1. O cecay coyoh pasowalay to maanan? Pakayni kitanan i, o maanan ko tatodong nonini hani?

 ANO ira ko coyoh pasowal tisowanan i, mamitengil kiso han? Soˈlinay haw i, anini iraay ko cecay coyoh pasowal ‘to kasakitakit, kasangasaw, kasasowalen ato kasafinawlan.’ O manan kora sowal hani? ‘Ka ngodoen namo ko Kawas, pahemeken Cingra . . . Ka pidoko kamo to misangaˈay to kakarayan ato sera a Tapang’ sanay. (Paˈarawan 14:6, 7) Ci Yihofa o tada cecayay a soˈlinay Kawas, o tamdamdaw mamidoko Cingranan. Paitinian Ningra kita i noˈadingoan a tadamaanay fangcalay sefi matayal saki Cingranan, tada miakoˈiday kita Cingranan!

2. Noˈadingoan a tadamaanay fangcalay sefi o maanan ko mitoroˈan? (Nengnengen ko sapatongal lalakaw “ Onini Fangcalay Sefi Cowa ka Pitoroˈ to Maanan?”)

² Onini noˈadingoan a fangcalay sefi o manan ko mitoroˈan hani? Aicowa kita mikilim to milingatay a sapitadtad hani? Onini a fangcalay sefi cowa ko soˈlinay a lomaˈ ko misowalan, ao mikitinian ni Yihofa to sapatefoc ni Yis a sapatoˈaya a midokoay a limasmas, mamitoor ko tamdaw tonini a limasmas midoko Cingranan, hongaˈ milifok to pihayda Ningra. Isaka 1 hahekalan, tarokos ci Pawlo patikamiay to itiniay i Yutiya a Hipray Krisciyang. Itira tora tikami, mitadtaday cingra tonini a limasmas. b

3-4. Hano calemcem ci Pawlo to Yutiyaay a Hipray Krisciyang hani? Samaanay cingra padama cangranan hani?

 ³ Hano patikami ci Pawlo to i Yutiyaay Hipray Krisciyang hani? Alatek tosaay ko lalangian. Saka cecay, pakalalokay cangranan. Ilalomaˈ nangra ˈalomanay tamdaw mimingho midokoayto to Yutayakiyo. Mala Krisciyangto cangra i, alatek malikafay no ˈaˈideman no pidoyongan, samanen o Krisciyang awaay ko tadamaanay fangcalay sefi pidokoan to Kawas, awaay ko soˈlinay cadada pipatafangan to sapatoˈaya, awaay ko masakapotay a saysi matayal saki cangranan. Onini a demak patoleday to falocoˈ nangra alatek, misatapangto a mangiyangi ko pakasoˈlin no falocoˈ nangra. (Hipray 2:1; 3:12, 14) O papinapina tamdaw ilalomaˈ nangra alatek sapatatikolaw midoko to Yutayakiyo.

⁴ Saka tosa, somowalay ci Pawlo to Hipray Krisciyang cowa ka pisongilaˈ cangra komaen to “ˈatekakay a kakaenen” no Kimad no Kawas, cowa pisaˈicel cangra cipinang to faelohay anoca ikemoday a soˈlinay kimad no Fangcalay Cudad. (Hipray 5:11-14) Ano nengnengen i, ilalomaˈ nangra iraayho ko midofdofay to Rikec ni Mosi. Kawra mitadtaday ci Pawlo, o misaˈosian no Rikec a sapatoˈaya cowa ko mamisongilaˈ mihepol to raraw, mankora ‘malasawadayto’ kora Rikec. Dotoc i, pasifanaˈan ni Pawlo cangra to ikemoday a soˈlinay kimad. Patalipaˈelal cangranan iraay ko ‘ikakaay ko nika ngaˈay a tokel’ no Krisciyang, samanen onini a tokel misalalangiay to sapatefoc ni Yis, o ngangaˈay a padama cangranan ‘miingid to Kawas.’—Hipray 7:18, 19.

5. Cacipinang kita to maanan lalakaw no Hipray cudad? Misamaanay hani?

⁵ Pasowalan ni Pawlo ko Hipray a salikaka, o pidoko no Krisciyang hano mikikaka ko nika ngaˈay to isaˈayaway noka pidoko nangra. O limasmas no pidoko no Yutayakiyo ‘o ˈadingo aca no ikoran a demak, ci Kristo ngaˈ o tatirengan nora ˈadingo.’ (Kolosay 2:17) O ˈadingo hananay i, cowa ko tatirengan. Mankora, somowalay ci Pawlo to limasmas no pidoko no Yutayakiyo o ˈadingo aca, tatodong i, iraayho ko mikikakaay ko nika ngaˈay a midokoay a limasmas, onini a limasmas ngaˈ o soˈlinay a tatirengan. O cacipinang kita tonini sapihepolaw ni Yihofa to raraw ita a limasmas, hongaˈ pakasoˈlinen kita to hahaydaen ni Yihofa ko pidoko ita Cingranan. Dotoc i, mamikitini kita i pitadtad no Hipray cudad, palalini to ‘ˈadingo’ (o pakayraan no pidoko no Yutaya tamdaw) ato ‘tatirengan nora ˈadingo’ (o pakayraan no pidoko no Krisciyang). Mihaen ngaˈ, ihkalto a mafanaˈ kita toya noˈadingoan a tadamaanay fangcalay sefi ato kalaliting ita tonini fangcalay sefi.

6. O sapimaan ko fangcalay kopang?

⁶ O pakayraan no pidoko no Yutaya tamdaw. Ora pitadtad ni Pawlo mikitiraay to fangcalay kopang a misatapang. (Nengnengen ko coka “O Pakayraan no Pidoko no Yutaya Tamdaw—O Pakayraan no Pidoko no Krisciyang.”) Ora fangcalay kopang hananay i, o ‘kasasoˈarawan to Kawas’ a kitiraan, matiraay to pakopangan a lomaˈ, o nipatirengan ni Mosi ˈAyaw no Kongyen saka 1512 mihecaan. Tayniay ko Israil tamdaw, ikaˈayaw ni Yihofa. Itiniay cangra patoˈaya ci Yihofaan. Ya itiniho i kohkohan ko Israil tamdaw misalinalinah i, mihawikidanto nangra konini fangcalay kopang a micoloˈ. Maedeng 500 mihecaan, o pidokoan a kitiraan no Israil tamdaw konini fangcalay kopang, tangasa mapatirengto ko fangcalay sefi i Yirusalim. (Kasadakan 29:43-46; 25:8, 9; Saˈosi 9:22) Pakaynien to Krisciyang ko sowal i, onini fangcalay kopang o tahapinangan to ikakaay ko nika ngaˈay a limasmas.

7. Noˈadingoan a tadamaanay fangcalay sefi ihacowaay a tatokian masadak hani?

⁷ O pakayraan no pidoko no Krisciyang. Nolitengan a fangcalay kopang ‘o tahapinangan ato ˈadingo no ikakarayanay a demak,’ mitaypiyaway to noˈadingoan a tadamaanay fangcalay sefi. Sowal ni Pawlo ‘onini fangcalay kopang o tahapinangan aca, somowalay to aniniay mafekaday a demak.’ (Hipray 8:5; 9:9) Mikitini tora sowal ningra mahapinangay ita, tiya mitilid cingra to Hipray cudad i, iraayto konini noˈadingoan a fangcalay sefi. Itiniay i Kongyen 29 miheca a masadak. Tora mihecaan, micadaay ci Yis to paputisem, hanaca mapanilnilay no fangcalay saocor, itiyaay misatapang cingra malo ‘sakakaay saysi’ ni Yihofa itini tonini noˈadingoan a fangcalay sefi. c—Hipray 4:14; Dmak 10:37, 38.

8-9. Mikitini Hipray 7:23-27, tadamaanay Sakakaay Saysi ci Yis Kristo ato sakakaay saysi no Israil iraay ko taˈangayay kasasiromaan, hano saan ko sowal hani?

⁸ O pakayraan no pidoko no Yutaya tamdaw. Mitaypiyaway to finawlan ko sakakaay saysi i kaˈayaw no Kawas. Tiya mapatireng ko fangcalay kopang i, mapanilnilay ni Yihofa ci Aron malo saka cecay a sakakaay saysi no Israil. Kawra matira o sowal ni Pawlo: ‘Madadotodotocay a mala saysi ko ˈalomanay tamdaw, tona mamapatay cangra, cowa ka ngaˈay a midaˈoc mala saysi.’ d (ˈOsien ko Hipray 7:23-27.) Orira sakakaay saysi sahtoay o cowa ka lefot a tamdaw, misaaliay to sapatoˈayaaw pakayni i raraw no niyah. Mihaenay i, o sakakaay a saysi no Israil ato tadamaanay Sakakaay Saysi ci Yis Kristo tada taˈangayay ko nika sasiroma.

⁹ O pakayraan no pidoko no Krisciyang. O Sakakaay Saysi no mita ci Yis Kristo ‘itiniay i soˈlinay fangcalay kopang . . . a matayal. Onini a fangcalay kopang oni Yihofa a mipatirengan, cowa kono tamdaw.’ (Hipray 8:1, 2) Sanay ci Pawlo, ci Yis ‘o midaˈocay a maˈorip, cowa pisaali to mamikotay cingranan a tamdaw mala saysi.’ Roma i, ci Yis ‘awaay ko patelac, cowa ka lecad to ciraraway tamdaw,’ ‘cowa ka lecad to romaroma sakakaay saysi patoˈaya to romiˈamiˈad.’ Dotoc, mamilengo kita to nolitengan a cadada ato sapatoˈaya, atoya cadada ato sapatoˈaya noˈadingoan a fangcalay sefi, iraay ko maanan a kasasiromaan.

10. Patafangan i fodawan a cadada a sapatoˈaya paliˈayaway a mitoroˈ to maanan?

¹⁰ O pakayraan no pidoko no Yutaya tamdaw. Itini i sacomod no kasasoˈarawan a kopang iraay ko cecay fodawan a cadada, itiniay i fafaed nira ko saysi patafang to pinaˈorip ci Yihofaan.  (Kasadakan 27:1, 2; 40:29) Kawrira, onini a sapatoˈaya cowa ko mamisahci a mihepol to raraw no finawlan. (Hipray 10:1-4) Ora padadotocan a patafang i fangcalay kopang a pinaˈorip, o paliˈayaway to ngangaˈay misahci milidong to tamdamdaw a sapatoˈaya.

11. Patafang ci Yis to niyah malo sapatoˈaya i maanan a cadada? (Hipray 10:5-7, 10)

¹¹ O pakayraan no pidoko no Krisciyang. Mafanaˈay ci Yis ocoren ni Yihofa cingra tayni fafekang no sera, o sapatafangaw to ˈorip ningra malo sapilidong to tamdamdaw a sapatoˈaya. (Matay 20:28) Mihaenay haw i, tiya micada to paputisem ci Yis i, patafang to tireng no niyah a milahci to araaw no kakarayan a Wama. (Yohani 6:38; Kalatiya 1:4) Mihaen to demak ci Yis malecaday patafang to ˈorip no niyah i cadada, onini a noˈadingoan a cadada o mitaypiyaway to ‘araaw’ ni Yihofa ci Yisan, onini araaw i, mamikinafalah ci Yis to malefotay ˈorip ningra. ‘Kinacecayay aca patafang’ ci Yis to ˈorip no niyah, ngaˈayayto midaˈoc a mihepol to raraw no mihakelongay cingranan a tamdaw. (ˈOsien ko Hipray 10:5-7, 10.) Dotoc i, nengnengen ita ko ilalomaˈay no fangcalay kopang.

12. Cima ko ngangaˈay micomod i Fangcalay Kitiraan? Cima ko ngangaˈay micomod i Safangcalay Kitiraan?

¹² O pakayraan no pidoko no Yutaya tamdaw. O lalomaˈ no fangcalay kopang ato lalomaˈ no ikoray a fangcalay sefi i Yirusalim iraay ko kalalecadan. Fangcalay kopang iraay ko tosa rawang, o cecay i, ‘Fangcalay Kitiraan,’ ora roma i, ‘o Safangcalay Kitiraan,’ i tenok iraay ko kiradom a palaˈed. (Hipray 9:2-5; Kasadakan 26:31-33) Itini Fangcalay Kitiraan iraay ko cecay no ekim a  padawdawan, cecay pitodohan to exiw ato cecay pitelian to epang a cokowi. Edengan o ‘manilnilay a saysi’ ko ngangaˈay a micomod to Fangcalay Kitiraan midemak to tayal no saysi. (Saˈosi 3:3, 7, 10) Itini Safangcalay Kitiraan i, mitelian ko mitaypiyaway to pikalacafay ni Yihofa to tamdaw a katatelekan a lipa. (Kasadakan 25:21, 22) Edengan o sakakaay saysi ko ngangaˈay i mihecahecaan a Pihepolan to Raraw a Romiˈad mitaˈlif tora kiradom micomod i Safangcalay Kitiraan. (Lifi 16:2, 17) To mihecahecaan, sakakaay saysi mihawikiday to remes no pinaˈorip micomod i Safangcalay Kitiraan, mihepol to raraw no niyah ato polong a Israil. Ikor i, pakaynian i fangcalay saocor, ihkalay ci Yihofa mitadtad tora ilalomaˈay no fangcalay kopang a dafong, o maanan ko mitaypiyawan nonini a dafong.—Hipray 9:6-8. e

13. Itiniay i fangcalay kopang a Fangcalay Kitiraan ato Safangcalay Kitiraan mitaypiyaway to maanan?

¹³ O pakayraan no pidoko no Krisciyang. O nisawawaan ni Yis iraay ko 144,000 tamdaw manilnilay no fangcalay saocor, cangra ato ci Yihofa iraay ko mikiriwiˈay a kalalaˈed, aitini i kakarayan malacafay ci Yisan a mala saysi. (Paˈarawan 1:6; 14:1) O Fangcalay Kitiraan mitaypiyaway, ya itiniho i sera ko 144,000 tamdaw i, mihofocan no fangcalay saocor cangra, malo wawa no Kawas. (Loma 8:15-17) O Safangcalay Kitiraan mitaypiyaway to kaitiraan ni Yihofa a kakarayan. Oya palaˈeday to Fangcalay Kitiraan ato Safangcalay Kitiraan a ‘kiradom’ mitaypiyaway to tireng ni Yis. Ano o ciheciayho a tireng ci Yis i, cowa ko ngangaˈay malo sakakaay saysi a micomod i kakarayan matayal saki Yihofaan. Patafangento ni Yis ko tireng, malo sapilidong to tamdamdaw a ˈaca i, ngaˈayayto ko 144,000 tamdaw milifok to no kakarayan a ˈorip, kawra sasawaden nangra ko nohecian a tireng wangaˈ milifok to mahaenay a sapalifon. (Hipray 10:19, 20; 1 Korinto 15:50) Patikol maˈorip ci Yis ikor, micomodayto i noˈadingoan a fangcalay sefi itini i Safangcalay Kitiraan. Salikor, polong manilnilay no fangcalay saocor a Krisciyang mamikalacafay cingranan.

14. Mikitini Hipray 9:12, 24-26, o pidoko no Krisciyang hano mikikakaay ko nika ngaˈay tono Yutaya a pidoko?

¹⁴ Ihkalay mahapinang ita, o pidoko no Krisciyang mikikakaay ko nika ngaˈay, samanen mipatireng ci Yihofa tonini limasmas, o taˈeneran i, oya mitamorongan a ˈinorong no Sakakaay Saysi ci Yis ato sapatefoc ningra. Sakakaay saysi no Israil mihawikiday to remes no pinaˈorip micomod i mipatirengan no tamdaw a Safangcalay Kitiraan, kawra ci Yis i, ‘tayniay i kakarayan’ i kaˈayaw ni Yihofa. O samakoracay a kitiraan korira, patafang ci Yis to epoc no malefotay ˈorip no niyah, patado kitanan mihepol to raraw. (ˈOsien ko Hipray 9:12, 24-26.) Samanen pacakatay ci Yis to sapatefoc, hato masahciay a malasawad ko raraw no mita. Dotoc maminanam kita, ano o tatayra i kakarayan ko hatokel anoca mamilifok to midaˈocay ˈorip i fafekang no sera, ngaˈayayto kita itini tonini noˈadingoan a fangcalay sefi midoko ci Yihofaan.

15. Cima ko matayalay i potal no fangcalay kopang?

¹⁵ O pakayraan no pidoko no Yutaya tamdaw. Fangcalay kopang iraay ko cecay potal, aitini tonini miˈadipelan a kitiraan matayal ko saysi. Itira tora potal iraay ko cecay pitodohan to sapatoˈaya a fodawan a cadada, ato cecay kamonanawan a fodawan. ˈAyaw no mamidemak to fangcalay tayal ko saysi i, aitini tora kamonanawan a fodawan mikorac to niyah. (Kasadakan 30:17-20; 40:6-8) O ikoray a mipatirengan a fangcalay sefi iraay ko cecay papotalay a potal, ngangaˈay micomod ko caay ko saysi a tamdaw tonini kilac midoko to Kawas.

16. Cima ko matayalay itini ilalomaˈay a potal noˈadingoan a fangcalay sefi? Cima ko matayalay itini papotalay a potal hani?

¹⁶ O pakayraan no pidoko no Krisciyang. ˈAyaw no tatayra i kakarayan mikapot ci Yisan a mala  saysi i, oya mapanilnilay no fangcalay saocor itiniayho i fafekang no sera a Krisciyang, madimadiay cangra itini tonini noˈadingoan a lalomaˈay a potal no fangcalay sefi, matayal saki Kawas. Oya lalomaˈay a potal piparoan to nanom a kamonanawan a fodawan patalipaˈelalay cangranan, o mamitawmec cangra to makoracay waywayan ato noˈadingoan, o sasinanoten no polong Krisciyang konini. Oya madimadiay a midama to salikaka ni Kristo a ‘taˈangayay ˈopo a tamdaw’ aicowa cangra midoko to Kawas hani? Maˈaraway no tarokos ci Yohani tomirengay cangra i ‘kaˈayaw no tadamaanay kamaroˈan, romiˈad dadaya i fangcalay sefi a midoko to [Kawas.]’ O taˈangayay ˈopo a tamdaw itiniay i fafekang no sera a midoko to Kawas, itini i papotalay a potal noˈadingoan a fangcalay sefi cangra matayal saki Kawas. (Paˈarawan 7:9, 13-15) Ira ko saaroˈan ita itini matatodongay noka pidoko a limasmas, tada mamiakoˈid kita ci Yihofaan!

17. Iraay ko fadangalan ita patafang to maanan a sapatoˈaya ci Yihofaan?

¹⁷ Anini, polong a Krisciyang iraay ko mikiriwiˈay a fadangalan patafang ci Yihofaan. Tano maanan a pakayraan hani? Sakadademaken ko toki, ˈicel, ato hafay no niyah micowat to tayal no Hongti Kitakit no Kawas. Matira o sowal ni Pawlo to Hipray Krisciyang, ‘ka padadotoc a pahemek to Kawas, o sapatafang a sapatoˈaya ita koninian; tano ngoyos a milasil to fangcalay ngangan Ningra, mihaen i, o patafangay to minaroˈan no ngoyos kita.’ (Hipray 13:15) Ano patafangen ita ko sangaˈayay ci Yihofaan i, o patalahkalay to misalimlaay to pidoko ci Yihofaan.

18. Aka misakahmaw kita to maanan? Paifalocoˈen ita ko maanan? (Hipray 10:22-25)

¹⁸ ˈOsien ko Hipray 10:22-25. Itini hererekan no Hipray cudad, somowalay ci Pawlo to pina cowa ko sasakahmawen a midokoay a tayal, mahawpay ko pitolon ci Yihofaan, mitenak to tokel no mita, malacafay a masaˈopo i kasakopang, masasipakalalok. Patalipaˈelalayho ci Pawlo kitanan, ‘tona maˈaraway ko nika ngata no romiˈad ni [Yihofa], mamangalef ko pihaen to demak.’ Roma i, itini hererekan no Paˈarawan cudad, o coyoh ni Yihofa kinatosaay misaˈicel a pasowal, ‘ka pidoko to Kawas’ sanay. (Paˈarawan 19:10; 22:9) Nanay paifalocoˈen ita ko soˈlinay kimad pakayni to noˈadingoan a tadamaanay fangcalay sefi, paifalocoˈen ita ko kalimlaan a sapalemed i pidoko to tadamaanay a Kawas, o sasalimlaen ita konini!