1-2. Mang e bin th’abi fel’ e kanawo’ ni ngam beeg ma ga be fil e Bible rom riy? Mu susunnag.

 AM SUSUNNAG ni ga be lemnag ni ngam pi’ puluwon reb e naun ni ngam par riy. Ere mang e ga baadag ni ngam guy u m’on ni ngam dugliy ko ngam par ko re naun nem fa danga’? Ra fel’ u wan’um ni kemus ni ngam guy bangi sasing ni yaan mit e re naun nem, fa? Dariy e maruwar riy ni ga ra adag ni ngam man ko gin bay fare naun riy ya nge yag nim yaliy tooben, mag yan nga langgin ngam guy urngin e singgil riy, nge gubin yang ko fare naun. Sana kub fel’ ni ngam non ngak be’ ni manang rogon nni toy fare naun. Ba mudugil ni ga ra adag ni ngam yaliy urngin ban’en ko fare naun u m’on ni ngam par ngay.

² Ku rayog ni ngad rin’ed ban’en ni aray rogon u nap’an ni gad be beeg ma gad be fil e Bible. I yog be’ ni boor ban’en u murung’agen e Bible ni manang ni Bible e bod “ba naun nib ga’ nrib tolang mab toar e def riy.” Ere uw rogon nrayog ni ngari tamilangan’dad ko n’en bay u Bible? Faanra kemus ni ngam beeg nib papey, ma rayog ni yigoo tin nib mom e machib ara “tin som’on e thin ni yima fil ko thin ni yib rok Got” e ir e ga ra nang. (Heb. 5:12) Ere ba t’uf ni ngam fal’eg i fil e Bible ya nge yag ni ngari tamilang u wan’um e n’en bay riy, ni bod fare naun nib t’uf ni ngam man nga langgin ya nge yag ni ngam nang boch ban’en u rarogon. Reb e kanawo’ nrib manigil nrayog ni ngam fil e Bible riy e aram e ngam guy rogon nib peth reb e thin riy nga reb. Gathi kemus ni ngam guy rogon ni nge tamilang u wan’um e tin riyul’ nib mich u wan’um, ya ngkum guy rogon ni ngam nang fan nib mich e pi n’em u wan’um.

3. Mang e pi’ apostal Paul e athamgil nga laniyan’ e pi walagen ni Kristiano ni ngar rin’ed, ma mang fan? (Efesus 3:​14-19)

³ Ra ngari tamilang u wan’dad urngin ban’en u lan e Thin rok Got, ma aram e ba t’uf ni ngad filed e tin riyul’ u Bible nib toar fan. I pi’ apostal Paul e athamgil nga laniyan’ e pi walagen ni Kristiano ni ngar fal’eged i fil e Thin rok Got ya nga yag ni ngar “nanged  fan feni ga’ radan nge feni n’uw nge feni tolang nge feni toar” e tin riyul’. Faan yad ra rin’ e re n’ey, ma aram e ra ‘yan lik’ngirad’ nga fithik’ e michan’ rorad mar pared riy. (Mu beeg e Efesus 3:​14-19.) Ere kub t’uf ni ngad rin’ed e re n’ey. Chiney e ngad weliyed rogon nrayog ni ngad filed e Thin rok Got nib fel’ rogon ya nge yag ni ngari tamilang u wan’dad e n’en be yog.

4. Mang e rayog ni ngad rin’ed ya nge yag nda chugurgad ngak Jehovah? Mu weliy boch ban’en nrayog ni ngad rin’ed.

⁴ Gadad e piin Kristiano e de gaman ni kemus ni ngad nanged e tin nib mom e machib u lan e Bible. Ya ku gad baadag ni ngad filed e “tin nda nnang ni ke m’ay i lemnag rok Got.” Rayog ni nge ayuwegdad gelngin Got nib thothup ni ngad rin’ed e re n’ey. (1 Kor. 2:​9, 10) Ere mang ndab mu tabab i fil murung’agen boch ban’en u nap’an e fol Bible ni ga ma tay ni yigoo gur nra chugurnag e tha’ u thilmew Jehovah? Bod nrayog ni ngam fil murung’agen rogon ni i t’ufeg e pi tapigpig rok kakrom nge rogon ni be micheg e re n’ey ni gab t’uf rok. Ku rayog ni ngam fil murung’agen e yaram rok Jehovah ni fan ko liyor ni i tay piyu Israel kakrom mag taarebrogonnag nga rogon ni baadag ni ngad liyorgad ngak e ngiyal’ ney. Fa reb e rayog ni ngam fal’eg i fil e pi yiiy ni lebguy Jesus u daken e pi n’en ni i rin’ nge machib ni i tay u fayleng.

5. Bay ban’en ni ga baadag ni ngam fal’eg i gay murung’agen u nap’an e fol Bible ni ga ma tay ni yigoo gur, fa?

⁵ Bay boch e walag ni yad ma fal’eg i fil e Bible ni ka rogned in ban’en ni yad baadag ni yad ma fal’eg i fil u lan e Thin rok Got. Bay boch ban’en ni ka rogned ni bay ko fare kahol ni kenggin e “ Boch Ban’en Nrayog ni Ngam Fil.” Ba gel e felfelan’ ni ga ra tay ni faan ga ra fil e pi n’ey ni ga be fanay fare Watch Tower Publications Index ara fare Research Guide for Jehovah’s Witnesses. Ga ra fil e tin nib toar e machib u lan e Bible, ma rayog ni nge gel e michan’ rom me ayuwegem ni ngam “nang murung’agen Got.” (Prov. 2:​4, 5, BT) Ere chiney e ngad weliyed boch e tin riyul’ u Bible nib toar fan nrayog ni ngad fal’eged i fil.

6. (a) Mu weliy fan ni gubin ngiyal’ ni ma yan i aw e n’en nib m’agan’ Jehovah ngay nga rogon ni ke lemnag. (b) Mang fan nrayog ni nga nog ni n’en nib m’agan’ Jehovah ngay ni fan ko girdi’ nge fayleng e dawori thil ni ka bod rogon ko ngiyal’ “ndawori sum e fayleng riy”? (Efesus 3:11)

⁶ Ngad guyed e n’en be yog e Bible u murung’agen e n’en nib m’agan’ Got ngay. Jehovah  e de taareb rogon ko girdi’ ni yad ma mel’eg taab pa’ e kanawo’ ni nge fekrad ko gin yad baadag ni nga ranod ngay. Ma faanra bay ban’en ni keb i dubchey nga lan e kanawo’ ni yad be yan riy, ma aram e rayog ni nge dab ra tawgad ko gin yad be nameg ni nga ranod ngay. Machane n’en nib m’agan’ Jehovah ngay e taareb rogon ko fa gin’en ni yibe nameg ni ngan taw ngay. Ke mu’ i dugliy e gin nge yan ngay, ma rayog ni nge thilthilyeg e kanawo’ ni nge yan riy ya nge yag ni nge taw ngaram. Gad ba felfelan’ ngay ni ke fanay Jehovah e Bible ni nge dag ngodad e “tin ni lemnag ko tabolngin ndawori sum e fayleng riy” ni buchuuw ma buchuuw. (Efesus 3:11) Boor e kanawo’ nrayog ni nge mel’eg Jehovah ni nge lebguy e n’en nib m’agan’ ngay ma gubin ngiyal’ ni ma yan i aw nga rogon ni ke lemnag ni bochan e ke “gagiyegnag gubin ban’en ni nge yan i aw nib fel’ rogon ya nge puluw ko n’en nib m’agan’ ngay.” (Prov. 16:​4, NW) Ma angin e pi n’en ma rin’ Jehovah e ma par ndariy n’umngin nap’an. Ere mang e n’en nib m’agan’ Jehovah ngay, ma mang boch ban’en ni ke thilyeg ya nge yag ni lebug e n’en nib m’agan’ ngay?

7. Uw rogon ni thilyeg Jehovah rogon nra lebguy e n’en nib m’agan’ ngay u tomuren ni togopuluw e gal nsom’on e girdi’? (Matthew 25:34)

⁷ I yog Got ko gal nsom’on e girdi’ e n’en nib m’agan’ ngay ni fan ngorow. I yog ngorow ni ngar ‘diyengow nge yoor pi fakrow, nge wer e piin ni owcherow nga gubin yang u fayleng ngar pired riy mi yad suwey . . . urngin e gamanman’ u fayleng. (Gen. 1:28) Nap’an ni togopuluw Adam nge Efa miki af e denen ko girdi’, ma de thil e n’en nib m’agan’ Jehovah ngay. Ya n’en ni rin’ e thilyeg rogon nra lebguy e n’en nib m’agan’ ngay. Ka chingiyal’ nem me dugliy ni nge ngongliy reb e Am u tharmiy nra lebguy e n’en nib m’agan’ ngay ni fan ko girdi’ nge fayleng. (Mu beeg e Matthew 25:34.) Nap’an ni taw ko ngiyal’ ni ke dugliy Jehovah, ma aram me pi’ e bin nganni’ i Fak ni nge yib nga fayleng ni nge fil murung’agen Gil’ilungun ko girdi’ me pi’ e yafos rok ni nge biyuliydad ko denen nge yam’. Ngemu’ mu kun faseg ko yam’ nge sul nga tharmiy ni nge gagiyeg ni ir e Pilung u Gil’ilungun Got. Machane ka boor ban’en ni bay nib t’uf ni ngad filed u murung’agen e n’en nib m’agan’ Got ngay.

8. (a) Mang kenggin e machib u Bible? (b) Mang e kub m’agan’ Jehovah ngay nrogon ni be yog e Efesus 1:​8-11? (Mu guy e sasing ni bay u wuru’ e re ke babyor ney.)

⁸ Rogon ni yira tayfan fithingan Jehovah u nap’an nra lebguy e n’en nib m’agan’ ngay ni fan ko fayleng u daken Gil’ilungun ni Kristus e ir e pilung riy e aram kenggin e machib u Bible. Dabiyog ni nge thil e n’en nib m’agan’ Jehovah ngay. Ke micheg nra rin’ urngin ban’en ni ke yog. (Isa. 46:​10, 11, NW, ftns.; Heb. 6:​17, 18) Yira ngongliy e re fayleng ney nge mang paradis ma pi fak Adam nge Efa ni kar flontgad ma yad ba mat’aw e yad ra par ni yad ba felfelan’ “ndariy n’umngin nap’an!” (Ps. 22:26) Machane gathi kemus e n’en nib m’agan’ Jehovah ngay, ya kub m’agan’ ngay ni nge par urngin e tapigpig rok u tharmiy ngu fayleng ni ke taareban’rad. Ma aram e urngin e piin yad be par ni yad ba fos e yad ra fol rok ni ir e Pilung rorad. (Mu beeg e Efesus 1:​8-11.) Ere gathi ga be ngat nga feni manigil rogon ni ma lebguy Jehovah e n’en nib m’agan’ ngay?

9. Faanra ud beeged e Bible, ma mang boch ban’en ni ka bay nga m’on nrayog ni ngad nanged?

⁹ Am lemnag fare yiiy ni yog Jehovah u lan fare milay’ nu Eden ni bay ko Genesis 3:15. b Re yiiy nem e be weliy murung’agen boch ban’en nra lebguy e n’en nib m’agan’ ngay, machane fin ra buch bokum biyu’ e duw nga tomuren. Pi n’ey e ba muun ngay be’ nra yib ni owchen  Abraham ni tabinaw rok e ra yib fare Messiah riy. (Gen. 22:​15-18) Ma nap’an e duw ni 33 C.E., ma aram min maad’ad nga wurilen ay Jesus ni bod rogon ni kan yiiynag. (Acts 3:​13-15) Ma gin tomur ko fare yiiy nra lebug ni aram e ngan bilbilig lolugen Satan e kab pag 1,000 e duw mfini buch. (Rev. 20:​7-10) Ku boor ban’en ni be tamilangnag e Bible u murung’agen e n’en nra buch u nap’an nra chugur ni nge mus nap’an e togopuluw ni be tay e m’ag rok Satan ko ulung rok Jehovah.

10. (a) Mang boch ban’en ni bayi buch ndab ki n’uw nap’an? (b) Uw rogon nrayog ni ngad fal’eged rogodad ni fan ko pi n’em? (Mu guy e footnote.)

¹⁰ Kum lemnag e pi n’en ni baaray ni be yiiynag e Bible nra buch ndawori buch biid. Som’on e ra yog e pi nam ni “ke gapas ndariy ban’en nra buch”! (1 Thess. 5:​2, 3) Ma yugu ran “da’da’” ma ke tabab fare gafgow nib ga’ u nap’an nra chel e pi nam ngar chamgad ko pi yurba’ i teliw ni googsur. (Rev. 17:16) Tomuren ma sana ra m’ug e pow ko “en ni Fak e Girdi’ ni be yib nga but’ u daken e manileng ni bay gelngin ma rib galgal ramaen.” (Matt. 24:30) Ngemu’ ma ra pufthinnag Jesus e girdi’ me kieg e saf ko kaming. (Matt. 25:​31-33, 46) Machane gathi yugu ra par Satan ndabi rin’ ban’en. Ya bochan gelngin e fanenikan rok, ma aram e ra k’aring ba ulung i nam ni be yog e Bible Gog nu Magog ngorad ni ngar chamgad ko girdi’ rok Jehovah. (Ezek. 38:​2, 10, 11) Bang ko re ngiyal’ i n’em, ma aram e yira kunuy e tin ka bay ko piin kan dugliyrad nga tharmiy ni ngar uned ngak Kristus nge pi salthaw rok u tharmiy ko cham u nap’an fare mahl ni Armageddon, ni aram e n’en nra buch u tungun fare gafgow nib ga’. c (Matt. 24:31; Rev. 16:​14, 16) Tomuren ma ra tabab e Gagiyeg Nra Tay Kristus u fayleng u Lan Fare Biyu’ i Duw.​—Rev. 20:6.

11. Mang angin e athap ko yafos ni manemus nra yib ngom? (Kum guy e sasing.)

¹¹ Kum lemnag e n’en nra buch boch nga m’on u tomuren fare biyu’ i duw. Be yog e Bible ni En Ke Sunmiydad e “ke tay e manemus nga [lanin’dad].” (Ekl. 3:​11, NW) Am lemnag angin e re n’ey ko tha’ u thilmew Jehovah. Baaray e n’en be yog fare babyor ni Draw Close to Jehovah ko page 319 nra yibnag e felfelan’ ngodad. Be gaar: “Tomuren ni gad ra par nge pag bokum  bilyon e duw, ma boor ban’en u murung’agen Jehovah Got ni gad ra nang ko tin gad manang e chiney. Yugu aram rogon ma ka boor ban’en nib manigil nrayog ni ngkud filed u murung’agen. . . . Dabiyog ni nge taw e lem rodad nga rogon feni manigil e par ni gad ra tay u paradis. Ma n’en th’abi manigil riy e aram e gubin ngiyal’ nra i chugur e tha’ u thildad Jehovah.” Machane chiney ni ka gad be ulul i fil e Thin rok Got e ku mang boch ban’en ni ku rayog ni ngad fal’eged i fil?

12. Uw rogon ni ngad guyed e pi n’en bay u tharmiy? Mu weliy reb e kanawo’.

¹² Be weliy e Thin rok Got buchuuw ban’en u murung’agen rarogon e par ko gin bay Jehovah riy “u tharmiy.” (Isa. 33:​5, NW) Boor ban’en ni be tamilangnag e Bible u murung’agen Jehovah nge ulung rok u tharmiy ni yira ngat ngay. (Isa. 6:​1-4; Dan. 7:​9, 10; Rev. 4:​1-6) Bod nrayog ni ngad beeged murung’agen boch ban’en ni guy Ezekiel ni yira ngat ngay u nap’an ni ‘mab lan e lang me piliyeg Got e changar rok me dag ban’en ngak.’​—Ezek. 1:1.

13. Uw rogon u wan’um e n’en be rin’ Jesus u tharmiy nrogon ni be yog e Hebrews 4:​14-16?

¹³ Kum lemnag e n’en be rin’ Jesus u tharmiy ni ir e Pilung nge Prist rodad Nth’abi Tolang ni ma kireban’ ngodad. Bochan Jesus ma rayog ni nga darod nga “tagil’ Got” u daken e meybil ma gad wenig ngak ni nge runguydad me ayuwegdad “ko ngiyal’ ndabi siy ni ngar ni ayuwegdad” riy. (Mu beeg e Hebrews 4:​14-16.) Gubin e rran nib t’uf ni ngad lemnaged e n’en ke rin’ Jehovah nge Jesus ni fan ngodad u tharmiy nge tin ka yow be rin’ e chiney. Susun e nge ga’ farow u wan’dad ni bochan e t’ufeg ni kar dagew ngodad me k’aringdad ni ngad pasiggad ko pigpig nge liyor ni gad be tay.​—2 Kor. 5:​14, 15.

14. Mang reb e ban’en nrib manigil nrayog ni ngad rin’ed ni ngad daged feni ga’ fan Jehovah nge Jesus u wan’dad? (Kum guy e sasing.)

¹⁴ Reb e kanawo’ nrib manigil ni ngad daged  riy feni ga’ fan e Got rodad nge Fak u wan’dad e aram e ngad guyed rogon ni ngad ayuweged yugu boch e girdi’ ni ngar manged e Pi Mich Rok Jehovah nge boch i gachalpen Jesus. (Matt. 28:​19, 20) Aram e n’en ni rin’ apostal Paul ni bochan e be pining e magar ngak Got nge Kristus ko n’en kar rin’ew. Manang ni Jehovah e baadag “urngin e girdi’ ni ngar thapgad ngak ma ngar nanged e tin nib riyul’.” (1 Tim. 2:​3, 4) Ba gel e maruwel ni i tay u nap’an e machib ni nge ayuweg urngin e girdi’ nrayog ni nge ayuwegrad ya nge “yognag boch i yad ngak Kristus.”​—1 Kor. 9:​22, 23.

15. Mang e ra yibnag e felfelan’ ngodad nrogon ni be yog e Psalm 1:2?

¹⁵ I yog e en ni yoloy e psalm ni be’ nib felfelan’ mab fel’ rogon gubin ban’en ni ma rin’ e ir be’ nra “beeg e motochiyel rok Jehovah ma ma yib e felfelan’ riy ngak” ma “ma fal’eg i lemnag e motochiyel rok ni rran nge nep’.” (Ps. 1:​1-3, NW; ftn.) Nap’an ni be weliy Joseph Rotherham ni ir be’ ni ma pilyeg e Bible murung’agen e re thin nu Bible ney u lan fare ke babyor rok ni Studies in the Psalms, me yog ni be’ ni “baadag ni nge pow’iy Got e susun e nge yaliy, me fil, me fal’eg i lemnag rogon ni be pow’iy Got.” Ki yog ni “faanra yan reb e rran ndabi beeg be’ e Bible, ma aram e ke adbey e tayim rok.” Faan ga ra fal’eg i fil e Bible nib fel’ rogon mag guy rogon nib peth reb e ban’en riy nga reb, ma aram e ga ra adag e fol Bible ni ga ma tay. Ri gad ra felfelan’ ni faan gad ra fal’eg i fil urngin ban’en u lan e Thin rok Got!

16. Mang e gad ra weliy ko bin migid e article?

¹⁶ Gathi kaygi mo’maw’ ni ngad nanged fan e tin riyul’ ni be fil Jehovah ngodad u lan e Thin rok. Bin migid e article e gad ra weliy riy murung’agen reb e tin riyul’ u Bible nib toar fan. Re n’em e aram fare tempel rok Jehovah nib fanathin ni faani weliy Paul murung’agen u lan fagi babyor ni yoloy ngak e pi Kristiano ni Hebrew. Manga yugum felfelan’ u nap’an ni ga be fil murung’agen e re n’ey.