DILONGI 44
Ngie Wunlongukanga Beni Kibibila
‘Kuvisa matedi kutola, kukula, kunangama ayi phinda’ —EFE. 3:18.
NKUNGA 95 Muinda Wuḿbuelama Kukienzuka
MAMBU TUANLONGUKA a
1-2. Phila mbi yilutidi yi kutangila ayi kulongukila Kibibila? Vana kifuani.
YINDULABU boti ngie wuntomba kubaka makani ma kusumba nzo. Mbi wunkuiza tomba kumona theti ava kubaka makani amomo? Bukiedika ti wunkuiza yangalala to mu kumona foto yi nzo beni? Tuidi lufiatu ti ngie wunkuiza tomba kumona nzo yoso, kufiongunina bivinga ayi kumona phila yawu yididi kutola. Mvandi wunkuiza tomba kufiongunina mambu mankaka muingi wumona buidi bayitungila. Diawu tuidi lufiatu ti ngie wunkuiza yangalala kumona mambu moso matedi nzo beni.
2 Mawu mvandi mantombulu bo tuntanga ayi tunlonguka Kibibila. Tsangu yi Kibibila bayidedikisa “na kibanga kinneni kidi makunzi makula ayi lusersu luphinda.” Buidi tulenda bakila ndandu mu mambu moso madi mu Kibibila? Ngie kutangila Kibibila mu nsualu, wunkuiza longuka to malongi—“matheti mu Diambu di Nzambi.” (Ebe. 5:12) Dedi mu kifuani ki nzo, befu tunkuiza kota muingi kufiongunina mambu moso. Bobuawu mvandi phila yilutidi yi kulongukila Kibibila, yidi mu kumona buidi mambu moso madidi kithuadi na tsangu yi Kibibila. Vanga mangolo muingi wuvisa kubika kuandi to mambu ngie wunkikininanga vayi kibila mbi wunkikininanga mu mawu.
3. Mbi mvuala Polo kakindisa Baklistu kuvanga ayi kibila mbi? (Efeso 3:14-19)
3 Muingi kuvisa buboti mambu madi mu Diambu di Nzambi, tufueti longuka kiedika kiphinda kidi muawu. Mvuala Polo wukindisa zikhomba muingi balonguka beni Diambu di Nzambi muingi “kuvisa buboti matedi kutola, kukula, kunangama ayi phinda” yi kiedika. Mu phila ayoyo baklistu abobo, bankuiza mena ‘mianzi ayi bakinda’ mu kiminu kiawu. (Tanga Efeso 3:14-19.) Mawu mvitu tufueti vanga. Ndoko tumona buidi tulenda longukila Diambu di Nzambi, muingi tuvisa tsundu yi mambu madi muawu.
FIONGUNINA MAMBU MAPHINDA
4. Mbi tulenda vanga muingi tufikama Yave? Vana bifuani.
4 Tulendi kuangalala ko to mu kuzaba mambu matheti ma Kibibila. Mu lusalusu lu phevi yinlongo yi Nzambi, tuidi bakubama muingi kulonguka ‘mambu maphinda ma Nzambi.’ (1 Koli. 2:9, 10) Buidi wummuena kutona thuadusulu yi ndongukulu yi ngie veka muingi kufikama Yave? Dedi, ngie wulenda longuka buidi nandi kamonisina luzolo kuidi bisadi biandi mu thangu yikhulu ayi buidi mawu mamvanina bivisa ti nandi mvandi wukuzolanga. Mvandi wulenda longuka thuadusulu yi mbuongimini Yave kavana kuidi basi Isaeli ayi kumona buidi yawu yindedikinina na thuadusulu yi Baklistu bubu. Voti wulenda longuka zimbikudulu zisalama mu Yesu bo kaba va ntoto ayi mu kisalu kiandi ki kusamuna.
5. Diambu mbi wulenda fiongunina mu ndongukulu’aku?
5 Batu bankaka banzolanga kufiongunina, batuba mua mambu bantomba kulonguka muingi kubaka bivisa bioso. Mambu batuba madi mu quadro yintuba ‘ Mambu Wulenda Longuka mu Ndongukulu’aku.’ Ngie wulenda baka mayangi mu kulonguka mambu amomo, mu kusadila Índice Das Publicações Da Torre De Vigia voti Guia De Pesquisa Para Testemunhas De Jeová. Kulonguka mambu maphinda ma Kibibila malenda kindisa kiminu kiaku ayi kukusadisa ‘kubaka nzailu yi Nzambi.’ (Zinga. 2:4, 5) Buabu tuantubila mua mambu maphinda ma Kibibila tulenda fiongunina.
YINDULA BENI MATEDI LUKANU LU NZAMBI
6. (a) Disuasana mbi didi mayindu ayi lukanu? (b) Kibila mbi tulenda tubila ti lukanu lu Yave matedi batu ayi ntoto luidi “lu mvu ka mvu”? (Efeso 3:11)
6 Dedi, fiongunina mbi Kibibila kinlonga matedi lukanu lu Nzambi. Vadi disuasana matedi mayindu ayi lukanu. Tulenda dedikisa mayindu na kusola nzila yilenda kutunata ku kibuangu tuntomba. Vayi mayindu malenda fuba befu kudengana nkaku mu nzila. Ayi tulenda fuanikisa lukanu na kibuangu tuntomba kukuenda. Befu kuzaba kibuanga tuntomba kuenda ayi va kumonika kikaku mu nzila, buna tulenda balula nzila yinkaka. Mawu Yave kamvanganga. Nandi wunzabikisanga lukanu “luandi” mu Kibibila malembi malembi. (Efe. 3:11) Kheti vammonikanga bikaku, nandi ‘wunnunganga kibila wukubika mamoso muingi lukanu luandi lusalama.’ (Zinga. 16:4) Ayi mambu Yave kamvanganga, mala kadidila. Lukanu mbi Yave kadi ayi mbi kavanga muingi luawu lusalama?
7. Bo Adami ayi Eva bambayisa, mbi Yave kavanga muingi kudukisa lukanu luandi? (Matai 25:34)
7 Nzambi wuzabikisa kuidi batu batheti matedi lukanu luandi mu bawu. Nandi wuba kamba muingi ‘babuta bana, bawesa ntoto ayi bayadila wawu. . .ayi yadilanu biuma bioso’ bimoyo va ntoto. (Ngene. 1:28) Bo Adami ayi Eva bambayisa, bawu batuadisa disumu mu batu, vayi kheti bobo lukanu lu Yave lusa fuba ko. Nandi wubalula mambu muingi kudukisa luawu. Mu nsualu nandi wubaka makani ma kusikika Kintinu ku diyilu kinkuiza dukisa lukanu luandi kuidi batu ayi ntoto. (Tanga Matai 25:34.) Mu thangu yifuana, Yave wufila Muan’andi wutheti va ntoto muingi kiza longa batu matedi Kintinu ayi kuvana moyo’andi muingi kukula batu mu musumu ayi mu lufua. Diawu bo Yesu kavulubuka nandi wuvutuka kudiyilu muingi kuba Ntinu mu Kintinu ki Nzambi. Vaya vadi mambu mankaka tulenda longuka matedi lukanu lu Nzambi.
Yindula mu thangu bivangu bioso ku diyilu ayi va ntoto bala zingila mu kithuadi ayi mu lukuikumunu kuidi Yave! (Tala lutangu 8)
8. (a) Diambu mbi dilutidi nkinza mu Kibibila? (b) Dedi bunsudikisila Efeso 1:8-11, lukanu mbi lutsuka Yave kadi? (Tala figula vathonono levista.)
8 Diambu dilutidi mfunu mu Kibibila didi, kudiodisa dizina di Yave bo nandi kala dukisa lukanu luandi va ntoto mu nzila Kintinu kiandi mu luyalu lu Yesu Klistu. Lukanu lu Yave lusa baluka ko. Nandi wala dukisa mamoso kakanikisa. (Yesa. 46:10, 11; nota Ebe. 6:17, 18) Buala viokila thangu ntoto wala kituka paladizu, ko kuala zingila bana basonga ayi bavedila ba Adami ayi Eva mu “luzingu lu mvu ka mvu.” (Minku. 22:26) Vayi vadi mambu mankaka Yave kala vanga. Lukanu luandi lutsuka luidi lu kukutikisa bivangu bioso bidi kudiyilu ayi va ntoto. Baboso bala tumukina Yave mu lukuikumunu. (Tanga Efeso 1:8-11.) Bukiedika ti masi ko mambu ma kukuitukila kumona phila Yave kala dukisila lukanu luandi?
YINDULA MATEDI BILUMBU BINKUIZA
9. Buidi kutanga Kibibila kulenda kutusadisila kuzaba mambu mankuiza kuntuala?
9 Mona mambu Yave kabikula ku lumbu lu Eden madi mu Ngenesi 3:15. b Mawu mammonisa buidi lukanu luandi luala salimina. Dedi, Nzambi wukamba kuidi Abalahami ti bo vala vioka zimbandu ziwombu, Klistu wala butukila mu nkunu’andi. (Ngene. 22:15-18) Ayi mu mvu 33 T.K., Yesu bantebila mu kikodi dedi bo bubikudulu. (Mava. 3:13-15) Tsundukulu yitsuka yi mbikudulu ayoyo, yitedi kukosikisa ntu wu Satana, yikidi kinanu kuvioka 1.000 di mimvu. (Nzai. 20:7-10) Mvandi Kibibila kintubila mambu mawombo ayi buidi kimbeni kio nza yi Satana kidi mu kimvuka ki Yave kiala manina.
10. (a) Mambu mbi mala monika mu bilumbu binkuiza? (b) Buidi tulenda kubikila kilunzi kitu ayi ntim’itu? (Tala mvandi nota.)
10 Yindulabu mu mambu amama Kibibila kibikula. Theti, mintinu bala yamikisa ‘ndembama ayi nsika!’ (1 Tesa. 5:2, 3) ‘Malembe malembe,’ ziphasi zingolo ziala tona bo mintinu bala tulula binganga bi luvunu. (Nzai. 17:16) Bosi mambu ma kukuitukila mala monika “Muana mutu wunkuiza mu matuti ku diyilu mu mangolo ayi nkembu wuwombu.” (Matai 24:30) Yesu wala fundisa batu mu kuvasa mamemi ayi zikhombo. (Matai 25:31-33, 46) Vayi Satana kalasa zinga ko mioko. Mu ngazi nandi wala kutikisa mintinu mi luyalu muingi kufonda dingumba dio Kibibila kantedila Ngongi yi Mangongi muingi kunuanisa dikabu di Yave. (Yehe. 38:2, 10, 11) Bala kutikisa ku diyilu baklistu basolu, muingi kunuana ku khonzu Yesu mu mvita wu Alimangedoni tsukulu yi ziphasi zingolo. c (Matai 24:31; Nzai. 16:14, 16) Bosi luyalu lu Klistu lu kivevi di mvu, luala tona va ntoto.—(Nzai. 20:6).
Buidi ngie wala muena kuba wufikama na Yave bo wala longuka matedi nandi mu mafunda na mafunda ma mimvu? (Tala lutanga 11)
11. Mbi luzingu lu mvu ka mvu lunsundula kuidi ngiewu? (Tala mvandi foto.)
11 Buabu yindula buidi luzingu luala bela kuntuala bo luyalu lu kivevi di mimvu luala vioka. Kibibila kintuba ti Mvang’itu “wutula mu mintima mitu phuila yi kuzinga mvu ka mvu.” (Mpovi 3:11) Yindula mbi mawu mansundulu kuidi ngiewu ayi kikundi kiaku na Yave. Buku Achegue-se a Jeová va tsielu 319, yintuba: “Bo tuala zinga mafunda na mafunda ma mimvu, tuala luta zaba matedi Nzambi kena bubu. Vayi kheti bobo, vala ba mambu mawombo mamboti muingi kulonguka. . . . Tuisi ko bu kuyindudila ntindu—luzingu lumboti tuala ba ku paladizu ayi diambu dilutidi nkinza diala ba kuluta fikama Yave.” Diawu bo tukhidi tatamana kulonguka Diambu di Nzambi, mbi binkaka tufueti fiongunina?
TALA KU DIYILU
12. Buidi tulenda muena ku diyilu? Vana kifuani.
12 Diambu di Nzambi di tusadisa kununga kumona buidi bukadila ku diyilu kibuangu ki Yave ‘kilutidi zangama.’ (Yesa. 33:5) Kibibila kimmonisa mambu ma kukuitukila matedi Yave ayi kimvuka kiandi ku diyilu. (Yesa. 6:1-4; Dani. 7:9, 10; Nzai. 4:1-6) Dedi, tulenda longuka matedi mambu Yehezekeli katuadusu muingi kusonika bo kamona ‘diyilu kuzibuka ayi wutona kumona kimona mesu ki Nzambi.’—Yehe. 1:1.
13. Dedi bummonisina Ebeleo 4:14-16, mbi wunluta zolanga mu kiyeku Yesu kadi ku diyilu?
13 Yindula mbi Ntinu’itu Yesu kadi mu kuvanga mu befu ku diyilu. Mu nzil’andi tulenda fikama va ‘kikuma ki mamboti malutidi ma Nzambi mu nzila nsambu ayi kudinda nlemvu’ ayi lusalusu ‘mu thangu yifuana’. (Tanga Ebeleo 4:14-16.) Tubika viokisa ni kilumbu kimueka mu khambu yindula mu mambu Yave ayi Yesu ba tuvangila ayi badi mu kuvanga mu befu ku diyilu. Luzolo luawu lufueti nyikuna ntim’itu ayi kuba kifuza mu kisalu kiandi ayi mu mbuongimin’itu kuidi Yave.—2 Koli. 5:14, 15.
Yindula mayangi wala ba mu nza yimona mu kuzaba ti wusadisa bankaka kuba Zimbangi zi Yave ayi minlandikini mi Yesu! (Tala lutangu 14)
14. Phila mbi yilutidi tulenda monisina ti tumvuanga nkinza mambu Yesu ayi Yave badi mu kuvanga? (Tala mvandi foto.)
14 Phila yimueka tulenda monisina ti tunzolanga Nzamb’itu ayi Muan’andi, yidi mu kuvanga mamoso tunnunga muingi kusadisa bankaka kuba Zimbangi zi Yave ayi minlandikini mi Yesu. (Matai 28:19, 20) Mawu mvuala Polo kavanga muingi kuvutula matondo kuidi Nzambi ayi Jesu Klistu. Nandi wuzaba ti Yave ‘wuntomba ti batu boso bavuka ayi babaka nzayilu yikiedika.’ (1 Timo. 2:3, 4) Nandi wuvanga mawombo mu kisalu ki kusamuna muingi kusadisa thalu yiwombo yi batu ‘muingi mu ziphila zioso kabaka bu kuvukisila bankaka.’—1 Koli. 9:22, 23.
BAKA MAYANGI BO WUMFIONGUNINA DIAMBU DI NZAMBI
15. Dedi bummonisina Minkunga 1:2, mbi biala tuvanga kubaka mayangi?
15 Nsoniki wu minkunga wufuanikisa mutu widi mayangi ayi wumbaka ndandu mu kutuba ti nandi ‘wunkuangalalanga mu nsiku wu Yave ayi wuntanganga nsiku’andi mu mbembu yivumbama builu ayi muinya.’ (Minku. 1:1-3; nota.) Nsekudi mueka wu Kibibila wutubila matangu amomo ti “mutu kafueti tomba thuadusulu yi Nzambi mu kulonguka yawu ayi kubotula beni thangu muingi kuyindula mu mambu kanlonguka.” Nandi wubue tuba ti mutu na kuviokisa kilumbu kimueka mu khambu tanga Kibibila, “buna kasa sadila ko buboti kilumbu kiandi.” Ngie wulenda baka mayangi bo wunlonguka Kibibila mu kuvanga mamoso wulenda nunga muingi kufiongunina mambu wunlonguka ayi kumona nguizani mawu madi. Mayangi beni kuvanga mamoso mantombulu, muingi kufiongunina Diambu di Nzambi!
16. Mbi tunkuiza tubila mu dilongi dinlanda?
16 Vasintombulu ko kuvanga mangolo mawombo muingi kuvisa kiedika Yave ka tulonga mu Diambu diandi. Mu dilongi dinlanda, tunkuiza tubila mua mambu maphinda—matedi tempelo yi kiphevi Polo katubila mu nkanda kasonikina kuidi Baklistu ku Ebeleo. Ngie kufiongunina mambu amomo, mala kutuadisa mayangi.
NKUNGA 94 Matondo mu Diambu Diaku
a Kulonguka Kibibila, kulenda tutuadisa ndandu mu luzingu ayi kuluta kutufikika kuidi Tat’itu yi diyilu. Mu dilongi adidi, tunkuiza mona buidi tulenda visila ‘kutola, kukula, kunangama ayi phinda’ yi Diambu di Nzambi.
b Tala dilongi dintuba “Mbikudulu Yikhulu Yitedi Ngiewu” mu Kibanga ki Nsungi ki ngonda Yisambuadi mvu 2022.
c Muingi wuzaba buidi wulenda kubimina mu mambu maphasi mankuiza kuntuala, tala buku O Reino de Deus já Governa! tsielu 230.
