1, 2. ¿Ximodo nga jma galán gúʼndanu ne guni estudiarnu Biblia? Bizeeteʼ ti ejemplu.

 GUNÍʼ ique racaláʼdxiluʼ siluʼ ti yoo. ¿Xi naquiiñeʼ gúniluʼ ante siluʼ ni yaʼ? ¿Ñee caquiiñeʼ gúʼyanu ti foto si stiʼ yoo ca la? ¿Cadi dxandíʼ ñuuláʼdxiluʼ niguuyaluʼ yoo ca la? Zándaca nuuluʼ gúʼyaluʼ ximodo ni, panda cuartu napa ni ne pabiáʼ naroʼbaʼ ni. Dede zándaca zanabadiidxaluʼ xi material biquiiñeʼ para gurí yoo ca. Ni racaláʼdxiluʼ nga gunibiáʼ chaahuiluʼ yoo ca para ganda siluʼ ni.

² Zaqueca nga naquiiñeʼ gúninu ora guidúʼndanu ne guni estudiarnu Biblia. Ti libru ruchaaga ni ná Biblia casi «ti edificiu guizáʼ naroʼbaʼ ni napa ca muru stiʼ guizáʼ nasoo ne gueteʼ nuu ca base stiʼ». Yanna, ¿ximodo zanda gunibiaʼnu guiráʼ ni ná Biblia yaʼ? Pa nagueenda nagueenda guidúʼndanu ni la? zazíʼdinu ca cosa si ni cadi nagana o ca cosa ni bizíʼdinu primé ni zeeda lu Stiidxaʼ Dios (Heb. 5:12). Jma galán gúninu cásica né yoo que: guʼyaʼ chaahuinu xi napa ni dentru. Para guni estudiar chaahuinu Biblia la? galán guidúʼyanu ximodo naazenáʼ ca relatu stini. Cadi caquiiñeʼ si gánnanu xi runi crenu, sínuque xiñee runi crenu ni.

3. ¿Xi gudxi apóstol Pablo ca xpinni Cristu ne xiñee? (Efesios 3:​14-19)

³ Para ganda guiene chaahuinu Stiidxaʼ Dios ne gúʼyanu pabiáʼ nalaga, ziuulaʼ, nasoo ne gueteʼ ni la? caquiiñeʼ guni estudiarnu ca cosa jma nagana ni zeeda luni. Apóstol Pablo guluu gana ca xpinni Cristu guni estudiarcaʼ Stiidxaʼ Dios, ngue runi guniʼbe «rinabaʼ Dios gusiene laatu [ . . . ] ni  dxandíʼ. Zeeda gaca ni casi xiixa ni nalaga, ziuulaʼ, nasoo ne gueteʼ» ne zacá «guzuhuaatu dxiichiʼ» lu ni runi cretu (biindaʼ Efesios 3:​14-19). Laaca naquiiñeʼ gúninu zacá. Guidúʼyanu ximodo zanda guiduʼndaʼ chaahuinu Stiidxaʼ Dios para ganda gúʼyanu pabiáʼ sicarú guiráʼ ni zeeda luni.

4. ¿Xi zanda gúninu para guidxíñanu jma gaxha de Jehová? Bizeeteʼ caadxi ejemplu.

⁴ Laanu, ca xpinni Cristu, qué racaláʼdxinu gánnanu ti luguiáʼ si ni zeeda lu Biblia. Racaláʼdxinu guizíʼdinu «dede ca cosa stiʼ Dios ni jma nagana» ne zacané espíritu santu laanu gúninu ni (1 Cor. 2:​9, 10). ¿Xiñee qué quixhe íqueluʼ gúʼndaluʼ xiixa para guidxíñaluʼ jma gaxha de Jehová lu estudiu personal stiluʼ yaʼ? Nuu stale ni zanda gúʼndaluʼ. Zanda guni investigarluʼ ximodo gunnaxhii Jehová ca xpinni de dxiqué ne ximodo rusihuínnibe laaca nadxiibe lii. Laaca zanda guni estudiarluʼ modo gudixhe chaahuiʼ Jehová guni adorárcabe laa ndaaniʼ guidxi Israel ne bichaaga ni modo runi ca xpinni Cristu yanna. O dede zanda guni estudiar chaahuiluʼ ca profecía ni guca cumplir dxi bibani Jesús lu Guidxilayú riʼ ne dxi biʼniʼ predicar.

5. ¿Xi tema ñuuláʼdxiluʼ ñápaluʼ casi ti proyectu de estudiu personal?

⁵ Ti biaje gunabadiidxacabe caadxi hermanu ni nabé runi estudiar Stiidxaʼ Dios xi tema nagana zeeda lu Biblia ñuuláʼdxicaʼ ñuni estudiar chaahuicaʼ. Lu recuadru ni láʼ « Ca tema ni zanda iquiiñeluʼ ora gápaluʼ estudiu personal» zeeda caadxi de ca ni bizeetecabe. Nanna dxíchidu guizáʼ ziuuláʼdxiluʼ guni estudiarluʼ ca tema casi laacani ra iquiiñeluʼ Índice de las publicaciones Watch Tower ne Ca tema ni huabee ca testigu stiʼ Jiobá. Pa gúniluʼ ni la? zuquidxi ni fe stiluʼ ne zunibiáʼ chaahuiluʼ Dios. (Prov. 2:​4, 5) Yanna, guidúʼyanu caadxi cosa nagana ni zeeda lu Biblia ni zanda guni estudiarnu.

6. (a) ¿Xiñee maʼ gadxé ti plan que ti propósitu? (b) ¿Xiñee ni maʼ gudixhe ique Jehová para binni ne guidxilayú riʼ naca ni ti propósitu ni qué ziuu dxi guiluxe? (Efesios 3:11).

⁶ Guiníʼ íquenu ni ruzeeteʼ Biblia ni naguixhe ique Dios guni o propósitu stiʼ. Maʼ gadxé nga ti plan que ti propósitu. Ti plan zeeda gácani casi ti neza, ni maʼ nexheʼ ne qué zanda guidxaani ne rineni ti lugar si. Peru zándaca qué zindanu lugar ca pa chuʼ xiixa ni gucueeza laanu. Peru para ti propósitu la? ni jma jneza nga chindanu lugar ra maʼ gudixhe íquenu. Cumu nánnanu paraa racaláʼdxinu chindanu la? nga runi qué riguíxhenu ti neza si, sínuque zanda guicaanu intiica si neza para ganda chindanu. Napa Jehová ti «propósitu ni qué ziuu dxi guiluxe» ne rudiʼnu xquixe peʼ laabe purtiʼ chaahuiʼ chaachiʼ cayabibe laanu xii ni lu Stiidxabe. (Efesios 3:11). Guiráʼ ni rúnibe riree ca ni jneza purtiʼ racané guiráʼ ni maʼ bizaʼbe gaca ni maʼ gudixhe íquebe (Prov. 16:4). Guiráʼ ni runi Jehová qué ziuu dxi guiluxe ca ni. Yanna, ¿xii nga maʼ gudixhe ique Jehová guni ne xi huayúnibe para guni cumplirbe ni?

7. ¿Ximodo bichaa Jehová ni naguixhe ique guni ora bichee Adán ne Eva? (Mateo 25:34).

⁷ Gudxi Dios ca primé binni guyuu lu Guidxilayú riʼ xii nga propósitu stiʼ para laacabe. Ora guniʼbe «lagapa xiiñitu ne lagaca stale, laguchá guidxilayú riʼ ne laguni dxiiñaʼ luni, ne lagapa [ . . . ] guiráʼ maniʼ nuu lu guidxilayú» (Gen. 1:28). Ora Adán ne Eva qué ninacaʼ nuzuubacaʼ stiidxaʼ Dios, beeda chuʼ pecadu lu Guidxilayú riʼ. Peru nga qué nuchaa diʼ ni maʼ gudixhe ique Jehová guni. Ni bíʼnibe nga bichaabe modo naguixhe íquebe gúnibe ni. Nagueendaca gudixhe íquebe chuʼ ti reinu guibáʼ, ni guni cumplir ni maʼ gudixhe íquebe para binni ne Guidxilayú (biindaʼ Mateo 25:34). Ne ora bedandá tiempu bisihuinni Jehová pabiáʼ nadxii laanu ra biseendaʼ Xiiñiʼ lu Guidxilayú riʼ, bisiidiʼ Jesús binni de Reinu stiʼ Dios ne bidii xquendanabani para gulá laanu de lu náʼ pecadu ne guendaguti. Despué biásabe de lade guetu, para guibánibe guibáʼ ne guni mandarbe casi rey lu Reinu stiʼ Dios. Peru nuuruʼ stale cosa ni zanda guiníʼ íquenu de ni naguixhe ique Dios guni.

8. (a) ¿Gunáʼ nga tema stiʼ Biblia? (b) Casi ná Efesios 1:​8-11, ¿xiruʼ naguixhe ique Jehová guni? (Biiyaʼ dibuju ni zeeda lu portada).

⁸ Tema ni jma risaca zeeda lu Biblia nga: zusiá Jehová lá ne zúnibe ni ora maʼ guni mandar Jesús lu Reinu stiʼ Dios, ne zacá zaca ni maʼ gudixhe íquebe lu Guidxilayú riʼ. Guirutiʼ zanda gucueeza Jehová de guni ni maʼ gudixhe ique. Laapebe maʼ guniʼbe zuni cumplirbe ni (Is. 46:​10, 11; Heb. 6:​17, 18). Ra tidiʼ tiempu zaca Guidxilayú riʼ ti paraísu ne ca ni zá de Adán ne Eva, ca ni nachaʼhuiʼ, zácacaʼ perfectu ne zabánicaʼ sin qué chuʼ dxi gáticaʼ (Sal. 22:26). Ne cadi ngasi, nuuruʼ ni naguixhe ique Jehová guni. Zúnibe chuʼ guiráʼ xixé ni nuu lu Guidxilayú ne guibáʼ tobi si ne gánnacaʼ laasibe nga nápabe derechu de guni mandarbe (biindaʼ Efesios 1:​8-11). ¿Cadi dxandíʼ guizáʼ galán modo chiguni Jehová ni maʼ gudixhe ique la?

9. ¿Xi guiráʼ ránnanu ora rúʼndanu Biblia?

⁹ Guiníʼ íquenu profecía ni guníʼ Jehová  ndaaniʼ jardín de Edén ni zeeda lu Génesis 3:15. b Luni riete caadxi cosa ni chiguizaaca para gaca cumplir ni maʼ gudixhe ique Dios guni, peru zazaaca ca ni stale iza despué. Lade ca ni chiguizaaca riʼ zahuinni tuu nga binni risaca ni zá de gunaa que, Mesías, ne zeedabe de ca ni zá de Abrahán (Gén. 22:​15-18). Lu iza 33 despué de ca dxi stiʼ Jesús gucaná xatiniñee Jesús casi maca cá ni (Hech. 3:​13-15). Ne cayaadxaʼ jma de ti mil iza para gaca cumplir últimu ndaa stiʼ profecía riʼ, ra gucaachebe ique Binidxabaʼ (Apoc. 20:​7-10). Peru Biblia cayabi laanu xi chiguizaaca ante gunduuxeʼ Jehová Binidxabaʼ ne guidxilayú stiʼ.

10. (a) ¿Xi zazaaca huidxegá si? (b) ¿Ximodo zanda cuʼnu listu xquendabiaaninu ne ladxidoʼno? (Biiyaʼ nota ca).

¹⁰ Guietenaláʼdxinu guiráʼ ni ruzeeteʼ Biblia zazaaca. Tobi de laacani nga ca guidxi ca zaniʼcaʼ «maʼ nuu paz ne seguridad» (1 Tes. 5:​2, 3). Ne málasi ca guidxi roʼ ca zucaalucaʼ ca religión ni qué rusiidiʼ ni dxandíʼ ne zacá zuzulú ca dxi chuʼ stale yuubaʼ o gran tribulación (Apoc. 17:16). Ne despué zazaaca caadxi cosa ni qué huayuuyaʼ binni «zuuyacaʼ zeeda Xiiñiʼ Hombre lu za né stale poder ne gloria» (Mat. 24:30). Zuni juzgar Jesús guiráʼ binni, zabeechube ca ni naca casi dendxuʼ lade ca ni naca casi chiva (Mat. 25:​31-33, 46). Qué ziaana Binidxabaʼ sin guni xiixa, de tantu cadxiichibe zucaabe ti grupo de guidxi ni ribee lá Biblia Gog de guidxi Magog para gucaalucaʼ xquidxi Jehová (Ezeq. 38:​2, 10, 11). Ne zedandá dxi guiráʼ ca ungidu ziuucaʼ guibáʼ ne xcaadxi ungidu ni cayaadxaʼ la? ziecaʼ guibáʼ, ziuucaʼ tobi si né Cristu ne ca ángel para chuʼcaʼ lu guerra ni láʼ Armagedón ne racá nga guiluxe gran tribulación (Mat. 24:31; Apoc. 16:​14, 16). c Ne últimu la? zuzulú zuni mandar Cristu lu Guidxilayú riʼ pur ti mil iza (Apoc. 20:6).

11. ¿Xii nga para lii guibániluʼ sin qué chuʼ dxi gátiluʼ? (Biiyaʼ ca imagen ca).

 ¹¹ Yanna guiníʼ íquenu xi zazaaca stale peʼ iza despué. Biblia ná guluu Dios ni bizáʼ laanu «tiempu ni qué gapa ra guiluxe ndaaniʼ ladxidóʼ binni» (Ecl. 3:11). Riníʼ íqueluʼ ximodo zanda gacané ndiʼ lii para chuʼluʼ jma gaxha de Jehová la? lu libru Acerquémonos a Jehová yaza 319, nabé ridxagayaanu ni ruzeeteʼ ni: «Ora maʼ bibáninu gayuaa, mil, millón o hasta billón de iza zánnanu jma de Jehová que biaʼ nánnanu yanna. Neca zacá zadúʼyanu nuuruʼ stale cosa sicarú ni zanda guizíʼdirunu de laabe. […] Qué zanda guxuíʼlunu pabiáʼ sicarú zabáninu ndaaniʼ paraísu, dede zanda gúninu gadxé gadxé cosa. Peru ni jma galán zúninu nga ziuʼnu jma gaxha de Jehová ra tidiʼ dxi». Laga guedandá dxi ca, ¿xi xcaadxi tema ni zeeda lu Stiidxaʼ Dios zanda guni investigarnu yaʼ?

12. ¿Ximodo zanda gúʼyadxinu guibáʼ? Bizeeteʼ ti ejemplu.

¹² Racané Stiidxaʼ Dios laanu guxuíʼlunu pabiáʼ nandxóʼ Jehová Dios ni nabeza guibáʼ (Is. 33:5). Biblia ruzeeteʼ stale cosa ni ridxagayaanu de Jehová ne laaca ruzeeteʼ ni parte de organización stibe ni nuu guibáʼ (Is. 6:​1-4; Dan. 7:​9, 10; Apoc. 4:​1-6). Zanda guidúʼndanu de ca cosa sicarú ni biiyaʼ Ezequiel ora bixeleʼ guibáʼ ne bizulú biiyabe ca visión stiʼ Dios (Ezeq. 1:1).

13. ¿Xi runi sentirluʼ ora guiníʼ íqueluʼ dxiiñaʼ ni cayuni Jesús guibáʼ? (Hebreos 4:​14-16).

¹³ Laaca zanda guiníʼ íquenu dxiiñaʼ ni napa Jesús guibáʼ casi Rey ni maʼ cayuni mandar ne casi Sumo Sacerdote ni riá binni, pur laabe zanda guidxíñanu lu trono stiʼ Dios «purtiʼ laa nachaʼhuiʼ né laanu» ne ziá laanu ora peʼ caquíʼñenu tu gacané  laanu (biindaʼ Hebreos 4:​14-16). Guiráʼ dxi naquiiñeʼ guiníʼ íquenu ni maʼ biʼniʼ Jehová ne Jesús pur laanu ne ni cayunirúcabe pur laanu dede guibáʼ. Cumu guizáʼ nadxiicabe laanu la? rucaa ni laanu gúninu ni ná Jehová né stale gana (2 Cor. 5:​14, 15).

14. ¿Gunáʼ nga tobi de ca modo ra jma zanda gudiʼnu xquixe peʼ Jehová ne Jesús? (Biiyaʼ ca imagen ca).

¹⁴ Tobi de ca modo ra jma galán para gusihuínninu rudiʼnu xquixe peʼ Dios ne Xiiñiʼ nga ra gacanenu xcaadxi gácacaʼ testigu stiʼ Jehová ne discípulo stiʼ Jesús (Mat. 28:​19, 20). Ne nga peʼ nga ni biʼniʼ apóstol Pablo purtiʼ bidii xquixe peʼ Dios ne Cristu. Laabe nánnabe ni racalaʼdxiʼ Jehová nga «gulá guiráʼ xixé binni ne guiziidiʼ chaahuicaʼ ni dxandíʼ» (1 Tim. 2:​3, 4). Nga runi nabé biʼniʼ predicarbe ti ganda gacanebe guilá «stale binni, biaʼ gándatiʼ» (1 Cor. 9:​22, 23).

15. Casi ná Salmo 1:​2, ¿xi zusiecheʼ laanu?

¹⁵ Qué ridxagayaanu guníʼ ti hombre ni bicaa Salmo nayecheʼ riuu ti binni ne ribani galán ora riuulaʼdxiʼ guʼndaʼ «ley stiʼ Jehová», ridxíʼ ne huaxhinni ne riníʼ ique ni nani (Sal. 1:​1-3). Ti hombre runi traducir Biblia guníʼ xii nga ni cusiene textu riʼ, laabe guniʼbe «naquiiñeʼ chuulaʼdxiʼ ti binni ni ruundaʼ ca conseju stiʼ Dios dede guyubi ca ni, guiziidiʼ ca ni ne guiníʼ ique de laacani». Ne guníʼrube: «Ne binitisibe tiempu nga ora qué guiénebe ca conseju stini» (Studies in the Psalms, Joseph Rotherham). Laanu laaca ziuuláʼdxinu gúʼndanu Biblia pa gúninu stipa guiénenu guiráʼ ca detallehuiiniʼ zeeda lu ni ne gúʼyanu ximodo nuu ca ni tobi si. ¡Ridxá tipa ladxidoʼno ra guni estudiar chaahuinu ne gúʼyanu pabiáʼ nalaga, ziuulaʼ, nasoo ne gueteʼ Stiidxaʼ Dios!

16. ¿Xi zadúʼyanu lu sti artículo ca?

¹⁶ Guiranu zanda guiénenu ca cosa sicarú ni zeeda lu Stiidxaʼ Dios. Lu sti artículo ca zazíʼdinu tobi de ca cosa nagana ni zeeda lu Stiidxaʼ Dios ni caquiiñeʼ guni estudiarnu, laani nga templu espiritual ni bizeeteʼ Pablo lu carta ni bicaa ra nuu ca xpinni Cristu hebreu. Guizáʼ ziuuláʼdxiluʼ guni estudiarluʼ tema riʼ.