1. Yisinke ana kuuyunga muengeli ntani ngapi omu yina kutukundama?

 NSENE asi muengeli a uyunga kumwe nove, no mu purakena ndi? Neina, muengeli kuna kuuyungisa ‘nomuhoko nadinye nokomarudi nagenye ntani nokomaraka nagenye.’ Yisinke ana kuuyunga? “Tjireni Karunga nokumufumadeka . . . karereni ogu ga sita eguru nevhu.” (Ehor. 14:​6, 7) Jehova yige gelike Karunga gosili ogu nava vhura kukarera vantu navenye. Tuna hafa kweyi ga tu pa mpito zongwa tu mu karere montembeli zendi zonene zopampepo!

2. Yisinke ntembeli zaJehova zopampepo? (Tara hena kakende “ Eyi azi dili kutanta.”)

² Yisinke ntembeli zopampepo ntani kupi natu vhura kugwana mauzera aga ga faturura kuhamena ntembeli ozo? Ntembeli zopampepo kapisi etungo. Azo kuna kara ewapayiko lyaJehova lyokumukarera monkedi zongwa kuliza nonzambo zaJesus zosizoweseso. Mupositoli Paurusa kwa fatwilire ewapayiko eli mombilive ezi ga tjangerere Vakriste woVahebeli womosiruwo sovapositoli ava va tungire moJudeya. b

3-4. Sinka musinke ga kere naso Paurusa kuhamena Vakriste woVahebeli womoJudeya ntani ngapi omu ga va vaterere?

³ Morwasinke Paurusa ga tjangerere Vakriste woVahebeli womoJudeya? Ayo kumoneka asi age kwa yi rugene oyo unene po morwa nokonda edi mbali. Zokuhova, mokuvakorangeda. Komeho va ya kare Vakriste, sinzi sawo kwa kere moukarelikarunga woVajuda. Vampitisili vawo vanare womaukarelikarunga nampo kwa va swawire morwa yeeyi va ya kere Vakriste. Morwasinke? Morwa Vakriste kapi va kere nontembeli oku nava vhura kuruganena ukareli, kapi va kere nosizambero oku nava vhura kuzambera nonzambo,  ntani kapi va kere novapristeli ava nava va vatera. Eyi nampo kwa dompesere varongwa owo vaKristusa noku ninkisa epuro lyawo li sesupe. (Heb. 2:1; 3:​12, 14) Vamwe vawo nampo kwa gazarere kutengura koukarelikarunga wawo woVajuda.

⁴ Zauvali, Paurusa kwa uyungire asi Vakriste owo woVahebeli kapi va litulire mo unene va kwate egano marongo gokonhiinhi, “nondyaandya” edi da kara moNonkango daKarunga. (Heb. 5:​11-14) Ayo kumoneka asi vamwe vawo ngava kwama simpe Veta zaMosesa. Paurusa kwa fatwilire asi nonzambo edi za pulisilire veta, kapi ta di vhuru kugusilira po nawa-nawa nonzo nadinye. Ozo yizo konda zeyi va “hagekesere po” Veta. Makura Paurusa yipo gava rongere marongo gokonhiinhi. Age kwa diworokesere Vakriste vakwawo “ehuguvaro lyewa” kuliza nonzambo zaJesus ezi nazi vhura kuvavatera va “hedere pepi naKarunga”.—Heb. 7:​18, 19.

5. Yisinke twa hepa kukwata egano kuhamena buke zoVahebeli ntani morwasinke?

⁵ Paurusa kwa fatwilire Vakriste woVahebeli asi nkedi ezi ngava karere Jehova ngwa unene kupitakana omu ngava mu karere mosiruwo sanare. Monkedi omu Vajuda ngava karere Jehova kuliza noveta, kwa kere tupu “mundunduma goyininke eyi ngayi wiza nye rutu rwene ko Kristusa.” (Koros. 2:17) Mundunduma gosininke songandi ago sininke tupu, nye kapisi sininke sene-sene. Mokulifana, monkedi omu Vajuda ngava karere Karunga mosiruwo sanare, kwa kere tupu mundunduma, morwa nkedi zongwa po zokukarera Jehova kwa ya wizire konyima. Twa hepa kukwata egano ewapayiko eli ga tulisa po Jehova yipo nonzo detu va di tu dongwenene po yipo tu mu karere monkedi ezi ga yi harera. Tu zeni tu ka hetakanese “mundunduma” (monkedi omu Vajuda ngava karere Jehova mosiruwo sanare) ‘korutu rwene ko’ (monkedi omu Vakriste vana kukarera Jehova neina) ngwendi moomu tupu va yi faturura moVahebeli. Pokuyirugana ngoso, ose natu kwata nawa egano ntembeli zopampepo ntani nomu twa hamena mo.

6. Ngapi omu nkongoronzugo ngava zi ruganesa?

⁶ Monkedi omu Vajuda ngava karere Jehova mosiruwo sanare. Paurusa kwa zogerere kuhamena nkongoronzugo ezi ga pitisilire Mosesa apa va zi tungire mo-1512 komeho Jesus a wize pevhu. (Tara kakende “Monkedi omu Vajuda ngava karere Jehova mosiruwo sanare—Monkedi omu Vakriste vana kukarera Jehova neina.”) Nkongoronzugo kwa fene ngwendi tende ezi ngava simbi Vaisraeli ngomu ngava dirauka. Awo kwa zi ruganesere hambara nomvhura dokusika ko-500 dogoro apa ntembeli va ya zi tungire moJerusarema. (Ex. 25:​8, 9; Num. 9:22) “Nkongoronzugo”  ezi kwa kere evango eli Vaisraeli ngava karere Karunga noku gava nonzambo dawo. (Ex. 29:​43-46) Nye nampili ngoso, nkongoronzugo kwa fanekesere hena yininke yoyiwa po unene eyi va ya gwene Vakriste.

7. Siruwo musinke za tamekere kukara po ntembeli zopampepo?

⁷ Monkedi omu Vakriste vana kukarera Jehova neina. Nkongoronzugo zomosiruwo sanare kwa ‘fanekesere yininke yemeguru’ ntani kwa fanekesa ntembeli zonene zaJehova zopampepo. Paurusa kwa uyungire asi “tenta ezi [ndi nkongoronzugo] kwa fanekesa yininke yina kuhoroka ngesi.” (Heb. 8:5; 9:9) Yipo nye, apa Paurusa ga tjangerere Vahebeli, azo ntembeli zopampepo nare pozili. Azo kwa tamekere kukara po momvhura 29 mosiruwo sovapositoli. Momvhura ozo, Jesus kwa gwene ekuho, kwa mu gwavekere nompepo zokupongoka ntani kwa tamekere kukara “mupristeli gomunene” gwaJehova gomontembeli zopampepo. c—Heb. 4:14; Yirug. 10:​37, 38.

8-9. Kuliza noVahebeli 7:​23-27, elisigo musinke lya kara po pokatji kovapristeli wovanene woVaisraeli ntani mupristeli gomunene po, Jesus Kristusa?

⁸ Monkedi omu Vajuda ngava karere Jehova mosiruwo sanare. Mupristeli gomunene nga karere po vantu komeho zaKarunga. Mupristeli gomunene gokuhova goVaisraeli kwa kere Arona ogu ga horowere Jehova, apa nkongoronzugo va zi tungikire. Ngwendi moomu tupu gayi fatwilire Paurusa asi: “Vapristeli kapi va vhulire kutwikira nosirugana sawo morwa ngava fu, eyi yiyo wopeke vava pinganene po, va twikire sirugana oso.” d (Resa Vahebeli 7:​23-27.) Ntani mokumona asi Vapristeli owo wovanene kwa kere vantu wokudira kusikiliramo, awo vahepere kuzamba nonzambo dononzo davene . Eyi yalisiga unene pokatji kovapristeli wovanene woVaisraeli ntani nomupristeli gomunene po unene, Jesus Kristusa.

⁹ Monkedi omu Vakriste vana kukarera Jehova neina. Ngomupristeli gomunene po unene Jesus Kristusa, ‘age mukareli . . . gomotenta zousili ezi ga tura po Jehova, nye kapisi vantu.’ (Heb. 8:​1, 2) Paurusa kwa fatwilire asi morwa ‘Jesus age kapi a fu, kwato ogu nga pinganena mo moupristeli wendi.’ Paurusa kwa gwederere ko asi Jesus “ga kuhuka, kwa mu pongora mo movananzo” ntani mokulisiga novapristeli wovanene woVaisraeli, “age kapi ga hepa kugava nonzambo nkenye ezuva” morwa nonzo dendi. Ngesi koneka malisigo aga ga kara poyizambero ntani nononzambo edi ngava zamba Vajuda mosiruwo sanare kumwe nedi ava gava Vakriste neina.

10. Yisinke da fanekesere nonzambo doposizambero songoporo?

¹⁰ Monkedi omu Vajuda ngava karere Jehova mosiruwo sanare. Ponze zevero lyonkongoronzugo kwa kere po sizambero esi ngava zambere yikorama kwaJehova. (Ex. 27:​1, 2; 40:29) Nye nampili ngoso, nonzambo dina kapi da vhulire kugusilira po nonzo dovantu. (Heb. 10:​1-4) Nonzambo edi ngava twikire kugava ponkongoronzugo kwa likidire asi pwa ya kere nzambo ezi za vhulire kuya gusilira po nonzo nadinye dovantu.

11. Posizambero musinke ga ligeve Jesus mwene ngonzambo? (Vahebeli 10:​5-7, 10)

¹¹ Monkedi omu Vakriste vana kukarera Jehova neina. Jesus gayi divire asi Jehova kwa mu tumine a wize pevhu mokuya gava rutu rwendi ropanyama ru ya kare nzambo zosizoweseso kovantu. (Mat. 20:28) Yipo nye, pekuho lyendi, Jesus kwa ligeve mwene yipo a rugane eyi ga mu  harere Jehova. (Joh. 6:38; Gar. 1:4) Jesus kwa ligeve mwene posizambero sopasifanekeso esi sa fanekesa ‘mpango’ zaKarunga. Mpango zaJehova kwa kere asi munendi a vhure kuzamba eparu lyendi lyokusikiliramo ngomuntu. Jesus kwa zembe eparu lyendi ‘rumwe tupu’ yipo a dongonone po narunye nonzo dankenye gumwe ogu a tura epuro mwaKristusa. (Resa Vahebeli 10:​5-7, 10.) Ngesi ta tu ka kona-kona eyi ya fanekesa yininke yomonda zonkongoronzugo.

12. Wolye va vhulire kuhwilira mwankenye nzugo zomonkongoronzugo?

¹² Monkedi omu Vajuda ngava karere Jehova mosiruwo sanare. Yininke eyi ya kere monda zonkongoronzugo ntani neyi ya kere montembeli zomoJerusarema ezi va ya tungire konyima zosiruwo, kwa lifene. Amo kwa kere mo mavango gavali: “Evango lyokupongoka” ntani “evango lyokupongokerera.” Ano ekehe yilyo lya tetere pokatji komavango ogo. (Heb. 9:​2-5; Ex. 26:​31-33) Mevango lyokupongoka kwa kere mo uzweko wonoramba nositafura ntani nonomboroto donzambo ntani sizambero. Vapristeli ava “va gwavekere” yiwo velike va pulisilire mevango lyokupongoka yipo va rugane yirugana yawo youpristeli. (Num. 3:​3, 7, 10) Mevango lyokupongokerera kwa kere mo sikesa segwanekero esi sa fanekesere ekaropo lyaJehova. (Ex. 25:​21, 22) Mupristeli gomunene yige gelike va pulisilire mokuza mevango lyokupongokerera rumwe momvhura, mezuva lyEfironkenda. (Lev. 16:​2, 17) Nkenye mvhura, age nga hwilire mo nohonde zoyikorama yipo a ka hundire egusiro po lyononzo dendi ntani nedi doVaisraeli. Ano konyima kupitira mompepo zokupongoka, Jehova  kwa yi zeresere eyi ya tembe yininke yomonda zonkongoronzugo.—Heb. 9:​6-8. e

13. Yisinke lyafanekesa evango lyokupongoka ntani evango lyokupongokerera lyomonkongoronzugo mosiruwo setu?

¹³ Monkedi omu Vakriste vana kukarera Jehova neina. Sivaro sosisesu sovarongwa vaKristusa kwa va gwaveka nompepo zokupongoka ntani awo va kara nelikwatakano lyokulikarera kumwe naJehova. Vantu ava 144 000 ngava ka kara vapristeli meguru kumwe naJesus. (Ehor. 1:6; 14:1) Evango lyokupongoka lyomonkongoronzugo kwa fanekesa asi awo kwa va horowora va kare vana vaKarunga wovagara apa simpe va kere pevhu. (Rom. 8:​15-17) Evango lyokupongokerera kwa fanekesa eguru omu ga tunga Jehova. “Ekehe” eli lyatetere pokatji kevango lyokupongoka ntani nevango lyokupongokerera kwa fanekesa rutu rwaJesus ropanyama. Apa ga kere norutu ropanyama age kapi ga vhulire kuhwilira meguru ngomupristeli gomunene gontembeli zopampepo. Apa ga geve rutu rwendi ropanyama ngonzambo kovantu navenye, Jesus kwa geve mpito koVakriste wovagwavekwa ngava ka gwane eparu meguru. Mokuka gwana eparu lyawo lyemeguru, nawo va hepa kusiga marutu gawo gopanyama. (Heb. 10:​19, 20; 1 Kol. 15:50) Konyima zapa Jesus va mu vhumbwire, age kwa ka hwililire mevango lyokupongokerera montembeli zopampepo, omu vagwavekwa navenye ava ka mu gwana.

14. Kuliza noVahebeli 9:​12, 24-26, morwasinke monkedi omu Vakriste a va karere Jehova ngesi yalisiga unene nomu ngava mu karere Vajuda?

¹⁴ Ose tuna dimburura nawa-nawa asi ewapayiko lyaJehova lyokumukarera mousili kwa zeruka unene morwa nzambo zosizoweseso ntani morwa mupristeli Jesus Kristusa. Mupristeli gomunene gomoIsraeli kwa hwililire mevango lyokupongokerera eli va rugene vantu kumwe nohonde zoyikorama yipo a gave nzambo. Nye Jesus kwa hwililire meguru, evango lyokupongokerera po unene yipo aka sikame komeho zaJehova. Age kwa ka geve eparu lyendi lyokusikiliramo meguru, “yipo a guse po nonzo kupitira monzambo zendi.” (Resa Vahebeli 9:​12, 24-26.) Nzambo zaJesus kwa gusa po nonzo detu dogoro narunye. Ngomu natu ka yi lironga ngesi, yikare asi ehuguvaro lyetu kuna kara lyokuka parukira meguru ndi pevhu, natuvenye kuvhura kukarera Jehova montembeli zendi zopamepo.

15. Wolye ngava karere Karunga meharango lyonkongoronzugo?

¹⁵ Monkedi omu Vajuda ngava karere Jehova mosiruwo sanare. Nkongoronzugo kwa kere neharango limwe, alyo kwa kere evango lyenene eli va kundurukidire norugumbo omu ngava ruganene vapristeli yirugana yawo. Sizambero songoporo sosinene sononzambo deswakerero kwa kere meharango kumwe nosiyaha songoporo somema aga ngava ruganesa vapristeli valikuhwe vene komeho va tameke yirugana yawo yokupongoka. (Ex. 30:​17-20; 40:​6-8) Ntembeli ezi va ya tungire konyima, nazo kwa kere neharango lyoponze oku ngava vhuru kusikama vantu ava va dilire kukara vapristeli yipo va karere Karunga.

16. Wolye ava karere Karunga mwankenye eharango lyomontembeli zopampepo?

¹⁶ Monkedi omu Vakriste vana kukarera Jehova neina. Komeho vagwavekwa ava vana kara ngesi pevhu ngava ze meguru va ka kare vapristeli kumwe naJesus, awo va hepa kutwikira kurugana noulimburukwi meharango lyomonda lyontembeli zopampepo. Siyaha sosinene somena esi sa kere monkongoronzugo ntani esi sa kere montembeli, kudiworokesa vagwaveka ntani noVakriste navenye eyi ya karera nomulyo kukara vana kuhuka pamukaro ntani pampepo. Kupi nye “emukurumbunga lyovantu” eli ali kwatesa  ko vamumbya vaKristusa wovagwaveka a li karere Jehova? Mupositoli Johanesa kwa va mwene awo kuna sikama komeho “zosipundi souhompa” eyi ya fanekesa keharango lyoponze pevhu, ‘nokukarera Karunga montembeli masiku nomutenya.’ (Ehor. 7:​9, 13-15) Yosili, ose kuvhura kukara norupandu kweyi Jehova ga tu pa mpito zokumukarera montembeli zendi zonene.

17. Nonzambo musinke atu gava kwaJehova?

¹⁷ Neina, Vakriste navenye va kara nomfumwa zokukarera Jehova pokuruganesa siruwo sawo nonkondo dawo ntani noyininke yawo yopanyama yipo va kwatese ko Uhompa waKarunga. Ngwendi moomu tupu mupositoli Paurusa ga tanterere Vakriste woVahebeli, ose kuvhura kugava “nonzambo dehamberero kwaKarunga, kupitira mwendi, kutanta asi kuruganesa tuna twetu tu divise edina lyendi.” (Heb. 13:15) Ose kuvhura tu likide rupandu kositumbukira esi twa kara naso sokukarera Jehova pokumuruganena paapa twa hulira mosirugana sendi.

18. Kuliza noVahebeli 10:​22-25, yininke musinke twa hepa kurugana nkenye apa?

¹⁸ Resa Vahebeli 10:​22-25. Pepi nehagero lyombilive ezi Paurusa ga tjangerere Vahebeli, age kwa tjenge yininke eyi natu rugana nkenye apa ngomu tuna kukarera Jehova. Ayo kwa kwatera mo kukanderera kwaJehova, kuzuvhisira ko wopeke, kukara momapongo gomombungakriste ntani kukorangeda wopeke, unene po “mokumona asi ezuva [lyaJehova] kuna kuhedera pepi.” Kehagero lyobuke zEhororo, muengeli gwaJehova kwa uyungire ruvali nonkango edi noku di nkondopeka asi: “Karera Karunga!” (Ehororo 19:10; 22:9) Ngano kapisi tu divareni yininke nayinye eyi tuna lirongo kuhamena ntembeli zaJehova zonene zopampepo ntani nositumbukira esi twa kara naso mokukarera Karunga gwetu!