1-2. Come che te pol studiar la Bìblia dela maniera giusta? Parla de un esémpio.

 METEMO dir che te vol comprar una casa. Sarà che te ndarissi comprarla dopo de vardar sol un ritrato? Sicuro che nò! Prima de comprarla, te piaseria vardarla ben. Te volarissi ndar cognosser ben la casa, veder tuto quel che ghen’è rento, vardar quanto granda la ze e fin el progeto de come la ze stata fata su.

² Noantri ghemo de far la medèsima roba quando ledemo e studiemo la Bìblia. Un studioso el ga dito che la Parola de Dio la ze come ‘una costrussion tanto granda, alta e con una fondassion ben firme’. Alora, se ledemo la Bìblia svelti, saremo boni de capir sol “i insegnamenti bàsichi”. (Ebr. 5:12) Cossita, compagno farìssino par comprar una casa, ghemo de proar cognosser ben tuta la Bìblia. Ma come che te pol studiarla e cognoserla ben? Proa veder come che un versìcolo el te giuta a capir nantro e sforsarte par capir ben le verità dela Bìblia e parché che te pol creder in queste verità.

3. De acordo con Efesi 3:14-19, che consìlio el apòstolo Paolo el ga dato ai fradei, e parché?

³ Noantri sol saremo boni de cognosser ben la Bìblia se se sforsemo de studiar anca le verità pi fadiga de capir. El apòstolo Paolo el ga dito ai fradei de quel tempo che lori i gavaria  de leder la Parola de Dio par capir quanto “larga, longa, alta e fonda” la ze la verità. Cossita, lori i saria boni de ‘gaver le radise forte e de esser firmi’ nela fede. (Ledi Efesi 3:14-19. b) Noantri ghemo de far compagno a lori. Adesso, ndaremo veder come che podemo studiar la Bìblia par capir in grando quel che la dise.

4. Cossa che ne giutarà a esser pi amighi de Geovà? Parla de arquanti esempi.

⁴ Intanto che studiemo la Bìblia, no volemo mia sol imparar dele verità pi fàcile de capir. Invesse, volemo domandar el aiuto del spìrito santo par imparar anca dele verità che ne toca studiar de pi, parché le ne giutarà a esser pi amighi de Geovà. (1 Cor. 2:9, 10) Alora, cossa pénsito de studiar qualcossa che te giutarà a far pi forte la to amicìssia con lu? Par esémpio, varda come che Geovà el ga mostrà el so amor ai so servi del passà e come el mostra che el te ama. Proa anca studiar come che el pòpolo de Dio lo adorea nel passà e come lu el vol che lo adoremo ancoi. Anca sfòrsate par imparar dele professie sora Gesù che le ga sucedesto intanto che lu l’era qua nela Tera.

5. Cossa che te piaseria studiar de pi sora la Bìblia?

⁵ Arquanti fradei che i lede tanto la Bìblia i ga parlà de un per de robe che ghe piase studiar de pi. Te pol catar fora quel che i ga dito nel quadro “ Bele idee par studiar de pi”. Proa anca doperar el Índice das Publicações da Torre de Vigia o el Guia de Pesquisa para Testemunhas de Jeová. Cossita, te ndarè far pi forte la to fede e te ndarè cognosser ancora meio a Geovà. (Pro. 2:4, 5) Adesso, ndaremo veder arquante verità dela Bìblia che ne toca studiar de pi par capirle.

6. (a) Parla de un esémpio che mostra che Geovà l’è bon de far tuto quel che el vol. (b) Parché che podemo dir che la volontà de Geovà la ze eterna? (Efesi 3:11)

⁶ Ndemo veder quel che la Bìblia la dise sora la volontà de Geovà par el futuro. Par giutarne a capir, pensemo nte un esémpio. Quando ndemo far un viaio, noantri scoliemo sol una strada par rivar fin el posto che volemo. Se la strada la ze serada, ne toca fermar el viaio. Ma Geovà no l’è mia cossita. Lu el ga ben in mente el posto ndove lu el vol rivar, o sia, quel che el vol far nel futuro e el pol cambiar quel che ghe ocore. Geovà el ne ga contà la so ‘volontà eterna’ par meso dela Bìblia. (Efe. 3:11) E parché che podemo dir che la so volontà la ze eterna? Parché Geovà el ndarà far tuto quel che el ga prometesto e quel che el farà restarà par sempre. (Pro. 16:4) Ma cossa che lu el farà nel futuro e cossa che ghe ga tocà cambiar fin adesso?

7. De acordo con Mateo 25:34, come che Geovà el ga cambià quel che ghe ocorea par far la so volontà?

⁷ Geovà el ga dito a Adon e Eva quala che la era la so volontà: “Gàpie tanti fioi. Gavé de impienir la tera e gavé de esser paroni dela tera.” (Gén. 1:28) Ancora dopo che Adon e Eva i ga desobedio a Geovà e tuti i ze deventadi pecadori, la so volontà no la ga cambià. Invesse, lu el ga cambià quel che ghe ocorea par far la so volontà. Come? Pena dopo quel che ga sucedesto, lu el ga dito che el doperaria el so Regno par far tuto quel che el vol qua nela Tera. (Ledi Mateo 25:34. c) Dopo, Geovà el ga mandà el so Fiol par insegnar ale persone sora el so Regno e par dar la so vita come sacrifìssio. Alora, quando Gesù l’è stà ressussità e l’è tornà al cielo, lu l’è deventà el Rè del Regno de Dio. Ma podemo imparar altre robe sora quel che Geovà el vol far.

8. (a) Quala che la ze la roba pi importante che la Bìblia la parla? (b) De acordo con Efesi 1:8-11, quala che la ze volontà de Geovà? (Varda la ilustrassion dela prima pàgina.)

⁸ El nome de Geovà el sarà santificà quando el Regno de Dio farà la so volontà qua nela Tera. Cossita, la santificassion del nome de Geovà la ze la roba pi importante che la Bìblia la parla. Alora, sicuro che el ndarà far quel che ga in mente parché lu no’l càmbia la so volontà. (Isa. 46:10, 11; Ebr. 6:17, 18) Nel futuro, tuta la Tera la deventarà un paradiso e tuti quei che i vol obedir a Geovà i ‘viverà par sempre’. (Sal. 22:26) Ma Geovà anca el vol che tuti i so servi nel cielo e nela Tera i lo adore insieme. Cossita, tuti i sarà leai e i ndarà obedirlo. (Ledi Efesi 1:8-11. d) No te resti maraveià de veder come che Geovà l’è drio far quel che el vol?

9. Quanto del futuro semo boni de saver par meso dela Bìblia?

⁹ Pensaghe sora la professia che Geovà el ga fato nel giardin del Èden e che la ze scrita in Génesi 3:15. e Geovà el ga parlà de robe che sol ndaria suceder tanti ani dopo. Par esémpio, lu el ga dito a Abraon che el Cristo el vegnaria dela so fameia, ma che ghe meteria tanto tempo fin che lu el nassesse. (Gén. 22:15-18) E l’è  stà sol nel ano 33 che i ga fato mal al calcagno de Gesù, de acordo con quela professia. (Ati 3:13-15) Ma la testa de Sàtana sol la sarà schissada dopo del Governo de Mila Ani de Cristo. (Apo. 20:7-10) La Bìblia la parla de altre robe che le ndarà suceder intrà el mondo de Sàtana e la organisassion de Geovà.

10. (a) Che robe suito le ndarà suceder? (b) Cossa che te ghè de far par esser pronto? (Varda anca la nota.)

¹⁰ Adesso, pensa in arquante robe che la Bìblia la dise che ndarà suceder. Prima, le nassion le ndarà dir: “Vivemo in pace e sensa paura!” (1 Tes. 5:2, 3) Alora, de colpo, le nassion le vegnarà contra le religion false, e scominsiarà la granda tribolassion. (Apo. 17:16) Pol esser che ndaremo veder robe de gnanca creder quando ‘el Fiol del omo el ndarà vegner nela so glòria par spartir le piégore dele cavre’. (Mat. 24:30; 25:31-33, 46) Ancora cossita, Sàtana el ndarà doperar un grupo de nassion par ndar contra i servi de Dio. La Bìblia la dise che questo grupo de nassion ga nome Goghe de Magoghe. (Eze. 38:2, 10, 11) Alora, i untadi che ancora i ze nela Tera i sarà portadi al cielo par lotar insieme a Gesù e i so àngeli nela guera del Armagedon. f (Mat. 24:31; Apo. 16:14, 16) Dopo, el Regno de Dio el ndarà governar qua nela Tera par mila ani. — Apo. 20:6.

11. Come che te te senti quando te pensi che te ndarè viver par sempre? (Varda anca la ilustrassion.)

¹¹ Adesso, proa pensa come sarà la to vita dopo i Mila Ani. La Bìblia la dise che Geovà el ne ga fato “cola voia de viver par sempre”. (Ecl. 3:11) Cossita, pensa come che restarà la to amicìssia con Geovà. El libro Achegue-se a Jeová, nela pàgina 319, el dise: “Dopo viver sento, mila, milioni o fin bilioni de ani, saremo boni de cognosser tanto de pi sora Geovà. Ancora cossita, ghen sarà tante altre bele robe che gavaremo de imparar. La nostra vita la sarà pròpio bela, ma la roba pi importante sarà esser cada volta pi amighi de Geovà.” Ma intanto che spetemo che la nostra vita la sìpie cossita, cossa ancora podemo imparar quando studiemo la Bìblia?

12. Cossa che ne giuta a saver come che l’è el cielo? Parla de un esémpio.

¹² La Bìblia la parla tante robe maraveiose sora Geovà e sora la so organisassion nel cielo. (Isa. 6:1-4; Dan. 7:9, 10; Apo. 4:1-6) La Parola de Dio fin la ne dà una idea de come che saria esser davanti de Geovà. (Isa. 33:5) Par esémpio, podemo leder sora quel che el profeta Ezechiel el ga visto quando el cielo el se ga verto e Dio lo ga fato veder robe maraveiose. — Eze. 1:1.

13. Dopo leder Ebrei 4:14-16 , cossa te piase saver sora quel che Gesù l’è drio far del cielo?

¹³ Ghemo anca de pensarghe sora quel che Gesù l’è drio far del cielo come Rè e Somo Sasserdote. Par meso de lu, podemo pregar a Geovà par domandarghe perdon dei nostri pecati e aiuto quando ne ocore. (Ledi Ebrei 4:14-16. g) Alora, tuti i giorni ghemo de pensarghe sora quel che Geovà e Gesù i ze drio far par noantri del cielo. Se pensemo sora el grando amor che lori i ne mostra, ghe daremo tanto valor e volaremo far el nostro meio nel laoro a Geovà. — 2 Cor. 5:14, 15.

14. Come che podemo mostrar che ghe demo valor a quel che Geovà e Gesù i fà par noantri? (Varda anca la ilustrassion.)

¹⁴ Come che podemo mostrar che ghe demo valor a quel che Geovà e Gesù i fà par noantri? Ghemo de giutar tute le persone che podemo a deventar servi de Geovà e dissìpoli de Gesù. (Mat. 28:19, 20) Paolo el ga fato pròpio cossita par ringrassiar a Geovà e a Gesù. Come lu el savea che Geovà el volea che ‘tuti i tipi de persone le fusse salve e le gavesse la  cognossensa giusta dela verità’, lu el ga fato el so meio par giutar a tuti che eI podesse. — 1 Cor. 9:22, 23; 1 Tim. 2:3, 4.

15. De acordo Salmo 1:2, come che podemo esser felici?

¹⁵ El salmista el ga dito che una persona la pol esser felice se el so “piaser l’è nela lege de Geovà” e se ‘ela la lede in voce bassa di e note’. (Sal. 1:1-3) Un omo che el ga tradusio una Bìblia el ga dito sora questo testo: ‘Una persona che la ga tanto piaser de leder la orientassion de Dio la ze sempre premosa par studiarla, e la doperarà tanto del so tempo par pensarghe sora. Se la passa sol un giorno sensa leder e imparar dela so sabedoria, ghe par come un giorno butà via.’ Se te sì sempre premoso par leder la Bìblia, te volarè studiar anca i versìcoli che i ze pi fadiga de capir e doperarli par imparar sora altre parte dela Bìblia. Sicuro che l’è tanto bel studiar la Bìblia cossita!

16. Cossa che ndaremo imparar nel pròssimo stùdio?

¹⁶ Alora, noantri semo boni de capir tute le verità dela Bìblia. Nel pròssimo stùdio, ndaremo imparar sora el témpio spiritual de Geovà che Paolo el ga parlà nela so carta ai ebrei. Sicuro che te piaserà tanto imparar sora questo témpio!