1. ¿Tlen kijtoua se ángel uan tejuan tlen moneki tikchiuaskej?

 TLA se ángel mitstlapouiskia, ¿tikkakiskia tlen mitsiluis? Axkan kajki se ángel tlen kintlapouia “akinmej oksekan chantij, tlatlamantli familias, akinmej tlatlamantli intlajtol uan akinmej chantij itech tlatlamantli altepemej”. ¿Tlen kinmiluia? Ye kinmiluia: “Xikmauilikan toTajtsin Dios uan xikueyichiuakan […] xikueyichiuakan akin okichijchi iluikak, tlaltikpak, mar uan kanin meya atl” (Apoc. 14:​6, 7). Tinochtin moneki tikueyichiuaskej Jehová porque san ye akin melauak toTajtsin Dios. Sapanoua tiktlasojkamatiliaj porque tikueyichiuaj itech itemplo espiritual.

2. ¿Tlen kijtosneki templo espiritual? (Noijki xikita recuadro “ Amo kijtosneki”).

² ¿Tlen kijtosneki templo espiritual uan kanin ijkuilitok itech Biblia? Templo espiritual amo kijtosneki se ueyi kali. Kijtosneki nochi tlen Jehová yokichi para matikueyichiuakan ken ye kineki. Ijkon okichi porque Jesús topatka omotemakak uan otechmakixti. Apóstol Pablo okijto seki tlamantli itech achto siglo itech non templo espiritual. Tikinmajsij itech carta tlen okinmijkuilili hebreos uan ochantiayaj altepetl Judea. b

3, 4. ¿Tleka Pablo okintlajkuilili hebreos uan ken okinpaleui?

³ ¿Tleka okintlajkuilili Pablo tokniuan hebreos tlen ochantiayaj altepetl Judea? Ijkon okichi porque okatka ome tlamantli miak ipati. Se, okintlajkuilili para kinyolchikauaskia.  Xamo yejuan okinpinauiayaj porque opejki kichiuaj ken Cristo uan ayakmo okichiuayaj ken judíos. ¿Tleka okinpinauiayaj? Porque amo okipiayaj seki tlamantli tlen okipiayaj judíos. Yejuan amo okipiayaj se templo kanin kiueyichiuaskiaj toTajtsin Dios, amo okipiayaj se altar kanin kintemakaskiaj yolkamej nion amo okinpiayaj teopixkej. Non uelis kichiuaskia ayakmo matlaneltokakan (Heb. 2:1; 3:​12, 14). Xamo sekimej omokuayejyekojkej oksepa kichiuaskiaj ijkon ken judíos okichiuayaj.

⁴ Ome, Pablo okinmilui hebreos amo omochijchikauayaj para okachi kajsikamatiskej tlamachtil tlen okachi oui noso tlen yankuik uan kajki itech iTlajtol toTajtsin Dios. Omonekiaya mochijchikauaskej momachtiskej uan non yetoskia ken ‘kikuaskiaj tlakuali’ (Heb. 5:​11-14). Sekimej ok okichiuayaj tlen okijtouaya iTlanauatil Moisés. Pero Pablo okinmilui tetliokolil tlen okijtouaya Tlanauatil makitemakakan amo okinpaleuiaya sepa makintlapojpoluikan. Ikinon ayakmo omonekiaya kichiuaskej tlen okijtouaya Tlanauatil. Satepan apóstol Pablo okinmachti seki tlamantli oui. Okinmilnamikti Jesús omotemakak makimiktikan uan non kinpaleuiskia makichiakan “itlaj okachi kuali” tlen melauak kinpaleuiskia mamotokikan inauak toTajtsin Dios (Heb. 7:​18, 19).

5. ¿Tlen moneki matikajsikamatikan uan tleka?

⁵ Pablo okinmilui ikniuan hebreos tleka axkan okachi kuali okiueyichiuayaj Jehová uan amo ken yiuejkika okiueyichiuayaj. Okijto ijkuak judíos okiueyichiuayaj toTajtsin Dios yetoskia “san iekauilo tlen satepan ualaskia”. Noijki okijto: “Pero Cristo iaxka tlen melauak” (Col. 2:17). Iekauilo se tlamantli amo techpaleuia matikmatikan ken kajki non tlamantli. Noijki ijkon ijkuak judíos okiueyichiuayaj toTajtsin Dios yetoskia san iekauilo tlen satepan ualaskia. Ikinon moneki matikajsikamatikan tlen kijtosneki templo espiritual. Non kijtosneki nochi tlen Jehová yokichi para matikueyichiuakan. Tla tejuan tikajsikamatij, uelis techtlapojpoluiskej uan uelis tikueyichiuaskej Jehová ijkon ken ye kineki. Axkan timomachtiskej ken mouika ijkuak judíos okiueyichiuayaj Jehová (yetoskia ken “iekauilo tlen satepan ualaskia”) uan ken kiueyichiuaj akinmej kichiuaj ken Cristo (yetoskia “tlen melauak”). Ikinon timomachtiskej tlen kijtoua carta tlen okinmijkuililijkej hebreos. Ijkon okachi tikajsikamatiskej tlen  kijtosneki templo espiritual uan tlen moneki tikchiuaskej.

6. ¿Tlen okichiuayaj itech tabernáculo?

⁶ Iekauilo tlen ualaskia. Ijkuak Pablo okijto tlen kijtosneki templo espiritual, omopaleui ika tlen okipiaya tabernáculo tlen okichi Moisés itech xiuitl 1512 achto itech xiuitl 1 (xikita kanin kijtoua “Iekauilo tlen ualaskia uan tlen melauak”). Tabernáculo noijki okiluiayaj kaltsintli kanin omonechikouayaj uan israelitas ompa okiueyichiuayaj toTajtsin Dios uan okintliokoliayaj yolkamej (Éx. 29:​43-46). Yejuan nochipa okiuikatinemiayaj ijkuak oksekan oyayaj ompa kanin tlauaki (Éx. 25:​8, 9; Núm. 9:22). Kanaj 500 xiuitl israelitas ompa okiueyichijkej Jehová hasta ijkuak okichijkej templo ompa Jerusalén. Pero tabernáculo okiteititi itlaj okachi ipati para akinmej kichiuaj ken Cristo.

7. ¿Tlen xiuitl opejki templo espiritual?

⁷ Tlen melauak. Tabernáculo “kiteititia tlen onka iluikak” uan okineskayotiaya itemplo espiritual Jehová. Pablo okijto: “Non kaltsintli itlaj kineskayotia itech ninmej tonalmej” (Heb. 8:5; 9:9). Ikinon yokatka templo espiritual ijkuak Pablo okintlajkuilili hebreos. Templo espiritual opejki itech xiuitl 29. Non xiuitl okapolaktijkej Jesús, okipejpenkej ika espíritu santo uan opejki tlapaleuia ken “teopixki tlen tlayekana” itech templo espiritual (Heb. 4:14; Hech. 10:​37, 38). c

8, 9. Ijkon ken kijtoua Hebreos 7:​23-27, ¿tleka Jesucristo teopixki tlen tlayekana amo ijkon ken oksekimej teopixkej?

⁸ Iekauilo tlen ualaskia. Teopixki tlen otlayekanaya okinpaleuiaya israelitas ixpan toTajtsin Dios. Jehová okitlali Aarón ken achto teopixki ompa Israel. Noijki ye achto okitlali matlapaleui itech tabernáculo. Pero Pablo okijto: “Teopixkej amo ouelik nochipa otekipanojkej porque oixpolitiajkej, ikinon okintlalijkej oksekimej teopixkej uan okichijkej inteki” (xiktlajtolti Hebreos 7:​23-27). d Teopixkej okatkaj tlajtlakolejkej ikinon noijki omonekiaya kintemakaskej yolkamej para makintlapojpolui toTajtsin Dios. Pero Jesucristo “teopixki tlen tlayekana” amo omonekiaya ijkon kichiuas.

⁹ Tlen melauak. Jesucristo teopixki tlen tlayekana “tlapaleuia […] itech kaltsintli tlen melauak. Non kaltsintli Jehová okitlali uan amo se tlakatl okitlali” (Heb. 8:​1, 2). Pablo okiyekijto: “Jesús nochipa yoltok ikinon amo moneki kipatkayotiskej oksekimej teopixkej”. Noijki okijto Jesús “chipauak, amo kichiua ken tlajtlakolejkej”. “Ye amo ijkon ken oksekimej teopixkej porque amo moneki mojmostla kinmiktis yolkamej para makitlapojpoluilikan itlajtlakol”. Axkan matikitakan tlen okijtosnekiaya yiuejkika okinmiktiayaj yolkamej uan okinpiayaj altares. Noijki tikitaskej tlen kijtosneki iekauilo tlen ualaskia uan tlen melauak.

10. ¿Tlen okineskayoti yolkamej tlen okinmiktiayaj ipan altar de cobre?

¹⁰ Iekauilo tlen ualaskia. Kanin okatka tabernáculo ompa kiauak okatka se altar de cobre uan israelitas ompa okinmiktiliayaj yolkamej Jehová (Éx. 27:​1, 2; 40:29). Pero ijkuak israelitas okinmiktiayaj nonmej yolkamej amo okinpaleuiaya sepa makintlapojpoluilikan intlajtlakol (Heb. 10:​1-4). Yolkamej  tlen okinmiktiayaj itech tabernáculo okineskayoti tlen motemakaskia para sepa matechtlapojpoluikan.

11. ¿Tlen kijtosneki altar tlen ipan omotemakak Jesús? (Hebreos 10:​5-7, 10).

¹¹ Tlen melauak. Jesús okimatiaya Jehová okiualtitlanki nikan tlaltikpak para makitemaka iyolilis uan ijkon miakej makintlaxtlaua (Mat. 20:28). Ikinon ijkuak okiapolaktijkej Jesús opejki kichiua tlen Jehová kineki (Juan 6:38; Gál. 1:4). Yetoskia ken omotemakak ipan se altar. Non altar okineskayoti tlen toTajtsin Dios okinekiaya. Ye okinekiaya ikone makitemaka iyolilis tlen amo okipiaya tlajtlakoli. Jesús “san se uelta okitemakak icuerpo uan amo moneki oksepa kitemakas”. Ijkon sepa kipojpolos intlajtlakol nochtin akinmej kineltokaj (xiktlajtolti Hebreos 10:​5-7, 10). Axkan timomachtiskej tlen okatka ijtik tabernáculo uan tlen kineskayotia.

12. ¿Akinmej ueli okalakiayaj itech cuartos tlen okinpiaya tabernáculo?

¹² Iekauilo tlen ualaskia. Tabernáculo uan templos tlen satepan okinchijkej Jerusalén okatkaj san se tlamantli ik tlaijtik. Okipiayaj ome cuartos, se cuarto okitokayotiayaj “Santo” uan okse cuarto okitokayotiayaj “Santísimo”. Nonmej cuartos okintlajkoxelouaya se tsotsoli tilauak (Heb. 9:​2-5; Éx. 26:​31-33). Itech cuarto tlen okitokayotiayaj Santo okatka se candelabro de oro, se altar para kitlatiskiaj kopali uan se mesa kanin okitlaliayaj “pan tlen okitemakayaj ixpan toTajtsin Dios”. San teopixkej tlen okinpejpenkej ueli okalakiayaj  itech cuarto tlen okitokayotiayaj Santo para kichiuaskiaj inteki (Núm. 3:​3, 7, 10). Itech cuarto tlen okitokayotiayaj Santísimo okatka se arca tlen ika omochi acuerdo. Non arca okatka de oro uan okineskayotiaya Jehová okatka inuan israelitas (Éx. 25:​21, 22). San teopixki tlen otlayekanaya ueli okipanouiaya tsotsoli tilauak uan okalakiaya kanin Santísimo. Sejse xiuitl ijkuak okintlapojpoluiayaj israelitas teopixki ompa okalakiaya. Ye okiuikaya inmieso yolkamej para makitlapojpoluikan uan makintlapojpoluikan oksekimej (Lev. 16:​2, 17). Satepan Jehová ika iespíritu santo okinexti tlen okijtosnekiaya tlen okatka ijtik tabernáculo (Heb. 9:​6-8). e

13. ¿Tlen kineskayotia cuarto tlen okitokayotiayaj Santo uan Santísimo?

¹³ Tlen melauak. Katej 144,000 (ciento cuarenta y cuatro mil) tlen yokinpejpenkej ika espíritu santo uan kuali mouikaj iuan Jehová. Yejuan yetoskej teopixkej iuan Jesús (Apoc. 1:6; 14:1). ToTajtsin Dios kinpejpena ika iespíritu santo maski ok katej nikan tlaltikpak uan kinselia ken ikoneuan. Cuarto tlen okipiaya tabernáculo uan okitokayotiayaj Santo kineskayotia 144,000 (ciento cuarenta y cuatro mil) kuali mouikaj iuan toTajtsin Dios (Rom. 8:​15-17). Cuarto tlen okipiaya tabernáculo uan okitokayotiayaj Santísimo kineskayotia iluikak kanin kajki Jehová. “Tsotsoli tilauak” tlen okitlajkoxelouaya Santo uan Santísimo kineskayotia icuerpo Jesús. Icuerpo amo okikauiliaya mauia iluikak para yetoskia teopixki tlen tlayekana itech templo espiritual. Ijkuak topatka okitemakak icuerpo yetoskia ken okintlapoli ojtli tlapejpenalmej para mayakan iluikak. Tlapejpenalmej noijki moneki kikajteuaskej incuerpo para uelis yaskej iluikak (Heb. 10:​19, 20; 1 Cor. 15:50). Ijkuak Jesús okiyolitijkej, okalak kanin Santísimo itech templo espiritual uan saiktlami nochtin tlapejpenalmej ompa yetoskej.

14. ¿Tleka okachi miak ipati templo espiritual ijkon ken kijtoua Hebreos 9:​12, 24-26?

¹⁴ Jehová yokitemakak iKone para matechtlaxtlaua uan okitlali ken teopixki para matikueyichiuakan ken moneki. Okachi miak ipati tlen ye okichi uan amo ken yiuejkika okichiuayaj. Itech altepetl Israel teopixki tlen otlayekanaya okalakiaya kanin Santísimo tlen okichijkej tlakamej uan okiuikaya inmieso yolkamej. Pero Jesús okalak iluikak kanin okachi tlachipauak uan ompa kajki ixpan Jehová. Ompa okiteititi okatka sapanoua ipati iyolilis tlen amo okipiaya tlajtlakoli porque omotemakak makimiktikan uan ijkon kipojpolos tlajtlakoli (xiktlajtolti Hebreos 9:​12, 24-26). Tlen okichi Jesús sapanoua miak ipati porque sepa kipojpoloua tlajtlakoli. Axkan tikitaskej tinochtin uelis tikueyichiuaskej Jehová itech templo espiritual maski timokauaskej tlaltikpak noso tiaskej iluikak.

15. ¿Akinmej otlapaleuiayaj kiauak kanin okatka tabernáculo?

¹⁵ Iekauilo tlen ualaskia. Tabernáculo okipiaya se patio tlen okitlatsakuijkej uan teopixkej ompa otlapaleuiayaj. Ompa okatka ueyi altar de cobre kanin okitlatiayaj tetliokolil. Noijki ompa okatka se akaxitl de cobre tlen okipiaya atl uan teopixkej ompa omomajtekiayaj uan omokxipajpakayaj ijkuak yipeuaskia tekipanoskej (Éx. 30:​17-20; 40:​6-8). Templos tlen satepan okinchijkej okinpiayaj ome patios. Se patio okatka kiauak uan okse okatka tlaijtik. Patio tlen okatka kiauak ompa okiueyichiuayaj toTajtsin Dios akinmej  amo okatkaj teopixkej uan ik ompa okalakiayaj akinmej onajsiayaj. Patio tlen okatka tlaijtik san teopixkej ompa otekipanouayaj.

16. ¿Akinmej kitekichiuiliaj Jehová itech sejse patio?

¹⁶ Tlen melauak. Tlapejpenalmej tlen ok katej nikan tlaltikpak uan ayamo mochiuaj teopixkej iuan Jesús yetoskia ken kitekichiuiliaj Jehová itech patio tlen kajki tlaijtik itech templo espiritual. Akaxitl de cobre tlen okatka itech tabernáculo uan itech templo, kinmilnamiktia tlapejpenalmej uan nochtin akinmej kichiuaj ken Cristo moneki yetoskej chipauakej ixpan toTajtsin Dios. ¿Kanin kiueyichiuaj toTajtsin Dios akinmej ‘sapanoua miakej tlen amikaj ueli kinpoua’ uan kinpaleuiaj ikniuan Cristo? Apóstol Juan okitak “katej ixpan itrono toTajtsin Dios uan kitekichiuiliaj tlajka uan youak”. Akinmej “sapanoua miakej tlen amikaj ueli okinpouaya” kitekichiuiliaj Jehová nikan tlaltikpak uan yetoskia ken kichiuaj itech patio tlen kajki kiauak itech templo espiritual (Apoc. 7:​9, 13-15). Tipakij porque tinochtin uelis tikueyichiuaskej Jehová itech itemplo espiritual.

17. ¿Tlen uelis tiktliokoliskej Jehová?

¹⁷ Uelis itlaj tiktliokoliskej Jehová tejuan akinmej tikchiuaj ken Cristo. ¿Tlen uelis tiktliokoliskej? Ijkuak timochijchikauaj tikchiuaj tlen ye kineki uan tiktemakaj tlen tikpiaj para tikpaleuiskej iTekiuajkayo. Matikchiuakan ijkon ken apóstol Pablo okinmilui tokniuan hebreos. Ye okinmilui uelis ‘tikueyichiuaskej toTajtsin Dios uan yetoskia ken tikmakaj se tetliokolil [...]. Tejuan tiktematiltiaj itoka ika tokamak’ (Heb. 13:15). Tikteititiskej tiknekij tikueyichiuaskej Jehová tla timochijchikauaj okachi tiktekichiuiliskej.

18. ¿Tlen amo moneki tikilkauaskej ijkon ken kijtoua Hebreos 10:​22-25?

¹⁸ (Xiktlajtolti Hebreos 10:​22-25). Itlamian carta tlen Pablo okinmijkuilili hebreos kijtoua tlen moneki tikchiuaskej para tikueyichiuaskej Jehová. Ompa kijtoua miak ipati matiktlatlaujtikan, matikintlapouikan oksekimej tlen ye kichiuas, matimonechikokan inuan tokniuan uan ‘matimosepanyolchikauakan porque tikitaj yiajsiki itonal toTajtsin Dios’. Saiktlami capítulos tlen kipia Apocalipsis iángel Jehová techiluia ‘matikueyichiuakan toTajtsin Dios’. Ome uelta ijkon okijto ángel para kiteititis miak ipati ijkon matikchiuakan (Apoc. 19:10; 22:9). Nochipa matikilnamiktokan tlamantli oui tlen otimomachtijkej itech itemplo espiritual Jehová. Noijki matikilnamiktokan Jehová techteochiua porque techkauilia matikueyichiuakan.