1. Aneru be dahaka ia hereva noho bona unai hereva ena anina be dahaka?

 BEMA aneru ta be oi ia hereva henia, iena hereva do oi kamonai, a? Hari aneru ta be “bese ibounai bona iduhu ibounai, gado ibounai, bona kopi idauidau taudia ibounai dekenai” ia hereva noho. Ia gwau: ‘Dirava umui gari henia bona ia umui hanamoa, guba bona tanobada ia karaia Diravana do umui tomadiho henia.’ (Apok. 14:​6, 7) Iehova be Dirava momokanina tamona, bona taunimanima ibounai ese idia tomadiho henia be namo. Ita moale bada badina dala ia kehoa iena lauma dubuna badana dekenai ita tomadiho henia totona!

2. Iehova ena lauma dubuna be dahaka? (“ Ena Anina be Idau” maua itaia.)

² To, lauma dubuna be dahaka, bona edeseniai ena hereva haida ita davaria diba? Lauma dubuna be dubu korikorina ta lasi. Unai lauma dubuna be Iehova ese ia abia dae tomadiho dalana bona Iesu Keriso ena mauri davalaia boubouna amo unai ia hegaegaelaia. Aposetolo Paulo ese Iudea ai idia noho Heberu Keristani Taudia ginigunadia dekenai ia torea revareva ai unai tomadiho dalana ia herevalaia. b

3-4. Dahaka dainai Paulo be Iudea ai idia noho Heberu Keristani taudia ia laloa bada, bona edena dala ai ia durudia?

³ Dahaka dainai Paulo ese Iudea ai idia noho Heberu Keristani Taudia dekenai revareva ia torea? Reana, badina rua dainai. Ginigunana be, idia ia hagoadaia totona. Idia momo be Keristani taudia ai idia do lao lasi neganai, Iuda tomadihona idia badinaia. To, tomadiho momokanina idia badinaia neganai, reana edia dubu gunalaia taudia ese idia hevaseha henidia. Dahaka dainai? Badina Keristani taudia be dubu lasi idia tomadiho  totona, boubou patana be lasi boubou gaudia idia karaia totona, bona hahelaga taudia be lasi idia hesiai henidia totona. Unai dainai, Iesu ena hahediba taudia idia lalohisihisi bona edia abidadama ia manoka diba. (Heb. 2:1; 3:​12, 14) Reana idia haida idia laloa Iuda tomadihona dekenai idia giroa lou be namo.

⁴ Gau iharuana be, Paulo ese Heberu Keristani taudia ia sisiba henidia, badina idia hekwarahi lasi “aniani korikorina,” eiava hahediba hereva matamatadia o dobudia, idia lalopararalaia totona. (Heb. 5:​11-14) Idia haida be Mose ena Taravatu idia do badinaia auka noho. Paulo ia hahedinaraia Taravatu henunai idia karaia boubou gaudia ese kara dika ia kokia momokani lasi. Unai dainai, Dirava ese unai taravatu ia “kokia.” Vadaeni, Paulo ese idia dekenai hahediba hereva dobudia ia hadibaia. Bona “Dirava kahirakahira [idia] lao” totona, Iesu ena boubou gauna amo idia abia “helaro namona” ia herevalaia.—Heb. 7:​18, 19.

5. Heberu bukana ai dahaka ita lalopararalaia be namo, bona dahaka dainai?

⁵ Paulo ese Heberu Keristani taudia dekenai ia hahedinaraia Keristani dalana ai Iehova idia tomadiho henia karana ese guna idia karaia tomadiho dalana ia hereaia. Iuda taudia ese Taravatu hegeregerena ai Dirava idia tomadiho henia karana be “gabeai do idia mai gaudia idia laulaulaia, to anina korikorina be Keriso ena.” (Kol. 2:17) Tau ta ena laulau be ena toana sibona. Unai hegeregerena, guna Iuda taudia ese idia badinaia tomadiho karana be lauma dubuna ia laulaulaia. Unai lauma dubuna be Iehova ese iseda kara dika gwauatao totona ia hegaegaelaia, unai amo iena ura dalana ai ia ita tomadiho henia diba. Unai dainai, lauma dubuna ena gaukara dalana ita lalopararalaia be mai anina bada. Mani Heberu bukana ese ia herevalaia ‘laulau’ (guna Iuda taudia ese Iehova idia tomadiho henia dalana) be “anina korikorina” (Keristani tomadiho dalana) ida ita hahegeregerea. Unai amo ita ese lauma dubuna bona ena gaukara dalana do ita lalopararalaia namonamo.

6. Palai dubuna be edena bamona idia gaukaralaia?

⁶ Laulau. Paulo ese Heberu Keristani taudia dekenai lagani 1512 B.C.E. ai, Mose ese ia haginia palai dubuna ia herevalaia. (“Laulau—Anina Korikorina” maua itaia.) Matamanai, unai palai dubuna be Israela taudia ese gabu ta ta dekenai idia huaia loaloa. Lagani 500 lalonai  idia gaukaralaia ela bona Ierusalema ai dubu momokani ta idia haginia. (Eso. 25:​8, 9; Num. 9:22) Unai “hebou dubu” ai Israela taudia ese Dirava idia guriguri henia, edia boubou gaudia idia henia bona idia tomadiho henia. (Eso. 29:​43-46) To, palai dubuna ese Keristani taudia totona do ia vara mai anina bada gauna ta ia laulaulaia.

7. Lauma dubuna be edena nega ai ia gaukara matamaia?

⁷ Anina Korikorina. Unai palai dubu gunana be “guba gaudia edia toana” bona Iehova ena lauma dubuna ia laulaulaia. Paulo ia gwau “unai palai ruma [o palai dubuna] be hari idia vara gaudia ia laulaulaia.” (Heb. 8:5; 9:9) Unai dainai Heberu Keristani taudia ia tore henidia neganai, Keristani taudia totona lauma dubuna badana be ia noho vadaeni. Unai be lagani 29 C.E. ai ia gaukara matamaia. Unai lagani ai, Iesu ia bapatiso, lauma helaga ese ia horoa, bona Iehova ena lauma dubuna ai “hahelaga tauna badana” bamona hesiai gaukara ia hamatamaia. c—Heb. 4:14; Kara 10:​37, 38.

8-9. Heberu 7:​23-27 hegeregerena, Israela besena ena hahelaga tauna badana bona Hahelaga Tauna badana hereadaena, Iesu Keriso, edia idau be dahaka?

⁸ Laulau. Hahelaga tauna badana be taunimanima totona Dirava ena vairanai ia hereva. Israela taudia edia hahelaga tauna badana ginigunana, Arona, be dubu helaga idia hahelagaia neganai, Iehova ese ia abia hidi. To, Paulo ese ia herevalaia bamona, “momo be hahelaga taudia, to idia mase dainai edia gaukara ia doko, bona ma haida ese edia gabu idia abia.” d (Heberu 7:​23-27 duahia.) Bona unai hahelaga taudia be goevadae lasi dainai, idia sibona edia kara dika totona boubou gaudia idia henia. Unai dainai Hahelaga Tauna Badana hereadaena, Iesu Keriso, be Israela taudia edia hahelaga taudia amo ia idau momokani.

⁹ Anina Korikorina. Iseda Hahelaga Tauna Badana, Iesu Keriso be “palai ruma momokanina ena hesiai tauna. Unai palai ruma be Iehova ese ia haginia, to taunimanima ese idia haginia lasi.” (Heb. 8:​1, 2) Paulo ia gwau, “Iesu be ia noho hanaihanai dainai, ta ese iena gabu do ia abia lasi hahelaga gaukara karaia totona.” Paulo ma ia gwau, Iesu “ena kara be goeva, ia be kara dika taudia amo ia idau” bona ia be unai hahelaga taudia bamona lasi, “dina ta ta ai” sibona ena kara dika totona “boubou gauna ia henia be anina lasi.” Mani, guna idia gaukaralaia boubou patadia bona idia bouboulaia gaudia edia anina korikorina ita herevalaia.

10. Kopa boubou pata ai idia karaia animal bouboudia be dahaka idia laulaulaia?

¹⁰ Laulau. Palai dubuna ena vareai gabuna kahirakahira ai kopa boubou patana ta ia gini, bona ia latanai Iehova dekenai animal idia bouboulaia. (Eso. 27:​1, 2; 40:29) To idia karaia boubou gaudia ese taunimanima edia kara dika ia kokia momokani lasi. (Heb. 10:​1-4) Palai dubuna ai, hanaihanai idia karaia animal bouboudia be boubou gauna tamona ia laulaulaia. Unai boubou gauna tamona ese taunimanima edia kara dika do ia kokia vaitani.

11. Laulau dalanai Iesu be edena boubou patana ai sibona ia bouboulaia? (Heberu 10:​5-7, 10)

¹¹ Anina Korikorina. Iesu ia diba Iehova ese tanobada ai ia siaia mai ena badina be taunimanima hoia lou totona ena mauri do ia bouboulaia. (Mat. 20:28) Unai dainai, Iesu ia bapatiso dinana ai, ia be Iehova ena ura karaia totona  sibona ia henia. (Ioa. 6:38; Gal. 1:4) Iesu ese ena mauri be taunimanima edia imana amo idia karaia boubou patana ai ia bouboulaia lasi. To, ena mauri ia bouboulaia boubou patana be Dirava ena “ura” ia laulaulaia. Iehova ena ura be ena Natuna be taunimanima ta bamona ena mauri goevadaena do ia bouboulaia. Iesu be “nega tamona sibona” ena mauri ia bouboulaia, unai amo Keriso idia abidadama henia taudia edia kara dika davana ia karaia eiava ia kokia vaitani. (Heberu 10:​5-7, 10 duahia.) Hari, palai dubuna ena lalona gaudia do ita herevalaia.

12. Palai dubuna ena daiutu rua ai daika idia vareai diba?

¹² Laulau. Gabeai Ierusalema ai idia haginidia dubu helaga edia lalona be palai dubuna ena lalona hegeregerena. Lalona ai be daiutu rua, “Helaga Gabuna” bona “Helaga Herea Gabuna” bona idia huanai be keten ta ia noho. (Heb. 9:​2-5; Eso. 26:​31-33) Helaga Gabuna ai golo lamepa atoa gauna, bonana namo muramura gabua patana, bona paraoa helagana ena teibolo idia noho. “Hahelaga gaukara karaia totona idia abia hidi” taudia sibona be Helaga Gabuna dekenai idia vareai edia hahelaga gaukara idia karaia totona. (Num. 3:​3, 7, 10) Helaga Herea Gabuna ai golo taravatu mauana ia noho, bona unai ese ia hahedinaraia Iehova be idia ida ia noho. (Eso. 25:​21, 22) Lagani ta ta ai, Kara Dika Davana Karaia Dinana ai, hahelaga tauna badana sibona be unai keten murinai ia lao bona Helaga Herea Gabuna dekenai ia vareai. (Lev. 16:​2, 17) Lagani ta ta ai, ia ese animal edia rara ia abia vareai, iena dika bona bese iboudiai edia dika gwauatao  totona. Gabeai, Iehova ese lauma helaga amo palai dubuna ai idia karaia tomadiho karadia edia anina korikorina ia hahedinaraia.—Heb. 9:​6-8. e

13. Palai dubu ena Helaga Gabuna bona Helaga Herea Gabuna be Keristani tomadiho dalana ai dahaka idia laulaulaia?

¹³ Anina Korikorina. Keriso ena hahediba taudia haida be lauma helaga ese ia horodia bona Iehova ena turana namodia ai idia lao. Unai 144,000 taudia be guba ai Iesu ida hahelaga gaukara do idia karaia. (Apok. 1:6; 14:1) Tanobada ai idia do noho lalonai Dirava ese idia ia horoa bona ena natudia ai ia halaodia. Palai dubuna ena Helaga Gabuna ese edia hetura karana namona Dirava ida ia laulaulaia. (Roma 8:​15-17) Palai dubuna ena Helaga Herea Gabuna be Iehova ia noho gabuna, guba ia laulaulaia. Helaga Gabuna bona Helaga Herea Gabuna ia hapararaia “keten” be Iesu ena tanobada tauanina ia laulaulaia. Ia be tanobada tauanina ai ia do noho dainai, Hahelaga Tauna Badana hereadaena bamona lauma dubuna lalonai ia vareai diba lasi. Taunimanima totona iena tauanina ia bouboulaia neganai, Iesu ese horoa Keristani taudia iboudiai edia dala ia kehoa guba maurina idia abia totona. Idia danu be guba ai edia ahuna idia abia totona, edia tanobada tauanina do idia rakatania. (Heb. 10:​19, 20; 1 Kor. 15:50) Iesu ia toreisi lou murinai, ia be lauma dubuna ena Helaga Herea Gabuna dekenai ia vareai. Gabeai, horoa taudia ibounai be unuseniai Iesu do idia hedavari henia.

14. Heberu 9:​12, 24-26 hegeregerena, dahaka dainai Iehova ena lauma dubuna ai ita tomadiho karana be hereadae?

¹⁴ Hari ita laloparara Iehova be Iesu Keriso ena mauri davalaia boubouna bona hahelaga gaukarana amo ia hegaegaelaia tomadiho dalana be hereadae. Israela ai hahelaga tauna badana ese taunimanima edia imana amo idia karaia Helaga Herea Gabuna dekenai animal edia rara ia abia vareai. To, Iesu be Iehova vairanai ia hedinarai totona, helaga herea momokani gabuna, “guba lalonai ia vareai.” Unuseniai, Dirava dekenai ena tauanina goevadaena “ia bouboulaia karana amo [iseda] kara dika ia kokia” gauna ena davana ia karaia. (Heberu 9:​12, 24-26 duahia.) Oibe, Iesu ena boubou gauna sibona ese kara dika ia kokia vaitani. Hari, herevana iseda helaro be guba ai o tanobada ai, ita ibounai ese Iehova ena lauma dubuna ai ita tomadiho henia dalana do ita herevalaia.

15. Daidia be palai dubuna ena ariara dekenai hesiai gaukara idia karaia?

¹⁵ Laulau. Palai dubuna ena ariara gabuna be tamona, ia be magu ese ia hagegea gabu badana. Unuseniai hahelaga taudia ese edia gaukara idia karaia. Unai ariara ai kopa boubou patana ia noho bona boubou gaudia be unuseniai idia gabua. Ma danu kopa disi mai ena ranu ia noho, unuseniai hahelaga taudia be sibona idia hagoevaia bena edia gaukara idia karaia. (Eso. 30:​17-20; 40:​6-8) To, gabeai idia haginia dubu helagadia be mai edia ariara gabudia rua. Ariara ginigunana ai taunimanima ma haida ese Dirava idia tomadiho henia diba. Bona ariara gabuna iharuana be hahelaga taudia edia gaukara idia karaia gabuna.

16. Daidia be lauma dubuna ena ariara rua ai hesiai gaukara idia karaia?

¹⁶ Anina Korikorina. Horoa orena taudia be Iesu ida guba ai hahelaga gaukara idia do karaia lasi neganai, tanobada ai lauma dubuna ena lalona ariara gabuna dekenai hesiai gaukara idia karaia. Ranu disi badana ese idia  bona Keristani taudia ibounai dekenai mai anina bada gauna ia hadibaia: Namona be kara mirodia idia dadaraia bona Iehova sibona idia tomadiho henia. Vadaeni, Keriso ena horoa tadikaka idia durua “hutuma bada” taudia be edeseniai Dirava idia tomadiho henia? Aposetolo Ioane ia itaia “idia be terona vairanai idia gini, bona . . . dina bona hanuaboi [Dirava ena] hesiai gaukara helagana idia karaia.” Hutuma bada be tanobada ai lauma dubuna ena murimuri ariara gabuna dekenai edia gaukara idia karaia noho. (Apok. 7:​9, 13-15) Ita moale badina Iehova ena tomadiho goevana lalonai ia ita hesiai henia diba!

17. Ita ese Iehova dekenai dahaka boubou gaudia ita henia diba?

¹⁷ Hari Keristani taudia ibounai be mai moale ida, edia nega, goada bona kohu be boubou gaudia bamona Iehova dekenai idia henia iena Basileia gaukarana idia durua totona. Aposetolo Paulo ese Heberu Keristani taudia ia hamaoroa hegeregerena, “namona be hanaihanai Iesu amo Dirava ita hanamoa. Unai be boubou gauna bamona Dirava dekenai ita henia. Ita ese iseda uduna ita gaukaralaia, ma haida dekenai iena ladana ita gwauraia totona.” (Heb. 13:15) Oibe, Iehova dekenai iseda boubou gaudia namodia ita henia neganai, ita hahedinaraia ita tomadiho henia be hahenamo badana.

18. Heberu 10:​22-25 hegeregerena, dahaka gaudia do ita karaia hanaihanai bona dahaka do ita laloa boio lasi?

¹⁸ Heberu 10:​22-25 duahia. Paulo ese Heberu Keristani taudia dekenai ia torea revareva dokonai, ia ese iseda tomadiho lalonai do ita karaia hanaihanai gaudia ia herevalaia. Unai gaudia be, Iehova do ita guriguri henia, iseda helaro do ita harorolaia, hebou do ita lao, bona ta ta do ita hagoadaia heheni “bona unai kara do ita habadaia noho, badina [ita] itaia [Iehova ena] dina be ia kahirakahira noho.” Apokalupo bukana ena dokonai, Iehova ena aneru ese nega rua inai hereva ia gwauraia: “Dirava oi tomadiho henia!” (Apok. 19:10; 22:9) Namona be hari ita dibaia Iehova ena lauma dubuna badana bona ia lalonai Dirava ita tomadiho henia karana ena hahenamo ita laloaboio lasi!