1. Yɛɛ maalikɛinɔɔ cho yɛ dimioo, nduyɛ yɛɛ nyɛ o cho dimioo wo sim yɛ le naa?

 TE O yɔŋ pɛ maa maalikɛinɔɔ nɔ mbo soo o numndo, baa a cho ndu pa nilaŋ yaŋɔɔ? O kpeekpei niŋ, maalikɛinɔɔ cho hau suɛi o “waŋnda lekaa o lekaa, a lelɛŋ o lelɛŋ, a isɔɔ o isɔɔ maŋgalaa” lo. Yɛɛ o cho yɛ nda dimullo? O cho nda dimullo aa: “La nɔ siooŋii Mɛlɛkɛi, nduyɛ mi la ke ndu bɛɛleŋ. . .. La piɛi Wana toosiaa choo choo, a lɛŋndeŋ” ndo. (Sɔɔŋ. 14:​6, 7) Chɛhowa ndupilɛ kpe cho Mɛlɛka tonyaa, o wana o wana nɔ mbo piɛiyo ni. Ŋ nɔ bɔɔ balika melaa le mɛɛ o ke naa dikeŋnaŋ sɔvɛ sɔviɔɔ, le ndu piɛiyo o chiɛi ndɔ bɛndu wana chi a lehɔl te wo niŋ yɛ!

2. Yɛɛ chiɛi bɛndu Mɛlɛka wana chi a lehɔl te wo sim yɛ? (Tofa vɛlɛ kɔfoo hoo, “ Yɛɛ o Sim Yɛ Le?”)

² Yɛɛ kpeekpei cho yɛ chiɛi bɛndu Mɛlɛka wana chi a lehɔl te wo, nduyɛ kuɛɛ naŋ saaluŋ yɛ tɛɛsiaa a ndu okɔɔ? Chiɛiyo hoo cho chiɛi kpeekpei le. O sim le kɛɛsiaa Chɛhowa tosa le mi waŋnda piɛi ndu o nɛi o chɛllo choo, sanaa a sala baŋaa Chiisu wo. Mi kiilanɔɔ Pɔɔl tɛɛsiaa a kɛɛsiaa hoo okɔɔ o yau o poonyial Hibuluiya wo niŋ. Nduyɛ o Chudiaa niŋ Kilisiɔŋnda haa wa ni. b

3-4. Buulaŋ yɛɛ Pɔɔl ndoo nɔ yɛ le Kilisiɔŋaa Hibuluiyaa wa o Chudiaa niŋnda, nduyɛ vɛɛ o mala yɛ nda?

³ Le yɛɛ Pɔɔl ndoo poonyial lɛ Kilisiɔŋaa Hibuluiya yauwo? Wana che pɛ maa, le sabulaŋ latiɔɔŋ o poonyial nda yau koŋ ni. O tasoo, le nda kɔltaŋ dɛɛniaa. Kilisiɔŋaa kaŋ a bɔɔbɔɔ, o piɛile Chuuwa niŋ nda veluŋ ni. Lelaŋ, naapum mi simlachiaa  le piɛile leŋ ndaa mam nda, le mɛɛ nda simnuŋ Kilisiɔŋnda yɛ. Le yɛɛ? Kanifuule Kilisiɔŋnda ndaa nɔ chiɛi bɛndu le Mɛlɛka piɛiyo le, nduyɛ ndaa nɔ bandu luamaa lasala le salalaŋ solioo o Mɛlɛka lo le. O faŋaŋ okoŋ kɔɔli, ndaa nɔ vɛlɛ wanaa soliaa lasala le. Hei ndii tiuba mi i dii buɛiyaa Chiisuaa dialloŋ, vɛlɛ mi laalaŋ ndaa yɔŋnuŋ pɔmbɔlɔsɔɔ. (Hibu. 2:1; 3:​12, 14) Naapum, mi keŋ tosa mi apum yiyaŋ le ma miiŋguŋ o piɛile Chuuwa niŋ.

⁴ O diiŋ ndɔɔ, mi Pɔɔl dimul Kilisiɔŋaa kaŋ maa, a ve sɛmbɛ dɔwɔɔ le tonyala sɛnɛilaŋ ɔɔ tonyala yiŋgoloŋndaŋ biyɔɔ bila le. Tonyalaŋ ndaŋ la cho “nyɛdiaa sikpaa” o Diom Mɛlɛkaa niŋ ni. (Hibu. 5:​11-14) Wana che pɛ maa, Kilisiɔŋnda haa apum wa wɔ sawala Mɛlɛka ndoo ke Muuse laŋ diikɔŋndo. Mi Pɔɔl tɛɛsial nda maa, salala sawaa ndoo dimi le solioo laŋ, laa feŋa hakioo fiou mɛɛ Mɛlɛka ndoo yeema yɛ le. Lelaŋ, mi Mɛlɛka “kpeeŋa” sawa tase koŋ. Okoŋ, mi Pɔɔl hiau lachi a nda tonyala yiŋgoloŋndaŋ pɛɛkoo. Mbo loonuŋ chaaŋaa nduaa laalaŋnda a ‘tiindaŋ sɔvɛ’ nda nɔ mbo tualnuŋ o sala baŋaa Chiisu wo choo wo okɔɔ. Sala baŋaa hoo ndoo tiuba ni mbo mala nda ma “sɔɔŋguu [Mɛlɛka] ikɛi kpɛɛluŋ.”—Hibu. 7:​18, 19.

5. Yɛɛ naŋ nɔ yɛ miŋ bii bila o yau Hibuluiya wo niŋ, nduyɛ le yɛɛ?

⁵ Mi Pɔɔl tɛɛsial puaapiliaa nduaa Hibuluiya maa, mɛɛ nda wa niŋ Chɛhowa piɛiyo yɛ ndoo hiou bɛnda a mɛɛ ndaa piɛi ndu o paandoo niŋ yɛ. Mɛɛ Chuuwa ndaa piɛi Mɛlɛka o paandoo niŋ yɛ ndoo sim ‘lewundu le nyɛm [wa] hunɔɔ yɔŋnɔŋndoŋ.’ Nduyɛ “Kiliti cho nyɛ kpeekpeiyo ni.” (Kolo. 2:17) Wundule nyɔɔ sim nuaa maa nyɛ kpeekpeiyo le cho koŋ te. Lende koni, nɛi Chuuwa ndaa soliŋ kpeku le Mɛlɛka piɛiyo wo sim lewundu, le nyɛ kpeekpei wa hunɔɔ wo. Ŋ nɔ miŋ sina kɛɛsiaa Chɛhowa tosa le miŋ sɔla malɔɔ hakioo, vɛlɛ miŋ piɛi ndu o nɛi o chɛllo choo wo. Lelaŋ, a mɛɛ yau Hibuluiya tɛɛsiaa yɛ, ŋ tuunuŋ ndɔ ‘wunduleŋ,’ ndu cho yɛ mɛɛ Chuuwa ndaa piɛi Mɛlɛka yɛ ni, a “nyɛ kpeekpeiyo,” ndu cho yɛ mɛɛ Kilisiɔŋnda piɛi Mɛlɛka yɛ ni. Hei tosaa cho naa mala, miŋ bii chiɛi bɛndu Mɛlɛka wana chi a lehɔl te wo bila, vɛlɛ a mɛɛ o piiliaŋ naa yɛ.

6. Vɛɛ ndaa soliŋ yɛ tɛndii bɔŋaŋndo kpeku o sindɔɔ niŋ?

⁶ Mɛɛ Chuuwa ndaa piɛi Mɛlɛka yɛ. Suukaŋ Pɔɔllo ndoo tɔlnuŋ o tɛndii Muuse ndoo toosiaa a wɔsi 1512 Tuupa mi Chiisu Vialuŋ ndo choo. (Tofa kɔfoo hoo, “Mɛɛ Chuuwa Ndaa  Piɛi Mɛlɛka Yɛ, Mɛɛ Kilisiɔŋnda Piɛi Mɛlɛka Yɛ.”) Mi Isɔluɛiya ndaa kuɛ a tɛndiiyo hoo ba o ba ndaa wa pɛ kɔlaŋ. Ma soliŋ ndu kpeku le wɔsilaŋ sɔŋgɔ 500. A lo ndu soliŋndo kpeku haaa ma taŋgul chiɛi Mɛlɛkaa o Chulusalɛm niŋ. (Ɛsɔ. 25:​8, 9; Nɔm. 9:22) “Tɛndii bɔŋaŋndo” wa fondaŋ kpeekpei Isɔluɛiya ndaa kua le Mɛlɛka piɛiyo, vɛlɛ a le salalaŋ solioo o ndu lo wo ni. (Ɛsɔ. 29:​43-46) Kɛ tɛndiiyo hoo bɛɛ, ndoo sim lewundu le nyɛ sɔvɛ cheleŋ wa hunɔɔ le Kilisiɔŋnda wo.

7. Wɔsi kuɛɛ chiɛi bɛndu Mɛlɛka wana chi a lehɔl te wo kilaŋ yɛ?

⁷ Mɛɛ Kilisiɔŋnda piɛi Mɛlɛka yɛ. Tɛndiiyo o sindɔɔ niŋ wa ko maa ‘tamasioo a wunduleŋ le nyɛm waa choo choo.’ Nduyɛ, le chiɛi bɛndu Mɛlɛka wana chi a lehɔl te wo ndoo sim lewundu ni. Mi Pɔɔl dimi maa, “[tɛndii koŋ wa] maa tamasi le sɔɔŋ cho yɔŋnɔŋndo teleŋndo hoo woŋ.” (Hibu. 8:5; 9:9) Lelaŋ, a teleŋ o poonyial Hibuluiya yauwo hoo wo, chiɛi bɛndu Mɛlɛka wana chi a lehɔl te wo wa niŋ. A wɔsi 29 Boondii Chiisu Ve chiɛiyo hoo kilaŋ ni. O wɔsi koŋ niŋ Chiisu sɔla yiŋɔɔ ni, mi Mɛlɛka pɔya ndu a nyina diandaa, nduyɛ mbo kandu wallo maa “wana bɛndu wanaa soliaa [lasalaa]” le Chɛhowa, o chiɛi ndɔ bɛndu wana chi a lehɔl te wo niŋ. c—Hibu. 4:14; Walta. 10:​37, 38.

8-9. A mɛɛ Hibuluiya 7:​23-27 dimi yɛ, teŋgeŋ bɛndu kuɛɛ cho yɛ wanaa bɛnduaa wanaa soliaa lasalaa o Isɔluɛiya niŋ tɛɛŋ a Wana Bɛndu Wanaa Soliaa Lasalaa, Chiisu Kiliti?

⁸ Mɛɛ Chuuwa ndaa piɛi Mɛlɛka yɛ. Wana bɛndu wanaa soliaa lasalaa ndoo nɔ kuee mi ndoo sim wanaa Mɛlɛkaa lachi. Elɔŋ wa wana tasoo ni, o Chɛhowa hɛli le mbo wa wana bɛndu wanaa soliaa lasalaa wo. Nduyɛ a teleŋ nda wa tɛndiiyo yɔŋgoo o Chɛhowa lo wo o hɛli ndu ni. Kɛ a mɛɛ Pɔɔl tɛɛsiaa yɛ, “mi wanaa bɔɔbɔɔ simnuŋ wanaa soliaa lasalaa, kanifuule piɔmndo chɛl le mi wanaa wa o foofo koŋ nda hiou lachi le.” d (Nuawɔ Hibuluiya 7:​23-27.) Le mɛɛ nda wa wanaa lahakiaa yɛ, wanaa soliaa lasalaa haa bɛɛ ndaa nɔ ma soli salalaŋ le hakila ndalaŋ. Teŋgeŋ bɛndoo wa hoo waŋnda haa tɛɛŋ a Wana Bɛndu Wanaa Soliaa Lasalaa, Chiisu Kiliti ni.

⁹ Mɛɛ Kilisiɔŋnda piɛi Mɛlɛka yɛ. Chiisu Kiliti cho Wana Bɛndu Wanaa Soliaa Lasala naa ni. Nduyɛ, ndu cho “wallo . . . o tɛndii kpeekpeiyo niŋ ni. Chɛhowa pila simi tɛndiiyo hoo ni, o cho wanachiee le.” (Hibu. 8:​1, 2) Mi Pɔɔl tɛɛsiaa maa, “le mɛɛ [Chiisu] cho wa yoomu le fɛɛŋ a fɛɛŋ yɛ, wana o wana miiŋgu niŋ o foofo ndɔɔ le.” Mbo chɔɔlu dimi maa, “tɔɔyaŋ cho ndu choo le, [nduyɛ] o cho maa wanaa lahakiaa le.” Mbo dimi vɛlɛ maa Chiisu “heu ba le salalaŋ solioo lepaa o lepaa” le hakila ndɔlaŋ te. Ŋ pɛɛkuŋndɔ vɛlɛ a bandu luamaa lasalaa vɛlɛ a salala ndaa luam lechoo laŋ, miŋ che teŋgeŋ cho mɛɛ Chuuwa ndaa piɛi Mɛlɛka yɛ tɛɛŋ a mɛɛ Kilisiɔŋnda piɛi Mɛlɛka yɛ.

10. Yɛɛ salala ndaa luam o bandu luamaa lasalaa choo laŋ la sim yɛ?

¹⁰ Mɛɛ Chuuwa ndaa piɛi Mɛlɛka yɛ. O tɛndii Mɛlɛkaa hɔlndɔ, ndaa nɔ bandu luamaa lasalaa le salalaŋ lomɔɔ lechoo. (Ɛsɔ. 27:​1, 2; 40:29) Kɛ salala ndaa luam lechoo laŋ, laa tiuba mi la tosa mi waŋnda ndaa sɔla malɔɔ hakioo le hakila ndalaŋ kpou le. (Hibu. 10:​1-4) Hiouwɔɔ nda wa lachi a visiaa salalaŋ solioo o tɛndii Mɛlɛkaa niŋndo sim, le sala baŋaa ndoo  huŋ niŋ mbo soli waŋnda o chɛle hakioo niŋndo.

11. O bandu luamaa lasala kuɛɛ choo Chiisu yɔŋguŋ yɛ le mbo soliŋ sala? (Hibuluiya 10:​5-7, 10)

¹¹ Mɛɛ Kilisiɔŋnda piɛi Mɛlɛka yɛ. Chiisu ndoo sina maa, le mbo huŋ yɔŋgu yoomu ndɔɔ le waŋnda chieeya baŋaa Chɛhowa ndoo vem ndu o lɛŋndeŋ choo ni. (Maa. 20:28) Lelaŋ, mɛɛ o sɔla yiŋɔɔ, mbo yɔŋguŋ o Chɛhowa lo le hɛnaŋ ndɔɔ tosaa. (Chɔŋ 6:38; Kalee. 1:4) Mi Chiisu yɔŋguŋ ndupila o bandu luamaa lasala sim le “hɛnaŋ” Chɛhowaa wo choo. Nduyɛ hɛnaŋ Chɛhowaa wa ni, le mi Po ndɔɔ yɔŋgu yoomu ndɔ walaŋndo le yoomula waŋnda chieeya baŋaa. “Lepilɛ kpe” Chiisu soliŋ sala ni, le mi wanaa dɔu laalaŋndo o ndu niŋnda sɔla baŋaa. (Nuawɔ Hibuluiya 10:​5-7, 10.) Ŋ tofaŋndɔ vɛlɛ nyɛm cheleŋ wa o tɛndii Mɛlɛkaa niŋndoŋ, miŋ che mɛɛ ŋ wa ŋ sɔvɛ yɛ.

12. Nɛɛ yaa ndaa nɔ yɛ ma luɛi o Fondaŋ Diandaa a Fondaŋ Hiou Diondɔɔ Wo o tɛndii Mɛlɛkaa niŋ?

¹² Mɛɛ Chuuwa ndaa piɛi Mɛlɛka yɛ. Velaŋndo wa tɛndii Mɛlɛkaa tɛɛŋ a chiɛi ndɔ nda taŋgul Chulusalɛmndo. Tɛndii Mɛlɛkaa a chiɛi ndɔɔ o Chulusalɛm niŋ ndoo nɔ “Fondaŋ Diandaa,” a “Fondaŋ Hiou Diondɔɔ Wo.” Nduyɛ kola bɛndoo ndoo piɔu fondaŋndaŋ ndaŋ tɛɛŋ ni. (Hibu. 9:​2-5; Ɛsɔ. 26:​31-33) Ndaa nɔ tibiiyo, nyɛ kɛsiaa lambuiyo, a beedii ndaa ke Mɛlɛka wo o Fondaŋ Diandaa. Wanaa ndaa pɔya ma siiŋguu nda wanaa soliaa lasalaa wa kinɛi ndaa luɛi o fondaŋndo hoo ni, le wali Mɛlɛkaa tosaa. (Nɔm. 3:​3, 7, 10) Fondaŋ Hiou Diondɔɔ Wo ndoo nɔ kɔfu kpemaa o yikpaa kpede a kooliiyoŋ. Nduyɛ kɔfu koŋ ndoo chɔm ni maa Chɛhowa cho a nda latulu. (Ɛsɔ. 25:​21, 22) Wana  bɛndu wanaa soliaa lasalaa kinɛi ndoo nɔ ni mbo luɛi o fondaŋndo hoo lepilɛ o wɔsioo niŋ, le salalaŋ solioo le halikpeŋ mi Chɛhowa ndoo mal waŋnda haki. (Lɛvi. 16:​2, 17) Iwɔsi o iwɔsi, mi ndoo luɛi loŋ a kooma visiaa, le mbo soli salaa le hakila ndɔlaŋ a hakila waŋnda kpou. Mɛɛ teleŋ tiŋ hiou, mi Chɛhowa soliŋ nyina ndɔ diandaa kpeku, le naa chɔmndo nyɛ nyɛm wa o tɛndii ndɔɔ niŋndoŋ sim lewundu kpeekpeiyoŋ.—Hibu. 9:​6-8. e

13. Yɛɛ Fondaŋ Diandaa a Fondaŋ Hiou Diondɔɔ Wo o tɛndii Mɛlɛkaa niŋ sim yɛ le Kilisiɔŋnda?

¹³ Mɛɛ Kilisiɔŋnda piɛi Mɛlɛka yɛ. Buɛiyaa Kilitiaa nyɛɛmbɔ koni sɔla pɔyaŋndo a nyina diandaa ni, ma wa chaŋyɛi teŋgeŋnde tueiyɔɔ yeela a Chɛhowa. Nda cho Kilisiɔŋaa ŋwaŋ 144,000 ni. A cho lakɔ choo choo le ma wa latulu a Chiisu, vɛlɛ ma wa wanaa soliaa lasalaa. (Sɔɔŋ. 1:6; 14:1) Fondaŋ Diandaa o tɛndii Mɛlɛkaa niŋ sim le ŋwaŋ 144,000 Mɛlɛka hɛli, le ma wa chuauwaa nduaa wa, mi che bɛɛ a cho wɔ o lɛŋndeŋ choo. (Luomaŋ. 8:​15-17) Fondaŋ Hiou Diondɔɔ Wo o tɛndii Mɛlɛkaa niŋ, sim le choo choo, naa Chɛhowa cho wa. “Kola bɛndu” piɔu Fondaŋ Diandaa a Fondaŋ Hiou Diondɔɔ Wo tɛɛŋndo, sim le dialuŋ Chiisu woŋ. Kanifuule, ndoo tiuba mbo kuɛ choo choo a dialuŋ muŋ, maa Wana Bɛndu Soliaa Lasalaa o chiɛi bɛndu Mɛlɛka wana chi a lehɔl te wo niŋ te. Mɛɛ o soliŋ dialuŋ muŋ sala le waŋnda chieeya baŋaa, mbo kumbi nɛiyo le mi Kilisiɔŋaa pɔyaŋnda kpou kuɛ choo choo. Nduyɛ, le mi Kilisiɔŋnda haa bɛɛ sɔla fanda ndaa, a nɔ ma mɛi dialuŋ ndaŋ lɛŋ naŋ. (Hibu. 10:​19, 20; 1 Kɔliŋ. 15:50) Mɛɛ Chiisu miiŋgu yoomu, mbo luɛi o Fondaŋ Hiou Diondɔɔ Wo o chiɛi bɛndu Mɛlɛka wana chi a lehɔl te wo niŋ. Loŋ Kilisiɔŋaa pɔyaŋnda kpou cho ndu komal ni.

14. A mɛɛ Hibuluiya 9:​12, 24-26 dimi yɛ, mi Chɛhowa tosa kɛɛsiaa le mi waŋnda piɛi ndu o nɛi o chɛllo choo, sanaa a sala baŋaa Chiisu wo, wana bɛndu wanaa soliaa lasalaa. Le yɛɛ kɛɛsiaa hoo cho yɛ o sɔvɛ mbo hiau mɛɛ Chuuwa ndaa piɛi Mɛlɛka yɛ?

¹⁴ A tonya, kɛɛsiaa Chɛhowa tosa le mi waŋnda piɛi ndu o nɛi o chɛllo choo, sanaa a sala baŋaa Chiisu wo, wana bɛndu wanaa soliaa lasalaa, cho o sɔvɛ mbo hiau mɛɛ Chuuwa ndaa piɛi ndu yɛ. Mi wana bɛndu wanaa soliaa lasalaa o Isɔluɛi niŋ ndoo luɛi o Fondaŋ Hiou Diondɔɔ Wo, o tɛndii waŋnda chieeya ndaa toosiaa wo niŋ, a kooma visiaa le salalaŋ solioo. Kɛ Chiisu ndu ndu, “choo choo kɛsɛ kɛsɛ o luɛi ni,” fondaŋ hiou diondɔɔ kpou wo, le mbo sim Chɛhowa lachi. Loŋ o yɔŋgu sala ndɔ soliaŋndo ni le naa, le halikpeŋ mi ‘hakioo faŋaŋ.’ (Nuawɔ Hibuluiya 9:​12, 24-26.) Sala soliaŋ Chiisu wo kinɛi tiuba ni mbo faŋa hakioo lefafɛɛŋ. A mɛɛ naŋ cho niŋ hunɔɔ pɛɛku yɛ, o yɔŋ bɛɛ miŋ nɔ tiindaŋndo le kɔlaŋ choo choo ɔɔ le waa o lɛŋndeŋ choo, naa kpou tiuba miŋ piɛi Chɛhowa o chiɛi ndɔ bɛndu wana chi a lehɔl te wo niŋ.

15. Nɛɛ yaa ndaa tosa yɛ wallo o luŋ wa o tɛndii Mɛlɛkaa niŋndo?

¹⁵ Mɛɛ Chuuwa ndaa piɛi Mɛlɛka yɛ. Tɛndii Mɛlɛkaa ndoo nɔ luŋndo, a kpakioo ndu o balaa silɔ. O luŋ koŋ wanaa soliaa lasalaa ndaa tosa walta ndalaŋ ni. Nduyɛ bandu luamaa lasalaa wa loŋ. Hɛŋgɛiyo wa vɛlɛ loŋ le mi wanaa soliaa lasalaa ndaa dindiŋ, tuupa mi ndaa tosa wali Mɛlɛkaa. (Ɛsɔ. 30:​17-20; 40:​6-8) Chiɛi Mɛlɛka nda taŋgul okoŋ kɔɔli wo bɛɛ ndoo nɔ luŋndo. Loŋ wanaa ve bɛɛ wanaa soliaa lasala le wa ndaa sim ni, le Mɛlɛka piɛiyo.

16. Nɛɛ yaa cho yɛ Chɛhowa piɛiyo o luŋ cho o chiɛi ndɔ bɛndu wana chi a lehɔl te wo niŋ?

 ¹⁶ Mɛɛ Kilisiɔŋnda piɛi Mɛlɛka yɛ. Tuupa mi Kilisiɔŋaa pɔyaŋaa cho wɔ o lɛŋndeŋ choo wa kuɛ choo choo le ma wa wanaa soliaa lasalaa a Chiisu latulu, a cho hiouwɔɔ lachi a Chɛhowa piɛiyo o laalaŋndo choo, o luŋ cho o chiɛi ndɔ bɛndu wana chi a lehɔl te wo niŋ. Hɛŋgɛi wa o tɛndii Mɛlɛkaa niŋ a mɛŋndaŋ leniŋndo, cho nda vɛlɛ a Kilisiɔŋnda kpou loonɔŋndo maa, a nɔ ma wa a diandaa o kaalaŋ niŋ, vɛlɛ a Mɛlɛka o hɔl. Mɛɛ, kuɛɛ faŋga bɛndu cho pɔmbuaa Chiisuaa tooloo wo cho yɛ Chɛhowa piɛiyo? Mi kiilanɔɔ Chɔŋ cha nda “isisi kpeŋgbei lemasaa” lachi. Nduyɛ naa nda wa isisi wa sim, le luŋ ɔɔ fondaŋnda yɛ yɛlaŋ o chieeŋndo choo, naa nda cho Mɛlɛka “saŋgalaa idii a ichɔl o chiɛi ndɔɔ niŋ” nda. (Sɔɔŋ. 7:​9, 13-15) Ŋ cho bɔɔ a kɔl kɛndɛ, le mɛɛ naŋ nɔ foofo sɔviɔɔ o kɛɛsiaa Chɛhowa tosa, le ndu piɛiyo wo niŋ yɛ!

17. Salala kuɛɛ naŋ nɔ yɛ dikeŋnaŋndo le yɔŋgoo o Chɛhowa lo?

¹⁷ Hau, Kilisiɔŋnda nɔ dikeŋnaŋndo le salalaŋ solioo o Chɛhowa lo, sanaa a teleŋ ndaa, yoomuma ndaŋ, a nyɛ nda sɔlaa soliŋndo kpeku le Masale ndɔleŋ hivioo lachi. A mɛɛ kiilanɔɔ Pɔɔl dimul Kilisiɔŋaa Hibuluiya yɛ, ŋ nɔ miŋ ‘saŋgala Mɛlɛka teleŋ o teleŋ sanaa o Chiisu niŋ. Salaa hoo naŋ solul ndu ni. Koŋ cho ni, waŋnda dimullo kpendekele a diola ndɔlaŋ okɔɔ.’ (Hibu. 13:15) Ŋ chɔm maa ŋ chua dikeŋnaŋ naŋ nɔ le Chɛhowa piɛiyo wo o sɔvɛ, te ŋ tosa pɛ o naŋ tiuba wo o ndu piɛiyo niŋ.

18. A mɛɛ Hibuluiya 10:​22-25 dimi yɛ, ɔɔ sɔɔŋ ŋtiŋ ŋ naŋ nɔ miŋ wa tosaa teleŋ o teleŋ ndoŋ, nduyɛ yɛɛ naŋ nɔ yɛ miŋ puɛɛnuŋ te?

¹⁸ Nuawɔ Hibuluiya 10:​22-25. O mɛɛlula yau Pɔɔl poonyial Hibuluiya wo, mbo chɔm naa sɔɔŋ ŋtiŋ ŋ naŋ nɔ miŋ wa tosaa teleŋ o teleŋ o Chɛhowa piɛiyo niŋndoŋ. Sɔɔŋ muŋ ŋtiŋ cho ni, piɛileŋ o Chɛhowa lo, waŋnda dimullo a tiindaŋ naŋ nɔ wo okɔɔ, kɔlaŋ o bɔŋaŋndaŋ, vɛlɛ a dɛɛniaŋndo vellaa velle. “Kanifuule, [naa pila] cho chɔɔ maa paale Masanɔɔ le cho niŋ kpɛɛluŋ.” O yilaŋuŋ maalikɛinɔɔ chɔm kiilanɔɔ Chɔŋ ndoŋ mɛɛlulaŋ, mbo dimul ndu bɛmbɔɔ lediiŋ aa: “Mɛlɛka ŋ nɔ ni ma piɛi.” (Sɔɔŋ. 19:10; 22:9) Maa fɛɛŋ bɛɛ ŋ puɛɛnuŋ tonya yiŋgoloŋndo hoo a chiɛi bɛndu Chɛhowa wana chi a lehɔl te wo okɔɔ le. Nduyɛ, maa ŋ hiounuŋ lachi a dikeŋnaŋ naŋ nɔ le Mɛlɛka naa bɛndoo piɛiyo wo chuaa o sɔvɛ.