1. Kai si ikataken sada malekat, janah kai ertina man banta?

 ADI lit sada malekat ngerana man bandu, nggit nge kam megikenca? Gundari, lit malekat si sangana ngerana “man tiap bangsa, suku, bahasa, ras umat.” Kai nina? ‘Mbiarlah man Dibata janah muliakenlah Ia. Sembahlah Ia si njadiken langit ras doni.’ (Ket. 14:​6, 7) Jahwe ngenca Dibata situhu-tuhu si arus isembah kerina jelma. Ngata bujur kel kita perban berekenNa kesempaten man banta guna nembah Ia bas rumah pertoton rohaniNa si mulia.

2. Kai nge maksudna rumah pertoton rohani Jahwe? (Nen ka kotak “ Rumah Pertoton Rohani Labo . . . ”)

² Kai kin rumah pertoton rohani e, janah i ja banci sidat keterangen kerna si e? Rumah pertoton rohani labo sada bangunen. Rumah pertoton rohani eme pengaturen si iban Jahwe erpalasken korban tebusen Jesus gelah kerina kalak banci nembah Jahwe alu cara si ngena ateNa. Ijelasken Paulus kerna pengaturen e bas suratna man kalak Kristen Heber si tading i Judea bas abad pertama. b

3-4. Engkai maka itulis Paulus surat man kalak Kristen Heber, janah kai si ijelaskenna?

³ Engkai maka itulis Paulus surat man kalak Kristen Heber i Judea? Banci saja lit dua alasenna. Si pertama, guna mpegegehi kalak e. Sope kalak e jadi kalak Kristen, teremen arah kalak e ngikutken agama kalak Jahudi. Banci saja peminpin agama kalak Jahudi nokoh-nokohi kalak e perban jadi kalak Kristen. Engkai? Perban kalak Kristen la lit rumah pertotonna, la lit ingan nutung persembahenna,  janah la lit imam-imam si ngelayani kalak e. Si e banci erban kitik ukur kalak Kristen janah erban lemah kinitekenna. (Heb. 2:1; 3:​12, 14) Piga-piga arah kalak e banci saja ipengaruhi gelah mulihken ku agama kalak Jahudi.

⁴ Si peduaken, ikataken Paulus atena man kalak Kristen Heber maka perlu usahaken kalak e ngangkai ajaren si mbaru ntah pe si mbages, eme “pangan si keras” si lit bas Kata Dibata. (Heb. 5:​11-14) Piga-piga arah kalak e banci saja ndalanken Undang-Undang Musa denga. Ijelasken Paulus maka korban si ipindo bas Undang-Undang Musa labo banci tuhu-tuhu nasapken dosa. E me sebapna Undang-Undang Musa “imasapken.” Kenca si e, ijelasken Paulus piga-piga kebenaren si terbagesen. Ingetkenna kalak Kristen kerna “arapen si terulin” si erpalasken korban Jesus si banci tuhu-tuhu nampati kalak e “rembak ras Dibata.”—Heb. 7:​18, 19.

5. Kai si perlu siangkai arah buku Heber, janah engkai?

⁵ Ijelasken Paulus man kalak Kristen Heber engkai maka cara kalak e nembah Dibata ulin asangken agama kalak Jahudi. Cara kalak Jahudi nembah Dibata eme “bayangen kerna kai si nandangi reh, tapi daging situhu-tuhu e eme Kristus.” (Kol. 2:17) Payo, cara kalak Jahudi nembah Dibata mbarenda eme bayangen arah cara nembah Dibata bas waktu si nandangi reh. Perlu siangkai pengaturen si iban Jahwe guna nasapken dosata gelah banci sisembah Ia bagi si ngena ateNa. Mari sibahas “bayangen” (cara kalak Jahudi nembah Dibata) ras “situhu-tuhu” (cara kalak Kristen nembah Dibata), si ijelasken bas buku Heber. Alu bage, banci siangkai terulin kai maksudna rumah pertoton rohani janah kai pengaruhna man banta.

6. Uga mbarenda kemah ingan ersembah igunaken?

⁶ Cara kalak Jahudi nembah Dibata. Pembahasen Paulus dasarna eme kemah ingan ersembah si iban Musa tahun 1512 SM. (Nen tabel “Cara Kalak Jahudi Nembah Dibata—Cara Kalak Kristen Nembah Dibata.”) Kemah ingan ersembah bali bagi tenda si banci ibongkar pasang janah ibaba kalak Israel ku ja pe kalak e pindah. Si e igunaken kalak e  hampir 500 tahun dekahna sope rumah pertoton ibangun i Jerusalem. (Kel. 25:​8, 9; Bil. 9:22) Kemah ingan ersembah pe igelari “kemah perjumpan,” janah ingan enda me si ipake kalak Israel guna nembah Dibata ras mpersembahken korban. (Kel. 29:​43-46) Tapi, kemah ingan ersembah pe nggambarken kai si ndauh ulin man kalak Kristen.

7. Ndigan nge rumah pertoton secara rohani enggo lit?

⁷ Cara kalak Kristen nembah Dibata. Kemah ingan ersembah si mbarenda eme “bayangen kerna kai si lit i surga,” janah nggambarken rumah pertoton rohani Jahwe si mulia. Ikataken Paulus maka “kemah e [ntah, kemah ingan ersembah] ncidahken kai si terjadi gundari.” (Heb. 8:5; 9:9) Emaka, sanga itulisna surat man kalak Kristen Heber, rumah pertoton rohani e enggo lit. Si e enggo lit mulai tahun 29 M. Bas tahun e, Jesus iperidiken, ilantik alu kesah si badia, janah mulai ngelayani bas rumah pertoton rohani Jahwe selaku ‘imam si mbelin si mulia.’ c—Heb. 4:14; Perb. 10:​37, 38.

8-9. Kai si beda kel antara imam si mbelin bas Israel ras Imam si Mbelin si mulia, Jesus Kristus? (Heber 7:​23-27)

⁸ Cara kalak Jahudi nembah Dibata. Imam si mbelin bas Israel ertugas guna jadi wakil umat Dibata bas nembah Dibata. Imam si mbelin si pertama eme Arun. Ia ilantik Jahwe sanga kemah ingan ersembah iresmiken. Tapi, ijelasken Paulus maka “imam-imam dungna mate janah lanai banci ndahiken dahinna. Emaka enterem kalak si arus nggantikenca bas ndahiken dahinna.” d (Baca Heber 7:​23-27.) Selain si e, imam-imam si mbelin e la sempurna, emaka arus ibanna persembahen guna dosana. Enda me si beda kel antara imam si mbelin bas Israel ras Imam si Mbelin si mulia, Jesus Kristus.

⁹ Cara kalak Kristen nembah Dibata. Selaku Imam si Mbelinta, Jesus Kristus eme “pelayan . . . bas kemah situhu-tuhu, labo si ibangun manusia tapi si ibangun Jahwe.” (Heb. 8:​1, 2) Ijelasken Paulus maka “perban Jesus nggeluh seh rasa lalap, dahinna selaku imam la perlu igantiken.” Ikataken Paulus ka maka Jesus ‘la najis janah ndauh arah kalak erdosa.’ Emaka, Jesus la bagi imam si mbelin bas Israel, “la perlu persembahkenna korban tiap wari” guna dosa-dosana. Gundari, mari sibahas kai bedana ingan nutung persembahen ras korban persembahen bas cara kalak Jahudi nembah Dibata ras cara kalak Kristen nembah Dibata.

10. Kai nge ertina korban-korban si iban bas ingan nutung persembahen arah tembaga?

¹⁰ Cara kalak Jahudi nembah Dibata. I darat pintu masuk kemah ingan ersembah, lit sada ingan nutung persembahen arah tembaga guna mpersembahken korban binatang man Jahwe. (Kel. 27:​1, 2; 40:29) Tapi korban-korban e labo banci tuhu-tuhu ngampuni kerina dosa. (Heb. 10:​1-4) Korban-korban si ipersembahken alu ratur bas kemah ingan ersembah eme bayangen arah sada korban si banci tuhu-tuhu ngampuni dosa manusia.

11. Ipersembahken Jesus dirina i datas ingan nutung persembahen si nggambarken kai? (Heber 10:​5-7, 10)

 ¹¹ Cara kalak Kristen nembah Dibata. Iteh Jesus maka iutus Jahwe ia ku doni guna mereken kegeluhenna jadi korban tebusen man kerina jelma. (Mat. 20:28) Emaka sanga ia iperidiken, ibuktikenna maka nggit ia ngelakoken peraten Jahwe. (Joh. 6:38; Gal. 1:4) Tempa-tempa ipersembahken Jesus dirina i datas sada ingan nutung persembahen. Ingan nutung persembahen e nggambarken “peraten” Dibata eme arus ikorbanken Jesus dirina selaku manusia si sempurna. Ipersembahken Jesus dirina “sekali seh rasa lalap,” alu bage dosa kerina kalak si erkiniteken man bana banci iampuni seh rasa lalap. (Baca Heber 10:​5-7, 10.) Gundari, mari sibahas kai si igambarken piga-piga bagin si lit bas kemah ingan ersembah.

12. Ise saja nge si banci masuk ku Ingan si Badia ras Ingan Sibadiana?

¹² Cara kalak Jahudi nembah Dibata. Kemah ingan ersembah ras rumah pertoton si ibangun bas pudi wari i Jerusalem lit perserina. I bas ingan e lit dua ruangen eme “Ingan si Badia” ras “Ingan Sibadiana” si ipisahken sada tirai si isulam. (Heb. 9:​2-5; Kel. 26:​31-33) Bas Ingan si Badia, lit ingan lampu si iban arah emas, ingan nutung kemenyan, ras meja roti persembahen. Kalak ‘si enggo ipilih ras ilantik jadi imam’ ngenca si banci masuk ku Ingan si Badia guna ndalanken tugas  si badia. (Bil. 3:​3, 7, 10) Bas Ingan Sibadiana, lit sada peti perjanjin si iban arah emas si nggambarken kerehen Jahwe. (Kel. 25:​21, 22) Imam si mbelin ngenca si banci ngelewati tirai e guna masuk ku Ingan Sibadiana sekali setahun bas Wari Pendamen. (Im. 16:​2, 17) Tiap tahun, masuk ia janah maba dareh binatang-binatang guna erban pendamen man dosana ras dosa bangsa Israel. Bas pudi wari, alu kesah si badia Jahwe, iturikenNa alu jelas kai gambaren arah bagin-bagin si lit bas kemah ingan ersembah.—Heb. 9:​6-8. e

13. Bas cara kalak Kristen nembah Dibata, kai nge si igambarken Ingan si Badia ras Ingan Sibadiana bas kemah ingan ersembah?

¹³ Cara kalak Kristen nembah Dibata. Iantara murid-murid Kristus, lit 144.000 kalak si ipilih ku surga janah banci gejapken kalak e hubungen si istimewa ras Jahwe. Ngelayani pagi kalak e selaku imam-imam i surga radu ras Jesus. (Ket. 1:6; 14:1) Ingan si Badia arah kemah ingan ersembah nggambarken keadan kalak Kristen si ipilih ku surga si enggo iangkat Dibata jadi anakNa sanga kalak e i doni denga. (Rom. 8:​15-17) Ingan Sibadiana arah kemah ingan ersembah nggambarken surga eme ingan Jahwe. “Tirai” si misahken Ingan si Badia ras Ingan Sibadiana nggambarken daging Jesus. Sanga Jesus jadi jelma denga, la ia banci masuk ku surga ras ngelayani jadi Imam si Mbelin bas rumah pertoton rohani. Alu mereken dagingna si sempurna jadi korban persembahen man kerina jelma, ibuka Jesus me dalan guna nggeluh i surga man kerina kalak Kristen si ipilih ku surga. Kalak e pe arus nadingken dagingna guna ngaloken upahna i surga. (Heb. 10:​19, 20; 1 Kor. 15:50) Kenca Jesus ipekeke, masuk ia ku Ingan Sibadiana bas rumah pertoton rohani, i je me pagi kerina kalak si ipilih ku surga ersada ras ia.

14. Engkai maka pengaturen bas rumah pertoton rohani Jahwe ndauh ulin asangken cara kalak Jahudi nembah Dibata? (Heber 9:​12, 24-26)

¹⁴ Enggo jelas siidah maka ndauh ulin pengaturen bas nembah Jahwe si erpalasken korban tebusen ras si ipinpin Jesus Kristus selaku Imam si Mbelin. Imam si mbelin bas Israel mbarenda masuk ku Ingan Sibadiana si iban jelma janahna maba dareh korban binatang. Tapi Jesus “masuk ku surga,” Ingan Sibadiana kel guna ngadap man Jahwe. I je ipersembahkenna dagingna si sempurna si meherga guna kepentingenta, “guna nasapken dosa alu ngorbanken dirina.” (Baca Heber 9:​12, 24-26.) Pengorbanen Jesus e erban dosata banci imasapken seh rasa lalap. Bagi si nandangi sibahas, la soal arapenta i surga ntah i doni, banci sisembah Jahwe bas rumah pertoton rohaniNa.

15. Ise nge si ngelayani bas halamen kemah ingan ersembah?

¹⁵ Cara kalak Jahudi nembah Dibata. Bas kemah ingan ersembah, lit sada halamen si lit pagarna janah halamen e mbelang. I je me imam-imam ngelakoken tugasna. Bas halamen e, lit ingan nutung persembahen si galang si iban arah tembaga guna persembahen tutungen. Lit ka i je baskom tembaga si risi lau, si ipake imam-imam guna mbersihken dirina sope ngelakoken pelayanen si badia.  (Kel. 30:​17-20; 40:​6-8) Tapi rumah pertoton si ibangun bas pudi wari, lit ka halamenna si arah darat, si igunaken kalak si labo imam guna nembah Dibata.

16. Bas rumah pertoton rohani, ise nge si ngelayani bas halamen si arah darat ras si arah bas?

¹⁶ Cara kalak Kristen nembah Dibata. Sope kalak si ipilih ku surga ngelayani jadi imam-imam ras Jesus i surga, kalak e setia ngelayani i doni, bas halamen si arah bas rumah pertoton rohani. Baskom si galang si risi lau ngingetken kalak e bage pe kerina kalak Kristen gelah tetap bersih secara moral ras rohani. Adi bage, i ja nge “kelompok jelma si enterem” si setia ndukung senina-senina Kristus nembah Dibata? Idah Rasul Johanes kalak e “tedis i lebe-lebe tahta” janah ngelakoken “pelayanen si badia man [Dibata] suari ras berngi.” Lakoken kalak e si e i doni eme halamen si arah darat rumah pertoton rohani. (Ket. 7:​9, 13-15) Ngata bujur kel kita perban banci kita ikut nembah Dibata bas rumah pertoton rohaniNa si mulia.

17. Kai nge hak istimewa kalak Kristen bas nembah Jahwe?

¹⁷ Gundari kerina kalak Kristen lit hak istimewana guna mereken persembahen man Jahwe alu nggunaken waktuna, gegehna, ras ertana guna ndukung kepentingen Kerajan Dibata. Bagi si ikataken Rasul Paulus man kalak Kristen Heber, banci ‘terus sibereken korban pujin man Dibata, eme kata-kata si rehna arah babahta nari guna mberitaken gelarNa i lebe-lebe jelma si enterem.’ (Heb. 13:15) Banci sibuktiken maka siergai hak istimewata guna nembah Jahwe alu mereken persembahen si mehulina man baNa.

18. Kai si arus terus silakoken ras si arus terus siinget? (Heber 10:​22-25)

¹⁸ Baca Heber 10:​22-25. Bas pendungi surat Paulus man kalak Kristen Heber, iturikenna piga-piga bagin si arus terus silakoken bas nembah Dibata. Si e termasuk ertoto man Jahwe, mberitaken arapenta, perpulungen, ras mpegegehi sada ras si debanna, janah “reh tutusna kita ngelakoken si e kerina perban siidah wari [Jahwe] enggo reh deherna.” Bas pendungi buku Ketangkasen, ikataken malekat Jahwe, “Sembahlah Dibata!” (Ket. 19:10; 22:9) Lit dua kali ikatakenna bage si mbuktiken maka penting kel si e. Mbera-mbera terus siinget kebenaren si mbages kerna rumah pertoton rohani Jahwe si mulia, janah siergai hak istimewata nembah Dibatata si mulia!