1. Tiheeni munkeelo mmoha onaloceiye nave eyo enanivolowela hai?

 WAAKHANLE wi munkeelo onnaloca ni nyuwo, apwanne mwaahaala owiriyana yeeyo owo onaloceiye? Chiryeene, olelo munkeelo mmoha onnaloca “wa ilapo soothene, mahimo, ilocelo ni maloko.” Tiheeni owo onaloceiye? “Mmoove Muluku nave mumvahe ncicimiho. . . Mmulapele Yoole opatunse erimu, [ni] elapo.” (Wup. 14:6, 7) Yehova ti Muluku mmoharu eeparipari yoowo achu oothene anaphwanelaaya omulapela. Ninnamuthamalela vancipale Yehova nthowa na onivaha ekari yavameekhaaya ya omurumeela yoowo mu empa awe etokweene yoomunepani!

2. Empa ya Muluku yoomunepani tiheeni? (Moone tho ekaaxa “Yeeyo Empa ya Muluku Yoomunepani Ehinataphulelaaya.”)

² Empa ya Muluku yoomunepani tiheeni, nave ti woowi nneeraahu niphwanyewo sooleeliherya sinathariha vooloca sa empa yeeyo? Empa ya Muluku yoomunepani tahi empa yawooneya. Ari marehereryo a Yehova a otikitherya malapelo aweemereryeya mwawiiwanana ni mukucho wa woopola wa Yesu. Murummwa Paulo oothariha marehereryo yaala mu ekaarata aarepenleiye Akristu yaari Ahepri a mu nsana noopacerya yaawo yaakhala o Yuteya. b

3-4. Wuukhuwa taani Paulo aareiyeno ni Akristu yaawo yaari Ahepri yaakhala o Yuteya, nave aakhavihenrye hai?

³ Ntakhara heeni murummwa Paulo aahaarepela Akristu yaakhala o Yuteya? Mwawooneya, aahikhalano mathowa meeli oochuneya. Noopacerya, wi aalipihe. Ancipale a yaawo yaaphwiiwale mu malapelo a Ayuta. Ahooleli a malapelo aya akhalai  akhweya yaanaaruwana wanthowa na okhala Akristu. Ntakhara heeni? Nthowa nawi Akristu hiyaarino empa vyakala yootikhiniha ntakhara malapelo, altare awooneya wi empaheleke mikucho Muluku nave hiyaarinono alipa amukucho wi yaahooleleke. Eyo yaanwerya waaceecheiha Akristu ni oyeleela nroromelo naya. (Ahe. 2:1; 3:12, 14) Ophiyerya wi akina a yaawo yaanwerya wuupuwela okookela malapelo a Ayuta.

⁴ Yanaawiili, Paulo aahaarepela Akristu yaale yaari Ahepri nthowa nawi awo hiyiilipixerya wi yiiwexexe iparipari ivyaani naari sawiiseela, naari wi “yoolya yoolipa” yeeyo enaphwanyeya Mmasu a Muluku. (Ahe. 5:11-14) Mwawooneya, akina a yaawo nlelo yaanachariha Nlamulo na Mose. Mwawiihiiha, Paulo oothariha wi mikucho seihe hisaahaala oviihavo soocheka moomalela. Wanthowa na yeeyo, Nlamulo “noomala muteko”. Nto Paulo aahipacerya ohusiha iparipari sikina sawiiseela. Owo aahiwuupuserya Akristu akhwaawe sa “ewehereryo yaphaamaxa” yeeyo yaathipeleya mu mukucho wa Yesu yoowo waahaala waakhaviherya yaawo ‘omwaacamela Muluku.’—Ahe. 7:18, 19.

5. Tiheeni nnaphwanelaahu wiiwexexa mu liivuru a Mpiipiliyani a Ahepri, nave ntakhara heeni?

⁵ Paulo aahaatharihela annawe yaawo yaari Ahepri ntakhara heeni malapelo a Akristu yaaryaaya avasulu opwaha malapelo yaawo yaapakaaya khalai. Mukhalelo Ayuta yaamulapelaaya Muluku mwawiiwanana ni nlamulo waari “muuruusi wa ichu sinoorwa, nyenya eparipari ene ti ya Kristu.” (Ako. 2:17) Muuruusi pahiru eruku ya echu ekhanle. Moolikana, mukhalelo Ayuta yaamulapelaaya Muluku khalai waari muuruxi wa mukhalelo waphaama wa omulapela Muluku yoowo waahaala orwa. Nnaphwanela wiiwexexa marehereryo yaawo Yehova opankeiye wi nleveleliwe soocheka sahu wi niwerye ovaha malapelo aweemereryeya. Vano hankooni nlikanyihe “muuruusi,” yoowo ori (mukhalelo wa malapelo wa Ayuta) ni “eparipari,” yoowo ori (mukhalelo wa malapelo wa Akristu) ntoko etharihiwaaya mu Ahepri. Neerano yeela, nnanwerya wiiwexexa empa ya Muluku yoomunepani ni mukhalelo enanivolowelaaya.

6. Ti mwawiihai muxakala waaphariheliwaaya?

⁶ Mukhalelo wa malapelo wa Ayuta. Mu othariha wawe, Paulo aahipharihela muxakala waapakiwe ni Mose mu 1512 E.E.K. (Moone ekaaxa “Mukhalelo wa Malapelo wa  Ayuta —Mukhalelo wa Malapelo wa Akristu.”) Muxakala waalikana ni etenta yeeyo Aisarayeli yaateexaaya vaavaa yaathaamelaaya mapuro makina. Awo yaapharihela mu iyaakha waacamela 500 ophiyerya vaavaa empa yawiikhalelaru yaatekiwaaya o Yerusalemu. (Muk. 25:8, 9; Nam. 9:22) Nipuro nenlo Aisarayeli yaathukumanaayamo wi emulapele Muluku ni ovaha mikucho niichaniwa “empa yookumanamo.” (Muk. 29:43-46, PMM) Nyenya, muxakala waaneemelela tho echu yaphaama yeeyo yaahaala orwa wa Akristu.

7. Ti liini empa ya Muluku yoomunepani yaapacenryaaya okhala?

⁷ Mukhalelo wa malapelo wa Akristu. Muxakala wakhalai waari “muuruxi wa ichu sa wirimu” nave weemelela empa etokweene yoomunepani ya Yehova. Paulo ooloca wi “musakala ola niphwanaphwaniho wa elukuluku yeela yamutano.” (Ahe. 8:5; 9:9) Mwawiihiiha, vaavaa owo aarepeleiye Ahepri, empa ya Muluku yoomunepani yaahikhala wa Akristu. Eyo yaahikhala ovinyerya mu 29 E.K. Mu eyaakha yeele, Yesu aahipatisiwa, aahithanliwa ni munepa waweela nave aahipacerya orumeela ntoko “mulipa a mukucho mutokweene” a Yehova mu empa ya Muluku yoomunepani. c—Ahe. 4:14; Saw. 10:37, 38.

8-9. Mwawiiwanana ni Ahepri 7:23-27, ohiyana taani orivovo variyari va mulipa a mukucho mutokweene a Aisarayeli ni Mulipa Mukucho Mutokweene, Yesu Kristu?

⁸ Mukhalelo wa malapelo wa Ayuta. Mulipa a mukucho mutokweene eemelela muloko vamiithoni va Muluku. Mulipa a mukucho mutokweene oopacerya a Isarayeli, Aroni, aathanliwe ni Yehova vaavaa muxakala waahuleliiwaaya. Nyenya, hiihaa ntoko Paulo otharinheiye, yaahikhalavo, “alipa a mukucho ancipale wi eraceelaneke, ntakhara okhwa waanaahiiha wi etitelele mmuteko aya.” d (Mwaalakhanye Ahepri 7:23-27.) Nave ntoko alopwana oohiphaameya, alipa a mikucho yaale yaaphwanela ovaha mikucho ntakhara soocheka saya. Ola ohiyana otokweene orivovo variyari va alipa mukucho a Isarayeli ni Mulipa Mukucho Mutokweene, Yesu Kristu.

⁹ Mukhalelo wa malapelo wa Akristu. Ntoko Mulipa a Mukucho Mutokweene, Yesu Kristu “murummwa . . . mmuxakalani weeparipari, yoowo otekiwe ni Yehova nave ohiya ni muchu.” (Ahe. 8:1, 2) Paulo oothariha wi “woona wi [Yesu] onnatitelela okhala mukumi okhala wookhala, onamukucho awe honaraceeliwa.” Paulo ohaaceererya wi Yesu ‘taphaama ohiyana ni alipa oocheka’ nave wi, moohiyana ni alipa a mikucho a Isarayeli, “hanaphwanela ovaha mikucho nihiku ti nihiku” ntakhara soocheka sawe. Vano hankooni nthokororye ohiyana orivovo variyari va altare ni mikucho saavahiwa mmukhalelo wa malapelo wa Ayuta akhalai ni mmukhalelo wa malapelo wa Akristu olelo.

10. Mikucho saapakiwa va altare a muchove seemelela heeni?

¹⁰ Mukhalelo wa malapelo wa Ayuta. Makupa a vaate vamulako wa musakala aahikhalavo altare aapakiwe ni muchove, nipuro nenlo saaveleeliwaaya mikucho sa axinama wa Yehova. (Muk. 27:1, 2; 40:29) Nyenya, mikucho seiho hisaawerya weeriha wi soocheka sa achu sileveleliwe moomalela. (Ahe. 10:1-4) Mikucho sa axinama saapakiwa mwawuuluulela mmisakalani seemelela mukucho mmoha waahaala weeriha wi soocheka sa achu sileveleliwe moomalela.

11. Va altare taani Yesu aavanheiyevo okumi awe ntoko mukucho wa woopola? (Ahepri 10:5-7, 10)

¹¹ Mukhalelo wa malapelo wa Akristu. Yesu aahisuwela  wi Yehova aahimurumiha veelapo ya vathi wi avahe okumi awe ntoko mukucho wa woopola ntakhara achu. (Mat. 20:28) Mwawiihiiha, mu opatiso awe, Yesu aahiiveleela wi apake yookhwela ya Yehova. (Yoh. 6:38; Aka. 1:4) Yesu aahiiveleela va altare oosiphela yoowo eemelela “yookhwela” ya Muluku yawi Mwanawe aveleele ekumi awe yoophaameya ntoko mukucho. Okumi wa Yesu waahivahiwa “ekwaha emoha wa ilukuluku soothene” wi uuheele soocheka sa achu oothene arino nroromelo mwa yoowo. (Mwaalakhanye Ahepri 10:5-7, 10.) Voocharela, hankooni nthokororye yootaphulela ya ichu saari mpuwa mwa musakala.

12. Taani aaphwanela ovolowa mu Nipuro Naweela ni mu Nipuro Naweelaxa?

¹² Mukhalelo wa malapelo wa Ayuta. Musakala ni ipa sa Muluku saatekiwe ohoolo waya o Yerusalemu saanatepa olikana mpuwa. Mpuwa yaahikhalamo mapuro meeli—“Nipuro Naweela” ni “Nipuro Naweelaxa”—yaawo yaavalaanyihiwe ni ekurtina. (Ahe. 9:2-5; Muk. 26:31-33) Mpuwa mwa Nipuro Naweela waahikhalamo epanthi, altare ntakhara opahavo mukucho ni emeesa ya iphaawu sootheteiwa. Pahiru ‘alipa a mukucho yaathanliwe’ yaahikhalano weemereryiwa ovolowa mu Nipuro Naweela wi ephare miteko saya saweela. (Nam. 3:3, 7, 10, PMM) Mu Nipuro Naweelaxa aahikhalamo arka awaataana aahuruweliwe ni ooru yoowo ooniherya wi Yehova aari vaavale. (Muk. 25:21, 22) Pahiru mulipa a mukucho mutokweene taarino weemereryiwa wa ovolowa mu Nipuro Naweelaxa ekwaha emoha vayaakhani mu Nihiku na Oveleela Soocheka. (Onam. 16:2, 17) Eyaakha ti eyaakha, owo  aanavolowa nnikhami na axinama wi aveleele soocheka sawe ni sa muloko woothene. Wookuchulani, Yehova, orweela wa munepa awe waweela aahihiya mookwakwaleya yootaphulela yeeparipari wa mukhalelo yoola wa musakala.—Ahe. 9:6-8. e

13. Nipuro Naweela ni Nipuro Naweelaxa na muxakala ineemelela eheeni mmukhalelo wa malapelo wa Akristu?

¹³ Mukhalelo wa malapelo wa Akristu. Nikhuuru navakhaani na oomuchara a Kristu aathanliwa ni munepa waweela, nave awo annapuha onthamwene wavameekhaaya ni Yehova. A 144.000 yaala anahaala orumeela ntoko alipa a mukucho wirimu ni Yesu. (Wup. 1:6; 14:1) Nipuro Naweela na musakala nnaweemelela yaawo, yooniheryaka wi ethanliwe ntoko anamwane oomunepani a Muluku nlelo eri veelaponi yavathi. (Aro. 8:15-17) Nipuro Naweelaxa na musakala nneemelela wirimu, weiwo Yehova onakhaleiyewo. “Ekurtina” yeeyo yaavalaanya Nipuro Naweela Nnipuro Naweelaxa neemelela mwiili woomuchu wa Yesu yoowo waamuhiiha ovolowa wirimu ntoko Mulipa Mukucho Mutokweene a empa yoomunepani ya Muluku. Moorweela wa oveleela okumi awe ntoko mukucho ntakhara achu, Yesu aahihula mphiro ntakhara okumi wirimu wa Akristu oothene oothanliwa. Awo tho enaphwanela oleva mwiili aya woomuchu wi yaakhele nchuwelo naya wirimu. (Ahe. 10:19, 20; 1 Ako. 15:50) Yesu amanle oviihiwa mookhwani, aahivolowa mu Nipuro Naweelaxa na empa ya Muluku yoomunepani, weiwo oothanliwa oothene anahaalaaya okhalawo.

14. Mwawiiwanana ni Ahepri 9:12, 24-26, ntakhara heeni mukhalelo wa olapela mu empa yoomunepani ya Yehova oryaaya waphaamaxa opwaha mukhalelo wa malapelo wa Aisarayeli?

¹⁴ Noowerya woona mookwakwaleya mukhalelo oryaaya waphaamaxa marehereryo a Yehova wi atikitherye malapelo aweela mwawiiwanana ni mukucho wa woopola ni onamukucho wa Yesu Kristu. Mulipa a mukucho mutokweene o Isarayeli aavolowa mu Nipuro Naweelaxa nenlo naapakiwe ni achu apharenle nikhami na axinama, nto Yesu ovolonwe “wirimu wene”, nipuro nenlo nri naweelaxa opwaha mapuro oothene, wi akhale variyari va Yehova. Weiwo owo aahiveleela okumi awe woophaameya ntakhara hiyo “wi axipihe yoocheka moorweela wa mukucho wa yoowo mwaneene.” (Mwaalakhanye Ahepri 9:12, 24-26.) Mukucho wa Yesu onnaxipiha yoocheka okhala wookhala. Ntoko nnahaalaahu ohuserya voocharela, moohipwacha ewehereryo ahu yaari ya wirimu naari veelaponi, oothene ahu nnanwerya omulapela Yehova mu empa awe yoomunepani.

15. Taani aarumeela va n’yateni na muxakala?

¹⁵ Mukhalelo wa malapelo wa Ayuta. Musakala waahikhalano n’yate—nenlo naari vanlakani vene nrukureryiwe ni ekintaale, nave naari nipuro nenlo alipa a mukucho yaapharaayavo miteko saya. Altare mutokotoko a muchove aakhala van’yateni, vamoha ni epasiya ya muchove yaarimo maahi yeeyo alipa a mukucho yaapharihelaaya wi yiiseelihe ehaakumve ophara muteko waweela. (Muk. 30:17-20; 40:6-8) Mwawiihiiha, ipa sa Muluku saapakiwa ohoolo waya saanakhalano mayate, mapuro yaawo yaale yahaari alipa mukucho yeemelaayavo wi emulapele Muluku.

16. Taani onarumeela va n’yate ti n’yate ya empa yoomunepani ya Muluku?

¹⁶ Mukhalelo wa malapelo wa Akristu. Ehaakumve orumeela ntoko alipa a mukucho ni Yesu wirimu, anna oothanliwa oohalela annarumeela moororomeleya mu n’yate ari makupa ampuwa a empa ya Muluku yoomunepani veelaponi. Ophwanyiwa wa epasiya etokotoko  ya maahi ennawuupuxerya awo, hiiha ntoko Akristu oothene, wi etitelele okhala aweela mmeecelo ni omunepani. Vano ti woowi “muloko mutokweene”, yoowo onaakhaviherya moororomeleya anna a Kristu, anavahaaya malapelo aya? Murummwa Yohani aahoona muloko owo “weemenle vamiithoni wa munyukhu” yeeyo eneemelela n’yate na makupa a vaate veelaponi, nave mu nipuro nenlo awo “annamulapela [Muluku] muteko waweela othana ni ohiyu.” (Wup. 7:9, 13-15) Ekari etokweene opaka makupa a marehereryo a Yehova mmalapelo aweela!

17. Mikucho taani nryaahuno ekari ya omvaha Yehova?

¹⁷ Olelo, Akristu oothene aakhalano ekari ya omvaha mukucho Yehova epharihelaka elukuluku ni sookhalano saya wi ekhaviherye soochuna sa Omwene wa Muluku. Hiiha ntoko murummwa Paulo aalonceiye wa Akristu yaari Ahepri, hiyaano nnanwerya omvaha Muluku “mahiku oothene . . . mukucho woomucicimihano, ela tiwi, yawiima ya iyano sahu seiho inalokoha vanlakani nsina nawe.” (Ahe. 13:15) Nnanwerya wooniherya esisapo ekari ahu ya omulapela Yehova moorweela wa opaka owetha wahu mmuteko awe.

18. Mwawiiwanana ni Ahepri 10:22-25, tiheeni nihinaphwanelaahu ohiya okhwipi nave tiheeni nihinaphwanelaahu ocuwala?

¹⁸ Mwaalakhanye Ahepri 10:22-25. Mu masu awe ookuchula a ekaarata aarepenleiye Ahepri, Paulo onnathariha mikhalelo soohiyanahiyana sa malapelo ahu nihinaphwanelaahu ohiya mukhwipi. Eyo enaphitaanyerya omwaacamela Yehova mu nivekelo, olaleerya, othukumana ni muloko ni waalipiha akina ‘xaxaxa vaavaa nnoonaahu nihiku na Yehova naacamelaka.’ Makupa ookuchula a liivuru a Wuupulula, munkeelo a Yehova onnaloca ikwaha piili wi acicimiherye, ariki: “Omulapeke Muluku!” (Wup. 19:10; 22:9) Nihirwe ncuwale eparipari ela yawiiseela yoomunepani vooloca sa empa etokweene yoomunepani ya Yehova ni ekari yavameekhaaya nryaahuno ya omulapela Muluku ahu mutokweene!