1. Ino munjelo atolwiita bantu kucita nshi, alimwi ino nshatokwaamba shilatukuma buyani?

 SA NA munjelo wamulwiita shakucita, inga mwamunyumfwila? Munshiku shino, munjelo atobandika a “bantu bacite shikanda shipusenepusene, mikowa yoonse, milaka yoonse alimwi akumishobo yoonse.” Atobalwiita ayi: “Amulemeke akulumbaisha Lesa . . . Amumulambile uyo wakalenga liculu acishi ca panshi.” (Ciyu. 14:​6, 7) Yehova ngo Lesa wancine eenkabo bantu boonse ngobeelete kulambila. Tulalumba abuumbi kwaamba ayi wakatupa coolwe cibotu cakumulambila mu tempele yakwe inene yakumushimu!

2. Ino tempele yakwe Yehova yakumushimu nciinshi? (Amubone akabokosi kacite mutwi utokwaamba ayi “ Tempele Ncoitasansululi.”)

² Ino tempele yakumushimu nciinshi, alimwi ino nkuli nkweenga twacana makani aamba pa tempele iyi? Tempele yakumushimu teshi ŋanda iine yakayakwa. Tempele iyi mbubaambo bwakulambila Yehova kweelana ambwasuni, kwiinda mumulambu wacilubula cakwe Yesu. Mutumwi Paulo wakaamba shiinji pa tempele iyi ncoisansulula munkalata njaakalembela Beneklistu bene Ebulu bakalinga kukala ku Judeya. b

3-4. Ino nshiinshi Paulo nshaakalinga kulisukama pa Beneklistu bene Ebulu bakalinga kukala ku Judeya, alimwi ino wakabacafwa buyani?

³ Ino nceebonshi Paulo ncaakalembela nkalata iyi ku Beneklistu bene Ebulu bakalinga kukala ku Judeya? Mpashi nceebo ca sheebo shobilo shitokonkelaawo. Cakutaanguna, wakalinga kusuni kubayuminisha. Baanji kabatana kuba Beneklistu, bakalinga kukonkela  bupailishi bwa baJuda. Mpashi abo bakalinga bamatanjilili babupailishi bwabo bakalinga kubaweluluka ceebo cakuba Beneklistu. Ino nceebonshi? Nceebo cakwaamba ayi Beneklistu tabakalinga kuciteewo tempele mwakulambilila, cipaililo cakubengelaawo milambu kuli Lesa alimwi tabakalinga kucitewo bapailishi. Ici naakwiinga cakapa bashikwiiya bakwe Klistu kulefuka akutatolelela kuba alushomo luyumu. (Ebu. 2:1; 3:​12, 14) Alimwi mpashi bamwi bakayeeya kuboolela kubupailishi bwa baJuda.

⁴ Cabili, Paulo wakalwiita Beneklistu bene Ebulu ayi tabakalinga kusebensa cankusu kunyumfwishisha makani ateshi oobu kunyumfwisha, na “shakulya shiyumuyumu” shicanika mu Maswi akwe Lesa. (Ebu. 5:​11-14) Citoboneka ayi bamwi bakalinga kunoocikonkela Milawo yakwe Mose. Nacibi boobo, Paulo wakaamba ayi milambu njobakalinga kubenga kweelana amulawo, tayakalinga kupa kwaamba ayi balekelelwe shibiibi shabo cakumaninina. Aboobo bakacileka kukonkela mulawo uyu. Lyalo Paulo wakabaiisha makani amwi ateshi oobu kunyumfwisha. Wakalwiita Beneklistunyina pa “kulangila kwiindaawo” nkobakalinga kucite ceebo ca mulambu wakwe Yesu, uyo wakalinga kusa mukubacafwa kusena pafwiifwi abuumbi a Lesa.—Ebu. 7:​18, 19.

5. Ino nshiinshi nshotweelete kunyumfwishisha mulibuku lya Bene Ebulu, alimwi ino nceebonshi?

⁵ Paulo wakalwiita bashominyina bene Ebulu ayi nshila Beneklistu mbobakalinga kulambila Yehova yakalinga ibotu abuumbi kwiinda mbobakalinga kumulambila kale kale. Nshila baJuda mbobakalinga kulambila Yehova yakalinga ‘ncimfulebo ca sheesho shancinencine shili kunembo. Sombi shancinencine isho, ngu Klistu.” (Kolo. 2:17) Cimfule ncimfunshabo ca cintu cimwi cancinencine. Aboobo nshila baJuda mbobakalinga kulambila Yehova, yakalinga ncimfulebo ca nshila ibotu mbobakalinga kusa mukutalika kumulambila. Tulayandika kunyumfwishisha bubaambo Yehova mbwaakabika kwaamba ayi tulekelelwe shibiibi shesu akumulambila kweelana ambwasuni. Amuleke tukoshanishe ‘cimfule’ (nkokwaamba ayi nshila baJuda mbobakalinga kulambila Yehova) ku “shancinencine” (nkokwaamba ayi nshila Beneklistu mbobalambila Yehova), kweelana amakani ngotucana mulibuku lya Bene Ebulu. Kucita boobo kutootucafwa kunyumfwishisha tempele yakumushimu amboitukuma.

6. Ino nshiinshi bene Isilaeli nshobakalinga kucita ku tente yakulambililaako?

⁶ BaJuda mbobakalinga kulambila Yehova. Munkalata Paulo njaakalembela bene Ebulu, wakaamba pa tente yakulambililaako Mose njaakapanga  mu 1512 B.C.E. (Amubone caati icite mutwi utokwaamba ayi “BaJuda Mbobakalinga Kulambila Yehova—Beneklistu Mbobalambila Yehova.”) Musena bene Isilaeli nkobakalinga kubunganina kwaamba ayi balambile Lesa akubenga milambu, wakalinga kwiitwa ayi ‘tente yakulambililaako.’ (Kulo. 29:​43-46) Bene Isilaeli ndyebakalinga muluyanga, bakalinga kuloonsha tente iyi na baswa pamusena womwi kuya pamusena umwi. (Kulo. 25:​8, 9; Shakube. 9:22) Nacibi boobo, tente yakulambililaako yakalinga kwimikaninaako a nshila ibotu Beneklistu mbobakalinga kusa mukutalika kulambila Yehova.

7. Ino ndilili tempele yakumushimu ndyeyakabaako?

⁷ Beneklistu mbobalambila Yehova. Tente yakulambililaako yakalinga “ncimfule nabi cikoshanyo ca sheesho sha kwiculu,” alimwi yakalinga kwimikaninaako tempele inene yakwe Yehova yakumushimu. Paulo wakaamba ayi “tente” yakalinga “ncikoshanyo ca ciindi cino.” (Ebu. 8:5; 9:9) Aboobo paciindi ndyaakalembela nkalata bene Ebulu, tempele yakumushimu kailiko kale. Yakabako mu 29 C.E. Mumwaaka uyu Yesu wakabombekwa, kunanikwa amushimu usalashi, akutalika kusebensa mbuli “mupailishi munene wiindaawo” wakwe Yehova, mu tempele yakumushimu. c—Ebu. 4:14; Milimo 10:​37, 38.

8-9. Kweelana a Bene Ebulu 7:​23-27, ino mbupusano nshi bunene bwakalinga pakati ka bapailishi banene ba bene Isilaeli a Mupailishi Munene wiindaawo ngotucite, Yesu Klistu?

⁸ BaJuda mbobakalinga kulambila Yehova. Mupailishi munene ngowakalinga kwimikaninaako bantu kuli Lesa. Aloni mupailishi munene wakutaanguna wa bene Isilaeli, wakasalwa a Yehova paciindi ndyebakalinga kwaaba tente yakulambililaako. Nacibi boobo, kweelana a Paulo mbwaakaamba, “bapailishi abo bakulukulu bakalinga baanji ceebo bakalinga kufwa. Aboobo tebakalinga kutolelela mumulimo wabo.” d (Amubelenge Bene Ebulu 7:​23-27.) Alimwi ceebo cakwaamba ayi bapailishi abo tabakalinga kumaninitewo, bakalinga kubenga milambu ya kulekelelwa shibiibi shabo. Ubu mbupusano bunene bwakalinga pakati ka bapailishi banene ba bene Isilaeli a Mupailishi Munene wiindaawo ngotucite, Yesu Klistu.

⁹ Beneklistu mbobalambila Yehova. Yesu Klistu Mupailishi wesu munene, ngu ‘musebenshi usebensela . . . mutente yancinencine Yehova njaakayaka, kuteshi muntu sobwe.’ (Ebu. 8:​1, 2) Paulo wakaamba ayi “Yesu ngwamuyayaya alimwi bupailishi bwakwe teshi bukamaane.” Wakeelikaawo akwaamba ayi Yesu “taacite kampenda nabi bubi muli nguwe. Wakapusanishikwa abamucita shibiibi.” Alimwi mubupusano abapailishi banene ba bene Isilaeli, ‘taayandiki kunoocaya banyama nshiku shoonse pacipaililo ceebo ca shibiibi shakwe.’ Ano amuleke tubandike bupusano buli pakati ka shipaililo alimwi amilambu baJuda njobakalinga kubenga kale kale, a Beneklistu njobabenga pacecino ciindi.

10. Ino milambu yakalinga kubengwa pacipaililo ca mukuba yakalinga kwimikaninaako nshi?

¹⁰ BaJuda mbobakalinga kulambila Yehova. Kufwiifwi a mwinjililo wa tente yakulambililaako, kwakalinga cipaililo ca mukuba mpobakalinga kubengela milambu ya shinyama kuli Yehova. (Kulo. 27:​1, 2; 40:29) Nacibi boobo, milambu iyo tayakalinga kupa kwaamba ayi bantu balekelelwe shibiibi shabo cakumaninina. (Ebu. 10:​1-4) Milambu ya shinyama njobakalinga kubenga pa tente yakulambililaako, yakalinga kwimikaninaako mulambu wakalinga kusa mukubengwa kwaamba ayi bantu balekelelwe shibiibi shabo cakumaninina.

11. Ino cipaililo Yesu mpakaabila buumi bwakwe mbuli mulambu cakalinga kwimikaninaako nshi? (Bene Ebulu 10:​5-7, 10)

 ¹¹ Beneklistu mbobalambila Yehova. Yesu wakalinga kucishi ayi Yehova wakamutuma kusa pacishi mukwaaba buumi bwakwe mbuli cilubula kwaamba ayi alubule bantu. (Mate. 20:28) Aboobo pesule lyakubombekwa, Yesu wakalyaaba kwaamba ayi acite kuyanda kwakwe Yehova. (Joni 6:38; Gala. 1:4) Cipaililo Yesu mpakaabila buumi bwakwe mbuli mulambu, cakalinga kwimikaninaako kuyanda kwakwe Lesa. Yehova wakalinga kusuni ayi Mwanaakwe aabe buumi bwakwe bumaninite. Yesu wakaaba buumi bwakwe “linkanda lyomwibo” kwaamba ayi bantu boonse bashoma muli Klistu balekelelwe shibiibi shabo cakumaninina. (Amubelenge Bene Ebulu 10:​5-7, 10.) Ano amuleke tubandike pambasu shamukati lya tente yakulambililaako ncoshakalinga kwimikaninaako.

12. Ino mbaani bakalinga kunjila mushipinda shamu tente yakulambililaako?

¹² BaJuda mbobakalinga kulambila Yehova. Tente yakulambililaako yakalinga kukoshenye mukati a tempele iyo yakesa mukuyakwa mu Jelusalemu. Yakalinga kucite shipinda shobilo—“Musena Usalalite” a “Musena Usalalite Wiindaawo.” Shipinda ishi shakalinga kupansaanishikwa acisani cishitilisha. (Ebu. 9:​2-5; Kulo. 26:​31-33) Mu Musena Usalalite mwakalinga cakubikaawo lilampi ca golodi, cipaililo cakutentelawo tununkila kabotu alimwi atebulu apo mpobakalinga kubika cimaande cacitondesho. ‘Bapailishi bakananikwa’ beenkabo mbobakalinga kusuminishikwa kunjila mu Musena Usalalite kwaamba ayi basebense ncito shabo shabupailishi. (Shakube. 3:​3, 7, 10) Mu Musena Usalalite  Wiindaawo mwakalinga libokoshi lya cipangano lya golodi ilyo lyakalinga kutondesha ayi Yehova mwaali. (Kulo. 25:​21, 22) Mupailishi munene eenkabo ngowakalinga kusuminishikwa kunjila mu Mumusena Usalalite Wiindaawo linkanda lyomwibo pa mwaaka, pa Bushiku bwa Kusalashikwa Kuswa Kushibiibi. (Lefi. 16:​2, 17) Mwaaka amwaaka pabushiku ubu, wakalinga kunjila mumusena uyu abulowa bwa shinyama kwaamba ayi alekelelwe shibiibi shakwe asha bene Isilaeli boonse. Mukuya kwaciindi, Yehova wakasebensesha mushimu usalashi kucafwa bantu bakwe kunyumfwishisha shintu shakalinga mu tente yakulambililaako ncoshakalinga kwimikaninaako.—Ebu. 9:​6-8.

13. Ino Musena Usalalite alimwi a Musena Usalalite Wiindaawo wakalinga mu tente yakulambililaako uleemikaninaako nshi?

¹³ Beneklistu mbobalambila Yehova. Bashikwiiya bakwe Klistu baniini bakananikwa amushimu usalashi alimwi balicite bushicibusa bulibetele a Yehova. Bashikwiiya aba bali 144,000 balaakusebensa mbuli bapailishi pomwi a Yesu kwiculu. (Ciyu. 1:6; 14:1) Musena Usalalite wakalinga mu tente yakulambililaako, uleemikaninaako bushicibusa mbobacite a Lesa mbuli bana bakwe mbwaakananika amushimu usalashi ndyebacili pacishi. (Loma. 8:​15-17) Musena Usalalite Wiindaawo wakalinga mu tente yakulambililaako, uleemikaninaako kwiculu uko Yehova nkwaakala. ‘Cisani cishitilisha’ ico cakalinga kupansaanya Musena Usalalite a Musena Usalalite Wiindaawo, cileemikaninaako mubili wakwe Yesu wa buntu. Yesu naakwiinga wakatolelela kuba amubili wa buntu, naakwiinga taakwe kuya kwiculu mbuli Mupailishi Munene wiindaawo mu tempele yakumushimu. Aboobo Yesu ndyaakafwa akwaaba mubili wakwe wa buntu, wakapa kwaamba ayi cikonsheke ku Beneklistu bananikitwe boonse kunoobushikwa akuya kwiculu. Abalo balyeelete kutaanguna kufwa akubushikwa amubili wamushimu, kwaamba ayi batambule cilambu cabo cakuya kwiculu. (Ebu. 10:​19, 20; 1 Koli. 15:50) Yesu ndyaakabushikwa, wakenjila mu Musena Usalalite Wiindaawo wa tempele yakumushimu. Alimwi bananikitwe boonse abalo mobeshikunjila akuba pomwi anguwe.

14. Kweelana a Bene Ebulu 9:​12, 24-26, ino nceebonshi bubaambo Yehova mbwaakabika bwa kumulambila kwiinda mumulambu wakwe Yesu buliinditeewo abuumbi?

¹⁴ Makani aya alatucafwa kushiba ayi bubaambo Yehova mbwaakabika bwa kumulambila kwiinda mumulambu wakwe Yesu Klistu Mupailishi wesu munene, buliinditeewo abuumbi. Muciindi ca bene Isilaeli, mupailishi munene wakalinga kunjila mu Musena Usalalite Wiindaawo bantu ngobakayaka, abulowa bwa shinyama. Sombi Yesu “wakenjila mwiculu mwiine mwiine,” musena usalalite abuumbi kwiindaawo, akubonekela kunembo lyakwe Yehova. Lyalo wakapa mpindu ya buumi bwakwe bumaninite “kwaamba ayi akushe shibiibi [shesu] kwiinda mukulibenga kwakwe.” (Amubelenge Bene Ebulu 9:​12, 24-26.) Mulambu wakwe Yesu ngoopa kwaamba ayi tulekelelwe shibiibi shesu cakumaninina. Kweelana ambweshi twiiye mumapalagilafu atokonkelaawo, soonse inga twalambila Yehova mu tempele yakwe yakumushimu, inga caba ayi tutolangila kuya kwiculu na kukala pacishi.

15. Ino mbaani bakalinga kusebensela mulubaansa lwakalinga pa tente yakulambililaako?

¹⁵ BaJuda mbobakalinga kulambila Yehova. Pa tente yakulambililaako pakalinga lubaansa lwakalinga kushingulukitwe alubumbu, umo bapailishi mobakalinga kusebensela ncito shabo. Mulubaansa momwakalinga cipaililo cinene ca mukuba mpobakalinga kutentela tununkila kabotu alimwi acakubikamo maanshi camukuba, bapailishi mobakalinga kusamba kumaansa akumyeendo kwaamba ayi balisalashe kabatana kuya mukusebensa ncito yabo isalalite. (Kulo. 30:​17-20; 40:​6-8) Nacibi boobo, ma tempele ayo akesa mukuyakwa alo akalinga kucite alubaansa lwa kunsengwe  umo bantu batakalinga bapailishi mobakalinga kwiimikana pakulambila Lesa.

16. Ino mbaani basebensela mu lubaansa lwa mukati alubaansa lwa kunsengwe lwa tempele yakumushimu?

¹⁶ Beneklistu mbobalambila Yehova. Bananikitwe bacili pacishi kabatana kuya mukutalika kusebensa mbuli bapailishi pomwi a Yesu kwiculu, balatolelela kusebensa cakushomeka mu lubaansa lwa mukati lwa tempele yakumushimu. Cakubikamo maanshi cinene cakalinga kuba pa tente yakulambililaako amu ma tempele, ncintu ciyandika cibeebalusha ayi balyeelete kutolelela kuba basalalite lwakumubili alwakumushimu. Alimwi Beneklistu boonse mbobeelete kunoocita. Ino nkuli bamu “likoto linene” abo bacafwilisha bamakwabo Klistu cakushomeka, nkobasebensela Yehova? Mutumwi Joni wakababona kabeemfwi ‘kunembo lya cuuna ca bwaami . . . Balasebensela [Lesa] incito isalalite malumwi amashiku.’ Bamu likoto linene balacita boobo pano pacishi mu lubaansa lwa kunsengwe lwa tempele yakumushimu. (Ciyu. 7:​9, 13-15) Tulalumba abuumbi pacoolwe ncotucite cakulambila Yehova mu tempele yakwe inene yakumushimu!

17. Ino ni milambu nshi njeenga twapa kuli Yehova?

¹⁷ Beneklistu boonse balicite coolwe cakubenga milambu kuli Yehova kwiinda mukusebensesha ciindi, nkusu alimwi ashintu shabo kwaamba ayi batole sha Bwaami panembo. Bweenka mutumwi Paulo mbwaakalwiita Beneklistu bene Ebulu, lyoonse inga katupa kuli Lesa “mulambu wakulumbaisha, nkokwaamba ayi cisepo ca milomo yesu iyo yaambilisha patuba liina lyakwe.” (Ebu. 13:​15, NWT) Inga twatondesha ayi tulalumba pacoolwe ncotucite cakulambila Yehova, kwiinda mukucita nsheenga twacikonsha muncito yakwe.

18. Kweelana a Bene Ebulu 10:​22-25, ino nshiinshi nshotweelete kubikilako maano alimwi ino nshiinshi nshotweelete kutolelela kwiibaluka?

¹⁸ Amubelenge Bene Ebulu 10:​22-25. Kumamanino ankalata Paulo njaakalembela bene Ebulu, wakaamba pa mbasu shimwi shakulambila kwesu nshotweelete kubikilako maano. Mbasu ishi shileelikaawo kupaila kuli Yehova, kushimikilako bamwi, kucanika kumabungano, alimwi akuyuminishanya ‘bunene bunene ndyetutoobona bushiku [bwakwe Yehova] ndyebutooya cisena pafwiifwi.’ Kumamanino a libuku lya Ciyubululo, munjelo wakwe Yehova wakaamba ayi: ‘Lambila Lesa!’ (Ciyu. 19:10; 22:9) Wakaamba maswi aya mankanda obilo kutondesha kuyandika kwa kucita boobo. Atutolelele kwiibaluka makani ateshi oobu kunyumfwisha ngotweeya, aamba pa tempele inene yakwe Yehova yakumushimu alimwi apacoolwe cibotu ncotucite cakulambila Lesa wesu wiinditeewo!