1-2. Nal wusngam kawei ende karkar ere, Baibel ger duwom enamen? Yubol to.

 NIM gar kolnga ende topro sinal ne buro pisen. Nim nawal ende yero kane embe enal ne pisen? Gar ngimba mongse piksa si ngonambe kanal ne pisen mo? Ma, nim embe ne pisel, gar kulo oriro na tuwalto pel nalmal wei seim kanpol tonal ne pisel. Ala gar nalmal wei taujup kanpol tonal ne pisel eri. Nim gar taujup mal kanpol wei tondol kunum, topro sinal ne kapisel.

² Kenem Baibel gere duwom enamen kunum, wal embe ding mal enamen. Baibel sape pam ye ende Baibel e, “gar kerma wei ende akil panda mal sement erse mal mento wei pu tause epmin wei punjup bol ding mal panim.” Embe pam dal, Baibel yu porpor tuwal meim, kenem nalmal kanpol wei tonamen? Nim Baibel kamkam gerin dal, yu mem kerma kanpol narondol—“Embe pile, ende nim Baibel yu ala duwom er ngonambe yu mem kerma meim kanpol tondol.” (Hib. 5:12) Nim tuwal pu gar nalmal seim kanpol tonal ne enen mal, Baibel yu duwom mane ere yu “mem” kanpol tondol. Wusngam ende nim Baibel yu duwom kawei endel e, Baibel yu ende nesip ende bol nalmal konjanem tosi ding kerem mal kanjel. Kunum kunum ombol ere, yuwei duwom er kanen pilgi mongse ninal ne nandel, nalende pilgi don pra pilkane endel eri.

3. Aposol Pol Kristen nal eiya nim, ala nalende embe enam? (Efesus 3:​14-19)

³ Got Yuwom Baibel a meim kerma nalmal paim, olwal nalmal paim, ala nalmal pase min punom, na nalmal pase mene wonom. Baibel yu embe nekem meim kanpol tonamen ne pinjin dal, Baibel duwom er kanse mur pu, yu mem wei dingding ne kanpol tonamen. Aposol Pol Kristen angam ambam man nengo, enem Got Yuwom duwom mane er kanpol tonam panim. “E, kerma nalmal paim, olwal nalmal paim ala nalmal pase min punom na nalmal pase mene” wonom. Yuwei Baibel a meim  duwom mane er kanam panim. Embe enam bar pakero kelde, “akilgi ne pilgi dongal pande” yuwei ambilgi ninam. (Efesus 3:​14-19 gere.) Kristen angjen ambajen enjip mal, kenem pra ding mal enamen. Pi kenem nalmal ere, Got Yuwom Baibel a meim yu dingding ne mem kanpol tonamen mal duwom er kanamen.   

4. Kenem nawal pende ere se Johova bol mand punamen? Wal pende enamen mal yubol to.

⁴ Kenem Kristen meimen Baibel yu mem kerma apal mongse kanmen e, porne napisamen. Got murmulom dongal kenem pakerondo, yuwei Baibel a meim kenem “duwom er kanpol tonamen ne kapisamen.” (1 Kor. 2:​9, 10) Nimnem wal pende kurkane Baibel yu duwom pulnombol er kanse mur pu, se Johova bol mand pundol. Ende embe mal, Johova komna olom kongan ga nalmal kanka kanim mem tanim, duwom er kane nem pra kanka kanem eri nepisel. Ala komna Israil ga, Johova lotu erngonam ne wusngam erkun erim na, yipe Kristen meim olom lotu erngonam ne wusngam erkun enem, ding mal paim mo napaim omukro kanjel. Mo Baibel yu propet omblombol pende mom, Jises ya mala wo Baibel yu kel wanim kunum, mongom tom mal mane ne omukro kanpol tondol.

5. Nenem Baibel yu duwom endel bar, yu pengem ende mane omukro kanpol tonal ne pisen mo?

⁵ Baibel yu mane neori duwom er kanpol tonam ne pinjip ga, ende ki si enem nal yu dongal pende Baibel a meim, mane duwom er kanpol tonam ne pisima ninjip. Ki pundom ngonjup mal boks a meim. Kenem kenem Baibel yu pende duwom erse mur punamen yu pengem kenjip meim. Ga pende ki pundom ngonjup mal boks a kangem, “ Yu Pengem Ende Nenem Mane Duwom er Kanjel Pane Paim bar Meim.” Nim yu pengem embe mal meim mane duwom er kanjel bar kawei pisel. Ala Watch Tower Publications Index mo the Research Guide for Jehovah’s Witnesses, pane paim buk tal nim pakeronambel. Nim Baibel yu dongal meim duwom mane er kanjel, pakerondo pilgi wo dongal punda, “ala Got ye nalmal e kanpol tondol.”  (Prov. 2:​4, 5) Pi kenem Baibel yuwei dongal pende meim omukro kanamen.

6. (a) Wal enal ne buro pisen na nalmem pande embe enal ne pisen, nalmal ding mal napaimbel? (b) Johova ya mala wal enal panim na, alamb bol enal panim wal nalernge kombe buro pim wal paninamen? (Efesus 3:11)   

⁶ Got wal pende enal pane Baibel a nekem meim, omukro kanamen. Wal enal ne buro pisen na nalmem pande embe enal ne pisen, yu mem jeljel paimbel mal omukro kanamen. Wal enal ne buro pisen panimen e, nim wusngam ende punal ne kapisen wusngam kun puori punon e pildom. Ba, wusngam tambem wal ende kol tungum dal, pundol ne punon bar puori napundol. Enal ne pisen wal panimen e, wusngam ende punal nepisen wusngam puori punon e pildom. Embe ding mal, kenem nal wusngam karkar ere ele punamen kenem kanpol tomon, ba wusngam jeljel karkar ere ele ori punamen kaple enem eri. Embe pile, wusngam ende kol panim dal, wusngam ende karkar er pundol eri. Kenem sangiyo wei ninamen nalenem, Johova kombe kenem alamb bol “enal nepim wal “Baibel wusngama yu ipal ipal ne neori kerem. (Efesus 3:11 Stadi not paim kanjel eri.) Johova enal ne kapim wal, wusngam kanem kanem karkar ere er kaple ere erim.” (Prov. 16:4) Johova nawal ende enal ne kapisem wal enem kunum kunum sepunda. Johova nawal pende enal ne kapisem na, nawal pende ere enal nepisem wal erkelde min wonda?

7. Adam na Iv Johova yu to kenjil kunum, olom nal wusngam pende karkar ere enal ne kapim wal, er kaple erim? (Matyu 25:34)

⁷ Got nalmem pange Adam na Iv enjel ersem mal nengom. Elep mulngal ere, pu mal pelpel mol kaple ere wal pelpel meim kantawol eiyala nim. Adam na Iv Johova yu to kele sin enjel kunum, alamb poro sin pam pile Johova kapim wal min nawom. Ba olom wusngam ende karkar ere, enal nepim wal er kaple erim. (Stt. 1:28) Komna wei olom wal ende enal ne kapim e, Gapman ende min epen simene kelde, ya mala alamb pel kantawol enda ne kapim. (Matyu 25:34 gere.) Johova enge er sem kunum kun min wom kunum, olom kanka wei kanim Ngangnem komna kelnge ya mala wo, Got Kingdom yu ne alamb ngo, ala olom kolmem ngo golo, kenem sin wakro sikem. Bulto olom ala akle se epen yem pu, Got Gapmana kongan King enem. Embe paim ba, Got kenem bol enal nepim wal puli wei meim duwom mane er kanamen.

8. (a) Baibel yu mem kerma nal yu paim? (b) Efesus 1:​8-11 dom, Johova nawal ende enal ne kapisem? (Garwom oriro ngimba piksa kane.)

⁸ Baibel yu kerma dom Johova olom Gapman mo, Kingdom Ngangnem Krais Jises kantawol enda bar, olom wal porpor ya mala enal nepisem wal er kaple ere, ala olom kangem erka enda. Johova enal nepisem wal weieri min wonda. Olom yu dongal dom, enal ne kapisem wal porpor min wonda. (Ais. 46:​10, 11, ftns.; Hib. 6:​17, 18) Kunum apal pende wo pundo, mal pel wose paradais punda. Ala Adam na Iv tal ngal kopajel man, sin nganja napande “kawei kunum kunum” mol punam. (Sng. 22:26) Wal e mongse ma, Johova wal pende enda eri. Olom konganem ga min epen na ya mala meim, erkelde kumbol ding wei moram. Ala ga porpor min epen na ya mala, Johova kongan Pengem enda bar molmene kele, olomYuwom karkar enam. (Efesus 1:​8-11 gere.) Johova wusngam kawei karkar ere, wal enal padom wal er kaple wei enda bar, nim kawei wei pisen mo?

9. Baibel gernamen bar, wal mibulto min wonda nalmal kanpol tonamen?

⁹ Kulu Iden sembar wal ende min wonda pane Johova yu propet nim, Stat 3:15 a paim omukro  kanamen. b Yu ele nim bar, wal olom kapim min wonda mal nim, ba wamnam nawonda, kongar tausen puli bulto min wonda pam. Wal ende, Johova Abram nengom olom ngal kopam man mol wonam bar, bulto Krais Jises min wonda panim. (Stt. 22:​15-18) Ala yu propet pam mal, kongar 33 C.E. kunum, keru Jises simb kokum e, olom to gonjup. (Apo. 3:​13-15) Ala yu propet ne pornim bar, Jises Seten pengem kambsa pane pakim, olom kongan King ende kongar 1000 porninda kunum bulto, Seten pengem kambsa. (Rev. 20:​7-10) Ala wal pende min wonda mal Baibel ne penem kerem e, Seten yipe mal tawol ere Johova okanaiseisen bol opyem keswei enem, Johova toporo nesikera mal dom eri.

10. (a) Nawal pende min wonda mand wei enem? (b)  Kenem nalmal ere, kumbol na bunuman erkun er moramen? (Putnot yu pra kane)

¹⁰ Wal jelmal wei pende, ya mala min wonda pane Baibel dom buro pile. Yero mala alamb porpor embe ninam, “yipe kunum kawei sem kumbol amin moramen paninam!” (1 Tes. 5:​2, 3) Embe ninam kunum “wamnam,” gapman er molo lotu gend porpor tondo, ombun kerma pulnombol min wonda. (Rev. 17:16) Bulto, wal jel mal ende min wonda e, “alamb kanam ye Ngalem min kupua kangem kerma pande, ala dongal wei pande yem wonda.” (Mat. 24:30) Kunum ele Jises alamb kot erngonda, sipsip siyem kele meme siyem kera. (Mat. 25:​31-33, 46) Ala kunum ele, Seten Got alambem man erkes enal ne meim, anjngo enda. Seten kumbol keswei si erkelde, kantri porpor woseding pu, Johova lotu wei erngom alamb tonam ne enam enjep kangjep, Baibel kulu Magok Gok pandom. (Ese. 38:​2, 10, 11) Ala Got oiro sim ga remnen se min epen pu, Krais Jises na min epen meim ga bol kolngo, Got nganmal kerma Amagedon simin keram e, bol wulom enam nganmal. c (Mat. 24:31; Rev. 16:​14, 16) Embe enam kunum bulto, Jises Krais Kongar Wan Tausen mal tawol enda kunum pulnombora.—Rev. 20:6.

11. Kolmem si aimanj aimanj mol punamen panimen, nim nal nepisen? (Piksa pra kane.)

 ¹¹ Kongar 1000-porninde bulto, aimanj aimanj mol punamen mal pile. Baibel dom, kenem Ersem Ye, “kol aimanj aimanj mol punamen bunuman [kenem] kumbola” kem paim padom. (Ekl. 3:11) Kenem aimanj aimanj monjin dal, Johova bol senomon mem nalmal panda pile. Buk Go Kolstu Long Jehova pes 319, kenem kapisamen yu ende embe dom: “Kenem kongar andet puli, tausen puli, millien puli, mo billien puli wei moramen kunum, Johova ye nalmal yipe duwom er kanmen ma, kunum ele Johova Got kanpol weironamen. Johova bol wal puli kes duwom er kanamen wal moram eri. . . . Ala paradais senda bar, kenem aimanj aimanj moramen mal bunuman topisamen kaple wei nanda—ala wal kawei ende, kunum kunum se Danjen Johova bol mand wei punamen.” Kenem yipe Got Yuwom Baibel a meim anjngo duwom enjin dal, nawal pende pilkane enamen?

12. Nim nalmal ere kanmin epen wei kel kanjel? Embe enamen mal yubol to.

¹² Got Yuwom Baibel a meim, “Johova komb epne wei meim” pane yu apal pende neori kere pilkane esmen. (Ais. 33:5) Ala Baibel Johova okanaiseisen aiyem min epen jel mal wei sem mal, neori kerem eri. (Ais. 6:​1-4; Dan. 7:​9, 10; Rev. 4:​1-6) Ende embe mal, Esikel wal jel mal wei ende kanim, kenem Baibel germen bar pilkane esmen, “[olom] kanim epen apis kelnge Got min epen mom wurkumbanj mal kanim.”—Ese. 1:1.

13. Hibru 4:​14-16, Jises min epen kongan er meim padom, nal kongan ende enem bar nim kapisen?

¹³ Jises min epen kongan King na Ai Pris, kenem wandil si wei pilngo enem mal pile. Olom wusngama kenem se “Got, pake kerma ronom mambnem paim ye sia King sembar mand punamen.” “Kunum kun” yane wusngama olom ki si, kin wandil si pakera ninamen. (Hibru 4: 14-16 gere.) Kunum dingding ne Johova na Jises kenem bol wal pende enjil na, pi min epen er meibel mal buro pisamen. Enjel kanka mem kenem bol tanibel kumbola wei pile, enjel konganjel kumbol ngo ere, Johova lotu er ngonamen.—2 Kor. 5:​14, 15.

14. Kenem Johova na Jises kankawei kanmen, nal wusngam kawei ende taninamen? (Piksa meim pra kane.)

¹⁴ Wusngam kawei ende kenem Johova na Ngangem Jises kanka kanmen mem taninamen e, alamb pakero kelpe wo Johova Witnis molo, Jises disaipol ende moram ne enamen. (Mat. 28:​19, 20) Aposol Pol, Got na Jises Krais kanka kanim mem, erkelnge kongan embe mal erim. Olom pilkane erim, Johova kapim “alamb porpor yuwei sape dulto sinambe, enjep siyem ninal nepim.” (1 Tim. 2:​3, 4) Embe pile, olom Baibel yu neori kem kongan ombol wei ere, alamb puli pakeronal ne erim. Pol embe nim, “na wusngam porpor karkar ere alamb pende siyem ninal ne erind.”—1 Kor. 9:​22, 23.

15. Buk Song 1:2 dom, nawal erkelde kenem kapile moramen?

¹⁵ Buk Song bom ye, alamb ende wal porpor ende woka pundo kapile moral nepim dal, “Johova Lo kanka kane” “Lo aiyem emilpal na tangaling buro pisa” panim. (Sng. 1:​1-3; ftn.) Buk Baibel yu akrom ye Josep Rotaam, Baibel wes e pam kane olom Buk Studies in the Psalms, pane bom bar embe nim, “alamb ende Got Yuwom olom kolta ne tawol ende nepim dal, Got Yuwom meim kurkane duwom ka ere, kunum kunum buro pisa.” Olom yu pende embe, “kunum ende ei mal pundo, alamb ende Baibel nagere bunuman ka ngonda meim nasim dal,” kunum e, konganem kananem. Nim Baibel yu duwom endel bar, yu kerma kawei pende meim kanpol tondol, ala yu ende ne sip ende bol konjanem to siding kerem kanjel bar kawei pisel. Embe pile, kerma nalmal paim, olwal nalmal paim, ala nalmal pase min punom na nalmal pase mene wonom, Got Yuwom Baibel a meim mane omukro kanjel!

16. Yu duwom miro enamen bar, nawal pende omukro kanamen?

¹⁶ Got Yuwom yuwei kawei Baibel a meim, kenem pilsinamen ne duwom erngonom, pisamen kaple enem. Yu duwom miro enamen bar, yuwei ombolombol ende duwom enamen—e, Pol pepe bol Ibru Kristen ga ngo, Johova tempol spirit kerma panim omukro kanamen. Yu ombolombol embe omukro kanjel kunum, nim kawei wei pisel.