1. Ngirozi iri kunangenyi, zvondhozvo zviri kunangenyi kwatiri?

 KUDARI ngirozi iri yese ikabhuya na imwimwi, kureva kuti maizoipurutana? Zvokadi nyamasi uno ngirozi iri kubhuya no “vo majinja ese, vo mavhumbo ese, vo ndimi jese no vandhu vese.” Iyona iri kubhuyenyi? “Ithyanyi Mwari, mumukuje . . . Namatanyi wiya wakaita kudenga no pasi pano.” (Apokaripsi 14:​6, 7) Jehovha ndiyena basi Mwari wo cokwadi wokuti vandhu vese vanodikana kumunamata. Tinobonga maningi ngokutipa kwake mukana wokumunamata mu themberi yake yo ku mujimu.

2. Themberi yo kumujimu ya Jehovha icinyi? (Vonanyi bhokiso rino musoro unoti: “ Icinyi Cicikaripi Themberi yo Kumujimu?”)

² Themberi yo kumujimu icinyi, ngokwapi kwatingawana masoko mazinji ngo pamusoro payo? Themberi yo kumujimu aizivi kudari inga nyumba yatinokwanisa kuvona. I nasiriro ya Jehovha yokutendera kwake kuti timunamate ecishandisa muripo wa Jesu Kristu. Mupostori Pauro wakasanangura pakarata jake jaakatarira kuno Makristu o ku Cihebheru mu zana rokutanga ro makore aipona ku Judheya. b

3-4. Ngorapi thangwe rakaita kuti mupostori Pauro atare karata ku Makristu o Cihebheru ainga ku Judheya, wakavabeseresa kudini?

³ Ngenyi mupostori Pauro wakatara karata yake ku Makristu o Cihebheru ku Judheya? Zvingaita kuti ngo mathangwe maviri anosisira. Rokutanga, waida kuvavangisa. Vazinji vavo vakarehwa mu ciara co Cijudha. Zvingaita kuti vatungamiriri vavo vokare vaivashora ngokuva kwavo Makristu. Ngenyi? Ngokuti Makristu aacaingepi no themberi inoshamaisa kuti vanamatiremo nee avacaingepi no artari kuti vaitiremo mupiro kuna Mwari nee avacaingepi no mupiri kuti avaitire mupiro iji. Izvi  zvaizoita kuti vajiji ava va Jesu Kristu varembejeke no kurembesa rutendo hwavo. (Vahebheru 2:1; 3:​12, 14) Vamweni, vaizorangarira kuhwirira mu Ciara cavo co Cijjudha.

⁴ Rocipiri, Pauro wakakhombija ku Makristu o Cihebheru awo okuti aacaivangisirepi kuti ave no zwisiso yo ku mujimu imbza kana yakajikisisa nokuha “zvokuha zvakavanga” zvinowanika mu Soko ra Mwari. (Vahebheru 5:​11-14) Zvingaita kuti vamweni vavo vainga vacashandisa Mutemo wa Mosi. Pauro wakasanangura kuti mupiro jainangwa ngo mutemo ajicaipfujura mukuperera kwese cishaishi. Ngo thangwe iri, Mutemo wainga “wecireruswa.” Ngo kudaro, Pauro wakaenderera mberi ecijijisa cokwadi cakajikisisa. Iyena wakaceukija Makristudoni “ngo pamusoro po vetero” yakakwana yakacijikira pa muripo wa Jesu Kristu unoita kuti “tikhwedere kuna Mwari.”—Vahebheru 7:​18, 19.

5. Ngozvapi zvatinoda kuzwisisa mu bhuku ra Vahebheru, ngenyi?

⁵ Pauro wakasanangurira kuno hama no hambzaji jake jo Cihebheru kuti ngenyi kunamata ko Cikristu kwainga kwakakwhirira maningi kupinda kunamata kwavaaita kare. Manera avainamata Vajudha mukuzwirana no mutemo aikhombija munvuriri wo “zviro zvaizoviya asi cokwadi kamare cainga na Kristu.” (Vakorose 2:17) Munvuriri unovonesa ciroco manera ocakagara. Mukufananavo, manera ainamata Vajudha aivonesa manera akanakisisa aizonamathwa. Tinodikana kuzwisisa nasiriro yakaithwa ndi Jehovha kuti tiregerehwe zvishaishi zvedu kuitira kuti timunamate ngo njira yaanotendera. Ngatende tiezanisire “munvuriri” kana kuti (manera ainamata Vajudha kareko) no “cokwadi” kana kuti no (manamatiro a nyamasi uno), inga zvakasananguhwa mu bhuku ro Vahebheru. Kudari tikaita izvi, tinozonasa kuzwisisa ngo pamusoro po themberi yo kumujimu no manera atinobatanijwepo.

6. Tabherinake yaishandiswa kudini?

⁶ Manamatiro o munguva yo kare. Pauro wakacijikira hurukuro yake pa tabhernake, iyo yakaithwa ndi Mosi mu gore ra 1512 Kristu Acito Aviya. (Vonanyi divi rino musoro unoti “Maitiro o Kare no a Nyamasi Uno.”) Tabherinake yainga ciro caidari inga tenda cokuti Vaiziraeri vaikwanisa kuimujura kuvha pa ndau imwe kwenda pa ndau imweni. Ivona vakaishandisa ko makore anokhwedera kuita 500  mbhera pa mukuvo wakazovakwa themberi ku Jerusarema. (Exodo 25:​8, 9; Bziverengo 9:22) “Tende yo musongano” yainga ndau yo kuti Vaiziraeri vaikwanisa kunghwinemo kuti vakhwedere phedo na Mwari no kuita mupiro javo no kunamata. (Exodo 29:​43-46) Asi tabherinake yaimirira ciro cinosisira maningi caida kuviya kuno Makristu.

7. Themberi yo kumujimu yakatanga kuveyo rini?

⁷ Manamatiro a nyamasi uno. Tabherinake yo munguva yo kare yainga “munvuriri wo zviro zvokudenga” yaivonesa themberi huru yo kumujimu ya Jehovha. Pauro wakati “Tende iyi ndiyona muezaniso wo mukuvo uno.” (Vahebheru 8:5; 9:9) Pa mukuvo waakatarira karata yake ku Vahebheru, themberi yo kumujimu cainga cokwadi kuno Makristu. Tabherinake yakatanga kuvepo mugore ra 29 Kristu Acito Aviya. Mugore rondhoro, Jesu wakabhabhatijwa ozojwa no mujimu mucena no kutanga kushanda inga “mupiri mukuru” mu themberi yo kumujimu ya Jehovha. c—Vahebheru 4:14; Mabasa o Vapostori 10:​37, 38.

8-9. Mukuzwirana no Vahebheru 7:23-27, ngowapi musiyano uripo wo vapiri vakuru vo ku Iziraeri no Mupiri Mukuru Jesu Kristu?

⁸ Manamatiro o mu nguva yo kare. Mupiri mukuru waimirira vandhu vese pa mberi pa Mwari. Mupiri mukuru wo kutanga ku Iziraeri wainga Aroni wakagajwa ndi Jehovha pa kutanga kushandiswa ko tabherinake. Inga zvakasananguhwa ndi Pauro, “vandhu vazinji vakavavo vapiri, vecifakeya vamweni vainga vafa. Ngokuti avacaishandepi kwenda no kwenda.” d (Verenganyi Vahebheru 7:​23-27.) Zvecivoneka kuti vapiri vainga vacizivi kukwana vaidikanavo kuita mupiro kuti varegerehwe zvishaishi zvavo. Apa tiri kukwanisa kuvona musiyano wo vapiri vakuru vo Kuiziraeri no Mupiri Mukuru Jesu Kristu.

⁹ Manamairo a nyamasi uno. Inga Mupiri Mukuru, Jesu Kristu, “ndi mushandi . . . pa tende yokadi-kadi yakaimiswa ndi Jehovha. Tende iyi aizivi kuimiswa ngo mundhu.” (Vahebheru 8:​1, 2) Mupostori Pauro wakasanangura kuti “zvecivoneka kuti iyena wainga acikafi, apacaidikanepi vandhu vaimufakeya.” Pauro wakanangazve kuti Jesu wainga “acina svina, akaparajana no vashaishi,” mukusiyana no vapiri vo Kuiziraeri “iyena aadikani kuita mupiro njiku jese” kuitira zvishaishi zvake. Wari ngatende tivone musiyano uripo no artari no mupiro jo mu nguva yo kare no mu nguva ya nyamasi uno.

10. Mupiro jaiizwa pa artari yo simbi jaiimirirenyi?

¹⁰ Manamatiro o mu nguva yo kare. Kudivi ro kunja ro tabhernake kwainga no artari yo simbi yaaitihwa mupiro jo zvinyama kuitira Jehovha. (Exodo 27:​1, 2; 40:29) Asi mupiro iji ajicaizokwanisepi kupfujura mukuperera zvishaishi zvavo. (Vahebheru 10:​1-4) Mupiro iji mutabhernake mukuwo wese ijona jaishandira kuitira kuvonesa kuti kumbejiyo kwaizova no muripo umwe waizosujunura vandhu kuzvishishi no rufu.

11. Jesu wakapira upenyu hwake pa artari yapi? (Vahebheru 10:5-7, 10)

¹¹ Manamatiro a nyamasi uno. Jesu Kristu waizviziva kuti iyena wainga akatumihwa ndi Jehovha kuti aviye pasi pano kuzopira upenyu hwake kuno vandhu. (Mateu 20:28) Pakubhabhatijwa kwake iyena wakakhombija kuti wajipira kuti aite kuda kwa Jehovha. (Johani 6:38; Vagaratiya 1:4) Jesu Kristu wakapira upenyu  hwake pa artari yo kuezanisira haiwa pa artari yakaizwa no mundhu. “Kuda” kwa Jehovha kwainga kuti mwana wake apire upenyu hwake inga mundhu wakakwana. Jesu wakapira upenyu hwake “kamwe mbhera narini,” kuitira kupfujura zvishaishi zva vaya vanokhombija rutendo kwaari. (Verenganyi Vahebheru 10:​5-7, 10.) Wari ngatende tivone kuti mukati mo themberi maiimirirenyi.

12. Ndiani waidikana kunghwina pa Ndau Yakacena no Yakacenesesa?

¹² Manamatiro o mu nguva yo kare. Tabhernake no themberi jakazovakwa ku Jerusarema, jainga jakaezana mukati majo. Mukati majo mainga no ndau mbiri “Ndau Yakacena” no “Ndau Yakacenesesa” jainga jakaguhwa ngo jira. (Vahebheru 9:​2-5; Exodo 26:​31-33) Mu ndau Yakacena mainga no cigajikiro co cibani co ndarama, artari kuitira kupisira rubani, meza no pau kuitira kuita mupiro. “Vapiri vakazojwa” ndivona basi vaidikana kunghwina mu ndau Yakacena kuti vaite basa ravo. (Bziverengo 3:​3, 7, 10) Mu Ndau Yakacenesesa mainga no bhokiso ro citenderano rakazojwa ngo goridhe raiimirira kuvepo kwa Jehovha. (Exodo 25:​21, 22) Mupiri mukuru ndiyena basi wainga no citendehwa cokunghwina mu Ndau Yakacenesesa kamwe pa gore pa Njiku yo Kupfujura Zvishaishi. (VaLevi 16:​2, 17) Makore ese iyena wainghwina no ngazi yo zvinyama kuitira kuita mupiro kuti apfujure zvishaishi zvake no zvishaishi zvo vandhu vese. Pakufamba ko nguva, Jehovha ecishandisa mujimu wake mucena wakazozivisa  kuti ngoyapi revo yo mativi maviri aya o tabherinake.—Vahebheru 9:​6-8. e

13. Ndau Yakacena no Yakacenesesa jo mu tabherinake jinoimirirenyi kuno Makristu nyamasi uno?

¹³ Manamatiro a nyamasi uno. Makristu manganani akazojwa ngo mujimu mucena ari kubusa ushamwari unosisira na Jehovha. Vo 144.000 vanozoshanda inga vapiri pamwepo na Jesu Kristu kumatenga. (Apokaripsi 1:6; 14:1) Ndau Yakacena yo tabherinake inoimirira vakakhethwa inga vana vo kumujimu va Mwari pavainga pasi pano. (Varoma 8:​15-17) Ndau Yakacenesesa yo tabherinake inoimirira kudenga ndau inogara Jehovha. “Jira” raiguraya Ndau Yakacena no Yakacenesesa rinoimirira muviri wa Jesu Kristu. Paiinga pasi pano no muviri wo mundhu aacaidikana kuhwirira kudenga kuti aende kova Mupiri Mukuru wo mu themberi yo kumujimu. Pakupira muviri wake inga muripo Jesu wakafunungura gwanja kuitira upenyu wo kumatenga kuitira Makristu ese akazojwa. Kudari inga ndi Jesu, Makristu o kuzojwa anodikana kusiya muviri wawo wo kunyama kuti vaashire mupocero wavo wo kumatenga. (Vahebheru 10:​19, 20; 1 Vakorinte 15:50) Jesu paakapera kumuswa iyena wakanghwina mu Ndau Yakacenesesa mu themberi yo kumujimu ndau yokuti vokuzojwa vese vanozoveyo.

14. Mukuzwirana na Vahebheru 9:12, 24-26, ngenyi kunamata Jehovha mu themberi yo kumujimu kwakakhwirira kupinda manamatiro aaithwa ngo Vajudha?

¹⁴ Apa tinokwanisa kuvona kukhwirira ko nasiriro ya Jehovha kuitira kunamata kwakacena takacijikira pa muripo wa Jesu Kristu no kushanda kwake inga mupiri mukuru. Mupiri mukuru wo ku Iziraeri wainghwina no ngazi yo zvinyama kuitira kuita mupiro mu Ndau Yakacenesesa yakaithwa ngo vandhu, kuveni Jesu “wakanghwina ku matenga” ku ndau yakacenesesa kupinda jese kuti atiimirire pamberi pa Mwari. Pakupira upenyu hwake wakakwana kwatiri, iyena wainga no cinangwa co ‘kupeja cishaishi ngo mupiro wake kamare.’ (Verenganyi Vahebheru 9:​12, 24-26.) Jesu pakupera kupira upenyu hwake kuti apfujure zvishaishi, apacaingepizve no dikano kuti paithwe mupiro uri wese. Inga zvaticazovona, azvinenyi dangani tino vetero yokuzorarama kudenga kana pasi pano, tese tino makomborero o kunamata Jehovha mu themberi yake yo kumujimu.

15. Ndiani waishandira mu ndau yo tabherinake?

¹⁵ Manamatiro o mu nguva yo kare. Mu tabherinake mainga no ndau yakajivirihwa kuti vapiri vaitireyo basa ravo. Artari yo simbi yaiitihwepo mupiro yainga pa ndau iyi no basiya ro simbi raizara ngo kumwa yaishandiswa ngo vapiri kuti vajicenese vacito vatangisa basa ravo rakacena. (Exodo 30:​17-20; 40:​6-8) Themberi jakazovakwa pakufamba ko nguva, jaingavo no mativi amweni o kunja zvokuti vese vaya vacaingepi vapiri, vainamatiremo Jehovha.

16. Ndiani ari kushanda pa ndau imwe nga imwe yo pa themberi yo kumujimu?

¹⁶ Manamatiro a nyamasi uno. Vokuzojwa vaciri pasi pano vacito vaenda koshanda na Jesu kumatenga inga vapiri, vamweni vakona vari kushanda vakagondeka mu ndau yo mukati yo themberi yo kumujimu. Basiya ro kumwa ririyari pa ndau iyi rinoshanda inga ciceukijo kuno Makristu o kuzojwa kuti vanodikana kwenderera mberi vakacena kudivi  ro kunyama no ro kumujimu. Waro “vandhu vakaima pamberi po cigaro co umambo” vanobesera Makristu okuzojwa vari kunamatira kwapi Jehovha? Mupostori Johani wakavona “vandhu vakaima pamberi po cigaro co umambo,” vainga ngo divi ro kunja ro tabherinake “veciita mabasa akacena usiku no masikati mu themberi yake.” (Apokaripsi 7:​9, 13-15) Itusu tinoreremeja maningi makomborero atakapuwa ndi Jehovha o kumunamata mu themberi yake yakacena.

17. Pa makomborero ese atinawo, ngozvapivo zvatingapa Jehovha?

¹⁷ Nyamasi uno, Makristu ese ano makomborero o kuita mupiro kuna Jehovha ngo kushandisa nguva yavo, simba no zvese zvavanokwanisa kuti vabesere zviri kuithwa ngo Umambo hwa Mwari. Inga zvanangwa ndi mupostori Pauro ku Makristu o Cihebheru, itusu ‘tingaitira Mwari mupiro jo kumusimba mukuvo wese. Mupiro iji, ndijona mucero jo muromo wedu unozivisa zina rake.’ (Vahebheru 13:15) Itusu tinokhombija kuti tinoreremeja makomborero atakapuwa ndi Jehovha ngo kumunamata nokuita zvese zvatinokwanisa mu basa rake.

18. Mukuzwirana na Vahebheru 10:22-25, ngozvapi zvatinodikana kuita, ngozvapi zvaticikadikani kukanganwa?

¹⁸ Verenganyi Vahebheru 10:​22-25. Kumbhiri ko karata yake yaakatarira Vahebheru, mupostori Pauro wakananga ngo zviro zvakawanda maningi zvatinodikana kuti tiite pakunamata kwedu Jehovha. Zviro izvi zvinobatanija kuita mukumbiro kuna Jehovha, kucumaera masoko akanaka ngo pamusoro po vetero yedu, kuva pamusongano nguva jese no ungano tecivangisana ngocedu, maningi-ningi ‘patinongari tecivona kuti njiku [ya Jehovha] iri kukhwedera.’ Kumbiri ko bhuku ra Apokaripsi ngirozi ya Jehovha yakananga kovhaza mbiri kuti: “Namatai Mwari,” kuitira kuvonesa kuti izvi zvinosisira maningi. (Apokaripsi 19:10; 22:9) Itusu narini atidi kukanganwa zvese zvatakajija ngo pamusoro po themberi huru yo kumujimu ya Jehovha no makomborero anoshamaisa atinawo okunamata Mwari wedu mukuru.