1. Omuyengeli oha popi naantu ta ti ngiini, naashoka otashi tu longo shike?

 NGELE omuyengeli okwa popi nangoye, mbela oto ka pulakena ngaa kwaashono ta popi? Kunena omuyengeli oha popi naantu ‘yomomihoko adhihe, yomomaludhi agehe noyomiigwana ayihe.’ Mbela oha popi nayo ta ti ngiini? Oha ti: ‘Tileni Kalunga, ne mu simaneke uunene we. Galikaneni Kalunga, ngoka a shiti egulu nevi.’ (Eh. 14:6, 7) Jehova oye owala Kalunga kashili, ngoka kehe gumwe e na okugalikana. Inatu nyanyukwa tuu sho Jehova e tu pa ompito yoku mu longela motempeli ye yopambepo?

2. Otempeli yaJehova yopambepo oshike? (Tala wo oshimpungu “ Kayi shi shike?”)

² Otempeli yopambepo oshike naanaa, nopeni tatu vulu okwaadha uuyelele mboka tawu yi yelitha nawa? Otempeli yopambepo kayi shi etungo lyo lyenelyene. Ihe elongekidho ndyoka Jehova a tula po sha ikolelela kekuliloyambo lyaJesus. Omuyapostoli Paulus okwa yelitha kombinga yelongekidho ndyoka montumwafo ye ndyoka a li a nyolelele Aakriste Aahebeli mboka ya li muJudea. b

3-4. Paulus okwa li ta ipula nashike shi na ko nasha nAakriste Aahebeli yomuJudea, nokwa li e ya kwathele ngiini?

³ Omolwashike Paulus a li a nyolele Aakriste Aahebeli yomuJudea ontumwafo? Otashi vulika a li e shi ningi omolwomatompelo gaali. Etompelo lyotango, oku ya tsa omukumo. Oyendji yomuyo oya li ya putudhilwa melongelokalunga lyOshijuda. Aawiliki yawo yonale yomalongelokalunga otashi vulika ya li taye ya sheke, sho ya ningi Aakriste. Omolwashike mbela? Omolwaashoka  Aakriste kaya li ye na otempeli hoka ya li ye na okuya ya ka galikane, kaya li ye na oshiyambelo hoka ya li ye na okufikila Kalunga omafikiloyambo nokapwa li aayambi mboka ya li ye na oku ya yakula. Shika osha li tashi vulu okuteya omukumo aalanduli yaKristus nokunkundipaleka eitaalo lyawo. (Heb. 2:1; 3:12, 14) Yamwe otashi vulika nokuli ya li ya adhika komashongo ngoka ge ya ningitha ya shune kelongelokalunga lyOshijuda.

⁴ Etompelo etiyali, Paulus okwa li a lombwele Aakriste Aahebeli mboka kutya itaya ningi oonkambadhala ya uve ko omalongo ngoka omape, ano “iikulya ya kola” mbyoka tayi adhika mOohapu dhaKalunga. (Heb. 5:11-14) Osha yela kutya yamwe natango oya li ya kakatela kOmpango yaMoses. Nonando ongawo, Paulus okwa li a yelitha kutya omayambo ngoka ga li taga pulwa kOmpango kaga li taga vulu okudhima po thiluthilu oondjo. Omolwetompelo ndyono, Ompango oya li ya “dhimwa po.” Onkee ano Paulus okwa li a tsikile okulonga aantu ooshili dhimwe dhomuule. Okwa li a dhimbulukitha Aakriste ooyakwawo shi na ko nasha ‘netegameno ewanawa lela,’ lya kankamena keyambo lyaKristus ndyoka tali vulu oku ya kwathela ya ‘hedhe popepi naKalunga.’ — Heb. 7:18, 19.

5. Oshike twa pumbwa okuuva ko kombinga yembo lyAahebeli, nomolwashike?

⁵ Paulus okwa li a yelithile aamwahe Aahebeli kutya omukalo moka haya longele Jehova ngashingeyi, ogu li nawa gu vule omukalo moka ya li haye mu longele nale. Aajuda oya li owala haye shi ningi ‘omolwomuzizimba gwowala gwiinima yokomeho, ihe oshinima sho shene oKristus.’ (Kol. 2:17) Omuzizimba ngoka ethano owala lyiinima mbyoka tayi ka ningwa. Sha faathana, omukalo moka Aajuda ya li haya longele Kalunga methimbo lya pita, ogwa li owala omuzizimba gwiinima yoshili mbyoka tayi ka ningwa. Otwa pumbwa okuuva ko elongekidho lyaJehova ndyoka e tu tulila po li na ko nasha nokudhima po oondjo dhetu, opo tu vule oku mu longela momukalo moka a hokwa. Natu yelekanitheni “omuzizimba,” ano omukalo gwokulongela Kalunga gwAajuda yonale ‘noshinima sho shene,’ ano omukalo gwokulongela Kalunga gwAakriste, ngaashi gwa yelithwa mAahebeli. Ngele otwe shi ningi, otatu vulu okukala tu uvite ko nawa otempeli yopambepo nankene ye tu kwatela mo.

6. Etsalihangano olya li hali longithwa ngiini?

⁶ Omukalo gwonale gwokulongela Kalunga gwOshijuda. Oonkundathana dhaPaulus odha li  tadhi popi kombinga yetsalihangano ndyoka lya li lya ningwa kuMoses mo 1512 K.E.N. (Tala oshimpungu “Omukalo gwonale gwokulongela Kalunga gwOshijuda — Omukalo gwokulongela Kalunga gwAakriste.”) Etsalihangano olya li oshinima sha fa otenda, shoka Aaisraeli ya li haya kala ya humbata uuna taya tembuka kehala limwe, ya uka kehala ekwawo. Oya li ye li longitha uule womimvo 500 lwaampono, sigo oosho otempeli yo yeneyene ya tungwa muJerusalem. (Eks. 25:8, 9; Num. 9:22) “Etsalihangano” ndika olya li ehala lyopondingandinga lyAaisraeli lyoku ya hedhitha popepi naKalunga noku mu pa omayambo sho taye mu longele. (Eks. 29:43-46) Nonando ongawo, etsalihangano olya li wo tali thaneke oshinima oshiwanawa shoka sha li tashi ka ningilwa Aakriste.

7. Otempeli yopambepo oya tameke okukala ko uunake?

⁷ Omukalo gwokulongela Kalunga gwAakriste Etsalihangano lyonale olya li ‘omuzizimba gwaashoka shi li megulu’ nolya li tali thaneke otempeli onene yopambepo yaJehova. Paulus okwa ti kutya etsalihangano “olyo ethano tali ulike ethimbo lyongashingeyi.” (Heb. 8:5; 9:9) Onkee ano pethimbo ndyoka a nyolele Aahebeli, otempeli yopambepo oya adhika nale opo yi li. Oya li ya tameke okukala po okuza mo 29 E.N. Momumvo moka, Jesus okwa ninginithwa, okwa gwayekwa nombepo ondjapuki nokwa tameke okulongela Jehova e li “omuyambi omukuluntu e vule ayehe” motempeli yopambepo. c — Heb. 4:14; Iil. 10:37, 38.

8-9. Shi ikolelela kAahebeli 7:23-27, eyooloko lini li li pokati kaayambi aakuluntu yaIsraeli nOmuyambi Omukuluntu, Jesus Kristus?

⁸ Omukalo gwonale gwokulongela Kalunga gwOshijuda. Omuyambi omukuluntu okwa li ha kalele po aantu koshipala shaKalunga. Omuyambi omukuluntu gwotango gwaIsraeli, Aaron, okwa li a langekwa po kuJehova, sho etsalihangano lya yapulwa. Ngaashi Paulus a yelitha “aayambi mbeyaka yalwe oya li oyendji, oshoka oya si noinaa vula okutsikila iilonga yawo.” d (Lesha Aahebeli 7:23-27.) Oshoka oye li aantu inaaya gwanenena, aayambi aakuluntu mboka oya li ye na okuyamba omayambo molwoondjo dhawo yene. Ndyoka olyo eyooloko li li pokati kaayambi aakuluntu yaIsraeli nOmuyambi Omukuluntu lela, Jesus Kristus.

⁹ Omukalo gwokulongela Kalunga gwAakriste. Jesus Kristus e li Omuyambi gwetu Omukuluntu ‘ota longo motempeli yo yene ndjoka ya tungwa kOmuwa, hakomuntu.’ (Heb. 8:1, 2) Paulus okwe shi yelitha kutya molwaashoka ‘Jesus oku na omwenyo sigo aluhe, oshilonga she shuuyambi itashi kuthwa po kugulwe.’ Paulus okwa gwedha ko a ti kutya Jesus “ke nando oshipo nenge oondjo. Oye okwa kuthwa maantu” nonokutya ‘ye ina fa aayambi yalwe aakuluntu yaIsraeli, mboka haa yamba esiku kehe,’ omolwoondjo dhawo. Ngashingeyi natu taleni eyooloko ndyoka li li pokati koshiyambelo nomayambo ngoka ga li haga yambwa momukalo gwonale gwokulongela Kalunga gwOshijuda nomukalo gwokulongela Kalunga gwAakriste.

10. Omayambo goshiyambelo shoshikushu otaga ti shike?

¹⁰ Omukalo gwonale gwokulongela Kalunga gwOshijuda. Komeho gosheelo shetsalihangano okwa li ku na oshiyambelo shoshingoli hoka kwa li haku fikilwa iinamwenyo mbyoka ya yambelwa Jehova. (Eks. 27:1, 2; 40:29) Nonando ongawo, omayambo ngoka kaga li naanaa haga dhimi po oondjo dhaantu. (Heb. 10:1-4) Okutsikila okugandja omayambo giinamwenyo petsalihangano  okwa li taku ulike keyambo ndyoka lya li tali vulu okudhima po thiluthilu oondjo dhaantu.

11. Okoshiyambelo shini Jesus a li a igandja e li eyambo? (Aahebeli 10:5-7, 10)

¹¹ Omukalo gwokulongela Kalunga gwAakriste. Jesus okwa li e shi kutya Jehova okwe mu tuma kombanda yevi a gandje omwenyo gwe gu li iikulila yaantu. (Mat. 20:28) Ano Jesus peninginitho lye, okwa li a igandja a longe ehalo lyaHe. (Joh. 6:38; Gal. 1:4) Jesus okwa li a igandja koshiyambelo shopathaneko shoka tashi ulike kutya Kalunga okwa ‘hala’ Omwana a gandje po omwenyo gwe gwa gwanenena, e li omuntu. Jesus okwa li a gandja omwenyo gwe “lumwe aluke,” opo a dhime po thiluthilu oondjo dhakehe gumwe ngoka e na eitaalo muye. (Lesha Aahebeli 10:5-7, 10.) Ngashingeyi natu ka kundathaneni iinima mbyoka ya li yi li metsalihangano kutya otayi thaneke shike.

12. Oolye ya li haya yi mondunda kehe yetsalihangano?

¹² Omukalo gwonale gwokulongela Kalunga gwOshijuda. Etsalihangano notempeli ndjoka ya li ya tungwa lwanima muJerusalem, oya li ya faathana meni. Meni lyetsalihangano nomotempeli omwa li mu na ‘Uuyapuki’ ‘nUuyapukielela’ mboka wa topolwa pokati netopolitho. (Heb. 9:2-5; Eks. 26:31-33) Meni lyUuyapuki omwa li mu na olamba yoshingoli, oshiyambelo shokufikila iitsinino noshitaafula shi na iikwiila yokutalika. ‘Aayambi owala mboka ya gwayekwa’ ya li ya pitikwa ya longe meni lyUuyapuki iilonga yawo iiyapuki. (Num. 3:3, 7, 10) MUuyapukielela omwa li oshikethahangano shoshingoli tashi thaneke okukala po kwaJehova.  (Eks. 25:21, 22) Omuyambi omukuluntu oye owala a li a pitikwa okuya mUuyapukielela lumwe aluke momumvo, mEsiku lyEkwatakanitho. (Lev. 16:2, 17) Omumvo kehe, oha yi mo nombinzi yiinamwenyo a ka pule a dhiminwe po oondjo dhe mwene nosho wo dhoshigwana ashihe. Lwanima, Jehova okupitila mombepo ye ondjapuki, okwa li a yelitha kutya iitopolwa mbyoka yometsalihangano oyi lile po naanaa shike. — Heb. 9:6-8. e

13. Ngele tashi ya komukalo gwokulongela Kalunga gwAakriste, Uuyapuki nUuyapukielela wetsalihangano otawu thaneke shike?

¹³ Omukalo gwokulongela Kalunga gwAakriste. Aalongwa yaKristus aashona oya gwayekwa nombepo ondjapuki nohaya nyanyukilwa ekwatathano lyawo lyi ikalekelwa naJehova. Aantu 144 000 otaya ka longa pamwe naJesus megulu ye li aayambi. (Eh. 1:6; 14:1) Uuyapuki wetsalihangano otawu thaneke kutya oya gwayekwa nombepo ondjapuki sho ya li kombanda yevi ye li oyanamati yaKalunga yopambepo. (Rom. 8:15-17) Uuyapukielela wetsalihangano otawu thaneke egulu moka Jehova e li. “Etopolitho” ndyoka lya topola ko Uuyapuki kUuyapukielela olya li tali thaneke olutu lwaJesus lwopanyama ndjoka lwa li talu mu imbi okuya megulu e li Omuyambi Omukuluntu gwomotempeli yopambepo. Sho Jesus a yamba po olutu lwe lwopantu, lu ninge ekuliloyambo lyaantu, kungawo okwe shi ningi tashi wapa, opo Aakriste ayehe aagwayekwa ya ka kale nomwenyo megulu. Aakriste aagwayekwa nayo oye na wo okuyamba po omalutu gawo gopanyama, opo ya ka mone ondjambi yawo yomegulu. (Heb. 10:19, 20; 1 Kor. 15:50) Konima sho Jesus a yumudhwa, okwa li a yi mUuyapukielela wotempeli yopambepo, moka aagwayekwa ayehe ya li taye ke mu wayimina.

14. Shi ikolelela kAahebeli 9:12, 24-26, oshike sha ningitha omukalo gwokulongela Jehova motempeli yopambepo gu kale omwaanawa gu vule omukalo gwopethimbo lyOmpango

¹⁴ Ekuliloyambo nomuyambi, Jesus Kristus, otayi tu ulukile nkene elongekidho lyaJehova lya kankamena kelongelokalunga lya yogoka lya dhenga mbanda. Omuyambi omukuluntu muIsraeli okwa li ha yi mUuyapukielela wa tungwa kaantu nomayambo gombinzi yiinamwenyo, ihe Jesus ‘omegulu lyo lyene,’ moka muuyapukielela a ka holoke koshipala shaJehova. Okwa li a gandja omwenyo gwe gwopantu gwa gwanenena omolwetu, opo “a kuthe po oondjo dhetu sigo aluhe.” (Lesha Aahebeli 9:12, 24-26.) Eyambo lyaJesus olya vula okudhima po oondjo dhetu sigo aluhe. Ngaashi tatu ka ilonga moshitopolwa tashi landula, kutya nduno etegameno lyetu olyokukala kombanda yevi, nenge olyomegulu, atuheni otatu vulu okulongela Jehova motempeli ye yopambepo.

15. Oolye ya li haya longo molugumbo lwehale lyetsalihangano?

¹⁵ Omukalo gwonale gwokulongela Kalunga gwOshijuda. Etsalihangano olya li li na olugumbo lwehale lwa mbwalangandja moka aayambi ya li haya longele iilonga yawo. Metsalihangano omwa li mu na oshiyambelo oshinene shoshikushu noshiyaha shoshikushu shi na omeya, moka aayambi ya li haya iyogo manga inaaya tameka okulonga iilonga yawo iiyapuki. (Eks. 30:17-20; 40:6-8) Ihe mootempeli ndhoka dha li dha tungwa lwanima, omwa li wo mu na ehale lyopondje moka mboka kaaye shi aayambi haya kala, opo ya longele Kalunga.

16. Oolye haya longele molugumbo lwehale kehe lwotempeli yopambepo?

¹⁶ Omukalo gwokulongela Kalunga gwAakriste. Manga oshihupe shaagwayekwa inaashi ya megulu shi ka longele Kalunga pamwe naJesus ye li aayambi, ohaya longo nuudhiginini molugumbo  lwehale lyomeni lyotempeli yopambepo. Oshiyaha oshinene shomeya, shoka sha li metsalihangano nomotempeli, osha li hashi ya dhimbulukitha nosho wo Aakriste ayehe kutya oye na okukala ya yogoka palutu nopambepo. Mbela “engathithi lyaantu” mboka haya ambidhidha nuudhiginini aamwahe yaKristus, oya li haya longele Kalunga peni? Omuyapostoli Johannes okwa li e ya mono ‘ya thikama ya taalela koshipangelapundi,’ hoka taku thaneke olugumbo lwehale lwopondje, moka ‘taya yakula Kalunga uusiku nomutenya motempeli ye.’ (Eh. 7:9, 13-15) Otwa pandula noonkondo sho Jehova e tu pa ompito ya simanenena yoku mu longela.

17. Otu na uuthembahenda wokugandja omayambo geni kuJehova?

¹⁷ Kunena Aakriste ayehe oye na uuthemba wokugandja omayambo kuJehova mokulongitha ethimbo lyawo, oonkondo dhawo nosho wo iiniwe yawo, opo ya pitithe komeho Uukwaniilwa waKalunga. Omuyapostoli Paulus okwa li a lombwele Aakriste Aahebeli kutya otatu vulu ‘oku shi ninga aluhe eyambo lyetu molwaJesus nonokutya tu pandule edhina lye noku mu imbila.’ (Heb. 13:15) Otatu vulu okuulika kutya otwa lenga uuthembahenda wetu wokulongela Jehova moku mu pa omayambo getu ga dhenga mbanda.

18. Shi ikolelela kAahebeli 10:22-25, oshike twa pumbwa okuninga, noshike inaatu pumbwa okudhimbwa?

¹⁸ Lesha Aahebeli 10:22-25. Paulus kehulilo lyontumwafo ye ndjoka a nyolele Aahebeli okwa li a popi iinima yi ili noyi ili yi na ko nasha nokulongela Kalunga kwetu, mbyoka kaatu na nando okweetha po oku yi ninga. Iinima mbyoka oya kwatela mo okugalikana Jehova, okuuvithila yalwe, okuya kokugongala nosho wo okuladhipikathana ‘uunene sho tu wete esiku lyaJehova tali hedha popepi.’ Okuuka pehulilo lyehokololo lyomEhololo, omuyengeli gwaJehova okwa li a tsu omuthindo lwiikando iyali oohapu tadhi landula, a ti: “Galikana Kalunga!” (Eh. 19:10; 22:9) Inatu dhimbwa nando oshili ndjika ya simanenena yi na ko nasha notempeli yaJehova yopambepo nosho wo okukala twa lenga uuthembahenda mboka tu na wokulongela Kalunga ketu omunene!