1. ¿Te mä mensaje ungä ntꞌo̱de nꞌa rä e̱nxe̱ Äjuä ꞌne te debe gä pe̱fihu̱ ko näꞌä xikägihu̱?

 XIꞌMU̱ nꞌa rä pa dä zo̱ho̱ nꞌa rä e̱nxe̱ ꞌne dä xiꞌi ge ne dä ñä kongeꞌi, ¿ma gi kohi gi yꞌo̱de näꞌä ne dä xiꞌi? Nde, ¿gi pädi? Rä Mäkä Tꞌofo mää ge mäpaya, nꞌa rä e̱nxe̱ Äjuä zofo yä jäꞌi de gatꞌho yä hnini, yä pueblo, yä dähni ꞌne embäbi njaua: «Tsuhu̱ Äjuä ꞌne nsundahu̱ꞌä [ . . . ]. Xo̱kämbenihu̱ nuꞌä to bi hyokä mähetsꞌi ꞌne rä xiꞌmhai, rä ndehe ꞌne yä po̱tꞌhe» (Apoc. 14:​6, 7). Xi nuju̱, ¿te debe gä pe̱fihu̱ ko näꞌä xikägihu̱? Hää, gatꞌho di debe gä xo̱kämbenihu̱ ꞌne gä pe̱päbihu̱ rä Zi Dada Jeoba ngeꞌä go geꞌä xa mäjuäni Äjuä. ¡Hängu di jamädibihu̱ ngeꞌä rꞌakägihu̱ rä oportunida de gä xo̱kämbenihu̱ ha rä mäkä templo!

2. ¿Te me̱ꞌä näꞌä rä mäkä templo no̱ni ha rä mfistꞌofo Hebreos? (Hyandi ꞌnehe rä rekuadro « Näꞌä hindi signifika»).

² ¿Te mä parte de rä Biblia no̱ni rä mäkä templo Äjuä ꞌne te di signifika? Nunä hingä nꞌa rä nguu nixi nꞌa rä templo näꞌä dä za gä handihu̱. Nunä mäkä templo signifika näꞌä rä modo de hanja xä desidi Jeoba drä so̱kämbeni ꞌne xä hñutsꞌi de gä simiento näꞌä rä te bi uni rä Hesu. Ha nuꞌu̱ yä pa yä mu̱di kristianu, rä apostol Pablo bi esplika ndunthi yä detalle de nunä rä mäkä templo ꞌne nuꞌu̱ yä rekisito xä uni rä Zi Dada Jeoba de hanja dri debe dä so̱kämbeni. Näꞌä bi esplika rä apostol Pablo de nunä mäkä templo, di tinihu̱ ha rä mfistꞌofo Hebreos. Gehnä rä karta bi me̱mpäbi nuꞌu̱ yä kristianu myä hebreo mi ꞌmu̱i ha Judea. b

3, 4. ¿Por hanja rä apostol Pablo mi turämu̱i po nuꞌu̱ yä kristianu yä hebreo ꞌne hanja bi matsꞌi?

³ ¿Por hanja rä apostol Pablo bi yꞌopäbi nꞌa rä karta nuꞌu̱ yä kristianu myä hebreo mi ꞌmu̱i ha Judea? Zäi ge po yoho yä raso. Nꞌaa, pa bi nupäbi yä mfeni. Ndunthi de gehyu̱ xki tꞌuti dende mi bätsi  näꞌä rä relijion ꞌne yä nzäi yä judío. Pe nubye̱ mi thogi yä ntꞌu̱tsate ꞌne mri ꞌme̱tuäbi yä tsa. ¿Por hanja? Ngeꞌä nuꞌu̱, xki desidi dä hye̱pu̱ näꞌä rä relijion yä judío pa go bi de̱nibye̱ rä Kristo. Hänge nuyu̱ yä de̱ni rä Hesu, ya himi pe̱ꞌtsi nꞌa rä templo habu̱ dä xo̱kämbeni Äjuä, himi pe̱ꞌtsi nꞌa rä altar habu̱ dä uni yä ofrenda, nixi nꞌa rä majhä. Ora mri tꞌu̱tsa ꞌne mri theni nuyu̱ yä kristianu, zäi ge mi u̱ yä mfeni ꞌne mi desanimä (Heb. 2:1; 3:​12, 14). Tal vez rꞌa de gehyu̱ asta bi beni dä mengi mänꞌaki ha näꞌä rä relijion yä judío.

⁴ Yoho, rä apostol Pablo bi yꞌopäbi nuꞌu̱ yä kristianu myä hebreo pa bi xipäbi ge xki da ngue̱nda ge nuyu̱ himi ho dä yꞌo̱tꞌe ntsꞌe̱di po dä nxadi ꞌne dä ntiende mänꞌa xä ñho nuꞌu̱ yä ntꞌudi ehe ha rä Noya Äjuä (Heb. 5:​11-14). Po̱de rꞌa de nuyu̱ yä kristianu tobe mi pe̱fi rꞌa de nuꞌu̱ yä mhända mi hutsꞌi ha nuꞌu̱ yä Ley bi tꞌumbäbi Moisés. Pe rä apostol Pablo bi esplikabi ge nuꞌu̱ yä ofrenda ꞌne nuꞌu̱ yä sacrificio mi mända rä Ley Moisés, himi tsa dä goꞌmi nixi dä xu̱kuäbi xä ñho yä pekado yä jäꞌi. Po geꞌä rä Zi Dada Jeoba bi desidi ya hindä mändabi rä hnini dä kumpli nuꞌu̱ yä leyꞌu̱. ꞌNepu̱ rä apostol Pablo bi ꞌñuti rꞌa de nuꞌu̱ yä ntꞌudi mi debe dä ntiende xä ñho nuꞌu̱ yä kristianuꞌu̱. Bi esplikabi ge po mäde de näꞌä rä te bi uni rä Hesu, nuꞌu̱ mänꞌa ma xä me̱ꞌtsi nꞌa rä hogä ntsitsꞌi ko rä Zi Dada Jeoba ꞌne ma xä me̱ꞌtsi nꞌa rä humu̱i mänꞌa xä ñho (Heb. 7:​18, 19).

5. ¿Te xa mähyoni gä ntiendehu̱ ꞌne por hanja?

⁵ Rä apostol Pablo bi esplikabi nuꞌu̱ yä kristianu myä hebreo, ge näꞌä rä forma de hanja mi xo̱kämbenibye̱ rä Zi Dada Jeoba, mänꞌa xmä ñho ke näꞌä rä modo de hanja mi ja mä mꞌe̱tꞌo. Rä apostol Pablo bi ꞌñembäbiꞌu̱: «Ngetꞌho gatꞌho näꞌä mi tꞌo̱tꞌä mä mꞌe̱tꞌo, ngu mrä xuditho de näꞌä to go ma dä e mꞌe̱fa, ꞌne nubye̱ di pähu̱ ge geꞌä rä zi Hmuu Ñhesukristo» (Col. 2:​17, Ár ꞌRaꞌyo Nkohi Jö [RN]). ¿Te di signifika nuya yä noya? Por ejemplo, ora di handihu̱ ge xä ꞌñepu̱ nꞌa rä xudi, ꞌne mꞌe̱fa ja di handihu̱ toꞌo näꞌä rä jäꞌi xä ꞌñepu̱; njabu̱ ꞌnehe näꞌä rä forma hanja yä judío mi adora rä Zi Dada Jeoba po mäde de nuꞌu̱ yä Ley bi tꞌumbäbi Moisés. Nunä ho̱nse̱ mi ngu nꞌa rä xudi näꞌä bi ꞌñudi nꞌa tu̱i de te mä forma ma xrä so̱kämbeni rä Zi Dada Jeoba xti zo̱ho̱ rä Kristo. Xa mähyoni gä pädihu̱ te mä mpadi bi ja rä Zi Dada Jeoba. ¿Por hanja? Ngeꞌä njabu̱ ma gä lograhu̱ gä xo̱kämbeni ja ngu di hoꞌä ꞌne ma gä pädihu̱ hanja di punꞌgägihu̱ mä pekadohu̱. Nubye̱ ma gä handihu̱ te mää rä mfistꞌofo Hebreos ꞌne ma gä handihu̱ te mi pe̱fi yä judío mäyaꞌmu̱ pa mi xo̱kämbeni rä Zi Dada Jeoba, ꞌne ma gä komparahu̱ ko näꞌä pe̱fibye̱ nuꞌu̱ xa mäjuäni yä kristianu. Njabu̱ ma dä za gä ntiendehu̱ mänꞌa xä ñho ndaꞌä näꞌä rä mäkä templo rä Zi Dada Jeoba no̱ni rä mfistꞌofo Hebreos ꞌne hanja di benefisiagihu̱.

6. ¿Pa te bri usa mäyaꞌmu̱ rä tabernáculo?

⁶ Te mi signifika mäyaꞌmu̱. Rä apostol Pablo bi mu̱di bi mää de näꞌä rä tabernáculo bi hyoki Moisés po rä je̱ya 1512 antes de rä era común (hyandi nuꞌu̱ yä dibujo habu̱ enä «Te mi signifika mäyaꞌmu̱ ꞌne te di signifika mäpaya»). Rä tabernáculo mi nꞌa rä jäꞌtsi de gä mhuntsꞌi habu̱ mi ntini yä israelita pa mi xo̱kämbeni rä Zi Dada Jeoba ꞌne mi umbäbi yä ofrenda (Éx. 29:​43-46). Durante näꞌä rä tiempo bi ñꞌo ha yä yꞌotꞌä ꞌmatha, yä israelita mi egi nunä jäꞌtsi habu̱ mi tso̱ni, ꞌne ora mi toka dä ma ha mä nꞌa rä luga, mi häki pa mi hätsꞌi nunä jäꞌtsi (Éx. 25:​8, 9; Núm. 9:22). Nunä jäꞌtsi bi usa yä israelita durante 500 yä je̱ya asta nuꞌmu̱ bi thoki näꞌä rä templo ha Jerusalén. ¿Pe gi pädi? Nunä tabernáculo o jäꞌtsi, bi ꞌñudi nuꞌu̱ yä tꞌo̱tꞌe ma xä ꞌñehe mꞌe̱fa pa nuꞌu̱ xa mäjuäni yä kristianu.

7. ¿Hämꞌu̱ bi zo̱ho̱ bi nja näꞌä rä mäkä templo rä Zi Dada Jeoba?

⁷ Te di signifika mäpaya. Rä apostol Pablo bi ꞌñenä ge näꞌä rä tabernáculo o jäꞌtsi de gä mhuntsꞌi mi usa yä israelita mäyaꞌmu̱, bi ꞌñudi näꞌä ma xä thogi mꞌe̱fa «ha mähetsꞌi» ko näꞌä rä mäkä templo rä Zi Dada Jeoba (Heb. 8:5; 9:9). Nunä mäkä templo bi zo̱ho̱ bi nja po rä je̱ya 29 era común nuꞌmu̱ rä Hesu bi nxixtehe. Dende geꞌmu̱, rä Hesu bi mu̱di bi Ndä gä Majhä ha näꞌä rä mäkä templo rä Zi Dada Jeoba. Hänge ora rä apostol Pablo bi yꞌopäbi nuyu̱ yä kristianu myä hebreo, ya mi ja nunä mäkä templo mäske nubye̱ hinto mi tsa dä hyandi (Heb. 4:14; Hech. 10:​37, 38). c

8, 9. Ja ngu di handihu̱ ha Hebreos 7:​23-27, ¿por hanja näꞌä mä Ndä gä Majhähu̱ Ñhesukristo di nꞌañꞌo de nuꞌu̱ yä ndä gä majhä mi ꞌmu̱i ha Israel?

⁸ Te mi signifika mäyaꞌmu̱. Ora mi ja nꞌa rä xuñha o asunto ha rä hnini Israel, rä ndä gä majhä go geꞌä mi uni rä hmi ante rä Zi Dada Jeoba. Aarón go geꞌä rä mu̱di ndä gä majhä bi thutsꞌi ha rä hnini Israel nuꞌmu̱ bri inäura näꞌä rä jäꞌtsi de gä mhuntsꞌi mi fädi ngu rä tabernáculo. Rä apostol Pablo bi esplika ge ora mi tu nꞌa rä ndä gä majhä, pe̱ꞌtsi te mi thahni mä nꞌa pa dä kupa näꞌä rä kargoꞌä (hñeti Hebreos 7:​23-27). d Nuꞌu̱ yä ndä gä majhä ꞌnehe xki mꞌu̱i ko rä pekado, hänge aparte de ke mi uni yä ofrenda po yä pekado rä hnini, ꞌnehe mi uni yä ofrenda po nuꞌu̱ yä pekadose̱. ¿Gi da ngue̱nda por hanja rä Kristo di nꞌañꞌo de nuꞌu̱ yä ndä gä majhä mi ꞌmu̱i ha rä hnini Israel?

⁹ Te di signifika mäpaya. Ñhesukristo go geꞌä rä Ndä gä Majhä ha näꞌä rä mäkä templo rä Zi Dada Jeoba hindi handihu̱. Hänge rä apostol Pablo bi ꞌñenä ge Ñhesukristo go geꞌä pe̱fi näꞌä rä kargo «de gä majhä nuni mähetsꞌi habu̱ bi ja nuꞌä rä mäkä luga bi hyokse̱ Äjuä, hingo bi hyokä yä jäꞌi» (Heb. 8:​1, 2). Rä apostol Pablo bi ꞌñenä ge koꞌmu̱ rä Hesu nunka ma dä du ꞌne ma dä mꞌu̱i pa nzäntho, hinto ma dä hñämbäbi näꞌä rä däta nsu de gä Ndä gä Majhä. Mäyaꞌmu̱ nuꞌu̱ yä ndä gä majhä ꞌnehe mi ofrese yä sacrificio ꞌne yä ofrenda po yä pekadose̱. Pe rä Hesu hinte mä pekado pe̱ꞌtsi, näꞌä nꞌa rä Ndä gä Majhä näꞌä rä perfecto ꞌne nunka bi peka mi mꞌu̱kua ha rä Xiꞌmhai. Nubye̱ ma gä handihu̱ te mi signifika nuꞌu̱ yä altar ꞌne yä sacrificio de mäyaꞌmu̱ ꞌne te signifika mäpaya.

10. ¿Te bi ꞌñudi nuꞌu̱ yä sacrificio mi tsꞌätꞌi mäyaꞌmu̱ ha rä altar de gä kobre?

¹⁰ Te mi signifika mäyaꞌmu̱. Ha näꞌä rä patio näꞌä rä tabernáculo o jäꞌtsi de gä mhuntsꞌi, mi ja nꞌa rä altar de gä kobre habu̱ mi tsꞌätꞌi nuꞌu̱ yä ofrenda de gä mboꞌni mri ofresebi rä Zi Dada Jeoba (Éx. 27:​1, 2; 40:29). Pe nuꞌu̱ yä sacrificio mi tꞌuni, himi tsa dä xu̱kuäbi xä ñho yä pekado yä jäꞌi (Heb. 10:​1-4). Nuꞌu̱ yä mboꞌni mri ofrese de gä sacrificio, ho̱nse̱ bi ꞌñudi näꞌä ma xä thogi mꞌe̱fa ora ma xä tꞌuni nꞌa rä sacrificio näꞌä hää ma xä xu̱kuäbi xä ñho yä pekado yä jäꞌi.

11. ¿Te me̱ꞌä näꞌä rä altar habu̱ bi uni rä bida Ñhesukristo ngu nꞌa rä sacrificio? (Hebreos 10:​5-7, 10).

 ¹¹ Te di signifika mäpaya. Rä Hesu mi pädi xä ñho ge rä Zi Dada Jeoba xki me̱hni ha rä Xiꞌmhai pa dä uni rä te, ꞌne njabu̱ dä guꞌtuäbi yä pekado yä mexiꞌmhai (Mat. 20:28). Hänge nuꞌmu̱ bi nxixtehe rä Hesu, bi mꞌai ante rä thandi rä Zi Dada Jeoba pa bi ꞌñuti ge mi ꞌmu̱i dispuesto dä me̱päbi rä bolunta (Juan 6:38; Gál. 1:4). Mi nxixtehe rä Hesu, ꞌñenä go bi uni rä te pa bri ofrese ha nꞌa rä altar. Näꞌä rä altar de mäyaꞌmu̱, nubye̱ bi signifika rä bolunta rä Zi Dada Jeoba. ¿Pe ndaꞌä mrä bolunta rä Zi Dada Jeoba? Ge näꞌä rä Tꞌu̱ xä uni rä bida po gatꞌho yä mexiꞌmhai. Hää, rä Hesu bi uni ho̱nse̱ nꞌa mꞌikitho näꞌä rä bida ngu nꞌa rä sacrificio pa dä xu̱kuäbi yä pekado gatꞌho nuꞌu̱ toꞌo pe̱ꞌspäbi rä jamfri (hñeti Hebreos 10:​5-7, 10). Nubye̱ ma gä ñähu̱ de te mi ja mbo ha näꞌä rä tabernáculo o jäꞌtsi de gä mhuntsꞌi mi usa yä israelita mäyaꞌmu̱, ꞌne te di signifika mäpaya.

12. ¿Toꞌo mi tsa dä yu̱tꞌi ha nuꞌu̱ yä kuarto mi tꞌembäbi rä Santo ꞌne rä Santísimo?

¹² Te mi signifika mäyaꞌmu̱. Tanto rä tabernáculo ngu näꞌä rä templo bi thoki mꞌe̱fa ha Jerusalén, mi pe̱ꞌtsi yoho yä kuarto: nꞌaa mi fädi ngu rä «Santo» ꞌne mä nꞌaa mi fädi ngu rä «Santísimo». Entre nuya yoho yä kuarto mi naxä nꞌa rä cortina näꞌä mi dibidi nuya yoho yä kuarto (Heb. 9:​2-5; Éx. 26:​31-33). Ha näꞌä rä kuarto mi tꞌembäbi rä Santo, mi ja nꞌa rä mfoxyoo o candelabro de gä oro, mi ja nꞌa rä altar habu̱ mi tsꞌätꞌi rä tꞌutsꞌi ꞌne nꞌa rä mexa habu̱ mi tꞌetsꞌi rä thuhme. Ho̱nse̱ nuꞌu̱ yä majhä xki thahni, geꞌu̱ mi tsa dä yu̱tꞌi ha nunä kuarto pa dä kumpli ko nuꞌu̱ yä mäkä responsabilida xki tꞌumbäbi (Núm. 3:​3, 7, 10). Ha näꞌä rä kuarto mi tꞌembäbi rä Santísimo, ja mi jani näꞌä rä arca de gä kohi. Nunä arca xki thoki de gä oro, ꞌne habu̱ mi ja nunä arca mi signifika ge ja mi ꞌmu̱hni Jeoba (Éx. 25:​21, 22).  Ho̱nse̱ rä ndä gä majhä mi tsa dä yu̱tꞌi asta mbo ha näꞌä rä kuarto mi fädi ngu rä Santísimo. Ha näꞌä rä Pa de gä Nsu̱kä pekado mi tꞌo̱tꞌe tatꞌä je̱ya, rä ndä gä majhä mi ku̱tꞌi ha rä Santísimo ko yä ji yä mboꞌni pa dä yꞌadi rä mpumbäte po yä pekadose̱ ꞌne po yä pekado gatꞌho rä hnini (Lev. 16:​2, 17). Ko rä tiempo rä Zi Dada Jeoba bi usa rä espiritu santo pa dä xikägihu̱ te bi ꞌñudi nuꞌu̱ yä tꞌo̱tꞌe mi ja ha rä tabernáculo (Heb. 9:​6-8). e

13. Ha rä mäkä templo rä Zi Dada Jeoba de mäpaya, ¿te me̱ꞌäbye̱ rä Santo ꞌne rä Santísimo?

¹³ Te di signifika mäpaya. ꞌMu̱i 144.000 nuꞌu̱ yä kristianu bi thahni ko rä espiritu santo, ꞌne rä Zi Dada Jeoba ya handi nuyu̱ ngu yä bätsi. Nuyu̱ yä kristianu ma dä mꞌu̱i ngu yä majhä ha mähetsꞌi ko rä Hesu (Apoc. 1:6; 14:1). Näꞌä rä kuarto mi tꞌembäbi mäyaꞌmu̱ rä Santo, nubye̱ geꞌä näꞌä rä hogä ntsitsꞌi ja entre Jeoba ꞌne nuꞌu̱ 144.000 yä kristianu (Rom. 8:​15-17). Näꞌä rä kuarto mi tꞌembäbi mäyaꞌmu̱ rä Santísimo, nubye̱ geꞌä mähetsꞌi habu̱ bi ꞌmu̱i rä Zi Dada Jeoba. Näꞌä rä «cortina» mi dibidi rä Santo ꞌne rä Santísimo, signifika näꞌä rä ndoyꞌo rä Kristo mi pe̱ꞌtsi nuꞌmu̱ bi mꞌu̱kua ha rä Xiꞌmhai. Koꞌmu̱ rä Hesu mi pe̱ꞌtsi rä ndoyꞌo de gä mexiꞌmhai, himi tsa dä yu̱tꞌi njabu̱ ha mähetsꞌi ha rä mäkä templo rä Zi Dada Jeoba. Nuꞌmu̱ rä Hesu bi uni rä ndoyꞌo ngu nꞌa rä sacrificio po gatꞌho yä jäꞌi, bi xoki nꞌa rä ꞌñuu pa dä ma dä ꞌmu̱i ha mähetsꞌi nuꞌu̱ 144.000 yä kristianu bi thahni. Pa dä za dä yu̱tꞌi ha mähetsꞌi nuyu̱ 144.000, pe̱ꞌtsi te di debe dä zopu̱ yä cuerpo de gä ngo̱ nuua ha rä Xiꞌmhai (Heb. 10:​19, 20; 1 Cor. 15:50). Mi nuhu rä Hesu de rä du, bi yu̱tꞌi ha mähetsꞌi ha rä mäkä templo rä Zi Dada Jeoba habu̱ tꞌembäbi rä Santísimo. Ko rä tiempo, gatꞌho nuꞌu̱ 144.000 ma dä ntini ko rä Hesu.

14. Ja ngu di handihu̱ ha Hebreos 9:​12, 24-26, ¿por hanja näꞌä rä mäkä templo rä Zi Dada Jeoba de mäpaya mänꞌa xä ñho ke näꞌä rä so̱kämbeni mi ja mäyaꞌmu̱ ha rä hnini Israel?

¹⁴ Näꞌä rä modo de hanja di xo̱kämbenihu̱ mäpaya rä Zi Dada Jeoba, mänꞌa xä ñho ke näꞌä rä so̱kämbeni mi ja mäyaꞌmu̱ ha rä hnini Israel. Ngeꞌä mäpaya, ha rä mäkä templo rä Zi Dada Jeoba, xä thutsꞌi de gä simiento näꞌä rä te bi uni Ñhesukristo ꞌne nubye̱ go geꞌä mismo rä Ndä gä Majhä. Näꞌä rä kuarto mi tꞌembäbi rä Santísimo mi ja ha rä tabernáculo mäyaꞌmu̱, go xki hyokise̱ yä jäꞌi ꞌne rä ndä gä majhä go geꞌä mi ku̱tꞌi ha nunä kuarto ko rä ji yä mboꞌni. Pe rä Hesu himbi yu̱tꞌi ha nꞌa rä kuarto näꞌä xä hyoki yä jäꞌi, sino ke bi yu̱tꞌi ha mähetsꞌi ante rä thandi rä Zi Dada Jeoba pa bi ntregabi näꞌä rä presio mi pe̱ꞌtsi näꞌä rä bida bi uni de gä sacrificio po gekhu̱ (hñeti Hebreos 9:​12, 24-26). Näꞌä rä bida bi uni rä Hesu, tsa dä xu̱kuäbi xä ñho yä pekado yä mexiꞌmhai, hingä ngu nuꞌu̱ yä sacrificio de gä mboꞌni mi tꞌuni mäyaꞌmu̱. Pe nubye̱ ma gä handihu̱ hanja hindi mporta ua di to̱ꞌmihu̱ gä ꞌmu̱ihu̱ ha rä Xiꞌmhai o ha mähetsꞌi, gatꞌho dä za gä xo̱kämbenihu̱ rä Zi Dada Jeoba ha rä mäkä templo.

15. ¿Toꞌo mi xo̱kämbeni rä Zi Dada Jeoba ha näꞌä rä patio mi ja thi de rä jutsꞌi?

¹⁵ Te mi signifika mäyaꞌmu̱. Thi de rä tabernáculo mi ja nꞌa rä patio habu̱ yä majhä mi kumpli ko yä responsabilida. ꞌNehe mi ja nꞌa rä jutsꞌi näꞌä mi kotꞌi tanto rä tabernáculo ngu rä patio. Ha rä patio ꞌnehe mi ja nꞌa rä altar de gä kobre habu̱ mi tsꞌätꞌi yä ofrenda. ꞌNehe mi ja nꞌa rä mꞌothe de gä kobre habu̱ yä majhä mi nxu̱ki änte de dä ja yä ꞌme̱fi (Éx. 30:​17-20; 40:​6-8). Ha nuꞌu̱ yä templo bi thoki mꞌe̱fa ha rä hnini Israel, ꞌnehe mi ja nꞌa rä patio thi de rä jutsꞌi habu̱ mi ntini nuꞌu̱ hingä myä majhä pa ꞌnehe mi xo̱kämbeni rä Zi Dada Jeoba.

16. ¿Toꞌo pe̱päbi rä Zi Dada Jeoba ha nuꞌu̱ yoho yä patio ja ha rä mäkä templo rä Zi Dada Jeoba?

¹⁶ Te di signifika mäpaya. Mientra to̱ꞌmi dä ma ha mähetsꞌi pa dä majhä mähye̱gi ko rä Kristo, nuꞌu̱ 144.000 tobe ꞌmu̱i ha rä Xiꞌmhai, ꞌñenä go ꞌmai ha näꞌä rä mu̱di patio de rä mäkä templo rä Zi Dada Jeoba pa pe̱päbi. Näꞌä rä mꞌothe de gä kobre  mi ja thi de rä tabernáculo ꞌne de rä templo, bembäbi tanto nuꞌu̱ to̱ꞌmi dä ma ha mähetsꞌi ꞌne nuꞌu̱ to̱ꞌmi dä mꞌu̱i ha rä Xiꞌmhai, ge hyaxtho di debe dä mꞌu̱i xä ntꞌaxi ante rä thandi rä Zi Dada Jeoba. ¿Xi habu̱ di xo̱kämbeni Jeoba nuꞌu̱ hingä yä majhä ꞌne to̱ꞌmi dä mꞌu̱i ha rä Xiꞌmhai? Rä apostol Juan bi ꞌñenä: «Nꞌa rä dängä mhuntsꞌä jäꞌi [ . . . ] ꞌmaiꞌu̱ ha rä thandi Äjuä [ . . . ] ꞌne pe̱päbi mä pa rä xui» (Apoc. 7:​9, 13-15). Hää, nuꞌu̱ to̱ꞌmi dä mꞌu̱i ha rä Xiꞌmhai, ꞌñenä go ꞌmai ha näꞌä rä patio ja thi de rä jutsꞌi de rä mäkä templo Jeoba, pa dende gekua di nsunda ꞌne pe̱päbi rä Zi Dada Jeoba. ¡Hängu di johyahu̱ gä pädihu̱ ge gatꞌho di pe̱ꞌtsihu̱ nꞌa rä luga ha rä mäkä templo rä Zi Dada Jeoba pa gä nsundahu̱ ꞌne gä xo̱kämbenihu̱!

17. ¿Te mä sacrificio dä za gä umbäbihu̱ rä Zi Dada Jeoba mäpaya?

¹⁷ ¿Te mä sacrificio dä za gä umbäbihu̱ rä Zi Dada Jeoba mäpaya? Dä za gä usahu̱ de mä tiempohu̱, mä tsꞌe̱dihu̱ ꞌne gatꞌho näꞌä di pe̱ꞌtsihu̱ pa gä apoyahu̱ rä Gobiernu Äjuä. Mähyoni gä jamäsuhu̱ ꞌnehe nunä konseho bi umbäbi rä apostol Pablo nuꞌu̱ yä kristianu myä hebreo ora bi ꞌñembäbi: «Xo̱kämbenihu̱ Äjuä nzäntho. Nunä so̱kämbeninä gehnä ngu nꞌa rä ñhäꞌti pa Äjuä nuꞌä ri ꞌñepi gä umbäbihu̱ ko mä nehu̱» (Heb. 13:15). Mu̱ xa gä o̱thu̱ ntsꞌe̱di po gä pe̱päbihu̱ rä Zi Dada Jeoba nubye̱ di tehu̱, ma gä udihu̱ ge di balorahu̱ näꞌä rä däta nsu di pe̱ꞌtsihu̱ de gä pe̱päbihu̱ ngu mä Zi Dadahu̱.

18. Ja ngu di handihu̱ ha Hebreos 10:​22-25, ¿te hindi debe gä deskuidahu̱ ꞌne te hindi debe gä pumfrihu̱ nunka?

¹⁸ (Hñeti Hebreos 10:​22-25). Ha nuꞌu̱ yä gäxä capítulo de rä mfistꞌofo Hebreos, rä apostol Pablo bi no̱ni rꞌa yä tꞌo̱tꞌe nuꞌu̱ hindi debe gä deskuidahu̱ ora di xo̱kämbenihu̱ rä Zi Dada Jeoba. Por ejemplo, bi mää ge xa mähyoni gä xatuäbihu̱ rä Zi Dada Jeoba, gä xipäbihu̱ märꞌa yä jäꞌi de Geꞌä ꞌne de näꞌä xä promete dä me̱fi, ꞌne hingä he̱gihu̱ de gä ntinihu̱ ha yä mhuntsꞌi. Hää, rä apostol Pablo bi ꞌñenä ge koꞌmu̱ «di hanthu̱ ya ꞌmu̱i getbu̱ rä pa» Jeoba, xa mähyoni gä nupämfenihu̱ ko mä kuhu̱. ꞌNehe, ha nuꞌu̱ yä gäxä capítulo de rä mfistꞌofo Apocalipsis, di handihu̱ hanja nꞌa rä e̱nxe̱ Jeoba enä: «¡Xo̱kämbeni Äjuä!» (Apoc. 19:10; 22:9). Hää, asta yo mꞌiki enä «¡Xo̱kämbeni Äjuä!» pa dä ꞌñudi ge xa mähyoni gä pe̱fihu̱ njabu̱. ¡Hänge nunka di debe gä pumfrihu̱ näꞌä dä pädihu̱bye̱ de rä mäkä templo rä Zi Dada Jeoba, ꞌne de näꞌä rä däta nsu di pe̱ꞌtsihu̱ de gä adorahu̱ ꞌne gä pe̱päbihu̱!