1. A wa wan ienjel a se, an ou dat fi mek wi fiil?

 EF WAN ienjel did kom kom taak tu yu, yu wuda lisn tu im, duohn? Wel rait ya nou, wan ienjel av wan “mesij. . . fi evri konchri, chraib, piipl, an evri langwij.” Im a se, “Unu beta gi Gad nof rispek an priez. . . . Unu fi worship di wan we mek evriting: di evn an di ort.” (Rev. 14:6, 7) Jeuova a di onggl chuu Gad we evribadi fi a worship. So wi fi api se im gi wi di chaans fi worship im iina im ous.

2. A wa a Gad ous? (Luk pan di paat we niem “ Gad Ous Difrant Fram Dem Sitn Ya.”)

² Gad ous we wi a worship iina rait ya nou, a wa dat? An we wi kyan fain nof sitn we tel wi bout it? Da ous ya a no wan riil bildin, it av fi du wid di wie ou Jeuova waahn wi fi worship im. An kaa Jiizas ded fi wi, wi av di chaans fi worship Jeuova da wie de. Di apasl Paal did taak bout dis wen im rait wan leta tu di Iibruu Kristiyan dem we did a liv iina Judiya. b

3-4. A wa did a bada Paal bout wa did a apm wid di Iibruu Kristiyan dem iina Judiya, an ou im did elp dem?

³ Wen Paal did rait da leta ya tu di Iibruu Kristiyan dem iina Judiya, im mait-a did av tuu riizn wa mek im rait it. Fos, im did waahn dem fi chos iina Gad an worship Im di wie ou Im waahn dem fi worship Im da taim de. Yu si wa did apm a dat muos a dem did gruo op iina di Juu dem choch, so di Juu liida dem mait-a did a mak dem kaa dem ton Kristiyan. An dem did a du dat kaa di Kristiyan  dem neva av no speshal plies fi go worship Gad, an dem neva av no alta fi mek no sakrifais gi Gad, an dem neehn av no priis fi du dem ting de niida. Dis wuda mek dem Kristiyan ya fiil a wie an mek dem no chos iina Gad so moch agen. (Iib. 2:1; 3:12, 14) An som a dem mait-a aal did fiil laik se dem fi go bak an worship a di Juu dem choch agen.

⁴ Di sekan riizn wa mek Paal did rait di Iibruu Kristiyan dem a kaa dem neva did a wok aad fi chrai fi andastan di sitn dem we aad fi andastan iina Gad Wod we komiin laik “aad fuud.” (Iib. 5:11-14) Som a dem stil did a fala di Laa we Gad gi Muoziz. Bot Paal did mek dem nuo se di sakrifais dem we di Laa did tel dem fi gi op wudn tek we aal a dem sin dem. An kaaz a dat, dem did fi put di Laa “wan said.” So afta dat Paal staat fi tiich dem som a di ting dem iina Gad Wod we aad fi andastan. An im mek di Kristiyan dem memba se kaaz Jiizas ded fi wi, wi av “sitn beta fi luk faawod tu.” An dis kuda elp dem fi ‘get kluos tu Gad.’​—Iib. 7:18, 19.

5. Wa de iina di buk a Iibruu we wi niid fi andastan, an wa mek?

⁵ Paal mek di Iibruu breda an sista dem nuo se di wie ou wan Kristiyan fi worship Gad wol iip muor taim beta dan ou dem yuus tu worship Im. Kaa di wie ou di Juu dem yuus tu worship wen dem a fala di Laa did komiin laik “wan sheda fi dem sitn de; dem a no di riil ting. Wa riil, a Krais Jiizas.” (Kol. 2:17) So jos laik ou wan sheda a jos di shiep a di riil sitn, a siem so di wie ou di Juu dem did worship Gad a jos wan sheda a ou di Kristiyan dem wuda worship Gad. So ef wi a-go worship Jeuova di wie ou im waahn wi fi worship im, wi afi andastan ou Jeuova set op tingz so dat wi kyan get paadn fi wi sin dem. So wa wi a-go du ya nou a luk iina di buk a Iibruu fi di “sheda” (dat a di wie ou dem worship bifuo Jiizas taim) an fi “di riil ting” (dat a di wie ou wi fi worship nou). Wen wi du dis, it a-go elp wi fi andastan muor bout Gad ous an wa it av fi du wid wi.

6. A wa dem yuus tu go a di tent go du?

⁶ Di wie ou dem worship bifuo Jiizas taim. Paal did se wa im a se bies pan di  tent we Muoziz set op fi worship Gad iina 1512 B.C.E. (Luk pan di paat we niem “Di Wie Ou Dem Worship Bifuo Jiizas Taim​—Di Wie Ou Wi Fi Worship Nou.”) Di Izrelait dem yuus tu kyari da tent ya wen dem a muuv fram wan plies tu wan neda plies. Dem yuuz it fi 500 ier til dem mek Gad ous iina Jeruusilem. (Ek. 25:8, 9; Nom. 9:22) An da tent ya a wich paat di Izrelait dem wuda go go taak tu Gad an gi op dem sakrifais dem wen dem a worship im. (Ek. 29:43-46) Bot da tent ya did av fi du wid sitn biga we av fi du wid di Kristiyan dem.

7. A wen dem did staat worship Gad iina wan nyuu wie?

⁷ Di wie ou wi fi worship nou. Di tent we dem yuus tu go worship “kyaahn riili kom kluos tu di wan we de evn, nuo sa! Dem de komiin laka sheda fi di riil ting.” An di riil ting av fi du wid di wie ou wi a worship Jeuova ya nou. Paal se “di tent pan ort a wan sain we shuo wa did a gwaan da taim de.” (Iib. 8:5; 9:9) So bai di taim Paal did rait da leta ya tu dem, di Kristiyan dem did fi a worship Gad iina di nyuu wie ou dem fi worship im. Dem staat worship Gad da wie ya iina 29 C.E., di ier wen Jiizas did baptaiz an Gad uoli spirit kom dong pan im. Dis shuo se Gad pik im fi ton di “liida fi di priis dem,” an a im a-go elp wi fi worship Gad di wie ou wi fi worship nou. c​—Iib. 4:14; Aks 10:37, 38.

8-9. Azkaadn tu Iibruu 7:23-27, ou di liida fi di priis dem iina Izrel did difrant fram Jiizas Krais we a di tap-a-tap Liida fi di Priis Dem?

⁸ Di wie ou dem worship bifuo Jiizas taim. Jeuova did put di liida fi di priis dem de fi taak op fi di piipl dem. A Ieran a di fos liida fi di priis dem iina Izrel we Jeuova pik wen dem did staat fi yuuz di tent wen dem a worship im. Bot Paal mek wi nuo se “a uol iip a priis yu did av. Kaaz priis wuda ded an so ada priis wuda afi kom tek uova.” d (Riid Iibruu 7:23-27.) An dem man de neehn porfek so dem wuda afi gi op sakrifais fi dem uona sin tu. So yu si ou difrant di liida fi di priis dem iina Izrel did bi fram ou Jiizas Krais, di liida fi di priis dem bi.

⁹ Di wie ou wi fi worship nou. Jiizas Krais “wok az di liida fi di priis dem iina di . . . riil tent, a [Jeuova] put dat op​—a no man!” (Iib. 8:1, 2) Paal se, “kaaz Jiizas naa no ded a ded, im a-go tan priis fi eva an nobadi naa tek uova fram im.” An im se, “nobadi kyaahn bliem [Jiizas] fi notn. Gad mek im difrant, im no komiin laka sina piipl.” An im se Jiizas “no tan laik di ada liida dem fi di priis dem we afi bon sakrifais fi fi dem uona sin . . . die afta die.” Mek wi luk pan di alta dem an di sakrifais dem we dem wuda bon bifuo Jiizas taim an wa dat av fi du wid di wie ou wi a worship nou.

10. A wa di sakrifais dem we dem gi op pan di alta we mek outa kapa mek wi nuo bout?

¹⁰ Di wie ou dem worship bifuo Jiizas taim. Di alta we mek outa kapa, we dem yuus tu gi op animal sakrifais pan tu Jeuova, did de a di front a di tent. (Ek. 27:1, 2; 40:29) Bot yu si wen dem gi op dem sakrifais de, dem wuda afi du it uova an uova agen kaa dem sakrifais de kudn  mek di piipl dem get paadn fi dem sin dem fi eva. (Iib. 10:1-4) Dem sakrifais de mek wi nuo bout wan biga sakrifais we wuda apm we wuda mek piipl kyan get frii fram dem sin fi eva.

11. A wa a di alta we Jiizas did gi op im laif pan? (Iibruu 10:5-7, 10)

¹¹ Di wie ou wi fi worship nou. Jiizas did nuo se Jeuova sen im kom a ort fi gi op im laif so dat piipl kyan get paadn fram dem sin. (Mat. 20:28) So wen Jiizas baptaiz, im gi im laif tu Jeuova fi du wa im waahn im fi du. (Jan 6:38; Gya. 1:4) So wen Jiizas ded fi wi, it wuda komiin laik se im gi op im porfek laif pan wan alta. Da alta de av fi du wid “wa [Jeuova] waahn [Jiizas] fi du.” Jiizas did “sakrifais im uona badi jos wan dege-dege taim an dat kova evriting.” So evribadi we chos iina Jiizas sakrifais a-go kyan get paadn fi dem sin dem fi eva. (Riid Iibruu 10:5-7, 10.) Di neks ting we wi a-go luk pan a wa did de iina di tent an wa dat av fi du wid wi.

12. A uu kuda go iina di Uoli Plies an di Uoliyis Plies iina Gad ous?

¹² Di wie ou dem worship bifuo Jiizas taim. Di tent an Gad ous we dem did mek op afta dat iina Jeruusilem did mek op di siem kain-a wie. Iina it yu did av tuu paat​—“di Uoli Plies” an “di Uoliyis Plies”​—an wan kortn did de bitwiin dem tuu paat de. (Iib. 9:2-5; Ek. 26:31-33) Yu did av wan lampstan we mek outa guol iina di Uoli Plies, an wan alta we dem yuus tu bon swiit spais pan, an wan tiebl wid dem  speshal bred we di priis gi op tu Gad. Onggl di priis dem we Gad pik kuda go iina di Uoli Plies fi du di wok we dem fi du. (Nom. 3:3, 7, 10) Di Uoliyis Plies did av di baks we tan fi di pramis we Gad did mek we did kova aal uova iina guol. An it wuda mek dem nuo se Jeuova de de-so. (Ek. 25:21, 22) Onggl di liida fi di priis dem kuda go chuu di kortn fi go iina di Uoliyis plies pan di speshal die wen piipl go fi get dem sin paadn. (Liv. 16:2, 17) Evri ier, di liida fi di priis dem wuda go iina di Uoliyis Plies wid di animal dem blod we dem sakrifais fi aks Jeuova fi paadn im an di res a piipl dem fi dem sin. Bot afta dat, Jeuova yuuz im uoli spirit fi mek piipl nuo wa di sitn dem iina di tent riili miin.​—Iib. 9:6-8. e

13. A wa di Uoli Plies an di Uoliyis Plies iina di tent av fi du wid Jiizas an di wan dem we get pik fi go a evn?

¹³ Di wie ou wi fi worship nou. A 144,000 a Jiizas falara dem Jeuova did yuuz im uoli spirit fi pik fi go bi priis iina evn wid Jiizas. An dem a-go bi Jeuova speshal pikni. (Rev. 1:6; 14:1) Di Uoli Plies we de iina di tent av fi du wid dem wan ya we de pan ort we Jeuova pik fi bi im pikni dem. (Ruo. 8:15-17) Di Uoliyis Plies iina di tent av fi du wid evn we Jeuova liv. “Di kortn” we de bitwiin di Uoli Plies an di Uoliyis Plies av fi du wid Jiizas badi we im kudn go iina evn wid, kaa fi im fi ton di tap-a-tap liida fi di priis dem iina Gad ous im wuda afi gi op im badi fi evribadi. An kaaz im du dis, im mek di wan dem we get pik fi go a evn get di chaans fi go de. An fi dem wan de get fi go a evn tu, dem afi gi op fi dem badi tu. (Iib. 10:19, 20; 1 Kor. 15:50) Afta Jiizas did kom bak alaiv, im go iina Gad ous iina di Uoliyis Plies an a de-so di res a di wan dem we a go a evn a-go go tu.

14. Azkaadn tu Iibruu 9:12, 24-26, wa mek wi nuo se di wie ou Jeuova set op tingz fi wi worship im ya nou beta dan ou di Izrelait dem yuus tu dwi’it?

¹⁴ So wi si se di wie ou Jeuova set op tingz fi wi worship im nou wol iip muor taim beta dan di wie ou di Izrelait dem yuus tu worship im kaa a man did mek di Uoliyis plies we di liida fi di priis dem iina Izrel did go iina wid di animal blod. Bot Jiizas go “iina evn itself” an dat a di uoliyis plies fi go bifuo Jeuova. A de-so im mek Jeuova nuo se im gi op imself laik wan sakrifais, “da wie de im kuda get rid a sin.” (Riid Iibruu 9:12, 24-26.) Kaa Jiizas sakrifais im laif fi wi, a it a-go tek we sin fi eva. Di neks ting we wi a-go luk pan a se weda wi a-go liv iina evn ar pan di ort, aal a wi kyan worship Jeuova a im ous.

15. A uu wok iina di yaad we di tent de?

¹⁵ Di wie ou dem worship bifuo Jiizas taim. Di tent did av wan yaad we fens roun an di priis dem wuda du dem wok iina da yaad de. Wan big alta we mek outa kapa we dem yuus tu bon sakrifais pan did de iina di yaad tu. An wan biesn we mek outa kapa we av waata iina it we di priis dem yuus tu yuuz fi kliin op demself bifuo dem du dem wok did de de tu. (Ek. 30:17-20; 40:6-8) Gad ous we dem did mek op afta dat did av wan yaad tu we di wan dem we a no priis kuda go tan op an worship Gad.

16. A uu an uu a sorv Jeuova iina di yaad we im ous de?

¹⁶ Di wie ou wi fi worship nou. Bifuo di wan dem we get pik fi go a evn fi bi priis  wid Jiizas go a evn, dem a-go a work iina di paat a di yaad we de nier tu Gad ous. Di big biesn a waata we de iina Gad yaad mek di wan dem we get pik fi go a evn an di res a wi memba se wen wi a worship Jeuova wi fi kliin iina evri wie. Bot a wich paat di “big kroud a piipl” we a stik tu di wan dem we a go a evn a worship Gad? Di apasl Jan mek wi nuo wen im se im si dem “tan op infronta di chuon,” an de-so a did di paat a di yaad we no so nier tu Gad ous, wich paat dem “a sorv [Gad] die an nait iina im ous.” (Rev. 7:9, 13-15) Wi riili api fi kyan worship Jeuova di wie ou wi a worship im ya nou!

17. Wa kain-a sakrifais wi kyan gi Jeuova tide?

¹⁷ Rait ya nou ya, aal a wi api se wi stil kyan gi Jeuova sakrifais wen wi a worship im. An wi du dis wen wi yuuz wi taim, di chrent we wi av, an wi moni, an eniting els we wi av fi du nof fi im Kindom govament. Tide wi kyan du siem laik wa Paal did tel di Iibruu Kristiyan dem wen im se, “Mek wi priez Gad aal di wail. Wen wi priez Gad so, a sakrifais wi a sen op gi im. A wi aafrin dat wi a gi wid wi mout, an dat shuo se wi chos iina im, an wi a se im a fi wi Laad.” (Iib. 13:15) So wi kyan shuo Jeuova se wi tangk im se wi kyan worship im wen wi gi im di bes we wi av.

18. Azkaadn tu Iibruu 10:22-25, wa wi fi aalwiez mek shuor se wi a du, an wa wi fi memba se?

¹⁸ Riid Iibruu 10:22-25. Iina di laas paat a di leta we Paal did rait dem, im tel dem se dem fi aalwiez prie tu Jeuova an priich di gud nyuuz an taak bout di gud sitn dem we dem a luk faawod fi get, an dem fi mek shuor se dem a go a dem miitn dem so dat dem kyan taak an mek dem wan aneda aat get chrangga “wos laka ou di Laad suun kom bak.” An iina di laas paat a di buk a Revilieshan, fi mek wi si ou impuotant it bi, a tuu taim Jeuova ienjel se: “A Gad yu fi worship!” (Rev. 19:10; 22:9) Wi a uop se wi aalwiez memba bout dem sitn ya we no so iizi fi andastan we tel wi bout Gad ous an di blesn we wi av fi a worship im.