1. Ndaga itshi muanjelo udi muzuela? Ndaga yene idi mukotelesa itshi mukunda nu esue?

 GULA nga wakhalele nu luendu lua guta maga nu muanjelo, nga wategelele ndaga jiakhalele naye muene guguwambela ba? Mangino muanjelo udi muzuela gudi athu “a ifutshi yagasue, a iphuta yagasue, a mazuelelo agasue nu a ilema yagasue.” Udi guawambela egi: “Vilenu Nzambi woma nu mutumbuisenu . . . Kombelelenu Muthu wafugile dilu nu mavu.” (Gumo. 14:6, 7) Phamba Yehowa udi Nzambi wa giamatshidia, athu agasue adi naye gumukombelela. Tuana khala nu gusuanguluga luholo luatuhanele muene luendu lua gumukombelela mu tempelo yenji yakoma ya mu nyuma!

2. Tempelo ya Yehowa ya mu nyuma idi itshi? (Tala nji galuanda “ Tempelo ya mu Nyuma Ishigo.”)

² Tempelo ya mu nyuma idi itshi? Fundo ditshi tuajiya guheta ukoteleshi wa tempelo yene? Tempelo ya mu nyuma ishigo inzo gifua jinzo jiko. Uvi idi ndaga jialondele Yehowa hagula athu amukombelele mu luholo luana tshigina muene mu njila ya mulambu wa Yesu. Mupostolo Phaula wakotelesele ndaga yene gudi enya Yuda a gu Yudea anyi abuile Aklisto; waamonesele nayo mu mukanda waasonegele muene mu siekle ya thomo. b

3-4. Mukunda natshi Phaula wakhalele gudisagesa mukunda nu enya Yuda abuile Aklisto? Luholo lutshi gaakuatesele?

³ Mukunda natshi mupostolo Phaula waasonegele mukanda wene? Yajiya gukhala egi mukunda nu ndaga mbadi. Ya thomo, ha guahana gikhesa. Gutuama egi abue Aklisto, avula mukatshi diawo akhalele mu gikombelelo gia enya Yuda. Yajiya gukhala egi mafumu a ikombelelo yawo asendesele guasegelula luholo abuile Aklisto. Tuazuela ngenyi handaga Aklisto ene akhalelego nu tempelo  ya gukombelela Nzambi, nga nu giwotshielo gia gumuhanela milambu. Akhalelego nji nu nganga-nzambi ha guatuameza. Tangua diko Phaula wamonele egi luholo adi guasegulula yajiya gulebesa gutshigina guawo. (Heb. 2:1; 3:12, 14) Yajiya gukhala egi Aklisto ako alebele muila, atangijile nji ha guvutuga mu gikombelelo gia enya Yuda.

⁴ Ya mbadi, Phaula waawambelele egi akhalelego mutshita ngolo ha gudia “ima ya gudia yakola” ya mu nyuma, yakotelesa egi gukotelesa malongo ahe-ahe nga malongo akola adi mu Mbimbi ya Nzambi. (Heb. 5:11-14) Waawambelele ngenyi handaga ako mukatshi diawo akhalele jigi-jigi gu Mukhuala wa Moize. Waakotelesele egi milambu yakhalele mutoga Mukhuala wene yakhalelego guakatula diago mu gubola. Gishina giene Mukhuala wa Moize ‘wakatudiwe.’ Gungima Phaula walongesele ndaga jiko jia ndando. Waawunguluishile “felela diabonga” akhalele nadio mu njila ya mulambu wa Yesu diajiya guakuatesa diago ha “gusuena hehi nu Nzambi.”​—Heb. 7:18, 19.

5. Ndaga jitshi tudi naye gukotelesa mu mukanda wa Hebelu? Mukunda natshi?

⁵ Phaula wawambelele enya Yuda abuile Aklisto egi luholo adi mukombelela Yehowa ludi luabonga gubalega luholo akhalele gumukombelela ha thomo. Ndaga jiakhalele mukalagewa mu gikombelelo gia enya Yuda, jiakhalele ‘givule-vule gia ndaga jidi muza. Uvi giamatshidia gidi Klisto.’ (Kol. 2:17) Givule-vule gidi gifuanesa gia gima, uvi gishigo gima giene. Luholo lumoshi nji ndaga jiakhalele mukalegewa mu gikombelelo gia enya Yuda jiakhalele gifuanesa gia ndaga jiakhalele naye guza. Ha gukombelela Yehowa mu luholo luana tshigina muene, tudi naye gukotelesa ndaga jialondele muene mukunda nu esue ha gututotesela gubola. Henyaha tutadilenu gudivua gudi mukatshi dia ‘gifuanesa’ yakotelesa egi (luholo enya Yuda akhalele mukombelela Yehowa) nu ‘giamatshidia’ yakotelesa egi (luholo Aklisto ana kombelela Yehowa), gifua luholo mukanda wa Hebelu udi guyimonesa. Gujiya ndaga jiene guajiya gutukuatesa ha gukotelesa muabonga tempelo ya mu nyuma nu luholo ndaga jiene jidi gututadila.

6. Luholo lutshi akhalele mukalegela inzo ya tenta?

⁶ Gifuanesa. Phaula wazuelediele muavula inzo ya tenta yalondele Moize mu givo 1512 G.G.Y. (Tala tablo “Gifuanesa​—Giamatshidia.”) Inzo ya tenta yene yakhalele fundo enya Isalele akhalele gudibungisa ha gukombelela Yehowa nu ha gumuhana milambu. (Guz. 29:43-46) Akhalele guyibata fundo diagasue akhalele  muya tangua akhalele mu mavu a luselenga. Akhalele guyikalegele ivo 500 gutuama egi tempelo ya gu Yelusalema itungiwe. (Guz. 25:8, 9; Lutang. 9:22) Uvi inzo yene ya tenta yakhalele nji mumonesa ndaga imoshi ya ndando yakhalele naye guza mukunda nu Aklisto.

7. Tangua ditshi tempelo ya mu nyuma yasendesele?

⁷ Giamatshidia. Inzo ya tenta yakhalele mukalegela enya Isalele yakhalele ‘gifuanesa gia ima idi mu dilu.’ Yakhalele nji mumonesa tempelo yakoma ya Yehowa ya mu nyuma. Phaula wazuelele egi “inzo ya tenta eyi idi gifuanesa gia ndaga jidi mukalegewa mangino.” (Heb. 8:5; 9:9) Hene, tangua diasonegele muene mukanda wa Hebelu, tempelo ya mu nyuma yakhalele guene. Tempelo yene yasendesele mu givo 29 G.Y. Yesu wabatijiwe mu givo giene, wambiwe maji mu nyuma, wasendesele gukalegela Yehowa mudimo gifua ‘nganga-nzambi wakoma’ mu tempelo ya mu nyuma. c​—Heb. 4:14; Makal. 10:37, 38.

8-9. Ha gutadila Hebelu 7:23-27, gudisha gutshi gudi mukatshi dia nganga-nzambi jiakoma dia gu Isalele nu Nganga-nzambi Wakoma Yesu Klisto?

⁸ Gifuanesa. Nganga-nzambi wakoma wakhalele mumoneshi wa athu gutuama dia Nzambi. Nganga-nzambi wakoma wa thomo gu Isalele wakhalele Alona. Yehowa wamutombele ha gubua Nganga-nzambi tangua enya Isalele atshitshile wano ha guhana inzo ya tenta gudi Nzambi. Uvi mupostolo Phaula wazuelele egi: “Nganga-nzambi jiavula jiakhalelego mulandula gukalagala mudimo wawo handaga akhalele mufua. Gishina giene athu ako akhalele guahingana ha gukalagala mudimo wene.” d (Tanga Hebelu 7:23-27.) Nganga-nzambi jiakhalele naye guhana milambu mukunda nu gubola guawo, handaga ene nji akhalelego athu atagana. Milambu akhalele muhana idi mumonesa gudisha gudi mukatshi dia nganga-nzambi jiene jia gu Isalele nu Nganga-nzambi Wakoma Yesu Klisto.

⁹ Giamatshidia. Yesu Klisto Ngaga-nzambi Wakoma udi ‘muenya mudimo . . . wa tenta ya giamatshidia inyi yajigiwe gudi Yehowa, uvi gudi muthu ndo.’ (Heb. 8:1, 2) Mupostolo Phaula wazuelele egi “luholo [Yesu] wana khala nu monyo mayilago, gushigo nu muthu mbawumuhingana mu mudimo wenji wa unganga-nzambi.” Phaula wazuelele luko egi Yesu “gashigo nu usala, udi gualeha nu enya masumu,” gashigo gifua nganga-nzambi jiakoma jia gu Isalele handaga “gashigo nu funu ya guhana milambu ya lusugu nu lusugu” mukunda nu masumu enji. Henyaha tutadilenu gudisha gudi mukatshi dia iwotshielo nu milambu akhalele muhana mu tangua dikulu nu luholo Aklisto ana guyikalagala.

10. Milambu ya shitu akhalele muhana holu dia giwotshielo gia kuivre yakhelele mumonesa isthi?

¹⁰ Gifuanesa. Guakhalele nu giwotshielo gia kuivre hanze hehi nu mufulo wa inzo ya tenta akhalele muhanela milambu ya shitu gudi Yehowa. (Guz. 27:1, 2; 40:29) Uvi milambu yene yakhalelego muhana njila egi Nzambi a atotesele diago gubola guawo. (Heb. 10:1-4) Milambu ya shitu akhalele muhana gu inzo ya tenta yakhalele mumonesa mulambu umoshi wakhalele naye guhanewa hagula Yehowa atotesele athu gubola guawo mayilago.

11. Yesu wadihanele gifua mulambu ha giwotshielo gitshi? (Hebelu 10:5-7, 10)

¹¹ Giamatshidia. Yesu wakhalele mujiya egi Yehowa wamutumile ha mavu ha guhana monyo wenji gifua gibawu mukunda nu athu agasue. (Mat. 20:28) Hene tangua Yesu wabatijiwe, wadihanele ha gutshita gutshigina gua Yehowa. (Yone 6:38; Gal. 1:4) Yesu wadihanele holu dia giwotshielo mu luholo luagifuanesa; giwotshielo  giene gidi mumonesa “gutshigina” gua Nzambi. Gutshigina guene gua Yehowa guakhalele egi Mun’enji ahane monyo wenji watagana gifua mulambu mukunda nu athu. Yesu wahanele monyo wenji “mbala imoshi” ha gutotesela nga gutshuiga mayilago gubola gua muthu wagasue udi musha gutshigina gudi muene. (Tanga Hebelu 10:5-7, 10.) Henyaha tutadilenu ukoteleshi wa ima yakhalele mu inzo ya tenta.

12. Nanyi wakhalele mungina ha fundo dia gijila nu ha fundo diabalega gijila mu inzo ya tenta?

¹² Gifuanesa. Inzo ya tenta nu tempelo yatungiwe gu Yelusalema gungima, yakhalele luholo lumoshi mukatshi. Mukatshi muakhalele nu sugu mbadi, yakotelesa egi “Fundo dia Gijila” nu “Fundo Diabalega Gijila,” rido yakhalele mukhaphumuna sugu jiene. (Heb. 9:2-5; Guz. 26:31-33) Mukatshi dia Fundo dia Gijila, muakhalele nu gihagelo gia mienda nu giwotshielo gia uhafu nu mesa a mapha ahanewe gudi Nzambi. Phamba “nganga-nzambi jiambiwe maji” akhalele naye gungina ha Fundo dia Gijila ha gutshita mudimo wawo wa ginganga-nzambi. (Lutang. 3:3, 7, 10) Mukatshi dia Fundo Diabalega Gijila muakhalele nu mushete wa gikotelo walondewe nu wolo. Mushete wene wakhalele mumonesa egi Yehowa udi ha fundo diene. (Guz. 25:21, 22) Phamba nganga-nzambi wakoma wakhalele naye gubalega rido ha gungina ha Fundo Diabalega Gijila. Wakhalele guyitshita mbala imoshi mu givo mu Lusugu lua Gutotesela Gubola. (Levi 16:2, 17) Givo nu givo, wakhalele mungina nu mahatshi a shitu hagula Nzambi amutotesele gubola guenji nu gua athu agasue a gu  Isalele. Gungima Yehowa waakuatesele mu njila ya nyuma yenji ha gujiya muabonga ukoteleshi wa ima yakhalele mu inzo ya tenta.​—Heb. 9:6-8.

13. Fundo dia Gijila nu Fundo Diabalega Gijila didi mumonesa itshi?

¹³ Giamatshidia. Alandudi phamba azonda a Klisto ana tombewa ha gumbiwa maji mu nyuma. Ana khala nu ufuta wakola nu Yehowa. Alandudi ene 144 000 adi naye gutshita mudimo nu Yesu mu dilu gifua nganga-nzambi. (Gumo. 1:6; 14:1) Fundo dia Gijila diakhalele mu inzo ya tenta didi mumonesa guvualewa guawo gua mu nyuma gifua ana a Nzambi tangua adi ha mavu. (Roma 8:15-17) Fundo Diabalega Gijila diakhalele mu inzo ya tenta didi mumosesa dilu, fundo diana khala Yehowa. “Rido” yakhalele mukhaphumuna Fundo dia Gijila nu Fundo Diabalega Gijila, idi mumonesa muila wa Yesu wa umuthu unu wakhalelego gumuhana njila ya gungina mu dilu gifua Nganga-nzambi Wakoma wa tempelo ya mu nyuma. Luholo Yesu wahanele muila wenji gifua mulambu mukunda nu athu, wahanele njila gudi Aklisto agasue ambiwe maji mu nyuma ha guya mu dilu. Aklisto ene nji adi naye gubemba muila wawo wa umuthu ha guheta gishimbigo giawo mu dilu. (Heb. 10:19, 20; 1 Kol. 15:50) Tangua Yesu wafuzumugile, wanginyine ha Fundo Diabalega Gijila mu tempelo ya mu nyuma. Aklisto agasue ana mbiwa maji mu nyuma anaya gumusanga guene gula afua.

14. Ha gutadila Hebelu 9:12, 24-26, itshi yana buisa tempelo ya Yehowa ya mu nyuma yabalega ndando?

¹⁴ Henyaha tuakotelesa diago muabonga ndaga jia ndando jialondele Yehowa mukunda nu gikombelelo gia giamatshidia mu njila ya mulambu wa Yesu Klisto nu mudimo wenji wa ginganga-nzambi. Nganga-nzambi wakoma wa gu Isalele wakhalele mungina nu milambu ya mahatshi a shitu ha Fundo Diabalega Gijila dialondewe gudi athu, uvi Yesu “wanginyile diago mu dilu,” fundo diabalega gijila mukunda nu athu agasue ha gumonega gutuama dia Yehowa. Wamonesele ndando ya mulambu wenji gudi Yehowa gifua muthu watagana mukunda nu gubola guetu ha gutukatula mu “masumu mu njila ya mulambu wenji.” (Tanga Hebelu 9:12, 24-26.) Mulambu wahale Yesu wana katula athu mu gubola guawo mayilago. Gifua luholo tuza guyimona, ikhale tudi nu felela dia guya mu dilu nga dia gukhala ha mavu, mukut’etu agasue tuajiya gukombelela Yehowa mu tempelo yenji ya mu nyuma.

15. Akhuatshi akhalele mutshita mudimo mukatshi dia luphango lua inzo ya tenta?

¹⁵ Gifuanesa. Inzo ya tenta yakhalele yagumbiwa luphango, nganga-nzambi jiakhalele mutshita midimo yawo mukatshi dia luphango luene. Muakhalele nu giwotshielo giakoma gia kuivre gia milambu ya guwotshia nu longa dia kuivre dia guzuila meya nganga-nzambi jiakhalele mukalegela ha gudiphelegetesa gutuama dia gutshita mudimo wawo wa gijila. (Guz. 30:17-20; 40:6-8) Tempelo yatungiwe gungima yakhalele nji nu luphango hanze, athu anyi akhalelego nganga-nzambi akhalele muza ha fundo diene hagula ajiya gukombelela Nzambi.

16. Akhuatshi ana kalagala mudimo mukatshi dia luphango lua tempelo ya mu nyuma? Akuatshi ana kalagala mudimo hanze ya luphango lua tempelo yene?

¹⁶ Giamatshidia. Aklisto ambiwe maji mu nyuma adi ha mavu, ana kombelela Yehowa nu gujinginyina guagasue mukatshi dia luphango lua tempelo ya mu nyuma gutuama egi aye mu dilu ha gukalagala mudimo hamoshi nu Yesu gifua nganga-nzambi. Longa dia koma diakhalele mu inzo ya tenta nu mu tempelo diana wunguluisa Aklisto ambiwe maji mu nyuma nu Aklisto ako ndaga imoshi ya ndando egi adi naye gusala aphelegeta mu nyuma nu mu muila. Fundo ditshi “thundu yakoma ya athu” ana kuatesa aphangi  a Klisto, ana kombelela Yehowa? Mupostolo Yone waamonele “agumagana gutuama dia nguasa ya ufumu, adi mukalegela [Nzambi] mudimo wa gijila phipha nu muanya.” Thundu yakoma ya athu yana kalagala mudimo wene ha mavu hanze ya luphango lua tempelo ya mu nyuma. (Gumo. 7:9, 13-15) Tuana suanguluga diago muavula luholo Yehowa watuhanele luendu lua gumukombelela mu tempelo yenji yakoma ya mu nyuma!

17. Milambu ya luholo lutshi tuana hana Yehowa ha gumukombelela?

¹⁷ Mangino, Aklisto agasue ana kalegela tangua diawo nu ngolo jiawo nu ima adi nayo ha gukombelela Yehowa. Gifua luholo mupostolo Phaula wawambelele enya Yuda anyi abuile Aklisto, esue nji tuajiya ‘gutumbuisa Nzambi tangua diagasue, handaga idi gifua mulambu tudi gumuhana; yakotelesa egi mbimbi jia mu kano dietu jiana longesa jina dienji ha meso a athu agasue.’ (Heb. 13:15) Tuajiya gumonesa egi tuana zula luendu lua gukombelela Yehowa nu ndando gula tudi gudihana muavula mu mudimo wenji.

18. Hagutadila Hebelu 10:22-25, ndaga jitshi tudi naye gutshita tangua diagasue? Itshi tushigo naye gubuita mutshima?

¹⁸ Tanga Hebelu 10:22-25. Tangua Phaula wasonegele mbimbi jia gisugishilo jia mukanda wa Hebelu, wazuelele ndaga jiavula tudi naye gutshita tangua diagasue hatudi mukombelela Yehowa. Mukatshi dia ndaga jiene tuajiya gutanga: Gutshita isambu gudi Yehowa, gulongesa athu ako lukuma luabonga, guya mu gudibungisa gua mu hungu nu gudihana gikhesa. Tudi naye gutshita ‘ngenyi muavula handaga lusugu lua Yehowa luasuena hehi.’ Mu mbimbi jia gisugishilo jia mukanda wa Gumonesa, muanjelo wa Yehowa wazuelele egi: “Kombelela Nzambi!” (Gumo. 19:10; 22:9) Wazuelele mbimbi jiene mbala mbadi ha gumonesa egi jiakhalele nu ndando yavula. Tutshitenu yagasue ha gutuna gubuita mutshima mu ndaga jiagasue tualonguga jiatadila tempelo yakoma ya Yehowa ya mu nyuma nu luendu tuana khala nalo lua gukombelela Nzambi wetu wakoma!