1. Weh wahn aynjel di seh, ahn how dat shuda mek wi feel?

 IF WAHN aynjel kohn taak yu, yoo wuda lis tu ahn? Wel, tudeh, wahn aynjel di taak “tu peepl fahn evri nayshan ahn chraib, ahn tu peepl fahn difrent rays, ahn tu peepl weh taak aal difrent kaina langwij.” Weh di aynjel di seh? “Fyaa Gaad ahn giv ahn gloari . . . Wership di Wan weh mek di hevn ahn di see.” (Rev. 14:​6, 7) Jehoava da di onli chroo Gaad weh evribadi fi wership. Wi need fi chrezha di privilij weh Jehoava gi wi fi wership ahn eena ih spirichwal templ!

2. Wat da Jehoava spirichwal templ? (Koment pahn di baks “ Di Spirichwal Templ Da Noh:”)

² Wat da di spirichwal templ, ahn wehpaat eena di Baibl wi ku fain moa infamayshan weh ku help wi andastan it beta? Di spirichwal templ da noh wahn reel bildin weh wi wership Jehoava. Insted, da di Kristyan way a wership weh Jehoava set op ahn dis way a wership onli pasabl bikaaz a Jeezas ransom sakrifais. Eena di fers senchri, di apasl Paal mi eksplayn moa bowt dis spirichwal templ eena wahn leta weh ih mi rait tu di Heebroo Kristyanz weh mi liv da Judeeya. b

3-4. Wai Paal mi rait wahn leta tu di Heebroo Kristyanz, ahn how hihn mi help dehn?

³ Wai Paal mi rait wahn leta tu di Heebroo Kristyanz? Di fers reezn kuda mi bee fi inkorij dehn. Moas a dehn yoostu fala di Jooish rilijan. An afta dehn mi ton Kristyanz, di Jooish rilijos leedaz mi praabli mak dehn. Wai? Bikaaz di Kristyanz neva ga wahn big ahn priti templ wehpaat dehn kuda goh wership Jehoava, dehn neva ga no alta fi aafa sakrifais, ahn dehn neva ga no prees fi tek di leed. Dis kuda mi diskorij di Kristyanz ahn mek dehn fayt geh week. (Heeb. 2:1; 3: 12, 14) Som a dehn kuda mi eevn geh temtid fi goh bak tu di Jooish rilijan.

⁴ Di sekant reezn wai Paal mi rait di leta tu di Heebroo Kristyanz da-mi fi help dehn si dat dehn neva mi-di chrai fi andastan nyoo er deep Baibl teechinz. Dehnya nyoo er deep Baibl teechinz da di “salid food” weh deh eena Gaad Werd. (Heeb. 5:​11-14) Ih luk laik som a dehn mi stil di fala di Laa weh Gaad mi gi Moaziz. Dat da wai Paal mi help dehn fi andastan dat di sakrifais weh dehn mi-di mek anda da Laa neva inof fi fergiv dehn sinz. Dat da di reezn wai Gaad mi put di Laa a Moaziz “wan said.” Ahn Paal gaahn hed ahn teech dehn sohn deep Baibl teechinz. Hihn mi rimain di Kristyanz bowt “wahn beta hoap” weh onli pasabl chroo Jeezas sakrifais. Da hoap da weh mi wahn help dehn fi jraa “kloas tu Gaad.”—Heeb. 7:​18, 19.

5. Weh impoatant tingz wi need fi andastan fahn di buk a Heebrooz, ahn wai?

⁵ Di Jooz mi bays dehn wership pahn di Laa a Moaziz, wail di Kristyanz mi bays dehn wership pahn Krais. Soh Paal mi help di Heebroo bradaz ahn sistaz fi si dat az Kristyanz fi dehn wership mi faar beta dan how dehn mi yoostu wership Jehoava. Hihn mi yooz wahn iloschrayshan fi mek dehn si dat da oal way a wership da-mi jos “wahn shado a di tingz weh wahn kom, bot di badi weh mek da shado da Krais, ahn hihn da di reel ting.” (Kol. 2:17) Wahn shado da noh di reel ting, ih onli gi di shayp a how di reel ting luk. Soh di way di Jooz mi wership Gaad eena di paas da-mi jos wahn shado. Laytaraan, Jehoava mi wahn set op di reel ting. Dis da-mi di Kristyan way a wership weh mi faar beta dan di way di Jooz mi wership Gaad. Ih impoatant fi andastan di nyoo, Kristyan way a wership weh Jehoava set op eena di fers senchri. Ih aalso impoatant fi andastan weh Jehoava du fi mek wi geh fergivnis fi wi sinz soh dat hihn ku aksep wi wership. Soh mek wi luk pahn how di buk a Heebrooz kompyaa “di shado” (di way di Jooz yoostu wership Jehoava) wid “di reel ting” (di way Kristyanz wership Jehoava). Dis wahn help wi fi andastan wat da di spirichwal templ ahn fi cherish wi privilij fi wership Jehoava eena dis spirichwal templ.

6. How di Izrelaits mi yooz di tabernakl?

⁶ Di shado. Paal mi yooz di tabernakl weh Moaziz mi set op eena 1512 B.C.E. fi  eksplayn di spirichwal templ. (Si di chaat “Di Shado—Di Reel Ting.”) Di tabernakl mi luk laik wahn tent ahn di Izrelait mi yooz it fi bowt 500 yaaz. Dehn yoostu kehr it wid dehn wen deh mi moov fahn plays tu plays. Dehn mi stap yooz it wen dehn mi bil di templ da Jeroosalem. (Eks. 25:​8, 9; Num. 9:22) Di “meetin tent,” er tabernakl, da wehpaat di Izrelaits yoostu goh fi wership Jehoava an aafa dehn sakrifais. (Eks. 29:​43-46) Ih aalso reprizent sohnting weh mi wahn bee moch beta fi Kristyanz.

7. Wen Jehoava mi set op di spirichwal templ?

⁷ Di reel ting. Di tabernakl weh di Izrelaits mi yooz da-mi “jos wahn egzampl fi shoa di tingz weh hapm da hevn.” Di tabernakl mi reprizent Jehoava spirichwal templ. Paal mi seh dat “dis tent [er, tabernakl] stan fi weh egzis now.” (Heeb. 8:5; 9:9) Soh dis meenz dat di spirichwal templ mi don egzis eevn bifoa Paal mi rait ih leta tu di Heebroo bradaz ahn sistaz. Di spirichwal templ, er di Kristyan way a wership, mi staat eena 29 C.E. wen Jeezas mi geh baptaiz. Jehoava mi poar ih hoali spirit pahn Jeezas fi anoint ahn az di “grayt hai prees” fi di spirichwal templ. c—Heeb. 4:14; Aks 10:​37, 38.

8-9. Akaadn tu Heebrooz 7:​23-27, wat da di difrens bitween Izrel hai prees ahn di grayt Hai Prees, Jeezas Krais?

⁸ Di shado. Onli di hai prees kuda mi reprizent di peepl fronta Jehoava. Pahn di saym day wen di Izrelaits mi staat yooz di tabernakl, Jehoava mi pik Ayron fi bee di fers hai prees fi di nayshan. Bot hihn da neva di onli hai prees; dehn mi ga lat moa hai prees afta hihn. Paal mi eksplayn dat “bikaaz a det wahn lata difrent prees mi haftu serv, kaaz wen eech wan mi ded wahn neks wan mi haftu tek ih plays.” d (Reed Heebrooz 7:​23-27.) Ahn sins di hai prees dehn neva perfek, dehn mi haftu aafa sakrifais fi dehn oan sin. Dis mek it klyaa fi si dat dehn ga wahn big difrens bitween di grayt Hai Prees, Jeezas Krais, an di hai prees dehn weh mi serv eena Izrel.

⁹ Di reel ting. Jeezas Krais da fi wee Hai Prees ahn hihn da “wahn servant weh serv . . . eena di chroo tent. Ahn dis tent da weh Jehoava ihself mi set op, noh man.” (Heeb. 8:​1, 2) Paal mi eksplayn dat “bikaaz Jeezas kantinyu fi liv fareva, nobadi wahn serv az prees afta hihn.” Ih mi seh dat Jeezas da wahn hai prees weh “hoali, ahn wan weh difrent fahn sinaz.” Paal mi aalso seh dat Jeezas “da noh laik dehn ada hai prees weh mi haftu aafa op sakrifais tu Gaad evri day fi dehn oan sin.” Now mek wi kompyaa di alta ahn di sakrifais fahn di “shado” wid di alta ahn di sakrifais fahn di “reel ting.”

10. Weh di animal sakrifais dehn pahn di alta mi reprizent?

¹⁰ Di shado. Fronta di tabernakl dehn mi ga wahn alta weh mek owta kapa. Dehn mi yooz da alta fi sakrifais animalz tu Jehoava. (Eks. 27:​1, 2; 40:29) Bot dehndeh animal sakrifais neva inof fi giv kompleet fergivnis fi peepl sinz. (Heeb. 10:​1-4) Insted, dehndeh animal sakrifais mi reprizent di wan sakrifais weh mi wahn free hyoomanz fahn aala dehn sinz fareva.

11. Weh alta Jeezas mi sakrifais ih laif pan? (Heebrooz 10:​5-7, 10)

¹¹ Di reel ting. Jeezas mi noa dat Jehoava mi sen ahn pahn ert fi giv op ih laif az wahn  ransom fi sayv peepl. (Mach. 20:28) Soh wen Jeezas geh baptaiz, ih mi shoa dat ih wilin fi du weh Jehoava waahn. (Jan 6:38; Gal. 1:4) Di alta weh Jeezas aafa op ih laif pan da neva wahn reel alta, bot dis alta reprizent Jehoava “wil,” weh da-mi fi mek Jeezas sakrifais ih perfek laif az wahn hyooman. Jeezas mi aafa ih laif “jos wan taim” soh dat evribadi weh shoa fayt eena hihn ku geh free fahn sin ahn det. (Reed Heebrooz 10:​5-7, 10.) Now, mek wi luk pahn di difrent tingz weh mi deh eensaida di tabernakl ahn weh dehn reprizent.

12. Hoo mi ga permishan fi goh eena di room dehn eena di tabernakl?

¹² Di shado. Eensaida di tabernakl mi ga too room, wid wahn kertn bitween dehn fi separayt wan fahn di neks. Di fers room da-mi “di Hoali Plays,” ahn di neks wan da-mi “di Moas Hoali.” Di templ weh Jehoava peepl mi bil da Jeroosalem mi set op di saym way. (Heeb. 9:​2-5; Eks. 26:​31-33) Di Hoali Room mi gat een wahn goal lampstan, wahn alta fi bon insens pan, ahn di taybl weh ga di hoali bred. Onli di prees dehn, weh dehn “mi poar ail pan,” mi ga permishan fi goh eena di Hoali room fi du di werk weh dehn fi du az prees. (Num. 3:​3, 7, 10) Di Moas Hoali Room mi gat een di aak a di kovenant weh mi kova wid goal. Di onli persn weh kuda mi gaahn chroo di kertn fi goh eena di Moas Hoali Room da-mi di hai prees, an ih onli kuda mi gaan een deh wans a yaa pahn Atoanment Day. Wen di hai prees mi gaahn fronta di aak a di kovenant, da laik ih mi-di goh fronta Jehoava ihself.  (Eks. 25:21; 22; Lev. 16:​2, 17) Evri yaa, hihn wuda goh eena di Moas Hoali Room wid sohn animal blod fi aafa op fi ih oan sin dehn, ahn fi di sin dehn a di nayshan. Laytaraan, Jehoava mi yooz ih hoali spirit fi help wi fi andastan weh dehndeh difrent tingz eena di tabernakl mi reprizent.—Heeb. 9:​6-8. e

13. Weh di Hoali ahn di Moas Hoali eena di tabernakl reprizent?

¹³ Di reel ting. Onli 144,000 a Jeezas disaiplz geh anointid wid hoali spirit, ahn dehn ga wahn speshal rilayshanship wid Jehoava. Dehn wahn serv az prees da hevn wid Jeezas. (Rev. 1:6; 14:1) Di Hoali Room reprizent di speshal rilayshanship weh dehn gat wid Gaad bikaaz hihn yooz ih hoali spirit fi adap dehn fi bee ih chiljren wail dehn stil liv pahn ert. (Roam. 8:​15-17) Di Moas Hoali Room eena di tabernakl reprizent hevn, di plays wehpaat Jehoava liv. “Di kertn” weh separayt di Hoali Room fahn di Moas Hoali Room reprizent Jeezas hyooman badi. Az lang az Jeezas da-mi wahn hyooman, hihn kudn goh da hevn fi serv az di grayt Hai Prees eena Jehoava spirichwal templ. Wen Jeezas giv op ih hyooman laif, hihn mi oapm di way fi mek di 144,000 goh da hevn. Jos laik Jeezas, dehn kudn goh da hevn wid dehn hyooman badi. Dehn haftu ded fers bifoa dehn ku goh da hevn. (Heeb. 10:​19, 20; 1 Kor. 15:50) Afta Jeezas mi geh rezorek, hihn kuda mi gaan eena di Moas Hoali Room eena di spirichwal templ. Da rait dehsoh aala di 144,000 wahn soon jain ahn.

14. Akaadn tu Heebrooz 9:​12, 24-26, weh mek di nyoo way a wership weh Jehoava set op beta?

¹⁴ Ih klyaa fi si dat di Kristyan way a wership weh Jehoava set op faar beta dan how di Jooz mi yoostu wership Jehoava. Jeezas da di Hai Prees weh leed dis nyoo way a wership weh bays pahn fi hihn ransom sakrifais. Di hai prees a Izrel yoostu goh eena di Moas Hoali Room a di tabernakl er di templ wid sohn animal blod fi aafa op tu Jehoava. Bot Jeezas neva gaan eena di Moas Hoali Room weh hyoomanz mek. Jeezas mi gaan “eena hevn” fronta Jehoava ihself, an ih mi aafa op di valyu a di perfek hyooman laif weh hihn mi giv op. Jeezas mi “geh rid a sin chroo fi hihn oan sakrifais,” an onli dis sakrifais ku geh rid a aala wi sin dehn fareva. (Reed Heebrooz 9:​12, 24-26.) Weda wi hoap da fi liv da hevn er fi liv pahn di ert, aala wi ku wership Jehoava eena ih spirichwal templ. Mek wi fain owt how.

15. Hoo mi serv eena di koatyaad weh mi deh rong di tabernakl?

¹⁵ Di shado. Di tabernakl mi ga wahn koatyaad. Di koatyaad da-mi wahn oapm ayrya rong di tabernakl weh mi ga wahn fens rong it. Da rait dehsoh di prees dehn mi du fi dehn werk. Fi egzampl, dehn yoostu aafa op bon aafrin pahn wahn alta weh mi mek owta kapa, ahn dehn yoostu kleen dehnself wid di waata weh deh eena di baysn weh mek owta kapa. (Eks. 30:​17-20; 40:​6-8) Bot di templ dehn weh dehn mi bil layta mi ga too koatyaad. Di fers wan da wehpaat peepl weh da noh prees wuda goh fi wership Jehoava. Wen yu goh eena di templ yu mi wahn paas chroo dis fers koatyaad. Di sekant koatyaad da wehpaat di prees dehn yoostu du dehn werk.

16. Hoo serv eena di koatyaad dehn eena di spirichwal templ?

¹⁶ Di reel ting. Kristyanz weh deh pahn di ert ku eeda serv eena di fers er sekant koatyaad. Bifoa anointid Kristyanz goh da hevn  fi serv az prees wid Jeezas, dehn serv Jehoava eena di sekant koatyaad eena di spirichwal templ. Di big baysn wid waata weh mi deh fronta di tabernakl ahn di templ help di 144,000, an aala wee az Kristyanz, fi memba dat wi need fi liv op tu Jehoava standadz ahn wi need fi kip wiself spirichwali kleen. Soh den, da wehpaat di “big krowd a peepl” hoo sopoat Jeezas anointid bradaz di wership Jehoava eena di spirichwal templ? Di apasl Jan mi si di big krowd di “stan op fronta di chroan.” Dehn deh eena di fers koatyaad “di wership hihn [Gaad] day ahn nait eena ih templ.” (Rev. 7:​9, 13-15) Wi soh graytful fi di apachooniti Jehoava gi wi fi wership hihn eena ih spirichwal templ!

17. Weh kaina sakrifais wee ku aafa op tu Jehoava tudeh?

¹⁷ Tudeh, aala wi ga di privilij fi yooz wi taim, enerji, ahn mateeryal tingz fi serv Jehoava. Jos laik weh di apasl Paal mi tel di Heebroo bradaz ahn sistaz, aala wi fi “aalwayz prayz Gaad; dis da di sakrifais weh wi aafa op tu Gaad. Ahn wid di werdz weh kom owta wi mowt, mek wi tel adaz bowt ih naym; dis da di froot weh wi aafa op tu Gaad.” (Heeb. 13:15) Yu shoa dat yu chrezha di privilij fi wership Jehoava wen yu giv ahn yu bes.

18. Weh wi shuda aalwayz du, ahn weh wi noh waahn ferget? (Heebrooz 10:​22-25)

¹⁸ Reed Heebrooz 10:​22-25. Da di en a Paal leta weh hihn mi rait tu di Heebroo bradaz ahn sistaz, hihn mi menshan sohn tingz weh aala wi need fi aalwayz du. Fi egzampl, wi fi aalwayz pray tu Jehoava, preech tu adaz, goh da wi Kristyan meetin dehn, an inkorij wan anada. Ahn wi fi “du aala dehnya tingz moa ahn moa sins wi noa dat [Jehoava] day di jraa kloasa.” Eena di buk a Revilayshan, aalmoas tu di en, too taimz Jehoava aynjel mi seh: “Yu fi wership Gaad!” (Rev. 19:10; 22:9) Wen di aynjel mi seh it too taimz ih di shoa wi dat da sohnting veri impoatant. Soh wi noh waahn ferget eni a dehnya tingz weh wi laan bowt Jehoava grayt spirichwal templ, ahn wi waahn cherish di privilij wi gat fi wership Jehoava!