1, 2. მუჭო ოკო იბკითხათ დო გიმიბრკვიათ ბიბლია? ქიმიჸონით მაგალით.

 ᲬᲔᲠᲛᲘᲓᲒᲘᲜᲘᲗ, ნამდა ჸუდეშ ჸიდირ გინოჭყვიდით. ჸიდირშახ ქიმურთ დო თქვან თოლით ქოძირუნთო თის, დოვარ ხვალე სურათის გეჯერდუთ? მუშო ოკო რაგად, თე გადაწყვეტილებაშ მეღებაშახ ქიმურთ თი ჸუდეშ მათოლიერებშა, ირფელს კილ-კილშა ქოძირუნთ დო მუჭოთ გალე, თეშ დინახალე ხოლო დილენთ თექიანობას. ალბათ თი პიროვნებაწკუმა ჩიებას ხოლო მიკორინუანთ, მიდგას ჯგირო უჩქჷ, მუჭო იჸუ შენებულქ თე ჸუდექ. ბუნებრივ რე, ჸუდეშ ჸიდირშახ გოკოდან, თიშ არძა კუნთხუ კილ-კილშა დილათ.

² მუჭო შემლებნა თე მაგალით ბიბლიაშ კითხირს დო გიმორკვიებას დუკავშირათ? ართ მარკვიებელქ ბიბლია მაღალ დო დიდ შენობას შეადარ, ნამუთ ძალიერ საძირკველშა რე შენებულ. ბიბლიას გინორულაფირო წებკითხენთ-და, ხვალე თიშ „საფუძველეფს“, თაშ ქოფთქუათინ, ძირითად საკითხეფს გებგენთ (ებრ. 5:12). მარა თიშ ინონჭაფა ქუმოკონან-და, კითხირიშ დროს საჭირო რე, დევეკვირათ დეტალეფს, მუჭოთ თეს ჸუდეშ ჸიდირიშ დროს გუვაკეთენდით. მუ მიმეხვარებნა, ქინვანჭათ ღორონთიშ სიტყვაშ სიტომბეეფს? გიმორკვიებაშ დროს ოკო ვეცადათ, ქობძირათ, მუჭო რე დაკავშირებულ ბიბლიაშ შხვადოშხვა მონაკვეთეფ ართიანწკუმა. თეს გეძინელ, ჯგირ იჸუაფ, დეფიფქრათ მუ ბწანა დო მუშენ.

3. მუშ კეთება ელუჩ პავლე მოციქულქ თანაქრისტიანეფს დო მუშენ? (ეფეს. 3:14—19).

³ ღორონთიშ სიტყვაშ სიტომბეეფს სრულას ქინვანჭათინ თიშო საჭირო რე, გეგმიბრკვიათ ტომბა ბიბლიურ საკითხეფ.  მოციქულ პავლექ თანაქრისტიანეფს ელუჩ, გურგედვალირო გეგმირკვისკო ღორონთიშ სიტყვა, ნამდა შეიალებუესკო ბოლოშა ქინანჭესკო ჭეშმარიტებაშ „სიგანეს, სიგინძას, სიმაღალეს დო სიტომბეს“. შედეგო, თინეფიშ რწმენას ჩხვიჩხვეფ უმოს მტკიცას აჸიდ გოდგუმილ დო ძალიერ საძირკველშა იჸუაფუდ გერსხილ (წეკითხით ეფესოელეფიშ 3:14—19). ჩქი ხოლო თე ქრისტიანეფცალო ოკო მიფქცუათ. მორთ გუვარჩუათ, მუჭო შემლებნა ინვანჭათ ღორონთიშ სიტყვაშ სიტომბეეფს დო უმოს დეტალურო გიმიბრკვიათ თინა.

4. მუ ოკო ვაკეთათ, ნამდა უმოსო დევეახლოვათ იეჰოვას? ქიმიჸონით მაგალითეფ.

⁴ ქრისტიანეფ ხვალე ძირითად ბიბლიურ საკითხეფიშ რჩქინას ვეგებჯერდუთ. მოკონა, ტომბა ბიბლიურ საკითხეფს ხოლო ქინვანჭათ, მუდგას ღორონთიშ წმინდა შურ მიმეხვარებნა (1 კორ. 2:9, 10). შეილებნა პირად გურაფას ქინახუნუათ თიცალ საკითხეფ, მუთ ხოლო უმოსო დუგაახლოვენა იეჰოვაწკუმა. მაგალთო, შეილებნა ქიდეკვირათ, მუჭო გიმირჩქინანდჷ თინა ჸოროფას ჯვეშ დროს მახორუ მუშ მსახურეფიშ მიმართ დო მუჭო ამტკიცენს თენა, ნამდა თქვა ხოლო მანგარო უჸორთ. შეილებნა თინა ხოლო გეგმირკვიათ, მუნერ თაყვანიშცემას ითხინდჷ ღორონთ ისრაელეფშე დო ქეშუდარათ თის, ამდღა მუნერ თაყვანიშცემას ითხინს ჩქინდე. თეს გეძინელ, შეილებნა უმოს დეტალურო გეგმირკვიათ, მუჭო შისრულ იესოშე რაგადებულ წინასწარმეტყველებეფქ თიშ დედამიწას ცხოვრებაშ დო მსახურებაშ დროს.

5. ნამ საკითხიშ გიმორკვიება გოინტერესნა?

⁵ ნამთინე და დო ჯიმა, მით გურგედვალირო ირკვიენს ბიბლიას, მიშინუანს, ნამ საკითხეფიშ გიმორკვიება ოკო უმოს დეტალურო. თინეფიშ ძირაფა შეილებნა ჩარჩოს  „საკითხეფ პირად გურაფაშო“. თქვა ხოლო თე ჩარჩოს მოჩამილ ვარდა შხვა საკითხეფიშ გიმორკვიება ქუგოკონან-და, შეილებნა გეგმირინუათ „გინაჯინალ კოშკიშ პუბლიკაციეფიშ საძიებელ“ ვარდა „იეჰოვაშ მოწმეეფიშ ორკვიებელ სახემძღვანელო“. ბიბლიაშ უმოს ტომბაშო გიმორკვიება მოიღანა ხიოლს, გაიმანგარენა რწმენას დო მიგეხვარებნა, მიღათ რჩქინა ღორონთიშ გურშენ (იგავ. 2:4, 5). მორთ გუვარჩუათ ნამთინე საკითხ, ნამდგაშ დეტალურო გიმორკვიება შეილებნა.

6. ა) მუ მარწმუნენა, ნამდა იეჰოვაშ განზრახვა აუცილებერო შისრულებ? ბ) მუ გაგებათ რე თე განზრახვა „მარადიულ“?

⁶ ბიბლიაშე ბგებულენთ, ნამდა იეჰოვას უღჷ განზრახვა, ნამუთ ვეგემტყუნებ დო მუდგაქ ვა მოხვადასინ, აუცილებერო შისრულებ. მუ მარწმუნენა თეშა? თის მუშ მიზანიშ მიოჭირნაფალო ხვალე ართ კონკრეტულ გეგმა ვა უღჷ დო მუდგაინ დაბრკოლებას ქეშეხვად-და, უხუჯანს სიტუაციას. თენა ნიშნენს, ნამდა შეულებ გეგმა დოთირუას დო მიოჭირინუას მუშ მიზანს, მუშენდა „ირფელს თიშო ორთჷ, ნამდა მუშ განზრახვა შეასრულას“ (იგავ. 16:4). ბიბლიაშე თის ხოლო ბგებულენთ, ნამდა იეჰოვაშ თე განზრახვა „მარადიულ“ რე დო თის ჭიე-ჭიეთ აარგამენს (ეფეს. 3:11). თე განზრახვა მარადიულ თიშენ რე, ნამდა იეჰოვაქ დუშვჷ, თიშ სრულას შესრულებაშახ დიდ დროს გამკურთუმუდუკო. თეს გეძინელ, შედეგეფ, ნამუთ თე განზრახვაშ შესრულებას მაჸუნუ, მარადიულ ჯგირობუას მიღანს. მორთ ქიგებგათ, მუ მიშურს იეჰოვაშ მარადიულ განზრახვაშა დო მუ ცვლილებეფ აკეთ თიშ მიოჭირნაფალო.

7. მუჭო თირუ იეჰოვაქ გეგმა მუშ განზრახვაშ შეიოსრულებერო? (მათ. 25:34).

⁷ იეჰოვაქ ადამ დო ევას ქუგაგებაფუ, მუ განზრახვა უღუდ თინეფწკუმა დაკავშირებით დო უწუ: „ინაყოფიერით, გემრავლით, გეიოფშით დედამიწა, ქემინჯით თის დო თქვა გომორჩილდან . . . არძა ცოცხალ არსება დედამიწას“ (დაბ. 1:28). სანარღოთ, ადამ დო ევაქ ვედემორჩილეს ღორონთის, მუდგაშ გურშენ თინეფიშ მთელ გამნარყიქ ცოდაშ მონათ გინირთჷ. მარა, თეს ვა უცილებ იეჰოვაშა, ნამდა შეასრულკო კაცობრიობა დო დედამიწაწკუმა დაკავშირებულ მუშ დუდშეიან განზრახვა დო თე მიზანიშ მიოჭირნაფალო შხვა შარა დოგორ. თიქ მუშ განზრახვაშ შეიოსრულებერო ხეთეშე გეგნოჭყვიდ, ზეცას სამეფო დაარსუკო (წეკითხით მათეშ 25:34). იეჰოვაქ, მერჩქინელ დროს, მუშ ხვალეგუნაჭყეფ საჸოროფო სქუა ქუმაშქვჷ დედამიწაშა, ნამდა ადამიანეფს თე სამეფოშ გურშენ უქადაგკო დო კაცობრიობაშ ცოდა დო ღურაშე გიშაჸიდირალო მუშ სიცოცხლე დათმუკო. იეჰოვაქ თინა გათელ დო მუშ სამეფოშ მეფეთ გიორინუ. მარა ღორონთიშ განზრახვაშა ხოლო უმოს მიშურს.

8. ა) მუ რე ბიბლიაშ მთავარ თემა? ბ) მუჭოთ ეფესოელეფიშ 1:8—11-ის იძირე, მუ რე იეჰოვაშ საბოლა განზრახვა? (ქოძირით სურათ გალენ გვერდის).

⁸ ბიბლიაშ მთავარ თემა ღორონთიშ სახელიშ განწმენდა რე. თენა თიმწკუმა მოხვადუ, მუჟამსით იეჰოვა მუშ სამეფოშ საშვალებათ შეასრულენს დედამიწაწკუმა დაკავშირებულ მუშ დუდშეიან განზრახვას. მუდგაქ ვა მოხვადას, იეჰოვაშ განზრახვა ვეთირუ დო შემლებნა თეშ ბჯერდან, მუშენდა ღორონთ მარწმუნენა, ნამდა აუცილებერო შეასრულენს ირფელს, მუდგას იჩიებ (ეს. 46:10, 11; ებრ. 6:​17, 18). მუჟამსით ღორონთიშ განზრახვა შისრულებ დედამიწა სამოთხეთ გინირთუ, სოდეთ მართალ ადამიანეფ გეხარენა მარადიულ ცხოვრებათ (ფსალმ. 22:26). მარა ირფელ თეთ ვეთებ. იეჰოვაშ საბოლა განზრახვა რე, ნამდა არძა გონიერ ქმნილება, ზეცას დო დედამიწას, ართ ოჯახის გაერთიანას. თე ირფელიშ უკულ, არძა თის დემორჩილებ, მუჭოთ უზენაეს მართველს (წეკითხით ეფესოელეფიშ 1:8—11). მართალო სარკო რე თიშ ძირაფა, მუჭო ასრულენს იეჰოვა მუშ განზრახვას.

9. მუსხით შორშა ონჭჷ ბიბლია მომავალშე წინასწარმეტყველებაშ დროს?

⁹ მორთ გუვარჩუათ დაბადებაშ 3:15-ის ინოჭარილ წინასწარმეტყველება, ნამუთ იეჰოვაქ დიო ხოლო ედემიშ ბაღის თქუ. b თე წინასწარმეტყველებაშა მიშეშ თი მოვლენეფ, ნამდგათ იეჰოვა მუშ დუდშეიან განზრახვას შეასრულენდჷ დო ნამუთ ანთასობით წანაშ უკულ მოხვადუდ. თე მოვლენეფშე ნამთინექ უკვე  შისრულ. მაგალთო, მუჭოთ ღორონთის აბრაამშა აფუდ რაგადებულ, თიშ გამნარყშე ქუმორთჷ ქრისტექ (დაბ. 22:15—18). თეშ უკულ, ახ. წ. 33 წანას იესოს „ქურს ქაჩეს“, მუჭოთ ნაწინასწარმეტყველებ რდჷ (საქ. 3:13—15). მარა თე წინასწარმეტყველებაშ საბოლა ნაწილიშ შესრულებაშა, მუდგაშა სატანაშ „დუდიშ აკოჭყანჭყუა“ მიშურს, 1 000 წანაშე უმოს მეძჷ (გამოცხ. 20:7—10). ბიბლიაშე თის ხოლო ბგებულენთ, მუ მოვლენეფქ ოკო გევითარას, ონდო სატანაშ დო იეჰოვაშ ორგანიზაციაშ შქას ნტერალა კულმინაციას მიოჭირინუანს.

10. ა) მუ მოვლენეფ მოხვადუ მალას? ბ) მუჭო შემლებნა ამდღარშე მივემზადათ თე მოვლენეფშო? (ქოძირით სქოლიო).

¹⁰ დეფიქრით, მუ სარკო მოვლენეფიშ გურშენ წინასწარმეტყველენს ბიბლია. თევრეშე ბგებულენთ, ნამდა დიო ერეფ „მშვიდობა დო უსაფრთხოებას“ გეგმაცხადენა (1 თეს. 5:2, 3). უკულ, თინეფ ხეთეშე არძა ტყურა რელიგიას ქიგიანთხუნა დუდის დო თეშნერო ქიდიჭყაფუ „დიდ გაჭირება“ (გამოცხ. 17:16). თეშ უკულ, გამკორჩქინდუ იესო, „ნამუთ ცაშ მუნაფეფს ძალიერებათ დო სიდიადეთ მიშას იჸი“, მუთ მუჭოთ იძირე, ზებუნებრივ მოვლენა იჸუაფ (მათ. 24:30). თინა გასამართლენს კაცობრიობას, მუ დროსით „შხურეფს“ „თხალეფშე“ გეგშართუნს (მათ. 25:31—33, 46). მუშო ოკო რაგად, თე დროს სატანა ხეჭკურელო ვეჯინედას იჸი. თინა თი დონეშა იჸუაფ გაჟღამებულ, ნამდა ღორონთიშ ხალხიშ წინააღმდეგ ახნარენს ერეფიშ კოალიციას, ნამუთ ბიბლიას მოშინაფილ რე, მუჭოთ „გოგ მაგოგიშ დიხაშე“ (ეზეკ. 38:2, 10, 11). „დიდ გაჭირებაშ“ დროს, მუდგარენ მომენტის, იესო გეკოშაყარანს დედამიწას დოსქილადირ ცხებულეფს, ნამდა თიწკუმა დო თიშ ზეციერ ლაშქარწკუმა ართო იბრძოლან არმაგედონიშ ომს. თეშნერო გეთებ „დიდ გაჭირება“ c (მათ. 24:31; გამოცხ. 16:14, 16). თე ირფელიშ უკულ, მთელ დედამიწას ქიდიჭყაფუ ქრისტეშ ანთასწანიან მართველობა (გამოცხ. 20:6).

11. მუშ შესაძლებლობას მერჩანა მარადიულ ცხოვრება? (ქოძირით სურათ).

¹¹ მორთ ასე დეფიფქრათ თი დროშე, მუჟამსით მარადიულო იფცხოვრენთ. მუჭოთ ბიბლიაშე ბგებულენთ, ჩქინ გუმაჭყაფალქ ჩქინ გურს „მარადიულობა ინოდვჷ“ (ეკლ. 3:11). დეფიქრით, მუს ნიშნენს თენა თქვანო  დო მუჭო იმოქმედენს თენა იეჰოვაწკუმა თქვან ურთიერთობაშა. წიგნის „დეახლოვ იეჰოვას“ [ქორთ.], 319-ა გვერდის თეცალ სიტყვეფ ჭარჷ: „ოშ, ანთას, მილიონ დო მილიარდობით წანაშ უკულ, იეჰოვაშ გურშენ თიშე ბრელით უმოს მარჩქვენუნა, ვინემ ამდღა მიჩქუნა, მარა ქობძირუნთ, ნამდა კინ ბრელ საინტერესო მუდგარენ მაჸინა დაგურაფალ . . . ამდღა წარმოდგენა ხოლო ვეშემლებნა, მუსხით საინტერესო დო აზრიან იჸუაფ მარადიულ სიცოცხლე. ღორონთწკუმა დაახლოება ირიათო იჸუაფ ცხოვრებაშ არძაშ უჯგუშ ნაწილ“. ონდო თე დრო დოდირთუდას, შემლებნა გეგმიბრკვიათ შხვა ტომბა სულიერ საკითხეფ ხოლო.

12. მუჭო შემლებნა თი ირფელიშ გაგება, მუთ ღორონთიშ ომკვიდრებელს ხვადუ? ქიმიჸონით მაგალით.

¹² ღორონთიშ სიტყვა ბრელ მუდგარენს მიარგამენა თი ადგილიშ გურშენ, სოდეთ იეჰოვა კვიდრენს (ეს. 33:5). თეს გეძინელ, მოგებაფუანა სარკო მუდგარენეფს, მუჭოთ იეჰოვაშე, თეშ თიშ ორგანიზაციაშ ზეციერ ნაწილშე (ეს. 6:1—4; დან. 7:9, 10; გამოცხ. 4:1—6). მაგალთო, შემლებნა წებკითხათ თი სარკო ხილუეფიშ გურშენ, ნამუთ ეზეკიელქ თიმწკუმა ძირჷ, მუჟამსით თიშ წოხოლე „ცაქ გინწყჷ“ (ეზეკ. 1:1).

13. მუშ გურშენ რეთ იესოშ მარდულ? (ებრ. 4:14—16).

¹³ დეფიქრით, მუს ორთჷ ჩქინო ზეცაშე იესო, ღორონთიშ სამეფოშ მეფე დო შხვეფიშ გაჭირებაშ გურშა მიმაღალარ მღვდელმთავარ. თიშ საშვალებათ მიღნა შესაძლებლობა, ლოცვას ჭყოლოფა დო მოხვარა ფთხუათ იეჰოვას, მუჟამსით მოსაჭირუნა (წეკითხით ებრაელეფიშ 4:14—16). მორთ დღაქ თეშ ვემკორთას, ნამდა ვეფიფქრათ, მუ აკეთეს ჩქინო იეჰოვაქ დო იესოქ დო მუს ორთუნა ამდღა. თინეფიშ გიმორჩქინელ ჸოროფაშე დაფიქრება გურს გომტიბუანა დო აღბძრენა,  დუდუდუზოგებუო ვემსახურათ თინეფს (2 კორ. 5:14, 15).

14. მუთ შემლებნა მარდულობაშ გიმოხანტუა იეჰოვაშ დო იესოშ მიმართ? (ქოძირით სურათეფ).

¹⁴ ჩქინ ძვირფას ღორონთიშ დო თიშ სქუაშ მიმართ მარდულობაშ გიმოხანტუაშ ართ-ართ არძაშ უჯგუშ საშვალება თინა რე, ნამდა მივეხვარათ ადამიანეფს, დუდ მეუძღვინან იეჰოვას დო გინირთან ქრისტეშ მოწაფეეფო (მათ. 28:19, 20). ზუსტას თაშ გიმოხანტუნდჷ მარდულობას პავლე მოციქულ. თის ჯგირო უჩქუდ, ნამდა იეჰოვას ოკო, „არძანერ ადამიანქ გეგნოსქიდას დო ჭეშმარიტებაშ საფუძვლიან რჩქინა მიღას“ (1 ტიმ. 2:3, 4). ათეშენ, თინა დუდის ვა ზოგენდჷ დო მთელ მონდომათ მსახურენდჷ, ნამდა მუდგაინნერო დერსხუკო ადამიანეფ (1 კორ. 9:22, 23).

15. ფსალმუნიშ 1:2-იშ თანახმას, მუ მომღანა ბედნერობას?

¹⁵ პირველ ფსალმუნიშ მაჭარალქ თქუ, ნამდა „ბედნერ რე კოჩ, . . . [მიდგას] იეჰოვაშ კანონ ოჰამ დო კითხულენს თის დღაშ დო სერით“ (ფსალმ. 1:1—3). თე მუხლწკუმა დაკავშირებით ბიბლიაშ მათარგმნალქ, ჯოზეფ როდერემქ, მუშ ნაშრომს თეცალ სიტყვეფ ჭარჷ: „ადამიანს თიშმანწარას ოკო ოსიამოვნუდას ღორონთშე ხემძღვანელობაშ მეღება, ნამდა ირიათო გორუნდას თის, გურგედვალირო ირკვიენდას დო ფიქრენდას თიშე . . . დო დღა თეშ გემკიშქვჷ, ნამდა ბიბლია ვეკითხჷ-და, ოკო მირჩქინას, ნამდა თი დღას მუთუნ სარგებელ ვა მუღალ თიშა“ (Studies in the Psalms). ბიბლიაშ გიმორკვიება თქვანო სასიამოვნო პროცეს იჸუაფ, მუჟამსით ყურადღებათ დეკვირებუთ არძა დეტალს დო დეფიქრებუთ, მუჭო რე თინეფ დაკავშირებულ ართიანწკუმა. ღორონთიშ სიტყვაშ სიტომბეეფიშ ინონჭაფას მართალო დიდ სიამოვნება მოუღ.

16. მუს გუვარჩიენთ უკულიან სტატიას?

¹⁶ მუჭოთ ბძირით, რთულ ვა რე, ინვანჭათ თი ჭეშმარიტებას, ნამდგას იეჰოვა მუშ სიტყვაშ საშვალებათ მოგებაფუანა. უკულიან სტატიას ქობრაგადანთ ღორონთიშ სიტყვას მოჩამილ ხოლო ართ სიტომბეშ გურშენ. თენა რე იეჰოვაშ დიდებულ სულიერ ტაძარ, ნამუთ პავლექ ებრაელეფშა მეჭარილ წერილს ეჭარ. ბჯერა, თე საკითხიშ უმოს ტომბას გიმორკვიება დიდ სიამოვნებას მოიღანა.