1. Kañelu nakuhosha nindidi, nawa awa mazu anatukundami ñahi?

 NEYI kañelu wakeñaña kuhosha nanenu, komana mwadi kutiyilila kunsañu yinakukeña kuhoshayi? Kafwampi, makonu kañelu nakuhosha “kunyuza yejima, kunyichidi yejima, kumadimi ejima nikudi antu ejima.” Nakuhosha nindidi? Nakuhosha nindi, “Mutiyenu Nzambi woma nikumulemesha . . . Difukulenu kudi Owu waleñeli iwulu [niiseki].” (Chim. 14:6, 7) Yehova diyi Nzambi wumu hohu walala kwatela kudifukulawu antu ejima. Twasakililaña nankashi hakutwinka kukooleka kwakuwahi kwakudifukula kudi yena mutembeli yindi yeneni yakuspiritu!

2. Tembeli yakuspiritu yaYehova hichumanyi? (Talenu cheñi chikasha chinakwila nawu “ Muyabula Kutalisha Iyi Tembeli.”)

² Tembeli yakuspiritu hichumanyi, nawa kudihi kutunateli kuwana nsañu yalumbulula muyatalisha? Iyi tembeli yakuspiritu bayi neyi hichuma chakutuña namakasa chitwamonaña namesuku. Hintanjikilu yaYehova yakudifukwilamu yetejewa yashindamena hamulambu waYesu wefutu danyiloña. Kapostolu Pawulu walumbulwili mwatalisha iyi ntanjikilu mumukanda wasonekeleliyi akaKristu akusambila aHeberu ashakamineña muYudeya. b

3-4. Chumanyi chakameneneñayi Pawulu kutalisha hadi akaKristu aHeberu adiña muYudeya, nawa wayikwashili ñahi?

³ Muloñadi Pawulu chayisonekeleliyi mukanda akaKristu aHeberu adiña muYudeya? Hadaha, muloña waniyi yuma yiyedi. Chatachi, kulonda ayikoleshi. Amavulu hakachi kawu  akulilili mukudifukula kwawaYudeya. Akulumpi jawu jakudifukula mwadiñawu hakusambila atela ayiseheleña chelili ekali akaKristu. Muloñadi? Muloña akaKristu hiyadiña natembeli yayiwahi yakudifukwilamuku, adiñahu wanyi nakameña kakulambwilahu nyilambu kudi Nzambi nawa hiyadiñahu nawatupristu akuyikalakelaku. Chumichi chadi kuletesha atumbanji twaKristu kuzeya, kushilahu nichikuhwelelu chawu. (Heb. 2:1; 3:12, 14) Amakwawu hakachi kawu atela atoñojokeleña jakufunta mukudifukula kwawaYudeya.

⁴ Chamuchiyedi, Pawulu wayilejeli ana akaKristu aYudeya nindi hiyazatileña nañovu kutiyishisha ntañishilu yakuspiritu yayiha hela yakunamaku, dikwila nawu ‘yakuda yakola’ yekala Mwizu daNzambi. (Heb. 5:11-14) Chakadi nikujina, amakwawu hakachi kawu achidiña kulondela Nshimbi jaMosi. Hela chochu, Pawulu walumbulwili nindi nyilambu yakeñekeleña kwesekeja naNshimbi hiyadi kutwesha kufumishahu nshidi jejimaku. Muloña wachumichi, Nshimbi ‘ajifumishiliku.’ Dichi Pawulu watwalekelihu kudizisha antu chalala chakunama. Wayanukishili akwawu akaKristu “kuchiñeja kwabadika kuwaha” kwashindameneni hamulambu waYesu kwadi kuyikwasha chikupu kuswina “kwakwihi naNzambi.”—Heb. 7:18, 19.

5. Chumanyi chitwatela kutiyishisha mumukanda waAHeberu, nawa muloñadi?

⁵ Pawulu wayilumbulwilili amanakwindi aHeberu chaletesheli kudifukula kwawu kwawakaKristu kwiikali kwalema nankashi kubadika kudifukula kwadifukwileñawu kunyima. Njila yadifukwilileñamu aYudeya kwesekeja naNshimbi yadiña hohu “himwevulu wayuma yakenza, ilaña yuma yalala yayumiyi yaKristu.” (Kol. 2:17) Mwevulu hichinjikijilu hohu chinakwimenaku chuma chacheni, ilaña bayi neyi mwevulu dichuma chacheniku. Munjila yoyimu, njila mwadifukwilileñawu aYudeya akushankulu yadiña hohu himwevulu wachuma chalala chadiña nakwinza. Twatela kutiyishisha mwatalisha ntanjikilu yatushilaku Yehova yakutwanakenenamu nshidi jetu kulonda tudifukuleña kudi yena munjila yetejayi. Twesekejenu “mwevulu” (njila yadifukwilileñamu aYudeya akushankulu) ‘nayuma yalala’ (njila yadifukwilañamu akaKristu), neyi chalumbululawu muAHeberu. Neyi twila mwenimu, tukutiyishisha mwatalisha tembeli yakuspiritu nichiyatukundama.

6. Tabanaka ayizatishileña ñahi?

⁶ Njila yadifukwilileñamu aYudeya. Nsañu yahosheleñayi Pawulu yashindameneni hatabanaka  yatuñiliwu kudi Mosi mu 1512 B.C.E. (Talenu chati yinakwila nawu “Njila Yadifukwilileñamu aYudeya—Njila Yadifukwilañamu akaKristu.”) Tabanaka yadiña neyi itenti dasendeleñawu kudi aIsarela hakusambila kwejima kwayileñawu. Ayizatishili kwakwihi nayaaka 500 kushika nimpinji yatuñiliwu tembeli muYerusalema. (Kwid. 25:8, 9; Kuch. 9:22) Idi “tenti dakubulakena” didu iluña kwayileñawu aIsarela nakulomba kudi Nzambi, kuhana nyilambu yawu nikudifukula. (Kwid. 29:43-46) Hela chochu, tabanaka yemeneneñaku cheñi chuma chasweja kubadika chadiña nakwinza hadi akaKristu.

7. Mpinjinyi yekaliliku tembeli yakuspiritu?

⁷ Njila yadifukwilañamu akaKristu. Tabanaka yakushankulu yadiña “mwevulu wayuma yamwiwulu,” nawa yemeneneñaku tembeli yeneni yakuspiritu yaYehova. Pawulu wahosheli nindi “idi itenti [hela netu, tabanaka] hichinjikijilu chayuma yinakumwekana hayinu mpinji.” (Heb. 8:5; 9:9) Dichi hampinji yayisonekeleliyi aHeberu, tembeli yakuspiritu adiña ayiluka dehi kudi akaKristu. Yekaliliku mu 29 C.E. Muchina chaaka, Yesu amupapatishili, amuwayishili naspiritu yajila nawa watachikili kukalakela mutembeli yakuspiritu hamu neyi “kapristu muneni wabadika” waYehova. c—Heb. 4:14; Yilw. 10:37, 38.

8-9. Kwesekeja naAHeberu 7:23-27, chaambwinyi cheneni chekala hakachi kawatupristu amaneni awaIsarela naKapristu Muneni wabadika, Yesu Kristu?

⁸ Njila yadifukwilileñamu aYudeya. Kapristu muneni diyi etejeliwu kwimenaku antu kudi Nzambi. Kapristu muneni watachi waIsarela, Aroni, amutondeli kudi Yehova hampinji yajilikiliwu tabanaka. Hela chochu, neyi chalumbulwiliyi Pawulu, “antu amavulu ekalileña atupristu mukudisinsa-sinsa muloña wakwila kufwa kwayikañesheleña kutwalekahu kuzata iwu mudimu.” d (Tañenu AHeberu 7:23-27.) Nawa chineli ana atupristu amaneni adiña abula kuwanina, adiña nakulambula nyilambu niyahanshidi jawu aweni. Ichi dichaambu cheneni chekala hakachi kakapristu muneni wawaIsarela naKapristu Muneni wabadika, Yesu Kristu.

⁹ Njila yadifukwilañamu akaKristu. Hakwikala kapristu wetu muneni, Yesu Kristu ‘himukakukalakela . . . mwitenti dalala dalemeniyi Yehova, bayi muntuku.’ (AHeberu 8:1, 2) Pawulu walumbulwili nindi “chineli [Yesu] wahandaña haya nyaaka nanyaaka, wupristu windi hiwukweti answanaku.” Pawulu wabombelelihu nindi Yesu wekala “wakadi kutamishewa, waambuka kudi akanshidi” nawa nindi kwaambukaku nawatupristu amaneni awaIsarela, “Yena hakeñekaña kulambula nyilambu [hefuku-hefuku]” yahanshidi jindiku. Ichi dinu talenu chaambu chekala hakachi katumeña ninyilambu yazatishileñawu mukudifukula kwawaYudeya nanoyu yazatishañawu mukudifukula kwawakaKristu.

10. Nyilambu yalambwilileñawu hakameña kawuneñu yadiña nakwimenaku kwodi?

¹⁰ Njila yadifukwilileñamu aYudeya. Hanji yawiñililu watabanaka ashilihu kameña kawuneñu hamulambwilileñawu Yehova nyilambu yayimuna. (Kwid. 27:1, 2; 40:29) Hela chochu, ayina nyilambu hiyadi kuletesha antu kuyanakena nshidi jawu jejimaku. (Heb. 10:1-4) Ayina nyilambu yayimuna yatwalekeliwu kuhana hatabanaka yadiña nakwimenaku mulambu wumu hohu wakakuula antu chikupu.

11. Kameña kamuchidinyi hadihanininiyi Yesu kwikala mulambu? (AHeberu 10:5-7, 10)

 ¹¹ Njila yadifukwilañamu akaKristu. Yesu welukili nindi Yehova wamutemesheli hanu hamaseki kulonda ahani wumi windi kwikala ifutu danyiloña dakukuula nachu antu. (Mat. 20:28) Dichi hampinji yamupapatishileñawu, Yesu wadihanini yomweni kwila chuma chakeñeleñayi Yehova. (Yow. 6:38; Ñal. 1:4) Yesu wadihanini yomweni hakameña kachifwikija kemeneneñaku “nkeñelu” yaNzambi yakwila nawu Mwanindi akahani wumi windi wawanina. Yesu wahanini wumi windi “kamu hohu” kulonda ajimi hela kubuta haya nyaaka nshidi jawantu ejima amukuhwelelaña Kristu. (Tañenu AHeberu 10:5-7, 10.) Kuhiñahu, tukuhanjeka chemenañaku yuma yadiña mukachi katabanaka.

12. Anyi hohu etejeliwu kwiñila mukapeka-hikapeka kamutabanaka?

¹² Njila yadifukwilileñamu aYudeya. Tabanaka nijitembeli jatuñiliwu muYerusalema mukuhita kwampinji, ajituñili chochimu mukachi. Mukachi mwadiña tupeka tuyedi, “Mwiluña Dajila” “[ni]Mwajila Chikupu,” nawa itu tupeka atwaambwili nehina dakujika nachu dakuchima chiwahi. (Heb. 9:2-5; Kwid. 26:31-33) Mwajila mwadiña chakutentekahu inoñu chawuru, kameña kakwochelahu insensi nimesa hakutenteka mankendi kumesu aNzambi. “Atupristu awayishiliwu” hohu diwu etejeliwu kwiñila Mwajila nakuzatilamu nyidimu yawu yajila. (Kuch. 3:3, 7, 10) Mwajila Chikupu mwadiña chimbañu chawuru chachitiyañenu chemeneneñaku kwikalahu kwaYehova. (Kwid. 25:21, 22)  Kapristu muneni hohu diyi etejeliwu kupandakana ihina dakujika nachu nakwiñila Mwajila Chikupu kamu hachaaka Hefuku daKubuta haNshidi. (Lev. 16:2, 17) Hachaaka-hachaaka, weñilileña mukachi namashi awayimuna nakubuta hanshidi jindi yomweni nijamuza wejima. Nkumininaku, Yehova, kuhitila mukuzatisha spiritu yindi yajila, wamwekesheli hatooka mwatalishili iyi yuma yadiña mutabanaka.—Heb. 9:6-8.

13. Mwajila niMwajila Chikupu mwamutabanaka mwemenañaku yumanyi mukudifukula kwawakaKristu?

¹³ Njila yadifukwilañamu akaKristu. Naambala yawatumbanji twaKristu antesha hohu ayiwayisha naspiritu yajila, nawa adiluñishaña wubwambu wadimena naYehova. Awa a 144,000 akakalakala hamu neyi atupristu mwiwulu naYesu. (Chim. 1:6; 14:1) Mwajila mwamutabanaka mwemenañaku kutondewa kwawu kwakwikala anyana kaNzambi akuspiritu hachidiwu hamaseki. (Rom. 8:15-17) Mwajila Chikupu mwamutabanaka mwemenañaku mwiwulu, mwashakamayi Yehova. “Ihina dakujika nachu” daambwili Mwajila naMwajila Chikupu demenañaku mujimba waYesu wawuntu wamukañesheleña kwiñila mwiwulu hamu neyi Kapristu Muneni wabadika wamutembeli yakuspiritu. Chelili ahani mujimba windi kwikala mulambu wakukuula nachu antu, Yesu wayenzunwinini njila akaKristu ejima awayishewa yakuya nakwikalilamu nawumi mwiwulu. Atela cheñi kushiya nyijimba yawu yawuntu hakwila atambwili wufwetu wawu wamwiwulu. (Heb. 10:19, 20; 1 Kor. 15:50) Hanyima yakwila Yesu anamusañuli dehi, weñilili Mwajila Chikupu mwamutembeli yakuspiritu, mwayaña nakumuwanawu awayishewa ejima.

14. Kwesekeja naAHeberu 9:12, 24-26, yumanyi yaleteshaña ntanjikilu yaYehova yatembeli yakuspiritu kwikala yabadika?

¹⁴ Ichi tunateli kumona wunsahu wunakumwekesha hatooka chabadika ntanjikilu yaYehova yakudifukula kwalala yashindamena hamulambu wefutu danyiloña nihawupristu waYesu Kristu. Kapristu muneni muIsarela weñilileña Mwajila Chikupu mwakutuña kudi antu nanyilambu yamashi awayimuna, ilaña Yesu weñilili “mwiwulu mwamweni,” mwabadika maluña ejima kujila, nakwimana kumesu aYehova. Mwiwulu wahanini wuswa wamwinkeliwu wakushakama hamaseki neyi muntu wawanina kukoola etu “kulonda yafumishihu nshidi kuhitila mukudilambula yomwenindi.” (Tañenu AHeberu 9:12, 24-26.) Mulambu waYesu dimulambu wabadika chikupu wajimaña nshidi haya nyaaka. Neyi chitukuhanjekahu, chili kuchiñeja kwetu kwakuya mwiwulu indi kwiji kwakushakama hamaseki, wejima wetu tunateli kudifukula kudi Yehova mutembeli yindi yakuspiritu.

15. Anyi azatilileña mulubanza lwamutabanaka?

¹⁵ Njila yadifukwilileñamu aYudeya. Tabanaka yadiña nalubanza lumu. Lwadiña neluña deneni kwanyeñumwishiliwu mbañu mwakalakeleleñawu atupristu nyidimu yawu. Mulubanza mwadiña kameña keneni kawuneñu kakulambwilahu nyilambu yakushita, kushilahu nibeseni yawuneñu yamenji yazatishileñawu atupristu hakuditookesha awenawu henohu kanda atachiki kuzata mudimu wawu wajila. (Kwid. 30:17-20; 40:6-8) Hela chochu, matembeli atuñiliwu mukuhita kwampinji adiña cheñi nalubanza lwahanji mwadiña nakwimana ana abulili kwikala atupristu nakudifukula kudi Nzambi.

16. Anyi azatilaña munawa malubanza ayedi amutembeli yakuspiritu?

¹⁶ Njila yadifukwilañamu akaKristu. Henohu kanda ayi nakukalakala hamu neyi atupristu naYesu mwiwulu, amanakwindi awayishewa achidi hamaseki akalakelaña nakashinshi mulubanza lwamukachi lwamutembeli yakuspiritu.  Beseni yeneni yamenji yadiñamu yayanukishaña chuma chalema neyi chiyatwanukishaña ninetu akaKristu ejima, kutwalekahu kwikala nayilwilu yayiwahi nawa akadi majilu kuspiritu. Hanu dinu, kudihi kwadifukwilaña “izaza deneni,” dakwashaña chikupu amana kwaKristu awayishewa? Kapostolu Yowanu wayimweni “anemani kumbidi yetanda,” demenañaku lubanza lwahanji hanu heseki, “[munakumukalakelawu Nzambi] mudimu wajila mwaana niwufuku mutembeli yindi.” (Chim. 7:9, 13-15) Twasakililaña chikupu hakutwinka kukooleka kudi Yehova kwakudifukwila mutembeli yindi yeneni yakuspiritu!

17. Nyilambwinyi yitwatela kumulambula Yehova?

¹⁷ Makonu akaKristu ejima akweti kukooleka kwakumulambula Yehova nyilambu kuhitila mukuzatisha mpinji yawu, ñovu niyuma yikwetiwu kulonda atwali nyidimu yaWanta waNzambi hambidi. Neyi chochayilejeliwu akaKristu aHeberu kudi kapostolu Pawulu, tunateli “[kumulambulaña] Nzambi mpinji yejima mulambu wakushimeka, dikwila nawu, nyikaabu yakunyivumbu yetu yashimunaña hatooka ijina dindi.” (Heb. 13:15) Tunateli kumwekesha netu twalemesha kukooleka kutukweti kwakudifukula kudi Yehova neyi tumukalakelaña kwesekeja nahakumina ñovu jetu.

18. Kwesekeja naAHeberu 10:22-25, yumanyi yitwatela kwila, nawa yumanyi yitwatela kubula kuvulamena?

¹⁸ Tañenu AHeberu 10:22-25. Kumakumishilu amukanda windi wayisonekeleliyi aHeberu, Pawulu washimwini yuma yashiyashana yitwatela kwilaña mpinji yejima hampinji yitunakudifukula kudi Yehova. Yumiyi munabombeli kulomba kudi Yehova, kushimuna kuchiñeja kwetu, kupompela hamu nawakwetu nikudikolesha wumu namukwawu, “chineli ifuku [daYehova] dinakuswina kwakwihi twileña nankashi yumiyi.” Kumakumishilu ansañu yamuchimwekeshu, kañelu kaYehova wafuntishilihu awa mazu kayedi nakukonkomwena nindi: “Difukuli kudi Nzambi!” (Chim. 19:10; 22:9) Bayi tuvulamena ichi chalala chakunama chakuspiritu chahosha hatembeli yeneni yakuspiritu yaYehova nikukooleka kweneni kutukweti kwakudifukula kudi Nzambi yetu wabadikaku!