1, 2. ¿Bin-utʼil ya skʼan ya jkʼopontik ta lek sok ya jnoptik ta lek te Biblia? Ala junuk ejemplo.

 NOPA AWAʼIY te ya akʼan ya aman jun na. ¿Bin ya skʼan ya anaʼ nailuk? ¿Tikʼnaxbal-a te ya awil jun foto yuʼun te na? ¿Mabal jichuk te ya skʼan ya xbajt awil te bin yilele? Yaniwan skʼan ya awil bin yilel ta spat pat, ta yutil, yilel te cuartoetik te yichʼoje sok spisil te bintik ay yuʼun te nae. Jaʼnix jich yaniwan akʼan ya awil te splanoil te bin-utʼil yichʼoj pasele. Yananix akʼan ya awil ta lek-a te bitʼil pasbil te nae.

² Jichnix ya skʼan ya jpastik kʼalal ya jkʼopontik sok ya jnoptik te Biblia. Jtul te machʼa ya yilbey skʼoplal te Biblia la spajaltay bitʼil jun «mukʼul na te toyol stsʼajkʼul sok te kʼubul ay te yiptajib». ¿Bin-utʼil ya xjuʼ ya jnaʼtik te bintik ya yal te Biblia? Teme animaltiknax ya jkʼopontike jaʼnax ya jnoptik te bintik kʼunik ta nopel, «te mantaliletik te kʼun ta nopel te chʼultesbil yuʼun te Diose» (Heb. 5:12). Jichnix te bitʼil ya jpastik ta swenta te na: yilel ta lek spisil te bintik yichʼoj. Yuʼun ya jnoptik te Biblia ya skʼan ya kiltik bin-utʼil stsakoj sba sok yantik versiculoetik. Ma jaʼuknax ya jnaʼtik te bin ya jchʼuuntik, jaʼnix jich ya skʼan ya jnaʼtik bin yuʼun ya jchʼuuntik.

3. ¿Bin la stijbey yoʼtan ta spasel te yermanotak te Pablo sok bin yuʼun? (Efesios 3:​14-19).

³ Yuʼun ya xkʼot ta koʼtantik te bin smakojbey skʼoplal te sKʼop Dios, ya skʼan ya jnoptik te bintik kʼubulik ay ta Biblia. Te jpuk-kʼop Pablo la yalbey te jchʼuunjeletik te akʼa snopik te sKʼop Dios sok spisil yoʼtanik yuʼun ya xkʼot ta yoʼtanik ta lek «te bin-utʼil ay te sjamalul, te snajtil, te stoyolil sok te skʼubulil» te smelelil kʼope. Yuʼun jich tsʼunbilik ta lek sok yichʼojuk yipik ta swenta te schʼuunel oʼtanil (kʼopona Efesios 3:​14-19). Jaʼnix jich ya skʼan ya jpastik-euk te joʼotike.  Jnoptik ta lek te bin ya yal te skʼop Dios sok te bintik smakojbey skʼoplal.

4. ¿Bin ya xjuʼ ya jpastik yuʼun ya xnoptsajotikxan ta stojol te Jehová? Ala cheʼoxebuk ejemplo.

⁴ Te j-abatotik yuʼun Dios, ma tikʼuk-a te ya jnoptik te bintik ma wokolukik ta nopel ta Biblia. Ya jkʼan ya jnoptik «te spʼijil yoʼtan te Dios te kʼax kʼubul aye» sok jaʼme ya xbajt skoltayotik te chʼul espíritu (1 Cor. 2:​9, 10). Kʼalal ya anop te Biblia ta atukel, ¿bin yuʼun maba ya awilbey skʼoplal te bin ya yakʼ xnoptsajatxan ta stojol te Jehová? Bayal bintik ya xjuʼ ya anop. Ya xjuʼ ya awilbey skʼoplal bin-utʼil la yakʼ ta ilel skʼuxul yoʼtan te Jehová ta stojol te j-abatetik yuʼun ta namey kʼinal sok bin-utʼil ya yakʼ ta ilel-abi te kʼuxat ta yoʼtan-euk. Ya xjuʼ ya anop te bin-utʼil la skʼan te ya x-ichʼot ta mukʼ te Jehová yuʼun te israeletik sok paja awil sok te bin-utʼil ya skʼan ya kichʼtik ta mukʼ ta ora ini. Jaʼnix jich ya xjuʼ ya anop ta skʼubulil te albilkʼopetik te la skʼotes ta pasel te Jesús kʼalal xtaluk ta Balumilal sok te kʼalal la schol skʼop Dios.

5. ¿Bintik temaetik te kʼubulik ay ta Biblia te ya akʼan ya anopxan?

⁵ Chaʼoxtul hermanoetik te ya smulanik snopel ta lek te Biblia la yichʼik jojkʼoybeyel te bin temail te kʼubulxan ay ya skʼan ya yilbeyikxan skʼoplal. Ta recuadro « Temaetik te ya xjuʼ ya anop ta atukel» tey ya xjuʼ ya ata cheʼoxeb temaetik te la yalike. Ya xjuʼ ya amulan snopel te temaetik ini sok te koltayel ya jtatik ta Índice de las publicaciones Watch Tower sok ta Sleojibal temaetik yuʼun sTestigotak Jehová. Teme jich ya apase, ya yakʼbey yichʼ yip te schʼuunel awoʼtan sok ya skoltayat ta snaʼbeyelxan sba Diose (Prov. 2:4, 5). Ta ora ini kiltik cheʼoxebuk te bin smelelil ya yal te Biblia te kʼubulik-xan aye.

6. 1) ¿Bin ya skʼan ya yal te ay bin ya jchaptik spasel sok te ay bin ya kakʼ ta koʼtantik spasele? 2) ¿Bin yuʼun ya kaltik te sbajtelkʼinal ay te skʼanojel yoʼtan te Jehová ta stojol te ants winiketik sok te Balumilale? (Efesios 3:11).

⁶ Jnop kaʼiytik ta swenta te skʼanojel yoʼtan te Jehová te ya yalbey skʼoplal te  Biblia. Ma pajaluk te ay bin ya jchaptik spasel sok te ay bin kakʼoj ta koʼtantik spasele. Te kʼalal ay bin ya jchaptik spasele, jich kʼoem bitʼil jun be te ya yikʼotik bael te ban ya jkʼan ya xkʼootik, pero teme ay bin ya smak te be-abi, maniwan xkʼootik te banti jchapojtik ya xkʼootike. Yan stukel teme kakʼojtikix ta koʼtantik spasele, ya xjuʼ ya jtsaktik yan be yuʼun ya xkʼootik ta lokʼel te banti ya jkʼantike. Te Jehová ay jun «skʼanojel yoʼtan te sbajtelkʼinal ay», sok ya kalbeytik wokol te kʼunkʼun yakʼoj jnaʼtik ta Biblia (Efes. 3:11). Lek ya xbajt lokʼuk yuʼun spisil, melel «ay scuentahil yuʼun Jehová spisil bintic spasoj» (Prov. 16:4). Spisil te bintik ya spas te Jehová ya xjalaj sbajtelkʼinal. Jaʼ yuʼun, ¿bin-a te skʼanojel yoʼtan te Jehová? Sok ¿bintik sjeltayoj yuʼun ya skʼotes ta pasel?

7. ¿Bin la sjelontes te Jehová yuʼun ya skʼotes ta pasel te skʼanojel yoʼtan kʼalal la skʼaxuntayik mantal te Adán sok te Eva? (Mateo 25:34).

⁷ Te Dios la yal bin-a te skʼanojel yoʼtan ta stojol te ants winiketik kʼalal jich la yal: «Sitinan soc pʼohla abahic, nojesahic ta swohlol te bahlumilal, soc tuhunahic te qʼuinale. Ajwalilat ya xcʼohat yuʼun […] spisil te chambahlametic te ya xbehenic ta lumqʼuinal» (Gén. 1:28). Kʼalal te Adán sok te Eva la skʼaxuntayik te mantal, la yotsesik te mulil ta balumilal pero ma jaʼuk makot yuʼun te Jehová yuʼun ya skʼotes ta pasel te skʼanojel yoʼtan. Lanax sjeltay te bin-utʼil ya skʼotes ta pasel. Oranax la snop te ya yakʼ jun Wentainel ta chʼulchan te ya skʼotes ta pasel te skʼanojel yoʼtan ta stojol te ants winiketik sok te Balumilal (kʼopona Mateo 25:34). La sta yorail te la yakʼ ta ilel skʼuxul yoʼtan te Jehová sok te la stikun talel te sNichʼan ta Balumilal. Te Jesús la yalbey skʼoplal te Wentainel ta stojol te ants winiketik sok la yakʼ te skuxlejal yuʼun libre ya xjilotik ta swenta te mulil sok te lajel. Ta patil chaʼkuxajtesot yuʼun ya xbajt ta chʼulchan sok ya x-och ta Ajwalil yuʼun te Wentainel yuʼun Dios. Pero bayalxan te bin ya skʼan ya jnopilantik ta swenta te skʼanojel yoʼtan te Dios.

8. 1) ¿Bin-a te mukʼ skʼoplal ya yal te Biblia? 2) Jich bitʼil ya yal Efesios 1:​8-11, ¿bin ya xbajt spasxan te Jehová? (Ilawil te dibujo ta yelaw te revista).

⁸ Te bin mukʼ skʼoplal ya yal te Biblia jaʼ te: ya schʼultes te sbiil te Jehová kʼalal ya skʼotes ta pasel te skʼanojel yoʼtan liʼ ta Balumilal ta swenta te Wentainel te ay ta swenta te Cristo. Maʼyuk bin ya xmakot yuʼun ya skʼotes ta pasel te skʼanojel yoʼtan te Jehová. Yananix skʼotes ta pasel-a te bin yaloje (Is. 46:​10, 11; Heb. 6:​17, 18). Ta patil bael ya xkʼatpʼuj ta nichimal kʼinal te Balumilal te banti ya xkuxin te stsʼumbal te Adán sok te Eva te kʼalal tojikix-a sok ya xkuxinik sbajtelkʼinal (Sal. 22:26). Ma jaʼuknax-abi: te skʼanojel yoʼtan te Jehová bayal bintik smakojbey skʼoplal. Ya xbajt yakʼ te jun-nax familia ya xkʼotik te machʼatik ayik ta chʼulchan sok ta Balumilal sok te ya xkʼot ta yoʼtanik te jaʼnax stukel Ajwalil te Jehová (kʼopona Efesios 1:​8-11). ¿Mabal jichuk te kʼax tʼujbil te bin-utʼil ya skʼotes ta pasel te skʼanojel yoʼtan te Jehová?

9. Te bitʼil ya jkʼopontik te Biblia, ¿jayebto ya jnaʼtik ta swenta te bin ya xkʼot ta pasel ta pajel chaʼbej?

⁹ Jnop kaʼiytik ta swenta te albilkʼop la yal te Jehová tey ta tsʼunbil kʼinal Edén, te ya xchiknaj ta Génesis 3:15. b Ya yalbey skʼoplal te bintik ya xkʼot ta pasel yuʼun ya skʼotes ta pasel te skʼanojel yoʼtan te Dios, pero yato xkʼax bayal jaʼbil. Jun te bin ya xkʼot ta pasel, jaʼ te stsʼumbal te ants, te Mesías, ya xchiknaj tal ta stsʼumbal Abrahán (Gén. 22:​15-18). Ta patil bael ta jaʼbil 33 te kʼalal talemix-a te Cristo, la yichʼ ejchentesel ta yit yok te Jesús, jich te  bin-utʼil albil skʼoplale (Hech. 3:​13-15). Yuʼun ya xkʼot ta pasel te slajibal parte yuʼun te albilkʼop sok te ya yichʼ tsʼoʼel ta tekʼel ta sjol te Satanás, kʼaxemtoxan ta jmil jaʼbil ya skʼan maliyel (Apoc. 20:​7-10). Pero te Biblia ya yal te bayal bin ya xkʼot ta pasel ta nailal te kʼalal ya xkʼot skʼajkʼalel te ma xyichʼix kontrainel yuʼun Satanás te organización yuʼun te Diose.

10. 1) ¿Bintik-a te nopolix ya xkʼot ta pasel? 2) ¿Bin-utʼil ya skʼan ya jchajpan jbatik? (Ilawil te nota).

¹⁰ Jultes ta koʼtantik te bin ya yal te Biblia te ya xkʼot ta pasel. Ta nailal, te nacionetik ya yalik: «¡lamalkʼinal sok maʼyuk bin chikan!» (1 Tes. 5:​2, 3). Te tulan wokolil «ta repentenax» ya xjajch kʼalal te nacionetik ya yochintayik te lotil religionetik (Apoc. 17:16). Bayalniwan bin ya xchiknaj ta ilel te kʼalal ya yilik «te sNichʼan te Winik te yak ta talel ta stokalil chʼulchan sok yuʼel sok bayal yutsilal» (Mat. 24:30). Te Jesús ya yichʼ ta kʼop spisil te ants winiketik sok parte ya yakʼ te machʼatik jich kʼoemik bitʼil tuminchij sok tentsunetik (Mat. 25:​31-33, 46). Pero te Satanás ya xjajch tulan yilinba sok ya stijbey yoʼtan te jtsojb nacionetik te Gog de Magog, yuʼun ya skontrain te lum yuʼun Jehová (Ezeq. 38:​2, 10, 11). Ya yichʼik ikʼel bael ta chʼulchan te machʼatik tsabilik, yuʼun ya sjokinik te Cristo sok te yantik chʼul-abatetik yuʼun ya yakʼik guerra ta Armagedón, te ya xbajt slajin ta jkʼaxel te tulan wokolil (Mat. 24:31; Apoc. 16:​14, 16). c Ta slajibal, ya xjajch te Wentainel yuʼun Cristo ta jmil jaʼbil liʼ ta Balumilal (Apoc. 20:6).

11. ¿Bin yaʼiyel ya awaʼiy aba yuʼun te ya xkuxinat ta sbajtelkʼinal? (Jaʼnix jich ilawil te dibujoetik).

¹¹ Kalbeytik skʼoplal te kʼalal kʼaxemix-a te bintik la kaltikixe. Te Biblia ya yal te Jpaswanej kuʼuntik yakʼojbey «ta yoʼtan te ants-winiquetic te bintic scuenta sbahtel qʼuinal» (Ecl. 3:11). ¿Bin ya yakʼbat anop te bitʼil ya xkʼot awamigoin aba sok te Jehová? Te libro Acerquémonos a Jehová, página 319, ay bin tʼujbil ya yalbey skʼoplal:  «Kʼalal kuxinemotikix bayal ta jmil jaʼbil-a, bayal ya xbajt jnaʼbeytikxan sba te Jehová. Manchukme jich, bayaltoxan te bin ya skʼan jnaʼtik ta swenta. […] Maniwan ya xtal ta koʼtantik te bintik ya xjuʼ ya jpastik ta Nichimal Kʼinal. Pero ta spisil te bintik ya xbajt jpastik tey-a, te bin tʼujbilxane, jaʼ te jujun kʼajkʼal ya xnoptsajotikxan ta stojol te Jehová». Te bitʼil jich yakotik ta smaliyel, ¿bintikxan temaetik ya xjuʼ ya kilbeytik skʼoplal ta sKʼop Dios?

12. ¿Bin-utʼil ya xjuʼ ya kiltik moel te chʼulchan? Ala junuk ejemplo.

¹² Te Biblia ya scholbey skʼoplal te bin yilel te yutsilal te Jehová (Is. 33:5). Te Biblia ya yal te bintik mukʼ skʼoplal ta swenta te Jehová sok te organización yuʼun ta chʼulchan (Is. 6:​1-4; Dan. 7:​9, 10; Apoc. 4:​1-6). Ya xjuʼ ya jkʼopontik ta swenta te bin la yil te Ezequiel kʼalal «la sjam sba te chʼulchan» sok jajch yil «nahalsitetic yuʼun Dios» (Ezeq. 1:1).

13. ¿Bin yaʼiyel ya awaʼiy aba yuʼun te kʼalal ya anop ta swenta te aʼtelil yak ta spasel te Jesús ta chʼulchan? (Hebreos 4:​14-16).

¹³ Jaʼnix jich jnoptik ta swenta te yaʼtel yichʼoj te Jesús ta chʼulchan jich bitʼil Ajwalil sok mukʼul Sacerdote. Ta swenta te Jesús, ya xjuʼ ya xnoptsajotik ta oración «ta stojol te smukʼul naktajib te Dios» sok te ya jkʼantik te ya snaʼ yoʼbolil jbatik «ta yorail te ya xtuun kuʼuntik te koltayel yuʼune» (kʼopona Hebreos 4:​14-16). Jujun kʼajkʼal akʼa jnoptik te bin ya spas sok te bin spasoj ta jtojoltik te Jehová sok te Jesús kʼalalto ta chʼulchan. Te skʼuxul yoʼtan ta jtojoltike, ya skʼan te yakuk stij koʼtantik yuʼun ya kichʼtikxan ta mukʼ te Jehová sok spisil koʼtantik (2 Cor. 5:​14, 15).

14. ¿Ala junuk bin-utʼil ya kakʼtik ta ilel te ya kaltik wokol ta stojol te Jehová sok te Jesús? (Jaʼnix jich ilawil te foto).

¹⁴ Jun te bin-utʼil ya kakʼtik ta ilel te ya  kaltik wokol ta stojol te Dios sok te sNichʼan, jaʼ te ya jpastik tulan ban kʼalal ya xjuʼ kuʼuntik ta skoltayel te ants winiketik yuʼun ya x-ochik ta testigo yuʼun Jehová sok ta jnopojeletik yuʼun Jesús (Mat. 28:​19, 20). Jich la yal wokol ta stojol Dios sok ta stojol Cristo te jpuk-kʼop Pablo. Snaʼoj te skʼanojel yoʼtan te Jehová jaʼ «te yakuk sta skolelik spisil te ants winiketike sok te yakuk xkʼot ta yoʼtanik ta lek te smelelil kʼope» (1 Tim. 2:​3, 4). Jaʼ yuʼun la spas tulan te ban kʼalal juʼ yuʼun ta scholel te skʼop Dios yuʼun «jich ay machʼatik ya sta skolelik» (1 Cor. 9:​22, 23).

15. Jich bitʼil ya yal Salmo 1:​2, ¿bin ya yakʼ stseʼelil koʼtantik?

¹⁵ Ma chajpuknax ya kiltik-a te machʼa la stsʼibay te salmo la yal te tseʼel yoʼtan sok lek ya xkʼot ta lokʼel te machʼa «ya smulan te ley yuʼun Jehová» sok te «cʼahcʼal ahcʼabal» ya skʼopon sok ya snopilan ta yoʼtan (Sal. 1:​1-3). Ta swenta te versiculoetik ini, jtul traductor yuʼun Biblia la yal te machʼa ya skʼopon te Biblia ya skʼan te «mero ya smulan te consejoetik yuʼun te Dios, te ya sle, te ya xkʼot ta yoʼtan sok te ya snopilan ta yoʼtan». Sok jich la yalxan: «Kʼalal maba ya xkʼot ta yoʼtan te bin ya skʼopone, jich ya yil te lanax schʼay te stiempo» (Studies in the Psalms, Joseph Rotherham). Jaʼnix jich te jaʼat yame amulan snopel te Biblia, teme ya apas tulan ta yilel spisil te bintik yichʼoj sok te bin smakojbey skʼoplale. ¡Kʼax ya jmulantik snopel te sKʼop te Dios ta spisil te bin smakojbey skʼoplale!

16. ¿Bin ya xbajt kilbeytik skʼoplal ta yan artículo?

¹⁶ Jpisiltik ya xjuʼ ya xkʼot ta koʼtantik te bin ya yakʼ jnoptik te Jehová ta Biblia. Ta yan artículo ya xbajt jnopbeytik skʼoplal junuk te bin kʼubul ya yakʼ ta nopel te Biblia: jaʼ te mukʼul templo yuʼun Jehová, te la yalbey skʼoplal ta carta te la stsʼibay te Pablo ta stojol te jchʼuunjel hebreoetik. Ya xbajt jmulantik yilbeyel skʼoplal te tema ini.