1. ¿Kʼãrẽta jarabʉ angelbara, maʉ̃ kʼarea dayirãra sãwũã sentipanʉ?

 ANGEL abaʉta atia bʉme bedʼeakĩrãbʉbʉrʉ, ¿bʉara ũrĩka iyi bedʼeara? Idi ewade angel abaʉba ẽbẽra jõmaʉʼa naʉ̃ta jarabʉ: «Wawiaidua Daizezera akʉza iyi ʉ̃rʉ ibia bedʼeabidua [. . .] yiwidʼidua bajã oda, drʉa oda» (Apoc. 14:​6, 7). Dayirãbara Jeowa abapaiʼabʉrʉ yiwidʼibara. Dayirãbara biga diapanʉ Jeowaʼa yiwidʼipanʉ baera iyi templo espiritualde.

2. ¿Kʼãrẽta jarakĩrãbʉ templo espiritualbara? (Akʉra rekuadro « Kʼãrẽta jarakĩrãbʉ ẽ»).

² ¿Kʼãrẽta jarakĩrãbʉ templo espiritualbara? akʉza ¿sama ũduseapanʉ dayirãba nekʼãrẽ maʉ̃ ʉ̃rʉ jara ũrĩbibʉra? Naʉ̃ templo espiritualʼra wãrĩnu deara ẽ. Awuarabʉrʉ naʉ̃bara jarakĩrãbʉ Jeowaba nekʼãrẽ odata dayirãba iyita orradamarẽã iyi warra Jesudeba. Pabloba kristianora ebreora Judeade panʉra kartata bʉ dia bʉesi. Iya mama biʼia jara ũrĩbisi maʉ̃ bedʼea ʉ̃rʉ. b

3, 4. ¿Kʼãrẽa Pablora mejãcha krĩcha zroma osi kristianora ebreora Judeadebema ʉ̃rʉ akʉza sãwũã kʼarebasi iya ãyira?

³ Pablobara naʉ̃ kartara bʉsibaibara nekʼãrẽ ũme kʼarea. Nããra, ãyaʼa so zarea diaita. Ʉ̃kʉrʉ kristianora ebreorãra nããra religion judiadepanasi. Naʉ̃ religion judiadebemabara erpanasi templota akʉza mama sakripisiota opanasi. Adewara erpanasi saserdoterata maʉ̃ sakripisio oita. Mamina kristianorabara maʉ̃ra oẽbasi akʉza  ãyara templora erba ẽ basi, maʉ̃ kʼarea ʉ̃kʉrʉ nokʼora religion judiadebemarãra ãyi kʼarea ipidapanasi (Heb. 2:1; 3:​12, 14). Maʉ̃ba ãyidebema ʉ̃kʉrʉba krĩchaseabasi jẽda wãita maʉ̃ religion judiadebemama.

⁴ Yi ũmeta, Pablobara naʉ̃ kartara bʉsi kristianora ebreora jara ũrĩbita ãyara zarea opana ẽ basita Daizeze Bedʼeaba kʼãrẽ jarabʉ bia ũrĩta (Heb. 5:​11-14). Maʉ̃ra kristianoranebema ʉ̃kʉrʉba waidide okĩrãpanasi Moisés leyba jarabʉta, mamina Pabloba ãyaʼa jara ũrĩbisi ãya sakripisio Moisés leyba jarabʉde obadabara jipa ãĩ bʉe ẽãta ãya kayirua obʉra. Maʉ̃ kʼarea Jeowaba jarasi maʉ̃neba ʉ̃ta maʉ̃ leyba jarabʉra ũrĩ ẽ baibarata. Maʉ̃ kʼarea Pabloba ãyaʼa jara ũrĩbisi bedʼea audre yibiata, ãyaʼa jara ũrĩbisi sãwũã Jesu beidaba kʼarebabʉta ãyi audre Jeowa kʼawa bʼaita (Heb. 7:​18, 19).

5. ¿Kʼãrẽta kʼawuadaibara Hebreos librodeba akʉza kʼãrẽa?

⁵ Pabloba kristianora ebreora jara ũrĩbisi ãya Jeowaʼa sãwũã yiwidʼibʉra audre yibiabasita ãyi religion judiade baside obadaira. Judioraba Moisés leyba jarabʉde Daizezeʼa sãwũã yiwidʼibadabara ũdubikĩrãbasi Jesu zebʉrʉde sãwũã yiwidʼibarabasita (Col. 2:17). Judioraba Jeowaʼa sãwũã yiwidʼibadabara bari ũdubibasi ʉ̃ra zeide sãwũã yiwidʼibarabasita Jeowaʼa. Jeowabara nekʼãrẽ osi dayirã kayirua kĩrãduaita akʉza dayirãba iya yiwidʼidamarẽã iya kãgabʉde. Maʉ̃ba dayirãbara biʼia kʼawuaibara iya kʼãrẽta osita maʉ̃ta berabarimarẽã. Atia akʉdayi judioraba sãwũã yiwidʼipanasita akʉza kristianorãra sãwũã yiwidʼibarata Hebreos kartaba jarabʉ kĩrãkʼa. Maʉ̃ ʉ̃rʉ kʼawuabʉrʉba biʼia ũrĩnañi kʼãrẽta jarakĩrãbʉta templo espiritualba akʉza maʉ̃neba dayirãba kʼãrẽta oibarata.

6. ¿Sãwũã zokʼapanasi tabernakulora?

⁶ Judioraba sãwũã yiwidʼipanasita. Pablora bedʼeasi Moisésba tabernakulo oda ʉ̃rʉ, maʉ̃ra poaga 1512de Kristo nãã osi (akʉra rekuadro «Judioraba sãwũã yiwidʼipanasita akʉza kristianoraba sãwũã yiwidʼipanʉta»). Maʉ̃  tabernakulora de karpa oma kĩrãkʼabasi, maʉ̃ba ãyara ãyi wãma edeseabasi maʉ̃ra. Ãyara mawũã opanʉra 500 poaga berabarisi, mamina tẽã Jerusalénʼne templo osidade wua oda ẽ basi (Éx. 25:​8, 9; Núm. 9:22). Maʉ̃ tabernakulora osida israelitaraba Jeowaʼa mama sakripisio diadamarẽã akʉza Jeowaʼa yiwidʼidamarẽã (Éx. 29:​43-46). Maʉ̃ tabernakulobara ũdubibasi ʉ̃ra zeide kʼãrẽ nebiata ũduibasita kristianoraba.

7. ¿Sõbede jʉ̃drʉsi maʉ̃ templo espiritualʼra?

⁷ Kristianoraba sãwũã yiwidʼipanʉta. Maʉ̃ tabernakulora yizabasi, mawũã maʉ̃neba ũdubita templo espiritual sãwũã bʼaita (Heb. 8:5; 9:9). Pabloba kristianora ebreora maʉ̃ karta dia bʉesidera yi templo espiritualʼra chuasi, maʉ̃ra jʉ̃drʉsi poaga 29 Kristo ewaride. Maʉ̃ poagade Jesura buru kʼoesi akʉza Jeowa jaure zareara iyi ʉ̃rʉ zesi. Adewara maʉ̃neba ʉ̃ta iyira sumo saserdote ba jʉ̃drʉsi maʉ̃ templo espiritualde c (Heb. 4:14; Hech. 10:​37, 38).

8, 9. Hebreos 7:​23-27 bayeda jarabʉdebara, ¿kʼãrẽne awuarabʉ sumo saserdote Israeldebemata sumo saserdote Jesuʉ̃me?

⁸ Judioraba sãwũã yiwidʼipanasita. Sumo saserdotera pʉwʉrʉ jõmaʉ̃bari bedʼeabasi Jeowa nãã. Jeowaba Aarónʼra sumo saserdote babisi tabernakulo mapãranʉmʉsidade, mamina maʉ̃ra sumo saserdoterãra tẽã beibasi baera jʉrʉibarabasi awuruta ãyi bari bʉeita d (akʉra Hebreos 7:​23-27). Akʉza maʉ̃ra saserdoterãra ãyisida nemitia omiabasi baera, sakripisio diaibarabasi ãyi nemitia kʼarea. Ãyira jipade awuarabasi sumo saserdote Jesuʉ̃mera.

⁹ Kristianoraba sãwũã yiwidʼipanʉta. Jesura Jeowa templo espiritualde sumo saserdote (Heb. 8:​1, 2). Pablobara jarasi Jesura beika baera iyira ewari jõmaʉ̃nẽ sumo saserdote bʼaita akʉza jarasi Jesura neneẽãbʉ baera adewara ẽbẽra kayiruaraneba jĩgabʉ baera, iyara nesida ẽãta kʼãrẽa sakripisio oira iyi kayirua kʼarea. Atiara akʉdayi kʼãrẽne awuarabʉta altarta akʉza sakripisiora judioraba obadata idibema kristianoraba opanʉme.

10. ¿Kʼãrẽta ũdubibasi maʉ̃ra sakripisiora israelitaraba diadaba?

¹⁰ Judioraba sãwũã yiwidʼipanasita. Tabernakuloidu jʉ̃ẽi nãã basi altarta, nama nedʉwʉrʉrata beapanasi Jeowaʼa sakripisio diaita (Éx. 27:​1, 2; 40:29). Mamina ãya maʉ̃ra sakripisio diabʉba ãyi kayiruara ewari jõmaʉnẽ kĩrãdua ẽ baibasi (Heb. 10:​1-4). Maʉ̃ra sakripisiora nrʉemaza obʉba ũdubisi israelitara ãyara nesidabasita sakripisio audre yi zromata mawũã ãyi kayirua jipade kĩrãduamarẽã.

11. Jesu beiside, iyi bebʉta sakripisio kĩrãkʼa diasi altarde, ¿maʉ̃ altarbara kʼãrẽta jarakĩrãbasi? (Hebreos 10:​5-7, 10).

¹¹ Kristianoraba sãwũã yiwidʼipanʉta. Jesubara kʼawuabasi iyira Jeowabara zokʼasita nama egoroeda iyi bebʉta diamarẽã ẽbẽrarã jõmaʉ̃bari, mawũã ãyi kayirua kĩrãduaita (Mat. 20:28). Maʉ̃ kʼarea  Jesura buru kʼoesi Jeowaba kãgabʉ oita (Juan 6:38; Gál. 1:4). Jesubara iyi bebʉta diasi sakripisio kĩrãkʼa altarde, maʉ̃ altarbara ũdubikĩrãbasi Jeowabara yi warra bebʉta diakĩrãbasita dayirãbari beimarẽã. Jesura beima abapai beisi, wua bei ẽ basi iyira, mawũã ẽbẽrarã iyi ʉ̃rʉ ĩjãpanʉrãta ewari jõmaʉ̃nẽ panamarẽã (akʉra Hebreos 10:​5-7, 10). Atia kʼawuadayi tabernakulode eda kʼãrẽbʉba kʼãrẽta jarakĩrãbʉta.

12. ¿Tabernakulodera kʼairata eda wãseabasi dejã aba abakaʉde?

¹² Judioraba sãwũã yiwidʼipanasita. Tabernakulota akʉza templo Jerusalénʼne parãnapeadara abarika parãsida, dejã ũme chuasi. Maʉ̃ dera wuaba dejã ũme zebichuasi, yi dejã nããbemara santobasi, yi dejã ũmera santisimobasi (Heb. 9:​2-5; Éx. 26:​31-33). Santode edabasi, ĩbira juwa jiwini barabʉta akʉza basi altar insienso babarita, adewara basi mesa pan bʉebarita. Santode edara wãseabasi saserdote mama eda wãi jidadapeadaratrʉ ãyi trajo oita (Núm. 3:​3, 7, 10). Santisimonera edabasi arka bedʼea abarika zedapeadatrʉ, mawũã ũdubita Jeowa mamabʉta (Éx. 25:​21, 22). Santisimonera eda wãseabasi sumo saserdotetrʉ poagaza espiasion ewaridebʉrʉ (Lev. 16:​2, 17). Poagaza eda wãbasi nedʉwʉrʉ wa eda, Jeowaba kĩrãduamarẽã iyi nemitiata akʉza pʉwʉrʉdeta. Ewari berabari wãne Jeowaba iyi jaure zareadeba jarasi  kʼãrẽta jarakĩrãbasita tabernakulode mawũã opananata (Heb. 9:​6-8). e

13. ¿Idi ewadera kʼãrẽta jarakĩrãbʉ santota akʉza santisimota?

¹³ Kristianoraba sãwũã yiwidʼipanʉta. Jeowaba jidasi 144.000 pai ʉ̃ta wãita saserdotera bʼaita, Jesuʉ̃me ʉ̃tʉ (Apoc. 1:6; 14:1). Ãyi nama udabʉdeweda Jeowaba iyi jaure zareaba jidasi, maʉ̃ba kʼarebabʉ ãyira Jeowaʉ̃me bia bʼaita. Ãyira tabernakulo santode eda wãbʉ kĩrãkʼabʉ. 144.000rãra Jeowaba jidasi iyi jaure zareaba ãyi nama udapanʉena, maʉ̃ba ãyira Jeowa wũãwũãra kĩrãkʼabʉ. Mamaʉ̃ba ʉ̃ta ãyira tabernakulo santo eda jʉ̃ẽbʉ kĩrãkʼabʉ (Rom. 8:​15-17). Santisimo tabernakulode badara jarakĩrãbasi bajã Jeowa chuta. Wua santo akʉza santisimo ẽzadra jirabadara jarakĩrãbasi Jesu kakuata, iyira ʉ̃tara wãbe ẽ basi kakuata bʉwʉrʉta akʉza watabara baera. Iyira ʉ̃ta wãibarabasi sumo saserdote templo espiritualdebema baera. Jesura ẽbẽrarãbari beisi baera o ewasi 144.000 pai ʉ̃ta wãita, mamina ãyira ʉ̃ta wã ẽ bʉwʉrʉta, yarata watabarabʉedara. Maʉ̃itara ãya maʉ̃ra idubʉibara jõma (Heb. 10:​19, 20; 1 Cor. 15:50). Jeowaba Jesu jẽda piradrʉbida tẽã ʉ̃ta wãsi Jesura, maʉ̃ba iyira santisimoinʉ jʉ̃ẽbʉrʉ kĩrãkʼasi. 144.000rasida mainʉ jʉ̃ẽñi Jesuʉ̃me ãba bʼaita.

14. Hebreos 9:​12, 24-26 bayeda jarabʉdebara, ¿kʼãrẽa idi ẽbẽrarãba sãwũã Jeowa orrabʉra audre yibia israelitaraba obadaira?

¹⁴ Nama biʼia ũdubibʉ kʼãrẽaba bigata osita Jeowaba dayirãba iyita orradamarẽã. Jesu iya dayirãbari beimarẽã diadadeba. Sumo saserdotera eda wãbasi santisimoinʉ nedʉwʉrʉra waeda, Jeowaba iyi nemitia kĩrãduamarẽã akʉza pʉwʉrʉdeta. Naʉ̃ tabernakulora ẽbẽrarãba parãnabasi, mamina Jesura jʉ̃ẽsi audre santisimoinʉ Jeowa kĩrãbita, mama erjʉ̃ẽsi iyi wata, mawũã kĩrãduamarẽã dayirã nemitiata (akʉra Hebreos 9:​12, 24-26). Jesu dayirãbari beisi baera maʉ̃ba kʼarebabʉ Jeowaba dayirã nemitia jipa kĩrãduamarẽã. Ẽbẽrarã yi ʉ̃ta wãiba akʉza nama egorode bʼaiba Jeowara orraseapanʉ iyi templo espiritualde.

15. ¿Kʼairata trajabasi tabernakulo ewaradera?

¹⁵ Judioraba sãwũã yiwidʼipanasita. Tabernakulora ewarabarabasi, maʉ̃ra audu purrabasi. Tabernakulo ewaradebasi altar kobre omata, maʉ̃ra sakripisio obaribasi akʉza basi ponchera kobre omata. Baniaba birabasi maʉ̃ra. Saserdote ãyi nekʼãrẽ oi naweda maʉ̃ baniaba jaigua sʉgʉibarabasi (Éx. 30:​17-20; 40:​6-8). Templora tẽã parãnanebida basi ewarata ũme, yi edabemata akʉza yi ãĩbemata. Yi ãĩbemanera jʉ̃ẽseabasi yi saserdotera ẽãsida mawũã Jeowa yiwidʼita.

16. ¿Kʼairatabʉ templo espiritual ewara aba abakaʉde?

¹⁶ Kristianoraba sãwũã yiwidʼipanʉta. 144.000ra ʉ̃tʉ Jesuʉ̃me saserdotera bʼai nãã nama egorode Jeowaʉ̃me kʼẽrẽpapanʉ, maʉ̃ba templo espiritual ewara yi edabemane panʉ kĩrãkʼabʉ. Ponchera kobre omaba kĩrãbebibʉ yi ʉ̃ta wãira akʉza nama egoro bʼaira, kʼẽrẽpabaibarata  akʉzade religion zeri ẽãne ãba ba ẽ baibarata. Yi nama egorode bʼairabara, ¿sama yiwidʼipanʉ Jeowara? Apostol Juanba ũdusi ẽbẽrarã mejãchaʉba Daizezeʼa yiwidʼinʉmʉta, maʉ̃ra ẽbẽrarãra Daizezeʼa yiwidʼipanʉ templo espiritual ewara yi ãĩbemane,  maʉ̃bara jarakĩrãbʉ nama egorode (Apoc. 7:​9, 13-15). Kʼãrẽaba yibia Jeowaba iduaribisi baera iyi pʉwʉrʉde dayirãba iyaʼa yiwidʼimarẽã.

17. ¿Kʼãrẽ sakripisiota diaseabʉ dayirãbara Jeowaʼa?

¹⁷ Idi ewadera kristianorabara Jeowaʼa sakripisio diapanʉ ãya diapanʉ ãyi ewarita, ãyi zareata akʉza ãya nekʼãrẽ erbʉta Daizeze Nokʼobari. Pabloba kristianora ebreora naʉ̃ta jarasi: «Iyideba ewariza Daizeze ʉ̃rʉ ibia bedʼeabibara, naʉ̃ra dayirã ideba oibara, jaradiaibara ẽbẽra jõmaʉ̃ʼa iyi trʉ̃ta» (Heb. 13:15). Dayirãba Jeowaʼa diapanʉbʉrʉ dayirãba diaseabʉta ũdubidayi iyaʼa biga diapanʉta.

18. Hebreos 10:​22-25 bayeda jarabʉdebara, ¿kʼãrẽta badua oibara akʉza kʼãrẽta kĩrãdua ẽ baibara?

¹⁸ (Akʉra Hebreos 10:​22-25). Hebreos karta jõbodoare Pabloba jarasi dayirãbara naʉ̃rata kĩrãdua ẽ baibarata. Nããra, dayirãra yiwidʼibarata Jeowa kʼawa bʼaita. Yi ũmeta, iyi ʉ̃rʉ jaradiaibarata akʉza iya nebia jʉ̃ãbibʉ ʉ̃rʉ. Yi ũbeata, ãba yi jʉreibarata akʉza dayirãi so zarea diaibarata naʉ̃ ewari jõira arakʼaitaba baera. Apocalipsis libro jõbodoare angelba naʉ̃ta jarama ũme jarabʉ «Daizezeʼa yiwidʼidua» (Apoc. 19:10; 22:9). Dayirãba idi templo espiritual ʉ̃rʉ kʼawuadara kĩrãduada ẽ baibara akʉza dayirãba Jeowa sãwũã yiwidʼibʉra dayirãitara jipade yibiabaibara.