1-2. Gini wene gene duho tipa ka geda Baibiri na kini wisigihe? Oni funga kpiapai.

 MO BERẼNGA gupai nga mo namanga diaberã tipa ka ngbe bambu. Ginihe rengbe mo ka ida ka bihe mbata fu mo mangi diaberã? Ya mo mo idi ka bi kina asura gu ngbadimo bambu re? Zanga kapa mo idi aida ka ndu ka bi gu bambu re na ki ta pa tini kirikiri, na ki ndu ka bi avuruhe yo na ki wisigi agu ahe du yo dunduko sirisiri. Si ima rengba kadu foro ni wenepai a mo fura na gu boro naini wai i ame gu bambu re. Si tie ziazia nga, mo du adu na nyemu ka bi gu futufutuapai dunduko du tipa gu bambu mo aida ka ngbehe.

² Ani ima rengba ka mangapai wakina gure a ho ani ageda Baibiri ni na kini wisigihe. Gu kura bawisigipai tipa Baibiri sa ape gupai nga: “Baibiri wakina gu bambu du ni gbangaha nga gu du mburu mehe ni ba nyanyakihe.” Sidu tie, waigu rengbe ani ka inido tirani wenengai na agu apai dunduko du rogo Baibiri yo? Ka si du nga mo na gedaha ni kina boro wiri ipo, mo ima rengba ka wirika kina taata wiri apai—“gu tonatona apai nga ga sangba Mbori.” (Eb. 5:12) Kina wai duhe tipa bambu nga si naida mo “rimi” ku vuru bambu yo tipa ka ino dungu apai tipa ha, si naida mo wisigi Baibiri sirisiri a tipa ka gia tiro na ni wenengai. Gu bawene gene rengbe ani ka wisigo Baibiri ngbaha nga ka bi wai du agu apai i akehe rogo Baibiri yo na ngbanya dagbaha. Mo asadi ka gia tiro na gu rengo mo naidi kutini na ndu gupai mo naidi ti ni kutini.

3. Ginipai gu mokedi nangia Pauro angarasi akurako aKristano i mangihe, na tipagine? (AEfeso 3:14-19)

 ³ Tipa ka giatirani wenengai na apapara Fugo Mbori, gu kuraapai kinaho si aida ani wisigihe sirisiri. Gu mokedi nangia Pauro angarasi awirinako aKristano nga i wisigi Fugo Mbori sirisiri tipa wa ka i rengbe ‘ka ruga tiyo na gu he nga inahe na bagizaha, na basonaha na badunguraha’ nga ga rengo. Si aima rengba ka undo yo tipa ‘nduyo du nyanyaki’ rogo idapase yo. (Oni gedi AEfeso 3:14-19.) Si naida ani mangi kina gu bangisapai re. Ani bingo wai rengbe ani ka wisigo Fugo Mbori sirisiri tipa ka ino rogoyo wenengai.

4. Ginipai rengbe ani ka mangaha tipa ka mbeda gbe na Yekova? Oni funga kpiapai.

⁴ Wangia ani aKristano, si aidanga ani rengbe kina be gu tonatona ayugopai nga ga Baibiri te. Na gu undo nga ga ga Mbori ziazia toro, ani na nyemu ka wirika “gu dudungura apai nga ga Mbori.” (1 Kor. 2:9, 10) Mo ima rengba ka manga dudunguro wisigopai na gu sasa nga ga mbeda na Yekova. Ni kpiapai, mo ima rengba ka manga dudunguro wisigopai ka bi wai ko ayugu gako nyemuse fu gako amoyambu bakuru kusayo na wai gipai re ayugo gupai nga ko ima kpinyemu ro a. Mo ima rengba ka manga wisigopai a ka bi wai Yekova aaida aYisaraere naairisoko na ki ringbisihe kuti wai ko aida ani naairiso ko awere. Watadu mo ima rengba ka manga dudunguro wisigopai tipa gu sangbaanebi Yesu adigisihe ti regbo gako raka na gako tungusapai auru kpotosende.

5. Ya mo pai ho nga gu mo aida ka manga dudunguro wisigopai tipaha ti regbo gamo wisigopai nisase?

⁵ Bete gu kura aboro ninaakpinyemu kaa manga wisigopai sirisiri ape bete agu apai i naaida ka manga dudunguro wisigopai tipaha rogo Fugo Mbori yo. Mo ima rengba ka bi bete agu apai i apehe rogo gu sanduki nga, “Gu Riiapai mo Narengbe ka Manga Wisigopai Nisase Tipaha.” Mo ima rengba ka gbia bakere ngbarago ni wisigo mo pai tipa gu riiapai re na gu undo nga ga agu abuku nga Watch Tower Publications Index watadu Research Guide for Jehovah’s Witnesses. Manga dudunguro wisigo Baibiri ima rengba ka nyakasa gamo idapase na ki undo ro  mo “bi gu inahe nga ga Mbori.” (Snz. 2:4, 5) Ani nika sakapai awere tipa gu dudunguro arengo nga ga Baibiri nga gu rengbe ani ka wisigoho sirisiri.

6. (a) Gini kparakparapai du dagba mbakadapai na ringbisapai? (b) Tipagine rengbe ani ka ya ti ni wẽ ga Yekova ringbisapai tipa aboro na kpotosende ‘nyeanye’ kindi? (AEfeso 3:11)

⁶ Ni kpiapai, oni bingo gupai Baibiri apehe tipa ga Mbori ringbisapai. Kparakparapai kinaho dagba du na mbakadapai gbiati ringbisapai. Ani rengbe ka ringbisa mbakadapai kuti sia gu gene nandu na mo mo da rogo gu ba mo andu kurogo ho. Ono tie, ka si du nga he kinaho kisi gene, mo arengbanga ka da rogo gu ba mo andu ku rogoyo te. Ono ani rengbe ka ringbisa ringbisapai kuti gu ba ani andu ku rogoyo nitihe. Ani ima ino wari nzunzu ani aida ka ndu ka digo ni, ono ani ata sianga gu gene ani nika ndu ngbaha te. Ka si du nga gu kura gene ima kiso ani ima rengba ka ndu ngba gu kuraha. Si nipa ngbarago tie nga, tooni tooni, Yekova ima yugo gako “nyenye berã” furani rogo Baibiri yo. (Ef. 3:11) Yekova ima rengba ka sia gu kura gene tipa ka digiso gako ringbisapai na ko “amangi ahe du tipa kina pa gaha sunge.” (Snz. 16:4) Na sangbana gupai Yekova amangaha nika nyeanye kindi. Ga Yekova ringbisapai nga gine na gini ariapai ko namangihe tipa ka digisoho?

7. Tingbafuo bambata aboro samungu, waigu Yekova aˈaria gako gene tipa ka da ti gako ringbisapai? (Matayo 25:34)

⁷ Mbori aima pepa gako ringbisapai fu bambata aboro. Si aaida i “zúga azuga, ki nge ange, ki hisi kpotosende berewe ki zogo ho; ki nikindo auru . . . gu unga anya dunduko nawo awo” auru kpotosende. (Bam. P. 1:28) Ho Adamu na Eva asamungu ni na ki sa gupai nga aboro gbia ingapai, gipai re aarugusanga Yekova ti digiso ko gako ringbisapai te. Ko aˈaria gu gene ko nika digisoho ngbaha. Nibasa, Yekova adiberã ka sigira Kindo ngbangbaturũ yo nga gu nika digiso gu gako ringbisapai naadu ti tonatonaha tipa aboro na kpotosende. (Oni gedi Matayo 25:34.) Ti gu regbo Yekova aima siaha, ko akedi bangisa Wiriko nga gu ko ko aima kpinyemu ko gbe ko ye ku auru kpotosende ka yugopai fu aboro tipa gu Kindo re na ki fu unga ko ni motumo tipa ka batasa rani be ingapai na kpio. Sidu, Yekova azingisi Yesu berewe ku ngbangbaturũ yo tipa ko zogorago ni Bakindo ga Mbori Kindo. Ono tie, badungu apai kinaho si aida ani wirikihe tipa ga Mbori ringbisapai.

8. (a) Gini banguapai du rogo Baibiri? (b) A wa saki yo pai tipaha rogo AEfeso 1:8-11, gini kurapai Mbori nika mangaha? (Oni bi gu sura duti kpotoho.)

⁸ Gu banguapai du rogo Baibiri yo nga rimo Yekova nika du ni ziasi ziasihe wa ko nikaa digiso gako ringbisapai tipa kpotosende vurube gako Kindo tiibe Kristo. Ka ga Yekova ringbisapai arianga tihe te. Ko ima kidohe nga apai nika manga dunduko kina wai ko apehe. (Yes. 46:10, 11; Eb. 6:17, 18) Fuo bete regbo, i nika sa kpotosende ni paradizo, yo rengberengbe atita Adamu na Eva nika raka ni ‘nye anyé ni unga yo kindi!’ (Tam. 22:26) Anga gere nga gu yangada pai Yekova nika digisoho te. Ko nika koda gako amoyambu dunduko aguyo du ngbangbaturũ na aguyo du auru kpotosende. Sidu, aboro dunduko nika giasangba Yekova ni gayo Bazogo. (Oni gedi AEfeso 1:8-11.) Ya mo iriworago aziongo ro ka bi wai Yekova adigiso gako ringbisapai te?

9. Nigeda ani Baibiri, gini apai rengbe ani ka bihe nika manga kumbatayo?

⁹ Oni berẽnga kurii gu sangbaanebi Yekova apehe ati Edene yo, a wa duhe ne kekehe rogo  Bambata Pai 3:15. b Si afura tipa gupai nika digiso gako ringbisapai, ono tie, si adu nga agi apai re nika manga fuo dungu kutu agarã kumbatayo. Ni kpiapai, Mbori ape gupai fu Abarayama nga tingbafuo dungu rikaaboro, boro sa dagba atitako yo nika da ni Kristo. (Bam. P. 22:15-18) Ono tie, rogo gu garã nangia 33 Fuo Batikayo Kristo, i amburu gido Yesu a wa i agumbaha. (Amo. 3:13-15) Gu yangara sangbaanebi du tipa mbura rii Satana nika manga kindi kumbatayo. (Yugo. 20:7-10) Na Baibiri ima fura tipa gu dungu apai nika manga wa gu sogote du dagba ga Satana zogarago na ga Yekova riigbu nikaa ndu kuti digidoho.

10. (a) Gini apai nika manga barambeda kumbatayo? (b) Waigu rengbe ani ka mbakada berãrani na kpotorani yo? (Oni bi rukutu kekeapai.)

¹⁰ Mo berẽnga kuriipa gu iiriwoapai nika manga nga gu Baibiri nagumba paha. Ni bambataha, rikaaboro nika takapandepa ‘zereda na ngbabase!’ (1 Tesa. 5:2, 3) “Ni ba sa,” bakere gberãngbi nika tona ho rikaaboro nika zubo ziree pambori ni dunduko. (Yugo. 17:16) Tingbafuo gure, iiriwoapai nika manga nga ‘bi Wiri boro ko niye rogo mai ngbangbaturũ yo na tandu na bakere taarimo.’ (Mt. 24:30) Yesu nika sarangbanga aboro, ni kparaka ko akandoro ti ameme. (Mt. 25:31-33, 46) Ti gu regbo re, Satana nikaa sovura kindi kuti Yekova. Bambiko ko ima soga ga Mbori aboro ni kerehe, ko nika sa dunguradungura ariigbu nga aguyo Baibiri ayamba yo nga Gogo boro gu ringara nga ga Magogo i zubo ga Yekova aboro. (Yeze. 38:2, 10, 11) Regbo nika du kinaho i nika dungura yangara mbedimbedi aKristano dunduko i kodi tiyo na Yesu ngbangbaturũ yo, gbiati gu gako aborovura nga ga ngbangbaturũ yo tipa i so gu vura nga ga Aramegido, nga gu nika digiso bakere gberãngbi. c (Mt. 24:31; Yugo. 16:14, 16) Tifuo gure, ga Kristo Zogarago Tipa Agarã Kutu ku auru kpotosende ki tona.—Yugo. 20:6.

11. Ginipai gu maabangirise nga ga raka nyeanye kindi ayugoho foro? (Oni bi sura a.)

¹¹ Awere, mo berẽnga kumbatayo kugii agarã  kutu yo. Baibiri nape gupai nga Bakusirani aima maa “nyenye apai a ku berã [rani] yo.” (Batu. 3:11) Mo berẽnga pa wai du gipai re na maapai kuriro na gamo pagume na Yekova. Gu buku nga Draw Close to Jehovah, kpehe 319, nape gi bawene afugo re: “Tingbafuo raka ani tipa agarã akama, akutu, amirioni, zavura abirioni, ani nika ino dungu apai tipa Yekova susi gu ani nainihe awere. Ono ani nika bi gupai nga dungu wene apai kinaho si aida ani wirikihe. . . . Ani ainongo wai nzunzu raka nika du ni bawenehe Paradizo yo te—ono gu ngbaangba kisusi nga ani nikaa mbeda ti aregbo dunduko na Yekova.” Wa ani kaa ndu kumbatayo kindi kaa wisigo Fugo Mbori, gini kuraapai rengbe ani ka wirikaha?

12. Waigu rengbe ani ka ngera kuari yo ku ngbangbaturũ yo? Oni funga kpiapai.

¹² Fugo Mbori nayugo kina bete apai furani tipa kadu barabangiri Yekova du “ari yo gbe.” (Yes. 33:5) Baibiri nayugo iiriwoapai tipa Yekova na gu gako riigbu du ngbangbaturũ yo. (Yes. 6:1-4; Dan. 7:9, 10; Yugo. 4:1-6) Ni kpiapai, ani ima rengba ka gedapai tipa gu iiriwoapai Yezekere abihe ho “angbangbaturũ aza, [ni ko] ki bi yuguyuguapai nga ga Mbori.”—Yeze. 1:1.

13. A wa saki yo pai tipaha rogo AEbere 4:14-16, waigu mo abi gupai Yesu amangaha awere ngbangbaturũ yo?

¹³ Oni berẽnga a tipa gupai Yesu amangaha furani wangia ko gu gaani Bakindo du ngbangbaturũ yo na ki ngia gu Gbiamotumo du na nunga. Vurube ko, ani ima rengba ka mbeda na ga Mbori “mbatabakindo nga ga undahe” rogo kparakpee yo na ki sanahe tipa inapai na undo ti “rago zingo.” (Oni gedi AEbere 4:14-16.) Aˈuru dunduko si aida ani naaberã tipa gupai aYekova na Yesu namangihe furani na gupai i amangaha awere furani ngbangbaturũ yo. Si naida gayo nyemuse tipa rani fõnga ngbaduraniyo afõ na si ki sa rani ani du zaaza tipa iriso Yekova.—2 Kor. 5:14, 15.

14. Gini bawenepai sa rengbe ani ka mangaha ka yugo gaani tambuahe fu aYekova na Yesu? (Oni bi asura a.)

 ¹⁴ Bawene gene sa rengbe ani ka yugo bakio wai du ani na tambuahe tipa Mbori na Yesu ngbaha nga, ka asada ka undo kura aboro i da ni aDezire Yekova na ni ga Yesu abawiriki. (Mt. 28:19, 20) Gere nga gupai gu mokedi nangia Pauro amangihe ka yugo gako tambuahe fu Mbori na Kristo. Ko aima ino gupai nga gupai Yekova akpinyemuhe nga “aboro bati dunduko, ki ye sa gu inahe nga ga rengo.” (1 Tim. 2:3, 4) Ko amangisunge nyanyaki tingba gako sunge tungusapai tipa ka undo dungu aboro a wa omeko arengbe na ni wa ka ko “batasi agu yo.”—1 Kor. 9:22, 23.

15. Ringbisihe kuti Atambuahe 1:2, ginipai nika sarani ani du na ngbarago?

¹⁵ Bake papara atambuahe ape gupai tipa gu boro du na ngbarago na kidu na diabese nga, ni nga gu boro du ‘gani ngbarago rogo gu rugute nga ga Yekova’ na ni gu boro “namakia pa gako rugute uru na yuru.” (Tam. 1:1-3) Gu kura ba-safugo Ziazia kekeapai du rimoko nga Joseph Rotherham ape gupai tipa agu averesi re nga: “Si naida boro du na nyemu gu rugapai nga ga Mbori ni bakerehe na kini gbataha, kini wisigihe, na kini di bakere regbo kaa berãkuriihe.” Ko agbia gu kurapai kutini nga, “ka si du nga uru susi ka boro agedanga Baibiri ya, pa gu uru re ima gberã.” Mo ima rengba ka gbia ngbarago ti wisigo Baibiri nidu mo na nyemu ka ino gu dungu futufutuapai du rogo yo na gu ngbanya du dagbaha. Nairiwo gu pa ngbarago ngaha ka wisigo gu dudunguro apai du rogo Fugo Mbori yo re!

16. Ginipai ani nika sakapai tipaha rogo gu kekeapai ngbefuo gere?

¹⁶ Si akpakaranga furani ani girogo gu dungu weneapai yo Yekova ayugoho furani vurube Fugoko te. Rogo gu kekeapai ngbefuo gere, ani nika sakapai tipa gu kura nyanyakipa rengo sa—ga Yekova bakere yekaru nga ga toro, nga gu Pauro afura tipaha rogo gako waraga yo fu agu aKristano nangia aEbere. Pa wisigo mo gipai re yengo aye na bakere ngbarago foro.