1. ¿Jas tajin kuya ubʼixik jun ángel, y jas kubʼan pa ri qakʼaslemal oj kimik?

 WE KTZIJON jun ángel awukʼ, ¿la katatabʼej riʼ ri kubʼij? Kimik kʼo jun ángel che tajin kchʼaw kukʼ «konojel ri nimaʼq taq tinamit, xuqujeʼ konojel amaqʼ, konojel chʼabʼal, xuqujeʼ konojel winaq». ¿Jas ri kubʼij? «Chixeʼj iwibʼ chuwach ri Dios. Chinimarisaj uqʼij, [...] Chiqʼijilaj bʼaʼ ri xbʼanow ri kaj, ri ulew, ri plo xuqujeʼ ri e ukʼiyibʼal taq jaʼ» (Apoc. 14:6, 7). Rajawaxik che qonojel kqaya uqʼij ri Jehová; are ri qastzij Dios. Sibʼalaj kojkikotik che tajin kqaqʼijilaj ri Jehová pa ri utemplo espiritual. ¡Are jun nimalaj eqeleʼn che yaʼom chqe!

2. ¿Jas riʼ ri templo espiritual re ri Jehová? (Xuqujeʼ chawilaʼ ri recuadro « Ri are taj»).

² ¿Jas riʼ ri templo espiritual y jawchiʼ kriqitaj wi pa ri Biblia? Ri templo espiritual are ta jun qas ja. Are ri kukoj ri Jehová rech kqʼijilaxik junam rukʼ ri kraj ri areʼ y kʼo ubʼanik rukʼ ri ukamikal ri Jesús. Ri apóstol Pablo xchʼaw chrij wariʼ pa ri carta che xutaq bʼi chke ri cristianos hebreos re ri nabʼe siglo che e kʼo pa Judea. b

3, 4. ¿Jasche xutaq bʼi cartas ri Pablo chke ri cristianos hebreos y jas xubʼan che kitoʼik?

³ ¿Jasche xutaq bʼi cartas ri Pablo chke ri cristianos hebreos che e kʼo pa Judea? Weneʼ rumal kebʼ jastaq che nim kibʼanik. Nabʼe, rech xuya kichuqʼabʼ. Kʼi chke xekʼiy pa ri kojonem judía y ri kʼamal taq bʼe re ri e kojonem riʼ xetzeʼn chkij are chiʼ xeʼux cristianos. ¿Jasche? Rumal che ri  cristianos e junam ta kukʼ ri judíos, rumal che kʼo ta jun templo jawiʼ kkiqʼijilaj wi ri Dios, kʼo ta jun altar jawiʼ kkiya wi ri tabʼal toqʼobʼ y e kʼo ta kojol tabʼal toqʼobʼ. Wariʼ weneʼ xubʼano che xubʼan kebʼ kikʼuʼx ri cristianos y xuqasaj uchuqʼabʼ ri kikojonik (Heb. 2:1; 3:12, 14). Weneʼ jujun chke xkaj xetzalij pa ri kojonem judía.

⁴ Ukabʼ, ri Pablo xubʼij chke ri cristianos hebreos che tajin ta kkikoj kichuqʼabʼ che retaʼmaxik ri kʼutunem che kʼax uchʼobʼik, ri wa «kech ri tzʼaqatinaq chik kijunabʼ» che kʼo pa ri uTzij ri Dios (Heb. 5:11-14). Rumal laʼ, e kʼi tajin kkibʼan na ri Taqanik che xyaʼ che ri Moisés. Are kʼu ri Pablo xubʼij chke che ri tabʼal toqʼobʼ che kubʼij ri Taqanik che xyaʼ che ri Moisés kkun taj kusach ronojel ri kimak ri winaq. Rumal laʼ, ri Taqanik kʼo ta chi upatan. Tekʼuriʼ ri apóstol Pablo xukʼut jujun kʼutunem chkiwach che kʼax uchʼobʼik. Xunaʼtaj chke che rukʼ ri ukamikal ri Jesús kekunik kkiriq jun kubʼsal «kʼuʼx ri sibʼalaj utz na» che keʼutoʼo rech keqebʼ rukʼ ri Dios (Heb. 7:18, 19).

5. ¿Jas rajawaxik kqachʼobʼo y jasche?

⁵ Ri Pablo xuqʼalajisaj chkiwach ri cristianos hebreos che ri tajin kkibʼan che uqʼijilaxik ri Dios más utz na chuwach ri xbʼan nabʼe kanoq. Xubʼij che ri kkibʼan ri judíos che uqʼijilaxik ri Dios are «xa umuʼjal ri kpe na». Y xubʼij: «Are kʼu ri qastzij kriqtaj pa ri Cristo» (Col. 2:17). Rech kqachʼobʼ jun jastaq jujun taq mul rajawaxik kqajunamaj rukʼ jun chi jastaq. Xa junam rukʼ, ri xkibʼan ri judíos che uqʼijilaxik ri Dios xa jun kʼutbʼal re ri kabʼan na che uqʼijilaxik ri Dios pa ri petinaq. Rajawaxik kqetaʼmaj ri kbʼan che uqʼijilaxik ri Jehová pa ri templo espiritual. ¿Jasche? Rumal che ktobʼanik rech kkuyutaj qamak y je wariʼ kojkunik kqaqʼijilaj ri Dios junam rukʼ ri kraj ri areʼ. Chqilampeʼ ri xa «umuʼjal» (ri xkibʼan ri judíos che uqʼijilaxik ri Dios) rukʼ «ri qastzij» (ri kkibʼan ri cristianos che uqʼijilaxik ri Dios). Rumal laʼ, kqanikʼoj na ri wuj re Hebreos. Je wariʼ qas kqachʼobʼo jas riʼ ri templo espiritual y jasche kʼo ubʼanik qukʼ.

6. ¿Jas xkoj wi ri tabernáculo?

⁶ Ri xa umuʼjal. Ri Pablo xukoj ri tabernáculo che kʼutbʼal che xubʼan ri Moisés pa ri junabʼ 1512 are chiʼ xchʼaw chrij ri templo espiritual (chawilaʼ ri gráfico «Ri xa  umuʼjal y ri qastzij»). Ri tabernáculo, che xuqujeʼ kbʼix «likʼom Rachoch Dios re riqoj ibʼ» che, are ri kʼolbʼal che xkikoj ri israelitas che uyaʼik uqʼij ri Dios y ri kkiya wi tabʼal toqʼobʼ (Éx. 29:43-46). Amaqʼel kkikʼam bʼik are chiʼ kebʼe pa jun chi lugar (Éx. 25:8, 9; Núm. 9:22). Más che 500 junabʼ xkikoj che uqʼijilaxik ri Jehová kʼa xbʼan na ri templo pa Jerusalén. Ri tabernáculo xuqujeʼ xukʼutunisaj jun qʼijilanik che más nim na ubʼanik che kkibʼan ri cristianos.

7. ¿Jampaʼ xmajtaj ri templo espiritual?

⁷ Ri qastzij. Ri tabernáculo «xa e uwachbʼal xuqujeʼ e umuʼjal ri kʼo chikaj» y xukʼutunisaj ri templo espiritual re ri Jehová. Ri Pablo xubʼij che ri tabernáculo are xa jun kʼutbʼal che ri kpe na (Heb. 8:5; 9:9). Rumal laʼ, are chiʼ xutzʼibʼaj wariʼ chke ri cristianos hebreos, ri templo espiritual ya kʼo chi pa ri tiempo riʼ. Wariʼ xmajtaj pa ri junabʼ 29 are chiʼ ri Jesús xubʼan uqasanjaʼ y xchaʼ rumal ri uxlabʼixel rech kux ri «nimalaj kinimal ri kojol tabʼal toqʼobʼ» pa ri templo espiritual (Heb. 4:14; Hech. 10:37, 38). c

8, 9. Junam rukʼ ri kubʼij Hebreos 7:23-27, ¿Jas kejunamataj ta wi ri kinimal kojol tabʼal toqʼobʼ re Israel rukʼ ri Kinimal kojol tabʼal toqʼobʼ, Jesucristo?

⁸ Ri xa umuʼjal. Ri kinimal ri kojol tabʼal toqʼobʼ are ri kchʼaw pa kiwiʼ ri winaq chuwach ri Dios. Are chiʼ xkʼis ubʼanik ri tabernáculo ri Jehová xuchaʼ ri Aarón rech kux ri nabʼe kinimal ri kojol tabʼal toqʼobʼ pa Israel. Are kʼu ri Pablo xubʼij: «Sibʼalaj e kʼi e okinaq kan che kojol tabʼal toqʼobʼ, xaq xeʼokʼowik, rumal rech chi chkijujunal xekamik, man xekʼojiʼ ta kʼi junabʼ» (chasikʼij uwach Hebreos 7:23-27). d Rumal che ri kinimal kojol tabʼal toqʼobʼ xa e ajmakibʼ, rajawaxik kkiya tabʼal toqʼobʼ chuwach ri Dios che ri kimak. Ri e kojol tabʼal toqʼobʼ re Israel kejunamataj ta rukʼ ri Jesucristo, ri Kinimal kojol tabʼal toqʼobʼ.

⁹ Ri qastzij. Ri Jesucristo are ri «kojol tabʼal toqʼobʼ ri kpatanin pa ri qas qʼijilabʼal ri xbʼan rumal ri Ajawaxel, man rumal ta winaq» (Heb. 8:1, 2). Ri Pablo xubʼij che ri Jesús «kkʼojiʼ amaqʼel chbʼe qʼij saq, okinaq che kojol tabʼal toqʼobʼ, ri man qʼaxal taj». Xuqujeʼ xubʼij che ri Jesús «chʼajchʼoj, utasom ribʼ chkij ri e ajmakibʼ» y che junam ta kukʼ ri kojol tabʼal toqʼobʼ che xekʼojiʼ pa Israel, «man rajawaxik ta che chi ronojel qʼij kukamisaj ta jun awaj che tabʼal toqʼobʼ cho ri Dios nabʼe pa kiwiʼ ri umak ri areʼ». ¿E kʼu ri altares y ri e tabʼal toqʼobʼ? Chqilaʼ ri kjunamataj ta ri xa umuʼjal rukʼ ri qastzij.

10. ¿Jas kukʼutunisaj ri tabʼal toqʼobʼ che keya pa ri altar che bʼanom che cobre?

¹⁰ Ri xa umuʼjal. Chuwach ri tabernáculo kʼo jun altar che bʼanom che cobre ri keporox wi ri awaj che tabʼal toqʼobʼ che ri Jehová (Éx. 27:1, 2; 40:29). Are kʼu ri tabʼal toqʼobʼ riʼ kkun ta che usachik ronojel ri kimak ri winaq (Heb. 10:1-4). Ri awaj che keya che tabʼal toqʼobʼ pa ri tabernáculo ojer, kukʼutunisaj ri tabʼal toqʼobʼ che kyaʼ na rech kusachisaj ri kimak ri winaq re ronojel ri uwach Ulew.

11. ¿Jachike altar xuya wi ribʼ ri Jesús junam rukʼ jun tabʼal toqʼobʼ? (Hebreos 10:5-7, 10).

¹¹ Ri qastzij. Ri Jesús retaʼm che xtaq lo rumal ri Jehová cho ri uwach Ulew rech  kuya ri ukʼaslemal pa kiwiʼ ri winaq (Mat. 20:28). Rumal laʼ, are chiʼ ri Jesús xubʼan uqasanjaʼ xukʼutu che kraj kubʼan ri urayibʼal ri Jehová (Juan 6:38; Gál. 1:4). Jetaneʼ che xyaʼ chuwach jun altar. Ri altar kukʼutunisaj ri «urayibʼal ri Dios», y ri xraj ri Jehová are che ri Jesús xkam umak kech ri winaq, paneʼ kʼo ta umak. Ri Jesús xuya ri ukʼaslemal «xa jumul chbʼe qʼij saq» rech kkuyutaj ri kimak ri winaq che kekojon chrij (chasikʼij uwach Hebreos 10:5-7, 10). Chanim riʼ, kojchʼaw na chrij ronojel ri kʼo chupam ri tabernáculo y ri kukʼutunisaj ri jastaq chkijujunal.

12. ¿Jachin kkunik kok pa ri tabernáculo?

¹² Ri xa umuʼjal. Ri upam ri tabernáculo kjunamataj kukʼ ri templos che xebʼan pa Jerusalén. Kʼo kebʼ cuartos chupam: ri Santo y ri Santísimo, jachom kipam rukʼ jun cortina (Heb. 9:2-5; Éx. 26:31-33). Pa ri Santo kʼo ri utakʼalibʼal kantela che bʼanom che oro, jun altar ri kporox wi incienso y jun mesa che kyaʼ wi ri kaxlanwa che tasal che ri Dios. Xaq xiw ri e kojol tabʼal toqʼobʼ che e chaʼom kekunik keʼok bʼi pa ri Santo rech kkibʼan ri eqeleʼn che yaʼom chke (Núm. 3:3, 7, 10). Pa ri Santísimo kʼo wi ri arca, che bʼanom che oro y che kukʼutunisaj ri ukʼolbʼal ri Jehová (Éx. 25:21, 22). Xaq xiw ri kinimal kojol tabʼal toqʼobʼ kkunik kok pa ri Santísimo. Pa ri qʼij re kuybʼal mak o Día de Expiación che kbʼan chi junabʼ, ri kinimal kojol tabʼal toqʼobʼ kok bʼi pa ri Santísimo rukʼ ri kikikʼel ri awaj rech ksachitaj ri umak y ri ke ri israelitas (Lev. 16:2, 17). Are chiʼ xqʼax  ri tiempo, ri Jehová xukoj ri ruxlabʼixel rech xuqʼalajisaj ri kraj kubʼij ri jastaq che kʼo pa ri tabernáculo (Heb. 9:6-8). e

13. ¿Jas kukʼutunisaj ri Santo y ri Santísimo?

¹³ Ri qastzij. E kʼo 144,000 winaq che xechaʼ rumal ri Dios rukʼ ri uxlabʼixel y che kʼo jun utz achilanik chkixoʼl rukʼ ri Jehová. Ri e areʼ keʼux na e kojol tabʼal toqʼobʼ rukʼ ri Jesús pa ri kaj (Apoc. 1:6; 14:1). Are chiʼ kʼa e kʼo na cho ri uwach Ulew, ri Dios kuya ri ruxlabʼixel pa kiwiʼ y keʼux na ralkʼwal. Ri Santo re ri tabernáculo kukʼutunisaj ri achilanik che kʼo chkixoʼl ri Jehová kukʼ ri 144,000 (Rom. 8:15-17). Ri Santísimo re ri tabernáculo kukʼutunisaj ri kaj che kʼo wi ri Jehová. Ri cortina che kʼo chkixoʼl ri Santo y ri Santísimo are kukʼutunisaj ri ucuerpo ri Jesús. Rukʼ ri ucuerpo kkun taj kok pa ri kaj rech kux kinimal ri kojol tabʼal toqʼobʼ pa ri templo espiritual. Are chiʼ ri Jesús xuya ri ukʼaslemal rumal kech ri winaq, wariʼ xuya bʼe che ri 144,000 cristianos kekunik kebʼe pa ri kaj. Ri e chaʼom rech kebʼe pa ri kaj, rajawaxik kkiya kan ri kicuerpo rech kekunik keʼok pa ri kaj (Heb. 10:19, 20; 1 Cor. 15:50). Are chiʼ xkʼastajisax ri Jesús, xok pa ri Santísimo re ri templo espiritual, ri kebʼe wi na ri 144,000 cristianos rech kekʼojiʼ rukʼ.

14. Junam rukʼ ri kubʼij Hebreos 9:12, 24-26, ¿jasche más nim ubʼanik ri templo espiritual re ri Jehová?

¹⁴ Qastzij che más nim ubʼanik ronojel ri ubʼanom ri Jehová rech kqʼijilaxik junam rukʼ ri kraj ri areʼ, che kʼo ubʼanik rukʼ ri ukamikal ri Jesús y ri chak che kubʼano re jun kinimal kojol tabʼal toqʼobʼ. Ri kinimal kojol tabʼal toqʼobʼ kok bʼi pa ri Santísimo che bʼanom kumal winaq y rukʼam bʼi ri kikikʼel ri awaj. Are kʼu ri Jesús xok bʼi pa ri lugar che más santo: «pa ri kaj», chuwach ri Jehová. Chilaʼ xujach wi che ri Jehová ri tzʼaqatalaj ukʼaslemal che xuya che tojbʼal mak chke konojel ri winaq «che usachik ri makaj» (chasikʼij uwach Hebreos 9:12, 24-26). Ri ukʼaslemal ri Jesús che xuya umak kech ri winaq, más nim na ubʼanik rumal che kusachisaj ri kimak ri winaq. Kqetaʼmaj na che qonojel kojkunik kqaqʼijilaj ri Jehová pa ri templo espiritual, paneʼ pa ri kaj o cho ri uwach Ulew kojkʼasiʼ wi.

15. ¿E jachin kepatanin pa ri patio re ri tabernáculo?

¹⁵ Ri xa umuʼjal. Ri tabernáculo kʼo jun upatio: jamal uwach y tzʼapim rij jawiʼ kkibʼan wi ri kichak ri kojol tabʼal toqʼobʼ. Chuwach ri patio kʼo ri altar che bʼanom che cobre ri keporox wi ri tabʼal toqʼobʼ. Xuqujeʼ kʼo jun ukʼolbʼal jaʼ che bʼanom che cobre jawiʼ kkichʼaj wi kiqʼabʼ ri kojol tabʼal toqʼobʼ are chiʼ majaʼ kkimaj ubʼanik ri kichak (Éx. 30:17-20; 40:6-8). Y ri templos che kʼateʼ xebʼan chik xuqujeʼ kʼo kipatios ri kqʼijilax wi ri Jehová kumal ri e kojol tabʼal toqʼobʼ taj.

16. ¿E jachin taq kepatanin pa ri patios re ri templo espiritual?

¹⁶ Ri qastzij. Are chiʼ ri e chaʼom majaʼ keʼux kojol tabʼal toqʼobʼ rukʼ ri Jesús pa ri kaj, tajin kkipatanij ri Jehová rukʼ sukʼilal pa ri patio interior re ri templo espiritual. Ri ukʼolbʼal jaʼ che kʼo pa ri tabernáculo kunaʼtaj chke ri kebʼe pa ri kaj y chke konojel ri cristianos che rajawaxik e chʼajchʼoj pa ri kikojonik y pa ri kikʼaslemal.  ¿Jawchiʼ kqʼijilax wi ri Dios kumal ri «kʼiʼalaj winaq», che tajin ketobʼan kukʼ ri e chaʼom che kebʼe pa ri kaj? Ri apóstol Juan xrilo che «e takʼatoj chuwach ri tem re ajawibʼal» y che «kepatanij chi pa qʼij chi chaqʼabʼ» che ri Dios. Ri kʼiʼalaj winaq kkiqʼijilaj ri Dios cho ri uwach Ulew pa ri patio exterior re ri templo espiritual (Apoc. 7:9, 13-15). ¡Sibʼalaj utz che kʼo jun lugar jawiʼ kqaqʼijilaj wi ri Jehová pa ri templo espiritual!

17. ¿Jas tabʼal toqʼobʼ kojkunik kqaya che ri Jehová?

¹⁷ Qonojel ri oj cristianos yaʼom ri eqeleʼn chqe che kqaqʼijilaj ri Jehová. ¿Jas kqabʼan che ubʼanik? Are ukojik ri qatiempo, qachuqʼabʼ y ri qapwaq rech kqatoʼ uwiʼ ri uQʼatbʼal tzij ri Dios. Junam rukʼ ri xubʼij ri apóstol Pablo chke ri cristianos hebreos, kojkunik amaqʼel kojqʼijilan che ri Dios, kraj kubʼij, «kukʼ taq ri e qachiʼ» (Heb. 13:15). We kqabʼan wariʼ, tajin kqakʼutu che nim kqil wi ri eqeleʼn che yaʼom chqe che kojkunik kqaqʼijilaj ri Jehová.

18. Junam rukʼ ri kubʼij Hebreos 10:22-25, ¿jas rajawaxik kqaya ta kan ubʼanik? ¿Y jas rajawaxik ksach ta pa qajolom?

¹⁸ (Chasikʼij uwach Hebreos 10:22-25). Ri kʼisbʼal taq tzij che kubʼij ri carta che xutzʼibʼaj ri Pablo chke ri hebreos, kchʼaw chrij kʼi jastaq che kʼo ubʼanik rukʼ ri qʼijilanik che kqaya che ri Jehová y che rajawaxik kqachajij. Kchʼaw chrij che kqabʼan qachʼawem che ri Jehová, kqatzijoj ri utzij ri Dios chke nikʼaj chik, kojbʼe pa ri e riqbʼal ibʼ kukʼ ri qachalal y kqaya qachuqʼabʼ chbʼil taq qibʼ, «rumal rech chi [...] knaqajin ri qʼij re ri» Jehová. Pa ri kʼisbʼal taq capítulos re Apocalipsis, ri ángel rech ri Jehová kubʼij: «¡Chaqʼijilaj ri Dios!». Kamul xuya ubʼixik rech kuqʼalajisaj che nim ubʼanik (Apoc. 19:10; 22:9). Masach pa qajolom ronojel ri qetaʼmam chrij ri templo espiritual che nim ubʼanik y ri eqeleʼn che yaʼom chqe che kojkunik kqaqʼijilaj ri Jehová.