1. Ka lariñagubei aban ánheli, ani ida luba wóunabun lun uganu le lariñagubei woun?

 LUN hamuga san layanuhan aban ánheli huma haganbuñein hamuga san? Uguñe weyu, anihein aban ánheli íchiga uganu “houn sun néchanigu, rasa, luwuyerigu dimurei luma sun fulasu”. Kati lariñagubei? Lariñaguña: “Inebelá Bungiu hun, ru huguyame uéiriguni lun; […]. Hudugua humá lun le adügübalin sielu luma ubóu, barana luma lísensen duna” (Aruf. 14:​6, 7). Sun wagía lunti wáhuduragun lun Heowá, Bungiu inarüniti. Seremei wamuti luagu líchuguni chansi le woun lun wáhuduragun lun lidan óunwenbu aransehani le ladügübei. Ma lubuidun chansi!

2. Ka san mini lubéi aransehani le ladügübei Heowá lun wáhuduragun lun? (Ariha huméi rekuáduru le gíribei “ Le úabei mini lan”).

² Katei san aransehani le ani ka fánreinti tídangiñeti Bíbülia ayanuhabei luagu? Mama wayanuhaña luagu áhuduraguni lun Heowá tidan aban ténpulu. Wayanuhaña luagu sun aransehani le ladügübei Heowá lun wáhuduragun lun kei labusenruni, seremei lun lani Hesusu sákürifisiu. Lidan furumiñeti sígulu afuranguagüdati apostolu Pábulu saragu ariñahani luáguti ligaburi áhuduraguni le. Darí wamuti ariñahani le tidan gárada to labürüdüboun houn kristiánugu ha ebüréuna ha meha awinwandubaña Hudéa. b

3, 4. Ka san uagu nidiheri lubéi meha Pábulu hawagu kristiánugu ebüréuna, ani ida liña líderaguniña?

³ Ka uagu labürüha Pábulu houn kristiánugu ebüréuna ha awinwandubaña Hudéa? Chóuruti lébubei lan labürühan houn, luagu bián resun súdiniti. Furumiñe, lun líchugun dǘgüdaguaü houn. Hiibe-agei hádangiñe, tidan relihión hani huríu haweirida, ani  másiñati adüga hamá tábutigu relihión tuguya bula hau ladüga hadügagun houngua kristiánugume. Ka uagu hadüga bula hau? Lugundun úatu aban ténpulu to wéndegutu hama kristiánugu lun háhuduragun lun Bungiu tidan kei to hámaboun huríu ani úati giñe latarü hama lun hadagaragüdün, ni fádirigu. Gayaraati ladügün katei le lun ledebilidun hafiñen lani Kristu disipulugu (Ebü. 2:1; 3:​12, 14). Másiñati añahein lan hádangiñe samina hamá hagiribudun hárigoun tidoun hani huríu relihión.

⁴ Libiaman, adügati Pábulu lun harihini kristiánugu ebüréuna mama lan hadügüñein sun hayaraati lun gunfuranda wamani arufudahani tídangiñeti Lererun Bungiu le iserigilitimabei o le hulilibei, le ítarabei kei “éigini le dǘgüdati” le adarirubei tidan Lererun Bungiu (Ebü. 5:​11-14). Genegeti meha añahagua lan hádangiñe afalarei Lilurudun Moisesi. Gama lumoun, afuranguagüda lumuti Pábulu houn siñá lan ladügün Lúrudu le meha líchugubei Moisesi lun ferudunawa lan figóu sunsuinagubei. Ligíati lébubei mahuudun hali lan lilurudun Moisesi. Lárigiñe, aba larufudahani apostolu Pábulu lídangiñe inarüni huliliti ligía houn. Aba laritaguagüdüniña seremei lan sákürifisiu le ladügübei Hesusu anihein lubéi “emenigini le buítimati” hama le gayaraabei layarafagüdüniña lun Bungiu (Ebü. 7:​18, 19).

5. Ka lunbei gunfuranda wamani, ani ka uagu?

⁵ Aba lafuranguagüdüni Pábulu houn líbirigu ha ebüréuna ka lan uagu buídutimahali lubéi ligaburi háhuduragun kristiánugu lun Heowá sügǘ luéi ligaburi láhudurawagun lun lidan meha binadu dan. Aba lariñagun ligaburi lan háhuduragun huríu lun Bungiu tidan relihión hani huríu “liyawadirügüñein lan le lunbei liabin”. Ani ariñagayati: “Kristu ligía linarünbei” (Kol. 2:17). Aban iyawadinaü, ábanrügüñein liyawa katei mama ligía tímatimaatibei. Ítarameme, ligaburi meha háhuduragun huríu lun Bungiu dan meha ligira aban meha liyawadina le lunbei meha liabin. Mégeiwati gunfurandawa lan aransehani le ladügübei Heowá lun wáhuduragun lun. Ka uagu? Adügati katei le lun ferudunawa lan wafigoun ani adügati giñe lun wáhuduragun lun Bungiu kei le aubei labusenra. Guentó wagoubaguagüdali “iyawadinaü” (ligaburi háhuduragun huríu lun Bungiu) lumoun “linarün” (ligaburi háhuduragun kristiánugu lun Bungiu). Lun lira wakutihaali le tariñagubei Gárada houn ha adimurehabalin Ebüréu. Ítara luba gunfuranda wamani buidu buidu aransehani le ladügübei Bungiu lun láhudurawagun lun luma ida liña lan gadan lániwa.

6. Ka meha un tayusurúa sanduariu?

⁶ Iyawadinaü. Ayanuhati Pábulu tuagu sanduariu to ladügüboun Moisesi lidan irumu 1512  lubaragiñe wadaani lun lafuranguagüdüni aransehani le ladügübei Bungiu lun láhudurawagun lun (ariha huméi dibuhu “Iyawadinaü luma le linarün”). Sanduariu, to giñe unboun laguarúa “kianpu lánina óundaruni”, ligía meha fulasu le ñein lubéi hóundaragua ísüraelina lun háhuduragun lun Bungiu luma lun hadagaragüdün lun (Afu. 29:​43-46). Barǘ hamutu meha hámagua sagü meha háguyun lidoun aban fulasu lun lidoun amu lidan fulasu mageirawati (Afu. 25:​8, 9; 1 Lur. 9:22). Séingüñein meha san irumu hau ayusuroun sanduariu darí tábunawagun ténpulu to Herusalénboun. Aban meha katei le buídutimati le lunbei meha liabin dan lárigiñe houn kristiánugu mini tubéi sanduariu.

7. Ídabuga lagumesera iseri aransehani le ladügübei Heowá lun láhudurawagun lun?

⁷ Le linarün. Le mini tubéi sanduariu “liyawarügüti le burí siélubei”, mini lan, lubuidun aransehani le ladügübei Heowá lun láhudurawagun lun. Ariñagati Pábulu kianpu lan to, o sanduariu “aban lan seini lira lun weyu le uguñebei” (Ebü. 8:5; 9:9). Ligíati dan le labürühabarun Pábulu gárada to houn ebüréuna gumeseeli meha iseri aransehani le ladügübei Bungiu lun láhudurawagun lun. Gumeseeli meha aransehani le lidan irumu 29 lidaaniwagu Kristu. Lidan irumu ligía labadiseira Hesusu, aba lanuadirún lau sífiri sandu ani aba lagumeserun eseriwida kei lufadirin Heowá le tímatimaati lidan iseri aransehani le ladügübei Heowá lun láhudurawagun lun (Ebü. 4:14; Adü. 10:​37, 38). c

8, 9. Según Ebüréu 7:​23-27, ida liña amu hamá fádirigu íñutimatiña ha ísüraelibaña lumoun Fádiri Íñutimati, Hesukrístu?

⁸ Iyawadinaü. Fádiri le íñutimabei ligía meha ayanuhabei luéigiñe hafulesein gürigia ligibugiñe Bungiu. Aarón meha furumiñeti fádiri íñutimati Ísüraeli, Heowá íridubalin dan meha le tederegerubei sanduariu. Aba lariñagun Pábulu: “Ha meha fádirigu, chülütiña agibedagua lugundun kei aba lan burí hóunwegun, siñati hasigirún” (aliiha huméi Ebüréu 7:​23-27). d Gama lumoun, kei giñe chará habéi fádirigu ha íñutimabaña mosu meha hadagaragüdün luagu hafigoun guánarügü. Amu meha Hesukrístu Fádiri le tímatimaati hawéi fádirigu ha íñutimabaña Ísüraeli.

⁹ Le linarün. Hesukrístu Fádiri Íñutimati, “leseriwiduña keisi fádiri […] tidan Sanduariu tímatimaatu to ladügüboun Wabureme Bungiu, mama to hadüga gürigia” (Ebü. 8:​1, 2). Ariñagati giñe Pábulu kei winwan lan Hesusu “lun sun dan, másügürünbei lifisiute keisi fádiri lumoun amu”. Gama lumoun, ariñagayati giñe luagu Hesusu haruma lan “mítaranti kei gafigountiña” ani “mítaranti kei híbiri fádirigu íñutimatiña ha gásubei hadagaragüdün sagü weyu” luagu hafigoun. Ka gayaraabei wariñaguni luagu latarü luma luagu adagaragüdüni? Ariha waméi amu lan iyawadinaü lumoun linarün.

10. Ka mini lubéi adagaragüdüni le adügübei luagu latarü le buronse?

¹⁰ Iyawadinaü. Bóugudi tuéi sanduariu anihein meha aban latarü lauti buronse ñein, ani ñein meha hadagarawagüdüwa animaalu lun Heowá (Afu. 27:​1, 2; 40:29). Gama lumoun, madügünti adagaragüdüni le lun ferudunawa lan hafigoun lílana ageiraü sunsuinagubei (Ebü. 10:​1-4). Hadagarawagüdün animaalu le meha adügǘbei tidan sanduariu liyawadinarügüñein adagaragüdüni le lunbei larumadagüdüniña gürigia sunsuinagubei lídangiñe hafigoun.

11. Ka uagu latarü lederegerei Hesusu libagari keisi sákürifisiu? (Ebüréu 10:​5-7, 10).

 ¹¹ Le linarün. Subudi lumuti meha Hesusu lóunahanbalin lan meha Heowá ubouagu lun líchuguni libagari lebegime hesefurun gürigia (Mat. 20:28). Ligíati, dan le labadiseirunbei aba larufudagun Hesusu lungua lun ladügüni le labusenrunbei Heowá (Huan 6:38; Gal. 1:4). Ítara liña katei le kamá hamuga ladagarawagüdüña lungua lidan aban latarü. Mini lan latarü le “lugundan” Heowá, ani le labusenrunbei Heowá lun ladagaragüdüni Lisaani libagari le mafigounbei hawagu gürigia. Derege lumuti Hesusu libagari “aban wéiyaasu lun sun dan” lun lachibuni sunsuinagubei figóu hawéi sun ha afiñebaña luagu (aliiha huméi Ebüréu 10:​5-7, 10). Guentó, wayanuhan luagu sun le múnadabei tun sanduariu luma le mini lubéi fiu lídangiñe.

12. Ka gayaraabei lebelurun lidan kada rumu le tídanbei sanduariu?

¹² Iyawadinaü. Ligíati, dandu sanduariu kei ténpulu to abunawagunboun dan lárigiñe Herusalén genegeguatu meha. Anihein meha bián rumu tidan: “Fulasu Sánduti” luma “Fulasu le Sándutimabei”, ñeinñoun aban korutína labadinagua bián rumu ligía (Ebü. 9:​2-5; Afu. 26:​31-33). Lidan fulasu le Sánduti anihein meha aban lebu sanudelu lauti golu, aban latarü lun lágudahoun kupali luma aban dábula lun tíchugun fein to anuadirúaboun. Fádirirügüñanu ha anuadahoutiña gayara hebelurun lidoun Fulasu le Sándubei lun hadügüni hadasin le sagüráubei (1 Lur. 3:​3, 7, 10). Lidan rumu le Sándutimabei ñeinñoun bágüsi to lánina daradu to lautu golu mini lan ñeinñein  lan Heowá (Afu. 25:​21, 22). Fádirirügüñein le íñugutimabei gayara lebelurun lidoun rumu le Sándutimabei. Ani beluti aban wéiyaasu luagu irumu lidan luéyuri Ferudunawa lan figóu, ligía lebelurun fádiri le íñugutimabei lau hata animaalu lun ferudunawa lan lifigoun luma hafigoun lílana ageiraü (Fad. 16:​2, 17). Lau lásügürün dan, aba layusuruni Heowá lani sífiri sandu lun lariñaguni létima mini lubéi sun le tídanbei sanduariu (Ebü. 9:​6-8). e

13. Ka mini lubéi fulasu le Sándubei luma le Sándutimabei?

¹³ Le linarün. Añahein aban sétanu hau 144.000 kristiánugu anuadirúaaña lau sífiri sandu ani espechaliti hamadagua luma Heowá. Heseriwiduba kei fádirigu sielu úara luma Hesusu (Aruf. 1:6; 14:1). Sun añahagua lan ya ubouagu, aba lanúadiruniña Bungiu lau sífiri sandu ani aba lanügüniña keisi lirahüñü. Rumu Sánduti le tídanbei sanduariu mini lan umadaguaü espechaliti le hánibei luma Bungiu (Rom. 8:​15-17). Ánheinti rumu le Sándutimabei tidan sanduariu mini lan sielu, le ñein lubéi lawinwanda Heowá. Ánhounti “belu” o korutína to afanreinraguagüdübalin rumu le Sándubei luéi le Sándutimabei mini lan lúgubu Hesusu dan meha le ya lubéi ubouagu. Siñati meha lebelurun Hesusu lau úgubu ligía kei Fádiri le íñugutimabei sielun lidan iseri aransehani le ladügübei Bungiu lun láhudurawagun lun. Lau lederegeruni Hesusu lúgubu keisi sákürifisiu luagu hafulesein gürigia aba ladaaruni üma houn sun kristiánugu anuadirúaaña lun hawinwandun sielu. Lun gayara lan heresibiruni kristiánugu anuadirúaaña hafayeiruaha le siélubei mosu giñe hígiruni hágubu le ubouaguna harigiñegua (Ebü. 10:​19, 20; 1 Ko. 15:50). Lárigiñe láguyugun Hesusu aba lebelurun lidoun Fulasu le Sándutimabei sielun, lau lásügürün dan ñeinba hóundaragua sun kristiánugu anuadirúaaña luma.

14. Según Ebüréu 9:​12, 24-26, ka uagu íñutima lubéi aransehani le ladügübei Heowá lun wáhuduragun lun?

¹⁴ Chóuruti íñutima lan aransehani le ladügübei Heowá lun ñein lan áhuduraguni inarüniti sügǘ luéi hafadirihan sun meha fádirigu hagüra, seremei lun lebegi esefuruni luma lun lafadirihan Hesukrístu. Rumu le Sándutimabei le meha ñein lubéi lebelura fádiri le íñutimabei Ísüraeli hadügün meha gürigia lau háhabu, ani lau meha hata animaalu hebelura. Ánheinti Hesusu: “siélunmeme lebelura” le ñein lubéi Heowá, fulasu létima sándutimabei. Ñein lederegerei lebegi libagari le mafigounbei wawagu súngubei “íchaagueina lungua lun lagidaruni figóu” (aliiha huméi Ebüréu 9:​12, 24-26). Íñutimati lani Hesusu sákürifisiu luéi súngubei lugundun arumadaha lumutiwa sunsuinagubei lídangiñe figóu. Guentó warihaali sun lan wagía gayara lan wáhuduragun lun Heowá lidan aransehani le ladügübei, meberesenga anhein hemenigi wabéi lun wawinwandun sielu o ya lan ubouagu.

15. Ka meha eseriwidubaña lidan tibürürün sanduariu?

¹⁵ Iyawadinaü. Ñeinñein meha aban bürürü tidan sanduariu: aban fulasu le mábuluguti ani ayarawaguati, ñein heseriwida fádirigu. Lidan bürürü ligía ñeinñein óunwenbu latarü le laubei buronse le ñein lubéi ladügǘwa adagaragüdüni le gudawarügüti. Anihein meha giñe aban lagei duna lauti buronse le ñéingiñe lubéi hadabura fádirigu duna lun hachibagun houngua lubá hadügüni hadasin le sagüráubei (Afu. 30:​17-20; 40:​6-8). Dan lárigiñe, dan le tabunawagunbei ténpulu anihein meha giñe bürürü tidan le ñein lubéi gayara lan háhuduragun gürigia lun Bungiu ha mámabaña fádirigu.

16. Kátaña eseriwidubaña lidan kada aban lídangiñe bürürü, mini lan le aransehani le ladügübei Heowá lun wáhuduragun lun?

¹⁶ Le linarün. Lubaragiñe fádiri hamá kristiánugu  anuadirúaaña luma Hesusu sielu ha añaheinguabaña ubouagu, seriwitiña lun Heowá lau úaraguni lidan bürürü le múnadabei, mini lan le, aransehani le ladügübei Heowá lun láhuduragun lun. Óunwenbu lagei duna le meha tídanbei sanduariu luma le meha tídanbei ténpulu haritaguagüda lumutiña giñe súngubei kristiánugu súdiniti lan lun hakipuragun houngua harumañu dandu hágubu kei ligaburi háhuduragun lun Bungiu. Halía san háhuduragua lun Bungiu “saragu gürigia” ha ítarabaña kei mudún ha íderagubaliña kristiánugu anuadirúaaña ha líbirigu Kristu? Ariha lumutiña apostolu Huan, “rara haña ligibugiñe lálana arúeihani” ‘eseriwida lun Bungiu wéyuagu áriebu’. Seriwitiña saragu gürigia ha ya ubouagu lidan bürürü le bóugudigiñebei lidan aransehani le ladügübei Bungiu lun láhudurawagun lun (Aruf. 7:​9, 13-15). Ma lubuidun galugaarun wamá súngubei wagía lidan aransehani le ladügübei Heowá lun wáhuduragun lun!

17. Ka adagaragüdüni gayaraabei wadagaragüdün lun Heowá?

¹⁷ Sun wagía kristiánugu inarünitiña anihein aban lubuidun chansi wama lun wadagaragüdün lun Heowá. Ida luba wadügüni? Lau wayusuruni wadaani, were luma wámati lun wídeha lidan lawanserun uganu luáguti Larúeihan Bungiu. Ítara kei lariñaguni apostolu Pábulu houn kristiánugu ebüréuna, “ligía lunti lubéi wíchugun eteingiruni lun Bungiu súnwandan […], ligía luwuyeribei adagaragüdüni le labusenrúbei Bungiu wámagiñe. Ru wamá lubeiti uéiriguni lun lau wayuma!” (Ebü. 13:15). Ánhawa íchigei le buídutimabei wámagiñe lun Heowá warufudubei gebegitima lan chansi le wámabei lun wáhuduragun lun.

18. Según Ebüréu 10:​22-25, ka ariñahani moun lubéi lun wígiruni ani ka ariñahani moun lubéi lun wabulieiduni?

¹⁸ (Aliiha huméi Ebüréu 10:​22-25). Lidan lagumuhóun fánreinti tidan gárada houn ebüréuna, ayanuhati Pábulu luagu saragu ariñahani luáguti wáhuduragun le moun lubéi lun wabulieidagun luéi. Kéiburi, ayanuhati luagu lisudinin wafurieidun lun Heowá, wayanuhan houn amu luagu wemenigin, wadamuridagun hama wíbirigu luma lun wíchugun gurasu wámagua, lau ariha wamaali lan “luagu yarafaali lan luéyuri Wabureme” Heowá. Lidan lagumuhóun kapítulu le tídanbei líburu to gíriboun Arufudúni, ariñagati lani Heowá ánheli: “Lunlá Bungiu báhuduragua”. Biánñein wéiyaasu lariñaguni lun larufuduni weiri lan lisudinin katei le (Aruf. 19:10; 22:9). Maweiyasun wamá abulieidei ariñahani huliliti le furendei wamaalibei luáguti aransehani le ladügübei Heowá lun láhudurawagun lun ni lun wabulieidagun luéi lueirin ebegi le wámabei lun wáhuduragun lun Wabungiute le wéirigutimabei.