1. Txini enloga anju nanda enlogiye ekalelo nni yamakamaka wa iyo?

 KOWILIWA anju wele ologa na weyo ogahivuruwana egalogiliye? Masaka abano ohikalawo anju onloga na attu “a vilabo dhotene, a mahimo, a vilogelo, a malogo etene.” Txini enlogiye? “Murihení Mulugu, mmuthithimihe . . . Mwebedhení ole opaddutxile erimu, elabo.” (Ovuh. 14:6, 7) Yehova ddi Mulugu mmodha bahi webaribari onfwanyela webedhiwa na attu otene. Iyo ninomutamalela venjene sabwa ya onivaha gari ya omwebedha mumparhani mwaye womuyani!

2. Mparha womuyani wa Yehova txini? (Koona vina kasha “ Ehili Mparha Txini.”)

² Mparha womuyani txini, vina ninafwanye wuvi miselu dhinloga mwaha wa mparhaya? Kuli nyumba eli velaboni yavati enkuweliwa mparha womuyani. Mparha womuyani dhilobo dhotene dhinkosa Yehova dhiniwanana na mukutto wa yobolo wa Yezu, wi attu awodhege omwebedha. Murumiwi Paulo ohitapulelamo ejuwene mukartani nalebeliye Akristu oroma Ahebreu akala o Judeya. b

3-4. Txini yamuttukuleli Paulo walebela Akristu o Ahebreu vina txini ekosiliye wi akamihedhe?

³ Txini emuttukuleli Paulo walebela karta Akristu Ahebreu akala o Judeya? Sabwa ya dhilobo bili. Yoroma, wi ápangarhaze. Akristu owinjiva aleliwe mu relijiauni ya Ayuda. Asogorheli a relijiau ejile annapambiha sabwa ya awene ottiya relijiau ya Ayuda bakala Akristu. Sabwaya jani? Sabwani Akristu kanna mparha mwamwebedhani Yehova, awene kana mparha wowoneya  nne vina kanna anamakutta amperhekela mikutto Mulugu. Eji txino yahawobaniha Akristu vina yahobaniha nroromelo nawa. (Aheb. 2:1; 3:12, 14) Ena txino ahubuwela wi anfwanyela wiyelela relijiau ya Ayuda.

⁴ Yanawili, Paulo wafuna alibihe Akristu a Ahebreu anonelemo masunziho maswa ebaribari vina oviteya. (Aheb. 5:11-14) Enkala ninga Paulo wahatapulelamo wi Nlamulo na Mizé na okutta mikutto wi dhittimihe dhottega nahikwela. Ovano Paulo wahasunziha dhebaribari dhoviteya, iyene wahawubutxedha mwaha wa njedhelo namakamaka ninda sabwa ya ororomela mukutto wa Yezu vowi njedhelo ntti ninoniwodhiha omwaddamela Mulugu.—Aheb. 7:18, 19.

5. Txini enfwanyelihu ononelamo na nivuru na Bibilia na Ahebreu vina sabwaya jani?

⁵ Paulo wahawubutxedha Akristu Ahebreu wi webedha wa Akristu wali wattima opitta webedha wakosani wale. Mukalelo wamwebedhani Yehova mowiwanana na Malamulo a Mizé yali ninga mundduri wa esile dhafuna odha, mbwenyi ebaribariya ja Kristu. (Kol. 2:17) Mundduri wa elobo ononiha mukalelo onakale eloboya. Na mukalelo wakakene, wale, mukalelo wamwebedhani Mulugu yali ninga mundduri vowi ovano yahiroma omwebedha Mulugu na mukalelo wamakamaka. Iyo ninofwanyela ononelamo pama dhetene dhikosile Yehova wi dhottega dhehu dhileveleliwe vina niwodhe omwebedha na mukalelo onfuniye. Mwari mwa nsunzo ntti ninele oladdaniha “mundduri” (mukalelo wamwebedha Ayuda Mulugu) na “ebaribari” (mukalelo onimwebedha Akristu Mulugu), dhahene ninga mutapuleliwani mu nivuru na Ahebreu. Dhahene, panawodhihu ononelamo pama mparha womuyani vina sabwaya ekalelani yamakamaka wa iyo.

6. Musana walabihedhiwa dhavi?

⁶ Mukalelo wamwebedha Ayuda Mulugu. Paulo ohilabihedha musana wamagiwe na Mizé yaka ya 1512 AEC wi atapulelemo sabwa ya mparha womuyani. (Koona kasha “Mukalelo Wamwebedha Ayuda Mulugu—Mukalelo Onimwebedha Akristu Mulugu.”) Mukalelo wamagiwe musana wali ninga tenda yawodha ana Izrayel omwaliha agamwalelaga mburo mwina. Musana obu ohilabihedhiwa vyaka 500 mpaka nsaka nimagiwe mparha o Jeruzalemi. (Obud. 25:8, 9; Oleb. 9:22) “Musana obu wogumana” obe tenda wali mburho  walabihedha ana Izrayel wi amwebedhevo Mulugu vina amperhekele mukutto. (Obud. 29:43-46) Mbwenyi musana obu vina wantonya elobo yina yattima egávahile Yehova Akristu.

7. Mparha womuyani oromile okalawo yaka gani?

⁷ Mukalelo onimwebedha Akristu Mulugu. Musana wa nsaka nawale wali “mundduri wa [dhilobo] dhiniriwa odhulu,” vina watonya mparha munddimuwa womuyani wa Yehova. Paulo ohiloga wi mwenemwa-mpu mmusanani ehikalamo enlogamo ya masaka a ovano. (Aheb. 8:5; 9:9) Nsaka nalebele Paulo Ahebreu, mparha obu womuyani mwa Akristu wahikalawo. Sabwani oromile okalawo yaka ya 29 EC. Yaka ejile mmalile Yezu obatiziwa vina ottikitteliwa na muya wokoddela wahiroma olaba ninga “namakutha munddimuwa” wa Yehova mumparhani womuyani. c—Aheb. 4:14; Mer. 10:37, 38.

8-9. Ottiyana gani onddimuwa wa anamakutta a mu Izrayel, na Namakutta Munddimuwa Yezu Kristu? (Ahebreu 7:23-27)

⁸ Mukalelo wamwebedha Ayuda Mulugu. Namakutta munddimuwa ddafiyana mpaganyo wa nlogo vamentoni va Mulugu. Namakutha munddimuwa woroma wa nlogo na Izrayel, wali Aroni, iyene wattomiwe na Yehova nsaka niromile olabihedhiwa musana. Mbwenyi ninga mulogile Paulo, “anamakutha awale ahinjivana, kàwodha ogonelana vowi okwa wanagwaddela.” d (Kengesa Ahebreu 7:23-27.) Vowi awene ali attu ohiligana, anfwanyela operheka mikutto wi aleveleliwe dhottega dhawa. Veneva ninowona ottiyana onddimuwa wa anamakutha a Izrayel na Namakutha Munddimuwa, Yezu Kristu.

⁹ Mukalelo onimwebedha Akristu Mulugu. Ninga Namakutha Munddimuwa, Yezu Kristu “onottidda mabasa . . . mumparhani webaribari, omagiwe na Nabuya, ohimagiwe na athu.” (Aheb. 8:1, 2) Paulo ohitapulelamo wi “onamakutha waye kummala, vowi ddokalawovi.” Paulo ohiloga vina wi iyene “ddokoddela murima, kafwanyiwena yothega, kanná yotakala, ddothiyana na athegi” vina mottiyana na anamakutha anddimuwa a mu Izrayel iyene kanfwanyela ohela mukutho siku-siku wottimihana dhottega dhaye. Ovano ninfuna none ottiyana wa ebuwa na mikutto dha nsaka na Ayuda vina nsaka na Akristu.

10. Txini yatapulela mukutto waddumeyiwa vebuwani ya nddarhama?

¹⁰ Mukalelo wamwebedha Ayuda Mulugu. Otakulo wa musana wahikalawo ebuwa ya safuri yalabihedhiwa wi aperhekeliwege Yehova mukutto wa dhinama. (Obud. 27:1, 2; 40:29) Mbwenyi mikutto esi kadhawodha ottimiha kakamwe dhottega dha nlogo. (Aheb. 10:1-4) Mukutto wa dhinama waperhekiwa mudhidhi wotene mmusanani yalagiha wi musogorho ogahikala mukutto modha bahi ogattimihile dhottega dhotene dha nlogo.

11. Ebuwa gani operhekile Yezu egumi yaye ninga mukutto? (Ahebreu 10:5-7, 10)

¹¹ Mukalelo onimwebedha Akristu Mulugu. Yezu wanziwa wi orumiwe odha velaboni ya vati na Yehova wi aperheke egumi yaye ninga mukutto w’owawobolana attu. (Mt. 20:28) Nona vabatiziwe Yezu ohiviperheka wi akose efunelo ya Yehova. (Jo. 6:38; Gal. 1:4) Yezu  ohiperheka egumi yaye vebuwani ya nladdaniho ottiya ebuwa emagiwe na attu, ebuwa eji entapulela ofuna wa Yehova. Yofuna ya Yehova yali Yezu aperhekele attu egumi yaye yoligana, nona Yezu Kristu “ovilevela mvilevelo” wi aperheke egumi yaye enttimiha kakamwe yottega ya attu abale animuroromela. (Kengesa Ahebreu 10:5-7, 10.) Ovano ninfuna none esile dhali mwari mwa mparhaya.

12. Bani warumelihiwa ovolowa Mburo Wokoddela vina Wokoddela-koddela?

¹² Mukalelo wamwebedha Ayuda Mulugu. Musana vina mparha dhamagiwe vasogorhova o Jeruzalemi, ekaleloya ya mwari kiyattiyana. Mwarimwa wakala mimburo mili—“Mburo Wokoddela” vina “Mburo Wokoddela-koddela”—na guwo enddimuwa yamwalaniha mimburo esi. (Aheb. 9:2-5; Obud. 26:31-33) Mburo Wokoddela wakala panti ya woru, ebuwa vaddumeyiwa lubani vina meza vakala mikatte dhaleveliwa Mulugu. Arumelihiwa ovolowa Mburo Wokoddela ali anamakutta ottikitteliwa wi attidde mabasa attomeliwani. (Oleb. 3:3, 7, 10) Mburo Wokoddela-koddela wakoyiwa yobo ya nipagano yasasanyiwe na woru vina Yehova waloga na namakutta munddimuwa vadhulu va yobo eji. (Obud. 25:21, 22) Warumelihiwa okwaranya guwo enddimuwa avolowa Mburo Wokoddela-koddela, wali namakutta munddiwa vina wavolowa dila modha vayakani wi akose mwambo wa okupa dhottega. (Onam. 16:2, 17) Yaka-yaka, wanvolowana nikami na dhinama wi akupe dhottega dhaye vina dha nlogo. Na ovira wa mudhidhi,  Yehova ohilabihedha muya waye wokoddela ohoniha kakamwe yatapulela dhilobo esi.—Aheb. 9:6-8. e

13. Mburo Wokoddela vina Mburo Wokoddela-koddela dha mmusanani dhintapulela nni mwa Akristu?

¹³ Mukalelo onimwebedha Akristu Mulugu. Akristu ang’onovi banttikitteliwa na muya wokoddela, sabwa ya ejene ahikana mandano a vawoka na Yehova. Akristu aba 144.000 anele olaba wirimu ninga anamakutta vamodha na Yezu. (Ovuh. 1:6; 14:1) Mburo Wokoddela wali mmusanani, ontapulela yimelelo yawa ya omuyani ninga ana a Mulugu oku bali velaboni ya vati. (Rom. 8:15-17) Mburo Wokoddela-koddela wali mmusanani, ontapulela wirimu oli Yehova. “Guwo enddimuwa” yamwalaniha Mburo Wokoddela na Mburo Wokoddela-koddela entapulela maningo a Yezu, bali velaboni ya vati iyene wahikana maningo dhahene ninga attu ena. Sabwa ya ejuwene kawodha ovolowa wirimu vina okala Namakutta Munddimuwa wa mparha womuyani. Muperhekeliye egumi yaye wi awobole attu, Yezu ohifugula dila wi Akristu ottikitteliwa akele egumi wirimu. Dhahene ninga Yezu, attikitteliwi anofwanyela ottiya vina maningo awa wi akele nlivo nawa wirimu. (Aheb. 10:19, 20; 1 Kor. 15:50) Mumalile Yezu ovenyihiwa mukwani, ohivolowa Mburo Wokoddela-koddela mumparhani womuyani wirimu, na mudhidhiya ku wenewo anagumane attikitteliwi otene na iyene.

14. Sabwaya jani omwebedha Yehova mumparhani womuyani onopitta mukalelo webedha Ayuda? (Ahebreu 9:12, 24-26)

¹⁴ Webedha wokoddela wa Yehova onowiwanana na mukutto wa yobolo okosile Yezu Kristu vina mabasa anttiddiye ninga namakutta munddimuwa. Kavali waganyedha wi webedha oku ohikana ttima enddimuwa opitta mukalelo wamwebedha Ayuda Yehova nsaka na wale. Namakutta munddimuwa wa ana Izrayel wavolowana nikami na dhinama Mburo Wokoddela-koddela wamagiwe na attu. Oku Yezu “ovolowilé odhulu-wene,” mburo wokoddela-koddela ohimagiwe na mada a attu wi aviperheke vali Yehova. Mwa oniperhekela egumi yaye yoligana, Yezu ohoniha wi ohikana owodha wa ottimiha yottega na ovilevela waye okala mukutto. (Kengesa Ahebreu 9:12, 24-26.) Na mukutto wa Yezu kili yofuneya mukutto mwina wa oleveleliwana dhottega. Ninga vanasunzehu ddima dhinfwarela, kintanala akala ninjedhela okala velaboni ya vati obe wirimu, notene ninofwanyela omwebedha Yehova mumparhani waye womuyani.

15. Bani wamwebedha Yehova nttaddo nali vamusanani?

¹⁵ Mukalelo wamwebedha Ayuda Mulugu. Vamusanani vahikala nttaddo nddimuwa—narugunowiwe na nsitto anamakutta vakosani mabasa awa. Ebuwa ya safuri vaddumeyiwa mukutto yali vattaddo apo vina yobo ya safuri mwekiwa manje yalabihedha anakutta wi avikupena ahinatti ottidda mabasa awa. (Obud. 30:17-20; 40:6-8) Mparha dhimagiwe vasogorhova, otakulu wankala nttaddo wi abale ahali anamakutta amwebedhegevo Mulugu.

16. Bani onimwebedha Yehova nttaddo nili mwari vina nili otakulu mwa mparha womuyani?

¹⁶ Mukalelo onimwebedha Akristu Mulugu. Ahinatti odhowa wirimu ninga anamakutta vamodha na Yezu, attikitteliwi alivi velaboni ya vati masaka abano anomulabela Yehova nttaddo nili mwari mwa mparha womuyani. Yobo enddimuwa ya manje eli va  nttaddo apo mubutxedho wamakamaka wa attikitteliwi vowi dhahene ninga Akristu otene, awene anofwanyela okala okoddela mpaddi womuyani womaningoni vina mweddelo wawa. “Muthithi munddimuwa,” onakamihedha abali a Kristu animwebedha wuvi Yehova? Murumiwi Joau ohona muttitti munddimuwa wemelile “osogorho wa mpaddo,” eji entapulela nttaddo nili otakulu wa mparha “amwimelelaga iyene mathiyu na mutana mmusanani mwaye.” (Ovuh. 7:9, 13-15) Iyo ninottittimiha vaddiddi gari enivahile Yehova ya omwebedha na mukalelo wofwanyelela!

17. Mikutto gani dhina iyo gari ya omperhekela Yehova?

¹⁷ Akristu otene masaka abano ahikana gari ya omperekela mukutto Yehova alabihedhaga mudhidhi wawa, guru yawa vina dhokana dhawa, wi akamihedhe mabasa a Omwene wa Mulugu. Dhahene ninga mwawaddeli murumiwi Paulo Akristu o Ahebreu, iyo “nimperhekelegevi Mulugu mukutho womuthithimihana, oli mulima wa mazu a mwano mwehu, onvuwiha nzina naye.” (Aheb. 13:15) Iyo ninowoniha wi ninovaha ttima gari eji nigamwebedhaga Yehova ninvahaga dhilobo dhattima mpaka vanwodhelihu.

18. Ddhilobo gani dhinfwanyelihu okosa mudhidhi wotene vina txini ehifwanyelihu odduwala? (Ahebreu 10:22-25)

¹⁸ Kengesa Ahebreu 10:22-25. Omagomo wa karta nalebeliye Akristu o Ahebreu, Paulo ohiloga dhilobo dhottiyana-ttiyana dhinfwanyelihu okosa wi nimwebedhe Yehova. Omulobelela Yehova mudhidhi wotene, walaleya attu sabwa ya njedhelo nehu, odhowa omatugumanoni vina olibihana muttu na mukwaye “thabwa-thabwa apa vanziwehu wi siku na Nabuya nli vakuvi.” Vina mu nivuruni na Ovuhulela ninowengesa wi, anju wa Yehova ohiloga dhahi: “Mulugu bahi ddinfwanyeliwe omwebedha!” (Ovuh. 19:10; 22:9) Txipo kanidduwale esi dhisunzilehu sabwa ya mparha munddimuwa womuyani wa Yehova vina gari enihu ya omwebedha Mulugu wehu Munddimuwa!