1. Ndawa chani vimwevi ni vodekana maninge kwa isepano?

 VICHIKHALA kuti mngelo akufuna kuyankhula namwe, ko imwepo mungatetekere vomwe akufuna kukuuzani? Ntsiku zino angelo akuyankhula kwa wanthu wa ‘makhaindi yose, mtundu uliwose na chiyankhulo chilichose.’ Ko iye ankunena kuti chani? ‘Gopani Mulungu ndipo mupaseni ulemelero . . . Tumikirani yemwe adalenga kudzulu na dziko yapasi.’ (Chiv. 14:6, 7) Yahova ni Mulungu yekha yemwe wanthu wose achadekana kumutumikira. Ndise okondwa ndawa yotipasa mwayi wotumikira mu kachisi wake wauzimu.

2. Ko kachisi wauzimu wa Yahova ni chani? (Onani pomwe bokosi yakuti: “ Osati kachisi chaiye.”)

² Ko kachisi wauzimu ni chani? Ndipo ni kuponi komwe tingakagumane nkhani zobveseseka za kachisi moyu? Kachisi wauzimu moyu ni nyumbalini chaiyoiyo. Kachisi wauzimu moyu ankuphatanidzapo vose vomwe Yahova adakonza pakuphatisa basa ntsembe ya dipo ya Yesu kuti wanthu akwanise kumutumikira. Mtumi Paulo adafotokoza bwinobwino vimwevi mu kalata yake yomwe adanembera Akhrisitu Wachiheberi womwe ambakhala ku Yudeya. b

3-4. (a) Nchani chomwe chidachitisa Paulo kuti anembere kalata Akhrisitu Wachiheberi omwe ambakhala ku Yudeya? (b) Ndipo iye adachita chani kuti awathandize?

³ Ndawa chani Paulo adanembera kalata Akhrisitu Wachiheberi omwe ambakhala ku Yudeya? Vinkuoneka kuti adanemba kalata mweyi pa vifukwa viwiri vikuluvikulu. Chakuyamba, kuti awalimbikise. Azinji wa iwo enze adakulila mu chipembedzo cha Chiyuda ndipo atsogoleri wachipembedzo ambawaimba  mulandu ndawa yakuti enze adakhala Akhrisitu. Venze teno ndawa yakuti Akhrisitu mwawa enze alibe kachisi aliyese kuti ambatumikirire Yahova. Iwo enze alibe kachisi ne wantsembe kuti ambapereke ntsembe kwa Mulungu. Vimwevi vidachitisa kuti Akhrisitu ambakhale wokwinyirira maninge na kufokesa chikhulupiriro chawo. (Aheb. 2:1; 3:12, 14) Anango wa iwo panango enze adaganiza vobwererapomwe ku chipembedzo cha Chiyuda.

⁴ Chachiwiri, Paulo ambafuna kulimbikisa Akhrisitu Wachiheberi kuti ambachite khama kupfunzira vinthu vinyowani na vozama panango kuti ‘chakudya chotafuna’ chogumanika m’Mawu ya Mulungu. (Aheb. 5:11-14) Vinkuoneka kuti Ayuda anango ambaphatisa basa chilamulo cha Mose. Paulo adafotokoza kuti ntsembe zomwe zimbaperekewa nthawe mweire zenze zosakwanira kuti zimalisiretu machimo. Ndipomwapa chilamulo cha Mose ‘chenze chidasiya kuphata basa.’ Manje Paulo ambapfunzisa chonadi chaicho chozama mwechi. Iye adawakumbusa kuti ‘chidikhiro chabwino’ maninge chochokera mu ntsembe ya dipo ya Yesu Khrisitu ndicho chidakawathandiza kuti ‘amufenderere Mulungu.’—Aheb. 7:18, 19.

5. Nchani chomwe tichadekana kubvesesa m’bukhu ya Aheberi, ndipo ndawa chani?

⁵ Paulo adawauza Akhrisitu wa Chiheberi kuti kutumikira kwa Akhrisitu nikwapadzulu maninge kuposha komwe iwo ambachita kale. Vomwe iwo ambachita pakutumikira Yahova pakuphatisa basa chilamulo cha Mose, ‘wenze nthunzi wa vinthu vomwe vimbabwera kutsogolo koma kupemphera chaiko kumbachokera kwa Yesu Khrisitu.’ (Akol. 2:17) Nthunzi wa chinthu undowonesa momwe chinthucho chiliri. Shuwadi, njira yomwe Ayuda ambatumikirira Mulungu pakuyamba wenze nthunzi chabe womwe manjeuno tinkutumikirira Yahova munjira yabwino maninge. Tichadekana kubvesesa bwinobwino vose vomwe Yahova adachita kuti machimo yathu yose yakhululukiwe na kumutumikira munjira yomwe iye achafuna. Mu pfunziro mweyi tilinganize ‘nthunzi’ (na njira yomwe Ayuda ambatumikirira Yahova) na ‘chinthu chayicho’ (njira yomwe Akhrisitu achatumikirira Yahova). Ninge momwe vidafotokozerewa mu lemba ya Aheberi. Kuchita vimwevi kutithandize kubvesa bwino vomwe kachisi wauzimu ankutathauza kwa isepano.

6. Ko chihema chimbaphatisiwa tani basa?

⁶ Njira yomwe Ayuda ambatumikirira Yahova. Paulo adaphatisa basa chihema chomwe chidakonzewa mu nthawe ya Mose mu 1512 Yesu akanati wabwera, pakufuna kufotokoza va  kachisi wauzimu. (Onani tchati yakuti: “Njira yomwe Ayuda ambatumikirira Yahova na momwe Akhrisitu achatumikirira Yahova.”) Chihema chenze chinthu chokonzewa ninge tenti chomwe Aizirayeli ambakwanisa kutakula akafuluka kuyenda kumbuto inango. Iwo adaphatisa basa chihema kwa magole 500 mpakana kufika pomwe kachisi adamangiwa ku Yerusalemu. (Eks. 25:8, 9; Num. 9:22) ‘Chihema chogumaniranako,’ yenze malo yomwe Aizirayeli ambagumana kuti atumikire Yahova na kupereka ntsembe. (Eks. 29:43-46) Chihema chimbatanthauzapomwe chinthu chodekana maninge chomwe Yahova ambadzapasa Akhrisitu.

7. Ni panthawe iponi pomwe kachisi wauzimu udakhazikisiwa?

⁷ Njira yomwe Akhrisitu achatumikirira Yahova. Chihema chakale wenze ‘nthunzi wa vinthu vakudzulu’ chomwe chimbatanthauza kachisi nkulu wauzimu wa Yahova. Mtumi Paulo adanena kuti: ‘Chihema chimwechi, chimbatanthauza vinthu va ntsiku zino.’ (Aheb. 8:5; 9:9) Manje panthawe yomwe adanembera Akhrisitu wa Chiheberi, kachisi wauzimu wenze chinthu chaicho kwa Akhrisitu. Udayamba kukhalapo mu 29 Yesu alipano padziko yapasi. Mu gole mweire Yesu adabatiziwa na kudzodzewa na mzimu uchena ndipo adayamba kutumikira ninge ‘nkulu wantsembe’ wa Yahova mu kachisi wauzimu. c—Aheb. 4:14; Mac. 10:37, 38.

8-9. Ko ni kusiyana kuponi komwe kulipo pakati pa nkulu wantsembe wa nthawe ya Aizirayeli na Nkulu Wantsembe Yesu Khrisitu? (Aheberi 7:23-27)

⁸ Njira yomwe Ayuda ambatumikirira Yahova. Nkulu wantsembe ambayimira wanthu pa maso pa Mulungu. Nkulu wantsembe woyamba wa Aizirayeli wenze Aroni. Iye adapasiwa udindo moyu na Yahova pomwe adafungulira chihema. Koma ninge momwe Paulo adanenera, ‘pambafunika kuti pabwerepomwe antsembe anango ndawa yakuti impfa imbawakangisa kuti atumikire ninge antsembe mpakana kalekale.’ d (Werengani Aheberi 7:23-27.) Ndawa ya uchimo, antsembe ambadekana kupereka ntsembe ndawa ya machimo yawo chaiyo. Ndipomwapa pali kusiyana kukulu maninge pakati pa nkulu wantsembe wa Aizirayeli na nkulu wa wantsembe Yesu Nkhrisitu.

⁹ Njira yomwe Akhrisitu achatumikirira Yahova. Ninge nkulu wantsembe Yesu Khrisitu ni ‘ntumiki . . . wachihema chaicho chomwe Yahova wachimanga osati wanthu.’ (Aheb. 8:1, 2) Paulo adafotokoza kuti: ‘Ndawa yakuti [Yesu] akhala na moyo mpaka kalekale, untsembe wake palibe yemwe angamungene m’malo.’ Paulo adafotokozapomwe kuti ‘Yesu niwosapsipiziwa, wolekanisiwa na ochimwa.’ Mosiyana na nkulu wantsembe Wachiyizirayeli, ‘iye achadekanalini kupereka ntsembe ntsiku iliyose’ ndawa ya vophonya vake. Manje naboni tione kusiyana komwe kulipo pakati pa guwa yantsembe na ntsembe za nthawe ya ayuda, na nthawe ya Akhrisitu.

10. Ko ntsembe zomwe zimbaperekewa pa guwa zimbatanthauza chani?

¹⁰ Njira yomwe Ayuda ambatumikirira Yahova. Kunja kwa nsuwo wachihema kwenze guwa yantsembe ya nkuwa pomwe Ayuda ambaperekerapo ntsembe za nyama kwa Yahova. (Eks. 27:1, 2; 40:29) Koma ntsembe zimwezi zidakakwanisalini kumalisiratu machimo ya wanthu. (Aheb. 10:1-4) Ntsembe za nyama zomwe zimbaperekewa pa guwa yantsembe nthawe zose zimbatanthauza kuti kutsogolo kudzaperekewe  ntsembe ibodzi yomwe idzakwanise kumalisa machimo ya wanthu.

11. Ni guwa iponi yomwe Yesu adapereka moyo wake ninge dipo? (Aheberi 10:5-7, 10)

¹¹ Njira yomwe Akhrisitu achatumikirira Yahova. Yesu ambadziwa kuti wenze adatumiziwa na Yahova pa dziko yapasi kuti adzapereke moyo wake ninge dipo pakuwombola wanthu wose. (Mat. 20:28) Ndipo pomwe adabatiziwa Yesu adawonesa kudzipereka kuti achite vomwe Yahova ankufuna. (Yoh. 6:38; Agal. 1:4) Yesu adapereka moyo wake pa guwa yantsembe yophiphirisa osati pa guwa yantsembe chaiyoiyo. Guwa yantsembe mweyi, inkutanthauza chifuniro cha Yahova. Cholinga cha Mulungu chenze chakuti Yesu ‘adzapereke’ moyo wake waungwiro. Ndipo Yesu adapereka moyo wake ‘kabodzi kokha mpakana kalekale’ kuti amalise machimo ya wanthu wose omwe achamukhulupirira. (Werengani Aheberi 10:5-7, 10.) Manje naboni tione kuti vinthu vankati va chihema vimbatanthauza chani.

12. Ko ni mbani ambadekana kungena malo yochena ndipo ni mbani ambadekana kungena malo yochena maninge?

¹² Njira yomwe Ayuda ambatumikirira Yahova. Chihema na makachisi yomwe yenze yadamangiwa ku Yerusalemu yenze yolingana ndipo nkati mwake mwenze vipinda viwiri—‘Malo yochena’ na ‘yochena maninge’ yomwe yenze yadagawiwa na ntsalu. (Aheb. 9:2-5; Eks. 26:31-33) Malo yochena mwenze choyikhapo lambi cha ouro na guwa yoperekera ntsembe, meza na mikate yavionesero. ‘Antsembe odzodzewa’ okha ndiwo ambabvumiziwa kungena pa malo yochena mwaya kuti aphate basa zochena. (Num. 3:3, 7, 10) Malo yochena maninge  mwenze likasa yokonzewa na ouro yokhayokha yomwe imbatanthauza kukhalapo kwa Yahova. (Eks. 25:21, 22) Nkulu wantsembe ndiye yekha yemwe ambabvumiziwa kungena pa malo yochena maninge mwaya, kabodzi pa gole pa ntsiku yomasula wanthu ku ukapolo. (Lev. 16:2, 17) Gole iliyose iye ambangena na magazi ya nyama kuti atetezere machimo yake na machimo ya wanthu. Pakumalizira, Yahova pakuphatisa basa mzimu wake uchena adawonesa bwino tanthauzo ya malo yawiri yochena mwaya ya chihema.—Aheb. 9:6-8. e

13. Ko malo yochena na yochena maninge yankutanthauza chani kwa Akhrisitu?

¹³ Njira yomwe Akhrisitu achatumikirira Yahova. Namba yochepa ya Akhrisitu ankudzodzewa na mzimu uchena. Ndawa ya vimwevi iwo ali pa ushamwali wapadzulu maninge na Yahova. Odzodzewa mwawa okwana 144,000 akatumikire ninge antsembe kudzulu pabodzi na Yesu. (Chiv. 1:6; 14:1) Malo yochena ya chihema yambatanthauza kubadwa kwawo kwauzimu ninge wana wa Mulungu alipano pa dziko yapasi. (Aro. 8:15-17) Malo yochena maninge ya chihema yatanthauza kudzulu komwe Yahova achakhala. ‘Ntsalu’ yomwe imbagawa malo yochena na malo yochena maninge ichatanthauza thupi ya Yesu. Alipano pa dziko yapasi anathupi ya umunthu iye adakakwanisalini kuyenda kudzulu nkukakhala nkulu wantsembe wa kachisi wauzimu wa Yahova. Pa kupereka moyo wake ninge dipo kwa wanthu wose Yesu adafungula njira ya moyo wakudzulu kwa Akhrisitu ose odzodzewa. Ninge Yesu Akhrisitu odzodzewa achadekana kuvula mathupi yawo ya umunthu kuti akatambire mphaso yawo ya moyo wosapera kudzulu. (Aheb. 10:19, 20; 1 Akor. 15:50) Pomwe Yesu adamukisiwa, iye adangena malo yochena maninge ya kachisi wauzimu panango kuti kudzulu komwe Akhrisitu odzodzewa pa nthawe inango akakhale naye.

14. Ndawa chani kutumikira Yahova pa kachisi wauzimu ni kwapadzulu maninge kuposha momwe Ayuda ambachitira? (Aheberi 9:12, 24-26)

¹⁴ Kupemphera chaiko kwa Yahova kunkuchokera pa ntsembe ya dipo ya Yesu Khrisitu na kudekana kwake ninge nkulu wantsembe. Vinkuoneka bwinobwino kuti kutumikira Yahova mwa njira imweyi ni kwapadzulu maninge kuposha komwe Ayuda ambaphatisira basa pakutumikira Yahova kalekale. Nkulu wantsembe ambangena na magazi ya nyama m’malo yochena maninge yomwe yenze yadakonzewa na wanthu, koma Yesu adangeneratu ‘kudzulu chaiko’ malo yapadzulu maninge kuposha yose, kukawonekera kwa Yahova. Pa kupereka moyo wake wa ungwiro ndawa ya isepano Yesu wenze na udindo ‘womalisiratu machimo yose na ntsembe yake chaiyo.’ (Werengani Aheberi 9:12, 24-26.) Ntsembe ya Yesu ni ntsembe yomaliza yomwe idaperekewa kuti imalise machimo ya wanthu mpaka kalekale. Ninge momwe tidzawonere mu nkhani yomwe inkubwera ,viribe basa peno chidikhiro chathu ni cha kudzulu panango padziko yapasi, tose isepano tingamutumikire Yahova mu kachisi wake wauzimu.

15. Ni mbani ankutumikira pa malo yopempherera ya chihema?

¹⁵ Njira yomwe Ayuda ambatumikirira Yahova. Chihema chenze na malo yabodzi yopempherera yakulu maninge komwe wantsembe ambaphatirako basa. Malo mwaya ndiko kwenze guwa ya ntsembe ya nkuwa komwe ambaperekerako ntsembe pabodzi na basiya ya nkuwa yodzadza madzi yomwe wantsembe ambadzichenesera akanati kuyamba kuphata basa zawo za untsembe. (Eks. 30:17-20; 40:6-8) Makachisi yomwe yenze yadamangiwa patsogolo pake, yenzembo na malo mwaya kunja komwe munthu  aliyese yemwe ni wantsembelini adakakwanisa kutumikirira Yahova.

16. Ni mbani ankutumikira pa malo yopempherera yankati na yakunja ya kachisi wauzimu?

¹⁶ Njira yomwe Akhrisitu achatumikirira Yahova. Akanati kuyenda kudzulu kukatumikira ninge antsembe pabodzi na Yesu, Akhrisitu odzodzewa ankutumikira mokhulupirika pano padziko yapasi panango kuti mbali ya nkati ya kachisi wauzimu. Basiya ya madzi yomwe ili pa malo mwaya, ni chikumbuso chikulu maninge kwa Akhrisitu odzodzewa pabodzi na Akhrisitu ose kuti achadekana kukhala ochena mwakuthupi na m’maganizo. Manje nkuponi komwe ‘wanthu azinji’ omwe ankuthandiza mokhulupirika Akhrisitu odzodzewa ankutumikirira Yahova? Mtumi Yohane adaona wanthu azinji ‘aliyimirire patsogolo pa mpando wa Chifumu’ mukachisi wophiphirisa yemwe achatanthauza malo yakunja. Momwe ‘iwo achachitira utumiki wopatulika wa Mulungu usiku na masikati mukachisi wake.’ (Chiv. 7:9, 13-15) Isepano titembeja maninge mwayi womwe Yahova adatipasa wakumutumikira munjira yochena mu kachisi wake nkulu wauzimu!

17. Ni ntsembe ziponi zomwe isepano tingapereke kwa Yahova?

¹⁷ Ntsiku zino Akhrisitu ose anamwayi wopereka ntsembe kwa Yahova. Pakuphatisa basa nthawe yawo, mphanvu na chuma chawo pakuthandiza vose vomwe Ufumu wa Mulungu unkuchita. Ninge momwe mtumi Paulo adauzira Akhrisitu Wachiheberi, ‘isepano tingapereke mphaso zathu nthawe zose kwa Yahova pakumutamanda, yomwe ni vipatso va milomo yathu yomwe tiphatisa basa pakulengeza va dzina yake.’ (Aheb. 13:15) Isepano tionesa kuti titembeja maninge mwayi moyu tikambatumikira Yahova na kumupasa vose vomwe tingakwanise.

18. Ni chani chomwe isepano nthawe zose tichadekana kuchita ndipo nchani chomwe tichadekanalini kuyebwa? (Aheberi 10:22-25)?

¹⁸ Werengani Aheberi 10:22-25. Kumapeto kwa kalata yake yomwe adanembera Aheberi, Paulo adafotokoza vinthu vizinji vomwe isepano tichadekana kuchita kuti titumikire Yahova. Vinthu vimwevi vinkuphatanidzapo kupemphera kwa Yahova nthawe zose, kulalikira kwa wanthu anango va chidikhiro chathu, kugumanika pa misonkhano pabodzi na mpingu na kulimbikisana ‘makamaka pomwe tinkuona kuti ntsiku ya [Yahova] inkufika.’ M’bukhu ya Chivumbulutso isepano tiwerenga kuti mngelo wa Yahova adanena kuti: ‘Tamandani Mulungu’ iye adanena vimwevi maulendo yawiri pakufuna kuonesa kuti ni chinthu chodekana maninge. (Chiv. 19:10; 22:9) Isepano tichadekanalini kuyebwa vose vomwe tapfunzira mu nkhani mweyi va kachisi wauzimu wa Yahova na mwayi womwe isepano tinaye wotumikira Mulungu wathu nkulu, Yahova.