1. Kiko un angel ta bisando, i kon esei ta laga nos sinti?

 KIKO lo bo hasi si un angel bin papia ku bo? Sin duda, lo bo ke tende ta kiko e tin di bisa bo. Wèl, na e momentonan akí tin un angel ta papia ku “tur nashon, tribu, idioma i pueblo.” Kiko e ta bisando? ‘Teme Dios i dun’é gloria. Adorá Esun ku a traha shelu i tera.’ (Rev. 14:​6, 7) Yehova ta e úniko Dios berdadero kende tur hende mester adorá. Nos ta kontentu i gradisidu ku el a duna nos e onor di ador’é den su tèmpel spiritual!

2. Kiko Yehova su tèmpel spiritual ta? (Wak tambe e kuadro “ Loke E No Ta.”)

² Kiko presis e tèmpel spiritual ta, i unda nos por haña informashon tokante dje? E tèmpel spiritual no ta un edifisio. E ta Yehova su areglo pa nos ador’é na e manera korekto a base di e sakrifisio di Hesus. Apòstel Pablo ta splika mas tokante esei den e karta ku el a skirbi den promé siglo pa e kristiannan hebreo bibando na Hudea. b

3-4. Kiko tabata preokupá Pablo di e kristiannan hebreo na Hudea, i kon el a yuda nan?

³ Dikon Pablo a skirbi e kristiannan hebreo na Hudea? Kisas pa dos motibu. Promé, e kier a animá nan. Mayoria di nan a lanta den hudaismo. Kisas ora nan a bira kristian,  nan èks-lidernan religioso a hasi chèrchi di nan. Dikon? Pasobra e kristiannan no tabatin tèmpel, ni altar ni saserdote. Tur esei por a desanimá e kristiannan i suak nan fe. (Heb. 2:1; 3:​12, 14) Algun di nan kisas a asta pensa pa bai bèk na hudaismo.

⁴ E di dos motibu tabata ku Pablo kier a splika e kristiannan hebreo ku nan no tabata hasiendo sufisiente esfuerso pa kome “kuminda sólido” ku tin den Dios su Palabra, esta e siñansanan nobo i e siñansanan profundo. (Heb. 5:​11-14) Ta parse ku te ainda algun di nan tabata sigui Lei di Moises. Pero, Pablo a splika ku e sakrifisionan ku e lei a eksigí no por a kita piká kompletamente. Pa e motibu ei e lei a “keda anulá.” Djei, Pablo a siña nan algun siñansa profundo. El a kòrda su rumannan riba “un mihó speransa” ku ta basá riba Hesus su sakrifisio ku por ègt yuda nan “hala serka Dios.”—Heb. 7:​18, 19.

5. Kiko ta masha importante pa nos komprondé for dje buki di Hebreonan, i dikon?

⁵ Pablo a splika su rumannan hebreo ku e manera ku nan ta adorá Yehova awor komo kristian ta superior ku e forma ku nan tabata ador’é den pasado. Dikon? E hudiunan tabata adorá Yehova segun Lei, i esei tabata djis “un sombra di e kosnan ku mester bini, ma e realidat ta pertenesé na Kristu.” (Kol. 2:17) Sombra ta un forma vago di algu, e no ta e kos real. Asina tambe, e manera ku e hudiunan tabata adorá Dios den pasado tabata djis un sombra di e realidat ku tabata na kaminda. Ta masha importante pa nos komprondé e areglo ku Yehova a hasi pa nos haña pordon pa nos pikánan i pa nos por ador’é na e manera korekto. Laga nos kompará e “sombra” (e manera ku hudiunan tabata adorá Dios) ku e “realidat” (e manera ku kristiannan ta adorá Dios). E buki di Hebreonan lo yuda nos haña un mihó komprondementu di kiko e tèmpel spiritual ta i kiko e tin di haber ku nos.

6. Pakiko e israelitanan tabata usa e tabernakel?

⁶ Sombra. Den su splikashon, Pablo a usa e tabernakel ku Moises a traha na 1512 P.K. (Wak e plachi “Sombra—Realidat.”)  E tabernakel tabata algu manera un tènt ku e israelitanan tabata desarmá i karga huntu ku nan kada biaha ku nan tabata muda di un lugá pa otro. Nan a us’é pa kasi 500 aña te ora ku a konstruí e tèmpel na Herúsalèm. (Éks. 25:​8, 9; Num. 9:22) E tabernakel, esta, e “tènt di reunion,” tabata kaminda e israelitanan tabata aserká Dios, ador’é i ofresé nan sakrifisionan. (Éks. 29:​43-46) Sinembargo, e tabernakel a simbolisá algu mas mihó ku tabata na kaminda pa e kristiannan.

7. Ki tempu e tèmpel spiritual a kuminsá eksistí?

⁷ Realidat. E tabernakel tabata “un sombra di kosnan selestial,” i a simbolisá Yehova su tèmpel spiritual. Pablo a bisa ku “e tènt akí [òf, tabernakel] ta un símbolo di e tempu aktual.” (Heb. 8:5; 9:9) Pues, pa ora Pablo a skirbi su karta na e kristiannan hebreo, ya kaba e tèmpel spiritual tabata eksistí. Na ki tempu el a kuminsá eksistí? Na aña 29 di promé siglo. E aña ei Hesus a batisá, a ser ungí ku spiritu santu i a kuminsá sirbi komo Yehova su “gran sumo saserdote” den e tèmpel spiritual. c—Heb. 4:14; Echo. 10:​37, 38.

8-9. Segun Hebreonan 7:​23-27, ki diferensia grandi tin entre e sumo saserdotenan di Israel i e gran Sumo Saserdote, Hesukristu?

⁸ Sombra. E sumo saserdote tabata representá e pueblo dilanti Dios. Israel su promé sumo saserdote tabata Aron, i Yehova a nombr’é ora El a dediká e tabernakel. Sinembargo, manera Pablo a splika, “hopi desendiente di Aron mester a bira saserdote un tras di otro pa motibu ku morto a stroba nan di sigui den tal funshon.” d (Lesa Hebreonan 7:​23-27.) Komo ku tur e sumo saserdotenan ei tabata hende imperfekto, nan mester a ofresé sakrifisio pa nan mes pikánan. Esaki ta un diferensia grandi entre Israel su sumo saserdote i e gran Sumo Saserdote, Hesukristu.

⁹ Realidat. Komo nos Sumo Saserdote, Hesukristu ta “un sirbidó públiko di . . . e berdadero tènt ku Yehova a lanta, i no hende.” (Heb. 8:​1, 2) Pablo a splika ku “komo ku [Hesus] sí ta sigui biba pa semper, su saserdosio no tin susesor.” Pablo a agregá ku Hesus ta “sin mancha, distinto di pekadó.” Kontrali na e sumo saserdotenan di Israel, “e no tin nodi di ofresé sakrifisio tur dia” pa su pikánan. Awor, laga nos trata e diferensianan entre e altarnan i e sakrifisionan di e sombra i di e realidat.

10. Kiko e sakrifisionan ku tabata hasi riba e altar di koper a representá?

¹⁰ Sombra. Pafó, na entrada di e tabernakel tabatin un altar di koper. Riba dje tabata sakrifiká e bestianan pa Yehova. (Éks. 27:​1, 2; 40:29) Sinembargo, e sakrifisionan ei no por a libra e pueblo for di piká. (Heb. 10:​1-4) E sakrifisio kontinuo di bestia na e tabernakel a representá e solo sakrifisio ku lo purifiká hende kompletamente di piká.

11. Riba kua altar Hesus a sakrifiká su mes? (Hebreonan 10:​5-7, 10)

 ¹¹ Realidat. Hesus tabata sa ku Yehova a mand’é na tera pa ofresé su bida humano komo un sakrifisio pa humanidat. (Mat. 20:28) Pues, na su boutismo, Hesus a demostrá ku e ta dispuesto pa hasi loke Yehova tabata ke. (Huan 6:38; Gal. 1:4) Hesus a ofresé su mes riba un altar simbóliko ku a representá Yehova su “boluntat.” Su boluntat tabata p’e sakrifiká su bida perfekto komo hende. Hesus a duna su bida “ún biaha i pa semper” pa pordoná kompletamente e pikánan di tur hende ku demostrá fe den Kristu. (Lesa Hebreonan 10:​5-7, 10.) Awor laga nos trata kiko e Lugá Santu i e Lugá Santísimo ta simbolisá.

12. Ken por a drenta “e Lugá Santu,” i ken por a drenta “e Lugá Santísimo”?

¹² Sombra. Tantu e tabernakel, komo e tèmpelnan ku a konstruí na Herúsalèm tabata meskos paden. Tabatin dos kompartimentu separá pa un kortina. E promé kompartimentu tabata “e Lugá Santu” i e otro tabata “e Lugá Santísimo.” (Heb. 9:​2-5; Éks. 26:​31-33) Den e Lugá Santu tabatin un kándelar di oro, un altar di kima sensia i un mesa ku e pannan di presentashon riba dje. Ta solamente e saserdotenan ungí tabatin mag di drenta e Lugá Santu pa hasi nan trabounan di saserdote. (Num. 3:​3, 7, 10) Den e Lugá Santísimo tabatin e arka di pakto trahá  di oro ku a representá Yehova su presensia. (Éks. 25:​21, 22) Ta solamente e sumo saserdote por a pasa dor di e kortina i drenta e Lugá Santísimo riba e Dia di Ofresé Sakrifisio pa Pordon di Piká. (Lev. 16:​2, 17) Tur aña e tabata drenta ku e sanger di e bestianan pa haña pordon pa su pikánan i pa esnan di henter e nashon. Ku tempu, Yehova, pa medio di su spiritu santu, a revelá nifikashon di tur e kosnan akí di e tabernakel.—Heb. 9:​6-8. e

13. Kiko e Lugá Santu i e Lugá Santísimo ta representá?

¹³ Realidat. Ta solamente 144.000 di Hesus su disipelnan a ser ungí ku spiritu santu. Nan tin un amistat spesial ku Yehova i lo sirbi komo saserdote den shelu huntu ku Hesus. (Rev. 1:6; 14:1) Dios a ungi nan ku su spiritu santu miéntras ku nan tabata riba tera i a adoptá nan komo su yunan. E Lugá Santu ta representá e amistat spesial ei ku nan tin ku Dios. (Rom. 8:​15-17) E Lugá Santísimo di e tabernakel ta representá shelu, kaminda Yehova ta biba. Anto, “e kortina” ku tabata separá e Lugá Santu for di e Lugá Santísimo ta representá Hesus su kurpa di karni. Tanten ku Hesus tabatin e kurpa ei, e no por a drenta shelu komo gran Sumo Saserdote di e tèmpel spiritual. Ora Hesus a entregá su kurpa humano komo sakrifisio pa humanidat, el a habri kaminda pa tur kristian ungí drenta shelu. Nan tambe tin ku entregá nan kurpa di karni pa drenta shelu. (Heb. 10:​19, 20; 1 Kor. 15:50) Despues ku Hesus a resusitá, el a drenta e Lugá Santísimo di e tèmpel spiritual, kaminda ku tempu, tur ungí lo djòin e.

14. Segun Hebreonan 9:​12, 24-26, kiko ta hasi Yehova su areglo pa e tèmpel spiritual superior?

¹⁴ Ta bisto anto ku Yehova su areglo pa adorashon puru basá riba e sakrifisio di e reskate i e saserdosio di Hesukristu, ta superior. E sumo saserdote di Israel tabata drenta e Lugá Santísimo di e tabernakel ku sanger di e bestianan sakrifiká. Pero Hesus a drenta “den shelu mes,” e lugá di mas santu, pa aparesé dilanti Yehova. Hesus tabatin e derecho di biba riba tera komo un hende perfekto. Pero, el a entregá e derecho ei dilanti Yehova, “ofresiendo su mes komo sakrifisio pa kaba ku piká.” (Lesa Hebreonan 9:​12, 24-26.) Hesus su sakrifisio ta e mihó sakrifisio pasobra e ta kita piká pa semper. Pero, sea ku nos speransa ta pa biba den shelu òf riba tera, nos tur por adorá Yehova den su tèmpel spiritual. Ban wak kon.

15. Ken tabata sirbi riba e plenchi di e tabernakel?

¹⁵ Sombra. E tabernakel tabatin un plenchi. Esei tabata un área grandi ku un tranké rònt di dje. Ei, e saserdotenan tabata hasi nan trabounan. Riba e plenchi tabatin e altar grandi pa kima ofrenda ku ta trahá di koper. Ademas, tabatin un baki di koper ku awa aden. Promé ku e saserdotenan por a hasi nan sirbishi sagrado, nan tabata usa e awa ei pa laba nan man ku nan pia. (Éks. 30:​17-20; 40:​6-8) Sinembargo, e tèmpelnan konstruí despues, tabatin un plenchi mas. Esei tabata mas pafó kaminda hendenan ku no tabata saserdote por a para i adorá Dios.

16. Ken ta sirbi riba e plenchi mas paden i ken ta sirbi riba e plenchi mas pafó di e tèmpel spiritual?

 ¹⁶ Realidat. Promé ku nan bai shelu pa sirbi komo saserdote huntu ku Hesus, e ungínan riba tera ta sirbi fielmente riba e plenchi mas paden di e tèmpel spiritual. E baki grandi di awa ku tabatin tantu na e tabernakel komo na e tèmpelnan, a fungi komo rekordatorio importante pa nan i, de echo tur kristian, ku ta importante pa keda moralmente i spiritualmente limpi. Pero na unda anto e “multitut grandi,” kende ta apoyá Kristu su rumannan ungí, ta sirbi Yehova? Apòstel Huan a mira nan “pará dilanti di e trono . . . ta rindi sirbishi sagrado na [Dios] di dia i anochi.” E multitut grandi ta hasi esei, aki riba tera, riba e plenchi mas pafó di e tèmpel spiritual. (Rev. 7:​9, 13-15) Nos ta sumamente gradisidu na Yehova ku el a duna nos e oportunidat pa ador’é den su tèmpel spiritual!

17. Ki sakrifisionan nos tin e onor di duna Yehova?

¹⁷ Awe tur kristian tin privilegio di ofresé sakrifisio na Yehova dor di usa nan tempu, energia i kosnan material pa sirbié. Manera Pablo a bisa, nos por “ofresé Dios semper un sakrifisio di alabansa, esta, e fruta di nos lepnan, ku ta deklará su nòmber públikamente.” (Heb. 13:15) Nos por mustra ku nos ta gradisidu pa e onor ku nos tin pa adorá Yehova dor di ofresé nos mihó sakrifisionan.

18. Segun Hebreonan 10:​22-25, kiko nunka nos lo no ke neglishá, i kiko nunka nos no ke lubidá?

¹⁸ Lesa Hebreonan 10:​22-25. Kasi na final di e karta ku Pablo a skirbi e rumannan hebreo, el a menshoná algun kos tokante nos adorashon ku nunka nos no mester neglishá. Esaki a inkluí hasi orashon na Yehova, proklamá nos speransa, reuní ku otro komo kongregashon i animá otro “muchu mas ainda ku [nos] ta mira [Yehova su] dia ta yega serka.” Anto Yehova su angel mes a bisa kasi na final di e relato di Revelashon: “Adorá Dios!” (Rev. 19:10; 22:9) El a bisa esaki dos biaha pa mustra kon importante esei ta. Pues, laga nos nunka lubidá tur e kosnan ku nos a siña tokante Yehova su tèmpel spiritual i e bunita privilegio nos tin di adorá nos gran Dios!