1. Wat nao wanfala angel talem, and hao nao iumi shud ting lo datwan?

 IF WANFALA angel story lo iu, hao bae iu lisin lo wat hem talem? Distaem, wanfala angel gohed story lo “pipol bilong evri kantri, tribe, and languis.” Wat nao hem talem? Hem sei: “Fraet long God and givim glory long hem . . . Worshipim God wea wakem skae and graon.” (Rev. 14:6, 7) Jehovah hem only tru God wea evriwan shud worshipim. Iumi barava tinghae lo spesol chance wea hem givim lo iumi for worshipim hem lo nambawan spiritual temple blo hem!

2. Wat nao spiritual temple blo Jehovah? (Lukim tu box “ Wat Hem No Minim.”)

² So wat nao datfala spiritual temple, and wea nao iumi savve faendem olketa detail abaotem datwan? Spiritual temple hia hem no wanfala building. Hem arrangement blo Jehovah abaotem worship wea hem acceptim wea base lo ransom sakrifaes blo Jesus. Aposol Paul explainim disfala arrangement lo leta wea hem raetem for olketa first century Hebrew Christian wea stap lo Judea. b

3-4. Why nao Paul wari abaotem olketa Hebrew Christian lo Judea, and hao nao hem helpem olketa?

³ Why nao Paul raetem disfala leta for olketa Hebrew Christian lo Judea? Luk olsem, for tufala main reason. First wan, hem for encouragem olketa. Bifor olketa kamap Christian, olketa joinim Jew religion. Olketa leader lo religion wea olketa  joinim bifor maet tok spoelem olketa bikos olketa kamap Christian. Why nao olsem? Bikos olketa Christian no garem temple for worship insaed, no garem altar for bonem sakrifaes, and olketa no garem olketa priest. Datwan maet savve mekem olketa disaepol blo Christ for discourage and mekem faith blo olketa for wikdaon. (Heb. 2:1; 3:12, 14) Samfala maet even tingting for go bak lo Jew religion.

⁴ Second reason, Paul storyim hao olketa Hebrew Christian hia no waka hard for minim olketa niu or deep spiritual teaching, wea hem nao “strongfala kaikai” wea stap lo Bible. (Heb. 5:11-14) Luk olsem, samfala lo olketa still followim Law blo Moses. Bat Paul explainim hao olketa sakrifaes wea Law sei olketa mas givim, hem no mekem olketa for kasem forgiveness for olowe. Dastawe ‘God aotem’ datfala Law. Then Paul teachim samfala deep teaching lo olketa. Hem storyim wanfala “hope wea winim datwan” wea base lo sakrifaes blo Jesus wea savve barava helpem olketa for “fren gud witim God.”—Heb. 7:18, 19.

5. Wat nao iumi need for minim gud lo Bible buk Hebrew, and why nao olsem?

⁵ Paul explainim lo olketa Hebrew Christian dat hao olketa worshipim Jehovah distaem, hem barava gud winim hao olketa worshipim Jehovah bifor lo Jew religion. Arrangement wea olketa Jew followim hem “shadow nomoa bilong olketa samting wea bae kam, bat Christ nao . . . datfala shadow [or real samting].” (Col. 2:17) Shadow blo wanfala samting hem sheip nomoa blo wanfala real samting. So pattern lo worship blo olketa Jew bifor hem shadow nomoa bikos real samting bae kamap. Disfala real samting hem arrangement blo Jehovah wea helpem iumi for kasem forgiveness for olketa sin blo iumi mekem hem acceptim worship blo iumi. So hem barava important for minim gud datwan. Distaem bae iumi comparem datfala “shadow” (pattern lo worship blo olketa Jew bifor) witim datfala real samting (pattern lo worship blo olketa Christian), olsem Bible buk Hebrew storyim. Datwan bae helpem iumi for minim gud datfala spiritual temple and hao iumi part lo datwan.

6. Olketa Israelite iusim tabernacle for wanem?

⁶ Pattern lo worship blo olketa Jew bifor. Main samting wea Paul discussim hem datfala tabernacle wea Moses setimap lo 1512 B.C.E.  (Lukim chart “Pattern Lo Worship blo Olketa Jew Bifor—Pattern lo Worship blo Olketa Christian.”) Datfala tabernacle hem luk olsem tent. Olketa Israelite savve karem datfala tent taem olketa muv from ples tu ples. Olketa iusim for klosap 500 year go kasem taem olketa buildim temple lo Jerusalem. (Ex. 25:8, 9; Num. 9:22) Disfala “tent for meeting” hem main ples for olketa Israelite worshipim God and offerim olketa sakrifaes. (Ex. 29:43-46) Bat datfala tabernacle hem representim tu barava gud samting wea olketa Christian bae kasem.

7. Wat taem nao datfala spiritual temple hem start for exist?

⁷ Pattern lo worship blo olketa Christian. Datfala tabernacle hem “shadow” blo “olketa samting long heven,” and hem piksarem nambawan spiritual temple blo Jehovah. Paul storyim “datfala tent [or, tabernacle] hem piksarem olketa samting wea happen distaem.” (Heb. 8:5; 9:9) So taem Paul raet for olketa Hebrew Christian, spiritual temple hem exist finis. Hem start for exist lo 29 C.E. Lo datfala year Jesus baptaes, God anointim hem witim holy spirit, and hem kamap “nambawan hae priest” blo Jehovah lo spiritual temple. c—Heb. 4:14; Acts 10:37, 38.

8-9. Olsem Hebrew 7:23-27 storyim, wat nao difrens between olketa hae priest lo Israel and datfala nambawan Hae Priest, Jesus Christ?

⁸ Pattern lo worship blo olketa Jew bifor. Hae priest nao savve representim pipol front lo God. Jehovah appointim first hae priest blo Israel, Aaron, taem olketa dedicatem tabernacle. Bat Paul storyim hao “staka man mas kamap priest for changem olketa priest wea dae.” d (Readim Hebrew 7:23-27.) And from olketa no perfect, olketa hae priest hia mas offerim sakrifaes for sin blo olketa seleva. Diswan mekem olketa hae priest lo Israel barava difren from nambawan Hae Priest, Jesus Christ.

⁹ Pattern lo worship blo olketa Christian. Jesus Christ wea hem Hae Priest blo iumi hem “wakaman . . . bilong datfala tru tent wea Jehovah nao wakem, no man.” (Heb. 8:1, 2) Paul explainim hao “from [Jesus] bae laef olowe, hem bae priest for olowe and no eniwan bae changem hem.” Paul sei tu hao Jesus hem “holy, hem barava no olsem olketa wea sin” and hem no olsem olketa hae priest lo Israel bikos hem no need for “mekem sakrifaes evriday” for sin blo hemseleva. Distaem bae iumi storyim difrens between olketa altar, and olketa sakrifaes wea followim pattern lo worship blo olketa Jew bifor and worship blo olketa Christian.

10. Olketa sakrifaes wea olketa offerim antap lo datfala copper altar, wat nao hem piksarem?

¹⁰ Pattern lo worship blo olketa Jew bifor. Wanfala copper altar hem stap aotsaed lo entrance blo tabernacle for sakrifaesim olketa animal for Jehovah. (Ex. 27:1, 2; 40:29) Bat olketa sakrifaes hia no mekem pipol for kasem forgiveness for sin blo olketa for olowe. (Heb. 10:1-4) Olketa animal sakrifaes wea olketa offerim lo tabernacle, hem piksarem wanfala sakrifaes wea bae mekem pipol kasem forgiveness for sin blo olketa for olowe.

11. Wat nao altar wea Jesus offerim hemseleva antap hem representim? (Hebrew 10:5-7, 10)

¹¹ Pattern lo worship blo olketa Christian. Jesus savve Jehovah sendem hem kam lo  earth, for givim human laef blo hem olsem ransom sakrifaes for evri pipol. (Matt. 20:28) So taem Jesus baptaes, hem givim hemseleva for duim wat Jehovah laekem. (John 6:38; Gal. 1:4) Altar wea Jesus offerim hemseleva antap, hem representim hao God laekem Son blo hem for sakrifaesim perfect human laef blo hem. Jesus offerim laef blo hem “wantaem nomoa” mekem evriwan wea showimaot faith lo hem savve kasem forgiveness for olowe. (Readim Hebrew 10:5-7, 10.) Next samting, bae iumi discussim wat nao olketa samting insaed tabernacle hem representim.

12. Hu nao savve go insaed tufala rum lo tabernacle?

¹² Pattern lo worship blo olketa Jew bifor. Hao olketa wakem insaed tabernacle and datfala temple wea olketa buildim lo Jerusalem hem barava klosap semsem. Tabernacle and temple hia garem tufala rum insaed, wea hem nao “Holy Rum” and “Most Holy Rum,” and wanfala curtain divaedem tufala rum hia. (Heb. 9:2-5; Ex. 26:31-33) Insaed lo Holy Rum, hem garem golden lampstand, altar for bonem incense, and tebol for showbred. Only olketa wea kasem “anointing . . . for kamap priest” allowed for go insaed lo Holy Rum for duim holy waka blo olketa. (Num. 3:3, 7, 10) Datfala Most Holy Rum garem ark blo covenant wea representim hao Jehovah stap witim olketa. (Ex. 25:21, 22) Evri year lo Atonement Day, only hae priest nomoa savve go insaed lo Most Holy Rum. (Lev. 16:2, 17) Evri year, hem go insaed lo datfala rum witim blood blo olketa animal  sakrifaes for offerim for olketa sin blo hemseleva and for full nation. Gogo, Jehovah iusim holy spirit for showimaot klia wat nao olketa samting wea stap insaed tabernacle hem representim.—Heb. 9:6-8. e

13. Wat nao Holy Rum and Most Holy Rum lo datfala tabernacle representim lo worship blo olketa Christian?

¹³ Pattern lo worship blo olketa Christian. Smol namba lo olketa disaepol blo Christ nomoa kasem anointing from holy spirit, and olketa garem spesol frenship witim Jehovah. Namba blo olketa hem 144,000 and olketa bae kamap priest witim Jesus lo heven. (Rev. 1:6; 14:1) Datfala Holy Rum lo tabernacle hem representim hao God adoptim olketa olsem olketa spiritual son blo God taem olketa stap yet lo earth. (Rome 8:15-17) Datfala Most Holy Rum lo tabernacle hem representim heven, ples wea Jehovah stap. “Datfala curtain” wea divaedem Holy Rum from Most Holy Rum hem representim physical body blo Jesus, wea mekem hem no savve go insaed heven for kamap Hae Priest lo datfala spiritual temple. From Jesus sakrifaesim human body blo hem for evri pipol, datwan openem wei for olketa anointed Christian for laef lo heven. Olketa anointed wan tu mas lusim physical body mekem olketa kasem reward blo olketa lo heven. (Heb. 10:19, 20; 1 Cor. 15:50) Bihaen Jesus resurrect, hem go insaed Most Holy Rum lo datfala spiritual temple, and gogo evri anointed wan tu bae joinim hem.

14. Olsem Hebrew 9:12, 24-26 storyim, wat nao mekem arrangement for worshipim Jehovah lo spiritual temple hem barava gud winim hao olketa Israelite worship bifor?

¹⁴ So arrangement blo Jehovah for tru worship wea base lo ransom sakrifaes and wea Hae Priest Jesus Christ nao leadim, hem barava gud winim worship blo olketa Jew bifor. Hae priest lo Israel bifor savve go insaed lo Most Holy Rum, wea man nomoa wakem, for presentim blood blo olketa animal sakrifaes. Bat Jesus hem “go insaed lo heven,” wea holy tumas front lo Jehovah for presentim value lo perfect human laef blo hem on behalf lo iumi, wea hem “givim hemseleva olsem sakrifaes for finisim sin.” (Readim Hebrew 9:12, 24-26.) Sakrifaes wea Jesus givim hem finisim sin for olowe. Distaem bae iumi storyim, hao nomata iumi garem hope for laef lo heven or lo earth, iumi evriwan savve worshipim Jehovah lo spiritual temple blo hem.

15. Hu nao olketa wea duim waka lo courtyard blo datfala tabernacle?

¹⁵ Pattern lo worship blo olketa Jew bifor. Datfala tabernacle hem garem wanfala courtyard, wea hem open area wea fence hem raonem, and olketa priest savve duim waka blo olketa lo there. Disfala courtyard hem garem wanfala big copper altar for burnt offering, and wanfala copper basin wea wata stap insaed. Olketa priest iusim wata hia for klinim olketa seleva bifor olketa savve duim holy waka blo olketa. (Ex. 30:17-20; 40:6-8) Bat, olketa temple wea olketa buildim bihaen garem tu wanfala courtyard aotsaed wea pipol wea no priest savve kam standap and worshipim God.

16. Hu nao olketa wea worship insaed each courtyard blo datfala spiritual temple?

¹⁶ Pattern lo worship blo olketa Christian. Bifor olketa anointed wan go ap lo heven for kamap priest witim Jesus, olketa gohed faithful for waka lo courtyard insaed lo spiritual temple. Datfala big basin wea wata stap insaed, hem remindim evri Christian for mas gohed klin lo wei blo olketa and lo spiritual  wei. So wea nao datfala “big crowd” wea loyal for sapotim olketa anointed brata blo Christ worshipim Jehovah? Aposol John lukim olketa “standap front long datfala throne,” and “worshipim [God] evri day and evri naet.” Datfala big crowd duim diswan lo earth lo courtyard aotsaed lo spiritual temple. (Rev. 7:9, 13-15) Iumi thankiu lo Jehovah for givim iumi spesol privilege for worshipim hem insaed nambawan spiritual temple blo hem!

17. Wat nao olketa sakrifaes wea iumi savve givim lo Jehovah?

¹⁷ Distaem iumi garem privilege for givim olketa sakrifaes lo Jehovah olsem for iusim strong, taem, and olketa material samting wea iumi garem for sapotim Kingdom blo God. Olsem Paul talem olketa Hebrew Christian, iumi savve “evritaem praisem God,” wea diswan hem ‘olsem sakrifaes wea iumi givim lo God,’ wea hem nao for ‘iusim mouth blo iumi for talemaot nem blo hem lo nara pipol.’ (Heb. 13:15) Iumi showimaot iumi tinghae lo privilege for worshipim Jehovah taem iumi givim olketa best sakrifaes lo hem.

18. Olsem Hebrew 10:22-25 storyim, wat nao samfala samting wea iumi mas duim, and wat nao iumi mas no forgetim?

¹⁸ Readim Hebrew 10:22-25. Klosap end lo leta blo Paul for olketa Hebrew Christian, hem storyim samfala samting wea iumi mas duim lo worship blo iumi. Olketa samting hia nao hem for prea lo Jehovah, storyim hope blo iumi lo pipol, meet tugeta lo kongregeson meeting, and for gohed encouragem each other “moa taem [iumi] lukim datfala day [blo Jehovah] hem kakam klosap.” Angel blo Jehovah sei: “Worshipim God!” (Rev. 19:10; 22:9) Angel talem diswan tufala taem for showim hao datwan hem barava important. Hem gud for iumi no forgetim olketa deep spiritual truth wea iumi lanem abaotem nambawan spiritual temple blo Jehovah, and for tinghae lo privilege blo iumi for worshipim God!