1. Mittu sokkaasinchi mayyee coyiˈranni no? Tini ma assineemmo gede assitannonke?

 SOKKAASINCHU coyishiishoommehero isi yaannohere macciishshatto? Xaa yannara sokkaasinchu ‘gosa, gaˈrenna addi addi afiinni coyiˈranno manna baala’ coyishiishanni no. Isi mayyaanni no? “Magano waajje; ayirrinyeno uuyyesi. Gordonna baatto . . . kalaqinoha magansidhe!” yaanni no. (Aju. 14:6, 7) Baalunku magansiˈra hasiissannohu halaalaancho Magano Yihowa callaati. Bayiru ayyaanaamittennihu qullaawu mini giddo iso magansiˈneemmo faro faninonke daafira Yihowa lowo geeshsha galanteemmosi!

2. Yihowahu ayyaanaamittennihu qullaawu mini maati? (“ Ayyaanaamittennihu Qullaawu Mini Maa Diˈˈikkino?” yitanno saaxine lai.)

² Ayyaanaamittennihu qullaawu mini maati? Konni mini daafira kulanno xawishsha afiˈra dandiineemmohu hiikkiinniiti? Ayyaanaamittennihu qullaawu mini illete leellannoha diˈˈikkino. Kuni Yihowa Yesuusite wodote kakkalo widoonni Iso hagiirsiisanno garinni magansiˈneemmo gede qixxeessino qixxaawooti. Soqqamaasinchu Phaawuloosi umi xibbi diro, Yihudaho heeˈrinohu Ibiraawootu Kiristaanira borreessino sokkara tenne qixxaawo daafira xawise kulino. b

3-4. Phaawuloosi Yihudaho heeˈrannohu Ibiraawootu Kiristaani daafira yaadinohu mayiraati? Isi insa kaaˈlinohu ma garinniiti?

³ Soqqamaasinchu Phaawuloosi Yihudaho heeˈrannohu Ibiraawootu Kiristaanira sokka borreessinohu mayiraati? Borreessinohu lamu korkaatinni ikkikkinni digatino. Umihunni insa jawaachishateeti. Insa giddo rooru Kiristaana ikkitara albaanni Ayihudete ammaˈno harunsitannoreeti. Insa Kiristaana ikkitino  daafira albiri ammaˈnote murrootinsa qacifattansara dandiitanno. Mayira? Korkaatuno Kiristaanaho magansiˈrate haˈrannohu hoola yinoonnihu qullaawu mini, Maganoho kakkalo shiqinshannihu kakkalote bayichinna kakkalaano ikkite soqqantannori dinonsa. Kuri coyibba Yesuusi rosaano hexxo mudhitanno gedenna ammanansa shoshshoggitanno gede assara dandaannoho. (Ibi. 2:1; 3:12, 14) Mitootu isinni albite Yihudu ammaˈnonsa widira higate heddinoha nafa ikkara dandaanno.

⁴ Layinkihunni, Phaawuloosi Ibiraawootu Kiristaani Maganu Qaali giddo noota “kaajjado sagale” itate yaano haaro woy hawa gede huwantannikkiha ayyaanaamittete roso huwatate sharraminokkita xawisino. (Ibi. 5:11-14) Mitootu isinni Muse Seera harunsa diagurtino. Ikkirono Phaawuloosi Muse Seeri garinni shiqinshanni kakkalo woˈmunni woˈma cubbu maaro afiˈnanni gede assitannokkita xawisino. Hakko daafira “albi hajajo . . . hoolloonni. Konnira Phaawuloosi insara hawa gede huwantannikkiha mito halaale rosiisinonsa. Isi ammanate roduuwisira Yesuusite wodote kakkalo widoonni addinta ‘Maganunniwa shiqate’ kaaˈlitannota “woyyitino hexxo” kulinonsa.—Ibi. 7:18, 19.

5. Ibiraawootu maxaafa huwatate maa assa hasiissannonke? Mayira?

⁵ Phaawuloosi Ibiraawootu Kiristaanira xa Yihowa magansidhanni noo gari alba Yihudu ammaˈno harunsitanno waro magansidhannohunni roorannoha ikkinota xawise kulinonsa. Muse Seeri garinni magansiˈnanni gari “albillitte daara noo coyira caalu gedeeti; halaalu leellannohu kayinni Kiristoosinniiti.” (Qol. 2:17) Caaleho yaa mittu coyi hincilaallooti ikkinnina hakkonne coye diˈˈikkino. Hatteente gede hundi waro Yihudu manni magansiˈranno garino albillitte daara noo coyira caaleho. Yihowa hagiirsiisanno garinni magansiˈra dandiineemmo gede, isi cubbinkera maaro afiˈneemmo gede qixxeessino qixxaawo huwata hasiissannonke. Hanni Ibiraawootu maxaafi giddo xawinsoonniha ‘caalenna’ (Yihudu manni magansiˈranno gara) ‘albillitte daara noo coye’ (Kiristaanu magansiˈranno gara) heewisiinse laˈno. Togo assanke ayyaanaamittennihu qullaawu mini daafira albinni roore huwanteemmo gedenna ninkeno konni mini wido ikkinoommohu ma garinniitiro afate kaaˈlitannonke.

6. Xaadooshshu dukkana horoonsiˈnoonnihu ma garinniiti?

⁶ Yihudu manni magansiˈranno gara. Phaawuloosi borreessinohu 1512 K.A. Muse seekkinoha  xaadooshshu dukkana kaima asseeti. (“Yihudu Manni Magansiˈranno Garanna Kiristaanu Magansiˈranno Gara” yitanno sanxarazhe lai.) Israeele bayichunni bayicho hadhanno woyite konne xaadooshshu dukkana adhite hadhanno. Insa konne dunkaana 500 diro meddi yitanno yanna yaano Yerusaalamete qullaawa mine minni yanna geeshsha horoonsidhanni keeshshitino. (Ful. 25:8, 9; Kir. 9:22) Kuni xaadooshshu dukkani Israeele Maganunniwa shiqate, kakkalo shiqishiˈratenna iso magansiˈrate gamba yitannoho mereerima bayichooti. (Ful. 29:43-46) Ikkirono xaadooshshu dukkani Kiristaanaho albillitte daannoha hakkiinni roorino coyeno riqiwannoho.

7. Ayyaanaamittennihu qullaawu mini xawe leellinohu mamooteeti?

⁷ Kiristaanu magansiˈranno gara. Hundihu xaadooshshu dukkani ‘gordoho noo coyira caaleho’ hattono Yihowahu bayiru ayyaanaamittennihu qullaawu mini lawishshaati. Phaawuloosi “kuni coyi [woy xaadooshshu dukkani] xaa yannara lawishshaho” yiino. (Ibi. 8:5; 9:9) Hakko daafira isi Ibiraawootu Kiristaanira tenne sokka borreessi yannara ayyaanaamittennihu qullaawu mini Kiristaanaho xawe leelle no. Kuni qullaawu mini xawe leella hanafinohu 29 M.D. Hakko diro Yesuusi cuuamino hattono qullaawu ayyaaninni buuramino; qoleno ayyaanaamittennihu qullaawu mini giddo “jawa Qeesootu Qara [kakkalaanote biilo]” ikke Yihowara soqqama hanafino. c—Ibi. 4:14; Soq. 10:37, 38.

8-9. Ibiraawoota 7:23-27 kultanno garinni Israeelete kakkalaanote biilo ikkite soqqantannorinna qaru Kakkalaanote Biili Yesuusi Kiristoosi mereero noo badooshshi maati?

⁸ Yihudu manni magansiˈranno gara. Kakkalaanote biilo ikkite soqqantannori manna riqibbe Maganu albaanni shiqate qoosso noonsa. Israeelennihu umihu kakkalaanote biili Aarooniiti; Yihowa iso shoominohu xaadooshshu dukkana maassiinsi woyiteeti. Ikkirono Phaawuloosi togo yee xawisino: “Reyanno daafira mittu qeesichi [kakkalaanchi] soorramikkinni loosisi aana hegere geeshsha heeˈra didandiino; kunnira albi qeesooti kiiro batinyeho.” d (Ibiraawoota 7:23-27 nabbawi.) Kakkalaanote biilo ikkite soqqantannori guuntete xeˈne noonsare ikkitino daafira, uminsa cubbi daafirano kakkalo shiqishiˈra hasiissannonsa. Israeelennihu kakkalaanote biilinna qaru Kakkalaanote Biili Yesuusi Kiristoosi mereero lowo badooshshi no.

⁹ Kiristaanu magansiˈranno gara. Kakkalaanote Biilonke ikkinohu Yesuusi Kiristoosi “gordoho halaalaanchu dukkanira” soqqamanni no. Konne dukkana qasinohu, Mooticha Maganoho ikkinnina dimannaho.” (Ibi. 8:1, 2) Phaawuloosi “Yesuusi kayinni hegerera heeˈrannoha ikkino daafira qeesimmasira gawalo dino” yiino. Phaawuloosi lede Yesuusi ‘minshe nookkiha cubbaataammuwiinni baxxinoha’ ikkinotanna Israeelenniri kakkalaanote biilo ikkite soqqantannori gede ‘umisi cubbira barru baala kakkalo shiqisha hasiissannosikkita’ coyiˈrino. Hanni xa Yihudu manninna Kiristaanu shiqishiˈranno kakkalonna kakkalote bayichi mereero noo badooshshe laˈno.

10. Camotenni loonsoonnihu kakkalote darga shiqqanno kakkalo maa leellishshanno?

¹⁰ Yihudu manni magansiˈranno gara. Xaadooshshu dukkana eˈnanniwa gobbaanni Yihowara saadate kakkalo shiqinshannihu camotenni seekkinoonnihu kakkalote bayichi no. (Ful. 27:1, 2; 40:29) Ikkirono hatti kakkalo mannu  woˈmunni woˈma cubbinsara maaro afiˈranno gede assa didandiitino. (Ibi. 10:1-4) Xaadooshshu dukkanira woˈmanka woyite shiqinshanniti saadate kakkalo mannu ooso woˈmunni woˈma cubbinsara maaro afidhanno gede assitanno kakkalora caaleho.

11. Yesuusi isonooto kakkalo asse shiqishinohu kakkalote bayichi maati? (Ibiraawoota 10:5-7, 10)

¹¹ Kiristaanu magansiˈranno gara. Yesuusi Yihowa iso uullara soyinohu heeshshosi mannu oosora kakkalo asse shiqishara ikkinota afino. (Mat. 20:28) Hakko daafira Yesuusi cuuami yannara Yihowa hasiˈrannore assate isonooto shiqishino. (Yoh. 6:38; Gal. 1:4) Yesuusi lawishshunnihu kakkalote bayicho isonooto kakkalo asse shiqishino; kuni kakkalote bayichi Maganu guuta Beettosi mannu oosora kakkalo asse shiqishate maahoyye yaasi leellishannoho. Yesuusi ‘lendannikkita mitte kakkalo’ shiqishe Kiristoosa ammantannota loosunni leellishshannori baalu cubbinsara hegere maaro afidhanno faro fanino. (Ibiraawoota 10:5-7, 10 nabbawi.) Hanni aanchine xaadooshshu dukkani giddo noo coyi daafira laˈno.

12. Xaadooshshu dukkani giddo nooha mitto mittonka bayicho ea dandaannohu ayeti?

¹² Yihudu manni magansiˈranno gara. Xaadooshshu dukkaninna gedensoonni Yerusaalamete minnoonnihu qullaawu mini mittu gariho. Lamunku mini giddo dukkanu hoccinni bandoonnihu ‘Qullaawu Darginna Qullaawu Holgi’ no. (Ibi. 9:2-5; Ful. 26:31-33) Qullaawa Bayicho caabbicho worrannihu culkunni seekkinoonni uduunnichi, hixaana wiliishshinannihu  kakkalote bayichinna tima worranni xarapheessi no. Konne darga eˈe qullaawa loosonsa loossanno gede fajjinoonniri ‘qeesimmate [kakkalote] soqqanshora bande buurroonnire’ callaati. (Kir. 3:3, 7, 10) Qullaawa Holge Yihowa hakko noota leellishannohu culkunni seekkinoonnihu gondooru taawooti no. (Ful. 25:21, 22) Hakkira Cubbo Agursiisate Barra dirunni mitte hige kakkalaanote biili calla eanno gede fajjinanni. (Lew. 16:2, 17) Isi diru kiiro umisi cubbonna Israeelete cubbo agursiisate saadate mundee haaˈre hakkiira eanno. Yihowa gedensoonni qullaawu ayyaanisinni kuni xaadooshshu dukkani maa leellishannoro bande anfanni gede assino.—Ibi. 9:6-8.

13. Xaadooshshu dukkani giddo noohu qullaawu bayichinna qullaawu holgi Kiristaanaho maa riqiwanno?

¹³ Kiristaanu Magansiˈranno gara. Kiristoosi rosaano giddonni boodu manni qullaawu ayyaaninni buuramanno; insara Yihowa ledo baxxino jaaloomi heeˈrannonsa. Kuni 144,000 manni iima Yesuusi ledo kakkalaano ikke soqqamanno. (Aju. 1:6; 14:1) Xaadooshshu dukkanihu Qullaawu Bayichi insa Maganu ooso ikkite uullate aana heedhino gara riqiwanno. (Rom. 8:15-17) Xaadooshshu dukkanihu Qullaawu Holgi Yihowa heeˈrannoha iima riqiwanno. Xaadooshshu dukkanira nooha qullaawa bayichonna qullaawa holge badannohu ‘dakkanu hocci’ Yesuusi uullate aana maalunni heeˈrino heeshsho riqiwanno; Yesuusi konni maalinni heeˈre qara Kakkalaanote Biilo ikke ayyaanaamittennihu qullaawu minira ea yaano iimira haˈra didandaanno. Yesuusi manna ikke heeˈrino heeshshosi mannu oosora kakkalo asse buuramino Kiristaani baalu iimira haˈranno faro fanino. Insa iimi baˈraaˈra adhate maalunni heedhanno heeshshonsa agura hasiissannonsa. (Ibi. 10:19, 20; 1 Qor. 15:50) Yesuusi reyotenni kaihu gedensaanni ayyaanaamittennihu Qullaawa Holge eino; gedensoonni buuramino Kiristaani baaluno hakkiira eanno.

14. Ibiraawoota 9:12, 24-26 kultanno garinni Yihowa qixxeessinoti ayyaanaamittennihu qullaawu mini qixxaawo baalanta roortannohu ma garinniiti?

¹⁴ Tini, Yihowa Yesuusite wodote kakkalonna Yesuusi kakkalaanote biilo ikke soqqamanno gede asse qixxeessinoti xalala magansiˈra qixxaawo baalantenni roortinota ikkitinota leellishshanno. Israeelenniri kakkalaanote biilo ikkite soqqantannori saadate mundee haadhe eˈannohu Qullaawu Holgi mannu loosinoho; Yesuusi kayinni Yihowa albaanni leellara baalunkunni roore qullaawa ikkino bayicho “gordo eino.” Isi hakkiicho manna ikke heeˈrinota guuta heeshshosi waaga Maganu albaanni shiqishino; tenne assinohu “cubbo hunate isonoo kakkalo asse” shiqisheeti. (Ibiraawoota 9:12, 24-26 nabbawi.) Yesuusi kakkalo cubbo woˈmunni woˈma huntannote taalle nookki kakkalooti. Kowiinni aanchine laˈneemmonte gede hexxonke iimira haˈra woy uullate aana heeˈrano ikkituro, ninke baalunku ayyaanaamittennihu qullaawu mini giddo Yihowa magansiˈra dandiineemmo.

15. Xaadooshshu dukkani hoowe giddo soqqantannori ayeooti?

¹⁵ Yihudu manni magansiˈranno gara. Xaadooshshu dukkaniwa kakkalaano loosonsa loossannohu huxxinoonnihu halaˈladu bayichi no. Camotenni loonsoonnihu jawu kakkalote bayichi noohu hakko hoowete giddoonniiti; qoleno hakkiicho kakkalaano qullaawa loosonsa loossara albaanni hayishshidhannohu camotenni loonsoonnihu waa worroonni uduunnichi no. (Ful. 30:17-20; 40:6-8) Gedensoonni minnoonnihu qullaawu minira kayinni kakkalaano ikkinokki manni uurre Magano magasiˈrannoti gobbayidi hoowe no.

16. Mitte mittente ayyaanaamittennihu qullaawu mini hoowe giddo soqqantannori ayeooti?

¹⁶ Kiristaanu magansiˈranno gara. Uullate aana gattinori Yesuusi roduuwi iima hadhe  isi ledo kakkalaano ikkite soqqantara albaanni uullate aana noohu ayyaanaamittennihu qullaawu minite giddoyidi hoowera ammanante soqqantanno. Xaadooshshu dukkanira jawu uduunnichira worroonni wayi baalunku Kiristaani amanyootunninna ayyaanaamittetenni xuru nookkire ikke heeˈra hasiissannonsata leellishanno. Ikkina buurantinore Yesuusi roduuwa ammanante kaaˈlitannori “lowo manni” [“lowo daga”] magansidhannohu hiikkootiyya? Soqqamaasinchu Yohaannisi insa ‘ayirradu barcimira albaanni uurrite’ noore laino. Kuni bayichi uullayidita gobbayidi hoowe leellishannoho; insa hakkiicho “hashshanna barra qullaambesi mine [Maganoho] soqqantanno.” (Aju. 7:9, 13-15) Yihowahu bayiru ayyaanaamittennihu qullaawu mini giddo isira soqqamate qoosso afiˈra ninkera lowo ayirrinyeeti!

17. Yihowara hiittee kakkalo shiqishiˈrate qoosso noonke?

¹⁷ Xaa yannara baalunku Kiristaanira yannansa, wolqansanna woxensa horoonsiˈre Maganu Mangiste balaxisiise Yihowara kakkalo shiqishiˈrate qoosso noonsa. Soqqamaasinchu Phaawuloosi Ibiraawootu Kiristaanira kulinonte gede ninkeno “woˈma woyite galatu kakkalo Maganoho shiqinsho. Tini kakkalo suumenkenni, ‘Isi Mootichankeeti’ yine uyineemmote.” (Ibi. 13:15) Yihowara kakkalo shiqishiˈrate dandiinummore baala assine iso magansiˈrate qoossonke naandeemmota leellisha dandiineemmo.

18. Ibiraawoota 10:22-25 kultanno garinni horo deanna hawa hasiissannonkekki coyi maati?

¹⁸ Ibiraawoota 10:22-25 nabbawi. Soqqamaasinchu Phaawuloosi Ibiraawootu Kiristaanira borreessino sokka jeefora Yihowa magansiˈrate assineemmoha dea hasiissannonkekkiha duucha coye kulino. Kuri giddo gamu huuccatto assiˈrate, hexxonke daafira wolootaho kulate, gambooshshe haˈratenna ‘Yihowa barri gamba yiinota qaanganni mimmitonke albinni roore jawaachishate.’ Yihowa sokkaasinchi Ajuujate maxaafi jeefora Yihowa magansiˈra hasiissannota luphi asse kulanni “Maganoho kumbuuli!” yiino. (Aju. 19:10; 22:9) Yihowahu bayiru ayyaanaamittennihu qullaawu mini daafira ronsoommo halaalenna bayira Maganonke Yihowa magansiˈrate afiˈnoommo qoossonke dea dihasiissannonke!