1. Ẹlịyẹ olegu-ẹrụ ọhẹ à tị́ wẹẹ ya? Ányị ẹla ọọwa à tị́ guhi?

 KORI kọ chịkpẹẹ ká olegu-ẹrụ á ka ya ẹla balang, à ka ke ụrụ wo ẹla ọlẹ kọ la ka ya? Olegu-ẹrụ ọhẹ wẹẹ ya ẹla alẹ “je angịlẹ kị kụ odehe ọlẹ ju kele ka epwoja myị́ epwoja wuu bala alụpwọma myị́ ụpwọma wuu bala aloja myị́ oja bala angịnyị myị́ angịnyị.” Ẹlịyẹ ọ tị́ wẹẹ ya? “Anụ juhi nya Ohe Oluhye kanụ juwa gwogbo họọ ịnyịnyị mẹ. . . . Anụ gbịgba ha Ọwa Ohe Oluhye Ọngọ họ epwoohe bala odehe.” (Ọwụ. 14:6, 7) IJihova à ri Ohe nya ịlẹhị kem ọlẹ ká ọng myị́ ọng ka gbịgba ha lẹ. O ri ọkẹkẹnị ọtụka hahị nyọlẹ kahị la iwe nyọka gbịgba ha iJihova u-ube ịgọgọ ọtụka nya olegu nyamwụ!

2. Ịyẹ à tị́ ri ube ịgọgọ nya olegu nya iJihova? (Yẹ akpa ọlẹ kọ ri, “ Ang Ọlẹ Kọ Ri Ka.”)

² Ịyẹ kpangga à tị́ ri ube ịgọgọ nya olegu ọọwa? Ale ahị tị́ ka yé ọdawụlẹ nyamwụ kpẹẹkpẹẹ? Ube ịgọgọ nya olegu ọwẹ á lala ube ọlam-ọlam ọlẹ kị nwụ ka. O ri ụgbẹyị ọlẹ ká iJihova hu nọ ká angịnyị ka jẹ́-ẹ gbịgba họọ bwula iya ọkịlaakịla nya iJisọsị. Ọlẹrụ ịPọlụ da ẹlẹwẹ wụlẹ ẹ-ẹpwụ nya ileta ọlẹ kọ da kịla ala iJuu ịlẹ kị ri Angịnyị nya ịKịrayịsị ịla oyi ọhọhẹ, kị kụ iJudiya. b

3-4. Ẹlịyẹ à tị́ ri uko ọchịchị nya ịPọlụ u-uhye nya ala iHiburu ịlẹ kị ri Angịnyị nya ịKịrayịsị kị kụ iJudiya? Ányị ọ tị́ bwu daa ụbwọ?

³ Ịyẹ tị́ du ká ịPọlụ da ileta kịla ala iHiburu ịlẹ kị ri Angịnyị nya ịKịrayịsị kị kụ iJudiya? Ang imiiye ka du myị́. Ọhọhẹ ri ọ-ka jwaa ọhụ. Ị kpa iru nyaa nwà ẹ-ẹpwụ nya ịgba ọgbagba nya ala iJuu. Alegbeju nya ịgba ọgbagba nyaa inyogo ka kpaa họ myị́ nyọlẹ kị wẹ ka ri Angịnyị nya ịKịrayịsị. Ịyẹ à tị́ du? Chajị  Angịnyị nya ịKịrayịsị á la ube ịgọgọ ọtụka ọhẹ ị kaa tụ́ guru gbịgba ka, ị́ la ogidi ọlam-ọlam kaa ya iyo kịliya ha Ohe ka, ọngọkiliya ọhẹ-ẹ́ tị ji ka kpaa kụ ịlahị ka ịnyịnyị. Ẹlẹwẹ ka kpụ angịjụgbẹyị nya ịKịrayịsị ọkịlẹtụ enyi du ká ọmyịmyị nyaa ka la dẹwụ-dẹwụ myị́. (Hib. 2:1; 3:12, 14) Ọ dọmwụ chịkpẹẹ myị́ ká angịhyẹ nyaa ka kụ irya nyọka tịrẹkpẹ ka ịgba ọgbagba nya ala iJuu.

⁴ Oheeye, ịPọlụ ya je ala iHiburu ịwẹ kị ri Angịnyị nya ịKịrayịsị nyori nyị́ kaa maga gbuu nyọka jẹ́ ẹlịlẹhị inyeewe lee ẹla ikpori-kpori ịlẹ kị ri “ang oriri ọnyọọngịrị” ịla Omyi Ẹla nya Ohe ka. (Hib. 5:11-14) Ang ẹjẹẹ ji nyori angịhyẹ nyaa kaa ba Ehile nya iMosisi jẹ wẹẹ. Ma ịPọlụ wụlẹ nyori iya ọkịlaakịla ịlụka nya Ehile nya iMosisi nyị́ jẹ́-ẹ hịlẹ ọhọbịrị nya ọngịnyị gbanggbang ka. Chajị nyọọwa lẹ, Ohe “nyẹ ehile ọọwa deeji” lẹ. Lẹ, ịPọlụ wẹẹ mẹ ẹlịlẹhị ọlẹ kọ la kpori-kpori gụ́ ọọwa jáa. Ọ kpụ Angịnyị nya ịKịrayịsị aanamwụ ịtịya nya “ẹhị ọrịrịị-rịrị ohiigu gụ” ọlẹ kọ ji bwula iya ọkịlaakịla nya iJisọsị ọlẹ kọ ka jẹ́-ẹ daa ụbwọ “tụ ju Ohe Oluhye chwẹẹ” ọlam-ọlam.—Hib. 7:18, 19.

5. Ẹlịyẹ ahị tị́ baba nyọka jẹ́ bwu ụpwụ nya Ala iHiburu? Ịyẹ à tị́ du?

⁵ ỊPọlụ wụlẹ ya je ala iHiburu aanamwụ nyori ụgbẹyị ọlẹ kị wẹẹ gbịgba ha iJihova lẹẹlẹẹ nyị há gụ́ ọlẹ kị kaa kpa gbịgba ene-ene. Ọhọhọ nya ịgba ọgbagba nya ala iJuu ri “ụrụrụ nya ang ọlẹ kọ juwa ka warị ị-ịlahị. ỊKịrayịsị ayịdang la ịlọmwụ a ri ọ-họ jịra nya ụrụrụ nya ang ịịwa wuu lẹlẹ.” (Kol. 2:17) Ụrụrụ nya ang ọlẹ kọ kaa hu rịrị kaa mẹjẹ jaabwọ ká ang ọọwa la kem, ó ri ang ọọwa kpangga ka. Lẹ ịnyịnyị, ụgbẹyị ọlẹ ká ala iJuu kaa bwu gbịgba lụka onyogo ri ụrụrụ nya ịgba ọgbagba ọlam-ọlam ọlẹ kọ ja ka wẹ. Ahị baba kahị ka jẹ́ ụgbẹyị ọlẹ ká iJihova hu nọ hahị kahị ka jẹ́-ẹ yé ọhịnyọhi nya ịhọbịrị nyahị chajị kahị ka jẹ́-ẹ gbịgba họọ ụ-ụgbẹyị ọlẹ kọ ka ye myị. Ahị chụ “ụrụrụ” (abwọlẹ ká ala iJuu kaa gbịgba lụka onyogo) bala “ọ-họ jịra” (ụgbẹyị ọlẹ ká angịnyị nya ịKịrayịsị kaa bwu gbịgba) kaka pwoku awụlẹ, jaabwọ kị wụlẹ ụ-ụpwụ nya Ala iHiburu wẹẹ. Bwula ọ-họ ịnyị, ahị ka jẹ́ jaabwọ ká ube ịgọgọ nya olegu la gụ́ ọọwa bala ọ-ka yẹ jaabwọ kọ guhi.

6. Ányị ị tị́ kaa kpa ọdụ họ ụkụrwọ?

⁶ Ụka onyogo. ỊPọlụ ya ẹla nyamwụ kpụnịrọ ọdụ ọlẹ ká iMosisi ya yeji la ẹka nya 1512  ene nya ọmama nya ịKịrayịsị. (Yẹ akpa ọlẹ kọ ri “Ụka Onyogo—Ụka nya Angịnyị nya ỊKịrayịsị.”) Ọdụ ọọwa lala ụdaa ọlẹ ká ala Isirẹlụ kaa kpa ba ịlaa jaabwọ kị wẹẹ jẹ bwu ẹgẹhẹ ka ẹga ọkịla. Ị kaa kpa gbịgba tụ ahị ju ẹka 500 ene kị lẹẹ nwụ ube ịgọgọ ọlam-ọlam i-iJerusalẹm. (Ehe. 25:8, 9; Ọwa. 9:22) ‘Ọdụ nya iJihova’ à ri ẹga ọlẹ ká ala Isirẹlụ kaa ka nyọka tụ ju Ohe chwẹẹ, ya ang kiliya bala ọ-ka gbịgba ha Ohe lẹ. (Ehe. 29:43-46) Ma, ọdụ ọwẹ ku ọmwakpa nya ang ọ-há gụ́ ọlẹ kọ ja ka wẹ ha angịnyị nya ịKịrayịsị.

7. Ụka oyina ube ịgọgọ nya olegu à tị́ wẹ ka yeji?

⁷ Ụka nya Angịnyị nya ịKịrayịsị. Ọdụ ọlụka onyogo ri “ụrụrụ bala ang oku ọmwakpa” nya ang ilepwoohe, kọ ri ube ịgọgọ ọtụka nya olegu nya iJihova. ỊPọlụ ya nyori “ụrụrụ nya ang ọlẹ kọ juwa ka họ, lụka nyahị ahị alụka ọlẹẹlẹẹ kem, ọhọhọ nyaa [lee ọdụ] ịịwa wuu, a ri lẹ.” (Hib. 8:5; 9:9) Lẹ ụka kọ da ụpwụ kịla ala iHiburu wẹẹ, ube ịgọgọ nya olegu wẹ ka ji ha Angịnyị nya ịKịrayịsị lẹ. Ọ wẹ ka ji la ẹka nya 29 nyọlẹ kị ma ịKịrayịsị kpá. La ẹka ọwẹ, iJisọsị hu enyi Ohe, Ohe chwọọ bwula olegu ịgọgọ, ọọwa ọ dọmwụ nyọka họ ụkụrwọ lala “olegbeju ọgbahị ọgụgụ wuu nya alegbeju nya angịkiliya” nya iJihova ẹ-ẹpwụ nya ube ịgọgọ nya olegu lẹlẹ. c—Hib. 4:14; Ụkụr. 10:37, 38.

8-9. Jaabwọ ká ụpwụ nya Ala iHiburu 7:23-27 ya, ang ọkpọnchị oyina à tị́ ri ọdatị nya alegbeju nya angịkiliya ịla Isirẹlụ bala iJisọsị kọ ri Olegbeju Ọgbahị nya Angịkiliya?

⁸ Ụka onyogo. Olegbeju nya angịkiliya la ọngịrị nyọka ku ọmwakpa nya angịnyị ẹ-ẹga nya Ohe. IJihova à chụ Eron kọ ri olegbeju nya angịkiliya ọhọhẹ nya ala Isirẹlụ, lụka ọlẹ kị hu ọdụ chị gọgọ ha iJihova lẹ. Ma, jaabwọ ká ịPọlụ da wụlẹ, “alegbeju ịkịla iya nya Ohe Oluhye inyogo . . . ju iru lụmẹ chajị nyọlẹ ká igu ogbugbu la ọngịrị kaa chị olegbeju oriri nyaa ịwa apatọyị myị́.” d (Wa Ala iHiburu 7:23-27.) Nyọlẹ ká alegbeju nya angịkiliya ịwẹ á la kpẹẹkpẹẹ ka ịnyịnyị wẹẹ, ị kaa kiliya wọnụ nya ịhọbịrị nya ịlaa ju ịnyịnyị. Ịngịhyẹ ọkpọnchị ọlẹ kọ ri ọdatị nya alegbeju nya angịkiliya ịla ala Isirẹlụ bala iJisọsị Olegbeju Okiliya Ọgbahị à wẹ lẹ.

⁹ Ụka nya Angịnyị nya ịKịrayịsị. IJisọsị ịKịrayịsị Olegbeju Okiliya Ọgbahị ọlẹ kahị la à ri ọngọ “myị ẹrụ ha Ohe Oluhye ẹ-ẹpwụ nya ube ịgọgọ [ọlẹ kọ] ri ịnyịlẹhị lẹ. Chajị, ọọngịnyị ehe ọhẹ-lọhẹ a kpa ụbwọ nwụ́ ube ịgọgọ ọọwa dala Ohe Oluhye Ọngọlahị ayịdang kaka.” (Hib. 8:1, 2) ỊPọlụ da ẹla ọọwa wụlẹ nyori “jaabwọ ká iJisọsị ayịdang tị juwa la ọhịhị pyịyọọ lẹlẹ, ị́ ka jẹ́-ẹ nyẹ okoji ahụrụ nya olegbeju ọkịla iya nya Ohe Oluhye oriri nyamwụ ọwa ugọyị deeji kpá ẹnẹnẹhẹ kaka.” ỊPọlụ myị́myị́ ya nyori iJisọsị nyị ri “ọngọ la abyị ọhẹ-lọhẹ ka bala o-ri ọngọhọbịrị kpong-kpong kaka. Bala o-ri ọngọlẹ ká abwẹla ọnyịịla ọhọhọ kem nyamwụ chọọ ebwo hi alọhọbịrị,” ọwa-á tị baba nyọka kịliya ha “Ohe Oluhye ẹnẹnẹẹnụ” wọnụ nyịlọmwụ ju jaabwọ ká alegbeju ikiliya ịla Isirẹlụ kaa họ ka ịnyịnyị. Ahị kụ ẹhị yẹ ọdatị nya ogidi ịwẹ bala ụgbẹyị ọlẹ kị kaa bwu kịliya ụ-ụwa lụka oyogo bala ụka nya angịnyị nya ịKịrayịsị alẹ wẹẹ.

10. Ịyẹ iya ọlẹ kịị kịla u-uhye nya ogidi nya oje ọnyọmịla à tị́ ku ọmwakpa?

¹⁰ Ụka ongogo. Ị kaa ya iyo kịliya ha iJihova u-uhye nya ogidi nya oje ọnyọmịla ọlẹ kọ ji odehe nya ọnang nya ọdụ. (Ehe. 27: 1, 2; 40:29) Ma, iya ịkịlaakịla ịịwa á jẹ́-ẹ kpa ọhịnyọhi wẹ ọngịnyị gbang-gbang ka. (Hib. 10:1-4) Iya ọkịlaakịla ọlẹ kị kaa họ, ma họ wẹ ku ọmwakpa nya ookpokpo ọlẹ kọ ka gba angịnyị ehe kpehe bwu ẹpwụ nya ọhọbịrị gbanggbang.

11. Uhye nya ogidi oyina iJisọsị à tị́ ya ịlọmwụ kiliya? (Ala iHiburu 10:5-7, 10)

¹¹ Ụka nya Angịnyị nya ịKịrayịsị. IJisọsị jẹ́ nyori iJihova nyị doo ẹrụ wẹ odehe nyọka hu ọhịhị nyamwụ ha chajị nya angịnyị ehe. (Mat. 20:28) Lẹ, ụka ká iJisọsị hu enyi Ohe, ọ mẹ ịlọmwụ jẹ nyọka họ ang ọlẹ ká iJihova tịtọ bwu ẹga nyamwụ. (Jọn. 6:38; Gal. 1:4) Ogidi ọlẹ ká iJisọsị hu ịlọmwụ ha u-uhye nyamwụ á ri ọlẹ ká ọngịnyị ehe họ ka, ma ogidi ọọwa ku ọmwakpa nya “irya” nya Ohe Oluhye. IJisọsị hu ọhịhị nyamwụ kịliya bwula ọlẹ kọ “gbu lụka ookpokpo ọ-nwa ụga gbe oyi myị́ oyi” wọnụ nya ọhọbịrị nya ọng myị́ ọng wuu ọlẹ kọ la ọmyịmyị ẹ-ẹga nyamwụ ju. (Wa Ala iHiburu 10:5-7, 10.) Ahị ya ẹla u-uhye nya ang ịlẹpwụ nya ube nya ọdụ ọọwa wẹẹ.

12. Owo à tị́ la iwe nyọka jụ ka ẹpwụ ọhẹ bala ọkịla nya ọdụ?

¹² Ụka onyogo. Ọdụ bala ube ịgọgọ ịlẹ kị nwụ ku ẹkpẹ nyaa i-iJerusalẹm la abwụma ookpokpo. Ị la apwụ imiiye, kị ri “Ẹga Ọlịgọgọ” bala “Ẹga Ọlịgọgọ Ọtụka Ọgụgụ,” ọlẹ ká apwụ ọhẹ kaa chaa ebwo. (Hib. 9:2-5; Ehe. 26:31-33) Ang ọ-ya otinika rịrị, ogidi ọlẹ kịị jụ ịtangare ila, bala itebwuru ọlẹ ká ịkaa kaa rịrị juwa ẹ-ẹpwụ nya ẹga ọlịgọgọ. Angịlẹ kị ‘chị ịgọgọ  ju kị ka họ ụkụrwọ nya angịkiliya’ kem à la iwe nyọka ka ẹga ọlịgọgọ kaka họ ụkụrwọ ụ-ụwa lẹ. (Ọwa. 3:3, 7, 10) Akpa nya iro ọlẹ kọ ku ọmwakpa nya ijata ojiji nya iJihova juwa ẹ-ẹpwụ nya ẹga ọlịgọgọ ọtụka ọgụgụ. (Ehe. 25:21, 22) Olegbeju nya angịkịliya kem à la iwe nyọka jụ kpoye nya apwụ okeke ka ẹpwụ nya Ẹga Ọlịgọgọ Ọtụka Ọgụgụ la Ahyẹẹnụ nya Ọhọhọ nya Ọcharị-charị lẹ. (Liv. 16:2, 17) Bwu ẹka ka ẹka, ọ kaa jụ kele la ịwọ nya iyo nyọka họ ọhọhọ nya ọcharị-charị bwu ọhọbịrị nya ịlọmwụ bala ịnya alẹpwụma lẹpwụ-lẹpwụ. Nyọlẹ kọ nọ chẹẹ, iJihova họ ang ọlẹ ká ọhọhọ ịla ube nya ọdụ ọwẹ ku ọmwakpa la gede-gede gụ́ ọọwa bwula olegu ịgọgọ nyamwụ.—Hib. 9:6-8. e

13. Ịyẹ Ẹga Ọlịgọgọ bala Ẹga Ọlịgọgọ Ọtụka à tị́ ku ọmwakpa ẹ-ẹga nya angịnyị nya ịKịrayịsị?

¹³ Ụka nya Angịnyị nya ịKịrayịsị. Ohe ya ida wụ angị ịmanyị-ịmanyị lẹpwụ nya angịjụgbẹyị nya iJisọsị bwula olegu ịgọgọ, angịịwa tị ri igu balọọ ụ-ụgbẹyị ọdatị ịnyịnyị. Angịnyị angị 144,000 ịwẹ ka họ ụkụrwọ lala angịkiliya e-epwoohe ta iJisọsị. (Ọwụ. 1:6; 14:1) Ẹga ọlịgọgọ nya ube nya ọdụ ku ọmwakpa nya iwe-ahụrụ ọlẹ kị la nyọlẹ ká Ohe yaa myị lala anyị nyamwụ ụka kị jam odehe. (Rom. 8:15-17) Ẹga Ọlịgọgọ Ọtụka nya ube nya ọdụ tị ku ọmwakpa nya epwoohe, kọ ri ẹga ọlẹ ká iJihova ji. “Apwụ okeke” ọlẹ kọ chị ẹga ọlịgọgọ bala ẹga ọlịgọgọ ọtụka ebwo kụ ọmwakpa nya ugbịnyịrọ nya iJisọsị ọlẹ kọ kwoo iwe nyọka ka epwoohe lala Olegbeju nya Angịkiliya ọla ube ịgọgọ nya olegu. Bwula ọ-hu ịnyịrọ nya ọngịnyị ehe ọlẹ kọ la kiliya chajị nya angịnyị ehe, iJisọsị wụrụ ụgbẹyị nya ọhịhị olepwoohe da ha angịlẹ ká Ohe ya ida wụ. Ịwa ịnyịnyị ka baba nyọka tụụbwọ hi ịnyịrọ nya ọngịnyị ehe ene kị ka jẹ́-ẹ ye uri nyaa olepwoohe. (Hib. 10:19, 20; 1 Kọr. 15:50) Nyọlẹ ká iJisọsị wuleji bwula igu kpá, ọ jụ ka Ẹga Ọlịgọgọ Ọtụka nya ube ịgọgọ nya olegu, kọ ri ẹga ọlẹ ká angịlẹ ká Ohe ya ida wụ ka yẹ julọọ wẹẹ.

14. Jaabwọ ká ụpwụ nya Ala iHiburu 9:12, 24-26 ya, ịyẹ tị́ du ká ube ịgọgọ nya olegu ọlẹ ká iJihova ya yeji há gụ́?

¹⁴ Ahị ka yẹ wẹ gede-gede nyori ụgbẹyị nya ịgba ọgbagba nyịlẹhị ọlẹ ká Ohe nwụlanọ bwula iya ọkịlaakịla bala ọngọkịliya o-riri nya iJisọsị ịKịrayịsị há gụ ịnyịlẹhị. Olegbeju nya angịkiliya nya ala Isirẹlụ kaa kpa ịwọ nya iyo jụ ka Ẹga Ọlịgọgọ Ọtụka ọlẹ ká angịnyị ehe kpa ụbwọ họ, ma iJisọsị ọwa tị jụ ka “ube ịgọgọ olepwoohe ayịdang kpangga,” kọ ri ẹga ọ-la ịgọgọ gụgụ wuu nyọka yẹ ịlọmwụ mẹjẹ ẹ-ẹga nya iJihova. Ọ kpa apyobwuna nya ọhịhị ọkpẹẹkpẹẹ ọlẹ kọ hu ha wọnụ nyahị ju kịla Ohe nyọka “yịlẹ ibyi nya ọhọbịrị nya ọng myị́ ọng wuu jịra myị́ gbanggbang.” (Wa Ala iHiburu 9:12, 24-26.) Iya ọkịlaakịla nya iJisọsị à ri ọlẹ kọ gụgụ wuu kọ ka jẹ́-ẹ hịlẹ ịhọbịrị nyahị gboyi myị́ oyi lẹlẹ. Jaabwọ kahị wẹẹ ka jẹ́, kori ká ẹhị ọrịrịị-rịrị nyahị á ri ọ-ka hịhị e-epwoohe lee odehe, ahị wuu ka jẹ́-ẹ gbịgba ha iJihova u-ube ịgọgọ nya olegu nyamwụ.

15. Owo anyị à tị́ kaa họ ụkụrwọ ọdọda nya ọdụ?

¹⁵ Ụka onyogo. Ọdụ ọlụka onyogo la ọdọda ọhẹ. Ụwa ri ẹga ọ-pwọọ ọlẹ kị bá ang ju ká angịkiliya kaa họ ụkụrwọ nyaa. Ogidi ọtụka ọlẹ kị kaa kiliya ọ-rụ ila, bala ẹja ọlẹ ká angịkiliya kaa kpa tọ abwọ nyọka la cheri-cheri ene kị ka họ ụkụrwọ nyaa, juwa ọdọda ọọwa. (Ehe. 30:17-20; 40:6-8) Ma ube ịgọgọ ịlẹ kị nwụ ku ẹkpẹ nyọọwa la ọdọda olodehe, ọlẹ kọ ri ẹga ká angị ri angịkiliya ka kaa kụ gbịgba ha Ohe.

16. Owo anyị à tị́ kaa họ ụkụrwọ ẹ-ẹpwụ nya ọdọda imimiiye nya ube ịgọgọ nya olegu?

 ¹⁶ Ụka nya Angịnyị nya ịKịrayịsị. Ene ká angịlẹ ká Ohe ya ida wụ ka rụ ka ri angịkiliya ta iJisọsị e-epwoohe, ị kaa họ ụkụrwọ la ọmyịmyị ọdọda ọlẹpwụ nya ube ịgọgọ nya olegu ám̀ odehe ọlẹ. Ẹja nya enyi ọtabwọ ọtụka ọlẹ kọ juwa ẹ-ẹpwụ nya ọdụ bala ube ịgọgọ ri ịtịya ọkpụkpụ haa, bala ahị angịnyị nya ịKịrayịsị wuu nyọka la cheri-cheri ẹ-ẹpwụ nya abwẹla bala ịgba ọgbagba. Ale ‘iru nya angịnyị ịlụmẹ-lụmẹ’ ịlẹ kị kaa chẹkpẹ ju aanịna nya ịKịrayịsị ịlẹ ká Ohe ya ida wụ́, à tị́ tịtị kaa gbịgba ha Ohe? Ọlẹrụ ịJọn yaa kị “godayị rịrị ị-ịlahị nya ẹchị Adịrahụ,” kọ ku ọmwakpa nya ọdọda olodehe, kọ ri ẹga ọlẹ kị juwa “myị ẹrụ ha Ohe Oluhye lodu bala alẹnụ u-ube ịgọgọ nyamwụ” ám̀ odehe ọlẹ. (Ọwụ. 7:9, 13-15) Ọ myịhị lẹhị yẹẹyẹẹ nyọlẹ ká iJihova ya iwe ọtụka ọlịịwẹ da hahị nyọka gbịgba họọ u-ube ịgọgọ nya olegu!

17. Ịyẹ ahị tị́ la iwe nyọka ya kiliya ha iJihova?

¹⁷ Angịnyị nya ịKịrayịsị wuu alẹ la iwe nyọka ya ang kịliya ha iJihova bwula ọ-kpa ụka, ọngịrị, bala ang ọlala nyaa họ ụkụrwọ. Ọlẹrụ ịPọlụ byi Angịnyị nya ịKịrayịsị ịla iHiburu yẹkẹẹ: ‘O-juwa hu ẹnyị nya Ohe Oluhye hwaa kele ka uhye ẹ-ẹpwụ nya obe o-joo ji a tọchị ri ugbe ọnyịịla ọnwụnwụ nya ugbọnụ nyahị lẹ.’ Ahị ka jẹ́-ẹ họ ịnyị ụka myị́ ụka. (Hib. 13:15) Ahị ka jẹ́-ẹ mẹjẹ nyori ihi ọlẹ kahị la nyọka gbịgba ha iJihova myịhị lẹhị bwula ọ-họ ụkụrwọ họọ la ọngịrị nyahị wuu.

18. Jaabwọ ká ụpwụ nya Ala iHiburu 10:22-25 ya, ang iyina ahị tị́ ka tụụbwọ hi ẹnẹnẹhẹ ka? Ẹlịyẹ à tị́ ka gụụhị deeri ẹnẹnẹhẹ ka?

¹⁸ Wa Ala iHiburu 10:22-25. Ụka ká ịPọlụ ja ka chị ileta ọlẹ kọ da kịla ala iHiburu eju, ọ gu ẹnyị nya ang lụmẹ-lụmẹ ịlẹ kị ri apa nya ịgba ọgbagba nyahị kahị ka tụụbwọ hi ẹnẹnẹhẹ ka. Ang ịịwa ri abwọ ọrịrị ha iJihova, ẹla nya Ohe o-ya je angịkịla, ọjịra-jịra ọ-kaka, bala awụlẹ o-ju ọhụ gụ ọwọwa “jaabwọ ká ẹnụtụrụ nya ọwẹwẹ nya Ọngọlahị la juwa ju chwẹẹ!” Olegu-ẹrụ nya iJihova yẹkẹẹ: “Ohe Oluhye ayịdang kem a ka gbịgba ha lẹlẹ.” (Ọwụ. 19:10; 22:9) Ọ ma ẹlẹwẹ ya ugbabwọ imimiiye nyọka mẹjẹ jaabwọ kọ baba kaka ba. Ẹlịlẹhị ikpori-kpori u-uhye nya ube ịgọgọ nya olegu ọwẹ bala iwe ọnyịịla ọlẹ kahị la nyọka gbịgba ha Ohe nyahị ọtụka a gụụhị deeri ẹnẹnẹhẹ ka!