1. Omambo womuengeli maye tja vi, nu maye hee tjike kweṱe?

 HAPO indu omuengeli tji ma hungire ku na ove otjo puratena? Ndino omuengeli u hungira “komihoko avihe na komaraka aehe na koviwaṋa avihe.” Omuengeli ma tja vi? “Tireye Ndjambi nu mu Mu pe ondjozikiro . . . Rikotameneye ku Ye ngwa utire eyuru nehi.” (Omavan. 14:​6, 7) Jehova eye ongu ri erike Mukuru watjiri, ovandu avehe ku va sokurikotamena. Eṱe tu nondangi kutja we tu yandjera kutja tu rikotamene ku ye mondyero yomerikotameneno wouatjiri kombanda yehi.

2. Ondyero ya Jehova yomerikotameneno wouatjiri kombanda yehi otjikeṋa? (Wina tara kokawongo nga “ Ondyero ndjo kai nokuheya kutja.”)

² Ondyero yomerikotameneno wouatjiri kombanda yehi otjikeṋa, nu omakahururiro wondyero ndjo matu ye vaza pi? Ondyero yomerikotameneno wouatjiri kombanda yehi karuveze kaaṋi. Nungwari oyo ondyero ya Jehova yomekorikotameneno ku ye momuano mbwe yakura nu mbwa zikamena kotjisuta tjonguturiro tja Jesus. Omuapostele Paulus wa kahurura ondyero ndjo morutuu ndwa tjanga kOvaheberi mba ri Ovakriste veserewondo etenga mba turire moJudea. b

3-4. Omerikendero yeṋe Paulus nga ri na wo ohunga nOvaheberi mba ri Ovakriste moJudea nu eye we ve vatera vi?

³ Omena raye Paulus tja tjanga orutuu kOvaheberi mba ri Ovakriste moJudea? Mape ya ya ri mena romapu yevari. Epu etenga, ya ri okuvetunduuza. Ngunda ave hi ya rira Ovakriste, ovengi vawo ve kurisirwe mongamburiro yOvajuda. Ovanane vongamburiro mu va ri mape ya aave ve nyekerere mena rokutja owo va rira Ovakriste. Omena raye? Mena rokutja Ovakriste kava ri nondjuwo ondjapuke ya Muhona okukerikotamena ku ye, kava ri notjipunguhiro  okutjita ozombunguhiro ku Mukuru, nu kava ri novapristeri mbaave ve hongo. Ihi mape ya tja tjita kutja Ovahongewa va Kristus ve we momuinyo nu ongamburiro yawo i ngundipare. (Hebr. 2:1; 3:​12, 14) Nu mape ya tjiva aave ripura okuyaruka kongamburiro yOvajuda.

⁴ Epu oritjavari, Paulus wa raera Ovaheberi mba ri Ovakriste kutja kaave tjiti ozongondjero okuzuva omahongero omape poo omakoto nge ri “ovikurya oviṱaṱunwa” mbi ri mEmbo ra Mukuru. (Hebr. 5:​11-14) Oukahu kutja tjiva vawo ngunda aave kongorere Omatwako wa Moses. Paulus we ve raera kutja ozombunguhiro zOmatwako nḓo kaaze yenene okukohorora ovandu komauvi wawo oparukaze. Ku nao, Omatwako ngo ya “isiwa po.” Mena ranao, Paulus wa kayenda komurungu okuvehonga omahongero omakoto. Eye wa zemburukisa ovakambure ovakwao ohunga ‘nomaundjiro omasemba’ nga zikamena kombunguhiro ya Jesus ndjaai yenene okuvevatera okutumbuka popezu “ku Ndjambi.”—Hebr. 7:​18, 19.

5. Ovikeṋa mbi matu hepa okuzuva nawa okuza kembo rOvaheberi nu omena raye?

⁵ Paulus wa kahurura kOvaheberi mba ri ovakambure kutja ongwaye omerikotameneno wawo wOukriste tji ya ri omasemba pu inga worukapitaveze. Omuano Ovajuda maave rikotamene ku Jehova otja kOmatwako ya ri “otjizire uriri tjaimbi vyoruveze ndu maru ya; nu imbwi ouatjiri auhe ounanḓengu owo oKristus.” (Kol. 2:17) Otjizire otjiraisiro tjotjiṋa nungwari katjiṋa otjini. Momuano tjingewo, omuano Ovajuda maave rikotamene ku Mukuru morukapitaveze ya ri otjizire tjomerikotameneno omasemba ku Mukuru ngaaye sokuya. Matu hepa okuzuva nawa ondyero Jehova ndja twa po kweṱe kutja omauvi wetu ye isirwe, kokutja tu yenene okurikotamena ku ye momuano eye mbwe vanga. Ngatu sasaneke “otjizire” (mbu ri omuano Ovajuda maave rikotamene) ku na “ouatjiri auhe ounanḓengu” (mbu ri omuano Ovakriste mu ve rikotamenena), otja tji pa kahururwa mOvaheberi. Tji matu tjiti nao, matu yenene okuzuva nawa ondyero yomerikotameneno wouatjiri kombanda yehi nomuano mu i ṱuna kweṱe.

6. Omomuano uṋe Ondanda yomaturiro maai ungurisiwa?

⁶ Omuano Ovajuda maave rikotamene. Paulus wa zikamisire otjihungiriro tje kondanda yomaturiro ndja sembamisirwe i Moses mombura ndji 1512 K.O.Z. (Tara kokawongo nga “Omuano Ovajuda maave rikotamene—Omuano Ovakriste mu ve rikotamena.”) Ondanda yomaturiro ya ri tjimuna otenda Ovaisrael ndjaave ryanga na yo  tji mave tjindi okuza koruveze rumwe okuyenda ku rwarwe. Owo ve i ungurisa ape ozombura 500 nga indu ondjuwo ondjapuke ya Muhona tji ya tungwa moJerusalem. (Eks. 25:​8, 9; Num. 9:22) “Ondanda yOmahakaeneno” ndji, ya ri oruveze Ovaisrael paave hakaenene okurikotamena ku Mukuru nokutjita ozombunguhiro zawo. (Eks. 29:​43-46) Posi ya, ondanda yomaturiro wina aai kuramene po otjiṋa otjisembasemba tjaatji sokuya kOvakriste.

7. Ondyero ya Jehova yomerikotameneno wouatjiri kombanda yehi ya zikama ruṋe?

⁷ Omuano Ovakriste mu ve rikotamena. Ondanda onguru yomaturiro ya ri ‘otjizire uriri tjaimbi vyomeyuru,’ nu aai kuramene po ondyero ya Jehova yomerikotameneno wouatjiri kombanda yehi. Paulus wa tja ondanda yomaturiro aai “raisa oruveze ndwi rwanambano.” (Hebr. 8:5; 9:9) Ku nao moruveze eye ndwa tjanga kOvaheberi, ondyero yomerikotameneno wouatjiri kombanda yehi ya ri aya zikamisiwa rukuru. Oyo ya zikamisiwa mombura ndji 29 O.Z. Mombura ndjo, Jesus otja papitisiwa na twirisiwa nombepo ondjapuke, na utu okukarera ‘otjomupristeri otjiuru omunene’ mondyero ya Jehova yomerikotameneno wouatjiri kombanda yehi. c—Hebr. 4:14; Oviung. 10:​37, 38.

8-9. Otja kOvaheberi 7:​23-27, ombangu iṋe ndji ri pokati komupristeri omunene wOvaisrael nOmupristeri Omunene otjiuru, Jesus Kristus?

⁸ Omuano Ovajuda maave rikotamene. Omupristeri omunene aa kuramene po otjiwaṋa komurungu wa Mukuru. Omupristeri omutenga omunene ya ri Aron, ngwa twirisiwa i Jehova indu ondanda yomaturiro tji ya yapurwa. Nungwari, Paulus wa tja “novapristeri mbena ovakwao va ri ovengi, tjinga ava sere okukoka nu tjinga iyave ha yenene okukayendisa otjiungura tjawo tjoupristeri komurungu.” d (Lesa Ovaheberi 7:​23-27.) Nu mena rokutja ovapristeri ovanene mbo kava ri ohomonena, owo aave sokuritjitira ozombunguhiro mena romauvi wawo oveni. Pe nombangu onene pokati komupristeri omunene wOvaisrael nOmupristeri otjiuru Omunene, Jesus Kristus.

⁹ Omuano Ovakriste mu ve rikotamena. Jesus Kristus otjOmupristeri wetu Omunene “u karera . . . mOndanda yatjiri yomaturiro, ndja tungwa i Ndjambi, nu ndji ha tungirwe i omundu.” (Hebr. 8:​1, 2) Paulus wa kahurura kutja “Jesus u nomuinyo nga aruhe nu motjiungura tje, otjomupristeri kamu pingene omundu.” Paulus wina wa tja Jesus “omuyapuke, nomuhinouvi nomukohoke, eye wa yapurwa kovarunde” nu eye ke ri tjimuna omupristeri omunene wOvaisrael, “nu kahepero kutja eye eyuva arihe rutenga a punguhire ouvi we omuini ozombunguhiro.” Nambano tara kombangu ndji ri pokati kovipunguhiro nozombunguhiro nḓaaze tjitwa momerikotameneno wOvajuda na inḓa nḓe tjitwa momuano womerikotameneno wOvakriste.

10. Ozombunguhiro nḓaaze tjitirwa potjipunguhiro tji tja ungurwa pongoporo aaze hee tjike?

¹⁰ Omuano Ovajuda maave rikotamene. Pomahitiro wondanda yomaturiro pa ri otjipunguhiro tjongoporo paa pe punguhirwa ozombunguhiro zovinamuinyo ku Jehova. (Eks. 27:​1, 2; 40:29) Nungwari ozombunguhiro nḓo kaaze tjiti kutja omauvi wotjiwaṋa ye isirwe oparukaze. (Hebr. 10:​1-4) Ozombunguhiro zovinamuinyo nḓaaze tjitwa aruhe pondanda yomaturiro aaze kuramene po ombunguhiro imwe ndji mai katjita kutja ovandu ve isirwe omauvi nga aruhe.

11. Okotjipunguhiro tjiṋe Jesus ke ri yandja omuini otjombunguhiro? (Ovaheberi 10:​5-7, 10)

¹¹ Omuano Ovakriste mu ve rikotamena. Jesus  aa tjiwa kutja Jehova we mu hinda kombanda yehi okuyekupunguhira ovandu omuinyo we otjotjisuta tjonguturiro. (Mat. 20:28) Mena ranao pombapitisimo ye, Jesus wa raisa kutja ma tjiti ombango ya Jehova. (Joh. 6:38; Gal. 1:4) Otjipunguhiro Jesus pa punguhwa aatji kuramene po “ombango” ya Mukuru. Ombango ya Mukuru ya ri oyokutja Omuna we ma punguhe omuinyo we ohomonena otjomundu. Jesus wa punguha omuinyo we otjombunguhiro okuisa po omauvi “nambano na aruhe” wa ngamwa auhe ngu raisa ongamburiro mu Kristus. (Lesa Ovaheberi 10:​5-7, 10.) Nambano, matu kahungirira komaheero woviṋa mbya ri mondanda yomaturiro.

12. Ouṋe ngwaa yenene okuhita metuwo arihe rondanda yomaturiro?

¹² Omuano Ovajuda maave rikotamene. Ondanda yomaturiro nozondjuwo ozondjapuke za Muhona nḓa katungwa kombunda koJerusalem za ri tjimwe moukoto. Mwa ri omatuwo yevari “Otjouyapuke” na indi “Otjouyapukeyapuke” nga haṋenwe i yonguyu ondjizikize. (Hebr. 9:​2-5; Eks. 26:​31-33) Motjouyapuke mwa ri otjikurameno tjomamunine tji tja ungurwa pongoldo, otjipunguhiro kwaaku twimisirwa ovyomoro omuwa, notjitiha ku ngwa ri ozomboroto nḓaaze punguhirwa Ndjambi. Imba mba “twirisiwa na ve zikwa kutja ve rire ovapristeri” ombaave yandjerwa okuungura oviungura vyoupristeri mOtjouyapuke. (Num. 3:​3, 7, 10) Motjouyapukeyapuke mwa ri otjipwikiro tjomerikutiropamwe tjongoldo tjaatji raisa kutja Jehova u ri mokati kawo. (Eks. 25:​21, 22) Omupristeri omunene ongwaa yandjerwa okuhita monguyu ondjizikize mOtjouyapukeyapuke rumwe mombura mEyuva enene rOhanganisiro. (Lev. 16:​2, 17)  Mombura aihe, eye aa hiti nombinḓu yovinamuinyo okukatjita ombunguhiro yohanganisiro kouvi we omuini na imbwi wotjiwaṋa atjihe. Korusenina, okupitira mombepo ye ondjapuke, Jehova wa tjita kutja i rire oukahu okutjiwa omaheero woviṋa mbi ri mondanda yomaturiro.—Hebr. 9:​6-8. e

13. Otjouyapuke nOtjouyapukeyapuke vyOndanda yomaturiro vi kuramena po ye momerikotameneno wOukriste?

¹³ Omuano Ovakriste mu ve rikotamena. Otjivarero otjiṱiṱi tjovahongewa va Kristus va twirisiwa nombepo ondjapuke, nu owo ve yorokera oupanga wapeke ku na Jehova. Ovandu mba 144 000, mave kakarera otjovapristeri meyuru pu na Jesus. (Omavan. 1:6; 14:1) Otjouyapuke tjondanda yomaturiro tji kuramena po kutja owo va toororwa otjovanatje va Mukuru ngunda ave ri kombanda yehi. (Rom. 8:​15-17) Otjouyapukeyapuke tjondanda yomaturiro tji kuramena po eyuru Jehova katura. “Onguyu ondjizikize” ndjaai haṋa Otjouyapuke kOtjouyapukeyapuke i kuramena po orutu rwonyama rwa Jesus ndwaaru tjiti kutja a ha yenene okuhita meyuru otjOmupristeri Omunene otjiuru wondyero yomerikotameneno wouatjiri. Jesus wa tjita kutja ovatwirisiwa avehe Ovakriste ve kahupe meyuru mokupunguhira ovandu orutu rwe rwonyama. Owo wina mave sokuisa otutu twawo twonyama kokutja ve kamune ondjambi yawo meyuru. (Hebr. 10:​19, 20; 1 Kor. 15:50) Kombunda Jesus tja pendurwa, wa kahita mOtjouyapukeyapuke tjondyero yomerikotameneno wouatjiri, ovatwirisiwa avehe korusenina mu mave kawana na ye.

14. Otja kOvaheberi 9:​12, 24-26, omena raye ondyero ya Jehova yomerikotameneno wouatjiri wokombanda yehi tji i ri osembasemba okukapita omuano Ovaisrael maave rikotamene ku Jehova?

¹⁴ Imba eṱe matu yenene okumuna oukahu ounene wondyero ya Jehova momerikotameneno omakohoke nga zikamena kotjisuta tjonguturiro notjiungura tjoupristeri tja Jesus Kristus. Omupristeri omunene moIsrael aa hiti mOtjouyapukeyapuke tji tja ungurwa i yomundu nombunguhiro yombinḓu yotjinamuinyo, posi yokutja Jesus “wa hita meyuru orini” ndwa ri oruveze oruyapuke okukapita otuveze atuhe na kakurama komurungu wa Jehova. Eye wa karaisa onḓengu yomuinyo we ohomonena mbwa tjita kutja tu kohororwe ‘komauvi mokuripunguha omuini.’ (Lesa Ovaheberi 9:​12, 24-26.) Ombunguhiro ya Jesus ondji ri ombunguhiro osenina ndja tjita kutja tu isirwe omauvi nga aruhe. Otja tji matu kerihonga, kainatja kutja tu nomaundjiro wokukahupa meyuru poo kombanda yehi, eṱe atuhe matu yenene okurikotamena ku Jehova mondyero ye yomerikotameneno wouatjiri kombanda yehi.

15. Ooveṋe mbaave karere morumbo rwondanda yomaturiro?

¹⁵ Omuano Ovajuda maave rikotamene. Ondanda yomaturiro ya ri norumbo orunene, ovapristeri maave ungurire oviungura vyawo. Otjipunguhiro tjozombunguhiro ozoningiririsiwa tji tja ungurirwe pongoporo tja ri morumbo pu notjiyaha tjongoporo, nu mwa ri omeva ovapristeri ngaave ungurisa okurikoha nawo ngunda ave hi ya ungura oviungura oviyapuke. (Eks. 30:​17-20; 40:​6-8) Ozondjuwo ozondjapuke nḓa katungwa kombunda, wina za ri norumbo rwopendje maamu sokukurama imba mbe ha ri ovapristeri okurikotamena ku Mukuru.

16. Ooveṋe mbe karera morumbo rwomoukoto norumbo rwopendje mondyero yomerikotameneno wouatjiri kombanda yehi?

¹⁶ Omuano Ovakriste mu ve rikotamena. Ngunda ave hi ya ya okukakarera otjovapristeri pu na Jesus meyuru, ovatwirisiwa mba sewa ko ve karera nouṱakame morumbo rwomoukoto wondyero yomerikotameneno wouatjiri kombanda  yehi. Otjiyaha otjinene tjomeva tji tja ri mondanda yomaturiro na mozondjuwo ozondjapuke za Muhona, otjiṋa otjinanḓengu tji tji ve zemburukisa kutja owo mave sokuritjinda oukohoke mongaro na moupanga wawo ku na Jehova tjimuna Ovakriste avehe. Hapo “otjimbumba otjinene tjovandu” tji tji yandja oruvara oruṱakame kovangu va Kristus mba twirisiwa, tji rikotamena pi ku Jehova? Omuapostele Johanes we ve munine ava ‘kurama momurungu wotjihavero tjouhona,’ tji tji hitasana norumbo rwopendje kombanda yehi, owo mu ve mu ‘karera omutenya nouṱuku mondjuwo ye ondjapuke.’ (Omavan. 7:​9, 13-15) Tjiri eṱe matu yenene okutja ndangi ku Jehova mokutupa ouyara wokukara norupa mondyero ye yomerikotameneno wouatjiri kombanda yehi.

17. Eṱe tu nondjingonekero yokupunguha ye ku Jehova?

¹⁷ Ovakriste avehe ndino ve nondjingonekero yokurikotamena ku Jehova mokuungurisa oruveze rwawo, omasa wawo, nouini wawo okumukarera. Eṱe “ngatu punguhire Ndjambi ombunguhiro yondangero mu Jesus okutja indji ondangero ndji mai etwa ku ye nomiṋa mbi hongonona ena re,” tjimuna omuapostele Paulus tja raera Ovaheberi mba ri Ovakriste. (Hebr. 13:15) Eṱe matu yenene okuraisa ondangi kondjingonekero ndji tu na yo, yokurikotamena ku Jehova mokumupa imbi ovisembasemba otja pu matu yenene.

18. Otja kOvaheberi 10:​22-25, ovikeṋa mbi tu sokutjita aruhe nu ovikeṋa mbi tu ha sokuzemba?

¹⁸ Lesa Ovaheberi 10:​22-25. Ku ṱa komaandero worutuu rwe kOvaheberi, Paulus wa tjanga ohunga noviṋa mbi matu sokutjita aruhe indu tji matu rikotamenene ku Jehova. Ihi matji kamburire mo okukumba ku Jehova, okuzuvarisa ohunga nomaundjiro ngu tu na wo, okuya pamwe pozombongarero zombongo nokuyanḓiparisasana “tjinga [amatu] munu kutja eyuva raMuhona ri ri pokuya.” Ku ṱa komaandero wembo rOmavandururiro, Omuengeli wa Jehova wa hungira omambo nga potuvari, “rikotamena ku Ndjambi,” okuraisa ounanḓengu wokutjita nao. (Omavan. 19:10; 22:9) Eṱe atu zembi oviṋa avihe mbi twe rihongo ohunga nondyero yomerikotameneno wouatjiri kombanda yehi, nondjingonekero ndji tu na yo yokurikotamena ku Mukuru wetu omunenenene.