1-2. Ano an pinakamaopay nga paagi ha pagbasa ngan pag-aram ha Biblia? Iilustrar.

 IMADYINA nga nagdidesisyon ka kon mapalit ka ba hin balay. Ano an karuyag mo makita antes ka magdesisyon? An piktyur la ba han prente han balay? Sigurado nga karuyag mo ito makita hin personal basi malibot ito, mainspeksyon an tagsa nga kwarto, ngan makita an ngatanan nga bahin hito. Bangin karuyag mo pa ngani kitaon an plano han balay basi mahibaroan kon paonan-o ito gintukod. Matin-aw, karuyag mo makita an tagsa nga detalye han balay nga karuyag mo paliton.

² Puydi liwat naton ito buhaton kon nagbabasa ngan nag-aaram kita han Biblia. Usa nga eskolar han Biblia an nagsiring nga an Biblia pariho hin “haluag nga bilding nga hitaas hinduro ngan may hilarom nga pundasyon.” Salit paonan-o kita magigin pamilyar ha ngatanan nga aada ha Biblia? Kon basta mo la ito nga babasahon, an nangunguna la nga mga kamatuoran an mahimo mo mahibaroan—an “basihan nga mga prinsipyo mahitungod han sagrado nga mga mensahe han Dios.” (Heb. 5:12) Pero sugad la nga kinahanglan mo “sumulod” ha balay basi mas mausisa ito, kinahanglan mo liwat usisahon hin maopay an Biblia basi mo mahibaroan an mga detalye hito. An usa han pinakamaopay nga paagi ha pag-aram han Biblia amo an paghibaro kon paonan-o an usa nga bahin hito konektado ha iba pa nga bahin. Paningkamot nga masabtan diri la kon ano an mga kamatuoran nga imo gintotoohan kondi kon kay ano liwat nga natoo ka hito.

3. Ano an igin-aghat ni apostol Pablo nga buhaton han iya mga igkasi-Kristiano, ngan kay ano? (Efeso 3:14-19)

³ Basi bug-os nga masabtan an ngatanan nga bahin han Pulong han Dios, kinahanglan mahibaroan naton an higlarom nga mga kamatuoran ha Biblia. Gin-aghat ni apostol Pablo an iya Kristiano nga kabugtoan nga maduruto nga adman an Pulong han Dios basi ‘masabtan nira hin bug-os an kahilapad ngan kahilaba ngan  kahitaas ngan kahilarom’ han kamatuoran. Ha pagbuhat hito mas ‘makakagamot hin marig-on’ an ira pagtoo. (Basaha an Efeso 3:14-19.) Ito liwat an kinahanglan naton buhaton. Kitaon ta kon paonan-o naton mauusisa an Pulong han Dios basi naton masabtan hin maopay an kahulogan hito.

4. Ano an mahimo naton buhaton basi magin mas duok kan Jehova? Paghatag hin mga ehemplo.

⁴ Sugad nga mga Kristiano, diri kita kontento nga mahibaroan an nangunguna la nga mga katutdoan han Biblia. Ha bulig han baraan nga espiritu han Dios, karuyag gud naton mahibaroan “bisan an higlarom nga mga butang han Dios.” (1 Cor. 2:9, 10) Puydi ka magkaada proyekto han personal nga pag-aram nga makakabulig nga magin mas duok ka kan Jehova. Pananglitan, puydi ka mag-research kon paonan-o niya iginpakita an iya gugma ha iya mga surugoon ha kadaan nga panahon ngan kon paonan-o niya ginpapamatud-an nga hinigugma ka liwat niya. O mahimo mo adman an kahikayan ni Jehova para ha pagsingba han Israel ngan ikompara ito ha kahikayan ni Jehova ha pagsingba yana. Ngan puydi mo liwat adman hin mas detalyado an mga tagna nga gintuman ni Jesus ha panahon han iya pagkinabuhi ngan ministeryo dinhi ha tuna.

5. May-ada ba topiko nga karuyag mo himoon nga proyekto para ha personal nga pag-aram?

⁵ Ginpakianhan an pipira nga maduruto nga estudyante han Biblia kon ano nga higlarom nga mga butang ha Pulong han Dios an karuyag nira adman hin personal. An pipira han ira baton makikita ha kahon nga “ Mga Topiko Para ha Proyekto han Personal nga Pag-aram.” Malilipay ka nga adman ito nga mga topiko ha bulig han Watch Tower Publications Index o han Tulong sa Pag-aaral ng mga Saksi ni Jehova. An detalyado nga pag-aram ha Biblia makakaparig-on han imo pagtoo ngan makakabulig ha imo nga ‘hiagian an kahibaro mahitungod ha Dios.’ (Prob. 2:4, 5) Hisgotan naton yana an pipira nga higlarom nga kamatuoran ha Biblia nga puydi naton adman hin detalyado.

6. (a) Ano an kaibahan han plano ngan han katuyoan? (b) Kay ano nga masisiring naton nga an katuyoan ni Jehova para ha mga tawo ngan ha tuna “waray kataposan”? (Efeso 3:11)

⁶ Tagda pananglitan kon ano an ginsisiring  han Biblia mahitungod ha katuyoan han Dios. May-ada daku nga kaibahan an plano ngan an katuyoan. An usa nga plano pariho hin espisipiko ngan amo gud la nga ruta tikadto ha imo destinasyon. Pero an plano mahimo mapakyas kon may nakakaulang ha dalan. An katuyoan naman nakapokus ha destinasyon. Maaram gud kita kon diin an aton destinasyon, pero puydi kita umagi ha iba-iba nga ruta basi makaabot dida hito. Puydi ito bag-uhon kon ginkikinahanglan. Maopay na la hinay-hinay nga iginpahayag ni Jehova ha Biblia an iya “waray kataposan nga katuyoan.” (Efe. 3:11.) Damu nga paagi an ginagamit ni Jehova ha pagpalampos han ngatanan nga butang para ha iya katuyoan. (Prob. 16:4) Ngan an mga resulta han mga ginbubuhat ni Jehova magpapadayon ha waray kataposan. Ano an katuyoan ni Jehova, ngan ano nga mga pagbag-o an iya ginhimo basi matuman ito?

7. Han nagrebelde an siyahan nga mga tawo, paonan-o ginbag-o ni Jehova an iya paagi ha pagtuman han iya katuyoan? (Mateo 25:34)

⁷ Iginsumat han Dios ha siyahan nga mga tawo an iya katuyoan para ha ira. Kinahanglan nira ‘manganak ngan magdamu, pun-on an tuna ngan kultibaron ito, ngan magkaada awtoridad ha tagsa nga buhi nga linarang’ ha tuna. (Gen. 1:28) Tungod kay nagrebelde hira Adan ngan Eva, an mga tawo nagin makasasala, bisan pa hito waray mapugngi hi Jehova ha pagtuman han iya katuyoan. Ginbag-o niya an paagi han pagtuman hito. Nagdesisyon dayon hiya nga mag-establisar hin Ginhadian ha langit nga magtutuman han iya orihinal nga katuyoan para ha mga tawo ngan ha tuna. (Basaha an Mateo 25:34.) Ha iya igintanda nga panahon, mahigugmaon nga ginsugo ni Jehova an iya suhag nga Anak nganhi ha tuna basi tutdoan an mga tawo mahitungod ha Ginhadian ngan basi ihatag an iya kinabuhi para lukaton kita tikang ha sala ngan kamatayon. Katapos, ginbanhaw hi Jesus ngan binalik ha langit basi magmando sugad nga Hadi ha Ginhadian han Dios. Pero may-ada pa kita mahibabaroan mahitungod ha katuyoan han Dios.

8. (a) Ano an tema han Biblia? (b) Sugad han mababasa ha Efeso 1:8-11, ano an nangunguna nga katuyoan ni Jehova? (Kitaa an piktyur ha kobre.)

⁸ An nangunguna nga tema han Biblia amo an pagbindikar han ngaran ni Jehova samtang iya gintutuman an iya katuyoan para ha tuna pinaagi han iya Ginhadian nga ginmamandoan han Kristo. An katuyoan ni Jehova diri mababag-o. Nagsaad hiya nga mahitatabo an ngatanan nga iya ginyakan. (Isa. 46:10, 11, ftn.; Heb. 6:17, 18) Maabot an panahon, an tuna magigin paraiso na, diin an perpekto ngan matadong nga mga tulin nira Adan ngan Eva magigin ‘malipayon ha kadayonan.’ (Sal. 22:26) Pero diri la ito an bubuhaton ni Jehova. An iya nangunguna nga katuyoan amo an pag-usahon an ngatanan niya nga intelihente nga linarang ha langit ngan ha tuna. Katapos, an ngatanan nga buhi maunungon nga magpapasakop ha iya sugad nga ira Soberano. (Basaha an Efeso 1:8-11.) Diri ka ba naiimpres han maopay nga paagi han pagtuman ni Jehova han iya katuyoan?

9. Pinaagi ha pagbasa han Biblia, ano an aton mahibabaroan mahitungod ha mahitatabo ha tiarabot?

⁹ Pansina an tagna nga ginyakan ni Jehova ha garden han Eden nga nakarekord ha Genesis 3:15. b Nagtutudlok ito ha mga panhitabo nga magtutuman han iya katuyoan, pero mahitatabo ito paglabay pa hin yinukot ka tuig. Upod hito an pagkaada tulin ni Abraham nga amo an pagtitikangan han Kristo. (Gen. 22:15-18) Katapos, han 33 C.E., ginsamad an tikod ni Jesus, sugad han igintagna. (Buh. 3:13-15) An ultimo  nga panhitabo hito nga tagna, an pagdugmok han ulo ni Satanas, mahitatabo sobra 1,000 ka tuig pa tikang yana. (Pah. 20:7-10) Ngan damu pa an iginsusumat han Biblia mahitungod ha mahitatabo samtang nagtitikahirani na matapos an away han sistema ni Satanas ngan han organisasyon ni Jehova.

10. (a) Ano nga mga panhitabo ha tiarabot an hirani na matuman? (b) Paonan-o naton maiaandam an aton hunahuna ngan kasingkasing? (Kitaa an footnote.)

¹⁰ Hunahunaa inin diri ordinaryo nga mga panhitabo nga igintagna han Biblia. Siyahan, an mga nasud magdideklara hin “kamurayawan ngan kasigurohan!” (1 Tes. 5:2, 3) An daku nga kasakitan magtitikang “dayon” kon atakehon na han mga nasud an ngatanan nga buwa nga relihiyon. (Pah. 17:16) Katapos hito, posible magkaada urusahon nga mga kiritaon han “Anak han tawo nga naabot nga aada ha bawbaw han mga dampog han langit nga may gahum ngan daku nga himaya.” (Mat. 24:30) Huhukman ni Jesus an mga tawo pinaagi ha pagbulag ha mga karnero tikang ha mga kanding. (Mat. 25:31-33, 46) Hito nga panahon, hi Satanas padayon nga magios ha pagkontra kan Jehova. Tungod han iya kangalas, aaghaton niya an alyansa han mga nasud nga gintatawag han Biblia nga Gog ha tuna han Magog basi atakehon an putli nga mga magsiringba ni Jehova. (Ezek. 38:2, 10, 11) Hito liwat nga panahon, an mga dinihogan nga aanhi pa ha tuna titirukon ha langit basi updan an Kristo ngan an iya langitnon nga kasundalohan para makig-away ha girra han Armagedon, an kataposan han daku nga kasakitan. c (Mat. 24:31; Pah. 16:14, 16) Katapos, magtitikang na an Usa ka Yukot ka Tuig nga Pagmando han Kristo ha bug-os nga tuna.—Pah. 20:6.

11. Ano an kapulsanan ha imo han paglaom nga kinabuhi nga waray kataposan? (Kitaa liwat an piktyur.)

¹¹ Yana, hunahunaa an mahitatabo katapos han 1,000 ka tuig. An Biblia nasiring nga iginbutang pa ngani han aton Maglalarang an kadayonan ha aton kasingkasing. (Ecles. 3:11) Hunahunaa an kapulsanan hito ha imo ngan ha imo relasyon kan Jehova. An libro nga Magin Duok kan Jehova, pahina 319, nag-uunabi hinin  makapainteres nga kamatuoran: “Katapos mabuhi hin ginatos, yinukot, minilyon, binilyon pa ngani ka mga tuig, damu pa gud an mahibabaroan naton mahitungod kan Jehova nga Dios kay ha aton hinbabaroan yana. Kondi aabaton pa gihapon naton nga damu pa hinduro an urusahon nga mga butang nga sadang mahibaroan. . . . Makuri gud mahanduraw an pagin makahuluganon ngan an pagkaada magkalainlain nga buruhaton han kinabuhi nga waray kataposan—ngan an pagin mas duok kan Jehova pirme nga magigin an pinakabirilhon nga bahin hito.” Pero ha pagkayana, samtang padayon naton nga gin-aadman an Pulong han Dios, ano pa an puydi naton usisahon?

12. Paonan-o kita mahimo humangad ha kalangitan? Paghatag hin ehemplo.

¹² An Pulong han Dios naghahatag ha aton hin ideya mahitungod ha presensya ni Jehova ha “kahitas-an.” (Isa. 33:5) An Biblia nagsusumat hin urusahon nga mga butang mahitungod kan Jehova ngan ha langitnon nga bahin han iya organisasyon. (Isa. 6:1-4; Dan. 7:9, 10; Pah. 4:1-6) Pananglitan, mababasa ta an mahitungod ha urusahon nga mga butang nga nakita ni Ezekiel han “an kalangitan naabrihan ngan nakakita [hiya] hin mga bisyon tikang ha Dios.”—Ezek. 1:1.

13. Ano an imo naruruyagan mahitungod ha papel ni Jesus ha langit, sugad han mababasa ha Hebreo 4:14-16?

¹³ Hunahunaa liwat an papel ni Jesus ha langit sugad nga aton nagmamando nga Hadi ngan mapinairon nga Hitaas nga Saserdote. Pinaagi ha iya, mahimo kita dumaop ha kanan Dios “trono han diri matupngan nga pagkabuotan” pinaagi han pag-ampo ngan maghangyo hin kalooy ngan bulig “ha husto nga panahon.” (Basaha an Hebreo 4:14-16.) Hinaot diri gud naton palabyon an usa ka adlaw nga diri ginhuhunahuna an ginbuhat ngan ginbubuhat pa ni Jehova ngan ni Jesus para ha aton tikang ha langit. An ira gugma kinahanglan makabantad  gud ha aton kasingkasing ngan magpagios ha aton nga magin madasigon ha aton pag-alagad ngan pagsingba.—2 Cor. 5:14, 15.

14. Ano an usa han pinakamaopay nga mahihimo naton basi maipakita nga gin-aapresyar gud naton hi Jehova ngan hi Jesus? (Kitaa liwat an mga piktyur.)

¹⁴ An usa han pinakamaopay nga paagi basi maipakita nga gin-aapresyar gud naton an aton Dios ngan an iya Anak amo an pangalimbasog nga buligan an iba nga magin mga Saksi ni Jehova ngan mga disipulo ni Jesus. (Mat. 28:19, 20) Ito an ginbuhat ni apostol Pablo basi ipakita an iya pagpasalamat ha Dios ngan ha Kristo. Maaram hiya nga kaburut-on ni Jehova nga “matalwas an ngatanan nga klase hin tawo ngan makadangat ha husto nga kahibaro han kamatuoran.” (1 Tim. 2:3, 4) Maduruto gud hiya ha ministeryo para mabuligan an mas damu nga tawo tubtob ha iya mahihimo ‘basi matalwas niya an iba ha anoman nga paagi kon posible.’—1 Cor. 9:22, 23.

15. Sumala ha Salmo 1:2, ano an makakapalipay ha aton?

¹⁵ Angayan la nga iginhulagway han salmista an malipayon ngan malampuson nga tawo sugad nga ‘nalilipay ha balaud ni Jehova’ ngan ‘namamalandong ha Iya balaud ha adlaw ngan gab-i.’ (Sal. 1:1-3; ftn.) An parahubad han Biblia nga hi Joseph Rotherham nagkomento mahitungod hini nga teksto ha iya libro nga Studies in the Psalms nga dapat “hingyapon gud han usa nga tawo an giya han Dios nga tungod hito bibilngon niya ito, aadman, ngan maggagahin hin hilawig nga panahon ha pagpamalandong hito.” Nagsiring liwat hiya nga “kon lumabay an usa ka adlaw nga an usa nga tawo waray magbasa hin Biblia, nakarag ito nga adlaw.” Malilipay ka ha pag-aram ha Biblia kon magigin interesado ka ha importante nga mga detalye hito ngan kon uusisahon mo an koneksyon hito ha kada tagsa. Makalilipay gud an pag-usisa han tagsa nga bahin han Pulong han Dios!

16. Ano an hihisgotan ta ha sunod nga artikulo?

¹⁶ An mag-opay nga kamatuoran nga igintututdo ha aton ni Jehova ha iya Pulong diri makuri masabtan. Ha sunod nga artikulo, hihisgotan ta an usa han mas higlarom nga mga kamatuoran—an daku nga espirituwal nga templo ni Jehova, nga iginhulagway ni Pablo ha iya surat ha Hebreo nga mga Kristiano. Hinaot an pag-usisa hito nga topiko maghatag ha imo hin daku nga kalipay.