1. ¿Tlake kiijtoua se ángel, uan tlake moneki tijchiuasej?

 TLAJ se ángel mitskamanaljuiskia, ¿kuali tijtlakakiliskia? Ipan ni tonali se ángel kiniljuia nochi maseualmej: “Xikimakasikaj Toteko. [ . . . ] Xijueyimatikaj yajaya tlen kichijki iluikaktli uan tlaltipaktli, nopa ueyi atl uan nochi ameli” (Apoc. 14: 6, 7). Nochi moneki san Jehová tijueyichiuasej, pampa ya eli toTeotsij katli melauak. Tlauel tiyolpakij uan tikitaj kej se ueyi tlateochiualistli pampa tijueyichiuaj Jehová ipan nopa teokali tlen tlatsejtseloltik.

2. ¿Tlake eli nopa teokali tlen tlatsejtseloltik? Nojkia xikita nopa recuadro “ Tlen amo kiixnextia”.

² Nopa teokali tlen tlatsejtseloltik amo nelnelia eli se kali. Ni kiixnextia nochi tlen techpaleuia ma tijueyichiuakaj Jehová kej kinamiki, uan nochi ni tijpiaj pampa Jesús techmakixtik ika imikilis. Ipan achtoui siglo apóstol Pablo kiijtok se keski tlamantli tlen techpaleuia ma tijueyichiuakaj toTeotsij. Eltok ipan amatlajkuiloli tlen kintitlanilik toikniuaj hebreos katli itstoyaj Judea. b

3, 4. ¿Tlake kitekipachouayaya Pablo, uan kenijkatsa kinpaleuik hebreos?

³ ¿Kenke Pablo kintlajkuiljuilik toikniuaj hebreos? Pampa kitekipachouayaya ome tlamantli: se, kinekiyaya kinyolchikauas. Miakej tlen inijuantij moskaltijtoyaj ipan religión judía, uan uelis katli tlayakanayayaj ipan nopa religión kinpinajtiyayaj pampa mochijtoyaj Cristo itokilijkauaj uan amo kipiayayaj se ueyi teokali, tlaixpamitl yon kinyakanayayaj sacerdotes. Nopa uelis kichijki ma moyolkokokaj toikniuaj hebreos uan ayokmo kuali ma tlaneltokakaj (Heb. 2:1; 3:12, 14). Yeka  uelis se keskij kinekiyayaj tlakuepilisej ipan nopa religión judía.

⁴ Ome, apóstol Pablo kiniljuik Cristo itokilijkauaj monekiyaya kichiuasej kampeka kikuamachilisej nopa yankuik tlamachtili o nopa tlamachtili tlen ouij tlen eltok ipan Biblia (Heb. 5:11-14). Se keskij nojua moyakanayayaj ika nopa Tlanauatili tlen kimakakej Moisés. Yeka Pablo kiniljuik maske temakayayaj nopa tlakajkaualistli, ayokmo kinpaleuiyaya. Uan nojkia kiniljuik nopa Tlanauatili ayokmo kipiayaya ipati. Teipa kinixtomilik se keski tlamachtili tlen ouij uan kiniljuik nama kipiayayaj “tlen achi kuali” pampa Jesús temaktilik inemilis, uan nopa kinpaleuiskia ma mouampojchiuakaj iuaya toTeotsij (Heb. 7:18, 19).

5. ¿Tlake moneki kuali tijkuamachilisej, uan kenke?

⁵ Apóstol Pablo kinixtomilik toikniuaj hebreos más kuali kiueyichiuayayaj Jehová, uan amo kej kiueyichiuayayaj israeleuanij uejkajkia. Kiijtok kej tlaueyichiuayayaj judíos eliyaya kej “se akauilotl tlen kinextik tlen ualaskia teipa. Pero ama ualajtok Cristo, uan ayok ipati nochi nopa tlanauatili tlen uejkajkia” (Col. 2:17). Se akauili amo nelnelia eli se tlamantli. Kej tlaueyichiuayayaj judíos, nojkia eliyaya kej se akauili pampa san kiixnextiyaya tlen mochiuaskia teipa. Yeka moneki kuali tijkuamachilisej tlake kiijtosneki nopa teokali tlen tlatsejtseloltik tlen Jehová kitlalijtok. ¿Kenke? Pampa nopa techpaleuia ma tijueyichiuakaj Jehová kej ya kineki uan ma techtlapojpoljui totlajtlakoljuaj. Achtoui tikitasej tlake kiixnextia nopa “akauili” (kej tlaueyichiuayayaj judíos) uan nojkia tikitasej “tlen kiixnextia” (kej tlaueyichiuaj Cristo itokilijkauaj). Yeka ma tikitakaj nopa amatlajkuiloli tlen kintitlanilijkej toikniuaj hebreos, pampa nopa techpaleuis ma tijkuamachilikaj tlake kiijtosneki nopa teokali tlen tlatsejtseloltik uan kenijkatsa techpaleuia.

6. ¿Kenijkatsa kitekiuiyayaj nopa tabernáculo?

⁶ Akauilotl. Kema Pablo kiixtonki tlake kiijtosneki nopa teokali tlen tlatsejtseloltik, kamanaltik tlen nopa tabernáculo tlen kichijki Moisés ipan xiuitl 1512 a.u.J., (xikita nopa tlaixkopinkayotl “Akauilotl uan tlen kiixnextia”). Nopa tabernáculo nojkia kiixmatiyayaj kej kampa Jehová mopantiyaya ininuaya maseualmej, nopaya israeleuanij  kiueyichiuayayaj Jehová uan kimakayayaj tlakajkaualistli (Éx. 29:43-46). Kema israeleuanij yauiyayaj sejkanok, nojkia kiuikayayaj nopa tabernáculo (Éx. 25:8, 9; Núm. 9:22). Uan kitekiuijkej nechka 500 xiuitl pampa teipa kichijchijkej nopa teokali ipan Jerusalén. Nopa tabernáculo kiixnextik se tlamantli tlen tlauel ipati tlen teipa kiseliskiaj Cristo itokilijkauaj.

7. ¿Kema pejki nopa teokali tlen tlatsejtseloltik?

⁷ Tlen kiixnextia. Nopa tabernáculo san kiixnextiyaya “tlen nelnelia eltok nepa iluikak” uan nojkia kiixnextiyaya nopa teokali tlen tlatsejtseloltik. Pablo kiijtok: “Ni tlamantli technextilia kejatsa nochi mopatlatok ama” (Heb. 8:5; 9:9). Uajka kema Pablo kintlajkuiljuilik toikniuaj hebreos, toTeotsij ya kitlalijtoya nopa teokali tlen tlatsejtseloltik. Pejki ipan xiuitl 29 kema Jesús moatsonpoliuiltik uan toTeotsij kitlapejpenik ika ichikaualis uan kitekimakak kej Sumo Sacerdote tlen nopa teokali tlatsejtseloltik (Heb. 4:14; Hech. 10:37, 38). c

8, 9. Kej kiijtoua Hebreos 7:23–27, ¿kenke Jesús amo eli sanse kej nopa sumo sacerdotes katli itstoyaj Israel?

⁸ Akauilotl. Nopa sumo sacerdote kitlajtlaniyaya toTeotsij ma kintlapojpoljui israeleuanij. Aarón elki nopa achtoui sumo sacerdote uan Jehová kitekimakak kema pejki motekiuia tabernáculo. Pero Pablo kiijtok: “Achtouia itstoyaj miak totajtsitsij, pampa kema mijki sejse inijuantij, monekiyaya seyok ma kiitskis iteki” (xijpoua Hebreos 7:23-27). d Nopa sumo sacerdotes nojkia eliyayaj tlajtlakolejkej, yeka monekiyaya temakasej tlakajkaualistli uan kiampa Jehová kintlapojpoljuiskia. Inijuantij amo elkej sanse kej nopa Sumo Sacerdote Jesucristo.

⁹ Tlen kiixnextia. Nopa Sumo Sacerdote “Jesucristo tekiti [ . . . ] nepa ipan iluikak kampa nelnelia eltok Kampa Más Tlatsejtseloltik. Nopa teopamitl Toteco Dios iselti kichijki. Axtlachijchiuali ika ininma tlakamej” (Heb. 8:1, 2). Pablo kiijtok “Cristo itstos para nochipa”, uajka ayokmo monekis se akajya ma kitekipatla. Nojkia kiijtok “yajaya tlatsejtseloltik uan axkipia tlajtlakoli”, yeka amo monekiyaya kichiuas kej sumo sacerdotes, pampa inijuantij “mojmostla kimakayayaj Toteko Dios tlakajkaualistli” uan kiampa Jehová nojkia kintlapojpoljuiyaya inintlajtlakoljuaj. ¿Uan tlake kiixnextia nopa tlaixpamitl uan nopa tlakajkaualistli? Ma tikitakaj tlake kiijtosneki.

10. ¿Tlake kiixnextia nopa tlakajkaualistli tlen temakayayaj ipan nopa tlaixpamitl?

¹⁰ Akauilotl. Kalixpa tlen nopa tabernáculo eltoya nopa tlaixpamitl tlen kichijchijtoyaj ika cobre, uan nopaya kimakayayaj tlakajkaualistli Jehová (Éx. 27:1, 2; 40:29). Maske temakayayaj nopa tlakajkaualistli, israeleuanij amo ueliyayaj kiixpolouaj nochi inintlajtlakoljuaj (Heb. 10:1-4). Nopa tlapialmej katli temakayayaj, kiixnextiyaya nopa tlakajkaualistli tlen kiixpoloskia inintlajtlakoljuaj nochi maseualmej.

11. ¿Tlake kiixnextia nopa tlaixpamitl kampa motemaktilik Jesús? (Hebreos 10:5-7, 10).

¹¹ Tlen kiixnextia. Jesús kimatiyaya Jehová kiualtitlantoya pampa kinekiyaya ma kinmakixti maseualmej tlen tlajtlakoli (Mat. 20:28). Yeka kema moatsonpoliuiltik, kejuak  moixnextik iixpa Jehová pampa kinekiyaya kichiuas tlen kinauatiskia (Juan 6:38; Gál. 1:4). Jesús temaktilik inemilis kejuak ipan se tlaixpamitl, ni kiijtosneki kichiuaskia “ipakilis Toteko”. Jehová kinekiyaya Jesús ma temaka inemilis tlen amo tlajtlakole, uan nelia kiampa kichijki “kema san se uelta motemaktilik”, kiampa kiixpolok inintlajtlakoljuaj katli tlaneltokaskiaj ipan ya (xijpoua Hebreos 10:5-7, 10). Nama tikitasej tlake eltoya ipan nopa tabernáculo uan tlake kiixnextia.

12. ¿San ajkia inijuantij kalakiyayaj ipan nopa ome cuartos tlen eltoya ipan tabernáculo?

¹² Akauilotl. Nopa tabernáculo uan nopa teokali tlen eltoya Jerusalén sanse kichijchijtoyaj. ¿Kenke? Pampa kitlajkoxelojtoyaj. Tlajko eliyaya“Kampa Tlatsejtseloltik” uan nopa seyok tlajko eliyaya “Kampa Más Tlatsejtseloltik”, uan ni cuartos kixelojtoyaj ika se cortina (Heb. 9:2-5; Éx. 26:31-33). Ipan nopa cuarto Kampa Tlatsejtseloltik eltoya se tlauilketsali, se tlaixpamitl kampa kitlatiyayaj incienso uan se mesa kampa kitlaliyayaj pantsi iixpa Jehová. San katli kintlapejpenijtoyaj kej sacerdotes, ueliyayaj kalakij Kampa Tlatsejtseloltik uan kiampa kichiuayayaj ininteki (Núm. 3:3, 7, 10). Uan ipan nopa cuarto Kampa Más Tlatsejtseloltik eltoya nopa kaxa tlen kichijchijtoyaj ika oro uan kiixnextiyaya Jehová itstoya ininuaya israeleuanij (Éx. 25:21, 22). San sumo sacerdote ueliyaya kalaki ipan ni cuarto, kalakiyaya sejse xiuitl ika inineso tlapialmej ipan  nopa tonali kema Kiixtsakuayayaj inintlajtlakoljuaj (Lev. 16:2, 17). Teipa Jehová ika ichikaualis kiniljuik se keskij itekipanojkauaj tlen kiixnextiyaya tlen eltoya ipan tabernáculo (Heb. 9:6-8). e

13. ¿Tlake kiixnextia nopa cuarto Kampa Tlatsejtseloltik uan nopa cuarto Kampa Más Tlatsejtseloltik?

¹³ Tlen kiixnextia. Jehová kintlapejpenijtok ika ichikaualis 144 mil Cristo itokilijkauaj uan kuali mouikaj iuaya. Inijuantij elisej sacerdotes uan tekitisej iluikak iuaya Jesús (Apoc. 1:6; 14:1). Jehová kintlapejpenia ika ichikaualis kema nojua itstokej ipan Tlaltipaktli uan kinita kej ikoneuaj. Nopa cuarto Kampa Tlatsejtseloltik, kiixnextia kema katli kintlapejpenijtokej kuali mouikaj iuaya Jehová (Rom. 8:15-17). Uan nopa cuarto Kampa Más Tlatsejtseloltik, kiixnextia iluikak kampa itstok Jehová. Nopa “cortina” tlen kixelouayaya nopa cuarto Kampa Tlatsejtseloltik uan nopa cuarto Kampa Más Tlatsejtseloltik, kiixnextia itlakayo Jesús. Kema kipiayaya itlakayo amo ueliyaya kalaki iluikak kej Sumo Sacerdote, tlen nopa teokali tlen tlatsejtseloltik. Kema temaktilik inemilis, kejuak kintlapouilik iluikaktli nochi tlapejpenilmej, yeka inijuantij nojkia moneki kikajteuasej inintlakayo kema yasej iluikak (Heb. 10:19, 20; 1 Cor. 15:50). Kema Jesús moyolkuik kalajki Kampa Más Tlatsejtseloltik, kampa tlapejpenilmej teipa nojkia mosentilisej iuaya.

14. Kej kiijtoua Hebreos 9:12, 24-26, ¿kenke tlauel kuali kej nama tijueyichiuaj Jehová?

¹⁴ Jesús ya temaktilik inemilis uan techyakana kej Sumo Sacerdote, yeka nama tlauel kuali tijueyichiuaj Jehová uan amo kej uejkajkia kichiuayayaj. Nopa cuarto kampa kalakiyaya sumo sacerdote ika inineso tlapialmej, kichijchijtoyaj maseualmej. Uan Jesús kalajki kampa tlauel tlatsejtseloltik pampa “kalajki nepa iluikak” iixpa Jehová, nopaya kimaktilik inemilis uan “kiampa ueliskia kitlamiltis inintlajtlakoljuaj maseualmej” (xijpoua Hebreos 9:12, 24, 25; 9:26 f). Jesús imikilis kiixtlaua nochi totlajtlakoljuaj. Nama tikitasej kenijkatsa nochi uelis tijueyichiuasej Jehová maske timotemachiaj tiitstosej iluikak o ipan Tlaltipaktli.

15. ¿Ajkia inijuantij tlatekipanouayayaj kalixpa tlen nopa tabernáculo?

¹⁵ Akauilotl. Nopa tabernáculo kipiayaya se kalixpamitl tlen kiyaualtsaktoyaj, nopaya sacerdotes kichiuayayaj ininteki uan eltoya nopa tlaixpamitl tlen kichijchijtoyaj ika cobre, kampa kitlatiyayaj tlakajkaualistli. Nojkia eltoya se paila tlen cobre kampa sacerdotes momajtekiyayaj uan moikxipajpakayayaj kema kichiuaskiaj ininteki (Éx. 30:17-20; 40:6-8). Nopa teokali tlen teipa kichijchijkej nojkia kipixtoya se kalixpamitl kampa katli amo eliyayaj sacerdotes kiueyichiuayayaj Jehová.

16. ¿Ajkia inijuantij kiueyichiuaj Jehová ipan kalixpamitl tlen eltok kalijtik uan ipan nopa kalixpamitl tlen eltok kalteno?

¹⁶ Tlen kiixnextia. Kema tlapejpenilmej nojua itstokej ipan Tlaltipaktli, ayamo elij sacerdotes iuaya Jesús. San kitekipanouaj Jehová ipan nopa kalixpamitl tlen eltok kalijtik tlen nopa teokali tlen tlatsejtseloltik. Nopa paila kampa momajtekiyayaj uan moikxipajpakayayaj sacerdotes kinilnamikilia  tlapejpenilmej uan tojuantij, moneki kuali timonejnemiltisej uan tijueyichiuasej Jehová kej kinamiki. ¿Uan kanke kiueyichiuaj Jehová katli kinpaleuiaj Cristo iikniuaj uan motemachiaj itstosej ipan Tlaltipaktli? Apóstol Juan kiitak moketstoyaj “imelak nopa ueyi silla” uan kitekipanouayayaj Dios “youali uan tonali”. Katli motemachiaj itstosej ipan Tlaltipaktli kiueyichiuaj Jehová ipan nopa kalixpamitl tlen eltok kalteno tlen nopa teokali tlen tlatsejtseloltik (Apoc. 7:9, 13-15). Tlauel tiyolpakij pampa maske timotemachiaj tiitstosej ipan Tlaltipaktli o iluikak, nochi ueli tijueyichiuaj Jehová ipan nopa teokali tlen tlatsejtseloltik.

17. ¿Tlake tlamantli uelis tijmakasej Jehová?

¹⁷ Nochi uelis tijueyichiuasej Jehová ika tlen tijpiaj. ¿Kenijkatsa uelis tijchiuasej? Uelis tijmakasej Jehová tochikaualis, tlen tijpiaj uan tijkixtisej tonali kema tijtekipanosej. Apóstol Pablo kiniljuik toikniuaj hebreos: “Ika tokamak ma tijueyichiuakaj Toteko ajachika”. Kema kiampa tijchiuaj, kejuak tijmakaj Jehová se tlamantli tlen tlauel ipati (Heb. 13:15). Kema tijtekipanouaj ika nochi toyolo, tijnextiaj tijtlaskamatiliaj pampa techkaua ma tijueyichiuakaj.

18. Kej kiijtoua Hebreos 10:22-25, ¿tlake moneki tijchiuasej, uan tlake amo kinamiki tikilkauasej?

¹⁸ (Xijpoua Hebreos 10:22-25). Kema Pablo nechka tlamiskia kiijkuiloua amatlajkuiloli Hebreos, kiijtok se keski tlamantli tlen moneki tijchiuasej tlaj nochipa tijnekij tijueyichijtosej Jehová. Ya technauatik ma timomaijtokaj, ma tikiniljuikaj sekinok tlen tijselisej teipa, ma timonechikokaj uan ma timoyolchikauakaj pampa Jehová nechka kitsontlamiltis tlen amo kuali. Ipan Apocalipsis 19:10 uan 22:9, se ángel techiljuia san Jehová ma tijueyichiuakaj. Amo kema ma tikilkauakaj tlen timomachtijkej ipan ni tlamachtili uan nochipa ma tijpatiitakaj pampa Jehová techkaua ma tijueyichiuakaj.