တၢ်မၤလိ ၄၅
ပာ်လုၢ်ပာ်ပှ့ၤ တၢ်ခွဲးတၢ်ယာ်လၢ နဘူၣ်ထီၣ်ဘါထီၣ်ဘၣ်တၢ်လၢ ယဟိဝၤယွၤ အနီၢ်သးတၢ်လုၢ်ဟံၣ်အပူၤ
“ဘူၣ်ထီၣ်ဘါထီၣ် တၢ်ဘၣ်တ့ကစၢ်လၢ အတ့လီၤမူခိၣ်, ဟီၣ်ခိၣ်.”—လီၣ် ၁၄:၇.
တၢ်သးဝံၣ် ၉၃ ဆိၣ်ဂ့ၤဘၣ် ပတၢ်အိၣ်ဖှိၣ်ရိဖှိၣ်
တၢ်မၤလိအံၤ အတၢ်တိာ်ပာ် a
၁. မူခိၣ်ကလူးတဂၤ တဲတၢ်ဂ့ၢ်မနုၤလဲၣ် ဒီးအတၢ်ကတိၤန့ၣ် ဘၣ်ထွဲဒီးပှၤဒ်လဲၣ်.
မူခိၣ်ကလူးတဂၤ မ့ၢ်ဟဲတဲတၢ်ဒီးနၤန့ၣ် နကဒိကနၣ် တၢ်လၢအတဲဝဲဧါ. ဆၢကတီၢ်ခဲအံၤ မူခိၣ်ကလူးတဂၤ တဲတၢ်ဒီး “ပှၤကိးကလုာ်ဒဲး, ကလုာ်ဒူၣ်ကိးဒူၣ်ဒဲး, ပှၤတဲတၢ်အကျိာ်ကိးကျိာ်ဒဲး ဒီးပှၤကိးဒူၣ်ဒဲး.” ဒီးအတဲဝဲလၢ “ပျံၤကစၢ်ယွၤ ဒီးဟ့ၣ်အီၤ တၢ်လၤကပီၤတက့ၢ် . . . ဘူၣ်ထီၣ်ဘါထီၣ် တၢ်ဘၣ်တ့ကစၢ်လၢ အတ့လီၤမူခိၣ်, ဟီၣ်ခိၣ်.” (လီၣ် ၁၄:၆, ၇) ယဟိဝၤယွၤန့ၣ် မ့ၢ်ယွၤလၢအမ့ၢ်အတီ ထဲတဂၤအဃိ ပကြၢးဘူၣ်ထီၣ်ဘါထီၣ်အီၤ. တကးဒံးဘၣ် ပစံးဘျုးဘၣ် ယဟိဝၤယွၤဒိၣ်မး လၢအဟ့ၣ်ပှၤတၢ်ခွဲးတၢ်ယာ်လၢ ပကဘူၣ်ထီၣ်ဘါထီၣ်အီၤ လၢနီၢ်သးတၢ်လုၢ်ဟံၣ်အပူၤ.
၂. ယဟိဝၤယွၤ အနီၢ်သးတၢ်လုၢ်ဟံၣ်န့ၣ် မ့ၢ်မနုၤလဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ တမ့ၢ်မနုၤဘၣ်လဲၣ်.”)
၂ နီၢ်သးတၢ်လုၢ်ဟံၣ်န့ၣ် မ့ၢ်မနုၤလဲၣ် ဒီးပဃုသ့ၣ်ညါအါထီၣ် ဘၣ်ဃးဒီးတၢ်ဂ့ၢ်အံၤ လီၤတံၢ်လီၤဆဲး ကသ့ဖဲလဲၣ်. နီၢ်သးတၢ်လုၢ်ဟံၣ်န့ၣ် တမ့ၢ်တၢ်လုၢ်ဟံၣ် အနီၢ်ကီၢ်တဖျၢၣ်လၢ ပှၤတ့ထီၣ်ဝဲဘၣ်. နီၢ်သးတၢ်လုၢ်ဟံၣ်န့ၣ် အကဲဝဲ ယဟိဝၤယွၤ အတၢ်ရဲၣ်တၢ်ကျဲၤတခါလၢ အတူၢ်လိာ်ဝဲ တၢ်ဘူၣ်ထီၣ်ဘါထီၣ်အီၤ ခီဖျိ ယ့ၣ်ၡူးအတၢ်ပှ့ၤက့ၤအဃိ. ဘၣ်ဃးဒီး နီၢ်သးတၢ်လုၢ်ဟံၣ်န့ၣ် တၢ်မၢဖိပီလူး တဲဖျါအါထီၣ်ဝဲလၢ အလံာ်ပရၢလၢအကွဲးဝဲ ဖဲတၢ်မၢဖိအစိၤ. ဒီးလံာ်ပရၢအံၤ အကွဲးန့ၢ်ဝဲ ပှၤဧ့ၤဘြံၤဖိ လၢအကဲထီၣ်ခရံာ်ဖိ လၢအအိၣ်လၢ ကီၢ်ယူဒၤအပူၤ. b
၃-၄. ပှၤဧ့ၤဘြံၤဖိ လၢအကဲထီၣ်ခရံာ်ဖိ လၢအအိၣ်လၢ ကီၢ်ယူဒၤအပူၤန့ၣ် ဘၣ်မနုၤအဃိ စီၤပီလူး ဘၣ်ယိၣ်န့ၢ်တၢ်လၢ အဝဲသ့ၣ် အဂီၢ်လဲၣ် ဒီးစီၤပီလူးမၤစၢၤ အဝဲသ့ၣ်ဒ်လဲၣ်.
၃ ဘၣ်မနုၤအဃိ စီၤပီလူးကွဲးန့ၢ် လံာ်ပရၢ ပှၤဧ့ၤဘြံၤဖိ လၢအကဲထီၣ်ခရံာ်ဖိ လၢအအိၣ်လၢ ကီၢ်ယူဒၤအပူၤလဲၣ်. စီၤပီလူးကွဲးန့ၢ် အဝဲသ့ၣ် လံာ်ပရၢန့ၣ် ခီဖျိလၢ တၢ်ဂ့ၢ်ခံထံၣ်အဃိ. တၢ, တချုးလၢ အဝဲသ့ၣ်ကဲထီၣ် ခရံာ်ဖိဒံးဘၣ်န့ၣ် အဝဲသ့ၣ်အိၣ်လၢ ပှၤယူဒၤဖိ အတၢ်ဘူၣ်တၢ်ဘါအပူၤ အဃိ စီၤပီလူးအဲၣ်ဒိး ဟ့ၣ်ဂံၢ်ဟ့ၣ်ဘါ အဝဲသ့ၣ်. ခီဖျိလၢ အဝဲသ့ၣ်ကဲထီၣ်ခရံာ်ဖိအဃိ အတၢ်ဘူၣ်တၢ်ဘါခိၣ်နၢ် လၢညါတဖၣ် တဲဆါအဝဲသ့ၣ်. တၢ်ဘူၣ်တၢ်ဘါခိၣ်နၢ်တဖၣ် တဲဆါအဝဲသ့ၣ် လၢတၢ်ဂ့ၢ်မနုၤအဃိလဲၣ်. ဆၢကတီၢ်ဖဲန့ၣ် ခရံာ်ဖိတဖၣ် တအိၣ်ဒီးတၢ်လုၢ်ဟံၣ်လၢ ကလဲၤဘူၣ်ထီၣ်ဘါထီၣ်တၢ် အဂီၢ်ဘၣ် ဒီးအဝဲသ့ၣ် အတၢ်လုၢ်လီၢ်လၢ ကလုၢ်ထီၣ်တၢ်လၢ ကစၢ်ယွၤအအိၣ်န့ၣ် တအိၣ်စ့ၢ်ကီးဘၣ်. တကးဒံးဘၣ် အဝဲသ့ၣ်တအိၣ်ဒီး ပှၤလုၢ်တၢ်ဒိၣ်တဖၣ်လၢ ကလုၢ်ထီၣ်န့ၢ်တၢ်လၢ အဝဲသ့ၣ်အဂီၢ်ဘၣ်. အဃိ ခရံာ်အပျဲၢ်အဘီၣ်တဖၣ်န့ၣ် အသးဟးဂီၤ ဒီးအတၢ်နာ်လီၤစၢ်ဝဲသ့. (ဧ့ၤ ၂:၁; ၃:၁၂, ၁၄) ဘၣ်သ့ၣ်သ့ၣ် အဝဲသ့ၣ်တနီၤ ကဆိကမိၣ်ဝဲလၢ အမ့ၢ်က့ၤကဒါလၢ ယူဒၤ အတၢ်ဘူၣ်တၢ်ဘါအပူၤန့ၣ် ကဂ့ၤဒိၣ်ဒံး.
၄ ခံ, စီၤပီလူးတဲဘၣ် ပှၤဧ့ၤဘြံၤဖိ လၢအကဲထီၣ် ခရံာ်ဖိတဖၣ်လၢ အဝဲသ့ၣ်တကျဲးစၢး ဃုသ့ၣ်ညါနၢ်ပၢၢ် တၢ်ဂ့ၢ်အသီ ဒီးတၢ်မ့ၢ်တၢ်တီလၢ အဒိၣ်အယိာ် ဒ်သိးဒီး “တၢ်အီၣ် အသံးအကာ်” လၢအအိၣ်လၢ လံာ်စီဆှံအပူၤ မူာ်မူာ်နီၢ်နီၢ်ဘၣ်. (ဧ့ၤ ၅:၁၁-၁၄) ပထံၣ်ဘၣ်လၢ ပှၤလၢအဝဲသ့ၣ်အကျါတနီၤန့ၣ် မၤထွဲဝဲ စီၤမိၤၡ့ အတၢ်သိၣ်တၢ်သီဒံး. ဒီးစီၤပီလူးတဲဘၣ် အဝဲသ့ၣ်ပျီပျီလၢ စီၤမိၤၡ့တၢ်သိၣ်တၢ်သီ လၢအမ့ၢ် တၢ်လုၢ်တၢ်ပာ်န့ၣ် မၤလီၤမၢ်ကွံာ် ပှၤဟီၣ်ခိၣ်ဖိ အတၢ်ဒဲးဘးခဲလၢာ် တသ့ဘၣ်. အဃိ စီၤမိၤၡ့ အတၢ်သိၣ်တၢ်သီန့ၣ် “ဘၣ်တၢ်မၤကတၢၢ်ကွံာ်အီၤ” လံ. ဝံၤဒီး စီၤပီလူးသိၣ်လိအဝဲသ့ၣ် တၢ်မ့ၢ်တၢ်တီ အဒိၣ်အယိာ်တနီၤ လၢအအိၣ်လၢ လံာ်စီဆှံပူၤ. စီၤပီလူး တဲပၠးအဝဲသ့ၣ် ဘၣ်ဃးဒီး “တၢ်မုၢ်လၢ်လၢ အဂ့ၤဒိၣ်ဝဲတခါ.” တၢ်မုၢ်လၢ်လၢ အဂ့ၤဒိၣ်ဝဲတခါအံၤ အိၣ်ထီၣ် ခီဖျိလၢ ယ့ၣ်ၡူးအတၢ်ဟ့ၣ်လုၢ်ထီၣ်သးအဃိ ဒီးတၢ်မုၢ်လၢ်အံၤ ကမၤစၢၤအဝဲသ့ၣ်ဒ်သိး အဝဲသ့ၣ်က “ဘူးထီၣ်ဒီးကစၢ်ယွၤ” အဂီၢ်.—ဧ့ၤ ၇:၁၈, ၁၉.
၅. လၢလံာ်ဧ့ၤဘြံၤအပူၤန့ၣ် ပကဘၣ်နၢ်ပၢၢ် တၢ်ဂ့ၢ်မနုၤလဲၣ် ဒီးဘၣ်မနုၤအဃိလဲၣ်.
၅ စီၤပီလူးၡဲပၠး ဧ့ၤဘြံၤဒီပုၢ်ဝဲၢ်မုၣ်ခွါတဖၣ်လၢ ခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ ခဲအံၤန့ၣ် ဂ့ၤဒိၣ်န့ၢ် ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ လၢအပူၤကွံာ်ဒံး. ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤန့ၣ် ကဲဝဲ “တၢ်အကဒုလၢ အပာ်ဖျါထီၣ် တၢ်လၢအကဟဲခါဆူညါလီၤ. ဘၣ်ဆၣ် တၢ်လၢအမ့ၢ်တၢ်နီၢ်ကီၢ်န့ၣ် မ့ၢ်ဝဲခရံာ်.” (ကလီး ၂:၁၇) တၢ်အကဒုန့ၣ် အကဲဝဲ တၢ်အက့ၢ်အဂီၤတခါလၢ ပထံၣ်အီၤတၡဲဘၣ် အဃိ တၢ်အကဒုန့ၣ် တမ့ၢ်ဝဲ တၢ်နီၢ်ကီၢ်ဘၣ်. ဒ်န့ၣ်အသိး ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤန့ၣ် အကဲထီၣ်ဝဲ တၢ်အကဒု မ့ၢ်လၢ တၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤလၢ အဂ့ၤန့ၢ်အီၤန့ၣ် ဟဲတုၤဝဲအဃိ. ဒ်သိး ယဟိဝၤယွၤ ကပျၢ်ပတၢ်ဒဲးဘး ဒီးကတူၢ်လိာ် ပတၢ်ဘူၣ်ထီၣ်ဘါထီၣ်အဂီၢ် ပကဘၣ်နၢ်ပၢၢ် အတၢ်ရဲၣ်တၢ်ကျဲၤ အိၣ်ဝဲဒ်လဲၣ်အဂ့ၢ်. အဃိ ခဲအံၤ ပကထိၣ်သတြီၤကွၢ် “တၢ်အကဒု” (ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ) ဒီး “တၢ်နီၢ်ကီၢ်” (ခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ) လၢလံာ်ဧ့ၤဘြံၤ ပာ်ဖျါထီၣ်ဝဲ. ပမ့ၢ်မၤဒ်န့ၣ်န့ၣ် ပကနၢ်ပၢၢ်ထီၣ် နီၢ်သးတၢ်လုၢ်ဟံၣ် ဒီးပကနၢ်ပၢၢ်လၢ နီၢ်သးတၢ်လုၢ်ဟံၣ်အံၤ အဘၣ်ထွဲဒီးပှၤဒ်လဲၣ်အဂ့ၢ်.
ဒဲစီဆှံ
၆. ဒဲစီဆှံန့ၣ် ပှၤသူအီၤလၢ မနုၤအဂီၢ်လဲၣ်.
၆ ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. စီၤပီလူးၡဲပၠးဝဲ ဒဲစီဆှံတဖျၢၣ်အဂ့ၢ် လၢစီၤမိၤၡ့တ့ထီၣ်ဝဲဖဲ ချ.ခ.န ၁၅၁၂. (ကွၢ်တၢ်မၤနီၣ်မၤဃါလၢ “ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ—ခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ.”) “တၢ်အိၣ်ဖှိၣ်အဒဲ” မ့တမ့ၢ် ဒဲစီဆှံန့ၣ် အကဲဝဲ တၢ်လီၢ်တခါလၢ ပှၤအံၣ်စရ့လးဖိတဖၣ် ကဘူၣ်ထီၣ်ဘါထီၣ် ယဟိဝၤယွၤ ဒီးကလုၢ်ထီၣ်တၢ်အဂီၢ်. (၂ မိၤ ၂၉:၄၃-၄၆) တၢ်အိၣ်ဖှိၣ်အဒဲလၢ အမ့ၢ်ဒဲစီဆှံန့ၣ် မ့ၢ်ဝဲဒဲတဖျၢၣ်လၢ ပှၤစိာ်ထီၣ်စိာ်လီၤဝဲညီ အဃိ ဖဲပှၤအံၣ်စရ့လးဖိတဖၣ် သုးလီၢ်သုးကျဲအခါ အဝဲသ့ၣ်လဲၤစိာ်ဃုာ်ဝဲဒီး ဒဲစီဆှံ. ပှၤအံၣ်စရ့လးဖိသူဝဲ ဒဲစီဆှံအံၤ တုၤလီၤလၢ ပှၤတ့ထီၣ်ဝဲ တၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤဝံၤဝဲ. အဃိ ပှၤအံၣ်စရ့လးဖိ သူဝဲဒဲစီဆှံန့ၣ် ဘူးကအိၣ်အနံၣ် ၅၀၀ ညါ. (၂ မိၤ ၂၅:၈, ၉; ၄ မိၤ ၉:၂၂) ဒီးဒဲစီဆှံအံၤ ဒိလီၤဝဲ တၢ်ဂ့ၤဒိၣ်မးတမံၤလၢ ကဟဲအိၣ်ထီၣ်လၢ ခရံာ်ဖိတဖၣ်အဂီၢ်.
၇. နီၢ်သးတၢ်လုၢ်ဟံၣ်န့ၣ် စးထီၣ်အိၣ်ထီၣ်အခါဖဲလဲၣ်.
၇ ခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. ဒဲစီဆှံလၢပျၢၤတဖျၢၣ်န့ၣ် ကဲဝဲ “တၢ်အကဒုလၢ အပာ်ဖျါထီၣ် တၢ်လၢအဘၣ်ဃးဒီးမူခိၣ်” ဒီးအဲၣ်ဒိးဒိလီၤဝဲ ယဟိဝၤယွၤ အနီၢ်သးတၢ်လုၢ်ဟံၣ်. စီၤပီလူးတဲဝဲလၢ “ဒဲအံၤ [မ့တမ့ၢ် ဒဲစီဆှံ] မ့ၢ်တၢ်အဒိအတဲာ်လၢ ဆၢကတီၢ်ခဲအံၤ အဂီၢ်.” (ဧ့ၤ ၈:၅; ၉:၉) အဃိ ဖဲစီၤပီလူး ကွဲးလံာ်ပရၢလၢ ပှၤဧ့ၤဘြံၤဖိတဖၣ် အအိၣ်အခါ နီၢ်သးတၢ်လုၢ်ဟံၣ်န့ၣ် ဟဲအိၣ်ထီၣ်လၢ ခရံာ်ဖိတဖၣ်အဂီၢ်လံ. နီၢ်သးတၢ်လုၢ်ဟံၣ်န့ၣ် စးထီၣ်အိၣ်ထီၣ်ဖဲ ခ.န ၂၉, ဖဲယ့ၣ်ၡူးဒိးဘျၢထံ အဆၢကတီၢ် ဒီးဖဲယဟိဝၤယွၤ ဒိးဖှူအီၤ လၢသးစီဆှံအခါ. အဃိ ယ့ၣ်ၡူးမၤတၢ်ဒ် ယဟိဝၤယွၤအ “ပှၤလုၢ်တၢ်ခိၣ် အဒိၣ်ကတၢၢ်” လၢနီၢ်သးတၢ်လုၢ်ဟံၣ်အပူၤ. c—ဧ့ၤ ၄:၁၄; မၤတၢ် ၁၀:၃၇, ၃၈.
ပှၤလုၢ်တၢ်ခိၣ် အဒိၣ်ကတၢၢ်
၈-၉. အံၣ်စရ့လး အပှၤလုၢ်တၢ်ခိၣ် အဒိၣ်ကတၢၢ် လီၤဆီလိာ်အသးဒီး ပှၤလုၢ်တၢ်ခိၣ် အဒိၣ်ကတၢၢ် လၢအမ့ၢ် ယ့ၣ်ၡူးန့ၣ်ဒ်လဲၣ်. (ဧ့ၤဘြံၤ ၇:၂၃-၂၇)
၈ ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. ပှၤလုၢ်တၢ်ခိၣ် အဒိၣ်ကတၢၢ်တဂၤ ဒိးန့ၢ်ဘၣ်မူဒါလၢ ကမၤတၢ်လၢ ပှၤဂီၢ်မုၢ်အခၢၣ်စး လၢကစၢ်ယွၤအမဲာ်ညါ. ပှၤအံၣ်စရ့လးဖိ အပှၤလုၢ်တၢ်ခိၣ် အဒိၣ်ကတၢၢ် လၢအမ့ၢ်စီၤအၤဟရိၣ်န့ၣ် ယဟိဝၤယွၤ ဃုထၢထီၣ်အီၤ ဖဲပှၤပာ်စီဆှံဝဲ ဒဲစီဆှံအဆၢကတီၢ်. ဘၣ်ဆၣ်စီၤပီလူး ပာ်ဖျါထီၣ်ဝဲလၢ “ပှၤလုၢ်တၢ်ဒိၣ်တဖၣ် သံဝဲအဃိ အဝဲသ့ၣ် ဆဲးမၤပှၤလုၢ်တၢ်ဒိၣ် အတၢ်မၤတသ့လၢၤဘၣ်. လၢတၢ်န့ၣ်အဃိ ပှၤလုၢ်တၢ်ဒိၣ် လၢအဂၤတဖၣ် ကဘၣ်ထီၣ်လၢအလီၢ် ဒီးဆဲးမၤက့ၤတၢ်.” d (ဖး ဧ့ၤဘြံၤ ၇:၂၃-၂၇.) ဒီးပှၤလုၢ်တၢ်ခိၣ် အဒိၣ်ကတၢၢ်စ့ၢ်ကီး မ့ၢ်ဝဲပှၤတလၢတပှဲၤဘၣ်အဃိ အဘၣ်လုၢ်ထီၣ်တၢ်လၢ အနီၢ်ကစၢ် အတၢ်ဒဲးဘးအဂီၢ်. အဃိ ပှၤအံၣ်စရ့လးဖိ အပှၤလုၢ်တၢ်ခိၣ် အဒိၣ်ကတၢၢ်န့ၣ် လီၤဆီလိာ်သးဒီး ပှၤလုၢ်တၢ်ခိၣ် အဒိၣ်ကတၢၢ် လၢအမ့ၢ်ယ့ၣ်ၡူးခရံာ်န့ၣ် ဖးဒိၣ်ညါ.
၉ ခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. ပှၤလုၢ်တၢ်ခိၣ် အဒိၣ်ကတၢၢ် လၢအမ့ၢ် ယ့ၣ်ၡူးခရံာ်န့ၣ် “အဝဲမ့ၢ်ဝဲ ဒဲနီၢ်ကီၢ် အတၢ်လီၢ်စီဆှံကတၢၢ်န့ၣ် အခ့အပှၤလီၤ. ဒဲအံၤ ယဟိဝၤယွၤ သူၣ်ထီၣ်ဝဲဒီး တမ့ၢ်လၢ ပှၤဟီၣ်ခိၣ်ဖိ သူၣ်ထီၣ်ဝဲဘၣ်.” (ဧ့ၤ ၈:၁, ၂) စီၤပီလူး ပာ်ဖျါထီၣ်ဝဲလၢ “ဘၣ်ဆၣ် မ့မ့ၢ်ယ့ၣ်ၡူးန့ၣ် မူဝဲလီၤထူလီၤယိာ်အဃိ ပှၤတလိၣ်ကဲထီၣ် ပှၤလုၢ်တၢ်ဒိၣ် လၢအလီၢ်နီတဂၤဘၣ်.” စီၤပီလူး ဆဲးတဲဝဲလၢ ယ့ၣ်ၡူးန့ၣ် “အတဘၣ်အၢဘၣ်သီဘၣ်” ဒီး “အလီၤဆီဒီး ပှၤတၢ်ဒဲးဘးဖိတဖၣ်.” ဒီးယ့ၣ်ၡူးန့ၣ်တလီၤဂာ် ဒ်ပှၤလုၢ်တၢ်ခိၣ် အဒိၣ်ကတၢၢ် အဂၤတဖၣ် အသိးဘၣ်အဃိ “အဝဲတလိၣ်ဟ့ၣ်လုၢ်ထီၣ်တၢ် ကိးနံၤဒဲး” လၢအတၢ်ဒဲးဘးအဂီၢ်ဘၣ်. ခဲအံၤ ပကတဲသကိး ဘၣ်ဃးဒီး တၢ်လုၢ်လီၢ် ဒီးတၢ်ဟ့ၣ်လုၢ်ထီၣ်တဖၣ်လၢ ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ ဒီးခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤန့ၣ် လီၤဆီလိာ်သးဒ်လဲၣ်အဂ့ၢ်.
တၢ်လုၢ်လီၢ် ဒီးတၢ်ဟ့ၣ်လုၢ်ထီၣ်တဖၣ်
၁၀. တၢ်လုၢ်လၢ ပှၤလုၢ်ထီၣ်အီၤလၢ တၢ်လုၢ်လီၢ်လၢ တိၢ်ဘီန့ၣ် ဒုးသ့ၣ်ညါ ပှၤတၢ်ဂ့ၢ်မနုၤလဲၣ်.
၁၀ ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. ဖဲဒဲစီဆှံအကျဲနုာ်လီၤ အမဲာ်ညါန့ၣ် အိၣ်ဝဲဒီးတၢ်လုၢ်လီၢ်လၢ ပှၤတ့အီၤလၢတိၢ်ဘီ. ပှၤသူဝဲတၢ်လုၢ်လီၢ်အံၤ ဒ်သိးကလုၢ်ထီၣ် ဆၣ်ဖိကီၢ်ဖိလၢ ယဟိဝၤယွၤအအိၣ်. (၂ မိၤ ၂၇:၁, ၂; ၄၀:၂၉) ဘၣ်ဆၣ် တၢ်လုၢ်ထီၣ်တဖၣ်အံၤ ပျၢ်ကွံာ် ပှၤဟီၣ်ခိၣ်ဖိအတၢ်ဒဲးဘး လီၤထူလီၤယိာ်တန့ၢ်ဘၣ်. (ဧ့ၤ ၁၀:၁-၄) ခီဖျိလၢ ပှၤဘၣ်လုၢ်ထီၣ်ဝဲ ဆၣ်ဖိကီၢ်ဖိတဖၣ် ထီဘိအဃိ ပာ်ဖျါထီၣ်ဝဲလၢ မုၢ်ကအိၣ်ဝဲတနံၤ တၢ်လုၢ်ထီၣ်တၢ် လၢအဂ့ၤဒိၣ်န့ၢ်အန့ၣ် ကအိၣ်တခါ. ဒီးတၢ်လုၢ်ထီၣ်တၢ် တခါအံၤ မၤထူၣ်ဖျဲးထီၣ် ပှၤဟီၣ်ခိၣ်ဖိလၢ တၢ်ဒဲးဘး ဒီးတၢ်သံလီၤထူလီၤယိာ်သ့.
၁၁. ယ့ၣ်ၡူးဟ့ၣ်လုၢ်ထီၣ်အသး လၢတၢ်လုၢ်လီၢ် မနုၤအလိၤလဲၣ်. (ဧ့ၤဘြံၤ ၁၀:၅-၇, ၁၀)
၁၁ ခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. ယ့ၣ်ၡူးသ့ၣ်ညါဝဲလၢ ယဟိဝၤယွၤဆှၢလီၤအီၤလၢ ဟီၣ်ခိၣ်ချၢ ဒ်သိးအကဟ့ၣ်လုၢ်ထီၣ် အသးသမူလၢ ပှၤဟီၣ်ခိၣ်ဖိအဂီၢ်. (မး ၂၀:၂၈) အဃိ ဖဲအဝဲဒိးဘျၢထံအခါ အပာ်ဖျါထီၣ်လၢ အဟ့ၣ်လီၤအသးလၢ အကမၤယဟိဝၤယွၤ အတၢ်ဘၣ်သး. (ယိၤ ၆:၃၈; ကလၤ ၁:၄) ဖဲန့ၣ်အခါ လီၤဂာ်ဒ်သိး ယ့ၣ်ၡူး ဟ့ၣ်လုၢ်ထီၣ်အသးလၢ တၢ်လုၢ်လီၢ်လၢ အဘၣ်တၢ်ဒိလီၤအီၤ လၢအမ့ၢ် ယဟိဝၤယွၤအ “တၢ်ဘၣ်သး.” ကစၢ်ယွၤ အတၢ်ဘၣ်သးန့ၣ် မ့ၢ်ဝဲဒ်သိး ယ့ၣ်ၡူးကဟ့ၣ်လုၢ်ထီၣ် အသးသမူအလၢအပှဲၤလၢ ပှၤဟီၣ်ခိၣ်ဖိတဖၣ်အဂီၢ်. ယ့ၣ်ၡူးဟ့ၣ်လုၢ်ထီၣ် အသးသမူ “ထဲတဘျီ” န့ၣ်ပျၢ်ကွံာ် မ့တမ့ၢ် ကျၢၢ်ဘၢဝဲ ပှၤလၢအစူၢ်က့ၤနာ်က့ၤ ယ့ၣ်ၡူးခရံာ် အတၢ်ဒဲးဘး လီၤထူလီၤယိာ်. (ဖး ဧ့ၤဘြံၤ ၁၀:၅-၇, ၁၀.) ခဲအံၤ ပကဆဲးမၤလိအါထီၣ် ဘၣ်ဃးဒီး တၢ်အိၣ်လၢ ဒဲစီဆှံအပူၤအဂ့ၢ်.
တၢ်စီဆှံအလီၢ် ဒီးတၢ်လီၢ်စီဆှံကတၢၢ်
၁၂. တၢ်စီဆှံအလီၢ် ဒီးတၢ်လီၢ်စီဆှံကတၢၢ်လၢ ဒဲစီဆှံအပူၤန့ၣ် မတဂၤသ့ၣ်တဖၣ် လဲၤနုာ်လီၤဝဲသ့လဲၣ်.
၁၂ ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. ဒဲစီဆှံ ဒီးတၢ်လုၢ်ဟံၣ်လၢ ပှၤတ့ထီၣ်က့ၤအီၤလၢ ဝ့ၢ်ယရူၤၡလ့ၣ်တဖျၢၣ်န့ၣ် အလီၤဂာ်လိာ်သး. လၢဒဲစီဆှံ ဒီးတၢ်လုၢ်ဟံၣ်အပူၤန့ၣ် အိၣ်ဒီး တၢ်လီၢ်ခံတီၤ လၢအမ့ၢ် “တၢ်စီဆှံအလီၢ်” ဒီး “တၢ်လီၢ်စီဆှံကတၢၢ်.” ဒီးလၢတၢ်လီၢ်ခံတီၤအံၤ အဘၢၣ်စၢၤန့ၣ်အိၣ်ဒီး ယၣ်ဘျးသဒၢတဘ့ၣ်. (ဧ့ၤ ၉:၂-၅; ၂ မိၤ ၂၆:၃၁-၃၃) ဖဲတၢ်စီဆှံအလီၢ်န့ၣ် အိၣ်ဝဲဒီး မ့ၣ်အူဒၢထူ, တၢ်လုၢ်လီၢ်လၢ တၢ်ဒွဲၣ်ထီၣ်တၢ်နၢမူအဂီၢ်, စီၢ်နီၤခိၣ်လၢအိၣ်ဒီးကိၣ်လၢ တၢ်လုၢ်ထီၣ်တၢ်အဂီၢ်. ထဲဒၣ် “ပှၤလုၢ်တၢ်ဒိၣ်လၢ ဘၣ်တၢ်ဒိးဖှူအီၤတဖၣ်” လဲၤနုာ်လီၤဝဲလၢ တၢ်စီဆှံအလီၢ် ဒ်သိးကမၤဝဲ တၢ်မၤစီဆှံအဂီၢ်. (၄ မိၤ ၃:၃, ၇, ၁၀) မ့မ့ၢ်လၢ တၢ်လီၢ်စီဆှံကတၢၢ်အပူၤန့ၣ် အိၣ်ဒီး တၢ်အၢၣ်လီၤအီလီၤ အတလါစီဆှံ လၢဒိလီၤဝဲလၢ ယဟိဝၤယွၤ အိၣ်ဝဲဖဲန့ၣ်. (၂ မိၤ ၂၅:၂၁, ၂၂) လၢတၢ်လီၢ်စီဆှံကတၢၢ်အပူၤန့ၣ် ထဲဒၣ်ပှၤလုၢ်တၢ်ခိၣ် အဒိၣ်ကတၢၢ်တဂၤ လဲၤနုာ်လီၤဝဲသ့ ဒီးနုာ်လီၤဝဲထဲတနံၣ်တသီ ဖဲတၢ်မၤဘၣ်လိာ်ဖိးဒ့က့ၤတၢ် အမုၢ်နံၤ. (၃ မိၤ ၁၆:၂, ၁၇) ဖဲန့ၣ်အခါ ပှၤလုၢ်တၢ်ခိၣ် အဒိၣ်ကတၢၢ် ကဘၣ်လုၢ်ထီၣ်ဝဲ ဆၣ်ဖိကီၢ်ဖိအသွံၣ် ဒ်သိးအနီၢ်ကစၢ် ဒီးပှၤအံၣ်စရ့လးဖိခဲလၢာ် အတၢ်ဒဲးဘး ကပျၢ်ကွံာ်အဂီၢ်. လၢခံယဟိဝၤယွၤ သူဝဲအသးစီဆှံ ဒ်သိးကဒုးနၢ်ပၢၢ်ပှၤ တၢ်အိၣ်လၢ ဒဲစီဆှံအပူၤတဖၣ် အခီပညီ.—ဧ့ၤ ၉:၆-၈.
၁၃. တၢ်စီဆှံအလီၢ် ဒီးတၢ်လီၢ်စီဆှံကတၢၢ် လၢဒဲစီဆှံအပူၤန့ၣ် ဒိလီၤဝဲ မနုၤလဲၣ်.
၁၃ ခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. ထဲဒၣ်ခရံာ်ဖိစှၤဂၤန့ၣ် အဝဲသ့ၣ် ဘၣ်တၢ်ဒိးဖှူအီၤ လၢသးစီဆှံအဃိ အဝဲသ့ၣ်အိၣ်ဒီး တၢ်ရ့လိာ်သးဒီးယဟိဝၤယွၤ လီၤလီၤဆီဆီ. ပှၤလၢ အဘၣ်တၢ်ဃုထၢထီၣ်အီၤတဖၣ်အံၤ အနီၣ်ဂံၢ် အိၣ်ဝဲ ၁၄၄,၀၀၀ ဒီးပှၤတဖၣ်အံၤ ကမၤသကိးတၢ်ဒီး ယ့ၣ်ၡူး လၢမူခိၣ် ဒ်ပှၤလုၢ်တၢ်ဒိၣ်တဖၣ်အသိး. (လီၣ် ၁:၆; ၁၄:၁) တၢ်စီဆှံအလီၢ် လၢဒဲစီဆှံအပူၤန့ၣ် ဒိလီၤဝဲ ပှၤလၢအဘၣ်တၢ်ဒိးဖှူအီၤတဖၣ် အတၢ်အိၣ်သး လၢအမ့ၢ် ဖဲအဝဲသ့ၣ် အိၣ်ဒံးလၢဟီၣ်ခိၣ်ချၢအခါ ကစၢ်ယွၤ လုၢ်ဖိအဝဲသ့ၣ် ဒ်အဖိလၢနီၢ်သးတခီ. (ရိ ၈:၁၅-၁၇) မ့မ့ၢ်လၢ တၢ်လီၢ်စီဆှံကတၢၢ် လၢဒဲစီဆှံအပူၤန့ၣ် ဒိလီၤဝဲ မူခိၣ် လၢအမ့ၢ် ယဟိဝၤယွၤ အိၣ်ဝဲအလီၢ်. ဒီး “ယၣ်ဘျးသဒၢ” လၢအအိၣ်လၢ တၢ်စီဆှံအလီၢ် ဒီးတၢ်လီၢ်စီဆှံကတၢၢ်အဘၢၣ်စၢၤန့ၣ် ဒိလီၤဝဲ ယ့ၣ်ၡူးအနီၢ်ခိ. ယ့ၣ်ၡူးအနီၢ်ခိန့ၣ် တြီဃာ်အီၤဒ်သိး အသုတလဲၤထီၣ်လၢမူခိၣ် ဒ်ပှၤလုၢ်တၢ်ခိၣ် အဒိၣ်ကတၢၢ် လၢနီၢ်သးတၢ်လုၢ်ဟံၣ်အပူၤတဂ့ၤအဂီၢ်. မ့ၢ်လၢယ့ၣ်ၡူး ဟ့ၣ်လုၢ်ထီၣ်အနီၢ်ခိအံၤ ဒ်တၢ်လုၢ်လၢပှၤဟီၣ်ခိၣ်ဖိအဂီၢ် အဃိ ကျဲအိးထီၣ်အသးလၢ ပှၤလၢအဘၣ်တၢ်ဒိးဖှူအီၤတဖၣ် ကလဲၤထီၣ်ဘၣ်လၢမူခိၣ်. အဝဲသ့ၣ်စ့ၢ်ကီး ဒ်သိးအကလဲၤထီၣ်ဘၣ်လၢမူခိၣ်အဂီၢ် အဝဲသ့ၣ် ဘၣ်ပာ်တ့ၢ်ကွံာ် အနီၢ်ခိ. (ဧ့ၤ ၁၀:၁၉, ၂၀; ၁ ကရံၣ် ၁၅:၅၀) ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ အဝဲလဲၤနုာ်လီၤလၢ နီၢ်သးတၢ်လုၢ်ဟံၣ်လၢ တၢ်လီၢ်စီဆှံကတၢၢ်တတီၤ ဒီးပှၤလၢအဘၣ်တၢ်ဒိးဖှူအီၤတဖၣ်စ့ၢ်ကီး လၢခံအဝဲသ့ၣ် ကလဲၤဝဲဖဲန့ၣ်.
၁၄. တၢ်ဘူၣ်ထီၣ်ဘါထီၣ် ယဟိဝၤယွၤ လၢနီၢ်သး အတၢ်လုၢ်ဟံၣ်န့ၣ် ဘၣ်မနုၤအဃိ အဂ့ၤဒိၣ်န့ၢ်ဒံး တၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤလၢ အပူၤကွံာ်လဲၣ်. (ဧ့ၤဘြံၤ ၉:၁၂, ၂၄-၂၆)
၁၄ ဖဲအံၤ ပသ့ၣ်ညါဘၣ် လီၤတံၢ်လၢ တၢ်ဘူၣ်တၢ်ဘါစီဆှံ လၢယဟိဝၤယွၤ ရဲၣ်ကျဲၤဝဲ အသီတခါအံၤ အဂ့ၤဒိၣ်န့ၢ်ဒံး လၢညါတခါ, မ့ၢ်လၢ အဒိးသန့ၤထီၣ်သးလၢ ယ့ၣ်ၡူးအတၢ်ပှ့ၤက့ၤ ဒီးယ့ၣ်ၡူးန့ၣ် အကဲစ့ၢ်ကီး ပှၤလုၢ်တၢ်ခိၣ် အဒိၣ်ကတၢၢ်အဃိ. ပှၤအံၣ်စရ့လးဖိ အပှၤလုၢ်တၢ်ခိၣ် အဒိၣ်ကတၢၢ်န့ၣ် လဲၤစိာ်ဝဲ ဆၣ်ဖိကီၢ်ဖိအသွံၣ်လၢ ကလုၢ်ထီၣ်တၢ်အဂီၢ် ဒီးလဲၤနုာ်လီၤလၢ တၢ်လီၢ်စီဆှံကတၢၢ်တတီၤ လၢပှၤဟီၣ်ခိၣ်ဖိတ့ဝဲ. မ့မ့ၢ် ယ့ၣ်ၡူးန့ၣ် “လဲၤနုာ်ဝဲလၢမူခိၣ်” လၢအမ့ၢ်တၢ်လီၢ်လၢ အစီဆှံဒိၣ်န့ၢ်တၢ်ခဲလၢာ် ဒီးလဲၤပာ်ဖျါထီၣ်အသးလၢ ယဟိဝၤယွၤအမဲာ်ညါ. ဖဲန့ၣ်န့ၣ် အလဲၤစိာ်ဝဲ အတၢ်ဟ့ၣ်လုၢ်ထီၣ်တခါ လၢအမ့ၢ် အတၢ်ခွဲးတၢ်ယာ်လၢ အကအိၣ်မူဘၣ် လီၤထူလီၤယိာ် လၢဟီၣ်ခိၣ်ချၢ ဒ်ပှၤလၢပှၤပှဲၤတဂၤအသိး. အမၤဝဲဒ်အံၤ လၢပဂီၢ် “ဒ်သိးအကမၤလီၤမၢ်ကွံာ် တၢ်ဒဲးဘး ခီဖျိလၢ အတၢ်ဟ့ၣ်လုၢ်ထီၣ်အသး.” (ဖး ဧ့ၤဘြံၤ ၉:၁၂, ၂၄-၂၆.) ယ့ၣ်ၡူးအတၢ်ဟ့ၣ်လုၢ်ထီၣ်သးအံၤ ကမၤလီၤမၢ်ကွံာ်ပတၢ်ဒဲးဘး လီၤထူလီၤယိာ်. ဒီးပကဆဲးမၤလိဘၣ်လၢ ပတၢ်မုၢ်လၢ်မ့ၢ်အိၣ်လၢ ပကလဲၤထီၣ်ဘၣ် လၢမူခိၣ်မ့ၢ်ဂ့ၤ, အိၣ်မူလီၤထူလီၤယိာ် လၢဟီၣ်ခိၣ်ချၢမ့ၢ်ဂ့ၤ ပဘူၣ်ထီၣ်ဘါထီၣ် ယဟိဝၤယွၤလၢ အနီၢ်သးတၢ်လုၢ်ဟံၣ်အပူၤသ့ဝဲ.
တၢ်ပျီလၢအအံၣ်တဘ့ၣ် ဒီးတၢ်ပျီလၢအလဲၢ်တဘ့ၣ်
၁၅. မတဂၤသ့ၣ်တဖၣ် မၤတၢ်လၢ ဒဲစီဆှံ အတၢ်ပျီပူၤလဲၣ်.
၁၅ ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. ဒဲစီဆှံန့ၣ် အိၣ်ဒီးတၢ်ပျီတဘ့ၣ်လၢ အအိၣ်လၢအကရၢၢ်ပူၤ. တၢ်ပျီလၢ အအိၣ်လၢကရၢၢ်ပူၤအံၤ အိၣ်ဒီးတၢ်ဒူၣ်ဝးဝး ဒီးဖဲတၢ်ပျီအံၤ အပူၤန့ၣ် ပှၤလုၢ်တၢ်ဒိၣ်တဖၣ် မၤဝဲအမူဒါဖဲန့ၣ်. ဒီးဖဲန့ၣ်န့ၣ်အိၣ်ဒီး တၢ်လုၢ်လီၢ်တိၢ်ဘီဖးဒိၣ်တဖျၢၣ်, တကးဒံးဘၣ် အိၣ်စ့ၢ်ကီးဒီး ထံဒၢဖးဒိၣ်တိၢ်ဘီတဖျၢၣ် ဒ်သိးပှၤလုၢ်တၢ်ဒိၣ်တဖၣ် ကသ့ကဆှီအသးတချုးလၢ အဝဲသ့ၣ်မၤဝဲ တၢ်မၤစီဆှံဒံးဘၣ်အခါ. (၂ မိၤ ၃၀:၁၇-၂၀; ၄၀:၆-၈) မ့မ့ၢ်တၢ်လုၢ်ဟံၣ်လၢ ပှၤသူၣ်ထီၣ်အီၤ လၢခံတဖျၢၣ်န့ၣ် အိၣ်ဝဲဒီး တၢ်ပျီလၢ အလဲၢ်တဘ့ၣ်စ့ၢ်ကီး. ဖဲတၢ်ပျီလၢ အလဲၢ်တဘ့ၣ်အံၤ အပူၤန့ၣ် ပှၤလၢအတမ့ၢ် ပှၤလုၢ်တၢ်ဒိၣ်တဖၣ်စ့ၢ်ကီး လဲၤဝဲဒီးဘူၣ်ထီၣ်ဘါထီၣ် ကစၢ်ယွၤဖဲန့ၣ်သ့.
၁၆. မတဂၤသ့ၣ်တဖၣ် ဘူၣ်ထီၣ်ဘါထီၣ် ယဟိဝၤယွၤလၢ နီၢ်သးအတၢ်လုၢ်ဟံၣ် အတၢ်ပျီတဖၣ် အပူၤလဲၣ်.
၁၆ ခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ. ဖဲပှၤလၢအဘၣ်တၢ်ဒိးဖှူအီၤတဖၣ် အိၣ်လၢဟီၣ်ခိၣ်ချၢအခါ တချုးလၢအဝဲသ့ၣ် မၤတၢ်ဒီးယ့ၣ်ၡူးလၢမူခိၣ် ဒ်ပှၤလုၢ်တၢ်ဒိၣ်တဖၣ်အသိး ဒံးဘၣ်န့ၣ် အဝဲသ့ၣ်ကဘၣ်မၤတၢ်လၢ တၢ်ပျီလၢအအံၣ်တဘ့ၣ် လၢအအိၣ်လၢ နီၢ်သးတၢ်လုၢ်ဟံၣ်အပူၤ. ထံဒၢဖးဒိၣ်တဖျၢၣ်အံၤ ဒုးသ့ၣ်နီၣ်ထီၣ် ပဝဲခရံာ်ဖိခဲလၢာ် ဃုာ်ဒီး ပှၤလၢအဘၣ်တၢ်ဒိးဖှူအီၤတဖၣ် လၢ ကအိၣ်ကဆှီလၢ လၢနီၢ်သးတခီ ဒီးလၢတၢ်သကဲာ်ပဝးတခီ. မ့မ့ၢ် “ပှၤဂီၢ်မုၢ်ဖးဒိၣ်” လၢအဆီၣ်ထွဲမၤစၢၤ ခရံာ်အဒီပုၢ်ဝဲၢ်တဖၣ်ဟီမီၤ မ့ၢ်အဝဲသ့ၣ် ကဘူၣ်ထီၣ်ဘါထီၣ်တၢ်ဖဲလဲၣ်. တၢ်မၢဖိယိၤဟၣ် ထံၣ်ဝဲတၢ်ထံၣ်လၢညါခီလၢ ပှၤဂီၢ်မုၢ်ဖးဒိၣ်အံၤ “ဆၢထၢၣ်ဝဲလၢ လီၢ်ပစိာ်အမဲာ်ညါ” လီၤဂာ်ဒ်သိး အဝဲသ့ၣ်ဆၢထၢၣ် ဘူၣ်ထီၣ်ဘါထီၣ်တၢ်လၢ တၢ်ပျီလၢအလဲၢ်တဘ့ၣ် လၢဟီၣ်ခိၣ်ချၢ ဒီးဖဲန့ၣ်န့ၣ် အဝဲသ့ၣ် “မၤကစၢ်ယွၤ အတၢ်မၤစီဆှံ လၢမုၢ်ဆါဒီးလၢမုၢ်နၤ လၢကစၢ်ယွၤ အတၢ်လုၢ်ဟံၣ်အပူၤ.” (လီၣ် ၇:၉, ၁၃-၁၅) ပစံးဘျုးဘၣ် ယဟိဝၤယွၤဒိၣ်မး မ့ၢ်လၢ အဟ့ၣ်ပှၤတၢ်ခွဲးတၢ်ယာ်လီၤဆီလၢ ပကဘူၣ်ထီၣ်ဘါထီၣ်ဘၣ်အီၤလၢ နီၢ်သးတၢ်လုၢ်ဟံၣ်ပူၤအဃိ.
ပအိၣ်ဒီးတၢ်ခွဲးတၢ်ယာ်လၢ ပဘူၣ်ထီၣ်ဘါထီၣ်ဘၣ် ယဟိဝၤယွၤ
၁၇. ပဟ့ၣ်လုၢ်ထီၣ် ယဟိဝၤယွၤလၢ တၢ်လုၢ်မနုၤသ့လဲၣ်.
၁၇ အဆၢကတီၢ်ခဲအံၤ ပဝဲခရံာ်ဖိတဖၣ် ပဟ့ၣ်လုၢ်ထီၣ်တၢ်လၢ ယဟိဝၤယွၤအအိၣ် ခီဖျိပဟ့ၣ်လီၤပတၢ်ဆၢကတီၢ်, ပတၢ်ဂံၢ်တၢ်ဘါ ဒီးပတၢ်ဖိတၢ်လံၤတဖၣ် လၢဘီမုၢ်တၢ်သးခုကစီၣ်အဂီၢ်. တၢ်မၢဖိပီလူး တဲဘၣ် ပှၤဧ့ၤဘြံၤဖိ လၢအကဲထီၣ် ခရံာ်ဖိတဖၣ်လၢ “လုၢ်ထီၣ် တၢ်စံးထီၣ်ပတြၢၤလၢ ကစၢ်ယွၤအအိၣ် ခီဖျိလၢ ယ့ၣ်ၡူး ထီဘိတက့ၢ်. အဝဲအံၤ မ့ၢ်ပထးခိၣ်အတၤသၣ်ဒီး ပမၤသ့ခီဖျိလၢ ပအၢၣ်လီၤအမံၤလၢ ပှၤဂၤအမဲာ်ညါ.” (ဧ့ၤ ၁၃:၁၅) ပမ့ၢ်မၤဒ်န့ၣ်လၢ အဂ့ၤကတၢၢ်န့ၣ် မ့ၢ်ဒၣ်ပပာ်ဖျါထီၣ်လၢ ပပာ်လုၢ်ပာ်ပှ့ၤ ပတၢ်ခွဲးတၢ်ယာ်လၢ ပဘူၣ်ထီၣ်ဘါထီၣ်ဘၣ် ယဟိဝၤယွၤ.
၁၈. ပကဘၣ်မၤ တၢ်မနုၤ ထီဘိလဲၣ် ဒီးပတဘၣ် သးပ့ၤနီၣ် တၢ်ဂ့ၢ်မနုၤဘၣ်လဲၣ်. (ဧ့ၤဘြံၤ ၁၀:၂၂-၂၅)
၁၈ ဖး ဧ့ၤဘြံၤ ၁၀:၂၂-၂၅. စီၤပီလူးအလံာ်ပရၢလၢ အလီၢ်ခံကတၢၢ်တကူာ်လၢ အကွဲးန့ၢ်ပှၤဧ့ၤဘြံၤဖိတဖၣ်န့ၣ် ဒုးသ့ၣ်နီၣ်ထီၣ် အဝဲသ့ၣ် တၢ်ဂ့ၢ်အရ့ဒိၣ်တဖၣ် လၢအဝဲသ့ၣ် ကဘၣ်မၤဝဲ. တၢ်ဂ့ၢ်တဖၣ်န့ၣ်မ့ၢ်ဝဲ တၢ်ဃ့ထုကဖၣ်, တၢ်စံၣ်တဲၤတဲလီၤတၢ်, တၢ်ထီၣ်တၢ်အိၣ်ဖှိၣ် ဒီးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ. လံာ်စီဆှံ တဲဝဲလၢ “ဒ်သုထံၣ် [ယဟိဝၤယွၤ] အမုၢ်နံၤ ဟဲဘူးထီၣ်ဝဲအသိး မ်သုမၤအါထီၣ် တၢ်သ့ၣ်တဖၣ်န့ၣ်တက့ၢ်.” လၢလံာ်လီၣ်ဖျါအပူၤန့ၣ် မူခိၣ်ကလူးတဲဝဲလၢ “ဘူၣ်ထီၣ်ဘါထီၣ် ကစၢ်ယွၤဟီ” န့ၣ်ခံဘျီညါ. (လီၣ် ၁၉:၁၀; ၂၂:၉) အဃိ မ်ပကသ့ၣ်နီၣ်ထီၣ် တၢ်မ့ၢ်တၢ်တီ အဒိၣ်အယိာ် ဘၣ်ဃးဒီး နီၢ်သးအတၢ်လုၢ်ဟံၣ်အံၤအဂ့ၢ် ဒီးပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ပဘူၣ်ထီၣ်ဘါထီၣ်ဘၣ် ယဟိဝၤယွၤထီဘိ.
တၢ်သးဝံၣ် ၈၈ ဒုးသ့ၣ်ညါယၤ တၢ်လၢအဘၣ်နသး
a လံာ်စီဆှံအတၢ်သိၣ်လိ လီၤလီၤဆီဆီတခါန့ၣ် အဘၣ်ဃးဒီး ယဟိဝၤယွၤ အနီၢ်သးတၢ်လုၢ်ဟံၣ် လၢအရ့ဒိၣ်တဖျၢၣ်အဂ့ၢ်. တၢ်လုၢ်ဟံၣ်တဖျၢၣ်အံၤ အဲၣ်ဒိးတဲဝဲ အခီပညီဒ်လဲၣ်. လၢတၢ်မၤလိအံၤန့ၣ် ပကသ့ၣ်ညါဘၣ် ဘၣ်ဃးဒီး လံာ်ဧ့ၤဘြံၤပာ်ဖျါထီၣ်ဝဲ တၢ်လုၢ်ဟံၣ်တဖျၢၣ်အံၤ အဂ့ၢ်လီၤတံၢ်လီၤဆဲး. ဒီးတၢ်မၤလိအံၤန့ၣ် ကမၤစၢၤပှၤလၢ ပကပာ်လုၢ်ပာ်ပှ့ၤအါထီၣ် ပတၢ်ဘူၣ်ထီၣ်ဘါထီၣ် ယဟိဝၤယွၤ.
b ဒ်သိးနကသ့ၣ်ညါ လံာ်ဧ့ၤဘြံၤအဂ့ၢ်အဂီၢ် ကွၢ်တၢ်ဂီၤမူလၢ အခိၣ်တီမ့ၢ်ဝဲ တၢ်ကတိၤအိးထီၣ်လၢ လံာ်ဧ့ၤဘြံၤအဂီၢ် လၢ jw.org.
c လၢလံာ်စီဆှံလၢ ကြံးကျိာ်တကတြူၢ်အပူၤန့ၣ် ထဲဒၣ်လံာ်ဧ့ၤဘြံၤတကတြူၢ် ပာ်ဖျါထီၣ်ဝဲယ့ၣ်ၡူး ဒ်အမ့ၢ်ပှၤလုၢ်တၢ်ခိၣ် အဒိၣ်ကတၢၢ်.
d လံာ်တဘ့ၣ် ပာ်ဖျါထီၣ်ဝဲလၢ စးထီၣ်လၢအခီၣ်ထံး တုၤလၢပှၤမၤဟးဂီၤ ဝ့ၢ်ယရူၤၡလ့ၣ် ဖဲ ခ.န ၇၀ န့ၣ်ပှၤလုၢ်တၢ်ခိၣ် အဒိၣ်ကတၢၢ် လၢကီၢ်အံၣ်စရ့လးအပူၤန့ၣ် ကအိၣ်ဝဲ ၈၄ ဂၤညါ.
e ကွၢ်လံာ်လၢအမ့ၢ် Pure Worship of Jehovah—Restored At Last! p. 240.
f ကွၢ်တၢ်လွံၢ်နၢၣ် လၢအမ့ၢ် “How the Spirit Revealed the Meaning of the Spiritual Temple” in the July 15, 2010, issue of The Watchtower, p. 22.
