1. Ke’ng seo morongwa a re botšago sona, gona seo se swanetše go dira gore re ikwe bjang?

 GE E BA morongwa a be a ka bolela le wena, na o be o ka theetša seo a se bolelago? Lehono morongwa o bolela le “ditšhaba tšohle, meloko yohle, maleme ohle le batho bohle.” Ke’ng seo a se bolelelago? O re: “Boifang Modimo gomme le mo nee letago . . . Rapelang Yo a dirilego legodimo [le] lefase.” (Kut. 14:​6, 7) Jehofa ke Modimo a nnoši wa therešo yoo motho yo mongwe le yo mongwe a swanetšego go mo hlankela. Re leboga gore o re neile tokelo ya gore re mo hlankele ka tempeleng ya gagwe e kgolo ya moya!

2. Tempele ya Jehofa ya moya ke’ng? (Bona lepokisi leo le rego “ Seo Tempele ya Jehofa ya Moya e Sego Sona.”)

² Ge e le gabotse tempele ya moya ke’ng, gona re ka hwetša kae dintlha tšeo di e hlalosago gabotse? Tempele ya moya ga se moago wa kgonthe. Ke thulaganyo yeo Jehofa a e dirilego ya gore re kgone go mo hlankela ka tsela yeo a e amogelago motheong wa sehlabelo sa Jesu. Moapostola Paulo, o hlalositše thulaganyo ye gabotse lengwalong leo a le ngwaletšego Bakriste ba Baheberu ba lekgolong la pele la mengwaga bao ba bego ba dula Judea. b

3-4. Moapostola Paulo o be a tshwenyegile ka’ng ka Bakriste ba Baheberu bao ba bego ba dula kua Judea, gona o ba thušitše bjang?

³ Ke ka baka la’ng Moapostola Paulo a ngwaletše Bakriste bao ba bego ba le Judea lengwalo le? Go ka ba go na le mabaka a mabedi a magolo. Lebaka La pele e ka ba e be e le go ba kgothatša. Bontšhi bja bjona pele e e ba Bakriste ba be ba le bodumeding  bja Sejuda. Mohlomongwe bao e bego e be e le baetapele ba bona ba bodumedi ba ka ba ba ile ba ba kwera ka ge bjale e le Bakriste. Ka baka la’ng? Ka gobane Bakriste ba be ba se na tempele ya kgonthe yeo ba ka yago go yona gore ba rapele, ba se na aletare moo ba ka direlago Modimo dihlabelo e bile ba se na baperisita bao ba ka ba hlankelago. Se se ka ba se ile sa nyamiša balatedi ba Kriste le go dira gore tumelo ya bona e fokole. (Baheb. 2:1; 3:​12, 14) Ba bangwe ba ka ba ba ile ba lekega go boela morago bodumeding bja Sejuda.

⁴ Lebaka la bobedi, Paulo o ile a bontšha gore Bakriste bao ba Baheberu ba be ba sa dire sohle seo ba ka se kgonago gore ba kwešiše dithuto tšeo di tseneletšego tša moya, e lego “dijo tše tiilego” tšeo di hwetšwago ka Lentšung la Modimo. (Baheb. 5:​11-14) Go molaleng gore ba bangwe ba bona ba be ba sa latela Molao wa Moshe. Moapostola Paulo o ile a hlalosa gore dihlabelo tšeo molao o bego o re ba di dire, di be di sa phumole sebe ka mo go feletšego. Ka baka leo molao o ile wa “beelwa ka thoko.” Ka gona Paulo o ile a ba ruta ditherešo tše di tseneletšego. O ile a gopotša Bakriste gotee le yena ka “kholofelo e kaone” yeo e theilwego sehlabelong sa Jesu seo se tla ba thušago gore ba “batamele go Modimo.”—Baheb. 7:​18, 19.

5. Re swanetše go kwešiša’ng ka puku ya Beibele ya Baheberu, gona ka baka la’ng?

⁵ Paulo o ile a hlalosetša bana babo ba Baheberu gore ke ka baka la’ng bodumedi bja Bokriste bo phala kgole bodumedi bja Sejuda bjo ba bego ba le go bjona peleng. Tsela yeo Bajuda ba bego ba hlankela ka yona go ya ka molao e be e no ba “moriti wa dilo tše di tlago go tla eupša selo sa kgonthe ke sa Kriste.” (Bakol. 2:17) Moriti e no ba seswantšho sa selo sa kgonthe. Ka mo go swanago, tsela ye Bajuda ba bego ba hlankela Jehofa ka yona nakong e fetilego, e be e no ba moriti ka gobane go be go sa na le tsela e kaone ya go hlankela Jehofa e sa tlago. Re swanetše go kwešiša thulaganyo yeo Jehofa a e dirilego ya gore re lebalelwe dibe e le gore re tle re kgone go mo hlankela ka tsela yeo a e amogelago. Re tlo swantšha “moriti” (e lego Tsela yeo Bajuda ba bego ba hlankela ka yona) le “selo sa kgonthe” (e lego Tsela yeo Bakriste ba hlankelago ka yona), ka ge di hlaloswa ka lengwalong la Baheberu. Ge re dira bjalo re tlo kwešiša gabotse tempele ya moya le gore e re kgoma bjang.

6. Taberenakele e be e dirišwa bjang?

⁶ Tsela yeo Bajuda ba bego ba hlankela ka yona. Paulo o be a theile polelo ya gagwe go  taberenakele yeo e bego e theilwe ke Moshe ka 1512 B.C.E. (Bona tšhate yeo e rego: “Tsela yeo Bajuda ba bego ba hlankela ka yona le Tsela yeo Bakriste ba hlankelago ka yona.”) Taberenakele e be e swana le tente yeo Baisiraele ba bego ba e rwala ka mehla ge ba tloga lefelong le lengwe ba eya go le lengwe. Ba e dirišitše ka mengwaga e fetago e 500 go fihla ge tempele e be e agwa kua Jerusalema. (Ek. 25:​8, 9; Num. 9:22) “Tente ye ya kopano,” e be e dula lefelong leo Baisiraele ba bego ba ka kgona go rapela Modimo, ba mo hlankela le go mo direla dihlabelo ba le go lona. (Ek. 29:​43-46) Eupša taberenakele gape e be e swantšhetša selo se se kaone seo se bego se tlo diragalela Bakriste.

7. Tempele ya moya e thomile goba gona neng?

⁷ Tsela yeo Bakriste ba hlankelago ka yona. Taberenakele ya kgale e be e le “moriti wa dilo tša legodimong,” e bile e swantšhetša tempele e kgolo ya Modimo ya moya. Paulo o boletše gore “tente ye goba taberenakele ke seswantšho sa dilo tša bjale.” (Baheb. 8:5; 9:9) Ka gona ka nako ye a be a ngwalela Baheberu, tempele ya moya e be e šetše e le selo sa kgonthe go Bakriste. E bile gona ka 29 C.E. Ngwageng woo Jesu o ile a kolobetšwa, a tlotšwa ka moya o mokgethwa, a ba a thoma go hlankela Jehofa e le “moperisita yo mogolo yo a phagamego” ka tempeleng ya moya. c—Baheb. 4:14; Dit. 10:​37, 38

8-9. Go ya ka Baheberu 7:​23-27, ke phapano efe e kgolo yeo e lego gona magareng ga baperisita ba phagamego ba Isiraele le Moperisita yo mogolo yo a Phagamego Jesu Kriste?

⁸ Tsela yeo Bajuda ba bego ba hlankela ka yona. Moperisita yo a phagamego o be a emela batho pele ga Modimo. Jehofa o ile a kgetha Arone gore e be moperisita wa mathomo yo a phagamego ge taberenakele e be e neelwa. Eupša Paulo o ile a hlalosa gore, “ba bantši ba ile ba swanelwa ke go ba baperisita ka go hlatlamana ka baka la ge lehu le ile la ba thibela gore ba tšwele pele ba le bjalo.” d (Bala Baheberu 7:​23-27.) Ka ge baperisita bao ba phagamego ba be ba sa phethagala, ba ile ba swanelwa ke go neela dihlabelo bakeng sa dibe tša bona. Se se bontšha phapano e kgolo magareng ga baperisita ba phagamego ba Isiraele le moperisita yo mogolo yo a phagamego e lego Jesu Kriste.

⁹ Tsela yeo Bakriste ba hlankelago ka yona. Ka ge e le moperisita wa rena yo a phagamego, Jesu Kriste “ke mohlanka. . . wa tenteng ya therešo yeo Jehfa a e hlomilego, e sego batho.” (Baheb. 8:​1, 2) Paulo o hlalositše gore “[Jesu] ka baka la go tšwela pele a phela ka mo go sa felego, boperisita bja gagwe ga bo na bahlatlami.” Paulo o tšwela pele ka gore, ka ge Jesu e le “yo a sa šilafalago, yo a sa swanego le badiradibe” e bile a fapana le baperisita ba phagamego ba Isiraele, “ga go nyakege gore letšatši le letšatši a dire dihlabelo” bakeng sa dibe tša gagwe. Ga bjale a re boneng phapano magareng ga dialetare le dihlabelo tšeo di bego di dirwa ke Bajuda le tšeo di dirwago ke Bakriste.

10. Dihlabelo tšeo di bego di dirwa aletareng ya koporo di be di lebišwa go eng?

¹⁰ Tsela yeo Bajuda ba bego ba hlankela ka yona. Go be go na le aletare ya koporo mojakong wa taberenakele moo ba bego ba neela Jehofa dihlabelo ka diphoofolo. (Ek. 27:​1, 2; 40:29) Eupša dihlabelo tšeo di be di sa dire gore dibe tša batho di phumolelwe sa ruri. (Baheb. 10:​1-4) Go neela dihlabelo ka diphoofolo taberenakeleng go be go lebiša sehlabelong se tee seo se bego se tla dira gore dibe tša batho di phumolelwe sa ruri.

11. Ke aletare efe yeo Jesu a ineetšego go yona e le sehlabelo? (Baheberu 10:​5-7, 10)

 ¹¹ Tsela yeo Bakriste ba hlankelago ka yona. Jesu o be a tseba gore Jehofa o mo rometše mo lefaseng gore a tle a neele bophelo bja gagwe e le sehlabelo sa topollo bakeng sa batho. (Mat. 20:28) Ge Jesu a kolobetšwa, o be a ineela gore a tle a dire seo Jehofa a se nyakago. (Joh. 6:38; Bagal. 1:4) Jesu o ile a neela bophelo bja gagwe aletareng ya seswantšhetšo yeo e bego e emela “thato” ya Modimo ya gore a neele bophelo bjo bo phethagetšego bja Morwa wa gagwe e le sehlabelo. Jesu o ile a neela bophelo bja gagwe “gatee ya ba moka” gore a phumole ka mo go feletšego dibe tša motho yo mongwe le yo mongwe yo a bontšhago tumelo go Kriste. (Bala Baheberu 10:​5-7, 10.) Ga bjale a re boneng gore dilo tša ka gare ga taberenakele di emela’ng.

12. Ke bomang bao ba bego ba swanetše go tsena ka diphapošing tša taberenakele?

¹² Tsela yeo Bajuda ba bego ba hlankela ka yona. Taberenakele le ditempele tšeo di bego di agilwe Jerusalema di be di swana ka gare, go be go na le diphapoši tše pedi, e lego “sekgethwa” le “sekgethwakgethwa” tšeo di bego di arogantšwe ka seširo. (Baheb. 9:​2-5; Ek. 26:​31-33) Ka sekgethweng go be go na le sehlomapone sa gauta, aletare ya go fišetša dibego le tafola ya senkgwa sa pontšho. Go be go dumeletšwe “baperisita ba tloditšwego” feela gore ba tsene ka sekgethweng gomme ba dire mediro e mekgethwa. (Num. 3:​3, 7, 10) Ka Sekgethwakgethweng go be go na le areka ya kgwerano ya gauta yeo e bego e swantšhetša go ba gona ga Jehofa. (Ek. 25:​21, 22) Ke moperisita yo a phagamego feela yo a bego a dumeletšwe go  feta seširo gomme a tsene ka Sekgethwakgethweng gatee ka ngwaga letšatšing la poelano. (Lef. 16:​2, 17) Ngwaga o mongwe le o mongwe o be a tsena ka madi a diphoofolo gore a dire poelano bakeng sa dibe tša gagwe le tša setšhaba ka moka. Mafelelong Jehofa o ile a diriša moya wa gagwe o mokgethwa go bontšha gore ge e le gabotse dilo tšeo di bego di le ka taberenakeleng di be di emela’ng.—Baheb. 9:​6-8. e

13. Sekgethwa le Sekgethwakgethwa tša ka taberenakeleng di emela’ng tseleng yeo Bakriste ba hlankelago Jehofa ka yona?

¹³ Tsela yeo Bakriste ba hlankelago ka yona. Go na le palo e lekanyeditšwego ya balatedi ba Kriste bao ba tloditšwego ka moya o mokgethwa e bile ba na le segwera seo se kgethegilego le Jehofa. Batho ba ba 144 000 ba tlo hlankela legodimong ba na le Jesu e le baperisita. (Kut. 1:6; 14:1) Sekgethwa sa ka tempeleng se be se bontšha gore ba kgethilwe e le barwa ba Modimo ba moya ba sa dutše ba le mo lefaseng. (Rom. 8:​15-17) Sekgethwakgethwa sa ka taberenakeleng se be se emela legodimo moo Jehofa a lego gona. “Seširo” seo se bego se aroganya Sekgethwa le Sekgethwakgethwa, se be se emela mmele wa Jesu wa nama wo o bego o mo thibela go tsena legodimong e le Moperisita yo mogolo yo a Phagamego wa tempele ya moya. Jesu o dirile gore Bakriste ba tloditšwego ka moka ba kgone go tsena legodimong ka go neela mmele wa gagwe e le sehlabelo bakeng sa batho. Le bona ba swanetše go neela mebele ya bona ya nama gore ba kgone go hwetša moputso wa bona legodimong. (Baheb. 10:​19, 20; 1 Bakor. 15:50) Ka morago ga gore Jesu a tsošwe, o ile a tsena Sekgethwakgethweng sa moya moo batlotšwa ba tlago go ba le yena.

14. Go ya ka Baheberu 9:​12, 24-26, ke ka baka la’ng go hlankela Jehofa ka tempeleng ya gagwe ya moya go le kaone go feta tsela yeo Baisiraele ba bego ba mo hlankela ka yona?

¹⁴ Re kgonne go bona thulaganyo ya Jehofa e phagamego ya borapedi bja therešo motheong wa sehlabelo sa topollo le boperisiteng bja Jesu Kriste. Moperisita yo a phagamego kua Isiraele, o be a tsena ka Sekgethwakgethweng seo se dirilwego ka diatla tša batho, a swere madi a diphoofolo tšeo go bego go dirwa dihlabelo ka tšona, eupša Jesu o ile a tsena “legodimong” e lego lefelo le lekgethwa go a phala ka moka le go tšwelela pele ga Jehofa. O ile a bontšha bohlokwa bja bophelo bjo bo phethagetšego bjo a bo neetšego e le topollo bakeng sa rena “gore a tloše dibe ka sehlabelo sa gagwe.” (Bala Baheberu 9:​12, 24-26.) Sehlabelo sa Jesu ke se segolo kudu e bile se phumola dibe tša rena ka mo go feleletšego. Re tlo bona gore go sa šetšwe gore kholofelo ya rena ke ya go phela legodimong goba mo lefaseng, ka moka ga rena re ka kgona go hlankela Jehofa ka tempeleng ya gagwe ya moya.

15. Ke bomang bao ba bego ba hlankela mabaleng a taberenakele?

¹⁵ Tsela yeo Bajuda ba bego ba hlankela ka yona. Taberenakele e be e na le lapa, moo e bego e le lefelo le legolo leo le ageleditšwego ka legora moo baperisita ba bego ba dira mešomo ya bona gona. Aletare e kgolo ya koporo yeo go bego go fišetšwa diorelo go yona e be e le ka lapeng, e na le sebjana sa koporo seo se bego se na le meetse ao baperisita ba bego ba a diriša go itlhwekiša pele ba phetha dikabelo tša bona tše kgethwa. (Ek. 30:​17-20; 40:​6-8) Ditempele tšeo di ilego tša agwa ka morago, tšona di be di na le malapa moo bao e bego e se baperisita ba bego ba ema gona ke moka ba hlankela Modimo.

16. Ke bomang bao ba hlankelago mabaleng a tempele ya moya?

 ¹⁶ Tsela yeo Bakriste ba hlankelago ka yona. Ga bjale batlotšwa ba hlankela Jehofa ka go botega malapeng a ka gare tempeleng ya moya ya Jehofa pele ba ka ya legodimong gore ba hlankele e le baperisita ba na le Jesu. Sebjana se segolo seo se bego se le ka taberenakeleng le ka tempeleng se gopotša Bakriste ka moka gore ba dule ba hlwekile boitshwarong le moyeng. “Lešaba le legolo” leo le thekgago bana babo Jesu ba tloditšwego ka go botega, lona le hlankela Jehofa kae? Moapostola Johane o ile a ba bona ba “eme pele ga sedulo sa bogoši,” seo mo lefaseng se swantšhetšwago ke malapa a ka ntle, moo “ba mo [direlago] tirelo e kgethwa mosegare le bošego ka tempeleng ya gagwe.” (Kut. 7:​9, 13-15) Re leboga gore Jehofa o re neile tokelo ya gore re mo hlankele ka tempeleng ya gagwe e kgolo ya moya!

17. Re na le tokelo ya go nea Jehofa dihlabelo tša mohuta mang?

¹⁷ Lehono Bakriste ka moka ba na le tokelo ya go neela Jehofa dihlabelo ba diriša nako ya bona, matla a bona le dilo tša bona go etiša dikgahlego tša Mmušo wa Modimo pele. Go etša ge moapostola Paulo a ile a botša Bakriste ba Baheberu, re ka “[direla] Modimo sehlabelo sa tumišo ka mehla, ke gore seenywa sa melomo ya rena yeo e bolelago ka leina la gagwe phatlalatša.” (Baheb. 13:15) Re ka bontšha gore re leboga tokelo yeo re nago le yona ya go hlankela Jehofa ka go mo nea dilo tša rena tše bohlokwahlokwa.

18. Go ya ka Baheberu 10:​22-25, ke’ng seo re sa swanelago go se hlokomologa le seo re sa swanelago go se lebala?

¹⁸ Bala Baheberu 10:​22-25. Go ya mafelelong a lengwalo leo Paulo a le ngwaletšego Baheberu, o bolela ka dilo tšeo re swanetšego go dula re di dira ge re hlankela Jehofa. Dilo tšeo di akaretša go rapela Jehofa, go bolela ditaba tše dibotse, go bokana mmogo bjalo ka phuthego le go kgothatšana “kudukudu ka ge [re] bona letšatši la Jehofa le batamela.” Go ya mafelelong a puku ya Kutollo, morongwa wa Jehofa o ile a gatelela mantšu a rego: “Rapela Modimo!” (Kut. 19:10; 22:9) Eka re ka dula re gopola therešo ye e tseneletšego ya moya mabapi le tempele e kgolo ya moya ya Jehofa le go thabela tokelo yeo re nago le yona ya go hlankela Modimo wa rena yo mogolo!