1. Eme ukọ-odhiwu jọ ọ be ta, kọ eme họ otọ ẹme riẹ na?

 OTẸRỌNỌ ukọ-odhiwu ọ be ta ẹme kẹ owhẹ, kọ whọ gbẹ te gaviezọ kẹ ẹme nọ ọ be ta? Nẹnẹ na, ukọ-odhiwu jọ ọ be ta ẹme jọ “kẹ orẹwho, orua, ẹrọunu gbe utu ahwo kpobi.” Eme ọ be ta? Anọ: “Wha dhozọ Ọghẹnẹ jẹ kẹe oruaro. . . . Wha gọ Ọnọ ọ ma odhiwu na gbe otọakpọ na.” (Evia. 14:6, 7) Jihova ọvo họ Ọghẹnẹ uzẹme na. Yọ ọye u fo nọ ohwo kpobi ọ rẹ gọ. Eva e were omai gaga inọ ma rrọ usu ahwo nọ a be gọ Jihova evaọ etẹmpol ologbo riẹ.

2. Eme họ etẹmpol Jihova nọ ma be jọ gọe na? (Who ve je rri ẹkpẹti na “ Oware nọ O Dikihẹ kẹ Hẹ.”)

² Eme họ etẹmpol ologbo Jihova na? Kọ diẹse evaọ Ebaibol a jọ ta ẹme kpahe etẹmpol na ziezi? Orọnikọ etẹmpol na yọ uwou jọ nọ a ginẹ bọ fihọ oria jọ họ. Rekọ oghẹrẹ nọ Jihova ọ gwọlọ nọ ma rọ gọe, avọ ẹrọwọ nọ ma fihọ idhe ẹtanigbo Jesu. Nọ Pọl o je kere ileta se Ileleikristi nọ e jọ ahwo Hibru nọ e jẹ rria Judia, ọ romatotọ hẹhẹ ẹme etẹmpol Jihova na. b

3-4. Fikieme Pọl o ro kere ileta se Ileleikristi nọ e jọ ahwo Hibru nọ e jẹ rria Judia, kọ eme ọ rọ tuduhọ ae awọ?

³ Kọ fikieme Pọl o ro kere ileta nana se Ileleikristi nọ e jọ ahwo Hibru nọ e jẹ rria Judia? O wọhọ nọ fiki eware ivẹ jọ. Orọ ọsosuọ, re ọ rehọ iẹe tuduhọ ae awọ. Egagọ ahwo Ju oye Ileleikristi yena buobu a jọ notọ ze. O sae jọ nọ isu egagọ ahwo Ju a je se ae ẹkoko inọ a kurẹriẹ ruọ egagọ Ileleikristi.  Kọ eme o sae jọ nọ o jẹ wha ẹkoko na ze? Ahwo Ju a wo etẹmpol nọ a rẹ jọ gọ Ọghẹnẹ, agbada-idhe nọ a re jo dhe idhe gbe izerẹ nọ i re dhe idhe kẹ ae. Rekọ Ileleikristi a wo eware yena ha. Fikiere a sai roro nọ egagọ rai i woma te ọrọ ahwo Ju hu, o vẹ whae ze nọ ẹrọwọ rai ọ gbẹ rọ ga tere he. (Hib. 2:1; 3:12, 14) Ẹsejọhọ Ileleikristi jọ nọ e jọ ahwo Ju a je roro nọ a re dhugbe zihe kpohọ egagọ ahwo Ju.

⁴ Orọ avọ ivẹ, Pọl ọ vuẹ Ileleikristi nọ e jọ ahwo Hibru na nọ, a be daoma re a riẹ eware ekpokpọ hayo eware ididi nọ e rrọ Ẹme Ọghẹnẹ hẹ. O se eware nana “emu ọgaga.” (Hib. 5:11-14) O sae jọ nọ ejọ evaọ usu rai a jẹ rọwo kpairoro vrẹ Uzi Mosis na ha. Pọl ọ tẹ vuẹ ae nọ idhe nọ Uzi Mosis o ta inọ a dhe na o sai ru nọ ahwo a rẹ rọ siọ uzi ba ẹraha ha. Yọ Ọghẹnẹ ọ sae rehọ fiki idhe yena rọ izieraha mai vrẹ omai riẹriẹriẹ hẹ. Oyejabọ a ro “si” Uzi Mosis na no. Pọl o te wuhrẹ ae eware ididi jọ nọ e rrọ Ẹme Ọghẹnẹ. Ọ vuẹ rai nọ a wo “ẹruore nọ ọ mai woma” fikinọ Jesu o whu kẹ ae, yọ oware nọ o te lẹliẹ ae “si kẹle” Ọghẹnẹ oye.—Hib. 7:18, 19.

5. Eme u fo nọ ma rẹ riẹ nọ a jọ obe Ahwo Hibru ta, kọ fikieme u ro fo re ma riẹ kpahe iẹe?

⁵ Pọl ọ vuẹ Ileleikristi nọ e jọ ahwo Hibru na nọ oghẹrẹ nọ a be rọ gọ Ọghẹnẹ enẹna u woma vi oghẹrẹ nọ a jẹ rọ gọe okenọ a jọ egagọ ahwo Ju. Fikieme u ro woma vi ei? Keme oghẹrẹ nọ ahwo Ju a jẹ rọ gọ Ọghẹnẹ yọ “uwoho eware nọ e be tha, rekọ Kristi na họ uzedhe oware na.” (Kọl. 2:17) Ohwo ọ tẹ be ruẹ uwoho oware, orọnikọ uzedhe oware na dẹẹ ọ be ruẹ na ha, rekọ uwoho riẹ gheghe. Ẹme na họ, oghẹrẹ nọ ahwo Ju a jẹ rọ gọ Ọghẹnẹ yọ uwoho gheghe ọrọ oghẹrẹ nọ ahwo a te rọ gọ Ọghẹnẹ. U fo re ma riẹ oware nọ Jihova o ru re ọ sae rọ izieraha mai vrẹ omai, ma vẹ sae gọe oghẹrẹ nọ ọ gwọlọ. Fikiere ma te ta kpahe “uwoho” na, koyehọ oghẹrẹ nọ ahwo Ju a jẹ rọ gọ Ọghẹnẹ. Ma te jẹ ta kpahe “uzedhe oware na,” koyehọ oghẹrẹ nọ Ileleikristi a be rọ gọ Ọghẹnẹ. Obe Ahwo Hibru ma ti rri rọ ta ẹme na. O te lẹliẹ omai riẹ otọ etẹmpol ologbo Jihova ziezi gbe oghẹrẹ nọ ma be rọ jariẹ gọ Jihova.

6. Eme a jẹ hae jọ uwou-udhu na ru?

⁶ Ọrọ ahwo Ju oke anwae. Uwou-udhu egagọ nọ Mosis ọ whẹhọ evaọ ukpe 1512 B.C.E.  na oye Pọl ọ kpọ ovao ẹme riẹ rri. (Rri echate na “Ọrọ Ahwo Ju Oke Anwae, Ọrọ Ileleikristi nọ O Rrọ Uzedhe Oware Na.”) A ru uwou-udhu na evaọ oghẹrẹ nọ a sae rọ ghae no jẹ whẹe họ nọ ahwo Izrẹl a te bi no oria jọ kpohọ oria ofa. Enwenọ ikpe egba isoi (500) soso ahwo Izrẹl a jẹ jariẹ gọ Ọghẹnẹ taure a tẹ te bọ etẹmpol fihọ Jerusalẹm uwhremu na. (Ọny. 25:8, 9; Ik. 9:22) A jẹ hai se uwou-udhu na “uwou-udhu omakugbe.” Obei ahwo Izrẹl a jẹ hae nyae jọ gọ Ọghẹnẹ je dhe idhe kẹe. (Ọny. 29:43-46) Rekọ uwou-udhu yena u dikihẹ kẹ oria ofa jọ nọ o mai woma nọ Ileleikristi a te jọ gọ Ọghẹnẹ.

7. Oke vẹ a ro rovie etẹmpol ologbo nọ ma be jọ gọ na?

⁷ Ọrọ Ileleikristi nọ ọ rrọ uzedhe oware na. Uwou-udhu nọ ahwo Izrẹl a jẹ jọ gọ Ọghẹnẹ na yọ “uwoho eware obọ odhiwu.” Yọ o dikihẹ kẹ etẹmpol ologbo Jihova. Pọl ọ ta nọ “uwou-udhu nana o rrọ oware oriruo kẹ oke nana.” (Hib. 8:5; 9:9) Koyehọ okenọ Pọl o ro kere ẹme yena, yọ etẹmpol ologbo Jihova na ọ riẹ no nọ Ileleikristi a be jọ gọ Ọghẹnẹ. Anwọ ukpe 29 C.E. etẹmpol na ọ rọ riẹ. Ukpe yena Jesu ọ rọ họ-ame, Ọghẹnẹ ọ tẹ rọ ẹzi riẹ wholo iei. Jesu o te zihe ruọ “ozerẹ okpehru ologbo” nọ o bi ru iruo evaọ etẹmpol ologbo Jihova na. c—Hib. 4:14; Iruẹru 10:37, 38.

8-9. Ma te rri obe Ahwo Hibru 7:23-27, ẹvẹ Jesu Kristi Ozerẹ Okpehru mai na o ro wo ohẹriẹ no ahwo nọ e jọ izerẹ ikpehru evaọ Izrẹl?

⁸ Ọrọ ahwo Ju oke anwae. Ozerẹ okpehru na ọye ọ jẹ hai dhe idhe kẹ ahwo Izrẹl evaọ oke anwae. Erọn họ ohwo ọsosuọ nọ a ro mu ozerẹ okpehru. Jihova ọ rehọ e riẹ mu okenọ a jẹ rehọ uwou-udhu egagọ na mudhe. Rekọ Pọl ọ ta nọ “ahwo buobu a zihe ruọ izerẹ unọjọ utọjọ keme enọ a ro mu a jẹ sai ru iruo na ribri hi fiki uwhu.” d (Se Ahwo Hibru 7:23-27.) Ere ọvo ho, ahwo nọ a jọ ọkwa ozerẹ okpehru na yọ ahwo-akpọ nọ a rẹ raha uzi, fikiere a jẹ hai dhe idhe rọkẹ izieraha rai re. Oyejabọ Jesu Kristi nọ ọ rrọ Ozerẹ Okpehru ologbo mai na o ro woma vi izerẹ ikpehru ahwo Izrẹl na.

⁹ Ọrọ Ileleikristi nọ ọ rrọ uzedhe oware na. Jesu Kristi họ Ozerẹ Okpehru mai, yọ “ọ rrọ ọgbodibo . . . uvi uwou-udhu na, onọ Jihova o ro vi, orọnikọ ohwo-akpọ họ.” (Hib. 8:1, 2) Pọl ọ ta nọ “fikinọ [Jesu] ọ rrọ uzuazọ bẹdẹ bẹdẹ, amọfa a rẹ rehọ ọkwa-ozerẹ riẹ hẹ.” Pọl ọ tẹ jẹ ta nọ Jesu ọ “kare epe,” o te je “wo ohẹriẹ no erahaizi.” Yọ “o du gwọlọ nọ o re dhe idhe kẹdẹ kẹdẹ hẹ” fiki izieraha riẹ wọhọ epanọ izerẹ ikpehru ahwo Izrẹl a jẹ hai ru. Obọnana joma ta kpahe ohẹriẹ nọ o rrọ agbada-idhe ahwo Izrẹl gbe orọ Ileleikristi. Ma te jẹ ruẹ ohẹriẹ nọ o rrọ idhe rai gbe erọ Ileleikristi.

10. Eme idhe nọ a je dhe evaọ agbada-idhe ekọpa na i dikihẹ kẹ?

 ¹⁰ Ọrọ ahwo Ju oke anwae. Agbada-idhe nọ a rehọ ekọpa ru ọ jọ otafe uwou-udhu na nọ a jẹ hae jọ dhe idhe kẹ Jihova. (Ọny. 27:1, 2; 40:29) Rekọ idhe nọ a je dhe oke yena e sai ru nọ Ọghẹnẹ ọ rẹ rọ rehọ izieraha ahwo vrẹ rai riẹriẹriẹ hẹ. (Hib. 10:1-4) Idhe nọ a jẹ hae rọ erao dhe ẹsikpobi evaọ uwou-udhu na i dikihẹ kẹ idhe jọ nọ a ti dhe ẹsiẹvo rọ ta ahwo-akpọ no igbo uzioraha riẹriẹriẹ.

11. Eme họ agbada-idhe nọ Jesu ọ jọ rehọ oma riẹ dhe idhe na? (Ahwo Hibru 10:5-7, 10)

¹¹ Ọrọ Ileleikristi nọ ọ rrọ uzedhe oware na. Jesu ọ riẹ nọ oware nọ Jihova o ro vi ei ziọ otọakpọ họ, re ọ rehọ uzuazọ riẹ dhe idhe rọ ta ahwo-akpọ no igbo. (Mat. 20:28) Oyejabọ ọ rọ họ-ame re o dhesẹ nọ ọ nyaze no re o ru oware nọ Jihova ọ rọ fiki riẹ vi ei ze. (Jọn 6:38; Gal. 1:4) Jesu ọ tẹ rọ uzuazọ riẹ dhe idhe evaọ agbada-idhe. Orọnikọ agbada-idhe jọ nọ a ro vi oria jọ họ. Rekọ agbada-idhe na họ “oreva” Ọsẹ riẹ. Oreva Ọsẹ riẹ họ, re ọ rehọ ugboma ogbagba ohwo-akpọ nọ o wo na ro dhe idhe kẹ ahwo-akpọ. Jesu ọ rọ uzuazọ riẹ dhe idhe “ẹsiẹvo rọkẹ oke kpobi.” Yọ ohwo kpobi nọ o fi ẹrọwọ họ iẹe, a rẹ rehọ izieraha riẹ vrẹ riẹ riẹriẹriẹ. (Se Ahwo Hibru 10:5-7, 10.) Obọnana ma te ta ẹme kpahe eware nọ e jọ obeva uwou-udhu egagọ na gbe oware nọ i dikihẹ kẹ.

12. Ono ọ rẹ sae ruọ Oria Ọrẹri gbe Ọrẹri Erẹri uwou-udhu na?

¹² Ọrọ ahwo Ju oke anwae. Enwenọ oghẹrẹ ovona a bọ uwou-udhu egagọ na gbe etẹmpol nọ a bọ fihọ Jerusalẹm uwhremu na. Ibriwou ivẹ e jọ eva rai. Eye họ “Oria Ọrẹri na” gbe “Ọrẹri Erẹri na.” Yọ ekọtini nọ a nabi zuo ziezi a rọ ghale ibriwou ivẹ na. (Hib. 9:2-5; Ọny. 26:31-33) Eware nọ e jọ Oria Ọrẹri na họ, ọkpọ-edada ukpẹ nọ a rọ igoru ru, agbada-idhe nọ a rẹ jọ mahe insẹnse, gbe emẹjẹ nọ a fi ebrẹdi nọ a ro mudhe kẹ Ọghẹnẹ fihọ. “Izerẹ nọ a wholo nọ a ro mu” na ọvo a rẹ ruọ Oria Ọrẹri na nyai ru iruo nọ a kẹ rai. (Ik. 3:3, 7, 10) Oware nọ o  jọ Ọrẹri Erẹri na họ etehe ọvọ nọ a rọ igoru ru. Yọ u dikihẹ kẹ oria nọ Jihova ọ rrọ. (Ọny. 25:21, 22) Ozerẹ okpehru na ọvo a kuvẹ nọ o re rovie ekọtini na ruọ oria Ọrẹri Erẹri na. Yọ Ẹdẹ Omavoro nọ a re ru ẹsiẹvo ẹgbukpe na ọvo ọ rẹ ruọ eva riẹ. (Izerẹ 16:2, 17) Kukpe kukpe, ozerẹ okpehru na ọ rẹ ruọ etẹe na ẹsiẹvo. Yọ ọ rẹ wha azẹ erao ruọ etẹe re o ro voro oma riẹ gbe ahwo orẹwho na soso fiki izieraha rai. Nọ ikpe buobu e vrẹ no, Jihova ọ tẹ te rehọ ẹzi ọfuafo riẹ fiobọhọ kẹ idibo riẹ riẹ oware nọ eware nana i dikihẹ kẹ.—Hib. 9:6-8. e

13. Eme Oria Ọrẹri gbe Ọrẹri Erẹri na i dikihẹ kẹ anwẹnọ Jesu ọ rọ họ-ame rite enẹna?

¹³ Ọrọ Ileleikristi nọ ọ rrọ uzedhe oware na. A rọ ẹzi wholo umutho Ileleikristi jọ. Yọ Ileleikristi yena a zihe ruọ emọ Ọghẹnẹ no makọ evaọ enẹna. A te jọ izerẹ re evaọ obọ odhiwu wọhọ epanọ Jesu ọ rrọ ozerẹ na. Yọ a ti bu te ahwo idu udhuhrẹ-gbene (144,000). (Evia. 1:6; 14:1) Oria Ọrẹri nọ o jọ uwou-udhu na u dikihẹ kẹ oghẹrẹ nọ enọ a rọ ẹzi wholo na a rrọ enẹna. A zihe ruọ emọ Ọghẹnẹ no dede nọ a gbẹ rrọ otọakpọ na. (Rom 8:15-17) Ọrẹri Erẹri nọ ọ jọ uwou-udhu na u dikihẹ kẹ obọ odhiwu nọ Jihova ọ rrọ na. “Ekọtini” nọ ọ rrọ udevie Oria Ọrẹri na avọ Ọrẹri Erẹri na u dikihẹ kẹ ugboma Jesu evaọ okenọ ọ jọ obọ otọakpọ obonẹ. Ọ sae rọ oma ohwo-akpọ nọ o wo oke yena kpobọ odhiwu hu re o ru iruo Ozerẹ Okpehru riẹ evaọ etẹmpol ologbo Jihova na. Oma riẹ nọ o ro dhe idhe kẹ ahwo-akpọ na oye u rovie uvẹ fihọ nọ Ileleikristi nọ a rọ ẹzi wholo kpobi a ti ro kpobọ odhiwu. Ileleikristi nana omarai a sae rọ ugboma ohwo-akpọ nọ a wo na kpobọ odhiwu hu. (Hib. 10:19, 20; 1 Kọr. 15:50) Nọ a kpare Jesu ze no, ọ tẹ ruọ eva Ọrẹri Erẹri ọrọ etẹmpol ologbo Jihova. Yọ enọ a wholo na a ti kuomagbei.

14. Ma te rri ẹme nọ ọ rrọ obe Ahwo Hibru 9:12, 24-26, eme o lẹliẹ etẹmpol nọ ma wo enẹna woma vi ọrọ oke anwae na kpekufiẹ?

¹⁴ Eware nana kpobi i dhesẹ nọ oghẹrẹ nọ ma be rọ gọ Jihova enẹna fikinọ Jesu o whu kẹ omai, ọ tẹ jẹ rrọ Ozerẹ Okpehru mai na o woma vi orọ ahwo Ju. Azẹ erao ozerẹ okpehru ahwo Izrẹl ọ jẹ hai ro dhe idhe evaọ oria Ọrẹri Erẹri nọ ohwo-akpọ ọ bọ. Rekọ Jesu “ọ ruọ odhiwu dẹẹ,” nọ ọ mae rrọ ọrẹri kpaobọ, nọ Jihova ọ rrọ. Ọ tẹ jọ obei hwosa ẹtanigbo mai “re o si uzioraha no ẹkwoma omariẹ nọ o ro dhe idhe.” (Se Ahwo Hibru 9:12, 24-26.) Idhe Jesu họ oware nọ o sai ginẹ wozẹ izieraha no omai oma bẹdẹ bẹdẹ. Obọnana ma te ta ẹme te oghẹrẹ nọ mai kpobi ma sae rọ gọ Jihova evaọ etẹmpol ologbo riẹ, te ma wo ẹruore obọ odhiwu hayo otọakpọ na ma te jọ.

15. Amono a jẹ hae jọ eva ighẹ uwou-udhu na?

¹⁵ Ọrọ ahwo Ju oke anwae. A di ogba wariẹ uwou-udhu egagọ na họ. Yọ obeva ighẹ na izerẹ na a jẹ hai jo ru iruo rai. Agbada-idhe ologbo ọrọ ekọpa ọ jọ obeva ighẹ na. Odhe ekọpa nọ izerẹ na a jẹ hae jọ wozẹ abọ gbe awọ rai taure a te ti mu iruo rai họ ọ tẹ jẹ jọ etẹe. (Ọny. 30:17-20; 40:6-8) Rekọ etẹmpol nọ a bọ uwhremu na gbe enọ a bọ nọ a raha ọrọ ọsosuọ na no, i wo ighẹ ọfa jọ nọ ọ rrọ otafe ogba ọsosuọ na. Yọ ighẹ obọ otafe yena ahwo nọ a rrọ izerẹ hẹ a re dikihẹ jọ gọ Ọghẹnẹ.

16. Amono a be gọ Ọghẹnẹ evaọ ighẹ obeva etẹmpol oke mai na, kọ amono a rrọ ighẹ obọ otafe riẹ?

¹⁶ Ọrọ Ileleikristi nọ ọ rrọ uzedhe oware na.  Taure Ileleikristi nọ a rọ ẹzi wholo nọ i kiọkọ otọakpọ na a te ti kpobọ odhiwu re a jọ izerẹ, a be gọ Ọghẹnẹ evaọ ighẹ obeva ọrọ etẹmpol ologbo Jihova. Odhe-ame ologbo nọ ọ jọ ighẹ uwou-udhu na gbe etẹmpol na o rẹ lẹliẹ Ileleikristi nọ a rọ ẹzi wholo na gbe Ileleikristi efa kpobi kareghẹhọ oware jọ nọ o roja gaga. Oye họ, u fo re a kẹnoma kẹ eware etọtọ gbe oware kpobi nọ o rẹ raha usu rai avọ Ọghẹnẹ. Kọ diẹse “ogbotu obuobu” nọ a bi fiobọhọ kẹ enọ a rọ ẹzi wholo na a be jọ gọ Ọghẹnẹ? Jọn ukọ na ọ jọ eruẹaruẹ ruẹ e rai nọ a “dikihẹ aro agbara-uvie na.” Ma sae ta nọ oria nọ a be jọ gọ Ọghẹnẹ evaọ otọakpọ na họ ighẹ obọ otafe na. Etẹe a be jọ “ru iruo ọrẹri [kẹ Ọghẹnẹ] te aso te uvo evaọ etẹmpol riẹ.” (Evia. 7:9, 13-15) Eva e were omai gaga inọ ma rrọ usu ahwo nọ a be gọ Jihova oghẹrẹ nọ ọ gwọlọ evaọ etẹmpol riẹ.

17. Idhe vẹ ma bi dhe kẹ Jihova enẹna?

¹⁷ Ileleikristi kpobi nẹnẹ a rẹ sai dhe idhe kẹ Jihova. Idhe nọ ma bi dhe nẹnẹ họ ẹgba mai, oke mai gbe eware nọ ma wo nọ ma bi ro ru iruo Ọghẹnẹ jẹ ta usi uwoma Uvie riẹ. Pọl ukọ na ọ ta kẹ Ileleikristi nọ e jọ ahwo Hibru nọ, jọ a hai “dhe idhe ujiro kẹ Ọghẹnẹ ẹsikpobi, koyehọ, unu mai nọ u re whowho odẹ riẹ via evaọ ẹgbede.” (Hib. 13:15) Ma te bi ru utho ẹgba mai kpobi evaọ iruo Ọghẹnẹ, u dhesẹ nọ eva e be were omai inọ mai yọ idibo Jihova.

18. Ma te rri ẹme nọ ọ rrọ obe Ahwo Hibru 10:22-25, eware vẹ i wuzou gaga nọ u fo nọ ma rẹ hai ru, kọ eme u fo nọ ma rẹ kareghẹhọ?

¹⁸ Se Ahwo Hibru 10:22-25. Evaọ ubrobọ ekuhọ ileta nọ Pọl ukọ na o kere se ahwo Hibru na, ọ fodẹ eware jọ nọ i wuzou gaga evaọ egagọ mai. Eye họ olẹ nọ ma rẹ lẹ se Jihova, usi uwoma nọ ma rẹ ta kẹ ahwo kpahe ẹruore mai, gbe ewuhrẹ nọ ma rẹ nya. Ma vẹ jẹ hae tuduhọ ohwohwo awọ maero kọ enẹna nọ ma be “ruẹ nọ ẹdẹ [Jihova] o bi si kẹle na.” Evaọ obọ ekuhọ obe Eviavia, isiava soso ukọ-odhiwu Jihova ọ ta nọ: “Gọ Ọghẹnẹ!” (Evia. 19:10; 22:9) Ajọ eware ididi nọ ma wuhrẹ kpahe etẹmpol ologbo Jihova nọ ma be jọ gọe na e thọrọ omai ẹro ho. Joma hae kareghẹhọ nọ ọghọ ologbo Jihova o bru họ omai oma nọ o ro se omai ze re ma jọ idibo riẹ!