1, 2. ¿Xí láani toib galán mod par goʼolo né guisuidylo la Biblia? Bisetlaa toib ejemplo.

 BUNY pensary que nainy siʼlo toib yoʼ. ¿Xí láani raquiin ganlo antes de coʼlo guiclo siʼlo láani? ¿Nosi naquiin ñaplo toib retrat xtuny yoʼcu la? ¿O fuerspa ñeelo nabiʼlo ximod nacni la? Sigory naniiny looy nabiʼlo ximod nac nisfuer, ximod nac lainy guirá xcuartni né nabiʼlo guidopy yoʼcu. Dada naniiny looy nabiʼlo guiich ro sieed mod goyaʼni. Riendxichni que naniiny looy nimbutzaaylo modpa nac yoʼcu.

² Modcuca labúu gonyno órni rolno né rasuidyno la Biblia. Toib obra de consulta raslooyni ni rasuidy la Biblia xomod toib «yoʼ rodann ni xilagdii, ni nap pilary nasoʼdii né ni sagaʼdxich». ¿Né ximod labúu ganno guirá ni ná la Biblia? Pal rolxexno láani la, nosi sanno loguiaʼsini, cós ni ma bisuidyno nírcu ló Xtiitz Dios (Heb. 5:12). Más sacró gonyno láani xomod ronyno né toib yoʼ: non guimbutzaayno «lainyni». Par guisuidytzayno la Biblia la, raquiin guibiʼtzayno ximod radzak guirá ni náni. Diti nosi ganno xi láani ronyno crer, láaca non ganno xigony ronyno crer láani.

3. ¿Xí láani buny animar Pablo xherman ñony, né xigony? (Efesios 3:14-19).

³ Par labúu guimbutzaayno Xtiitz Dios né guibiʼno ximodpa  nacni la, raquiin guisuidyno la Biblia nanoydiguieʼ. Apóstol Pablo buny animarbu guirá cristianos par nasuidyibu Xtiitz Dios né gan par labúu ñentzaayibu «ni xilag, ni sioʼol, ni nasoʼ né guet» de galnigolú. Né modreʼ, ñoʼdxichyibu né nasagaʼdxichyibu ló fe xtunyibu (bíil Efesios 3:14-19). Ngúca raquiin gonyno. Ganno ximod labúu guimbutzaayno Xtiitz Dios né gantzayno mod náni.

4. ¿Xí labúu gonyno par guibigaxno más Jehová? Bisetlaa tipnés ejemplos.

⁴ Lóono ni nacno cristianos diti non tzoʼno conforme guimbuno tidxóyensi ni sieed ló la Biblia. Nainy lóono guisuidyno «dada cós nagan xtuny Dios», né espíritu santo sacné lóono gonyno láani (1 Cor. 2:9, 10). ¿Xigony diti ragoʼlo guiclo guisuidylo toiblo Xtiitz Dios par guibigaxlo ronoʼ Jehová? Naplo xidal mod par labúu gonylo láani. Labúu guiyopylo ximod bislooy Jehová xcalnadxiʼ guirá xpiin ni goyoʼ ló dzú ni see, né ximod raslooy ngú que láaca nadxiʼbu looy. Labúu nasuidylo ximod góoch Jehová gudx Israel ñen láabu né natzaklo láani mod rienno Jehová ló naareʼ. O láaca labúu guisuidytzaylo profecías ni buny cumplir Jesús órni bunybu xchiin Jehová ló Gudxlio.

5. ¿Xí tema ñoladxlo ñony investigarlo órni guisuidylo xquiichlo toiblo?

⁵ Goyoʼ ni gonabdiitz a tipnés herman ni nanoy rasuidy Xtiitz Dios xi galnigolú ni nagan ni sieed ló la Biblia naniiny layibu nasuidyibu. Cuadriyen « Ni labúu guisuidylo toiblo», sieed tipnés cós ni bisetlayibu. Sigory sioladxlo guisuidylo de temas declas reʼ né xcalrracné Índice de las publicaciones Watch Tower né Ni gacné a testigos xtuny Jehová guisuidyibu la Biblia. Pal rony investigarlo sony nadipni fe xtunylo né sacnéni looy guidzelo «xcalnan Dios» (Prov. 2:4, 5). Nigoreʼ, guibiʼno tipnés galnigolú ni sieed ló la Biblia ni labúu guisuidyno.

6. a) ¿Xigony diti ngúca láani toib plan né toib propósito? b) ¿Xigony labúu guinino que ni goniʼ Jehová gony par buñgudxlio né Gudxlio sioʼni por tipzó? (Efesios 3:11).

⁶ Por ejemplo, gonyno pensary ni rasetlaa la Biblia ni ma goniʼ Dios gony. Diti láacani ngú toib plan né toib propósito. Plan, nacni xomod toib néz ni riné lóono toib lagary ni ma golúno. Labúu guixinni pal noʼ cós ni rasieg ló néz. Per propósito, nacni suusi lagary ni ma golúno guidxinno. Nanno púti mer nainy guidxinno, per labúu guitzaʼno de néz. Jehová nap toib propósito ni diti sadudy xtzú, né radudyno guixquix láabu por ni dxoga dxoga cabeʼ xilatbu láani ló la Biblia (Efes. 3:11). Guirá ór rarebuʼ ni nábu, portín «Jehová ma buny que guiráxadit cós gacnéni par gac ni nábu» (Prov. 16:4). Né mod rarebuʼ ni rony Jehová sioʼni por tipzó. Por ngú, ¿xí láani ma goniʼ Jehová gony, né xí ma bunybu par gony cumplirbu láani?

7. ¿Ximod bitzaʼ Jehová mod gony cumplirbu né ni ma goniʼbu órni Adán né Eva góc nayaʼyibu? (Mateo 25:34).

⁷ Dios gochbu primer galtzeʼel xi láani ñonybu né layibu órni goniʼbu ndeʼ: «Tzoʼ xidal xiinnto né guidalto, guistzato gudxlio né gony mandaryto […] guirá ni nabany» (Gén. 1:28). Nigolú, órni Adán né Eva góc nayaʼyibu, goloʼyibu galkié ló Gudxlio, per ngú diti bicaani ló ni ma goniʼ Dios gony. Nosi bitzaʼbu mod ñonybu láani. Nimaca goniʼbu nagoʼbu toib Gobierno lainy guibá par labúu ñonybu ni ma goniʼbu par buñgudxlio né Gudxlio (bíil Mateo 25:34). Bidxin ór ni bislooy Jehová xcalnadxiʼ né bixelbu xiingaʼnbu ló Gudxlio. Jesús goniʼbu de Gobierno xtuny Dios né goitybu par bilaabu lóono de galkié né galgoity. De ngú biásbu lad gueʼet né seebu guibá par gacbu Rey de Gobierno xtuny Dios. Per noʼ stipnés cós ni goniʼ Dios gony, ni labúu gonyno pensary.

8. a) ¿Xí tema rareloguiaʼ ló la Biblia? b) Mod rarexa ló Efesios 1:8-11, ¿xí más gony Jehová? (Bibiʼ dibuj ni sieed laidy guiich reʼ).

⁸ Tema ni rareʼ loguiaʼ ló la Biblia láani ndeʼ: mod guisiá Jehová laa órni gony cumplirbu né ni ma goniʼbu par Gudxlio né xcalrracné Gobierno xtunybu ni gony mandary Cristo. Diti noʼ ni labúu guicaa ló ni ma goniʼ Jehová gony. Láabu ma bidudybu xtiitzbu que sony cumplirbu láani (Is. 46:10, 11, notas; Heb. 6:17, 18). Sadxin midid, Gudxlio sácni toib Gudxlio móz roʼ guirá xfamil Adán né Eva ni rony xinésni ma diti sacyibu buñ galkié né sabanyibu por tipzó (Sal. 22:26). Né diti ngúsi: ni ma goniʼ Jehová gony raguiñani xidal cós. Láabu sonybu que guirá ni naní guic, tanli lainy guibá né ló Gudxlio, guiguaʼyibu toibsi xomod toib famil né guiráyibu ganyibu que Jehová ngú ni rony mandary tanli lainy guibá né ló Gudxlio (bíil Efesios 1:8-11). ¿Nigolú sacróyen mod rony cumplir Jehová guirá ni ma goniʼ ja?

9. ¿Balaati ranno ni gac ló dzú ni sietra órni rolno la Biblia?

⁹ Gonyno pensary ló profecía ni goniʼ Jehová ló lagary móz ni goyoʼ Edén né ni ritlaa ló Génesis 3:15. b Loni rasetlani cós  ni gac par gac cumplir ni ma goniʼ Dios per ni narebuʼ xidal mil íz después. Toibtica de cós cu láani ngú descendencia xtuny buñgonaʼ, Mesías, ro ñeed xfamil Abrahán (Gén. 22:15-18). Ló íz 33 de xtzúno, bireʼ herid xañeʼ Jesús, xomod bitlaa ló profecía (Hech. 3:13-15). Cayatzra más de 1.000 íz par gac cumplir profecía ro ritlaa guitach guic Buñdzab (Apoc. 20:7-10). Per la Biblia rasetlaa más cós ni gac antes de tíil xcudxliogox Buñdzab né xcudx Jehová.

10. a) ¿Xí láani mápa mer gac? b) ¿Ximod labúu gonyno puext xpensaryno né xcalnabanyno? (Bibiʼ nota).

¹⁰ Guisetnaladxno cós nadzuiby ni rasetlaa la Biblia. Primer, gudxrop saniʼyibu «¡Paz né seguridad!» (1 Tes. 5:2, 3). Gran tribulación salóni «tiptisi» órni gudxrop sacalóyibu guirá religión falz (Apoc. 17:16). Después, sigory sioʼ cós nadzuiby, órni guibiʼ buñ «Xiin Buñgudxlio sieed laidy xcaay lainy guibá né galnadip né gloria» (Mat. 24:30). Jesús sony juzgar guirá buñ, sabextzobu buñ ni nac xomod xiil de buñ ni nac xomod chiv (Mat. 25:31-33, 46). Laʼga gacni, Buñdzab diti sagudx ña. Soo xian láabu né por ngú sakíilbu tipnés gudxrop ni rabeʼ la Biblia laa, Gog de la tierra de Magog, par guicalóyibu xcudx Jehová (Ezeq. 38:2, 10, 11). Sadxin midid sadop ungidos ni noʼsa ló Gudxlio lainy guibá. Cu sadopyibu né Cristo né guirá ángeles ni noʼ lainy guibá par tíilyibu ló guerr ni laa Armagedón né láani sasloxni gran tribulación (Mat. 24:31; Apoc. 16:14, 16). c Órcu saló xcalmandary Cristo de Tipmil Íz ló guidopynac Gudxlio (Apoc. 20:6).

11. ¿Xí radudy diitz par looy ni guibanyno tipzó? (Láaca bibiʼ Dibuj).

¹¹ Gonyno pensary ló ni gac ló dzú ni sietra ni noʼ más sit. La Biblia ná que ni Bisaʼ lóono «Goloʼbu lainy xcalnabany buñgudxlio guibany por tipzó» (Ecl. 3:11). ¿Ronylo pensary xí radudyni  diitz par looy né mod radzaklo Jehová la? Libro ni laa, Acerquémonos a Jehová, página 319, rasetlaa ndeʼ: «Órni ma bibanyno gayoʼ íz, xidal mil íz, xidal millón íz, o dada billón íz, sanno más de Jehová que midid ni nanno nigoreʼ. Per ná scú sabiʼno que cayatz más cós sacróyen ni guisuidyno de láabu. […] Nili ritzanló ló xpensaryno balaati sacró guibanyno ló Gudxlio móz. Per, de guirá cós ni gonyno cu, ni más sacró láani ngú, guibigaxno más Jehová». Né, laʼga guidxin dzúcu, ¿xí stipnés temas ni sieed ló Xtiitz Dios labúu guisuidyno?

12. ¿Ximod labúu guibiʼno lainy guibá? (Bisetlaa toib ejemplo).

¹² Xtiitz Dios racnéni lóono gonyno pensary mod nac gloria xtuny Jehová «guiadíi» (Is. 33:5). La Biblia rasetlaa cós ni radziguiaʼ buñ de Jehová né de xcudxbu ni noʼ lainy guibá (Is. 6:1-4; Dan. 7:9, 10; Apoc. 4:1-6). Por ejemplo, labúu golno de cós xiroʼ ni bibiʼ Ezequiel órni «bixal guibá» né gosaló gopbu «visiones xtuny Dios» (Ezeq. 1:1).

13. ¿Ximod rasaclo órni ronylo pensary ló dxiin ni nap Jesús lainy guibá? (Hebreos 4:14-16).

¹³ Láaca gonyno pensary ló dxiin ni nap Jesús lainy guibá xomod Rey né Sumo Sacerdote ni nap galrronladx. Por xcalrracnébu, labúu rabigaxno ló oración ronoʼ «trono de galrronladx xtuny Dios» né guinabno gonladxbu lóono «órni merpa caquiinno láani» (bíil Hebreos 4:14-16). Dipa guidudyno lagary tudy nipa tipdzú gonyno pensary ló ni Jehová né Jesús ma buny por lóono, né ni cayonyibu por lóono desde lainy guibá. Galnadxiʼ ni napyibu lóono non guidxinni lainy xcalnabanyno né guichiinni  lóono gonyno xchiin Jehová né gan (2 Cor. 5:14, 15).

14. ¿Xí láani toib mod galán ni guidudylo guixquix Jehová né Jesús? (Láaca bibiʼ dibuj).

¹⁴ Toibtica mod galán ni napno par guislooyno que radudyno guixquix Dios né Xiimbu láani ngú, gonyno dada rutirigaʼlni lóono par gacnéno stipnés buñ guidxin gac testigos xtuny Jehová né xpiin Jesús (Mat. 28:19, 20). Ndeʼ ni buny apóstol Pablo órni bidudybu guixquix Dios né Cristo. Pablo gon que ni raniiny Jehová láani ngú «Que guirá clas buñ guilaa né guimbutzaay galnan ni nigolú» (1 Tim. 2:3, 4). Por ngú nadip bunybu xchiin Jehová par ñacnébu buñ, né modcu nalaabu tipnésyibu (1 Cor. 9:22, 23).

15. Mod ná Salmo 1:2, ¿xí sagoʼ nakit lóono?

¹⁵ Diti radziguiaʼno ni goniʼ salmista que buñ ni rieeni galán né rioʼ nakit, nacyibu buñ ni rioladx xiley Jehová né ni dzú né gueʼel roʼol láani né ronybu pensary loni (Sal. 1:1-3). Toib traductor bíblico golexa que ni roʼol la Biblia non «guioladxgoluʼbu xconsej Dios né ngú guichiin láabu guiyopybu, guisuidybu né gonybu pensary loni». Rasetlabu: «Né guisacbu que dzú ni diti labúu guientzaaybu xcalnanni, diti noʼ pu biquiinni» (Studies in the Psalms, Joseph Rotherham). Looy láaca sioladxlo guisuidylo la Biblia pal ronylo rutirigaʼlni looy par guientzaaylo láani né guibiʼlo mod radzakni saʼni. ¡Sacróyen láani pal rientzaayno Xtiitz Dios mod nacni!

16. ¿Xí sasuidyno ló artículo ni sieed?

¹⁶ Guiráno labúu guientzaayno galnigolú sacróyen ni rasuidy Jehová lóono ló Xtiitzbu. Ló artículo ni sieed, sasuidyno toibtica galnigolú reʼ ni nagan: gran templo espiritual xtuny Jehová, ni bicaʼ Pablo ló guiich par cristianos hebreos. Nandxichno que guiráno sioladxgoluʼno guisuidyno tema reʼ.