1. Gin ango ma lamalaika mo tye ka waco, dok meno myero owek wawiny nining?

 KA ONONGO ni lamalaika mo olok kwedi, tika onongo ibiwinyo lokke? I kare-ni, lamalaika mo tye ka lok “bot rok ducu ki kaka ki leb-gu ki jo mapatpat ducu.” Ngo ma en tye ka wacone? “Wulwor Lubanga, wumi deyo bote . . . Wuwor en ngat ma oketo polo ki lobo.” (Yabo 14:​6, 7) Jehovah keken aye obedo Lubanga me ada ma omyero dano ducu guwor. Pud dong watye ki pwoc madit ya ni en ominiwa mot madit me wore i ode!

2. Ot pa Jehovah i yo me cwiny obedo ngo? (Nen bene bok ma wiye tye ni “ Ot pa Lubanga i Yo me Cwiny.”)

² Ot pa Lubanga i yo me cwiny obedo gin ango, dok watwero nongo ngec matut ma tito pire ki kwene? Ot pa Lubanga i yo me cwiny pe obedo kom gedo kikome. Obedo yub ma Jehovah oketo piwa me wore i yo ma atir kun jenge i kom ginkok pa Yecu. Lakwena Paulo otito yub man ka maleng i waraga ma en ocoyo bot Lukricitayo ma Luibru me cencwari me acel ma onongo gikwo i Judaya. b

3-4. Paulo onongo tye ki par ango i kom Lukricitayo ma Luibru ma gibedo i Judaya, dok en okonyogi nining?

³ Pingo Paulo ocoyo waraga bot Lukricitayo ma Luibru ma gibedo i Judaya? Twero bedo pi tyen lok aryo. Me acel, me cuko cwinygi. Ma peya gudoko Lukricitayo, polgi onongo gitye i dini pa Lujudaya. Lutela dinigi macon nen calo gubedo ka cayogi pien gudoko Lukricitayo. Pingo? Pien Lukricitayo onongo gipe ki ot mo madit ma gicito iye ka woro Lubanga, gipe ki keno tyer mo ma gityero iye lee bot Lubanga, dok gipe  ki lulamdog ma telo wigi. Man onongo twero turo cwiny lulub kor Kricito dok weko niyegi doko goro. (Ibru 2:1; 3:​12, 14) Jo mogo i kingi oromo bedo ni gubedo ki tam me dok cen i dini pa Lujudaya.

⁴ Me aryo, Paulo otito ka maleng bot Lukricitayo ma Luibru ni onongo pe gitye ka tute me niang pwony manyen nyo ma tergi tut, ma meno aye “cam matek” ma nonge i Lok pa Lubanga. (Ibru 5:​11-14) Onen ka maleng ni, jo mogo i kingi onongo pud pe gitye atera me weko lubo Cik pa Moses. Ento, Paulo otito ni gityer ma onongo kimiyogi i te Cik pa Moses onongo pe twero kwanyo bal pa dano kwicikwici. Pi tyen lok meno, oweko Cik dong “gibolo woko.” Dong Paulo omedde ki pwonyogi lok ada mogo ma tere tut. En opoyo wi Lukricitayo luwote i kom “gen mo maber makato” ma jenge i kom ginkok pa Yecu dok twero konyogi me nyikke “cok bot Lubanga.”​—Ibru 7:​18, 19.

5. Gin ango ma mitte ni waniang ki i buk pa Jo Ibru, dok pingo?

⁵ Paulo otito bot omegine ma Luibru ni yo me worogi macalo Lukricitayo ber loyo yo ma onongo giworo kwede Jehovah i kare mukato. Yo me woro pa Lujudaya ma lubbe ki Cik onongo obedo ‘tipo keken ma nyuto gin ma bibino, ento kom gin meno tye bot Kricito.’ (Kol. 2:17) Tipo nyuto mere kit ma gin moni nen kwede keken. Ento pe obedo gin meno kikome. Kit meno bene, yo me woro pa Lujudaya onongo obedo mere tipo pa ot pa Lubanga i yo me cwiny. Yub man ma Jehovah oketo-ni oweko twerre me timo kica pi balwa wek wami woro ma atir bot Jehovah. Dong pire tek adada piwa me niang yub man. Kong dong waporu “tipo” (yo me woro pa Lujudaya) ki “kom gin meno” (yo me woro pa Lukricitayo), kit ma kitito kwede i buk pa Jo Ibru. Ka watimo meno, bikonyowa me niang maber gin ma ot pa Lubanga i yo me cwiny obedo ki kit ma gudowa kwede.

6. Onongo kitiyo ki kema me woro nining?

⁶ Yo me woro Jehovah i kare macon. Paulo ojengo guti me nywako lokke i kom kema me woro ma Moses oyubo i mwaka 1512 K.M.P. (Nen chart ma wiye tye ni “Yo me Woro Jehovah i Kare Macon​—Yo me Woro Jehovah i Kare-ni.”) Luicrael gubedo ka tic ki kema me woro ma onongo giguro i kabedo mapatpat ma gubedo ka wot iye. Gutiyo kwede cokcok  pi mwaki 500 nio wa i kare ma kityeko gero ot pa Lubanga i Jerucalem. (Nia 25:​8, 9; Wel 9:22) “Kema me rwatte” man aye onongo kabedo ma Luicrael gicito iye me lega bot Lubanga ki me miyo gityergi. (Nia 29:​43-46) Ento, kema man bene onongo cung pi gin mo maber makato ma onongo bibino pi Lukricitayo.

7. Ot pa Lubanga i yo me cwiny ocako tic awene?

⁷ Yo me woro Jehovah i kare-ni. Kema me woro ma i kare macon onongo obedo “tipo ki cal keken me kabedo maleng ma tye i polo,” dok onongo cung pi ot pa Jehovah i yo me cwiny. Paulo owaco ni kema man “aye lanyut me cal me kare man.” (Ibru 8:5; 9:9) Man nyuto ni i kare ma en ocoyo bot Jo Ibru, ot pa Lubanga i yo me cwiny onongo dong tye. Ocako tic i mwaka 29 K.M. I mwaka meno, Yecu onongo batija, kiwire ki cwiny maleng, dok ocako tic macalo ‘lalamdog madit’ i ot pa Lubanga i yo me cwiny. c​—Ibru 4:14; Tic 10:​37, 38.

8-9. Ma lubbe ki Jo Ibru 7:​23-27, apokapoka madit ango ma tye i kin lulamdog ma i lobo Icrael ki Lalamdog Madit, Yecu Kricito?

⁸ Yo me woro Jehovah i kare macon. Lalamdog madit onongo cung pi lwak i nyim Lubanga. Aron aye obedo lalamdog madit mukwongo i lobo Icrael, dok Jehovah kikome aye ocime i kare ma kidyero kema me woro. Ento, kit ma Paulo otito kwede, “[lulamdog] mukene ca onongo yam welgi dwong, pien to onongo ogengo nyimgi woko wek pe gumedde ki tic.” d (Kwan Jo Ibru 7:​23-27.) Dok kit macalo lulamdog magi onongo gitye ki roc, onongo mitte ni gumi gityer pi balgi. Ki kany waneno apokapoka madit i kin lulamdog ma i lobo Icrael ki Lalamdog Madit, Yecu Kricito.   

⁹ Yo me woro Jehovah i kare-ni. Macalo Lalamdog Madit, Yecu Kricito “tiyo ticce . . . i kema me ada ma Rwot [Jehovah] aye oguro, ento pe dano.” (Ibru 8:​1, 2) Paulo otito ni “Yecu bedo i dog ticce me ajwaka [lalamdog] matwal, pien en bedo nakanaka.” Paulo omedde ni ‘cilo me bal pe ogudo Yecu, yam gipoko en woko ki i kom lubalo,’ dok en pe tye calo lulamdog madito me Icrael, “ma gityero gitum bot Lubanga jwijwi” pi balgi. Kong dong wanenu apokapoka ma tye i kin keno tyer kacel ki gityer ma onongo kimiyogi i kare macon ki ma wamiyogi i kare-ni.

10. Gityer ma onongo kiwangogi i wi keno tyer ma kiyubo ki mola onongo gicung pi gin ango?

¹⁰ Yo me woro Jehovah i kare macon. I dyekal, cok ki doggola kema me rwatte, onongo tye iye keno tyer ma kiyubo ki mola, ka ma onongo kityero iye gitum awanga bot Jehovah. (Nia 27:​1, 2; 40:29) Ento, gitum awanga magi onongo pe kwanyo bal pa dano kwicikwici. (Ibru 10:​1-4) Lee mapatpat ma onongo kityerogi jwi i kema me woro onongo cung pi gityer acel ma onongo bikoko dano matwal.

11. Yecu omine kene macalo gitum i wi keno tyer mene? (Jo Ibru 10:​5-7, 10)

¹¹ Yo me woro Jehovah i kare-ni. Yecu onongo ngeyo ni Jehovah ocwale i lobo me miyo kwone me koko dano. (Mat. 20:28) Pi meno, i kare me batijane, Yecu omine kene me timo miti pa Jehovah. (Jon 6:38; Gal. 1:4) Keno tyer ma Yecu omine iye macalo gityer pe kiyubo  ki cing ento cung pi ‘miti’ pa Lubanga. Miti pa Jehovah onongo tye ni Wode omi kwone ma pe ki roc-ci. Yecu omiyo kwone “kicel keken ma otyeko lok woko ducu” pi kwanyo matwal bal pa jo ducu ma ginyuto niye i kom Kricito. (Kwan Jo Ibru 10:​5-7, 10.) Kong dong wanyamu tyen lok pa jami ma onongo tye i i kema.

12. Anga ma onongo twero donyo i kicika acel acel me kema me woro?

¹² Yo me woro Jehovah i kare macon. Kema me woro kacel ki ot pa Lubanga ma kigero lacen i Jerucalem onongo gical adada ki i iye. Gin ducu onongo gitye ki kicika aryo​—“Kabedo Maleng” ki “Kabedo Maleng Makato Ducu”​—ma onongo kipoko kingi ki bongo camanini ma kicweyo cal iye. (Ibru 9:​2-5; Nia 26:​31-33) I Kabedo Maleng, onongo tye iye okar mac me jabu, keno tyer me wango odok eceta, ki meja me mugati me aketa i nyim Lubanga. “[Lulamdog] ma giwirogi ki moo” keken aye onongo kiye ni gudony i Kabedo Maleng me tiyo ticgi. (Wel 3:​3, 7, 10) Kabedo Maleng Makato Ducu onongo tye ki canduk me gicikke ma kiyubo ki jabu dok cung pi tye pa Jehovah. (Nia 25:​21, 22) Lalamdog Madit keken aye onongo kiye bote ni odony i nge bong kicika wa i Kabedo Maleng Makato Ducu kicel keken mwaka ki mwaka i Nino me Kwanyo Bal. (Levi. 16:​2, 17) Mwaka ki mwaka, en onongo donyo kunnu ki remo pa lee me kwanyo bal ma mege ki bal pa rok me Icrael ducu. Lacen, Jehovah otiyo ki cwiny mere maleng me nyuto tyen lok me  jami mapatpat ma nonge i kema.​—Ibru 9:​6-8. e

13. Gin ango ma Kabedo Maleng ki Kabedo Maleng Makato Ducu cung pire i kare-ni?

¹³ Yo me woro Jehovah i kare-ni. Jo manok keken ki i kin lupwonnye pa Kricito aye kiwirogi ki cwiny maleng. Jo magi ma welgi romo 144,000 gibitic macalo lulamdog i polo kacel ki Yecu. (Yabo 1:6; 14:1) I kare ma pud gitye i lobo, Lubanga wirogi ki cwiny maleng dok lokogi gidoko lutinone kikome. Kabedo Maleng i kema cung pi wat man ma gitye kwede ki Lubanga. (Rom. 8:​15-17) Kabedo Maleng Makato Ducu i kema cung pi polo, ka ma Jehovah bedo iye. “Bongo kicika” ma onongo poko kin Kabedo Maleng ki Kabedo Maleng Makato Ducu cung pi kom Yecu. I kare ma onongo en tye ki kom me remo, onongo pe twero donyo i polo me tic macalo Lalamdog Madit i ot pa Lubanga i yo me cwiny. I kare ma Yecu omiyo kome macalo ginkok pi dano, en oyabo yo me cito i polo pi Lukricitayo ducu ma kiwirogi. Gin bene myero kong guto wek gunong mot me kwo i polo. (Ibru 10:​19, 20; 1 Kor. 15:50) I nge cer pa Yecu, en odonyo i Kabedo Maleng Makato Ducu i ot pa Lubanga i yo me cwiny, ka ma jo ma kiwirogi ducu gibiribbe kwede iye lacen.

14. Ma lubbe ki Jo Ibru 9:​12, 24-26, pingo yub me woro i ot pa Lubanga i yo me cwiny ber loyo yo me woro pa Luicrael?

¹⁴ Dong watwero neno ka maleng ber pa yub pa Jehovah pi woro me ada ma jenge i kom ginkok dok Lalamdog Madit Kricito aye telo wiye. Lalamdog madit i Icrael onongo donyo i Kabedo Maleng ma kitiyo ki cing kun tero remo pa lee, ento Yecu odonyo “i polo kikome,” ma en aye kabedo maleng loyo ducu, me cung i nyim Jehovah. Ki kunnu, en omiyo wel me kwone macalo dano ma pe ki roc piwa “wek ekwany bal woko pi mine kene macalo gitum.” (Kwan Jo Ibru 9:​12, 24-26.) Gityer pa Yecu kwanyo balwa woko kwicikwici. Kit ma dong wabineno kwede, kadi bed watye ki gen me kwo i polo nyo i lobo, wan ducu watwero woro Jehovah i ode.   

15. Angagi ma onongo gitiyo i dyekal me kema me woro?

¹⁵ Yo me woro Jehovah i kare macon. Kema me woro onongo tye ki dyekal acel. Man onongo kabedo malac ma kirumo woko ki cel ka ma lulamdog gitiyo iye ticgi. Keno tyer me gitum awanga onongo tye i dyekal meno, kacel ki otako mola ma gwoko pii ma lulamdog gitiyo kwede me lwok ma peya gucako tiyo ticgi. (Nia 30:​17-20; 40:​6-8) Ento, ot pa Lubanga ma kigero lacen, onongo bene tye ki dyekal ma woko ka ma jo ma pe gubedo lulamdog gitwero woro iye Lubanga.

16. Angagi ma gitiyo i dyekal aryo mapatpat ma i ot pa Lubanga i yo me cwiny?

¹⁶ Yo me woro Jehovah i kare-ni. Ma peya gucito i polo ka tic macalo lulamdog kacel ki Yecu, udong jo ma kiwirogi gitiyo i dyekal ma i iye me ot pa Jehovah i yo me cwiny. Otako mola ma onongo kigwoko iye pii i kema ki dok i ot pa Lubanga, poyo wigi, kacel ki Lukricitayo ducu, ni pire tek me bedo leng i kitgi ki i worogi. Dong, “lwak dano mapol ata,” ma gimiyo cwakgi bot omegi Kricito-ni, kono gicung i dyekal mene? Lakwena Jon onenogi ma “gucung i nyim komker [pa Lubanga] . . . ma gitiyo bote i ode dyeceng ki dyewor.” (Yabo 7:​9, 13-15) Lwak dano mapol ata-ni gitimo man i lobo kany i dyekal ma woko me ot pa Lubanga i yo me cwiny. Pud dong watye ki  pwoc ya ni Jehovah omiyo botwa kare maber me wore i ode!

17. Mot mapatpat ango ma watye ki kare me miyo bot Jehovah?

¹⁷ I kare-ni, Lukricitayo ducu gitye ki mot me woro Jehovah kun gitiyo ki cawagi, kerogi, ki jami me kom ma gitye kwede. Kit macalo lakwena Paulo otito kwede bot Lukricitayo ma Luibru, wan bene watwero miyo “pakwa bot Lubanga i kare ducu macalo gitum ma gityero bot Lubanga, kun wawok ki bot Yecu; meno aye pwoc ma wamiyo ki dogwa ka watuco nyinge.” (Ibru 13:15) Watwero nyuto ni watye ki pwoc pi motwa me woro Jehovah ka wamiyo bote gin maber loyo ma watye kwede.

18. Ma lubbe ki Jo Ibru 10:​22-25, jami mene ma omyero watimgi kare ducu, dok ngo ma myero wiwa pe owil iye matwal?

¹⁸ Kwan Jo Ibru 10:​22-25. I agikki me waragane bot Lukricitayo ma Luibru, Paulo oryeyo jami ma kare ducu omyero watim ka waworo Jehovah. Jami magi kwako lega bot Jehovah, tito kwena, cokke kacel, ki dong cuko cwiny luwotwa “makatone kit macalo wuneno nino maca dong tye ka nyiko cok-ki.” I agikki me buk me Niyabo, lamalaika pa Jehovah owaco ni: “Wor Lubanga.” (Yabo 19:10; 22:9) En onwoyo lok man tyen aryo me nyuto kit ma lok man pire tek kwede. Dong walego ni wiwa pe owil i kom ada ma tere tut ma wapwonyo ma kwako ot pa Jehovah i yo me cwiny, kacel ki mot ma watye kwede me woro Lubangawa madit tutwal-li!