1. Nemene la hna qaja hnene la angela enehila, nge nemene la thangane koi së?

 MAINE tro la ketre angela a ithanata koi epun, tro kö epuni a dreng? Ame enehila, ketre angela a ithanata kowe la “nöjei nöj, me nöjei tribu, me nöjei qene hlapa, me nöjei atr.” Nemene la maca i angeic? “Xoue Akötresieti ju, nge atrunyi nyidrëti jë . . . nyihluene jë la Atre xupe la hnengödrai me ihnadro.” (Hna ama. 14:​6, 7) Iehova la nyipi Akötresie, nge loi e tro la nöjei atr a atrunyi Nyidrë. Haawe, loi e tro sa olene koi Nyidrë la hna aijijë së troa atrunyi Nyidrë ngöne la uma ne hmi ka tru i Nyidrë!

2. Nemene la uma ne hmi i Iehova? (Wange ju la hna eköhagen “ Tha Eje Kö Lai Uma Ne Hmi i Iehova.”)

² Nemene la uma ne hmi i Iehova, nge ekaa la hna qejepengöne ej? Tha ketre uma hna xupe kö. Kolo pe a qaja la itre hna hnëkën hnei Iehova jëne la mel hna huujën hnei Iesu, nge ka aijijë së troa hmi koi Nyidrë. Hnei Paulo aposetolo hna qejepengöne la itre hna hnëkën cili, ngöne la tusi angeic kowe la itre keresiano ne Heberu ka mel e Iudra. b

3-4. Hnauëne la Paulo a cinyanyi kowe la itre keresiano ne Heberu ka mel e Iudra, nge nemene la aqane xatua angatr hnei angeic?

³ Pine nemene matre Paulo a cinyanyi kowe la itre keresiano ne Heberu ka mel e Iudra? Lue kepin. Ame la pane kepin, ke troa ithuecatr koi angatr. Alanyim thei angatr la itre hna hetrun ngöne la hmi angetre Iudra, nge ma hna hnyimasai angatre jë hnene la itre he ne hmi i angatr ekö. Pine  nemen? Pine laka, pëkö uma ne hmi ka tru nyine atrunyi Akötresie, nge pëkö ita ne huuj nyine tro fë huuj, nge pë fe kö itretre huuj thene la itre keresiano. Tro la itre aqane ujë cili a thapa la madrin ne la itretre dreng, me thë la lapaune i angatr. (Heb. 2:1; 3:​12, 14) Ijije fe hi tro lai a ukune la itre xan thei angatr troa bëeke kowe la hmi angetre Iudra.

⁴ Ame la hnaaluen kepin, ke öhne hi Paulo laka, tha itre keresiano ne Heberu kö a thel troa trotrohnine la itre ini ka hnyipixe me ka jui, ene la “nyipi xen” ka ej e hnine la Tusi Hmitrötr. (Heb. 5:​11-​14) Nge ame la itre xan, ke angatr palahi a fedre kowe la Trenge Wathebo i Mose. Matre Paulo a qaja jë koi angatr ka hape, tha ijije kö lo itre huuj hna amekötin hnene la Wathebo, troa apatrene la itre ngazo i angatr. Celë hi kepin matre kola “apatrene lo wathebo hnapan.” Thupene lai, hnei Paulo hna ini angatr la itre nyipici ka jui. Hnei Paulo hna amekunë angatr laka, hetre “mejiune së ka sisitria” hna nyitrepene hnene la mel hna huujën hnei Iesu, nge celë hi “ka aijijë së troa easenyi koi Akötresie.”​—Heb. 7:​18, 19.

5. Nemene la itre nyipici hna qejepengöne hnene la tusi Heberu, nge pine nemene matre nyipiewekë tro sa trotrohnin?

⁵ Hnei Paulo hna qaja kowe la itre keresiano ne Heberu la kepin matre ka sisitria la hmi angatr enehila, hune lo hmi angatr ekö, ene lo hmi angetre Iudra. Ame la hmi angetre Iudra, ke “iahnue ne la ewekë ka troa traqa, ngo Keriso la ngönetrei.” (Kol. 2:​17) Ame la iahnu ne la atr, ke tha ka amamane kö la nyipi pengöne la atr. Ketre tune mina fe, ame la hmi angetre Iudra ke, iahnu ne la itre ewekë ka troa traqa, ene la uma ne hmi ka tru i Iehova. Ame la uma ne hmi i Iehova, ene la itre hna hnëkën hnei Nyidrë, ke kola aijijë Nyidrë troa köletrij la itre ngazo së, me aijijë së troa hmi koi Nyidrë thenge la aja i Nyidrë. Ame ngöne la tane mekune celë, tro sa ce ithanatan la hna qaja ngöne la tusi Heberu göne la “iahnue” (aqane hmi i angetre Iudra) memine la “ngönetrei” (aqane hmi ne la itre keresiano). Celë hi ka troa xatua së troa trotrohnine la aliene la uma ne hmi i Iehova memine la enyipiewekëne ej koi së.

6. Nemene la hna kuca ngöne la uma maano?

⁶ Aqane hmi i angetre Iudra. Hnei Paulo hna hane qaja la uma maano hna cane  hnei Mose lo 1512 M.P.K. (Wange ju la iatr “Aqane Hmi i Angetre Iudra​—Aqane Hmi Ne La Itre Keresiano.”) Ceitune hi la uma maano memine la ketre itaat. Ame lo xötrei, angetre Isaraela a ajöne trongëne la uma maano. Celë hi aqane kuca i angatr ngöne la 500 lao macatre, utihë la kola acil la uma ne hmi e Ierusalema. (Eso. 25:​8, 9; Num. 9:​22) Angetre Isaraela a itronyi ngöne la “itat ne icasikeu” matre easenyi koi Akötresie, tro fë huuj, me hmi koi Nyidrë. (Eso. 29:​43-​46) Ngo ej a nyihatren la ketre ewekë ka sisitria kö kowe la itre keresiano.

7. Eue la kola acile la uma ne hmi ka tru i Iehova?

⁷ Aqane hmi ne la itre keresiano. Ame la uma maano, ke kola “nyihatren la itre ewekë e hnengödrai,” ene la uma ne hmi ka tru i Iehova. Öni Paulo, “kola nyihatrene la hneijine celë hnene la uma maano.” (Heb. 8:5; 9:9) Matre ame la Paulo a cinyanyine la tusi Heberu, ke cile hë la uma ne hmi ka tru i Iehova. Hna acile ej lo macatre 29 M.K. Ame lo macatre cili, hnei Iesu hna xomi bapataiso, nge hna ië nyidrë hnei uati hmitrötr, matre nyidrëti fe hë a xom la hnëqa ne “atre huuje ka sisitria” ngöne la uma ne hmi cili. c​—Heb. 4:​14; Itre hu. 10:​37, 38.

8-9. Thenge la Heberu 7:​23-​27, nemene la eisapengöne i Iesu memine la itretre huuj ka sisitria ekö?

⁸ Aqane hmi i angetre Iudra. Hnëqa ne la atre huuj ka sisitria troa qeneqaja ne la nöj qëmekei Akötresie. Hnei Iehova hna acile la pane atre huuj ka sisitria, ene Arona, lo ijine kola löthe la uma maano. Ngo, tune la hna qaja hnei Paulo, “ame la itre xa atre huuj, hnei angatre hna inyihnai pine la mec, ke mec a sewe angatr troa cilëne paluane la hnëqa cili.” d (E jë la Heberu 7:​23-​27.) Nge pine laka, itre atr ka tha pexeje kö, angatre fe a tro fë huuj kowe la itre sipu ngazo i angatr. Ngo tha ka ceitu kö memine la Atre Huuj Ka Sisitria, ene Iesu Keriso!

⁹ Aqane hmi ne la itre keresiano. Ame Iesu Keriso, lo Atre Huuj Ka Sisitria, ke nyidrëti la “hlue ne la nyipi taat, lo hna acile hnei Iehova, ngo tha hnei itre atre kö.” (Heb. 8:​1, 2) Öni Paulo, “ame [Iesu], pine laka, ka pë pune la mele i nyidrë, pëkö atre huuj ka troa nyihna i nyidrë.” Ketre, isapengöi nyidrëti kö memine la itre xaa atre huuj ka sisitria ke, ka “pë trian, nge ka isapengöne [nyidrë] me itretre kuca la ngazo” matre “tha nyipiewekë kö tro nyidrëti a huuj e nöjei drai” kowe la itre sipu ngazo i nyidrë. Tro pena sa ce wang la eisapengönene la itre ita ne huuj me itre huuj ekö ngöne lo hmi angetre Iudra, me thene la itre keresiano enehila.

10. Nemene la hna nyihatren hnene la itre huuj hna tro fë ngöne la ita ne huuj kopa?

¹⁰ Aqane hmi i angetre Iudra. Ezine la uma maano, hna acile la ketre ita ne huuj kopa, hnë huujëne la itre öni koi Iehova. (Eso. 27:​1, 2; 40:29) Ngo, tha ijije kö tro la itre huuje cili a köletrij hnyawane la itre ngazo ne la nöj. (Heb. 10:​1-4) Ame la itre huuj, ene la itre öni hna tro fë lapan ngöne la uma maano, ke kola nyihatrene la huuj ka cas ka troa köletrij la ngazo ne la itre atr.

11. Nemene la hna nyihatren hnene la ita ne huuj hnei Iesu hna huujë nyidrëti ngön? (Heberu 10:​5-7, 10)

 ¹¹ Aqane hmi ne la itre keresiano. Atre hi Iesu laka, ame la kepine matre Iehova a upi nyidrëti jë kowe la ihnadro, ke göi tro nyidrëti a nyithupene mel kowe la itre atr. (Mat. 20:28) Matre ame la Iesu a xomi bapataiso, kösë nyidrëti a cil qëmekei Iehova matre kuca la aja i Nyidrë. (Ioane 6:​38; Gal. 1:4) Hnei Iesu hna huujë nyidrëti kö ngöne la ketre ita ne huuj, ka nyihatrene la aja i Akötresie. Nge ame la “aja” i Iehova, ke tro Iesu a huujëne la mele i nyidrë ka pexej koi së. “Hna aca huujëne la ngönetrei i Iesu” matre troa köletrij asë la itre ngazo ne la itre ka lapaune koi nyidrë. (E jë la Heberu 10:​5-7, 10.) Tro pena sa ce wang la alien ne la itre hnahag ne la uma maano.

12. Drei la ka ijij troa lö kowe la Gaa Hmitrötr me kowe la Gaa Nyipi Hmitrötr?

¹² Aqane hmi i angetre Iudra. Ceitune hi la aqane kuca lo uma maano memine lo uma ne hmi hna xup e Ierusalema. Lue hnahage hi e kuhu hnin, ene la “götrane Gaa Hmitrötr” memine la “Gaa Nyipi Hmitrötr.” Hna thawa la lue hnahag hnene la ketre imaano hna can. (Heb. 9:​2-5; Eso. 26:​31-​33) Ame ngöne la Gaa Hmitrötr, hna amë la ita ne laam gool, me hnë dreu ka pui loi, memine la laulau, me itre areto nyine amamane koi Akötresie. Tro hmekuje hi la “itete huj, ite hna siën” a lö kowe la Gaa Hmitrötr matre kuca la huliwa i angatr ka hmitrötr. (Num. 3:​3, 7, 10) Ame ngöne la Gaa Nyipi Hmitrötr, hna amë la Pua  Ne Isisinyikeu hna kuca hnei gool, nyine amamane laka, Iehova hi e cili. (Eso. 25:​21, 22) Atre huuj ka sisitria hmekuje hi la ka ijij troa lö kowe la Gaa Nyipi Hmitrötr. Tro hi nyidrëti a lö kowe la hnahage cili ngöne la ca drai ne la macatre, ene la Drai Ne Ialoinekeun. (Lev. 16:​2, 17) E nöjei macatre, nyidrëti a lö fë la madra ne öni, matre troa seng la itre sipu ngazo i nyidrë, memine la ngazo ne la nöj. E thupen, jëne la uati hmitrötr, hnei Iehova hna qejepengöne la hna nyihatren hnene la lue hnahage cili.​—Heb. 9:​6-8.

13. Nemene la hna nyihatrene hnene la Gaa Hmitrötr me Gaa Nyipi Hmitrötr?

¹³ Aqane hmi ne la itre keresiano. Tha alanyimu kö la itretre drei Keriso hna iën hnei uati hmitrötr, nge ketrepengöne kö la aqane imelekeu i angatr me Iehova. Ala 144 000 angatr ka troa atre huuj e hnengödrai me Iesu. (Hna ama. 1:6; 14:1) Ame la Gaa Hmitrötr, ke kola nyihatrene la pengöne la itre hna iën, ene lo itre hnei Akötresie hna nyi kukun, la angatr palakö e celë fen. (Rom. 8:​15-​17) Ame la Gaa Nyipi Hmitrötr, kola nyihatrene la hnengödrai, hnë lapa i Akötresie. Ame la “imaano” akawane la Gaa Hmitrötr memine la Gaa Nyipi Hmitrötr, ke kola nyihatrene la ngönetrei Iesu ka thingijë i nyidrë, lo Atre Huuj Ka Sisitria troa tro hnengödrai. Ame la nyidrëti a huujën la ngönetrei nyidrë thatraqane la itre atr, ke nyidrëti hi lai a fe gojenyi kowe la itre hna iëne matre tro angatr a hane mel e hnengödrai. Tro fe angatr a nuetrij la ngönetrei angatr e celë fen qëmeken troa kapa la edrö i angatr e hnengödrai. (Heb. 10:​19, 20; 1 Kor. 15:50) Thupene la kola amele Iesu, hnei nyidrë hna lö kowe la Gaa Nyipi Hmitrötr ne la uma ne hmi i Iehova, nge hna xötrethenge nyidrë hnene la itre hna iën e thupen.

14. Nemene la aqane amamane Heberu 9:​12, 24-​26 la esisitriane la uma ne hmi ka tru i Iehova?

¹⁴ Ka sisitria la itre hna hnëkën hnei Iehova kowe la hmi ka wië jëne la thupene mel, me jëne la hnëqa ne Atre Huuj i Iesu Keriso. Ame ekö e Isaraela, atre huuj ka sisitria a löfë la madra ne la itre öni hna huujën ngöne la Gaa Nyipi Hmitrötr ne la uma ne hmi. Ngo hnei Iesu “hna lö e hnengödrai,” lo götrane gaa nyipi hmitrötr, qëmekei Iehova. Hnei Iesu hna amamane koi Iehova la madra i nyidrë ka pexej hna huujëne koi së matre “apatrene la itre ngazo.” (E jë la Heberu 9:​12, 24-​26.) Ame la mel hna huujën hnei Iesu, ke celë hi huuj ka troa apatrene la itre ngazo së utihë epine palua. Ame enehila, tro pena sa ce wang laka, e ka mejiune ju hë së troa mel e hnengödrai maine e celë fen, ngo ijiji easë asë hi troa nyihlue i Nyidrë ngöne la uma ne hmi i Nyidrë.

15. Drei la ka huliwa ngöne la götrane gaa pë ihakun?

¹⁵ Aqane hmi i angetre Iudra. Hna kuca la götrane gaa pë ihakun ezine la uma maano, nge hna nyihagene xötreith. E cili la hnë huliwa ne la itretre huuj. Ame ngöne la götrane gaa pë ihakun, hna amë la ita ne huuj memine la trepene tim kopa, matre tro la itretre huuj a pane wasi wanakoim me waca qëmekene troa eatrëne la hnëqa i angatr ka hmitrötr. (Eso. 30:​17-​20; 40:​6-8) Ame ngöne la itre uma ne hmi hna xup e thupen, hetrenyi la itre xaa götrane gaa pë ihakun, thatraqane la itre atr ka hmi koi Akötresie, ngo tha atre huuje kö.

16. Drei la ka nyihlue i Iehova ngöne götrane gaa pë ihakun ka ej e hnine me e trön ne la uma ne hmi ka tru i Iehova?

¹⁶ Aqane hmi ne la itre keresiano. Qëmekene tro la itre hna iën a elë hnengödrai  me atre huuj me Iesu, angatr a catre nyihlue i Iehova e celë fen, ngöne la götrane gaa pë ihakun ka ej e hnine la uma ne hmi ka tru i Iehova. Tro la trepene tim ne la uma ne hmi a amekunëne kowe la itre hna iën me itre xaa keresiano laka, nyipiewekë tro angatr a iananyi memine la kuci ngazo, nge troa wië la hmi angatr koi Iehova. Tune kaa fe “la ka ala nyimu atraqatr,” itre ka xatuane la itre trejin hna iën? Ekaa la angatr a nyihlue i Iehova? Hnei Ioane aposetolo hna meköle goeë angatr a “cil qëmekene la therone i Akötresie,” nge “angatr a kuca la huliwa ka hmitrötr e lai me jidr hnine la uma ne hmi i [Akötresie].” (Hna ama. 7:​9, 13-​15) Eje hi, angatr a kuca la huliwa cili e celë fen, hnine la götrane gaa pë ihakun e trön ne la uma ne hmi ka tru i Iehova. Easa madrine ke, hnei Iehova hna hane aijijë së troa nyihlue i Nyidrë ngöne la uma ne hmi ka tru i Nyidrë!

17. Nemene la itre huuj nyine tro sa hamën koi Iehova?

¹⁷ Ame enehila, ijiji easë asë troa tro fë huuj koi Iehova, ngöne la easa hamëne la traem, me trengecatr, me manie së thatraqane la itre huliwa ne la Baselaia i Akötresie. Öni Paulo aposetolo kowe la itre keresiano ne Heberu ka hape, “The mano kö së huujëne koi Akötresie la itre huuj ne iatruny, ene la wene ne la itre ineqë së, itretre anyipicin la ëje i nyidrë qëmekene la ka ala nyim.” (Heb. 13:15) Easa amamane laka, easa wangatrune la hmi së koi Iehova ngöne la easa kuca asë la hne së hna atrein ngöne la huliwa i Nyidrë.

18. Thenge la tusi Heberu 10:​22-​25, nemene la itre götrane ne la hmi nyine tro palahi sa eatrën, nge nemene la nyine tro sa kuca?

¹⁸ E jë la Heberu 10:​22-​25. Ame ngöne la pune la tusi Paulo kowe la angetre Heberu, Paulo a qaja la itre götran ne la hmi nyine tro palahi sa eatrën. Kola qaja la troa thith koi Iehova, me cainöj koi itre xan, me catre sine la itre icasikeu matre itö ithuecatrekeu ke, “calemi hë la drai i Akötresie.” Ame ngöne la pune la tusi Hna Amaman, önine la angela i Akötresie: “Nyihlue i Akötresieti jë!” (Hna ama. 19:10; 22:9) Alua qaja jë kö la angela, nyine amamane la enyipiewekën la eamo cili. Wangatrune jë së la hmi së koi Akötresie, nge the tro kö sa thëthëhmine la itre ini ka jui göne la uma ne hmi ka tru i Iehova!