1. Vyuma ali nakuhanjika kangelo, kaha vyatela kutulingisa twivwenga ngachilihi?

 KACHI nge kangelo mweza nakumilweza vyuma vimwe, kutala namumwivwilila tahi? Makumbi ano kangelo ali nakuhanjika kuli “vaze vatwama hamavu, navaka-mafuchi osena, navaka-miyachi yosena, navaka-malimi osena, navatu veka naveka vosena.” Vyuma muka ali nakuhanjika? Ali nakuhanjika ngwenyi: “Mwivwenu Kalunga woma, mutohwesenu ikiye . . . Lemesenu Uze atangile lilu, namavu.” (Kuso. 14:​6, 7) Yehova ikiye kaha Kalunga wamuchano uze vatu vosena vatela kulemesa. Tweji kumusakwililanga chikuma hakutuhana lisesa lyakumulemesela mutembele yenyi yakushipilitu.

2. Uno tembele yaYehova yakushipilitu yapwa ika? (Talenu nawa lipwata lyakwamba ngwavo “ Ovyo kayalumbununako.”)

² Uno tembele yakushipilitu yapwa yika, kaha tunahase ngachilihi kuyitachikiza kanawa? Tembele yakushipilitu kayapwa zuvo yize tunahase kumona namesoko. Yapwa jila yize alongesa Yehova yakumulemeselamo kuhichila mundando yakusokola yaYesu. Kaposetolo Paulu alumbunwine jila kaneyi mumukanda asonekelele vaka-Kulishitu vavaHepeleu vamulikulukaji lyamyaka lyakulivanga, vaze vapwile nakutwama muYuleya. b

3-4. Vyuma muka alizakaminyine Paulu hali vaka-Kulishitu vavaHepeleu vapwile muYuleya, kaha avakafwile ngachilihi

³ Mwomwo ika Paulu asonekelelele mukanda vaka-Kulishitu vavaHepeleu vaze vapwile nakutwama muYuleya? Pamo mwomwo  yavyuma vino vivali. Chatete, mangana avakolezeze. Vavavulu vakolelele mukwitava chavaYuleya. Pamo vatwamina vamukwitava chize vasezele vapwilenga nakuvatoleka mwomwo yakwalumuka nakupwa vaka-Kulishitu. Uno vavatolekelelenga ika? Mwomwo vaka-Kulishitu kavapwile natembele kuze valemeselelenga Kalunga, nalijiko lyakulumbila kuli Kalunga chipwe kupwa navapilishituko. Echi kachi chazeyesele lufwelelo lwavava tumbaji twaKulishitu. (Hepe. 2:1; 3:​12, 14) Kaha vamwe pamo vashinganyekele nakukinduluka kukwitava chavaYuleya.

⁴ Chamuchivali, Paulu asakile kuhanjika hatoma kuli vaka-Kulishitu vavaHepeleu ngwenyi kavapwile nakuzata nangolo mangana vevwishise kunangula chachihya chipwe chakujiminyina, chize chapwa “kulya chakutafunya” chamuMazu aKalungako. (Hepe. 5:​11-14) Chasoloka nge vamwe vatwalileho lika kukavangiza Jishimbi jize Kalunga ahanyine Mose. Chipwe ngocho, Paulu alumbunwine ngwenyi mawana vahanyinenga kweseka naJishimbi kawafumishilenga shili yosenako. Echi chikiko chalingishile Jishimbi ‘vajifumiseko.’ Paulu atwalileho kuvanangula muchano wakujiminyina. Anukishile vakwavo vaka-Kulishitu “lutalililo lwamwenemwene” luze lwapendamina hawana ahanyine Yesu uze watelelele kuvakafwa vapandame “kuli Kalunga.”—Hepe. 7:​18, 19.

5. Chuma muka twatela kwivwishisa mumukanda WavaHepeleu, kaha mwomwo ika?

⁵ Paulu alumbunwinyine vandumbwenyi vavaHepeleu ovyo vyalingishile kulemesa chavaka-Kulishitu chihambakane jila valemeselelengamo Kalunga kunyima. Jila yize vaYuleya valemeselelengamo Kalunga kweseka naJishimbi yapwile kaha “muvwimbimbi wavyuma vize vyapwile nakwiza, oloze vyuma vivene [vyapwa] vyakuli Kulishitu.” (Kolo. 2:17) Muvwimbimbi kawapwa chuma chiveneko. Chochimwe nawa, jila yize vaYuleya valemeselelengamo Kalunga kushikulu yapwile kaha muvwimbimbi wavyuma vivene vize vyapwile nakwiza. Twatela kutachikiza kanawa vyuma alongesa Yehova mangana vatukonekele jishili jetu numba tumulemese mujila yize etavila. Twesekesenu “muvwimbimbi” (jila vaYuleya valemeselelengamo Kalunga) “[ku]vyuma vivene” (jila vaka-Kulishitu veji kulemeselangamo Kalunga), kweseka nomwo vayilumbununa mumukanda wavaHepeleu. Kulinga ngocho, nachitukafwa tutachikize kanawa tembele yakushipilitu namulimo twazata mutembele kana.

6. Uno tavanaku vayizachishilenga mulimo muka?

⁶ Muvwimbimbi. Paulu ahanjikile hatavanaku yize vatungile kuli Mose mumwaka wa 1512 B.C.E. (Talenu chati yakwamba ngwavo “Muvwimbimbi—Vyuma Vivene.”) Tavanaku yapwile mbalaka yize vaIsalele vatambukilenga nayo mupambo. Vayizachishilenga hamyaka yakukokela ku 500 palanga nomu vatungile tembele muYelusalema. (Kulo. 25:​8, 9; Kula. 9:22) Eyi “mbalaka yakuliwanyina” yapwile chihela chize vaIsalele valemeselelenga Kalunga nakuhanyinaho mawana. (Kulo. 29:​43-46) Chipwe ngocho, yemanyinyineko nawa vyuma vyavinene chikuma vyapwile nakwiza mulwola lwavaka-Kulishitu.

7. Uno tembele yakushipilitu yejile nakupwako mwaka muka?

⁷ Vyuma Vivene. Tavanaku yakushikulu yapwile “muvwimbimbi wavyuma vyamwilu,” kaha yemanyinyineko tembele yaYehova yayinene yakushipilitu. Paulu ambile ngwenyi “eyi mbalaka [chipwe ngwetu tavanaku] yinapu chifwanyisa chavyuma viliko halwola luno.” (Hepe. 8:5; 9:9) Shikaho, eyi tembele kuyapwile halwola Paulu asonekelele vaHepeleu mukanda. Yaputukile kupwako mumwaka wa 29 C.E. Mumwaka kana mukiko vambapachishile Yesu, nakumuwavisa nashipilitu yajila nakuputuka kuzata “[mwa]kapilishitu wakulitulaho wamunene” waYehova mutembele yakushipilitu. c—Hepe. 4:14; Vili. 10:​37, 38.

8-9. Kweseka naWavaHepeleu 7:​23-27, chihandwa muka chatwama hali vapilishitu vakulitulaho vavaIsalele naKapilishitu Wakulitulaho wamunene, Yesu Kulishitu?

⁸ Muvwimbimbi. Kapilishitu wakulitulaho vamwitavishile kwimanyinako vatu kumeso aKalunga. Alone uze apwile kapilishitu wakulitulaho watete wavaIsalele, vamutongwele kuli Yehova hakukunjika tavanaku. Chipwe ngocho, Paulu alumbunwine ngwenyi, “vavavulu vapwilenga vapilishitu vakulishisashisa mwomwo kufwa chavahoneselenga kutwalililaho.” d (Tangenu WavaHepeleu 7:​23-27.) Kaha nawa hakuwana nge vapwile vatu vakuhona kukupuka, vasakiwilenga kuhana vimuna vakuvatula vakufwika hajishili javo. Echi chikiko chihandwa chatwama hali vapilishitu vakulitulaho vavaIsalele naKapilishitu Wakulitulaho wamunene, Yesu Kulishitu.

⁹ Vyuma vivene. Yesu Kulishitu hakupwa Kapilishitu Wakulitulaho, apwa “muka-kuzata . . . muchihela chajila namumbalaka yamuchano yize emikile Yehova, keshi mutuko.” (Hepe. 8:​1, 2) Paulu alumbunwine ngwenyi “oloze ikiye hakutwalaho lika nakuyoya haya myaka yosena, shikaho upilishitu wenyi kaweshi navaka-kuuswanako.” Ambile nawa ngwenyi Yesu “wakuzeneka majilo, wakuhandunuka kuli vaka-shili,” kaha nawa alihandununa navapilishitu vakulitulaho vavaIsalele, mwomwo “kasakiwa kuhananga vimuna vakuvatula hakumbi hakumbi” hajishili jenyi iveneko. Tutalenu jino omwo majiko akulumbila nawa vahanyinenga kushikulu vyalihandununa navyuma vivene veji kulinganga vaka-Kulishitu.

10. Uno wana vahanyinenga halijiko lyakulumbila lyaunengu wenyikililile kuchuma muka?

¹⁰ Muvwimbimbi. Kuwingililo watavanaku kwapwilenga lijiko lyakulumbila lyaunengu haze valumbilililenga vimuna vahanyinenga kuli Yehova. (Kulo. 27:​1, 2; 40:29) Chipwe ngocho, wana kana kawalingishile vatu vavakonekele jishili javo josenako. (Hepe. 10:​1-4) Wana  wavimuna vahanyinenga hatavanaku wemanyinyineko wana umwe kaha uze naukasokola vatu kujishili javo josena.

11. Lijiko muka lyakulumbila haze Yesu alihanyine kupwa wana? (WavaHepeleu 10:​5-7, 10)

¹¹ Vyuma vivene. Yesu atachikijile ngwenyi Yehova amutumine hano hamavu mangana ahane kuyoya chenyi kupwa ndando yakusokola vatu. (Mateu 20:28) Shikaho, omu Yesu vamumbapachishile alihanyine mangana alinge mwaya muchima waYehova. (Yowa. 6:38; Ngale. 1:4) Yesu alihanyine ivene halijiko lyakulumbila lyachifwanyisa, lize lyemanyinako “mwaya muchima” waKalunga mangana ou Mwana ahane kuyoya chenyi chakukupuka chahano hamavu. Yesu ahanyine kuyoya chenyi “kamwe kaha kunahu” mangana afwike jishili javatu vosena vaze navafwelela Kulishitu. (Tangenu WavaHepeleu 10:​5-7, 10.) Tutalenu nawa ulumbunwiso wavyuma vyapwile mukachi katavanaku.

12. Veya vengililenga mutupete twatavanaku?

¹² Muvwimbimbi. Tavanaku yalifwanyine najitembele jize vatungilenga muYelusalema, mukachi. Mukachi mwapwile vihela vivali, “Chihela Chajila” “[na]Chihela Chajila Chikuma,” kaha hakachi havatasanyine lihina. (Hepe. 9:​2-5; Kulo. 26:​31-33) MuChihela Chajila mwapwile chitumbikilo chalinongo, nalijiko lyakulumbila vyuma vyalivumba lyamwaza, namesa yakutumbikila jimbolo. “Vapilishitu vakuwavisa” vakiko vetavishile kwingilamo nakuzata milimo yavo yajila. (Kula. 3:​3, 7, 10) Oloze muChihela Chajila Chikuma mwapwile chikasha chalushiko chaulu chize chemanyinyinengako  kupwako chaYehova. (Kulo. 25:​21, 22) Kapilishitu wakulitulaho ikiye kaha vetavishile kwingila muChihela Chajila Chikuma kamwe mumwaka, haLikumbi Lyakulinga chaKufwika haShili. (Levi 16:​2, 17) Mwaka himwaka, engililenga muchihela kana namanyinga atunyama mangana alinge chakufwila hajishili jenyi najize jamuyachi wosena. Kutwala muze, Yehova asolwele hatoma vyuma vize vemanyinyineko kuvyuma vyapwilenga mutavanaku.—Hepe. 9:​6-8. e

13. Uno Chihela Chajila naChihela Chajila Chikuma vyapwile mutavanaku vyemanyinako ika kuli vaka-Kulishitu?

¹³ Vyuma Vivene. Tumbaji twaKulishitu vavandende kaha vanavawavisanga nashipilitu yajila, kaha veji kulivwisanga kawaha usoko wakulipwila naYehova. Ava vatu vakuheta ku 144,000 navakapwa vapilishitu nakuzachila hamwe naYesu mwilu. (Kuso. 1:6; 14:1) Chihela Chajila chamutavanaku chemanyinako kuvetavila kupwa vana vaKalunga shimbu vali hano hamavu. (Loma 8:​15-17) Chihela Chajila Chikuma chamutavanaku chemanyinako mwilu, muze atwama Yehova. “Lihina lyakuvatasana” lize lyahandunwine Chihela Chajila naChihela Chajila Chikuma lyemanyinako mujimba waYesu wanyama namanyinga uze wamuhonesele kuya mwilu nakupwa Kapilishitu Wakulitulaho wamutembele yakushipilitu. Yesu asokolwelele vaka-Kulishitu vawavisa vosena jila yakuya mwilu omu ahanyine mujimba wenyi kupwa wana wakusokola vatu. Navakiko nawa vatela kuseza mijimba yavo yanyama namanyinga numba vayenga nakutambula fweto yavo mwilu. (Hepe. 10:​19, 20; Koli. 1, 15:50) Omu Yesu asangukile hakiko engilile muChihela Chajila Chikuma chatembele yakushipilitu, muze veji kuyanga vosena vaze vawavisa.

14. Kweseka naWavaHepeleu 9:​12, 24-26, mwomwo ika tembele yaYehova yakushipilitu yapwila yayilemu chikuma kuhambakana yize yavaIsalele?

¹⁴ Tunamono jino ngwetu Yehova amona jila alongesa yakumulemeselamo yize yapendamina handando yakusokola nahaupilishitu waYesu Kulishitu kupwa vyavilemu chikuma. Kapilishitu wakulitulaho muIsalele engililenga namanyinga atunyama muChihela Chajila Chikuma chize vatungile kuvatu, oloze Yesu engilile “mwilu muvene,” muchihela chajila chikuma kuhambakana muze engililenga kapilishitu wakaIsalele, nakusoloka kumeso aYehova. Ahanyine kulema chakuyoya chenyi chahano hamavu chakukupuka “mangana afumiseko shili hakulihana ivene kupwa chimuna wakuvatula.” (Tangenu WavaHepeleu 9:​12, 24-26.) Wana ahanyine Yesu walingisa vatukonekele jishili jetu. Nganomu natushimutwila, numba nge twatwama nalutalililo lwakuyoyela mwilu chipwe hano hamavu, tuvosena tunahase kulemesela Yehova mutembele yakushipilitu.

15. Veya vazachililenga muchipango chamutavanaku?

¹⁵ Muvwimbimbi. Tavanaku yapwile nachipango chimwe muze vapilishitu vazachilililenga milimo yavo. Lijiko lyalinene lyaunengu lyakulumbila wana wakulumba lyapwililile muchipango, kwakamwihi nambashiya yaunengu muze mwapwilenga meya aze vazachishilenga vapilishitu hakulitomesa shimbu kanda vaputuke kuzata milimo yavo. (Kulo. 30:​17-20; 40:​6-8) Oloze jitembele japwilenga nawa nachipango chakusali muze vemanyinenga vaze kavapwile vapilishituko nakulemesa Kalunga.

16. Veya veji kuzachilanga muchipango chamukachi nachechi chakusali mutembele yakushipilitu?

¹⁶ Vyuma vivene. Vandumbu jaKulishitu vawavisa veji kuzachilanga muchipango chamukachi chahano hamavu chatembele yakushipilitu nakashishi, shimbu kanda vayenga nakupwa vapilishitu  mwilu hamwe naYesu. Mbashiya yayinene yameya yeji kwanukisanga vaka-Kulishitu vosena chishina chachilemu chikuma, ngwavo vatela kupwa vatoma kumujimba nakushipilitu. Jino liyongomena lyalinene lyavatu vaze veji kukundwizanga vandumbu jaKulishitu nakashishi, veji kulemeselanga kulihi Kalunga? Kaposetolo Yowano avamwene “vanemana kulutwe lwalitanda,” kulumbununa chipango chakusali, hano hamavu haze veji “[kuzachilanga Kalunga] mulimo wajila musana naufuku mutembele yenyi yajila.” (Kuso. 7:​9, 13-15) Chikupu vene, twatwama nakutokwa chachinene chakulemesela Yehova mutembele yenyi yakushipilitu.

17. Mawana muka aze tweji kuhananga Yehova?

¹⁷ Makumbi ano, vaka-Kulishitu vosena vali nakutokwa chakuhana mawana kuli Yehova kuzachisa lwola lwavo nangolo javo navikumba vyavo, mangana vakundwize Wangana waKalunga. Ngana muze kaposetolo Paulu akolezezele vaka-Kulishitu vavaHepeleu, nayetu tunahase “[kuhananga] Kalunga shimbu yosena chimuna wakuvatula wakumwalisa, yikiko mihako yamivumbo yetu yize yeji kuhanjikanga hatoma vyalijina lyenyi.” (Hepe. 13:15) Tunahase kusolola ngwetu twamona kulemesa Yehova kupwa chachilemu hakumuhananga mawana amwaza.

18. Kweseka namukanda WavaHepeleu 10:​22-25, vyuma muka vize katwatela kusuvilila navize katwatela kuvulyamako?

¹⁸ Tangenu WavaHepeleu 10:​22-25. Paulu akukulwile mukanda wenyi asonekelele vaHepeleu hakuvuluka vyuma vize katwatela kusuvililako omu tuli nakuzachila Yehova. Vyuma kana shina kulomba kuli Yehova, nakulwezako vakwetu vyalutalililo lwetu, nakulikungulwilanga hamwe mwachikungulwilo, nakulikolezezanga navakwetu “chikumanyi omu [tunamono ngwetu likumbi lyaYehova] linapandama kwakamwihi.” Kumakumishilo amukanda waKusoloka, kangelo kaYehova ahanjikile ngwenyi: “Lemesa Kalunga.” Ahanjikile mazu kana mapapa kavali mangana asolole kulema chamazu kana. (Kuso. 19:10; 22:9) Kanda natukavulyama ou muchano wakujiminyina tunalinangula watembele yaYehova yakushipilitu nakutokwa twatwama nacho chakulemesa Kalunga wangolo josenako.