1. Cosa ta habla el un angel y paquemodo se debe afecta kanaton?

 SI MAN cuento contigo el un angel, hay oi ba tu con ele? El deverasan, el un angel tan cuento ahora “con todo nacion, raza, lenguaje y pais.” Cosa ele ta habla? “Tene ustedes miedo con el Dios y dale gloria con Ele . . . Adora con Aquel quien ya hace el cielo y el tierra.” (Rev. 14:6, 7) Si Jehova el solamente verdadero Dios con quien debe adora el todo maga gente. Ta rindi gayot kita gracias cay ya dale le kanaton el un bonito oportunidad que adora con ele na de suyu grande espiritual templo!

2. Cosa el espiritual templo de Jehova? (Mira tambien con el cajon  “El Espiritual Templo Gendeh . . . ”)

² Pero cosa ba el espiritual templo y onde kita puede incuntra maga detalle acerca con ese? Gendeh un literal estructura el espiritual templo. Sino, este el arreglamiento de Jehova para ofrece aceptable adoranza el maga gente base na rescate de Jesus. Ya explica si apostol Pablo con este arreglamiento na carta que ya escribi le con el maga Hebreo Cristiano quien ta queda na Judea del primer siglo. b

3-4. Cosa el maga lingasa de Pablo acerca na maga Hebreo Cristiano na Judea y paquemodo le ya ayuda kanila?

³ Porque ya escribi carta si Pablo con el maga Hebreo Cristiano na Judea? Tiene posible dos razon. Una, ya escribi le para anima kanila. Mayoria kanila ya engranda na religion del maga Judio. Cuando ya queda sila maga Cristiano, posible que ya gangguia kanila el diila maga lider de religion de antes. Porque? Cay el maga Cristiano nuay templo onde anda para adora.  Mas pa, nuay tambien sila maga altar onde hace maga sacrificio con Dios y nuay maga sacerdote quien ta sirvi na templo. Por causa con este, posible que yan luya el fe del maga dicipulo del Cristo. (Heb. 2:1; 3:12, 14) El cuanto kanila baka ya pensa pa gane que bira na Judaismo.

⁴ Ika-dos, ya hace claro si Pablo con el maga Hebreo Cristiano que gendeh sila ta hace esfuerzo para entende con el maga nuevo o hondo enseñanza—el maga “comida duro” que puede incuntra na Palabra del Dios. (Heb. 5:11-14) Ta sale que el cuanto kanila ta sigui siempre con el Ley de Moises. Pero, ya explica kanila si Pablo que el maga sacrificio bajo na Ley gendeh completamente ta puede quita con el diila maga pecado. Por causa con ese, “ya queda cancelao” el Ley. Despues, ya enseña kanila si Pablo cuanto hondo verdad. Ya hace le acorda con el de suyu maga hermano y hermana el ‘un cosa que mas bueno’—el arreglamiento que deverasan puede ayuda kanila para queda “mas cerca con Dios” base na sacrificio de Jesus.—Heb. 7:18, 19.

5. Cosa kita necesita entende na libro de Maga Hebreo y porque?

⁵ Ya explica si Pablo con el de suyu maga Hebreo hermano si porque el adoranza que ta hace sila ahora como maga Cristiano mas bueno contra na adoranza que ta hace sila de antes. El manera de adoranza del maga Judio amo “maga sombra lang . . . del maga cosa-cosa que ay vene. El deverasan gayot amo el cuerpo de Cristo.” (Col. 2:17) El sombra amo forma lang del un cosa; gendeh este el actual cosa. Na igual manera, el adoranza que ya hace el maga Judio de antes amo un sombra lang ciendo tiene pa un mas buen manera de adoranza. Necesita kita entende con el arreglamiento que ya dale si Jehova para puede perdona con el diaton maga pecado y para puede kita adora con ele na aceptable manera. Compara kita con el “sombra” (el manera de adoranza del maga Judio) na cosa “deverasan” (el manera de adoranza del maga Cristiano), como cosa ya explica na Maga Hebreo. Si hace kita se, mas puede kita entende con el espiritual templo y si paquemodo se ta afecta kanaton.

6. Cosa el proposito del tabernaculo?

⁶ El manera de adoranza del maga Judio. Ya usa si Pablo con el tabernaculo que ya introduci si Moises del 1512 B.C.E. como basejan del cosa le ya habla na maga Hebreo. (Mira con el chart “El Manera de Adoranza del maga Judio —El Manera de Adoranza del Maga Cristiano.”) El tabernaculo amo igual na un tolda que ta carga el maga Israelita si ta cambia sila lugar. Ya usa sila con este cerca 500 año hasta ya tiene un permanente templo na Jerusalem. (Ex. 25:8, 9; Num. 9:22) Ese “tolda de miting” amo el lugar onde ta anda el maga Israelita para atraca con Dios, adora con ele y para ofrece maga sacrificio. (Ex. 29:43-46) Pero, el tabernaculo ta representa tambien un cosa que mas bueno para na maga Cristiano.

7. Del cuando ya principia existi el espiritual templo?

⁷ El manera de adoranza del maga Cristiano. El tabernaculo de antes amo “un sombra del Templo del cielo“ y ta representa este con el grande espiritual templo de Jehova. Ya habla si Pablo que “este tolda [o tabernaculo] amo un ilustracion para na presente tiempo.” (Heb. 8:5; 9:9, NWT) Entonces, cuando ya escribi le con el maga Hebreo, ta existi ya el espiritual templo. Ya principia este del 29 C.E. Na ese año, ya bautiza si Jesus, ya queda iscujido por medio del sagrao espiritu y ya principia sirvi como el Alto Sacerdote na espiritual templo de Jehova. c—Act. 10:37, 38; Heb. 4:14.

8-9. Asegun na Maga Hebreo 7:23-27, na cosa aspeto bien diferente el maga alto sacerdote del Israel na Alto Sacerdote que si Jesucristo?

⁸ El manera de adoranza del maga Judio. El alto sacerdote amo el ta representa con el maga gente adelante con Dios. Si Jehova el ya iscuji con el primer sacerdote que si Aaron cuando ya dedica con el tabernaculo. Pero como cosa ya explica si apostol Pablo, ‘bien mucho gayot aquellos maga sacerdote cay ta muri sila y no puede sila continua el diila trabajo.’ d (Le con el Maga Hebreo 7:23-27.) Y ciendo imperfecto aquellos maga alto sacerdote, necesita tambien sila ofrece maga sacrificio para na diila mismo maga culpa. Na ese aspeto bien diferente el maga alto sacerdote na Israel si compara con el Alto Sacerdote que si Jesucristo.

⁹ El manera de adoranza del maga Cristiano. Como diaton Alto Sacerdote, si Jesucristo “ta sirvi . . . na deverasan Tolda que el Señor, y gendeh un gente, amo el ya planta.” (Heb. 8:1, 2) Ya explica si Pablo que ‘si Jesus un sacerdote ya hasta para cuando cay hasta para cuando Le ta vivi.’ Ya omenta pa si Pablo que si Jesus “noay mancha, separtao con el maga pecador” y gendeh igual na maga alto sacerdote na Israel, “gendeh Le necesita ofrece todo el dia maga sacrificio” para na de suyu mismo culpa. Considera kita ahora con el maga diferencia entre na maga altar y maga sacrificio que ta hace el maga Judio de antes y el manera de adoranza del maga Cristiano.

10. Na cosa ta representa el maga sacrificio que ta hace na altar de bronce?

¹⁰ El manera de adoranza del maga Judio. Apuera del entrada del tabernaculo, puede mira con el un altar que hacido de bronce donde ta pone con el maga animal que hay ofrece con Jehova. (Ex. 27:1, 2; 40:29) Pero, ese maga ofrecimiento gendeh completamente puede quita con el maga pecado del maga gente. (Heb. 10:1-4) Ese maga sacrificio que regular ta hace na tabernaculo ta representa con el un sacrificio que hay completamente limpia con el pecado del maga gente.

11. Na cosa altar ya sacrificia si Jesus con el de suyu mismo cuerpo? (Maga Hebreo 10:5-7, 10)

 ¹¹ El manera de adoranza del maga Cristiano. Sabe si Jesus que ya imbia con ele si Jehova na tierra para ofrece con el de suyu vida para rescata con el maga gente. (Mat. 20:28) Poreso na de suyu bautismo, ya presenta si Jesus con el de suyu mismo cuerpo para hace si cosa quierre si Jehova. (Juan 6:38; Gal. 1:4) Na ese manera, ya ofrece si Jesus con el de suyu mismo cuerpo na un figurativo altar que ta representa con el “querer” del Dios—que sacrificia si Jesus con el de suyu perfecto vida. Ya sacrificia si Jesus con el de suyu vida “una vez lang” para permanente quita con el maga pecado de aquellos quien ta demonstra fe con el Cristo. (Le con el Maga Hebreo 10:5-7, 10.) Ahora, discuti kita si cosa quierre decir del maga cuarto adentro del tabernaculo.

12. (a) Quien lang puede entra na “Sagrao Lugar”? (b) Quien lang puede entra na “Mas Sagrao Lugar”?

¹² El manera de adoranza del maga Judio. Bien semejante el diseño del tabernaculo y el maga templo que ya construi na Jerusalem. Adentro de este, tiene dos cuarto—“el Lugar Sagrao” y “el Mas Sagrao Lugar”—y tiene un curtina que ta separta con ese dos cuarto. (Heb. 9:2-5, El Nuevo Testamento; Ex. 26:31-33) Adentro del Sagrao Lugar, puede mira con el candelario que hacido de oro, un altar donde ta quema con el maga incenso y un mesa donde ta pone con el pan de ofrecimiento. El “maga iscujido sacerdote” lang el puede entra na Sagrao Lugar para hace con el diila maga sagrao trabajo. (Num. 3:3, 7, 10) Na Mas Sagrao Lugar, puede mira con el arca  de contrata que hacido de oro que ta representa con el presencia de Jehova. (Ex. 25:21, 22) El alto sacerdote lang el puede pasa na curtina para puede entra na Mas Sagrao Lugar, una vez na un año, na Dia de Tapada de Culpa. (Lev. 16:2, 17) Ta entra le alla y ta lleva con el sangre del maga animal para pidi perdon na de suyu mismo maga pecado y del entero nacion. Na uliji, ya hace claro si Jehova por medio na de suyu sagrao espiritu si cosa quierre decir del cada uno de este.—Heb. 9:6-8. e

13. Cosa ta representa el Sagrao Lugar y el Mas Sagrao Lugar na tabernaculo?

¹³ El manera de adoranza del maga Cristiano. Ya iscuji por medio na sagrao espiritu con el limitao numero del maga dicipulo del Cristo y tiene sila un especial relacion con Jehova. Este 144,000 hay sirvi como maga sacerdote na cielo junto con Jesus. (Rev. 1:6; 14:1) El Sagrao Lugar del tabernaculo ta representa con el diila condicion cuando ya adapta kanila como maga espiritual anak del Dios mientras na tierra pa sila. (Roma 8:15-17) El Mas Sagrao Lugar del tabernaculo ta representa con el cielo, onde ta queda si Jehova. ‘El curtina’ que ta separta con el Sagrao Lugar na Mas Sagrao Lugar ta representa con el cuerpo de Jesus. Mientras tiene ele este fisical cuerpo, gendeh le puede entra na cielo como el Alto Sacerdote del espiritual templo. Cuando ya sacrificia si Jesus con el de suyu vida para na maga gente, ya abri le el camino para na maga iscujido Cristiano que obtene vida na cielo. Gendeh tambien sila puede ricibi con el diila premio na cielo si tiene pa sila fisical cuerpo. (Heb. 10:19, 20; 1 Cor. 15:50) Despues resucita con Jesus, ya entra le na Mas Sagrao Lugar del espiritual templo, donde man junto con ele el todo maga iscujido na uliji.

14. Asegun na Maga Hebreo 9:12, 24-26, porque mas bueno el arreglamiento que adora con Jehova na espiritual templo?

¹⁴ Puede kita claro mira que mas bueno el arreglamiento de Jehova de puro adoranza que base na rescate donde si Jesucristo el Alto Sacerdote. El alto sacerdote na Israel ta entra na Mas Sagrao Lugar que ta lleva con el sangre del maga animal. Pero si Jesus “ya entra na cielo” mismo, el de con todo sagrao lugar, para sacrificia adelante de Jehova. Ya presenta le con el de suyu perfecto vida como un gente “para destroza el pecado por medio del sacrificio del disuyo mismo cuerpo.” (Le con el Maga Hebreo 9:12, 24-26.) Por causa na sacrificio de Jesus, puede completamente perdona con el diaton maga pecado hasta para cuando. Como cosa kita hay aprende, todo kita puede adora con Jehova na de suyu espiritual templo—na cielo man o na tierra el diaton esperanza.

15. Quien ta sirvi na patio del tabernaculo?

¹⁵ El manera de adoranza del maga Judio. El tabernaculo tiene un patio—un grande lugar donde ta hace el maga sacerdote con el diila maga trabajo y tiene corral alrededor con ese. Puede mira na patio con el un grande altar que hacido de bronce donde ta quema con el maga ofrecimiento. Puede tambien mira aqui con el un cawa que hacido de bronce que tiene agua que ta usa el maga sacerdote para limpia con el diila mismo cuerpo antes sila hace con el diila maga sagrao trabajo. (Ex. 30:17-20; 40:6-8) Pero cuando ya construi con el maga templo na uliji, tiene tambien este un patio apuera donde aquellos gendeh maga sacerdote puede para y adora con Dios.

16. (a) Quien ta sirvi na adentro patio del espiritual templo? (b) Quien ta sirvi na apuera patio del espiritual templo?

 ¹⁶ El manera de adoranza del maga Cristiano. Antes anda na cielo para sirvi como maga sacerdote junto con Jesus, el maga iscujido quien taqui pa na tierra ta sirvi na adentro patio del espiritual templo. El grande cawa de agua que puede mira na tabernaculo y na maga templo ta hace acorda kanila y con el todo maga Cristiano que debe sila esta limpio na moral y espiritual. Pero quetal el grande grupo quien leal ta suporta con el maga iscujido hermano del Cristo? Onde sila ta adora con Jehova? Ya mira si apostol Juan que “parao sila adelante del trono” o na apuera patio donde ‘ta sirvi sila con Dios na de suyu templo didia y denoche.’ (Rev. 7:9, 13-15) Asigurao que ta aprecia gayot kita con el bonito privilegio que ya dale kanaton si Jehova que adora con ele na de suyu grande espiritual templo!

17. Cosa maga sacrificio kita puede ofrece con Jehova?

¹⁷ Ahora, el todo maga Cristiano tiene privilegio que ofrece maga sacrificio con Jehova por medio na usada del diila tiempo, fuerza y material cosas para na bien del Reino del Dios. Como cosa ya habla si apostol Pablo con el maga Hebreo Cristiano, “ofrece kita firmi con el Dios . . . un sacrificio de alabanza; quiere decir, manda kita con el diaton boca alaba con el disuyo Nombre.” (Heb. 13:15) Puede kita dale mira que ta aprecia kita con el diaton privilegio que adora con Jehova si dale kita con ele el diaton maga de con todo buen sacrificio.

18. Asegun na Maga Hebreo 10:22-25, cosa kita debe pirmi hace y cosa kita gendeh debe ulvida?

¹⁸ Le con el Maga Hebreo 10:22-25. Na fin del carta de Pablo para na maga Hebreo, ya menciona le con el diferente aspeto del diaton adoranza que debe kita pirmi hace. Incluido aqui el privilegio que atraca con Jehova por medio na rezo, predica con otro, man junto-junto na miting na congregacion y anima con uno y otro “especialmente ahora cay ta mira [kita] que cerca ya el Dia.” El angel de Jehova ya habla: “Con Dios lang adora”! (Rev. 19:10; 22:9) Ya habla le este dos beses para dale mira que bien importante este. Ojala gendeh kita ulvida con este hondo verdad acerca na grande espiritual templo de Jehova y aprecia con el privilegio que tiene kita que adora con el diaton marvelloso Dios!