1. ¿Mbaʼépa heʼi oikóvo peteĩ ánhel ha mbaʼépa jajapo vaʼerã upe haguére?

 PETEĨ ánhel oñeʼẽtaramo ñandéve, ¿jajapysakátapa hese? Katuete ningo. Koʼág̃a oĩ hína peteĩ ánhel heʼíva álgo “entéro tetã, trívu, puévlo ha umi oñeʼẽvape diferénte idióma”. ¿Mbaʼépa heʼi oikóvo ko ánhel? Haʼe heʼi: ‘Perrespeta Ñandejárape ha pembotuicha chupe. Peadora Ñandejárape, upe ojapo vaʼekue yvága ha yvy’ (Apoc. 14:6, 7). Enterove jaadora vaʼerã Jehovápe añoite, pórke haʼe hína pe Dios verdadéro. Ajépa jaagradesete chupe omeʼẽ haguére ñandéve pe oportunida porãite jaadorávo chupe itémplo espirituál tuichaitévape.

2. ¿Mbaʼépa hína Jehová témplo espirituál? (Ehecha pe rrekuádro “ ¿Mbaʼépa ndahaʼéi pe témplo espirituál?”).

² ¿Mbaʼépa hína pe témplo espirituál? ¿Mbaʼéichapa ikatu jaikuaa umi mbaʼe oĩ vaʼekue ko témplope? Nañañeʼẽi hína peteĩ konstruksión oñemopuʼã vaʼekuére, síno ko témplo orrepresenta álgo. Pe témplo espirituál haʼe hína opa mbaʼe Jehová ojapo vaʼekue ojeadora hag̃ua chupe haʼe oipotaháicha, koʼã mbaʼe haʼe ojapo itaʼýra Jesucristo sakrifísio rupive. Apóstol Pablo oexplika vaʼekue ko téma pe kárta omondo vaʼekuépe umi kristiáno hebreo oikóvape Judéape. b

3, 4. ¿Mbaʼérepa apóstol Pablo ojepyʼapy vaʼekue umi kristiáno hebréore ha mbaʼéichapa oipytyvõ chupekuéra?

³ ¿Mbaʼérepa oskrivi vaʼekue Pablo umi kristiáno hebreo oikóvape Judéape? Provávlemente mokõi mbaʼére. Primero omokyreʼỹ hag̃ua chupekuéra. Oiko mboyve chuguikuéra kristiáno, la majoría oĩ vaʼekue umi judío rrelihiónpe. Ikatu oime umi omoakã  vaʼekue chupekuéra irrelihiónpe oñembohory hesekuéra haʼe haguére koʼág̃a kristiáno. ¿Mbaʼérepa? Pórke umi kristiáno ndorekói vaʼekue peteĩ témplo neporãmba jepéva oadora hag̃ua Jehovápe. Ndorekói vaʼekue avei umi altár ojapo hag̃ua sakrifísio ha ndaipóri vaʼekue saserdóte oipytyvõ vaʼerã chupekuéra. Upéva ikatu kuri odesanima umi kristiánope ha omokangy ijeroviakuéra (Heb. 2:1; 3:12, 14). Ikatu voi oĩ algúno opensáva oho jeývo umi judío rrelihiónpe.

⁴ Segundo, apóstol Pablo ohechaukase kuri umi kristiáno hebréope, tekotevẽha oñehaʼãve hikuái ontende hag̃ua umi enseñánsa pyahu ha hypyʼũvéva, péva hína pe “tembiʼu iñaliméntova” oĩva Ñandejára Ñeʼẽme (Heb. 5:​11-14). Umi kristiáno apytépe oĩ vaʼekue umi osegíva gueteri ojegia Moisés léire. Péro Pablo oexplika vaʼekue umi sakrifísio ojejeruréva upe léipe ndaikatúi hague oipeʼapaite umi pekádo, ha upévare “oñemboyke” hague upe léi. Upéi Pablo omboʼe chupekuéra unas kuánta enseñánsa hypyʼũva. Por ehémplo heʼi umi kristiánope orekoha hikuái peteĩ “esperánsa iporãvéva” Jesús sakrifísio rupive. Ha upéva oipytyvõtaha chupekuéra ‘oñemoag̃ui hag̃ua Ñandejárare’ (Heb. 7:18, 19).

5. ¿Mbaʼe mbaʼépa tekotevẽ ñantende Hebréosgui ha mbaʼérepa?

⁵ Pablo oexplika umi ermánope mbaʼérepa oiko guive chuguikuéra kristiáno oadora porãveha Ñandejárape oĩrõ guarégui umi judío rrelihiónpe. Umi judío oadora vaʼekue Ñandejárape pe léi heʼiháicha. Péro upéva haʼe vaʼekue “peteĩ sómbrante umi mbaʼe oútavagui”. “Añetehápe umíva Cristo sómbra hína” (Col. 2:17). ¿Mbaʼéichapa ikatu ñantende upéva? Peteĩ yvyramáta sómbra ohechauka vai vaínte mbaʼeichaguápa pe yvyramáta. Péicha avei umi judío oadora lája Ñandejárape ñepyrũrã, ohechaukánte mbaʼépa la añetehápe oútava upe rire. Tekotevẽ ñantende umi mbaʼe Jehová ojapo vaʼekue oñeperdona hag̃ua ñandéve ñande pekádo, upéicha ikatúta jaadora chupe haʼe oipotahaichaite. Ñakomparamína koʼág̃a mbaʼéichapa umi judío oadora vaʼekue Ñandejárape ha mbaʼéichapa upéi umi kristiáno oadora chupe, heʼiháicha Hebreos. Péicha jajapóramo ñantende porãvéta mbaʼépa hína pe témplo espirituál ha mbaʼéichapa jaikuaávo upéva ñanepytyvõ.

6. ¿Maʼerãpa ojepuru vaʼekue pe tavernákulo?

⁶ Mbaʼéichapa oadora vaʼekue Ñandejárape umi judío. Koʼápe Pablo oñeʼẽ hína kuri pe tavernákulo omopuʼã vaʼekuére Moisés áño 1512 a.C-pe (ehecha pe rrekuádro “Oadora lája umi judío Jehovápe. Oadora lája umi kristiáno Jehovápe”). Pe lugár umi judío oñembyaty haguépe oadora hag̃ua Ñandejárape ha oofrese hag̃ua sakrifísio héra vaʼekue tavernákulo (Éx. 29:43-46). Pe tavernákulo haʼe vaʼekue peteĩ óga kárpa umi israelita oguerováva hendivekuéra oho ohohápe. Haʼekuéra oipuru vaʼekue upe tavernákulo haimete 500 áñore oñemopuʼã peve pe témplo Jerusalénpe (Éx. 25:8, 9; Núm. 9:22). Péro pe tavernákulo orrepresenta vaʼekue avei peteĩ mbaʼe tuichavéva oñepyrũtava kuri umi kristiánope g̃uarã.

7. ¿Arakaʼépa oñepyrũ vaʼekue oexisti pe témplo espirituál?

⁷ Mbaʼéichapa oadora Ñandejárape umi kristiáno. Pe tavernákulo yma guare “ohechaukánte umi mbaʼe yvagapegua”, ha orrepresenta Jehová témplo espirituál tuichaitéva. Pablo heʼi vaʼekue ‘pe tavernákulo orrepresentaha umi mbaʼe oĩva ko tiémpope’ (Heb. 8:5; 9:9). Pe tiémpo Pablo oskrivírõ guare umi hebréope oĩma vaʼekue ko témplo espirituál. Ko témplo oñepyrũ vaʼekue oexisti áño 29-pe, pórke upe áñope Jesús ojevautisa. Upérõ oñeunhi Jesúspe espíritu sánto rupive ha oñepyrũ oservi de súmo saserdóte Jehová témplo espirituálpe (Heb. 4:14; Hech. 10:37, 38). c

8, 9. Heʼiháicha Hebreos 7:23-27, ¿mbaʼérepa idiferentete vaʼekue umi súmo saserdóte Israelpegua ha pe súmo saserdóte iñimportantevéva Jesucristo?

⁸ Mbaʼéichapa oadora vaʼekue Ñandejárape umi judío. Pe súmo saserdóte oñepresenta vaʼekue Jehová renondépe pe puévlo rehehápe. Israélpe, pe primer súmo saserdóte haʼe vaʼekue Aarón. Jehová onombra vaʼekue chupe oñeinagurárõ guare pe tavernákulo. Péro Pablo heʼi haguéicha, yma “umi saserdóte omanóvo, ótro opyta hekovia ha osegi ojapo upe tembiapo” (elee Hebreos 7:23-27). d Umi súmo saserdóte yma guare iñimperfékto vaʼekue, upévare oofresémante vaʼerã sakrifísio oñeperdona hag̃ua chupekuéra ipekádo. Upéva peteĩ diferénsia tuichaitereíva éntre umi súmo saserdóte oĩ vaʼekue Israélpe ha pe súmo saserdóte iñimportantevéva haʼéva Jesús.

⁹ Mbaʼéichapa oadora Ñandejárape umi kristiáno. Jesucristo hína ñane súmo saserdóte ha haʼe oservi “pe tavernákulope, upéva Jehová voi omopuʼã vaʼekue ha ndahaʼéi peteĩ yvypóra” (Heb. 8:1, 2). Pablo oexplika vaʼekue ‘Jesús oikove rupi opa árare, natekotevẽiha ótro oservi de saserdóte hekovia’. Avei heʼi Jesús ‘ipotĩha entéro mbaʼépe, ndojoguaiha ni michĩmi umi pekadórpe’ ha natekotevẽiha omeʼẽ sakrifísio káda día ipekádore, ojapo haguéicha umi súmo saserdóte oĩva Israélpe. Koʼág̃a jahechami mbaʼépepa idiferénte umi altár ha sakrifísio yma guare ha la orrepresentáva umi kristiánope g̃uarã.

10. ¿Mbaʼépa orrepresenta umi sakrifísio ojejapo vaʼekue pe altár de kóvrepe?

¹⁰ Mbaʼéichapa oadora vaʼekue Ñandejárape umi judío. Pe tavernákulo entráda renondépe oĩ vaʼekue peteĩ altár de kóvre ha upépe ojeofrese vaʼekue umi animál ojesakrifika vaʼekue Jehovápe (Éx. 27:1, 2; 40:29). Péro umi sakrifísio rupive ndaikatúi vaʼekue oñeperdonambaite pe puévlo pekádo (Heb. 10:1-4). Pe tavernákulope kontinuadoite ojeofrese vaʼekue sakrifísioramo  umi animál. Umíva orrepresenta vaʼekue pe sakrifísio ojejapótava upéi oñeperdonambaite hag̃ua yvyporakuéra pekádo.

11. ¿Mbaʼépa hína pe altár Jesús oñepresenta hague? (Hebreos 10:5-7, 10).

¹¹ Mbaʼéichapa oadora Ñandejárape umi kristiáno. Jesús oikuaa vaʼekue Itúa ombou hague chupe ko yvy ape ári omeʼẽ hag̃ua hekove sakrifísioramo, péicha opaga hag̃ua pe rreskáte yvyporakuéra rehehápe (Mat. 20:28). Ha Jesús ojevautisárõ guare oñepresenta ojapo hag̃ua Jehová volunta (Juan 6:38; Gál. 1:4). Jesús haʼete vaʼekue ojeofreséva peteĩ altár ári. ¿Mbaʼépa upe altár? Upéva orrepresenta vaʼekue Jehová “rembipota”, ha hembipota haʼe vaʼekue Itaʼýra omeʼẽ hekove perfékto sakrifísioramo. Jesucristo omeʼẽ vaʼekue hekove “una ves ha opa ára g̃uarã”. ¿Mbaʼépa ojehupytýta ko sakrifísio rupive? Oñeperdonáta ipekadokuéra umi ojeroviávape guive Jesucrístore (elee Hebreos 10:5-7, 10). Koʼág̃a jahecháta mbaʼépa orrepresenta vaʼekue umi mbaʼe oĩva pe tavernákulo ryepýpe.

12. ¿Máva mávapa la ikatu vaʼekue oike umi koty oĩvape pe tavernákulope?

¹² Mbaʼéichapa oadora vaʼekue Ñandejárape umi judío. Pe tavernákulo ha umi témplo upéi oñemopuʼãva Jerusalénpe ojojogua vaʼekue hyepýpe. Koʼã lugár ojedividi vaʼekue en 2 párte hérava: pe “Lugár Sánto” ha pe “Santísimo”. Peteĩ kortína oservi vaʼekue de divisória éntre pe “Lugár sánto” ha pe “Santísimo” (Heb. 9:2-5; Éx. 26:31-33). Pe Sántope oĩ vaʼekue peteĩ kandelávro de óro, pe altár ojehapyha insiénso ha pe mesa oñemoĩháme pe pan. Umi “oñenombra vaʼekue oservi hag̃ua  de saserdóte” añoite ikatu vaʼekue oike pe Lugár Sántope ojapo hag̃ua umi traváho sagrádo orekóva hikuái (Núm. 3:3, 7, 10). Pe Santísimope oĩ vaʼekue pe Árka del Pákto de óro orrepresenta vaʼekue Jehová oĩha upépe (Éx. 25:21, 22). Pe súmo saserdóte añoite ikatu vaʼekue ohasa pe kortína ha oike pe Santísimope una ves al áño, pe Día Oñeperdonahápe umi Pekádo (Lev. 16:2, 17). Una ves káda áño pe súmo saserdóte opresenta vaʼekue umi animál ruguykue oñeperdona hag̃ua ipekádo ha pe puévlo kompletoite pekádo. Kon el tiémpo ijespíritu sánto rupive Jehová omyesakã mbaʼépa orrepresenta vaʼekue umi mbaʼe oĩva pe tavernákulope (Heb. 9:6-8). e

13. ¿Mbaʼépa orrepresenta pe “Lugár Sánto” ha pe “Santísimo”?

¹³ Mbaʼéichapa oadora Ñandejárape umi kristiáno. Unos kuánto Cristo disípulopente oñeunhi pe espíritu rupive. Péicha Jehová oadopta chupekuéra itaʼýraramo. Koʼãva hína umi 144.000 oservítava Jesús ndive yvágape saserdóteramo (Apoc. 1:6; 14:1). Pe Sánto orrepresenta Jehová oadopta hague koʼã unhídope itaʼýraramo oĩ aja gueteri hikuái ko yvy ape ári (Rom. 8:15-17). Pe Santísimo orrepresenta pe yvága Jehová oĩháme. ¿Ha mbaʼépa orrepresenta “pe kortína” odividíva pe Sánto ha pe Santísimo? Upéva orrepresenta Jesús rete oĩ aja gueteri ko yvy ape ári. Haʼe oreko aja pe kuérpo umáno ndaikatúi vaʼekue oike yvágape oservi hag̃ua de súmo saserdóte pe témplo espirituálpe. Jesús omeʼẽrõ guare hete sakrifísioramo yvyporakuéra rehehápe, oavri peteĩ tape opermitítava umi unhídope oiko yvágape. Umi unhído kásope avei oreko aja ikuérpo umáno ndaikatúi oike pe yvágape (Heb. 10:19, 20; 1 Cor. 15:50). Jesús orresusita rire oike pe Santísimo oĩvape pe témplo espirituálpe. Upépe avei oservíta hendive enterove umi unhído.

14. Ohechaukaháicha Hebreos 9:12, 24-26, ¿mbaʼérepa iporãve ojeadora lája Jehovápe itémplo espirituálpe la ymave ojejapo vaʼekuégui Israélpe?

¹⁴ Koʼápe ikatu jahecha iporãiteveha yma guarégui la upéi Jehová ojapo vaʼekue ojeadora hag̃ua chupe haʼe oipotaháicha itémplo espirituálpe. Haʼe ojapo entéro koʼã mbaʼe itaʼýra sakrifísio rupive ha omoĩvo chupe oservi hag̃ua de súmo saserdóte. Yma Israélpe pe súmo saserdóte oike vaʼekue pe Santísimope, haʼéva peteĩ lugár yvypórante ojapo vaʼekue, ha haʼe oraha vaʼekue opresenta umi animál ruguykue. Jesús katu oñepresenta Jehová renondépe ha upearã oike vaʼekue “yvágape voi”, haʼéva pe lugár isagradovéva. Upépe Jesús opresenta vaʼekue hekove perfékto omeʼẽ vaʼekue ñanderehehápe. Haʼe ‘oipeʼaite hag̃ua pe pekádo oñemeʼẽ ijupe voi sakrifísioramo’ (elee Hebreos 9:12, 24-26). Jesús sakrifísio la iñimportantevéva, pórke oipeʼa kompletoite umi pekádo pára siémpre. Koʼág̃a jahecháta mbaʼéichapa enterove ikatu jaservi Jehová témplo espirituálpe, tahaʼe jareko pe esperánsa jaikóvo yvágape térã ko yvy ape ári.

15. ¿Mávapa oservi vaʼekue pe tavernákulo korapýpe?

¹⁵ Mbaʼéichapa oadora vaʼekue Ñandejárape umi judío. Pe tavernákulo oreko vaʼekue peteĩ korapy. Upéva haʼe vaʼekue peteĩ lugár aviérto oñemongoráva télape, umi saserdóte okumpli vaʼekue itraváho ko korapýpe. Pe korapýpe oĩ vaʼekue pe altár de kóvre ojehapyha ofrénda ha avei pe palangána guasu de kóvre. Umi saserdóte oipuru vaʼekue pe palangána oñemopotĩ hag̃ua oñepyrũ mboyve itraváho sagrádo (Éx. 30:​17-20; 40:​6-8). Péro umi témplo oñemopuʼã vaʼekue kon el tiémpo oreko vaʼekue avei peteĩ korapy okapegua ha upépe umi ndahaʼéiva saserdóte oho vaʼekue oadora hag̃ua Ñandejárape.

16. ¿Máva mávapa oservi umi korapy oĩvape pe témplo espirituálpe?

 ¹⁶ Mbaʼéichapa oadora Ñandejárape umi kristiáno. Oho mboyve yvágape oservi hag̃ua de saserdóte Jesús ndive, umi unhído oĩva gueteri ko yvy ape ári oservi fiélmente pe korapy hyepypeguápe oĩva pe témplo espirituálpe. Pe palangána guasu orekóva y omomanduʼa umi unhídope álgo iñimportántevare ha entéro kristiáno oreko vaʼerã avei enkuénta. ¿Mbaʼépa hína? Tekotevẽha jasegi ñanderekopotĩ ha jaadora Jehovápe haʼe oipotahaichaite. ¿Péro moõpa oservi Jehovápe pe “aty guasu” oapojáva fiélmente umi unhídope? Apóstol Juan ohecha vaʼekue chupekuéra ‘oñemboʼývo pe tróno renondépe’. Upéva hína ko yvy ape ári, pe témplo korapy okapeguápe, upépe haʼekuéra oservi Ñandejárape “ára ha pyhare itémplope” (Apoc. 7:9, 13-15). ¡Ajépa javyʼaite Jehová omeʼẽ haguére ñandéve pe oportunida porãite jaadorávo chupe itémplo espirituál tuichaitévape!

17. ¿Mbaʼe mbaʼépa ikatu ñameʼẽ Jehovápe?

¹⁷ Koʼág̃arupi entéro kristiáno jareko pe oportunida porãite jaadorávo Jehovápe. Ñande jaipuru ñane tiémpo, ñane mbaretekue ha ñane mbaʼerepy jaservi hag̃ua Ñandejárape. Apóstol Pablo heʼi vaʼekue voi umi kristiáno hebréope: “Ñambotuichákena siémpre Ñandejárape Jesús rupive. Upéva haʼete peteĩ sakrifísio ñameʼẽva Ñandejárape. Ñande jaipuru ñande juru jaikuaauka hag̃ua héra enterove renondépe” (Heb. 13:15). Jaagradeseterei ikatu haguére jaadora Jehovápe, upévare ñameʼẽ chupe la iporãvéva iservísiope.

18. Heʼiháicha Hebreos 10:22-25, ¿mbaʼe mbaʼépa siémpre jajapo vaʼerã, ha mbaʼéguipa nañanderesaráiri vaʼerã?

¹⁸ (Elee Hebreos 10:22-25). Opakuévo ikárta umi hebréope, Pablo omensiona unas kuánta kósa siémpre jajapo vaʼerã jaadorávo Jehovápe. Haʼe heʼi ñañemboʼe vaʼerãha Jehovápe, japredika, jaha rreunionhápe ñane kongregasióndi ha ñañomokyreʼỹ vaʼerãha. “Jajapo vaʼerã koʼã mbaʼe koʼýte koʼág̃a jahechávo Ñandejára día hiʼag̃uimbaitemaha”. Lívro de Apocalípsispe Jehová ánhel heʼi: “Eadora Ñandejárape” (Apoc. 19:10; 22:⁠9). Haʼe heʼi upéva 2 vése voi ohechauka hag̃ua mbaʼeichaitépa iñimportánte jajapo upéva. Aníkena ñanderesarái la ñaaprende vaʼekuégui Jehová témplo espirituálgui ha tuichaiterei mbaʼeha jaadora Ñandejára ndaijojaháivape.