1-2. Geeshsha Maxaafaa nabbabanawunne xannaˈanawu keehi loˈˈo ogee aybee? Leemisuwa yoota.

 NEENI issi keettaa shammanaakko woy agganaakko kuuyaydda deˈiyabadan qoppa. Kuuyanaappe kase neeni beˈana koyiyobay aybee? Keettaassi sintta baggaa xalla bessiya pootuwa beˈanawu koyay? Neeni keettay deˈiyosaa baanawu, qassi kareera hemettadanne so giddon deˈiya kifileta gelada ubbabaa loytta beˈanawu koyanaagee qoncce. Keettay waani keexettidaakko eriya uraara neeni haasayikko, hegee loˈˈo gidana danddayees. Neeni shammana keettaabaa darobaa eranawu koyanaagee qoncce.

² Nuuni Geeshsha Maxaafaa nabbabiyo wodenne xannaˈiyo wode, hegaadan oottana danddayoos. “Geeshsha Maxaafay keehi adussanne loytti baasi keexxido gita pooqe” mala gidiyogaa Geeshsha Maxaafaa eranchchay yootiis. Yaatin, Geeshsha Maxaafan deˈiyabaa loytti eranawu waatana danddayiyoo? Neeni eesuwan nabbabikko, “Xoossaa qaalaa koiro timirttiyaa” xalla akeekana danddayaasa. (Ibr. 5:12) Shin issi keettaabaa loytta eranawu so gelana koshshiyogaadan Geeshsha Maxaafaa loytta akeekanawu xannaˈana koshshees. Geeshsha Maxaafaa xannaˈanawu keehi loˈˈo ogee an deˈiya qofay issoy issuwara waani gayttiyakko akeekiyogaa. Neeni ammaniyobaanne hegee tuma gidiyogaa neeni ammananaadan oottida gaasuwa akeeka.

3. Kiitettida Phawuloosi ba mala Kiristtaaneti ay oottanaadan minttettidee, qassi aybissi? (Efisoona 3:14-19)

³ Xoossaa Qaalan deˈiya ubbabaa loytti akeekanawu ciimma gidida Geeshsha Maxaafaa tumaa tamaarana koshshees. Kiitettida  Phawuloosi ba ishanttinne michchontti tumay “ai keena aahokko, adussakko, xoqqakkonne ciimmakko” eranawu Xoossaa Qaalaa loytti xannaˈanaadan minttettiis. Yaatikko eti ammanuwan ‘xaphuwa yeddidi minnana.’ (Efisoona 3:14-19 nabbaba.) Nuunikka yaatana koshshees. Xoossaa Qaalan deˈiya ciimma eraa akeekanawu waati loytti xannaˈanaakko ane beˈoos.

4. Yihoowakko kaseegaappe aaruwan shiiqanawu waatana danddayiyoo? Leemisuwa yoota.

⁴ Nuuni Kiristtaane gidiyo gishshawu, Geeshsha Maxaafaa koyro timirttetuppe aadhdhiyabaa akeekana koyoos. Xoossaa geeshsha ayyaanay maaddin nuuni ‘Xoossaabaa haray atto geemettida yohuwaa’ erana koyoos. (1 Qor. 2:9, 10) Yihoowakko kaseegaappe aaruwan shiiqanawu halchchada loytta xannaˈana danddayaasa. Leemisuwawu, I beni wode deˈida ba ashkkarata siiqiyogaa waati bessidaakko, qassi hegee I nenakka siiqiyogaa waati bessiyakko pilggana danddayaasa. Hegaa bollikka, Israaˈeelati baassi ay ogiyan goynnanaadan koyidaakko xannaˈananne ha wodiyan nu awu goynnanaadan I koyiyo ogiyara hegaa geeddarssana danddayaasa. Woy qassi Yesuusi saˈan deˈiyo wode, ba deˈuwaninne haggaazuwan polido hiraagatubaa gujjada xannaˈana danddayaasa.

5. Neeni buzo xinaatiyan loytta pilggana koyiyobay deˈii?

⁵ Loytti pilggiyogaa dosiya amaridaageeti gujjidi xannaˈana koyiyo issi issibata yootidosona. Eti yootido amaridabaa “ Geeshsha Maxaafaa Loytti Xannaˈanawu Maaddiya Qofaa” giya saaxiniyan beˈana danddayaasa. Yihoowa Markkati Geeshsha Maxaafaa Xannaˈanawu Maaddiya Xuufiya (Amaarattuwa) goˈettada he huuphe yohota xannaˈiyogan keehi ufayttana danddayaasa. Geeshsha Maxaafaa loytta xannaˈiyogee ne ammanuwa minttananne neeni ‘Xoossaa loytta eranaadan’ maaddana. (Lee. 2:4, 5) Nuuni loytti xannaˈana danddayiyo ciimma gidida amarida Geeshsha Maxaafaa tumaa ane beˈoos.

6. (a) Yihoowa halchchoy ubbatoo polettiyoy aybissakko qonccissa. (b) Yihooway asawunne saˈawu halchchidobay “merinaa” halchcho gaana danddayiyoy aybissee? (Efisoona 3:11)

⁶ Leemisuwawu, Xoossaa halchchuwa xeelliyagan Geeshsha Maxaafay yootiyobaa ane beˈoos. Yihooway, baanawu koyiyo sohuwa efiya issi oge xalla dooriya asa mala gidenna. Shin he ogee gorddettikko eti yaa baana danddayokkona. Hegaappe dumma hanotan, Yihoowa halchchoy he sohuwa mala. I baana sohuwa kuuyikkonne yaa baanawu dumma dumma ogiya goˈettana danddayees. Yihooway ba “merinaa qofaa” woy halchchuwa Geeshsha Maxaafan loddan loddan qonccissidoogee ufayssiyaba. (Efi. 3:11.) Yihooway ba halchchuwa polanawu dumma dumma ogiya doorana danddayees, qassi I ‘ba halchchuwawu ubbabaa oottido gishshawu’ awudenne hegaa polees. (Lee. 16:4) Hegaa gishshawu Yihooway oottiyobay merinawu deˈees. Yihoowa halchchoy aybee, qassi hegaa polanawu I laammidobay aybee?

7. Addaamenne Hewaana Yihoowa bolli makkali simmin, Yihooway ba halchchuwa poliyo ogiya waati laammidee? (Maatiyoosa 25:34)

⁷ Xoossay ba halchchuwa Addaamessinne Hewaanissi yootiis. Eti ‘yelettanaadan, corattanaadan, ha saˈaa kumanaadaaninne haaranaadan, qassi saˈan paxa deˈiya mereta ubbaa haaranaadan’ halchchiis. (Doo. 1:28) Addaamenne Hewaana Yihoowa bolli makkalidi asay nagaranchcha gidanaadan oottidoogee Yihooway ba halchchuwa polennaadan diggibeenna. I ba halchchuwa poliyo ogiya laammiis. Daro takkennan, I saluwan Kawotettaa essiis, he kawotettay I asawunne saˈawu halchchido koyro halchchuwa polana. (Maatiyoosa 25:34 nabbaba.) He Kawotettaabaa asaa tamaarissanaadaaninne nagaraappenne hayquwappe nuna wozanawu ba deˈuwa immanaadan Yihooway ba keerido wodiyan ba bayra Naˈaa ha saˈaa kiittiis. Yaatidi saluwan Xoossaa Kawotettawu Kawo gidanaadan Yihooway Yesuusa hayquwappe denttiis. Shin Xoossaa halchchuwabaa tamaariyo harabaykka deˈees.

8. (a) Geeshsha Maxaafaa waanna qofay aybee? (b) Efisoona 1:8-11n qonccidaagaadan, Yihooway oottanawu halchchido harabay aybee? (Koyro sinttan deˈiya misiliya xeella.)

⁸ Geeshsha Maxaafaa waanna qofay Yihooway ha saˈawu halchchido halchchuwa Kiristtoosi haariyo Kawotettaa baggaara poliyogan ba sunttaa geeshshiyogaa. Yihoowa halchchoy laamettibeenna. I giidoogaadan ubbabay polettanaagaa qaalaa geliis. (Isi. 46:10, 11; Ibr. 6:17, 18) Guyyeppe, saˈay Addaamenne Hewaani zeretta gidida xillonne wottiyobi baynna asay “merinau” ufayttidi deˈiyo gannate gidana. (Maz. 22:26) Shin Yihooway poliyobay hegaa xalaala gidenna. Qassi I saluwaninne saˈan deˈiya ba ashkkarati ubbay issuwa gidanaadan halchchiis. Hegaappe guyyiyan, deˈuwan deˈiyageeti muleera Ubba Haariya Yihoowawu ammanettidi haarettana. (Efisoona 1:8-11 nabbaba.) Yihooway ba halchchuwa poliyo maalaalissiya ogiyan neeni garamettabeykkii?

9. Geeshsha Maxaafaa nabbabiyogan nuuni sinttanaabaa ay keenaa akeekana danddayiyoo?

⁹ Doomettaabaa 3:15n odettida, Yihooway Edene gannatiyan yootido hiraagaabaa ane beˈoos. b He hiraagay A halchchoy polettana  hanotaa yootees. Gidoppe attin, he hanotati daro shaˈu layttaappe simmin polettana. Leemisuwawu, Abrahaama zerettatuppe issoy daro yeletaappe guyyiyan Kiristtoosa gidanaagaa Xoossay Abrahaamawu yootiis. (Doo. 22:15-18) Kasetidi odettidoogaadan, 33 M.Ln, Yesuusa qirbbee dukettiis. (Oos. 3:13-15) He hiraagaa wurssetta gidida Seexaanaa huuphee qoxettiyogee 1,000​ppe dariya layttaappe guyyiyan polettana. (Ajj. 20:7-10) Qassi Seexaanaa alamiyanne Yihoowa dirijjitiya giddon deˈiya morkketettay keehi daranaagaa Geeshsha Maxaafay gujjidi yootees.

10. (a) Mata wode aybi hananee? (b) Nu qofaaninne nu wozanan waani giigettana danddayiyoo? (Tohossa qofaa xeella.)

¹⁰ Geeshsha Maxaafan kasetidi odettida daganttiya hanotata qoppa. Koyro, kawotettati “Ubbabai saro; aibikka hanenna” giidi awajjana. (1 Tas. 5:2, 3) Kawotettati worddo haymaanoote ubbaa xayssiyo wode “qoppennan” gita waaye doommana. (Ajj. 17:16) Hegaappe simmin, ‘asa Naˈay wolqqaaranne gita bonchchuwara saluwa shaara giddoora yiiddi’ maalaaliya hanotan beettana danddayees. (Maa. 24:30) Yesuusi dorssata deeshshatuppe shaakkiyogan asaa bolli pirddana. (Maa. 25:31-33, 46) Shin Seexaanay he wodekka Yihoowa eqettiyogaa aggenna. I Xoossaa asaa keehippe ixxiyo gishshawu, Geeshsha Maxaafay Maagooga biittan deˈiya Googa giyo issippe denddiya kawotettati Yihoowa asaa qohanaadan oottana. (Hiz. 38:2, 10, 11) He wode, tiyettidaageetuppe attidaageeti Kiristtoosaaranne saluwan deˈiya A olanchchatuura issippe gididi Armmageedoona olaa olettanawu saluwa baana, he olay gita waayiyawu wurssetta gidana. c (Maa. 24:31; Ajj. 16:14, 16) Hegaappe simmin, Kiristtoosa Shaˈu Layttaa Haaroy saˈan doommana.—Ajj. 20:6.

11. Merinawu deˈiyogee nena waati maaddii? (Misiliyakka xeella.)

¹¹ Sinttanaabaa ane gujjadakka qoppa. Nuna Medhdhidaagee ‘nu wozanan merinatettaa wottidoogaa’ Geeshsha Maxaafay yootees. (Era. 3:11) Hegee nenanne neeni Yihoowara dabbotido dabbotaa waati  maaddiyakko qoppa. Yihoowakko SHiiqa giya maxaafan sinttaa 319y hegaa ufayssiya ogiyan qonccissees: “Nuuni xeetan, shaˈan, miilooniyan, ubba qassi biilooniyan qoodettiya layttawu deˈi simmidikka, Xoossaa Yihoowabaa ha wodiyagaappe keehi darobaa erana. Shin he wodekka nuuni tamaarana koshshiya zawi baynna maalaalissiyabay deˈiyoogaa akeekana. . . . Merinaa deˈoy nuuni qoppana danddayiyoogaappe aaruwan nuna ufayssiyaaba gidana; qassi Yihoowakko ubbatoo shiiqiyoogee nuuni merinawu deˈiyo wode demmiyo aybippenne aadhdhiya anjjo.” He wodee gakkanaashin, Xoossaa Qaalaa xannaˈiyo wode harabaa ay pilggana danddayiyoo?

12. Nuuni saluwa pude waati xeellana danddayiyoo? Leemisuwa yoota.

¹² Yihooway deˈiyo ‘xoqqa’ sohoy ay milatiyakkonne Xoossaa Qaalay guuttabaa nuussi yootees. (Isi. 33:5) Geeshsha Maxaafay Yihoowanne A dirijjitiyawu saluwa baggaa xeelliyagan maalaalissiyabaa odees. (Isi. 6:1-4; Dane. 7:9, 10; Ajj. 4:1-6) Leemisuwawu, Hizqqeeli ‘saloti dooyettin, Xoossaa ajjuutaa beˈido’ wode akeekido maalaalissiyabata nuuni nabbabana danddayoos.—Hiz. 1:1.

13. Ibraawe 4:14-16n qonccidaagaadan, Yesuusi saluwan uttidi oottiyobaappe neeni nashshiyobay aybee?

¹³ Nu Kawoynne qarettiya Qeese Ubbatu Halaqay Yesuusi saluwan uttidi nuussi oottiiddi deˈiyobaakka qoppa. Nuuni A baggaara “aaro kehatettai de7iyoosaa Xoossaa araataakko” woosan shiiqidi “koshshiyo wode” maarotaanne maaduwa demmanawu oychchana danddayoos. (Ibraawe 4:14-16 nabbaba.) Yihoowaynne Yesuusi saluwan uttidi nuussi oottidobaanne oottiiddi deˈiyobaa ubba galla loytti qoppana koshshees. Eti nuna siiqiyo siiqoy nuuni Yihoowawu minnidi  haggaazanaadan denttettana koshshees.—2 Qor. 5:14, 15.

14. Yihoowanne Yesuusa nuuni galatana danddayiyo keehi loˈˈo ogetuppe issoy aybee? (Misiliyakka xeella.)

¹⁴ Harati Yihoowa Markkanne Yesuusi erissiyo ashkkara gidanaadan maaddanawu baaxetiyogee Xoossaanne A Naˈaa nuuni galatiyo keehi loˈˈo ogetuppe issuwa. (Maa. 28:19, 20) Kiitettida Phawuloosi Xoossaanne Kiristtoosa galatiyo gishshawu hegaadan oottiis. Yihoowa shenee “asai ubbai attanaadaaninne tumatettaa eranaadan” gidiyogaa I akeekiis. (1 Xim. 2:3, 4) “Ai ogiyaaninne amarida asata ashshanau” haggaazuwan I baassi danddayettida keenan daro asaa maaddanawu baaxetiis.—1 Qor. 9:22, 23.

15. Mazamure 1:2y yootiyogaadan, nuuni ufayttanaadan oottiyabay aybee?

¹⁵ Mazamurawee ufayttiyanne ubbabay awu haniyo uri ‘Yihoowa higgiyan ufayttiyogaanne A higgiya gallassinne qammi qoppiyogaa’ yootiis. (Maz. 1:1-3) Geeshsha Maxaafaa birshshiya issi bitanee ha xiqisetubaa yootiiddi, issi asi “Xoossaa kaaletuwa demmanawu keehi yeemottidi koyana, xannaˈananne daro wodiya bazzidi qoppana” koshshiyogaa yootiis. I gujjidikka, “issi uri Geeshsha Maxaafaa nabbabennan issi gallassay aadhdhikko, he gallassay coo hada aadhdhidoogaa” yootiis. Geeshsha Maxaafan deˈiya ubbabaa shaakka eranawu baaxetiyogaaninne an deˈiya qofay issoy issuwara waani gayttiyakko akeekiyogan xannaˈikko neeni ufayttana danddayaasa. Xoossaa Qaalan deˈiya ubbabaa loytti pilggiyogee keehi ufayssiyaba!

16. Kaalliya huuphe yohuwan nuuni ay beˈanee?

¹⁶ Yihooway nuna tamaarissido keehi loˈˈo gidida tumay akeekanawu deexxenna. Nuuni kaalliya huuphe yohuwan, Phawuloosi Ibraawe Kiristtaanetussi xaafido dabddaabbiyan qonccida, gita gidida Yihoowa ayyaana beeta maqidasiyabaa yootiya ciimma tumaa pilggana. Hegaa pilggiyogan neeni keehi ufayttanaagaa hidootoos.