1. Ib tug tub txib saum ntuj hais li cas, thiab peb xav li cas txog nws cov lus?

 YOG ib tug tub txib saum ntuj hais lus rau koj, koj puas yuav ua tib zoo mloog? Niaj hnub nim no, muaj ib tug tub txib saum ntuj tab tom hais lus rau tib neeg, “tsis hais haivneeg twg, xeem twg thiab cov neeg uas hais yam lus twg.” Ua li nws hais li cas? Nws hais tias: “Nej yuav tsum hwm Vajtswv thiab qhuas hais tias Vajtswv yog tus uas muaj hwjchim loj kawg nkaus! . . . Nej cia li txhos caug ntua pehawm tus Vajtswv uas yog tus tsim lub ntuj thiab lub ntiajteb.” (Tshwmsim 14:6, 7) Yehauvas yog tus tseem Vajtswv xwb uas txhua leej txhua tus yuav tsum pe hawm. Peb ris Yehauvas txiaj ntsig kawg li rau qhov uas nws cia peb los pe hawm nws hauv nws lub tuam tsev ntawm sab kev ntseeg!

2. Yehauvas lub tuam tsev ntawm sab kev ntseeg yog dab tsi? (Saib lub ntsiab “ Lub Tuam Tsev Ntawm Sab Kev Ntseeg Tsis Yog Li No.”)

² Lub tuam tsev ntawm sab kev ntseeg yog dab tsi tiag, thiab phau ntawv twg thiaj piav zoo zoo txog lub tuam tsev ntawd? Lub tuam tsev ntawm sab kev ntseeg tsis yog ib lub tuam tsev tiag tiag. Tiam sis yog txoj kab ke uas Vajtswv tau npaj tseg rau tib neeg, kom lawv thiaj tau pe hawm nws thiab nrog nws sib raug zoo vim muaj Yexus tus nqe txhiv. Tus tub txib Povlauj piav ntxiv txog txoj kab ke no nyob hauv tsab ntawv nws tau sau mus rau cov ntseeg uas hais lus Henplais hauv Yudias. b

3-4. Vim li cas Povlauj thiaj txhawj txog cov ntseeg uas hais lus Henplais hauv Yudias, thiab nws tau pab lawv li cas?

 ³ Ua li cas Povlauj thiaj sau nws tsab ntawv rau cov ntseeg uas hais lus Henplais hauv Yudias? Muaj ob yam uas Povlauj txhawj txog. Yam ib, yog mus txhawb lawv lub zog. Cov ntseeg uas hais lus Henplais feem coob yeej ib txwm coj cov Yudais txoj kev cai. Yog li ntawd, tej zaum lawv kuj raug cov Yudais tej thawj coj thuam thaum lawv los ua Yexus cov thwj tim. Vim li cas lawv ho raug thuam? Vim lawv tsis muaj ib lub tuam tsev pe hawm Vajtswv, tsis muaj ib lub thaj fij tsiaj rau Vajtswv, thiab tsis muaj ib co pov thawj los ua hauj lwm. Tej zaum tej no kuj txo tau Yexus cov thwj tim lub zog thiab ua tau rau lawv txoj kev ntseeg tsuag. (Henplais 2:1; 3:12, 14) Ntshe lawv ib txhia kuj xav rov mus coj cov Yudais txoj kev ntseeg.

⁴ Yam ob, Povlauj hais rau cov ntseeg uas hais lus Henplais tias lawv tsis rau siab kawm tej yam tshiab los sis tej yam tob tob uas yog “tej zaub mov tawv” hauv Vajtswv Txoj Lus. (Henplais 5:11-14) Ib txhia tseem coj raws li Mauxes Txoj Kev Cai. Povlauj piav tias tej khoom fij uas hais hauv Mauxes Txoj Kev Cai yeej ntxuav tsis tau tib neeg tej kev txhaum mus. Vim li no, thiaj tau muab Mauxes Txoj Kev Cai tso tseg lawm. Tom qab ntawd, Povlauj thiaj qhia tej yam tob tob hauv Vajtswv Txoj Lus rau lawv. Povlauj thiaj pab kom lawv nco ntsoov txog txoj kev “cia siab uas tseemceeb dua” vim muaj Yexus tus nqe txhiv uas pab tau lawv “los cuag tau Vajtswv.”​—Henplais 7:18, 19.

5. Phau Henplais pab peb to taub txog tej twg, thiab yog vim li cas?

⁵ Povlauj piav rau nws cov kwv tij uas hais lus Henplais tias txoj kev pe hawm Yehauvas lub sij hawm ntawd zoo tshaj txoj kev pe hawm yav thaud. Txoj kev pe hawm raws li Mauxes Txoj Kev Cai tsuas yog “tej uas yuav muaj los yav tom ntej no tus duab xwb, tus uas tseemceeb yog Yexus Khetos.” (Kaulauxais 2:17) Tus duab tsuas yog tus ntxoov ntxoo ntawm ib yam dab tsi xwb, tsis yog ib yam tiag tiag. Ib yam li ntawd, txoj kev uas cov Yudais pe hawm Yehauvas tsuas zoo li ib tug duab xwb rau qhov txoj kev pe hawm uas zoo tshaj plaws tseem yuav los. Zoo rau peb to taub txog txoj kev uas Yehauvas tau npaj tseg los zam peb tej kev txhaum kom peb thiaj pe hawm tau Yehauvas raws li nws lub siab nyiam. Cia peb muab “tus duab” uas yog cov Yudais txoj kev pe hawm piv rau “tus uas tseem ceeb” uas yog cov Khixatias txoj kev pe hawm raws li tau piav nyob rau hauv phau Henplais. Yog peb ua li no ces peb yuav haj yam to taub zoo txog lub tuam tsev ntawm sab kev  ntseeg thiab seb tej ntawd cuam tshuam peb li cas.

6. Lub tsev ntaub yog siv los ua dab tsi?

⁶ Rau cov Yudais txheej thaud. Povlauj siv lub tsev ntaub uas Mauxes ua xyoo 1512 ua ntej Yexus los qhia rau cov ntseeg. (Saib lub ntsiab “Rau Cov Yudais Txheej Thaud​—Rau Cov Khixatias.”) Lub tsev ntaub yog ib lub tsev vov ntaub uas cov Ixayees ua kom tshais tau ib qho rau ib qho. Lawv sib lub tsev ntaub yuav luag tau li 500 xyoo ua ntej ua tau lub tuam tsev hauv Yeluxalees. (Khiav Dim 25:8, 9; Teev Npe 9:22) “Lub Tsevntaub uas yog . . . qhov chaw sib ntsib” yog qhov chaw uas cov Ixayees mus thov Vajtswv, mus muab khoom fij, thiab mus pe hawm Yehauvas. (Khiav Dim 29:43-46) Lub tsev ntaub kuj piv txog ib yam zoo tshaj uas cov Khixatias muaj los pe hawm Yehauvas thiab.

7. Lub tuam tsev ntawm sab kev ntseeg muaj nyob thaum twg los lawm?

⁷ Rau cov Khixatias. Lub tsev ntaub txheej thaud yog “tej uas muaj nyob saum ntuj . . . tus duab xwb,” thiab piv txog Yehauvas lub tuam tsev ntawm sab kev ntseeg. Povlauj hais tias lub tsev ntaub “piv txog tiam no ntag.” (Henplais 8:5; 9:9) Thaum Povlauj sau mus rau cov ntseeg uas hais lus Henplais, twb muaj lub tuam tsev ntawm sab kev ntseeg lawm. Lub tuam tsev ntawm sab kev ntseeg twb muaj rau xyoo 29 tom qab Yexus lawm. Xyoo ntawd Yexus ua kev cai raus dej, raug lub hwj huam dawb huv xaiv, thiab pib ua tus “pov thawj hlob loj” hauv lub tuam tsev ntawm sab kev ntseeg. c

8-9. Raws li Henplais 7:23-27, cov Ixayees cov pov thawj hlob ho txawv tus Pov Thawj Hlob loj uas yog Yexus Khetos li cas?

⁸ Rau cov Yudais txheej thaud. Tus pov thawj hlob sawv cov tib neeg cev mus cuag Vajtswv. Yehauvas yog tus tsa cov Ixayees tus thawj pov thawj hlob uas yog Aloos rau thaum muab lub tsev ntaub cob rau Yehauvas. Povlauj piav tias, “pheej muaj neeg sawv ua povthawj ib tiam dhau ib tiam, rau qhov cov uas tuag ua tsis tau haujlwm lawm.” d (Nyeem Henplais 7:23-27.) Vim cov pov thawj hlob yog noob txaug neeg txhaum, lawv yuav tau muab khoom fij daws lawv tej kev txhaum. Qhov no yog qhov txawv ntawm cov Ixayees cov pov thawj hlob thiab tus Pov Thawj Hlob loj, Yexus Khetos.

⁹ Rau cov Khixatias. Yexus Khetos uas yog peb tus Pov Thawj Hlob ua “txoj haujlwm hauv Chav uas Dawbhuv Kawg Nkaus uas nyob hauv lub tsevntaub tseemceeb uas yog [Yehauvas] ua tsis yog neeg ua.” (Henplais 8:1, 2) Povlauj piav li ntawd rau qhov “Yexus muaj sia nyob mus ibtxhis, thiab nws tes haujlwm ua povthawj tsis poob mus rau lwm tus ua.” Povlauj piav ntxiv tias Yexus “tsis muaj ib qho txhaum li” thiab nws tsis zoo li cov Ixayees cov pov thawj hlob uas “yuav niaj hnub muab tsiaj coj los tua theej nws lub txhoj.” Tam sim no peb yuav mus tham txog qhov txawv ntawm cov thaj thiab cov khoom fij ntawm txoj kev cov Yudais pe hawm Yehauvas thiab ntawm txoj kev cov Khixatias pe hawm Yehauvas.

10. Cov khoom fij uas muab fij rau saum lub thaj tooj liab piv txog dab tsi?

¹⁰ Rau cov Yudais txheej thaud. Nyob sab nraum lub tsev ntaub muaj ib lub thaj tooj liab uas muab khoom fij rau saud rau Yehauvas. (Khiav Dim 27:1, 2; 40:29) Txawm li ntawd los cov khoom fij ntawd yeej ntxuav tsis tau cov tib neeg tej kev txhaum mus li. (Henplais 10:1-4) Cov tsiaj uas niaj hnub muab fij rau ntawm lub  tsev ntaub piv txog tus nqe txhiv uas ntxuav tau tib neeg tej kev txhaum huv si mus.

11. Yexus muab nws tus kheej fij rau saum lub thaj twg? (Henplais 10:5-7, 10)

¹¹ Rau cov Khixatias. Yexus paub tias Yehauvas txib nws los rau hauv ntiaj teb los muab nws txoj sia ua nqe txhiv theej noob neej. (Mathais 20:28) Yog li ntawd, thaum ua kev cai raus dej, nws thiaj muab nws tus kheej pub rau Yehauvas ua raws li Yehauvas lub siab nyiam. (Yauhas 6:38; Kalatias 1:4) Yexus muab nws tus kheej fij rau saum lub thaj uas tsis yog neeg txhais tes ua tiam sis yog piv txog Yehauvas “lub siab nyiam.” Yehauvas lub siab nyiam yog kom nws Leej Tub muab nws txoj sia uas zoo tiav tiav los theej tib neeg. Yexus muab nws txoj sia los theej “tib zaug xwb theej tau mus ibtxhis li” kom ntxuav tau txhua tus uas ntseeg Khetos tej kev txhaum mus ib txhis. (Nyeem Henplais 10:5-7, 10.) Peb yuav mus tham txog tej yam hauv lub tsev ntaub seb piv txog dab tsi.

12. Leej twg thiaj mus tau rau hauv tej chav hauv lub tsev ntaub?

¹² Rau cov Yudais txheej thaud. Lub tsev ntaub thiab lub tuam tsev hauv Yeluxalees sab hauv zoo tib yam nkaus. Sab hauv muaj ob cha, “Chav Dawbhuv” thiab “Chav uas Dawbhuv Kawg Nkaus,” uas muaj ib daim ntaub kem. (Henplais 9:2-5; Khiav Dim 26:31-33) Hauv Chav Dawb Huv muaj ib tug ncej kub txawb teeb, ib lub thaj hlawv hmoov tshuaj tsw qab, thiab ib lub rooj rau cov mov ci. Tsuas yog cov uas “muab roj ywg tsa ua pov thawj” thiaj mus tau rau hauv Chav Dawb Huv mus leg lawv tes hauj lwm xwb. (Teev Npe 3:3, 7, 10) Chav  Dawb Huv Kawg Nkaus muaj lub phij xab rau ob daim txiag zeb uas qhia tias Yehauvas nrog nraim nws cov tib neeg. (Khiav Dim 25:21, 22) Tsuas yog tus pov thawj hlob xwb thiaj hla tau daim ntaub mus rau hauv Chav Dawb Huv Kawg Nkaus ib xyoos ib zaug rau hnub ua kev cai ntxuav. (Levis Kevcai 16:2, 17) Txhua txhua xyoo, nws nqa cov ntshav tsiaj mus rau hauv mus ua kev cai ntxuav rau nws thiab rau tag nrho Yehauvas haiv neeg tej kev txhaum. Tom qab no Yehauvas mam siv nws lub hwj huam dawb huv los qhia tias tej uas nyob rau hauv lub tsev ntaub yog piv txog dab tsi.​—Henplais 9:6-8. e

13. Qhov chaw dawv huv thiab qhov chaw dawb huv kawg nkaus hauv lub tsev ntaub piv txog dab tsi rau cov Khixatias?

¹³ Rau cov Khixatias. Yexus cov thwj tim ib txhia yog cov uas raug xaiv thiab muaj ib txoj kev sib raug zoo tshwj xeeb nrog Yehauvas. Cov no muaj 144,000 leej thiab yuav mus ua pov thawj nrog Yexus saum ntuj ceeb tsheej. (Tshwmsim 1:6; 14:1) Chav Dawb Huv hauv lub tsev ntaub piv txog qhov uas lawv raug saws los ua Vajtswv cov tub thaum lawv tseem nyob hauv ntiaj teb. (Loos 8:15-17) Chav Dawb Huv Kawg Nkaus hauv lub tsev ntaub piv txog lub ntuj ceeb tsheej uas yog Yehauvas qhov chaw nyob. “Daim ntaub” uas kem Chav Dawb Huv thiab Chav Dawb Huv Kawg Nkaus piv txog Yexus lub cev nqaij tawv. Thaum Yexus tseem muaj lub cev nqaij tawv, nws mus tsis tau saum ntuj li tus Pov Thawj Hlob loj rau hauv lub tuam tsev ntawm sab kev ntseeg. Tom qab Yexus muab nws lub cev nqaij tawv los txhiv noob neej, nws thiaj qhib tau txoj kev rau cov xaiv tseg mus saum ntuj. Cov xaiv tseg los yuav tau tuag, lawv thiaj mus tau saum ntuj. (Henplais 10:19, 20; 1 Kauleethaus 15:50) Tom qab Yexus ciaj sawv rov los, nws thiaj mus rau hauv Chav Dawb Huv Kawg Nkaus hauv lub tuam tsev ntawm sab kev ntseeg, uas tsis ntev tag nrho cov xaiv tseg yuav mus thiab.

14. Raws li Henplais 9:12, 24-26, vim li cas txoj kev pe hawm Yehauvas hauv lub tuam tsev ntawm sab kev ntseeg ho zoo dua txoj kev pe hawm raws li Mauxes Txoj Kev Cai?

¹⁴ Peb yuav mus tham txog txoj kev pe hawm Yehauvas uas muaj tus nqe theej txhoj, thiab Yexus Khetos ua tus pov thawj hlob seb vim li cas ho zoo tshaj. Cov Ixayees tus pov thawj hlob tsuas nqa tej ntshav tsiaj mus rau hauv Chav Dawb Huv Kawg Nkaus uas neeg txhais tes ua xwb. Tiam sis Yexus mus rau “saum ntuj ceebtsheej” uas yog qhov chaw dawb huv tshaj plaws mus nyob ntawm Vajtswv xub ntiag. Thaum nws mus txog ntawd, nws muab nws lub cev uas zoo kawg nkaus thaum nyob hauv ntiaj teb coj mus xyeem rau Yehauvas kom “nws lub cev theej tau sawvdaws lub txhoj huv tibsi.” (Nyeem Henplais 9:12, 24-26.) Yexus tus nqe txhiv yog qhov khoom fij uas ntxuav tau kev txhaum mus ib txhis. Peb yuav mus kawm tias txawm peb muaj txoj kev cia siab mus nyob saum ntuj los sis nyob hauv ntiaj teb no los, peb sawv daws yeej pe hawm tau Yehauvas hauv nws lub tuam tsev ntawm sab kev ntseeg.

15. Leej twg ua hauj lwm hauv chav tshav puam ntawm lub tsev ntaub?

¹⁵ Rau cov Yudais txheej thaud. Lub tsev ntaub muaj ib lub tshav puam uas xov ib ncig uas cov pov thawj leg lawv tes hauj lwm nyob rau hauv. Ntawm lub tshav puam muaj ib lub thaj tooj liab loj loj uas hlawv tej khoom fij. Nyob ntawd kuj muaj ib lub phiab tooj liab rau dej uas cov pov thawj siv los ntxuav lawv tus kheej ua ntej lawv ua lawv tes hauj lwm. (Khiav Dim 30:17-20; 40:6-8) Thaum ua lub tuam tsev tom qab no, kuj ua ib lub tshav puam rau sab nraud uas  cov tsis yog pov thawj tau tuaj sawv thiab pe hawm Vajtswv.

16. Leej twg ua hauj lwm nyob rau hauv cov tshav puam ntawm lub tuam tsev ntawm sab kev ntseeg?

¹⁶ Rau cov Khixatias. Ua ntej cov xaiv tseg mus ua pov thawj nrog Yexus saum ntuj, lawv yeej muaj kev ntseeg ruaj nreeg teev tiam Yehauvas nyob ntawm lub tshav puam sab hauv ntawm lub tuam tsev ntawm sab kev ntseeg. Lub phiab ntim dej loj loj ntawm lub tsev ntaub thiab ntawm lub tuam tsev pab kom cov xaiv tseg nco ntsoov tias lawv lub neej thiab lawv txoj kev ntseeg yuav tsum dawb huv. Ua li pab “neeg coob coob” uas kub siab lug txhawb nqa cov xaiv tseg ho teev tiam Yehauvas qhov twg? Tus tub txib Yauhas pom lawv “sawv tabmeeg ntawm Vajtswv lub zwmtxwv,” uas hauv ntiaj teb ces yog lub tshav puam sab nraud uas lawv “pehawm Vajtswv tas hnub tas hmo hauv lub Tuamtsev.” (Tshwmsim 7:9, 13-15) Cia peb ris Yehauvas txiaj ntsig rau qhov uas nws cia pe los mus pe hawm nws nyob rau hauv nws lub tuam tsev ntawm sab kev ntseeg!

17. Peb muaj txoj koob hmoov los muab tej twg pub rau Yehauvas?

¹⁷ Niaj hnub nim no txhua tus Khixatias muaj txoj koob hmoov los pub tau lawv lub sij hawm, lub dag lub zog, thiab tej qhov txhia chaw los txhawb nqa Vajtswv lub Nceeg Vaj. Cia peb ua li Povlauj tau hais rau cov ntseeg uas hais lus Henplais tias: “Peb yuav tsum niaj hnub ua Vajtswv tsaug. Peb ua li ntawd ib yam li peb muab tej uas haum Vajtswv siab fij rau Vajtswv saum lub thaj. Kuv hais li no yog kuv hais tias peb lub qhovncauj yuav tsum niaj hnub ua Vajtswv tsaug.” (Henplais 13:15) Yog peb ua npaum li peb ua tau rau Yehauvas ces qhia tias peb saib txoj koob hmoov uas peb muaj los pe hawm nws rau nqi.

18. Raws li Henplais 10:22-25, peb yuav tsum nco ntsoov ua tej twg thiab nco ntsoov tej twg?

¹⁸ Nyeem Henplais 10:22-25. Thaum Povlauj yuav xaus tsab ntawv uas nws sau rau cov ntseeg uas hais lus Henplais, Povlauj sau txog tej uas peb yuav tau ua thaum peb pe hawm Yehauvas. Tej ntawd yog thov Vajtswv, mus qhia txoj xov zoo, mus kev sib txoos, thiab ib leeg txhawb ib leeg vim hnub kawg twb los ze lawm. Nyob rau hauv phau Tshwmsim tom yuav kawg, Yehauvas tus tub txib saum ntuj tau hais ob zaug tias: “Pehawm Vajtswv xwb!” (Tshwmsim 19:10; 22:9) Qhov uas tus tub txib saum ntuj hais ob zaug qhia tias txoj kev pe hawm Yehauvas tseem ceeb heev. Cia peb nco ntsoov tej tob tob peb tau kawm txog Yehauvas lub tuam tsev ntawm sab kev ntseeg thiab saib txoj koob hmoov uas peb muaj los pe hawm Yehauvas rau nqi!