1. Ki en lanz pe dir e ki sa i vedir pour nou?

 SI EN lanz ti koz avek ou, eski ou ti pou ekout li? Ozordi, i annan en lanz ki pe koz “avek tou nasyon, tribi, langaz ek pep.” Ki sa lanz pe dir? “Annan en gran respe pour Bondye e rann li glwar . . . Ador sa Enn ki’n fer lesyel [ek] later.” (Rev. 14:​6, 7) Zeova i sa sel vre Bondye e tou dimoun i devret ador li. Nou vreman rekonesan ki i’n donn nou sa loportinite pour ador li dan son gran tanp spirityel.

2. Kisisa sa tanp spirityel Zeova? (Vwar sa bwat “ Sa ki tanp spirityel pa ete.”)

² Kisisa sa tanp spirityel Zeova e kote nou kapab trouv bann detay konsernan sa tanp? Sa tanp spirityel i pa en batiman fizik. Tanp spirityel i sa laranzman ki Zeova in met an plas gras a sakrifis Zezi, pour nou kapab ador li dan en fason akseptab. Zapot Pol ti donn en leksplikasyon konsernan sa laranzman dan en let ki i ti ekri dan premye syek, pour bann Kretyen Ebre ki ti pe reste Zide. b

3-4. Akoz Pol ti enkyet konsernan bann Kretyen Ebre ki ti reste Zide e ki mannyer i ti ed zot?

³ Akoz Pol ti ekri sa let pour bann Kretyen Ebre ki ti pe reste Zide? I kapab ki i ti fer sa pour de rezon. Premyerman, i ti fer sa pour ankouraz zot. Laplipar parmi zot ti’n grandi dan larelizyon Zwif e i kapab ki bann sef larelizyon Zwif ti sikann zot akoz zot ti’n vin Kretyen. Akoz sa bann sef larelizyon Zwif ti fer sa? Parski bann Kretyen ti napa en tanp pour ador Bondye ladan, zot ti napa en lotel pour ofer sakrifis pour Bondye e zot ti napa pret pour servi  zot. Sa ti’n kapab dekouraz bann disip Kris e afebli zot lafwa. (Ebr. 2:1; 3:​12, 14) Petet serten ti’n menm kapab mazin pour retourn dan larelizyon Zwif.

⁴ Dezyenmman, Pol ti dir ki sa bann Kretyen Ebre pa ti pe fer zefor pour manz bann “manze solid,” setadir pour konpran bann nouvo lansennyman oubyen bann lansennyman profon ki dan Parol Bondye. (Ebr. 5:​11-14) I ti kler ki i ti annan serten ki ti ankor pe swiv Lalwa Moiz. Me Pol ti eksplike ki bann sakrifis ki ti ganny fer anba Lalwa Moiz pa ti kapab tir pese konpletman. I pour sa rezon ki Lalwa Moiz ti ganny “met dekote.” Apre sa, Pol ti ansenny zot serten sa bann laverite profon. I ti fer son bann frer ek ser rapel ki sakrifis Zezi ti fer li posib pour zot annan en “lespwar ki pli meyer” e ki sa i kapab fer zot “vin pli pros avek Bondye.”—Ebr. 7:​18, 19.

5. Ki nou bezwen konpran dan liv Ebre e akoz?

⁵ Pol ti eksplik son bann frer ek ser akoz lafason ki zot ti pe ador Zeova konman en Kretyen, ti pli siperyer ki lafason ki zot ti pe ador Zeova dan lepase. Lafason ki bann Zwif ti ador Zeova ti zis “en lonbraz bann keksoz ki pou vini, me larealite i Kris.” (Kol. 2:​17, not.) Lonbraz en keksoz i zis laform oubyen reprezantasyon sa keksoz me i pa sa keksoz. Pareyman, lafason ki bann Zwif ti ador Bondye ti zis en lonbraz oubyen en reprezantasyon bann keksoz ki ti pou vini. Alor pour nou kapab ador Zeova dan en fason akseptab, nou bezwen konpran sa laranzman ki i’n met an plas pour nou pese kapab ganny pardonnen. Aprezan, annou vwar diferans ki i annan ant sa “lonbraz” (lafason ki bann Zwif ti ador Zeova) ek “larealite” (lafason ki bann Kretyen i ador Zeova), parey i ganny eksplike dan liv Ebre. Sa pou fer nou pli byen konpran sa tanp spirityel e ki i annan pour fer avek nou.

6. Ki mannyer tabernak ti ganny servi?

⁶ Lafason ki bann Zwif ti ador Zeova. Sa ki Pol ti dir i baze lo sa tabernak ki Moiz ti etabli an 1512 avan Kris. (Vwar sa desen “Lafason ki bann Zwif ti ador Zeova—Lafason ki bann Kretyen i ador  Zeova.”) Sa landrwa kot bann Izraelit ti zwenn pour ador Bondye e pour ofer bann sakrifis ti ganny apele “latant renyon” oubyen tabernak. (Egz. 29:​43-46) Bann Izraelit ti anmenn sa latant avek zot partou kot zot ti ale pandan ki zot ti dan dezer. Zot ti servi sa latant pour apepre 500 an ziska ki zot ti kapab konstri en tanp Zerizalenm. (Egz. 25:​8, 9; Nom. 9:22) Me pour bann Kretyen, tabernak i osi reprezant en keksoz pli meyer. En keksoz ki ti pou vini dan lavenir.

7. Kan ki sa tanp spirityel ti konmans egziste?

⁷ Lafason ki bann Kretyen i ador Zeova. Sa tabernak ki bann Izraelit ti servi ti “en reprezantasyon bann keksoz ki dan lesyel” e i ti reprezant gran tanp spirityel Zeova. Pol ti dir ki “sa latant [oubyen tabernak] i en senbol bann keksoz ki pe arive dan nou letan.” (Ebr. 8:5; 9:9) Alor, ler Pol ti ekri sa let pour bann Kretyen Ebre, sa tanp spirityel ti’n fini egziste. I ti konmans egziste lannen 29. Ler Zezi ti batize, i ti ganny swazir par lespri sen e konmans servi konman Granpret dan tanp spirityel Zeova. c—Ebr. 4:14; Akt 10:​37, 38.

8-9. Dapre Ebre 7:​23-27, ki diferans i annan ant bann granpret dan letan Izrael ek Zezi Kri ki Granpret dan tanp spirityel?

⁸ Lafason ki bann Zwif ti ador Zeova. Granpret ti reprezant nasyon Izrael devan Bondye. Zeova ti apwent Aaron konman sa premye granpret ler tabernak ti ganny inogire. Me parey Pol ti dir, “i ti annan en kantite pret parski zot ti bezwen ranplas kanmarad akoz zot ti mor e sa ti anpes zot kontinyen servi konman pret.” d (Lir Ebre 7:​23-27.) Sa bann granpret ti bann zonm enparfe, alor zot ti bezwen ofer sakrifis pour zot prop pese. Sanmenm sa ki fer bann granpret Izrael diferan avek Zezi Kri, sa Granpret ki siperyer.

⁹ Lafason ki bann Kretyen i ador Zeova. Konman nou Granpret, Zezi Kri i “en serviter . . . dan sa vre latant, ki’n ganny etablir par Zeova e pa par zonm.” (Ebr. 8:​1, 2) Pol ti dir ki vi ki “Zezi i viv pour touzour, i napa personn ki pou ranplas li konman pret.” Pol ti osi dir ki Zezi i “pir, separe avek bann ki fer pese” e “i pa bezwen ofer sakrifis tou le zour” pour son prop pese parey bann granpret Izrael ti fer. Aprezan, annou vwar ki mannyer bann lotel ek bann sakrifis ki bann Zwif ti fer i diferan avek sa ki pour bann Kretyen.

10. Ki bann sakrifis ki ti ganny ofer lo sa lotel an kwiv ti montre konsernan lavenir?

¹⁰ Lafason ki bann Zwif ti ador Zeova. An deor larantre tabernak, i ti annan en lotel an kwiv kot bann zannimo ti ganny ofer konman sakrifis pour Zeova. (Egz. 27:​1, 2; 40:29) Me sa bann sakrifis pa ti kapab pardonn pese bann dimoun konpletman. (Ebr. 10:​1-4) Bann sakrifis zannimo ki ti pe kontinyen ganny ofer kot tabernak, ti montre ki a lavenir, i ti pou annan en sakrifis ki ti pou fer li posib pour pese bann imen ganny pardonnen konpletman.

11. Lo ki kalite lotel Zezi ti ofer son lekor konman en sakrifis? (Ebre 10:​5-7, 10)

 ¹¹ Lafason ki bann Kretyen i ador Zeova. Zezi ti konnen ki Zeova ti’n anvoy li lo later pour donn son lavi konman en ranson pour bann imen. (Mat. 20:28) Alor, ler Zezi ti batize, i ti prezant son lekor pour fer sa ki Zeova i anvi. (Zan 6:38; Gal. 1:4) Zezi ti ofer son lekor lo en lotel senbolik ki reprezant “lavolonte” Bondye. I ti lavolonte Zeova ki son Garson i sakrifye son lavi parfe konman en imen. Zezi ti ofer son lavi konman en sakrifis “enn fwa pour tou” pour pey oubyen kouver pese tou dimoun ki demontre lafwa dan Kris. (Lir Ebre 10:​5-7, 10.) Aprezan nou pou vwar ki sa bann keksoz ki ti annan dan tabernak i reprezante.

12. Lekel ki ti kapab antre dan bann diferan konpartiman dan tabernak?

¹² Lafason ki bann Zwif ti ador Zeova. Lafason ki bann tanp ti ete anndan, ti parey avek lafason ki tabernak ti ete anndan. Anndan, i ti annan de konpartiman, sa i “Landrwa Sen” ek “Tre Sen” e i ti annan en rido ki ti separ sa de landrwa. (Ebr. 9:​2-5; Egz. 26:​31-33) Dan Landrwa Sen, i ti annan en sandelye annor, en lotel pour bril lansan ek en latab pour dipen prezantasyon. Zis bann pret ki ti’n “ganny swazir” ki ti annan drwa antre dan Landrwa Sen pour fer zot servis konman pret. (Nom. 3:​3, 7, 10) Dan Tre Sen, i ti annan lars lalyans ki ti ganny fer avek lor e ki ti reprezant  prezans Zeova. (Egz. 25:​21, 22) Zis granpret ki ti annan drwa pas atraver rido pour al dan Tre Sen. I ti annan drwa fer sa enn fwa par lannen, Zour Rekonsilyasyon. (Lev. 16:​2, 17) Lannen apre lannen, i ti antre dan Tre Sen avek disan zannimo pour ki son pese i ganny pardonnen e pour ki pese nasyon Izrael i ganny pardonnen. Avek letan, Zeova ti servi son lespri sen pour fer nou konpran ki sa bann keksoz ki dan tabernak i reprezante.—Ebr. 9:​6-8. e

13. Ki Landrwa Sen ek Tre Sen i reprezante pour bann Kretyen?

¹³ Lafason ki bann Kretyen i ador Zeova. En pti group parmi bann disip Kris in ganny swazir par lespri sen e zot annan en lanmitye spesyal avek Zeova. I annan 144,000 zot e zot pou servi konman pret dan lesyel avek Zezi. (Rev. 1:6; 14:1) Sa Landrwa Sen dan tabernak i reprezant lefet ki zot in ganny adopte konman bann garson Bondye pandan ki zot ankor lo later. (Rom. 8:​15-17) Sa landrwa Tre Sen dan tabernak i reprezant kot Zeova i ete dan lesyel. Sa “rido” ki ti separ sa Landrwa Sen ek Tre Sen, i reprezant lekor imen Zezi. Tan ki Zezi ti ankor annan en lekor imen, i pa ti kapab antre dan lesyel konman Granpret dan tanp spirityel Zeova. Ler Zezi ti sakrifye son lekor imen, i ti fer li posib pour bann Kretyen swazir kapab al dan lesyel. Sa bann Kretyen swazir osi i bezwen kit zot lekor imen pour zot kapab ganny zot rekonpans dan lesyel. (Ebr. 10:​19, 20; 1 Kor. 15:50) Apre ki Zezi ti’n resisite, i ti antre dan Tre Sen dan tanp spirityel e avek letan tou Kretyen swazir pou zwenn avek li laba.

14. Dapre Ebre 9:​12, 24-26, kwa ki fer sa laranzman konsernan tanp spirityel Zeova pli siperyer ki lafason ki bann Izraelit ti ador Zeova?

¹⁴ Sa laranzman ki Zeova in fer konsernan ladorasyon pir baze lo sakrifis Zezi e lo Zezi konman Granpret, i bokou pli siperyer ki lafason ki bann Zwif ti ador Bondye. Granpret Izrael ti antre dan Tre Sen dan tabernak avek disan zannimo me Zezi ti antre “dan lesyel menm,” sa landrwa pli sen, pour li prezant li devan Zeova. Ler i ti ariv dan lesyel, i ti prezant valer son lavi parfe avek Zeova pour nou, “pour elimin pese atraver sakrifis son prop lekor.” (Lir Ebre 9:​12, 24-26.) Sakrifis Zezi i fer li posib pour nou pese ganny pardonnen pour touzour. Parey nou pou vwar, ki swa nou annan lespwar pour viv pour touzour dan lesyel oubyen lo later, nou tou nou kapab ador Zeova dan son tanp spirityel.

15. Lekel ki ti servi dan lakour tabernak?

¹⁵ Lafason ki bann Zwif ti ador Zeova. Tabernak ti annan en lakour. Sa ti en gran landrwa ki ti’n bare e kot bann pret ti fer zot travay. Dan sa lakour, i ti annan en gro lotel an kwiv kot bann pret ti ofer lofrann brile e i ti osi annan en basen delo an kwiv ki bann pret ti servi pour netway zot avan fer zot servis sakre. (Egz. 30:​17-20; 40:​6-8) Me dan bann tanp ki ti ganny konstrir pli tar, i ti annan en lot lakour an deor, kot bann dimoun ki pa ti pret ti kapab debout pour ador Bondye.

16. Lekel ki servi dan bann lakour ki dan tanp spirityel?

¹⁶ Lafason ki bann Kretyen i ador Zeova.  Avan ki bann Kretyen swazir ki ankor lo later i al dan lesyel pour servi konman bann pret ansanm avek Zezi, sa bann Kretyen i servi dan lakour anndan dan tanp spirityel. Sa gran basen delo ki ti dan tabernak ek tanp, i fer sa bann Kretyen e nou osi rapel, ki i enportan pour reste prop moralman e spirityelman. Alor kote “gran lafoul” ki pe siport bann frer swazir Kris, i ador Zeova? Zapot Zan ti vwar sa gran lafoul “pe debout devan tronn,” ki reprezant lakour an deor ki lo later e “lizour konman aswar, zot pe servi [Bondye] dan son tanp.” (Rev. 7:​9, 13-15) Nou vreman apresye sa plas ki nou annan dan laranzman Zeova pour ladorasyon pir.

17. Ki bann sakrifis ki nou annan sa privilez pour ofer Zeova?

¹⁷ Ozordi, tou Kretyen i annan sa privilez pour ofer bann sakrifis pour Zeova. Zot fer sa par servi zot letan, lenerzi ek zot bann keksoz materyel pour servi Bondye. Parey zapot Pol ti dir bann Kretyen Ebre, nou kapab ‘toultan loue Bondye e koz piblikman lo son non akoz sa i en sakrifis ki nou pe ofer Bondye avek nou labous.’ (Ebr. 13:15) Nou kapab montre ki nou apresye sa privilez ki nou annan pour ador Zeova par donn li nou meyer dan nou servis.

18. Dapre Ebre 10:​22-25, ki nou devret toultan fer e ki nou pa devret zanmen oubliye?

¹⁸ Lir Ebre 10:​22-25. Ver lafen sa let ki zapot Pol ti ekri pour bann Kretyen Ebre, i ti koz konsernan bann keksoz ki nou devret toultan fer dan nou ladorasyon pour Zeova. Sa i enkli koz avek Zeova dan lapriyer, anons sa bon nouvel avek lezot, rasanble ansanm konman en kongregasyon e ankouraz kanmarad “plis ankor la ki [nou] vwar zour [Zeova] pe aprose.” Ver lafen liv Revelasyon, lanz Zeova ti dir: “Ador Bondye!” (Rev. 19:10; 22:9) I ti dir sa de fwa pour montre ki i vreman enportan pour fer sa. Annou pa zanmen oubliy sa laverite profon ki nou’n aprann konsernan gran tanp spirityel Zeova e konsernan sa privilez ki nou annan pour ador nou Bondye!