1. So jekh anđeo vaćeri hem so odova značini amenđe?

 AKO bi jekh anđeo vaćeri tuvaja, da li bi šuneja odova so isi le te phenel tuće? Jekh anđeo avdije vaćeri „svakona nacijaće, svakone plemese, svakona ćhibjaće hem svakone narodose“. So phenela lenđe? „Daran ando Devel [. . .] Pokloninen tumen e Stvoriteljese ando nebo hem andi phuv“ (Otkr. 14:6, 7). O Jehova tano o ćaćutno Devel hem amen sare valjani te služina lese. Kobor samo valjani te ova lese zahvalna so dinđa amen prilika te služina lese ko oleso duhovno hram!

2. Soj tano e Jehovaso duhovno hram? (Dikh o okvir „ So nane o duhovno hram.“)

² Soj tano o duhovno hram hem kaj šaj te arakha o detaljija kola objasninena le? O duhovno hram nane doslovno objekat. O duhovno hram predstavini sa odova so o Jehova prekali Isusesi žrtva ćerđa te šaj o manuša te služinen lese ko ispravno način. O apostol Pavle objasninđa pobuter akalestar ko lil kova ko prvo veko pisinđa e hrišćanenđe kola hine Jevreja, a kola živinđe ki Judeja. b

3-4. Sose o Pavle hine zabrinuto aso Jevreja hem sar pomožinđa lenđe?

³ Sose o Pavle pisinđa e hrišćanenđe kola živinđe ki Judeja? Verovatno ando duj važna razlogija. Sar prvo, te šaj te ohrabrini len. Angleder te oven hrišćanija, but olendar barilje ko judaizam. O jevrejska religiozna vođe šaj marđe lenđe muj odolese so ulje hrišćanija. Sose? Odolese so na hine len hram te služinen e Devlese, na hine len oltarija  te den žrtve niti hine len sveštenstvo. Odova šaj hine te obeshrabrini e Hristese učenikonen hem te slabonćeri olengi vera (Jevr. 2:1; 3:12, 14). Disave olendar šaj razmislinđe odolestar te irinen pe ki pi purani religija.

⁴ Sar dujto, o Pavle phenđa lenđe so na trudinena pe te haljon o neve ja o hor sikljoviba, i „zorali hrana“, koja tani ko Devleso Lafi (Jevr. 5:11-14). Izgleda so disave olendar pana ićerđe pe ko Mojsijeso zakon. O Pavle objasninđa lenđe so o životinjska žrtve našti potpuno te ciden o greh. Odolese odova Zakon više na važinđa. Sebepi odova, o Pavle sikavđa len o hor sikljoviba. Setinćerđa len ki „pošukar nada“ koja temeljini pe ki Isusesi žrtva koja ćaće šaj hine te pomožini len te oven paše e Devleja (Jevr. 7:18, 19).

5. So valjani te haljova andi knjiga Jevrejima hem sose?

⁵ O Pavle objasninđa e Jevrejenđe so o način sar akana služinena e Devlese tano but pošukar nego okova sar angleder služinđe lese. Okova sar angleder služinđe e Devlese hine samo „senka ando odova so avela, ama odova soj tano ćaće tano o Hrist“ (Kol. 2:17). Na primer, i senka koja dićhola ando disavo predmet tano samo o oblik ando predmet kova ćaće postojini. Isto ađahar, o način ko kova o Jevreja služinđe e Devlese angleder hine samo senka, sose o pošukar način tek valjanđa te avel. Amen valjani te haljova sa so o Jehova ćerđa te šaj amare grehija te oven oprostime hem te služina lese ko ispravno način. Hajde te uporedina i „senka“ (o način ko kova o Jevreja ko purano vreme služinđe e Jehovase) odoleja „soj tano ćaće“ (o način ko kova o hrišćanija služinena lese), sar soj tano objasnimo ki knjiga Jevrejima. Odova ka pomožini amenđe pošukar te haljova o duhovno hram hem sar tano povezimo amencar.

6. Sar koristinđa pe o sveto šatori?

⁶ Ko purano vreme. O Pavle pe objašnjenja temeljinđa ko sveto šatori kova hine ćerdo ko Mojsijeso vreme, ko 1512. berš angl. n. e (Dikh o okvir „Ko purano vreme – Palo Isus“). Đi hine ki  pustinja, o Izraelcija legarđe o sveto šatori kotar jekh than ko aver. On koristinđe le oko 500 berš, sa đi na ćerđa pe o hram ko Jerusalim (Izl. 25:8, 9; Br. 9:22). O sveto šatori hine than kuri o Izraelcija ćedinđe pe te služinen e Devlese hem te den žrtve (Izl. 29:43-46). Ama, o sveto šatori predstavinđa hem diso but pobaro so valjanđa te ovel.

7. Ked počminđa te postojini o duhovno hram?

⁷ Palo Isus. O sveto šatori kotar purano vreme hine „slika hem senka kotar odova soj tano ko nebo“ hem predstavinđa e Jehovaso duhovno hram. O Pavle phenđa so „odova šatori predstavini odova so postojini ko avdisutno vreme“ (Jevr. 8:5; 9:9). Ko vreme ked pisinđa lil e Jevrejenđe, o duhovno hram već postojinđa. Ov počminđa te postojini kotar 29. berš ki n. e. Ko odova berš, o Isus krstinđa pe, hine pomazimo sveto duhoja hem počminđa te služini sar Prvosvešteniko ko duhovno hram (Jevr. 4:14; Dela 10:37, 38). c

8-9. Premalo Jevrejima 7:23-27, koja bari razlika isi maškaro prvosveštenikija kola hine ko Izrael hem o Prvosvešteniko o Isus Hrist?

⁸ Ko purano vreme. O prvosvešteniko predstavinđa e narodo anglo Devel. Prvo manuš kova služinđa sar prvosvešteniko hine o Aron. O Jehova dinđa le odija odgovornost ked hine posvetimo o sveto šatori. Ama, sar so o Pavle objasninđa, „o meribe ćhinavđa e sveštenikonen trajno te aćhon ki odija služba“. d (Čitin Jevrejima 7:23-27.) Isto ađahar, odolese so hine nesavršena, on valjanđe te den žrtve aso pe grehija. Kotar akava dikhaja koja bari razlika hine maškaro izraelska prvosveštenikija hem o Prvosvešteniko, o Isus Hrist.

⁹ Palo Isus. Sar amaro Prvosvešteniko, o Isus Hrist tano „sluga ko [. . .] pravo šatori kova vazdinđa o Jehova, a na o manuš“ (Jevr. 8:1, 2). O Pavle objasninđa so o Isus „živini zauvek, olesi svešteničko služba niko na ka lel.“ O Pavle pana phenđa so ov tano „bizi mana, čisto, odvojimo ando grešnikija“ hem so „na valjani, sar okola avera sveštenikija svako dive te del žrtve“ aso pe grehija. Akana ka dikha koja razlika hine maškaro oltarija hem o žrtve ko purano vreme hem ko vreme palo Isus.

10. So predstavinđe o žrtve kola dinđe pe ko bakarno oltari?

¹⁰ Ko purano vreme. Angleder te khuvel pe ko sveto šatori hine jekh bakarno oltari ko kova dinđe pe o životinje sar žrtva e Jehovase (Izl. 27:1, 2; 40:29). Ama, odola žrtve našti hine potpuno te ućharen e manušenge grehija (Jevr. 10:1-4). Odova so uvek valjanđe te den žrtve ko sveto šatori mothovđa so valjani te del pe jekh žrtva koja potpuno ka oslobodini e manušen ando greh.

11. Ko kova oltari o Isus dinđa pes sar žrtva? (Jevrejima 10:5-7, 10)

¹¹ Palo Isus. O Isus đanđa so o Jehova bićhalđa le ki phuv te del po životi sar otkupnina aso sa o manuša (Mat. 20:28). Odolese, ked krstinđa pe, o Isus mothovđa e Jehovase so mangela te ćerel olesi volja (Jov. 6:38; Gal. 1:4). O  Isus dinđa pes sar žrtva ko simbolično oltari kova predstavinđa e Jehovasi volja. E Jehovasi volja hine oleso Ćhavo te žrtvujini po savršeno životi sar manuš. O Isus dinđa po životi sar žrtva „jekh puti hem zauvek“ te šaj te otkupini e manušen ando greh. (Čitin Jevrejima 10:5-7, 10.) Akana ka vaćera ando odova so predstavinđe o buća kola hine ko šatori.

12. Ko šaj hine te khuvel ki svako prostorija ko sveto šatori?

¹² Ko purano vreme. O sveto šatori hem o hram kova kasnije hine ćerdo ko Jerusalim, andre hine but slična. Andre hine duj prostorije. Jekh vićinđa pe „Svetinja“, a aver „Svetinja upro svetinje“. Odova so odvojinđa akala duj prostorije hine jekh zavesa (Jevr. 9:2-5; Izl. 26:31-33). Andre ki Svetinja hine jekh zlatno svećnjako, jekh oltari kaj tharela pe hine o kad hem jekh astali upro kova hine 12 mare. Samo o sveštenikija kola hine pomazime šaj hine te khuven ki Svetinja te šaj te ćeren pi buti (Br. 3:3, 7, 10). Ki Svetinja upro svetinje hine o kovčeg ando savez kova predstavinđa e Jehovasi prisutnost (Izl. 25:21, 22). Samo o prvosvešteniko šaj hine te đal pali zavesa hem te khuvel ki Svetinja upro svetinje hem odova jekh puti ko berš – ko Dive ando pomirenje (Lev. 16:2, 17). Svako berš, ov khuvđa e rateja ando životinje kola hine dinde sar  žrtva, te šaj te otkupini pe grehija hem e narodose grehija. Sar đelo o vreme, o Jehova prekalo po sveti duh mothovđa so predstavinđe akala buća ko sveto šatori (Jevr. 9:6-8). e

13. So predstavinđe i Svetinja hem i Svetinja upro svetinje?

¹³ Palo Isus. Jekh određeno broj ando Isusese učenikija tane pomazime sveto duhoja hem on tane ko jekh posebno odnos e Jehovaja. Akala 144 000 manuša ka služinen sar sveštenikija zajedno e Isuseja ko nebo (Otkr. 1:6; 14:1) I Svetinja ko sveto šatori predstavini odova so o pomazanikija tane usvojime sar e Devlese ćhave đi tane pana ki phuv (Rimlj. 8:15-17). I Svetinja upro svetinje predstavini o nebo, kuri tano o Jehova. I „zavesa“ koja odovojinđa i Svetinja hem i Svetinja upro svetinje predstavinđa e Isuseso fizičko telo. Sa đi hine le fizičko telo, ov našti hine te khuvel ko nebo sar Prvosvešteniko ko duhovno hram. Ked dinđa po telo sar žrtva e manušenđe, o Isus phravđa o drumo aso nebesko životi aso sa o pomazime hrišćanija. Sa đi isi len fizičko telo, on našti te dobinen pi nebesko nagrada (Jevr. 10:19, 20; 1. Kor. 15:50). Palo odova so o Isus hine uskrsnimo, ov khuvđa ki Svetinja upro svetinje, ko nebo, kuri sa o pomazanikija ka služinen oleja.

14. Premalo Jevrejima 9:12, 24-26, sose e Jehovaso duhovno hram tano but pošukar?

¹⁴ Akate jasno dikhaja so o način te služina e Jehovase ko oleso duhovno hram kova temeljini pe ki Isusesi žrtva hem ki olesi svešteničko služba tano but pošukar ando način sar o Izraelcija služinđe e Jehovase. Ko Izrael, o prvosvešteniko e rateja ando životinje khuvđa ki Svetinja upro svetinje koja ćerđa o manuš. Ama, o Isus khuvđa ko nebo, ko najsveto than, te pojavini pe anglo Jehova. Odothe o Isus predstavinđa i vrednost ando po savršeno životi kova dinđa sar žrtva amenđe te šaj te oslobodini amen ando greh. (Čitin Jevrejima 9:12, 24-26.) Sebepi e Isusesi žrtva, amare grehija šaj te oven oprostime. Sar so ka sikljova akana, savi god nada te ovel amen, sare amen šaj te služina e Jehovase ko oleso duhovno hram.

15. Ko služinđa ko dvorište ando sveto šatori?

¹⁵ Ko purano vreme. Ko sveto šatori hine jekh ogradimo dvorište kuri o sveštenikija šaj hine te ćeren pi buti. Ko odova dvorište, hine jekh baro bakarno oltari aso žrtve paljenice hem jekh umivaoniko ando bakar ko kova hine pani. Odole panjeja o sveštenikija šaj hine te thoven pe vasta hem pe pre angleder te ćeren pi sveto služba (Izl. 30:17-20; 40:6-8). O hram kova kasnije hine ćerdo, isto hine le jekh spoljašnjo dvorište kuri šaj hine te služinen e Jehovase okola kola na hine sveštenikija.

16. Ko služini ko unutrašnjo dvorište ko duhovno hram, a ko služini ko spoljašnjo?

¹⁶ Palo Isus. Angleder te đan ko nebo te služinen e Isuseja sar sveštenikija, o pomazanikija verno služinena e Jehovase ki phuv ko unutrašnjo dvorište ando duhovno hram. O baro umivaoniko e panjeja, kova hine ko sveto šatori hem kasnije ko hram, setinćeri e  pomazanikonen hem amen so valjani te aćhova moralno hem duhovno čista. Ama, kuri o „baro mnoštvo“, kova verno podupirini e Isusese phralen, služini e Jehovase? O apostol Jovan ki vizija dikhlja sar on „terdilje anglo presto [. . .] hem sar služinena [e Devlese] dive hem rat.“ O „baro mnoštvo“ odova ćerela akate ki phuv ko spoljašnjo dvorište ando duhovno hram (Otkr. 7:9, 13-15). Amen hijam but zahvalna e Jehovase so dinđa amen prilika te služina lese ko oleso duhovno hram.

17. Kola žrtve amen šaj te da e Jehovase?

¹⁷ Avdije, sare isi amen bari čast te služina e Jehovase ađahar so koristinaja amaro vreme, snaga hem materijalna buća te ćhiva o Kraljevstvo ko prvo than. Sar so o apostol Pavle phenđa e hrišćanenđe kola hine Jevreja, hem amen šaj „prekalo Isus uvek [te da] e Devlese i žrtva andi hvala, avere lafencar, o plod ando muj kova objavini oleso anav“ (Jevr. 13:15). Amen šaj te mothova so ceninaja i čast te služina e Jehovase ađahar so ka da lese amaro najšukar ki služba.

18. Premalo Jevrejima 10:22-25, kola buća valjani uvek te ćera hem kola na valjani niked te bistra?

¹⁸ Čitin Jevrejima 10:22-25. Ko krajo ando po lil e Jevrejenđe, o Pavle pisinđa hem ando buća kola valjani uvek te ćera đi služinaja e Devlese. Ov phenđa so valjani te molina amen, te propovedina, te đa ko sastankija hem te ohrabrina jekh jekhe „sa pobuter so dikhaja soj tano [e Jehovaso] dive popaše.“ Ko krajo ando izveštaj kotar Otkrivenje, e Jehovaso anđeo phenđa: „E Devlese klanin tut“ (Otkr. 19:10; 22:9). Akala lafija phenđa duj putija te šaj te naglasini kobor tano odova važno. Odolese, niked na valjani te bistra sa akala buća kola sikljiljam ando Jehovaso duhovno hram hem kobor bari čast isi amen te služina lese.