1. ¿Imataj juc ángel niycämanchi y chayga imata ruranapätaj shacyächimanchi?

 JUC ángel parlapäshuptiquega, ¿cäsupanquimanchuraj? ‘Au’ niptiquega, chauraga canan wichan juc ángel cayno nimashganchita cäsucunquiman, payga nin: “¡Tayta Diosta mantsakur payta alabapäkuy! [...] ¡Jana patsata, kay patsata, lamarta y pashtaq yakukunatapis kamaq Tayta Diosta adorapäkuy!” (Apoc. 14:6, 7). Lapanchimi Jehovata adurananchi, paylami rasunpa caj Diosmi. Jehovapa templun nirajcho aduraycashganchega, ¡cushicuypämi!

2. Jehovapa templun nirajcho aduraycashganchipita parlarga, ¿imapitataj parlaycanchi? (“ Manami caycunachu” nishgan recuadrutapis ricay).

² Jehovapa templun nirajcho aduraycashganchi Biblia niptenga, manami parlaycämunchu juc wasicho ni juc templuchoraj payta aduranapaj cashganpita. Sinoga parlaycämun Jesuspa wanuyninwan imataj Jehová camacächishganpita pay munashganno aduranapaj. Punta caj cristianucunata apóstol Pablo chaypita shumaj tantiachicamurgan. Chaytaga tarinchi Judeacho caycaj hebreo cristianucunata cartacamushgancho. b

3, 4. ¿Imanirtaj Pabluga hebreo cristianucunata cartacamurgan, y chayga imanotaj yanapargan?

³ ¿Imapätaj apóstol Pabluga Judeacho caycaj cristianucunata escribirgan? Shacyächinanpächi cargan. Achca judiucuna Moisespa Leynin nishganno winashga carpis cristianuman ticrapäcurgan, y chayraycur pushacoj religiosucuna  paycunapita burlapäcojchi. Cristianucunapäga juc templun carganchu, ni sacrificiucunata rupachinanpaj altarpis, ni sacerdoticunapis. Chayraycur pushacoj judiucuna burlacäriptin, cristianucunaga laquicurpis guelanäcunmanchi cargan (Heb. 2:1; 3:12, 14). Waquincunaga unaycho caycashgan religiunmanpis cutinanpaj yarparganchi.

⁴ Hebreo cristianucuna Diospa más alinnin yachachicuynincunata tantiarcunanpaj mana calpachacuycashganta ricar, Pabluga nergan: “Pishi wamra mikuyta manaraq yachakur lëchilataraq upuqnömi” caycashganta (Heb. 5:11-14). Waquincunaga Moisespa Leyninta cäsucur caycargan. Paycunaga yarpapäcurgan Ley nishganno sacrificiucunata rurar juchancunapita perdunashga cananpaj. Ichanga Pabluga tantiachicurgan chay Leyga mana vijentina caycashganta. Chaymi apóstol Pabluga paycunata shumaj yachachergan Jesuspa wanuyninwanraj Jehovaman más guelicamuyta puedipäcushganta (Heb. 7:18, 19).

5. ¿Imataj ali caycan shumaj tantiarcunapaj, y imanir?

⁵ Pabluga hebreo yäracoj masincunata shumaj tantiachicurgan canan wichan cristianucuna Jehovata imano adurashgan unay judiucuna imano adurashganpita más ali cashganta. Payga nergan unay judiucuna Jehovata adurashganga “lantuyno pasaqla karmi Jesucristo shamushqanyaqla kashqa” (Col. 2:17). Imatapis shumaj tantiarcunapäga imalawanpis tincuchishwanraj. Chaynolami unay judiucuna Diosta adurashganga ricächicurgan shamoj watacunacho cristianucuna imano Diosta adurapäcunanpaj. Shumaj tantiarcushun imataj Jehová camacächirgan juchanchicunata perdunamänanchipaj, chaynoparaj musyashun pay munashganno aduranapaj. Ricärishun unaycho judiucuna imanotaj Diosta adurargan, y canan wichan cristianucuna imanotaj Diosta aduranchi. Pablo cartacamushganpitaga yachacushun Jehovapa templun niraj ima cashganta, y chayraycur noganchi imataj rurashun.

6. ¿Imapätaj unaycho sagrado tolduta sharcachipäcurgan?

⁶ Unaycho. Pabluga parlacaramurgan 1512 watacho Moisés Sagrado Tolduta sharcachishganpita (“Unaycho y canan wichan”  nishgan recuadruta ricay). Israelitacunaga Sagrado Tolducho o Tincunan Tolducho shuntacärej Diosta adurar sacrificiucunata rupachipäcunanpaj (Éx. 29:43-46). Chunyaj jircacho caycar maypa aywarpis Sagrado Toldutaga apacärej (Éx. 25:8, 9; Núm. 9:22). Chaytaga 500 watacunano utilizargan Jerusalencho templo sharcachishgancama. Ichanga chay Sagrado Tolduga ricächicurgan shamoj watacunacho cristianucuna imanotaj Diosta adurapäcunanpaj.

7. ¿Imay watachotaj cristianucunaga Diospa templun nirajcho adurar galaycurgan?

⁷ Canan wichan. Sagrado Toldu cashganga ricächicurgan shamoj watacunacho Jehovapa templun nirajcho imano aduranapaj cajta. Chaymi Pabluga nergan “jana patsacho kaykaq Sagrädu Toldu niraqta rurashqalanchömi Tayta Diosta” sirvinchi (Heb. 8:5; 9:9). Pablo hebreo cristianucunata cartacamushga wichanga, cristianucunaga mayna Tayta Diospa templun nirajcho adurayta galaycushga cargan 29 caj watacho Jesús shamushganpitana. Chay watacho Jesús bautizacurgan, espíritu santuwan acrashga cargan y Mandaj Sacerdotino sirvir galaycushga cargan (Heb. 4:14; Hech. 10:37, 38). c

8, 9. Hebreos 7:23-27 nishganno, ¿imanirtaj ninchi Mandaj Sacerdote Jesucristuga unay mandaj sacerdoticunano mana cashganta?

⁸ Unaycho. Mandaj Sacerdotiga sacrificiucunata rupachipäcoj israelitacunapa juchancuna perdunashga cananpaj. Sagrado Tolduta sharcarcachirna Jehovaga Aaronta acrargan mandaj sacerdote cananpaj. Ichanga Pabluga nergan “mandaq cüra [o sacerdote] wanuptin juknami trukan yaykuq” (leiriy Hebreos 7:23-27). d Jinamanpis chay mandaj sacerdoticuna juchasapa cashganraycur quiquincunapäpis sacrificiucunata rupachipäcoj. Jesús ichanga chay mandaj sacerdoticuna rurashgannochu rurargan, ¿imanir?

⁹ Canan wichan. Señorninchi Jesucristo cananga “jana patsacho kaq Sagrädu Tolduchömi mandaq cüra [o sacerdote] kaykan. Tsay toldutaqa manami runakunatsu sharkatsishqa, sinöqa kikin Tayta Diosmi” (Heb. 8:1, 2). Pabluga nergan Jesucristo “mana ushakaq kar imayyaqpis mandaq cüra kaykan”. Jina “jutsaynaq santu kar”, unay mandaj sacerdoticunano cutin cutin sacrificiucunata rupachipäcunchu. ¿Y ima nishwantaj altarcunapita y sacrificiucunapita?

10. ¿Unaycho sacrificiucunata rurashganga imataj ricächicurgan?

¹⁰ Unaycho. Sagrado Toldupa yaycunancho broncipita rurashga juc altar caycargan, y chaycho uywacunata rupachipäcoj Jehovapaj (Éx. 27:1, 2; 40:29). Pero chay sacrificiucunawanga runacunapa juchancuna chipyaypa perdunashga cashgachu (Heb. 10:1-4). Uywacunata sacrificiuno rupachishganga, ricächicurgan shamoj watacunacho imano runacunapa juchancuna chipyaypa perdunashga cananpaj.

11. ¿Jesús ima rurashgantaj juc altarcho sacrificiuta ruraycashganno cargan? (Hebreos 10:5-7, 10).

¹¹ Canan wichan. Jesusga musyargan runacunaraycur wanunanpaj Taytan cay pachaman  cachamushganta (Mat. 20:28). Chaymi bautizacurna camaricushga caycargan papäninpa voluntäninta rurananpaj (Juan 6:38; Gál. 1:4). Pay rurashganga juc altarcho sacrificiuta rurashganno cargan, chaywanga cumpliycargan Taytanpa voluntäninta. Jesusga “juk kutila wanurqan” payman lapan yäracojcunapa juchancuna chipyaypa perdunashga cananpaj (leiriy Hebreos 10:5-7, 10). Cananga parlarishun sagrado toldupa rurincho imacuna caycashganta y imacunawan tincushgantapis.

12. ¿Pïcunalataj Lugar Santuman y Lugar Santïsimumanpis yaycoj?

¹² Unaycho. Sagrado tolducho y tiempuwan templucunachopis ishcay cuartucuna caycargan: “Lugar Santu” y “Lugar Santïsimu” cajcuna, y chaycunataga juc cortina raquirargan (Heb. 9:2-5; Éx. 26:31-33). Lugar Santuchoga caycargan goripita candelabro, inciensuta goshtachinanpaj altar y juc mesapis Tayta Diospaj tantata churananpaj. Chaymanga acrashga sacerdorticunalami yaycoj Jehová mandashganta rurapäcunanpaj (Núm. 3:3, 7, 10). Lugar Santïsimuchona goriwan enchapashga pacto babul caycargan y chayga ricächicoj Jehová chaycho caycashganta (Éx. 25:21, 22). Chay cuartumanga mandaj sacerdotila yaycoj. Y Perdunta Tarinan Junajcho mandaj sacerdotiga pacto babulpa jananman uywacunapa yawarninta chajchoj, chaynopa quiquinpa y israel masincunapapis juchancuna perdunashga cananpaj (Lev. 16:2, 17).  Tiempuwanga Jehová espiritunwan shumaj tantiachicurgan sagradu toldupa rurincho caycajcuna imacunawan tincushganta (Heb. 9:6-8). e

13. ¿Imawantaj tincun Lugar Santu y Lugar Santïsimupis?

¹³ Canan wichan. Jehovaga 144.000 runacunatami wamrancunatano acrargan cielucho tiyananpaj. Paycunaga sacerdoticunano cielucho Jesuswan carcaycanga (Apoc. 1:6; 14:1). Paycuna cay Pachachoraj carcaycaptin Jehovaga espiritunwan paycunata acran y churincunatano ricapäcun. Chaura Sagrado Tolducho caycaj Lugar Santuga ricächimanchi paycuna Jehovawan juc pactuta rurashganta paylata sirvinanpaj (Rom. 8:15-17). Pero Sagrado Tolducho caycaj Lugar Santïsimuga tincun Jehová tiyanan cieluwan. Y chay ishcay cuartucunata raquiraj cortinaga tincun Jesuspa cuerpunwan. Pay aychayoj y tuluyojraj caycaptin cieluman aywayta puedirganchu, pero wanuyninwanga puncuta quicharishganno cargan acrashga caj cristianucuna cieluman aywananpaj. Pero chayno cananpäga cay acrashga cristianucunapis wanunanrämi. Cielumanga pipis aychayoj y yawaryojga yaycuyta puedinchu, chaymi wanunanraj (Heb. 10:19, 20; 1 Cor. 15:50). Jesús cawarircamur Lugar Santïsimuman yaycurgan. Tiempuwanga cielupaj acrashga cajcunapis chayman chayapäcunga.

14. Hebreos 9:12, 24-26 nishganno, ¿imanirtaj Diospa templun nirajga más alimi caycan unay sagrado toldupita?

¹⁴ Canan wichan Jehovata imano aduranapaj cajga, más alimi caycan unaycho judiucuna imano Payta adurashganpita. Mandaj sacerdote Lugar Santïsimuman yaycushganga runacuna rurashgalanmi cargan, chaymanga uywacunapa yawarninwanraj yaycoj. Ichanga Jesusga jana pachacho caycaj templumanmi yaycurgan, chaychomi payga noganchiraycur wanushganta juc sacrificiuta rurashgantano papäninta entregargan “jutsantsipita perdonashqa kanantsipaqmi” (leiriy Hebreos 9:12, 24-26). Jesuspa wanuyninwanga juchanchicunapita chipyaypa perdunashga cashun. Cananga ricärishun cielupaj aywanapaj carpis o cay pachacho cawanapaj carpis imanotaj Diospa templun nirajcho aduraycanchi.

15. ¿Pïcunalataj sagrado toldupa patiuncho carcaycargan?

¹⁵ Unaycho. Sagrado tolduchoga juc patiupis caycargan, chaychoga sacerdoticuna Jehová mandashganta rurapäcoj. Jina chaycho caycargan cobripita rurashgan altarpis sacrificiucunata rupachipäcunanpaj, y cobripita rurashgan lavatoriupis caycargan sacerdoticuna sagrado ruraynincunata manaraj rurar chaycho maylacärinanpaj (Éx. 30:17-20; 40:6-8). Tiempuwanga sharcachishgan templucunachopis juc patio masraj caycargan mana sacerdote cajcuna Diosta adurapäcunanpaj.

16. ¿Pïcunataj jucnin jucnin caj patiucunacho canan sirvircaycan?

¹⁶ Canan wichan. Cielupaj acrashga cajcuna Jesuswan sacerdoticunano manaraj caycar, paycunaga Jehovapa templun nirajcho ruri caj patiucho lapan shongunwan sirvircaycan. Y unay sagrado toldupa patiuncho lavatoriucho caycashgan yacuga paycunata y noganchitapis yarpächimanchi limpio  y santo runacuna cananchipaj. Y cay Pachacho aypala cawananpaj runacunaga, ¿maychotaj sirvircaycan? Paycunaga Jehovapa templun nirajcho yaycunan patiucho carcaycan, chaymi apóstol Juan nergan: “Tsay runakunaqa Tayta Dios jamarashqan trönun nawpanchömi karkaykan. Paqasta junaqtami templuncho alabarkaykan” (Apoc. 7:9, 13-15). ¡Selläma cushicurcunchi Jehovapa templun nirajcho aduraycashganchipita musyar!

17. ¿Imacunata rurartaj sacrificiuta altarman churajno Jehovata goycushwan?

¹⁷ Lapanchimi altarcho sacrificiucunata churajno Jehovata goycushwan, chaytaga ruranchi lapan tiempunchiwan, calpanchiwan y imaycanchicunawanpis Diospa Gobiernunta yanapacuptinchi. Hebreo cristianucunata Pablo nishganno ‘sacrificiuta altarman churaqno Tayta Diosta imay hörapis alabashun. Paypa jutinta joqarishun’ (Heb. 13:15). Chauraga imapitapis masraj Jehovalata aduranapaj calpachacurga, cushicuypämi canga.

18. Hebreos 10:22-25 nishganno, ¿imataj jinala ruraycarla siguiycashwan? ¿Y imataj ama gongashwanchu?

¹⁸ (Leiriy Hebreos 10:22-25). Apóstol Pablo Hebreo cristianucunata cartacamur ushashganchona paycunata yarpächin caycunata jinala ruraycar siguipäcunanpaj, chaycunaga caycan: Jehovata mañacärinanpaj, imaman yäracushganpita waquincunata parlapänanpaj, hermanuncunawan juntacarcur shacyächinacärinanpaj masraj Jehovapa junajnin caylachona caycaptin. Apocalipsis librupa ushanancho Jehovapa angelninga ishcay cuti nin: “¡Tayta Diosta adorayga!”. Chaynoga nimanchi mana gonganapaj (Apoc. 19:10; 22:9). Aumi, ama gongashunchu Jehovapa templun nirajpita shumajta yachacushganchipita, paylata sirvishganchega imapitapis más alimi caycan.