1. Aha do na dipaboa sada suru-suruan tu hita? Jala ikkon songon dia do pakkilalaatta?

 BAYAKKON ma molo makkatai suru-suruan tu hamu. Olo do hamu manangihon ibana? Saonari on, adong do suru-suruan na makkatai “tu akka jolma na di tano on, tu saluhut bangso, suku, marga, dohot bahasa”. Didok ibana, ‘Habiari hamu ma Debata jala pasangap ma Ibana. . . . Somba hamu ma Ibana na manoppa banua ginjang, tano on.’ (Pgk. 14:​6, 7) Holan Jahowa do Debata na sittong, jala holan Ibana do na tama disomba. Mandok mauliate do hita ala dilehon Debata do hasangapon tu hita lao manomba Ibana di bagas joro na mulia!

2. Aha do bagas joro na mulia i? (Ida kotak “ Bagas Joro na Mulia i . . . ”)

² Aha do bagas joro na mulia i, jala didia do boi dapotta hatorangan taringot i? Dang sada bangunan bagas joro on, alai on manggombarhon pengaturan taringot ibadat na sittong na dibahen Jahowa marhite tobusan ni Jesus. Takkas do dipaboa Apostel Paulus taringot pengaturan on di suratna tu halak Kristen Heber na di Judea di abad na parjolo. b

3-4. Boasa dibahen si Paulus surat tu halak Kristen Heber na di Judea? Jala songon dia do ibana mangurupi nasida?

³ Boasa dibahen si Paulus suratna i tu halak Kristen Heber na tinggal di Judea? Adong dua alasanna. Na parjolo, lao patoguhon nasida. Alana, godangan sian nasida maragama  Jahudi hinan do sebelum gabe halak Kristen. Olo do ra direhei pamimpin agama Jahudi nasida ala gabe halak Kristen. Alana dang adong bagas joro ni halak Kristen gabe inganan ni nasida lao manomba Debata. Dang adong muse langgatan na gabe inganan ni nasida mambahen pelean tu Debata, jala dang adong malim na boi mangurupi nasida mangulahon i. On boi mambahen metmet roha ni nasida jala mambahen gale haporseaon ni nasida. (Heb. 2:1; 3:​12, 14) Gariada adong do piga-piga sian nasida na tarpikkir mulak muse tu agama Jahudi.

⁴ Alasan na paduahon, ala dang adong upaya ni halak Kristen Heber mamparsiajari parbinotoan na bagas, i ma “sipanganon na karas” sian Hata ni Debata. (Heb. 5:​11-14) Piga-piga sian nasida toktong dope mangihutton Patik ni si Musa. Alani i ma didok si Paulus, dang boi pelean na dipaboa di Patik ni si Musa manesa dosa ni sude halak. I do alana ‘dang dipakke be’ Patik ni si Musa. Jadi diajarhon si Paulus ma piga-piga parbinotoan na bagas sian Hata ni Debata. Jala dipaingot ibana do sude halak Kristen taringot “janji na dumenggan”, i ma marhite tobusan ni Jesus na boi mangurupi nasida “jonok tu Debata”.—Heb. 7:​18, 19.

5. Aha do na porlu taattusi sian bukku Heber, jala boasa?

⁵ Dipaboa si Paulus do tu halak Kristen Heber i, boasa undenggan cara ni nasida manomba Debata sian cara ni nasida tikki maragama Jahudi hinan. Didok ibana, Patik na diihutton halak Jahudi najolo holan “gombaran tu akka na lao masa do i sude, alai Kristus i do anggo na sasittongna”. (Kol. 2:17) Jadi holan gombaran do cara ni halak Jahudi manomba Debata, alana lao adong ma cara na undenggan sian i. Porlu do taattusi pengaturan na dibahen Jahowa lao manesa dosatta asa boi hita manomba Ibana songon na dihalomohon rohana. Saonari tabandingkon ma jo “gombaran” i (cara ni halak Jahudi manomba Debata) tu “na sasittongna” (cara ni halak Kristen manomba Debata) songon na dipaboa di bukku Heber. Molo taulahon on, gabe lam denggan ma pangattusionta taringot bagas joro na mulia jala taboto ma aha do pengaruhna tu hita.

6. Aha do tujuanna dibahen tabernakel di tikki najolo?

⁶ Cara ni halak Jahudi manomba Debata. Tikki dibahen si Paulus suratna i, dipaboa  ibana do taringot tabernakel na dibahen si Musa di taon 1512 SM. (Ida bagan “Cara ni Halak Jahudi Manomba Debata—Cara ni Halak Kristen Manomba Debata”.) Songon kemah do tabernakel i, jala boi do diboan halak Israel i tikki marpinda-pinda. Nungnga naeng 500 taon tabernakel i dipakke halak Israel sahat tu na dipajongjong bagas joro di Jerusalem. (2 Mus. 25:​8, 9; 4 Mus. 9:22) Di tabernakel manang di “kemah parpunguan” i ma marpungu halak Israel lao mangalehon pelean jala manomba Debata. (2 Mus. 29:​43-46) Alai holan gombaran do tabernakel i lao patuduhon cara na dumenggan manomba Debata, na lao diihutton halak Kristen.

7. Nandigan do mulai adong bagas joro na mulia i?

⁷ Cara ni halak Kristen manomba Debata. Tabernakel na dibahen di tikki najolo gabe “gombaran do i lao patuduhon akka na di banua ginjang”. Jala i manggombarhon bagas joro ni Jahowa na mulia. Didok si Paulus, “Lao manggombarhon tikki sisaonari on do kemah [manang, tabernakel] i.” (Heb. 8:5; 9:9) Tikki dibahen si Paulus suratna tu halak Heber, nungnga adong be bagas joro na mulia i. Nungnga adong be bagas joro i sian taon 29 M. Di taon i ma Jesus tardidi jala dipillit Debata marhite tondi parbadia. Jala laos di tikki i ma ibana gabe “sintua ni malim” di bagas joro na mulia i. c—Heb. 4:14; Ul. 10:​37, 38.

8-9. Songon na disurat di Heber 7:​23-27, aha do beda ni sintua ni malim halak Israel tu Sintua ni Malimta Jesus Kristus?

⁸ Cara ni halak Jahudi manomba Debata. Najolo ditugasson do sintua ni malim manguluhon halak Israel lao manomba Debata. Si Aron ma sintua ni malim halak Israel na parjolo sahali. Dipillit Debata do ibana tikki diresmihon tabernakel. Alai songon na didok si Paulus “mate do akka malim i. Alani i, ikkon gattion ni na asing ma malim na parjolo i lao manorusson ulaon ni nasida”. d (Jaha Heber 7:​23-27.) Jala ala dang sempurna nasida, ikkon dilehon nasida do pelean lao manesa dosa ni nasida sandiri. Alai imbar situtu do sintua ni malim ni halak Israel najolo tu Sintua ni Malim na umbalga, i ma Jesus Kristus.

⁹ Cara ni halak Kristen manomba Debata. Jesus Kristus do Sintua ni Malimta. “Marhobas ma ibana di inganan na badia di kemah na sasittongna i. Jahowa do na pajongjokkon i dang jolma”. (Heb. 8:​1, 2) Didok si Paulus “dang porlu [Jesus] gattion ni na asing, ai mangolu do ibana saleleng ni lelengna”. Didok ibana do muse ‘na so ramun do Jesus, jala asing sian halak pardosa’. Jala ‘dang songon sintua ni malim na asing ibana na ikkon ganup ari mangalehon pelean alani dosana’. Saonari tabahas ma imbar ni langgatan dohot pelean na dibahen halak Israel najolo tu na adong di halak Kristen.

10. Manggombarhon aha do akka pelean na ditutung di langgatan i?

¹⁰ Cara ni halak Jahudi manomba Debata. Adong do langgatan inganan manutung pelean situtungon di jolo ni pintu tabernakel. (2 Mus. 27:​1, 2; 40:29) Alai dang boi akka pelean i manesa dosa ni jolma saleleng ni lelengna. (Heb. 10:​1-4) Akka binatang na torus dipelehon i holan gombaran do i tu sada pelean na boi manesa dosa ni jolma saleleng ni lelengna.

11. Manggombarhon aha do langgatan i? (Heber 10:​5-7, 10)

 ¹¹ Cara ni halak Kristen manomba Debata. Diboto Jesus do na disuru Jahowa ibana tu tano on asa mangalehon ngoluna gabe tobusan tu sude jolma. (Mat. 20:28) Alani i, tikki tardidi Jesus dilehon ibana do ngoluna lao mangulahon lomo ni roha ni Jahowa. (Joh 6:38; Gal. 1:4) Jala hira na dipelehon Jesus do dirina di langgatan. Langgatan i manggombarhon lomo ni roha ni Debata, asa dilehon Jesus ngoluna na sempurna gabe tobusan. Holan “sahali ro di saleleng ni lelengna” do dilehon Jesus ngoluna. Tobusan ni Jesus i boi do manesa dosa ni sude jolma na porsea tu ibana saleleng ni lelengna. (Jaha Heber 10:​5-7, 10.) Saonari tabahas ma aha na digombarhon akka bagian na adong di bagasan ni tabernakel i.

12. Ise do na boi masuk tu dua ruangan na adong di tabernakel?

¹² Cara ni halak Jahudi manomba Debata. Sarupa do akka na di bagasan ni tabernakel dohot akka na di bagasan bagas joro na di Jerusalem. Adong dua ruangan disi, i ma “Inganan na Badia” dohot “Inganan na Massai Badia”. Dibahen do tire gabe pembatas ni dua ruangan i. (Heb. 9:​2-5; 2 Mus. 26:​31-33) Di Inganan na Badia adong do inganan ni lampu na sian mas, langgatan manutung dupa, dohot inganan ni roti pelean. Holan malim na “dipillit” do na diloas masuk tusi lao mangulahon tugas ni nasida. (4 Mus. 3:​3, 7, 10) Molo di Inganan na Massai Badia, adong do disi poti parpadanan na sian mas na manggombarhon  di tonga-tonga ni nasida do Jahowa. (2 Mus. 25:​21, 22) Holan sintua ni malim do na boi mangalewati tire tu Inganan na Massai Badia. Jala holan sahali sataon do ibana masuk tusi, i ma di Ari Pardamean. (3 Mus. 16:​2, 17) Ganup taon masuk do ibana tusi mamboan mudar ni binatang lao manesa dosana sandiri dohot dosa ni bangso Israel. Lam leleng lam takkas do dibahen Jahowa pangattusionta taringot akka na adong di tabernakel marhite tondi parbadiana.—Heb. 9:​6-8. e

13. Manggombarhon aha do Inganan na Badia dohot Inganan na Massai Badia na adong di tabernakel i?

¹³ Cara ni halak Kristen manomba Debata. Adong 144.000 sisean ni Kristus naung dimiahi tondi parbadia. Istimewa do hubungan ni nasida dohot Jahowa, jala lao gabe malim ma nasida di surgo rap dohot Jesus. (Pgk. 1:6; 14:1) Inganan na Badia di tabernakel manggombarhon naung dipillit Debata nasida gabe anakna tikki mangolu dope di tano on. (Rom 8:​15-17) Inganan na Massai Badia manggombarhon surgo, inganan ni Jahowa. “Tire pembatas” ni dua ruangan i manggombarhon daging ni Jesus. Saleleng mangolu di tano on dope Jesus, dang boi ibana masuk tu surgo lao gabe Sintua ni Malim di bagas joro na mulia i. Ikkon jolo mate do ibana jala ikkon jolo dipelehon ibana do dagingna gabe tobusan tu sude jolma. Dung i, gabe tarbukka ma dalan tu sude halak Kristen na miniahan lao mangolu salelengna di surgo. Jala ikkon jolo mate do nasida asa boi dapot ni nasida upa di surgo. (Heb. 10:​19, 20; 1 Kor. 15:50) Dung dipahehe Jesus masuk ma ibana tu Inganan na Massai Badia di bagas joro na mulia i, jala ujungna sude halak na miniahan rap dohot ibana disi.

14. Songon na disurat di Heber 9:​12, 24-26, boasa undenggan pengaturan taringot bagas joro na mulia sian pengaturan na diihutton halak Jahudi?

¹⁴ Saonari nungnga takkas be taboto undenggan do pengaturan ibadat na sittong marhite tobusan ni Jesus sian pengaturan na diihutton halak Jahudi najolo. Molo sintua ni malim halak Israel, tu Inganan na Massai Badia do ibana masuk mamboan mudar ni binatang pelean. Alai molo Jesus “tu surgo do ibana masuk”, i ma inganan na paling badia sian sude inganan na asing. Tu jolo ni Debata do ibana ro mangalehon ngoluna na sempurna “lao manesa dosa ni jolma”. (Jaha Heber 9:​12, 24-26.) Tobusan ni Jesus on ma na boi manesa sude dosa ni jolma saleleng ni lelengna. Saonari tabahas ma boi do hita sude manomba Debata di bagas jorona na mulia dang soal hita lao mangolu di tano on manang di surgo.

15. Ise do na martugas di alaman ni tabernakel?

¹⁵ Cara ni halak Jahudi manomba Debata. Adong do alaman di luar ni tabernakel, jala disi ma akka malim mangulahon tugas ni nasida. Di alaman i do dibahen langgatan manutung pelean dohot bak na sian tombaga na dipakke akka malim lao paiasson diri ni nasida andorang so mangulahon tugasna. (2 Mus. 30:​17-20; 40:​6-8) Dung dipajongjong bagas joro, dibahen do tong alaman luarna. Alai akka na so malim pe boi do masuk tusi lao manomba Debata.

16. Ise do na marhobas di alaman ni bagas joro na di bagasan dohot na di luar?

¹⁶ Cara ni halak Kristen manomba Debata. Andorang so gabe malim akka halak na miniahan setia do nasida saleleng di tano on, i ma di alaman ni bagas joro na di bagasan. Jala bak na sian tombaga i paingotton  nasida dohot sude halak Kristen asa toktong ias roha, pikkiran, dohot pangalaho ni nasida. Adong do muse “punguan bolon”, i ma akka halak na setia mangurupi akka na miniahan. Didia do nasida manomba Jahowa? Diida Apostel Johannes do ‘nasida jongjong di jolo ni tahta i. . . . Jala marhobas tu Ibana arian nang borngin di bagas jorona’. Di tano on do nasida marhobas, i ma di alaman luar ni bagas joro. (Pgk. 7:​9, 13-15) Mandok mauliate do hita ala boi hita manomba Debata di bagas joro na mulia!

17. Pelean aha do na boi talehon tu Jahowa?

¹⁷ Sada hasangapon do di sude halak Kristen saonari on boi manomba Jahowa. Dilehon nasida do tikki, gogo dohot arta ni nasida lao melayani Ibana. Songon na didok Apostel Paulus tu halak Kristen Heber, “Toktong ma talehon pujian tu Debata marhite Jesus. Ai songon pelean tu Debata do i. Tabaritahon ma goarna tu akka halak marhite pamanganta.” (Heb. 13:15) Molo talehon na dumenggan tu Jahowa, on patuduhon na taargai do hasangapon na dilehon Jahowa tu hita lao manomba Ibana.

18. Songon na disurat di Heber 10:​22-25, aha do na ikkon torus taulahon? Jala aha do na ikkon torus taingot?

¹⁸ Jaha Heber 10:​22-25. Di panutup surat ni si Paulus tu halak Kristen Heber, dipaboa ibana do akka na ikkon taulahon lao manomba Jahowa. Contohna martangiang, marbarita na uli, marpungu, jala patoguhon akka dongan. Jadi “lam marsitutu ma hita mangulahon i, ai nungnga lam jonok ari ni [Jahowa]”. Di panutup ni bukku Pangungkapon dua hali ma didok suru-suruan, “Somba ma Debata.” (Pgk. 19:10; 22:9) Jadi torus ma taingot akka naung taparsiajari taringot bagas joro ni Jahowa na mulia. Jala taargai ma hasangapon ala boi manomba Debata!